Isai59
1Sünta, CHAKRAMANG kowh bawng dow atownchow nadowi.Naiawng rakowi aia nowng lawng enni dowi tham pami hangkow tuak diah.Aia kowh param paw apangma nadowi.Naiawng rakowi enni kowh hawk klow aia ta dowi tham pami hangkow tuak diah.2CHAKRAMANG hownia langta enni mih dow enni kowh angak chowtaih;aia cham dangta enni mih dow enni chang lup ngak rakowi chekhai,now enni kowh hawk klow aia sünta dowi mih dow enni kowh angak rakowi chekhai.3Enni kowh rut dow vi hown tasür talawk khai bowt,enni kowh rutprüm dow angak hown tasür talawk khai bowt.Enni kowh nawr dow tek dai lai khai,now enni kowh dai dow tek lai ngak khai.4Tara chetra kowi anowmma miapaw chet tara dowi chekhai,enni dow dai lai hown tara chetra kowi naawng kown mih owmsak khai.Enni dow nachang ngak kown mih lainowmma enni sangkrang khai,now akung kowi dow enni krawi chang angak reng chekhai.5Akru uowima mih rua dui dow chata now maru kowng reng,enni kowh sangkrangra ngak dow nami rua dui iawng chekhai.6Lingleng bai iawng mih tawnguat hown dow buk ia taphum dowi,nami powm iawng enni kowh angak dow enni ia pet dowi chekhai.Enni kowh lup la maten dow angak kangowh chekhai.7Enni kowh klowng dow angak prakowi iowm reng,enni dow angak uowi dowi mih maru kowi krawi sai kownkow iowm reng.Enni kowh tuak dow angak kangowh chekhai,now enni kowh tiama kowi dow piakra kangowh chekhai.8Enni dow thaulangra tiama tuk dowi bowt,enni tut-e dow mapaw tara nowm uowi dowi chekhai.Enni dow enni matia kowh tiama kuikekma changah khai,nami tiama kowi mang miuüa dow thaulangra pami tuk dowi chekhai.9Naiawng rakowi a-i tut-e tara nowm uowi dowi chekhai,now anowmma nauowi kown mih a-i tuk dowi bowt chekhai.A-i krawi cham anowi chowdiah.Tawkche aiiu chowtaih a-i ka.Ka anowi kown a-i nau chowdiah.Tawkche aiiu kowi chowtaih a-i mang.10Mik duma mih maru iawng kimbang kowi tadowkla se a-i mang khai,mik uowi dowi mih maru iawng tiama kowi a-i sowp raprap khai.Uariiu khe kowh iawng sat downg khe a-i tatheu khai,a-i dow sing uowi miuüa pungmadawng kowi akowngma mih iawng chekhai.11A-i bowkbowk chak sakkrai mih putawm huk hak iawng a-i paw tüng klow khai,now sak kowi rau kowh nguk rünrün mih uatur iawng a-i nguk khai.Naka tara chetra nowm kown a-i nau.Tawkche a-i ka dowi chekhai.Naka lawngra kown a-i nau.Tawkche nami dow a-i hown alakma chekhai.12Tawngplawng kowchow panow Aw CHAKRAMANG, en mik kowi anging kowh angak ahuma chekhai,anging kowh angak mih kingküala anging mih saksi thuak anging khai.Anging kowh angak dow anging hown tawi uowi reng,now anging kowh atawi ama mih anging tuk chekhai.13Anging kingküa en hai tadata en khai,now anging kowh Thurai hownia alakma kowi anging cham süt khai.Nami klen kowi anging krawi chang nowng hai krawi chang ngak khai,now krawi dai maru kown tuakah now krawi tek dai lai khai.14Naiawng rakowi tara chetra kowi ka tara nowm dowi bowt,now tachi tanawmra dow alakma kowi lang uowi khai bowt.Anowm dow tiama towng kowi tatheu khai bowt,tachi tanawmra mih tara chetra kowi nowng kup dowi bowt chekhai.15Anowm kowi mih tawng kowi paw krawi ka dowi bowt,now towta lup ngak mih maru dow nowng changra kowi uowi reng chekhai.Naiawngün maten dow CHAKRAMANG khi chekhai,now tara nowm uowi dowi rakowi aia dow sak-ih dowi chekhai.16Aia dow tara nowm chet mih miapaw uowi dowi mih khita now awda khai;naiawng rakowi aia kowh akürma mih rut hown aia chang lawngra lup khai,now nami lup dow nanowng churla kownkow aia kowh tachi tanawmra mih tawi khowngah khai.17Anowm dow aia kowh kow taka müa lawngha kowrmow chekhai,lawngra dow aia kowh lu taka müa lawngha lukruk chekhai.Aia dow napaw lu klai kown mih tawnguat khupah khai,now aia kowh süngürra dow uanchow iawng aia khupah khai.18Maru changah mih srui aia dow naplanta pe kown;aia kowh ransu-uüa luk kowi aia kowh kunmaraura aia nakhük pe kown,now aia kowh ransu-uüa kowi amatni kowh lup ngak sung aia naripah kown.Pren lakma kowi kowh maru-uüa kowi khowm amatni kowh kakbak aia napeah kown.19Satkup pra kowh maru-uüa dow CHAKRAMANG kowi ringkawma hown nakramah kown,satlawt pra kowh maru-uüa dow aia kowh kraingra khi hanow ringkawma hown nakram kown.Tawngplawng kowchow panow aia dow tuikling mangma hai liku iawng nauang kown chekhai.20CHAKRAMANG tek mih, “Angak hownia tarip miuüa vüiZaiawn kowi lawng miia nauang kown.21Amatni vüi ang kowh sangbowk laitawm dow maiawng:Enni luk kowi kowh uowi mih ang kowh lümla haienni nawr kowi kowh ang towah mih ang kowh laiklow dow napowt kown nadowi;nami dow enni hai enni kowh chauüa hown enni kowh chuprek chaprekuüa nawr hownia napowt kown nadowi,now nami dow kawmat hownia chowngchowng saksakma pat nauowi kown,Ang CHAKRAMANG mami laiklow ang tek khowk,” pakhai.
The Seed Company