Isai58
1CHAKRAMANG tek mih, “Kür uowi srui atünma hek büa diah.Israeluüa kowi amatni kowh angak lawnguan kowtek pe büa diah.2Amatni dow ni towng ang nau iawng uowi mih iow chang khai,now ang kowh tiama natuk kown süngürma mih iawng chang aiow khai.Amatni dow chang lup nowm mih chenchapuüa iow chang khai,now amatni kowh Thurai ana pek nuata dowi mih iawng chang aiow khai.Amatni dow tara nowm lawnguan tuk kown naumow mih iow chang khai,now Thurai tut-e nauang kown naumow mih iawng chang aiow khai.3Amatni dow tek mih, ‘Anging khang hawm khowk manow,nachepaw tawngplawng kowchow en mü anging dowi?En pur kowi anging khamsum khamdaw khowk chepaw tawngplawng en pe ching dowi?’ pakhai.Nachenganchepaw sünta, enni khang hawm mih dow enni matia sak-ih müa chowtaih enni chang,now enni kowh lup chang miuüa maten kowi dow enni changah nowng khai.4Enni khang hawm khowk chepaw enni takhowk taran reng tak,now lowkkowlowk tathawng hanow enni tape ngarau reng tak chekhai.Naiawng che enni khang hawm hanowenni kowh laiklow ang nasünta enni kown pabow?5Naiawng bow nakhang hawm kown mih ang tek enni?Enni kowh hawm khang dow kowmatia tatowk kawm mih chowtaih.Mum tulu se enni krawi mang khai,enni khup sala uan hanow namawkla kownkow enni krawi uet dinchow khai.Enni tek pe hawm khang mih dow naiawng mih kowi bow?CHAKRAMANG hownia nakala sanara kown mih naiawng mih hown bow?6“Ang nauah mih hawm khang dow aprek uowi dowi matchang enni towah thawng miuüa kowi enni lawtta mih chekhai,now maru-uüa kowi enni tawmla mih leng enni latta pe mih chekhai.7Nami klen kowi hawm sakkrai miuüa kowi enni kowh chakkham enni retla pe mih,ngarawng ngarai miuüa kowi enni matia kim kowi enni pe tanaiah mih chekhai.Nami klen kowi tengiow tengklaima miuüa kowi enni kowh tawnguat enni khup pe mih,now akhowng takla mih tasin taken miuüa kowi tapetta pe dowi mih chekhai.Hawm khang ching dow naiawng chang mih chekhai.8Naiawng enni chang hanow enni kowh anowi mih uarthowi iawng natatüng kown,now arau hownia alenma enni naiung kown.Enni kowh tachi tanawmra mih nakruitownla enni kown,now ang kowh kraingra mih enni kung prakowi natowkala enni kown.9Nakhowk khe dow enni uang lü uang leng hanow ang naklang enni kown;naka khowng kownkow enni uang haw ang khe,‘Mami re-e chaw ang,’ ang napa enni kown.Enni che enni hownia nowng changra, prawng renra hai iung dowi mih lai tek enni kuakta khai,10now hawm sakkrai miuüa kowi sana kowh enni peah chakkham khai hanowiiu dawng kowi paw enni kowh anowi mih nakrawi sawt kown,now enni riaret kowi kowh aiiuma mih dawng kowi paw sat downg khe kowh nowi iawng enni tut-e nanowi kown.11Ang CHAKRAMANG ngengche atungma nakruitown enni kown;akang khawngma mih pren kowi enni lakke mih ang nape enni kown,now enni kowh buk kowi ang nape enni kür kown.Enni mih klangiungma ka tui reng mih bakan iawng naphaw kown,now katpaw kang dowi mih krawng dawng tui iawng enni nachowng kown.12Enni kowh maru-uüa mih alai kowh piak mih rah maten nakrawi raw kown,achük alai kowh phükta mih chüng kowi enni nakrawi thawp kim iawk kown.Enni kowi dow tap rawk mih hai tiama rawk mih pahai maru natek enni kown.13“Tanai Ni sunah büa diah;nami ni dow enni nau iawng hangkow sunah büa diah.Apiawma hown Tanai ni mih sunah büa diah,now Thurai kowh chimsaima mih ni pahai ringkawah büa diah.14Naiawng che enni chang hanow ang hown apiawma enni nauowi reng kown;palusama kowi ringkawra uowima ang nathawp enni kown,now enni kowh pa Jakawb kowh pren paw ang nape enni kown.Ang CHAKRAMANG mami laiklow ang tek khowk,” pakhai.
The Seed Company