Isai50
1CHAKRAMANG tek mih,“Enni kowh u kowi ang khuaah mih charam tawng kowi chow?Ang kowh pekra uowi kowh mia tut-e chow ang cham sum enni?Ang cham sum enni mih dow enni kowh angak rakowi chowtaih;enni kowh u kowi ang prütta mih dow enni kowh ngak rakowi chowtaih.2Ang uang khe tawngplawng kowchow nakowi miapaw uowi dowi?Tawngplawng kowchow ang haw enni khe miapaw enni klang ang dowi?Nalawng enni kownkow ang kowh rut town lai bow?Nalawng enni kownkow ang kowh kür uowi dowi bow?Pakat nang sang sata tui mih ang pe kangah khai,pakat nang sang aw ün kowi ang pe chowngah süngrüp süngkangma khai.Naiawngün kowi kowh dam dow khawr tui kowh kowng hanow su khai.3Mukuang dow khup uan num mih iawng anumma ang changah khai;nami dow uowila uiting uangtak mih maru iawng anumma chekhai,” pakhai.4Bowm miuüa kowi laiklow hown ang nowng khowngla kownkowCHAKRAMANG Thurai mih cha tuk miuüa kowh dai pe ang khai.Tape iawng ang nasüntala kownkow aia dow ni towng mur krüng ang khai.5CHAKRAMANG mih uow ang param khai.Naiawng rakowi ang chün lai khai, now aia hownia ang süt dowi chekhai.6Bawp ang miuüa kowi ang towng pe kumlawng khai,now thük ang mawmpawi miuüa kowi ang towng pe ngeupa khai.Pe ang rukrai hai thawk ang kria mih khin khe ang kowh lumowr ang mumta dowi chekhai.7CHAKRAMANG Thurai mih khowng ang khai rakowi ang narukrai kown nadowi.Naiawng rakowi anikma nauowi kown mih ang tatuak khai.Tawngplawng kowchow panow ang narukrai dowi kown mih ang tuk chekhai.8Chet ang tara nowm mih Thurai dow ang hown atawnchow chekhai.Naiawng rakowi mia chow nowng tang ang aprek kown mih maru ang pur kowi pauang lah.9CHAKRAMANG Thurai mih khowng ang khai.Naiawng rakowi miapaw nowng tang ang aprek dowi chekhai.Amatni dow uan iawng naprim iawlaw kown,now amatni kowi dow dungh nachata kown.10Enni pungmadawng kowi CHAKRAMANG kowi ringkawma hown kram mih mia chow?Enni pungmadawng kowi aia kowh nar laiklow chün mih mia chow?Iiu dawng kowi mang mih maru dow CHAKRAMANG ming kowi pacham owm lah,now aia kowh Thurai luk kowi pacham neplawng nesak lah.11Nachenganchepaw kowmatia nowi kowi mang miuüa dow kaneu diah;CHAKRAMANG mih phih iukma nauang pawla enni kown.
The Seed Company