Isai51
1CHAKRAMANG tek mih,“Achinawmma hai ang nau iawng mang kown enni nau miuüa low, sünta büa diah.Enni uang phawla mih singku huamang lawnguan kowi tuakah büa diah,now thaila enni mih kuam prakowi tang mü büa diah.2Enni kowh pa Abraham hai pen enni mih enni kowh u Sara prakowi tang mü büa diah.Aia kowi ang hawah khe aia dow lowk iachow taih chekhai,now aia kowi ang peah prasi hanow maru iun akawmma ang changah khai.3Zaiawn kowi ang napeah sakklamra ngengche kown,now aia kowh apiaknama mih arah maten kowi ang nasanaah kown.Aia kowh süngrüp süngkangma kowi Eden bakan iawng ang nachangah kown;nami dow CHAKRAMANG kowh bakan iawng ang nachangah kown.Nakowi dow piawpara, awmrawmra hai meng klow nata kown.4“Aw ang kowh maru-uüa, ang kowh laiklow sünta büa diah,now ang kowh laiklow kowi pe param büa diah.Ang hownia ana nalawt kown;chenchapuüa nakala anowi kownkow ang kowh tara nowm mih ang natowah bowt kown.5Ang kowh anowm dow nauang ting kown chowbowt,ang kowh lawngra lup dow tarowng khowk chekhai.Ang matia mih chenchapuüa kowi nachet pe tara kown.Pren lakma kowi kowh maru-uüa mih ang prakowi natang mü kown,now ang kowh bawng akürma mih kowi nachawng büah kown.6Mukuang prakowi awr tang mü büa diah,now lusa prakowi iu mü büa diah.Mukuang dow maikhük iawng natama kown,now lusa dow uan iawng natu kown.Lusa lak kowi kowh uowi miuüa paw nakowng kown.Nachenganchepaw ang pe enni mih lawngra dow achowngma pat anikma nauowi kown,now ang kowh anowm mih chowngchowng saksakma nauowi kown.7“Anama mih kowi enni tuk miuüa hai ang kowh tüngsangra sak kowi enni towah miuüa low, sünta büa diah.Maru prawngren enni mih hai maru pe enni rukrai mih kowi hangkow kram büa diah.8Tawngplawng kowchow panow amatni dow uan hai la kowi lowngsirin nachowua chaah khe kowh piak iawng napiak kown.Nachenganchepaw ang kowh anowm dow achowngma nauowi kown;ang kowh lawngra dow chowngchowng saksakma anikma nauowi kown,” pakhai.9Aw CHAKRAMANG awr rü diah, now khowng anging diah.Achük alai kowh iawng en kowh kür tawngah hanow uang lawng anging diah.Achük alai khe sata kowi kowh asak uowi mih aiukma mih kowi en dungta nak khai.10Sata tui abüpma mih dow en pe kangah khai,now en lawngah mih maru-uüa naia pownla kownkow sata tui dawnglang iawng en chang pe tiama khai.11CHAKRAMANG lawngah mih maru-uüa dow nauang plan hanow tekla meng se Zaiawn kowi nauang kup kown.Amatni kowh achowngma mih piawpara dow amatni kowh mang lukruk nachowng kown.Amatni dow lainowmma napiaw kown,now akrat pusara hai tuak kratra dow naprowng bowt kown.12CHAKRAMANG tek mih, “Pe enni sakklamra mih ang chowtaih.Tawngplawng kowchow lusa maru kowi enni tuk kram khai?Amatni dow nakowng kown mih taih chekhai.Lusa maru dow pram iawng anikma nadowi.13Thawp enni miia kowi tawngplawng kowchow enni tamata khai?Aia dow mukuang mih krawi phatah khai,now lusa chüng mih phükah khai.Krawi chang nowng mih maru kowh kramra uowima mih kunmarau kowi tawngplawng kowchow ni towng atungma kram hown enni uowi?Nami maru kowh kramra uowima mih kunmarau dow tawngpaw nadowi chekhai.14Nar kowi takhang miuüa kowi dow alenma nalawtta kown.Amatni mih amatni kowh thawngrum lak kowi nakowng kown nadowi,chakkham paw nakhawr büah kown nadowi.15Ang dow CHAKRAMANG enni kowh Thurai chekhai.Sata kowi ang pe talowngah phunglung hanow tuilowng tün nowk rumrum reng.Ang kowh ming dow mukuang siphaiuüa kowh CHAKRAMANG chekhai.16Enni kowh nawr kowi ang kowh laiklow ang phang enni khai,now ang kowh rut klim hown ang tung enni khai.Mukuang kowi aia uowi rah kowi ang towah khai,now lusa chüng mih ang phükah khai.Zaiawn kowi ang tek pe mih, ‘En dow ang kowh maru chekhai,’ pakhai,” pape khai.17Aw Jerusalem, thowr bowt, thowr bowt, now awr iowng bowt.En dow CHAKRAMANG rut hownia aia kowh kunmaraura bia kham khowk chekhai.Nami bia dow maru kham hanow taiüa lutlut reng,nami bia dow ale kowi pat en biata prowng khowk.18En penah mih chauüa pungmadawng kowi miapaw natüng tiama kown mih uowi dowi chekhai.En thumah mih chauüa pungmadawng kowi miapaw nadowk en rut kown mih uowi dowi chekhai.19Piakra, khown hai tasenra iawng mih phih en tut-e uang kla khai.Nakhowk khe mia chow nowng pe en sakklamra mih uowi?Tawng iawng chow ang nape en sakklamra kown?20En kowh chauüa dow maw bowk khowk;amatni dow leng kowi tasowk mih naki iawng tiama towng alu takuakla hüah towbowt.Amatni luk kowi dow CHAKRAMANG kowh kunmaraura,en kowh Thurai ripra akümma uang kla khai bowt.21Naiawng rakowi aw taprüa taiia hown uowi mih masiuüa,mami laiklow sünta diah.En kowi pe pua en khai.Tawkchedow grep tui hown nadowi.22En kowh CHAKRAMANG Thurai, en maru-uüa kowi tawi tangila miia tek mih,“Sünta, en khamla ang kowh kunmaraura mih bia en rut hownia ang pawta khowk.Ang kowh kunmaraura nami bia hownia katpaw en nakham kown nadowi bowt.23Nami ang kowh bia dow chang en nowng miuüa rut kowi ang naap pe bowt kown.Amatni dow tek en mih, ‘En luk iawng naia mangla kownkow takhum diah,’ pakhai.En luk iawng amatni naia mangla kownkow en kowh kumlawng krawng hai tiama iawng en changah khai,” pakhai.
The Seed Company