Isai9
1Nachenganchepaw kawmkrat hai taprüa tanguk dawng kowi uowi khowk miuüa dow kawmkrat hai taprüa tanguk hown nauowi kown nadowi. Achük alai khe dow Zebulun hai Naptali süng mih asung uowi dowi iawng CHAKRAMANG changah chowdiah. Nachenganchepaw pur prakowi dow sata pang kowi kowh tiama iawng panow Jawrdan aw satlawt pra kowh süng mowr Jenteluüa kowh Galili süng kowi ringkawra uowima aia nachangah kown.2Aiiu kowi uowi miuüa dow nowi kraingma nakhi kown,iiu chamang iiu mih pren kowi uowi miuüa luk kowi nami nowi dow nasawt kown.3Israel chenchap kowi dow en nape prungah hanow awmrawmra ahuma en napeah kown;kua luprak khe kowh maru awmrawm iawng amatni dow en pur kowi naawmrawm kown,now tasen awng khe kowh kala mih uanh taret khe maru piaw iawng amatni dow napiaw kown.4Amatni kowi changah nowng mih chenchapuüa kowi dow en napiakah kown;amatni kowi dow Midian siphaiuüa kowi en piakah iawng en napiakah kown.Amatni luk kowi kowh laithawn tim iawng mih kurdik dow en naklata pe bowt kown,now amatni kowi kowh bawpla mih müa dow en naklowkta pe bowt kown.5Tasen mih siphaiuüa kowh phanaikhawk dow en natowkta pe bowk kown,now vi taplik nak mih tawnguat maten paw maih kowi en natikta pe bowk kown.6Tawngplawng kowchow panow a-i vüi chah nauang dia lowk ia kown,a-i vüi nape a-i kachakuüa chah lowk ia kown.Aia pangkawt kowi dow pren kruitown mih kurdik natang pe kown,aia kowh ming dow, “Awdara uowima mih Prengia pek mih, Akürma mih Thurai,Achowngma Pa hai Takingra Mang,” napape kown.7Aia nakruitownah kown mih pren dow naphia ngamlam kown,now aia nathawpah kown mih takingra tasangra dow nachur kown nadowi.Aia dow David kowh mang chowm rah hownia nakruitown pren kown;aia dow chowngchowng saksakma vüi anowmma nakruitown pren kown.Nami lup dow mukuang siphaiuüa kowh CHAKRAMANG mih süngürma hown nachangah kown.8Jakawb kowi naripah kown mih satang CHAKRAMANG uang krawi phowng khai;nami ripra dow Israeluüa luk kowi nauang ting kown.9Israel hai Samari kowi kowh uowi mih maten nami ripra dow natuk kown.Nachenganchepaw amatni dow bawrima hai owrowma hown natek kown mih,10“Thawpla kim mih ipbawn takuakla pan towbowt.Nachenganchepaw aiungma mih hua hown a-i naplan thawpah iawk kown.Uidut singh maten ransu-uüa kripta bowk khowk.Nachenganchepaw nami takcha sidar singh aiungma mih a-i naplan chowk pe kown,” napa kown.11Nachenganchepaw amatni kowi nauang senah kownkowCHAKRAMANG mih Asuria pren mang Rezin kowh ransu-uüa kowi nadua pe kunma kown.12Satlawt hownia Siriauüa hai satkup hownia Filistinuüa mih Israeluüa kowi naiawnah kown.Naiawng khowt phaw khowk chepaw CHAKRAMANG kowh kunmaraura mih naprowng kown nadowi tak;aia kowh rut mih Israeluüa luk kowi aia natangta hüah tak kown.13Aia maru-uüa dow Thurai ripah khowk chepaw aia tut-e uang plan dowi chekhai,mukuang siphaiuüa kowh CHAKRAMANG naukrang iawng mang büah dowi chekhai.14Naiawng rakowi Israel kowh lu hai mai mih natadung kown;nami dow pani sang CHAKRAMANG nadungta pe kown.15Nami lu dow lawngtang aluchowuüa hai ringkawra uowima miuüa chekhai,now mai dow krawi dai maru mih risiuüa chekhai.16Mami chenchapuüa kowi kowh tüngsang miuüa dow amatni kowi tiama tawi kowi cham pawla khai,now amatni kung kowi tawi krawi miuüa dow tawng pra chow amatni cham mang mih tuk büah dowi chekhai.17Naiawng rakowi CHAKRAMANG dow Israel klanguüa hawmh luk kowi sak-ih dowi chekhai,now saratchow hai mamaimowuüa kowi paw aia dow sanaah dowi chekhai.Tawngplawng kowchow panow amatni dow angakma kangowh chekhai,now sangbua lai tek büah khai.Naiawng khowt phaw khowk chepaw CHAKRAMANG kowh kunmaraura mih naprowng kown nadowi tak;aia kowh rut mih Israeluüa luk kowi aia natangta hüah tak kown.18Maru-uüa kowh angak dow chuh mung hai chuh singh kowi kamta bowk mih maih iawng chekhai.Nami maih dow kaurawng maten kamla now maikhük pün lawmlawm chekhai.19Mukuang siphaiuüa kowh CHAKRAMANG kunmarau lai rakowi paprenma kowi kowh maru-uüa kowi maih iawng nakamah kown.Nami khin khe maru-uüa mih kowmatia tainau kowi khowm nasana kown nadowi.20Amatni dow amatni hawmlawm pra kowh uowi mih maten nakrawi chata kown.Nachenganchepaw amatni kowh sakkrai mih narim kown nadowi.Now amatni lakuai pra kowh uowi mih maten nakrawi plan cha iawk kown.Nachenganchepaw amatni kowh sakkrai mih narim kown nadowi.Achur khe dow amatni chowlowkkow kowh chauüa nga nacha büah kown.21Manase hai Efraim maru-uüa dow lowkkowlowk natasen kown,now amatni dow takrüpah hanow Juda kowi nakingküaah kown.Naiawng khowt phaw khowk chepaw CHAKRAMANG kowh kunmaraura mih naprowng kown nadowi tak,aia kowh rut mih Israeluüa luk kowi aia natangta hüah tak kown.
The Seed Company