Isai8
1CHAKRAMANG tek ang mih, “Charam aphiama mih cham paw lowk diah. Now nami charam kowi, ‘Maher-Salal-Has-Baz,’ pahai aiukma ruiah diah,” pakhai. (Maher-Salal-Has-Baz pami dow “Sakkrowngma rupah now alenma khünta mih” pami chekhai).2Now naiawng ang chang khe kaah sakowmma mih Jeberekia kowh chapa Zekaria hai uamow Uria iüah kowi ang towla saksi khai.3Akung kowi ang masi hown ang taphua taiua hanow ang masi mih kum nau khai, now pen chapa lowk ia khai. Nakhowk khe CHAKRAMANG tek ang mih, “Nami chah kowi, ‘Maher-Salal-Has-Baz,’ pahai rük pe ming diah.4Tawngplawng kowchow panow nami chah mih, ‘A-u, a-pa,’ pami tuk tek dowi rawn Damaska hai Samari kowi Asuria mang nauang senah hanow napawla pe dawngthawnguan bowk kown,” pakhai.5Now CHAKRAMANG plan tek ang mih,6“Maiawngün maru-uüa dow Silo kowi kowh aklamchow tui hawr dowilowi mih iawng ang khetah mih nau dowi chekhai. Nami lak-e amatni dow Rezin hai Remalia kowh chapa Peka iüah hown awmrawmma uowi büah khai.7Naiawng rakowi amatni kowi nauang senah kownkow Asuria mang kowh akürma mih siphaiuüa kowi ang nauang pawla pe kown. Asuria siphaiuüa dow Iufratis aw kowi tui lawt khe kowh awchawng awlang kowi tui süng krawi tachua mih iawng nauang krawi tachua kown.8Naiawngün siphaiuüa dow tui lawt khe kowh ngawng mowr tui pün mih iawng Juda pren kowi nahu kown. Aw Immanuel, en kowh pren dow Asuria mang kowh lap hown natamum klum kown.9“Chenchapuüa low, kram hown arasang taiua uowi büa diah. Alakma kowi kowh prenchakuüa low, sünta büah. Nadowk tasen kownkow kamrüt büa diah. Nachenganchepaw enni napiak kown.10Takua büah hanow thawp sangkrangra büa diah. Nachenganchepaw enni sangkrangta iawng naphaw kown nadowi. Tawngplawng kowchow panow anging tut-e Thurai uowi reng chekhai,” pakhai.11CHAKRAMANG mih aia kowh rut akürma mih ang luk kowi tangah hanow Juda kowi kowh akeng miuüa iawng natawi uowi dowi kownkow tek ang napnap khai. Aia tek ang mih,12“Maiawngün maru-uüa tek pe sangkrangra ngak mih kowi en dow sangkrangra ngak pahai hang tawi tek diah. En dow amatni kramah mih chap kowi hang tawi kram diah.13Mukuang siphaiuüa kowh CHAKRAMANG dow chimsaima pami chünah diah. Aia kowi phai kramah diah, now aia kowi chowtaih kramra uowima pami tuakah diah.14Nahanow aia dow en kowh chimsaima mih tatung tanimra nachowng kown. Nachenganchepaw Juda hai Israel vüi dow tatui müa hua iawng naown kown. Aia dow Jerusalem maru-uüa vüi leng hai powk iawng naown kown.15Amatni pungmadawng kowi tawngbak mih dow natatheu ne kown, now nanowng rü kown nadowi bowt. Amatni dow leng kowi kowh cham tasowk mih iawng nacham takhuowk ne kown,” pakhai.16Mami Thurai laiklow arui uowi mih charam tua mingkhetah kaneu diah, now ang kowh tapeuüa kowi peah diah.17Jakawb krungchakuüa kowi cham dangta pe lumowr mih CHAKRAMANG kowi ang nachawng tak; aia luk kowi ang naneplawng nesak tak.18Mow, ang hai CHAKRAMANG pe ang mih chauüa hown mami re-e anging uowi khai. Anging kowi dow Israeluüa vüi masing laiklow iawng Zaiawn hungh kowi kowh uowi mih siphaiuüa kowh CHAKRAMANG uang chin anging mih chekhai.19Kowng miuüa hai lümla ngakuüa hown taklawp taiua hai klawk bürlür taklowp taklang miuüa tut-e maru cham chin enni khe Thurai tut-e nadowi bow enni nakowkowi kown takla? Sing miuüa pache tawngplawng kowchow kowng miuüa tut-e napaw prengia kown?20Thurai kowh rirow hai ana pek tuk mih tut-e enni nakowkowi kown takla. Amatni che Thurai laiklow powm iawng tek lai dowi hanow amatni tut-e anowi uowi dowi pami enni natukah kown takla.21Amatni dow tui sakkrai hawm sakkrai hai akawm akratma hown pren kowi nakrawi lenla pang kown. Hawm sakkrai bowm lai bowt rakowi amatni dow mukuang prakowi awr tau hanow amatni kowh mang hai amatni kowh Thurai kowi napeah piati kown. Nami kung kowi dow amatni mih lusa kowi kawmkrat hai aiiu hown ngarera kangowh chowtaih nakhi kown. Amatni kowi dow iiu chamang iiu mih rah kowi nakuakah kown.
The Seed Company