Isai60
1CHAKRAMANG tek mih, “Aw Jerusalem, nowi bowt;tawngplawng kowchow panow en kowh anowi uang ting khowk.CHAKRAMANG kowh kri kraingra pe en nowi khowk chekhai.2Mü madiah, lusa dow aiiu hown tamum klum khai bowt;nachenganchepaw en luk kowi dow CHAKRAMANG nape en anowi kown,now aia kowh kraingra mih en luk kowi nauang tatüng kown.3Chenchapuüa mih en kowh anowi kowi nauang kown,manguüa mih en kowh rau-e kowh nowi kowi nauang kown.4“En riaret kowi krawi tang mü madiah,maru kawmuüa mih en tut-e uang takua talawm khai bowt.En kowh chapauüa dow pren lakma hownia uang plan khai bowt,now en kowh chamauüa kowi dow paila se maru uang pawla khai bowt.5Nami khita hanow lainowmma en napiaw kown,en piaw lai bowt kowh en kowh kow mih nachür prang kown.Sata kowi kowh dawngthawnguan en tut-e maru nauang pawla en kown,chenchapuüa kowh dawngthawnguan en tut-e nauang ting kown.6“Kun chang miuüa kowh ut hawmh mih en pren kowi atekma nauowi kown,naiawngün ut hawmh dow Midian hai Efa süng hownia nauang kown.Kun chang miuüa dow Seba pren hownia kowh kuh nauang pawla en kown,now nam iungma mih maikhük towk müa than paw nauang pawla en kown.Nami klen kowi CHAKRAMANG kowi nauang tawi rowsi büah kown.7Kedar hai Nebaiawt süng hownia nauang pawla en ruapur hawmh kown,naiawngün ruapur dow ang kowh phuchuara kowi ang nahawt paw enni kown.Kri kraingma mih ang kowh kim dow kri kraingma ang nachangah ngamlam kown.8“Kowmatia kim prakowi uatur hawmh uang iow mih iawng uang iow mih mia chow?uangnim iow lawmlawm mih iawng uang iow mih mia chow?9Amatni dow prenchur nammowt hownia kowh uang mang mih chawnlawng chekhai.Amatni pur kowi dow Tarsis chawnlawng uang rik mang khai,now amatni dow en kowh chauüa hai amatni kowh kuh tai uang pawla khai.Israel kowh chimsaima mih Thurai kowi narowsi kownkow,CHAKRAMANG en kowh Thurai kowi narowsi kownkow en chapauüa uang mang khai bowt.Tawngplawng kowchow panow aia mih klangiungma tawng en khai bowt.10“Prenlang maru-uüa mih en kowh tap tapiak mih naraw en iawk kown,now amatni kowh manguüa mih nachang en lup kown.Kunmarau kowh ang bawp en khowk chepaw ang nasana en iawk kown.11Chenchapuüa kowh dawngthawnguan nauang nowng pawla en kownkow en kowh tapplawt mih atungma natauow hüah bowt kown,amatni kowh manguüa kowi paw nauang nowng pawla en kownkow naiawngün tapplawt dow ni-e hai uar-e paw natabüng kown nadowi bowt.12Chang en lup dowi mih chenchap hai pren dow natapiak kown.Nami chenchap hai pren dow asaima pat natapiak kown.13“Lebanawn kowi kowh kraingra dow en kowh nachowng kown;ang kowh kim chimsaima mih raw müa nauang pawla singh kown,sidar singh, painglang singh hai ri singh nauang pawla kown.Ang kowh khawk towk rah kowi ang napeah rowsira kown.14Chang en nowng miuüa kowh chauüa dow mum tulu se en pur kowi nauang kown,now nü en klowk en dowi miuüa maten dow nachup en kown.Amatni dow CHAKRAMANG kowh marow pahai nahaw en kown,Israel kowh chimsaima mih Zaiawn pahai nahaw en büah kown.15“En kowi dow nuata en akat khowk chekhai,en iawng miapaw mang dowi bowt chowdiah.Nachenganchepaw ringkawra uowima hown achowngma ang nachang en bowt kown,now chowngchowng saksakma maru piawra ang nachang en bowt kown.16Chauüa kowi a-u pe khamah iawn tui reng mih iawngchenchapuüa hai manguüa mih nape en uanh iung kown.Nakhowk khe dow ang CHAKRAMANG chowtaih en kowh lawng miia pami en natuk bowt kown,ang chowtaih Jakawb kowh akürma mih Thurai pami en natuk bowt kown.17“En vüi kri takcha kuh, now lawngha takcha tai ang nauang pawla en kown,singh takcha kri, now hua takcha lawngha ang nauang pawla en kown.Iungra dow en kowh kruitown mih ang nathawp en kown,now anowm kowi dow en kowh aluchow ang nathawp en kown.18Tawng iawng mih lup ngak paw en pren kowi nakhi kown nadowi bowt,en kowh sünghi lak kowi piakra laiklow mapaw nata kown nadowi bowt.En kowh tap ming dow lawngra naown kown,now en kowh tapplawt ming dow rowsira naown kown.19“Ni-e khe sat nowi en nalakke kown nadowi bowt,lama nowi paw en nalakke kown nadowi bowt.CHAKRAMANG mih achowngma vüi en kowh anowi nachowng bowt kown,now en kowh Thurai mih en kowh rowsira nachowng bowt kown.20En kowh sat mih katpaw nakup kown nadowi bowt,now en kowh lama paw katpaw nakowi kown nadowi bowt.CHAKRAMANG mih en kowh achowngma nowi nachowng kown,en kowh uowila uiting uangtak mih ni dow nachur bowt kown.21En kowh maru maten natachi tanawm bowt kown,amatni dow chowngchowng saksakma vüi napowng pren bowt kown.Amatni dow ang chowkah mih singh pawi, ang rut hown kowh lup chekhai;amatni pungmadawng hownia ang kowh klangiungra natatüng kown.22Enni pungmadawng kowi kowh chenchap lang sowm mih dow chenchap iukma naphaw kown,now machak kowi kowh lang nen mih dow akürma mih chenchap naphaw kown.Ang CHAKRAMANG nami lup dow akhin khe alenma ang nachangah kown,” pakhai.
The Seed Company