Isai49
1Pren lakma kowi kowh maru-uüa low, ang kowh laiklow sünta büa diah.Alakma kowi kowh chenchapuüa low, pe param büa diah.Ang uang dia dowi rawn CHAKRAMANG mih haw ang khai;aia dow au mu lak kowi ang uowi khe hownia rük ang ming khai.2Aia dow ang kowh nawr mih achukma mih saidawng iawng changah khai.Aia dow aia rut nim kowi pet ang khai.Aia dow aia lang ruiah mih leba sek changla ang khai,now aia kowh leba sek towk rah kowi tow ang khai.3Aia tek ang mih, “Aw Israel, en dow ang kowh nar chekhai;en hownia ang kowh kraingra ang natüngah kown,” pakhai.4Nachenganchepaw ang tek pe mih, “Ang kawmah mih aiawmma taih;tawngpaw asung uowi dowi mih kowi ang khowk kür khai.Nachenganchepaw ang kowh kakbak dow CHAKRAMANG rut kowi uowi chekhai,now ang kowh awmrawm sung dow Thurai tut-e chekhai,” pakhai.5CHAKRAMANG mih aia kowh nar nachangla ang kownkow mu lak kowi thawp ang khai.Naiawng aia thawp ang mih dow Jakawb kowi aia tut-e nakow ia plan pawla pe kownkow chekhai,now Israel kowi aia tut-e nakow nowng pawla pe kownkow chekhai.Ang mih CHAKRAMANG mik kowi ringkawra uowima chekhai,now ang kowh Thurai dow ang kowh kürra chekhai.6Aia tek mih, “Jakawb kowh krungchak kowi nalawngah kownkow ang kowh nar en chowng mih nadowi;Israel kowh ta sing uowi miuüa kowi nauang planla krowngchow kownkow ang kowh nar en chowng mih nadowi.Naiawngün dow asowmchow mih lup taih tak.Nami klen kowi en hownia palusama maru mih angak hownia nakala lawngra kownkowakeng chenchapuüa tut-e paw anowi iawng ang nachang en kown,” pakhai.7Maru nüah dowi mih hai maru suiah mih pren kruitown miuüa kowh nar kowiIsrael kowh chimsaima mih Thurai hai lawng miia CHAKRAMANG tek pe mih,“Manguüa khi en hanow natüng en ringkawra kownkow naiowng kown,now mang chauüa paw nachup en kown.Tawngplawng kowchow panow CHAKRAMANG rui en mih chekhai,aia dow kaah sakowmma hai Israel kowh chimsaima mih Thurai chekhai,” pakhai.8CHAKRAMANG tek mih, “Natüng saksing sanara kown mih khin khe en uang lü uang leng mih kowi ang naklang en kown,now naka lawngra kown mih ni khe ang nakhowng en kown.Ang natakhula en kown,now en hownia maru-uüa vüi ang natow sangbowk laitawm lowk kown.Nahanow pren mih alai kowh iawng en naia chang iawk kown towbowt,now apiaknama mih rah maten maru-uüa napowngta iawk kown towbowt.9Takhang miuüa kowi en natek pe kown mih, ‘Uang lawt büa diah,’ napape kown.Now iiu dawng kowi uowi miuüa kowi en natek pe kown mih, ‘Anowi kowi uang büa diah,’ napape kown.Amatni dow ruapur hawmh iawng hungh luk kowi paw naka chakkham kown.10Amatni dow hawm nasakkrai kown nadowi bowt,now tui paw nasakkrai kown nadowi bowt.Süngrüp süngkangma kowi kowh den hai sat den paw amatni tut-e nauang kak kown nadowi bowt.Amatni kowi kowh saksing sanaah miia dow amatni kowi natüng pe tiama bowt kown,now tui ria kowi nacham pawla bowt kown.11Ang kowh hungh maten kowi ang nathawpla tiama kown;ang kowh tiama chung ang nathawpla kown.12Sünta, amatni dow alakma hownia nauang kown;tawngbak mih dow tawngphak hownia hai satkup hownia,now tawngbak mih dow Sinim pren hownia nauang kown,” pakhai.13Aw mukuang hai lusa, apiawma how büa diah.Aw hungma mawngma, atünma tek piaw meng büa diah.Tawngplawng kowchow panow CHAKRAMANG mih aia maru-uüa kowi napeah sakklamra bowt kown,now nowng chang powng changra kowi kowh uowi mih aia maru-uüa kowi aia nasanaah bowt kown.14Nachenganchepaw Zaiawn tek mih,“CHAKRAMANG nuata ang khai bowt;aia dow tamata ang tüng khowk,” pakhai.15Naiawng rakowi CHAKRAMANG tek mih,“Kham iawn mih ngiachow kowi a-u nowng tamata tak bow?Aia penah mih ngeuüa kowi aia sanaah dowi tham pabow?Aia kowh chah kowi a-u nowng tamata chepaw ang dow katpaw natamata en kown nadowi.16Sünta Jerusalem, en kowh ming mih ang kowh rut kum kowi ang ruiah khai.En kowh tapat lut mih tap dow ang sak kowi atungma uowi reng chekhai.17En kowh krungchakuüa mih nauang lüa plan kown chowbowt,now piak en hanow towta en hüah miuüa dow en hownia nacham powt bowt kown.18Rowng lu hanow en riaret tapat lut krawi tang mü madiah.Sünta, en kowh chauüa maten takua talawm hanow en tut-e uang tarü khowk.Ang ming hown ang takham khowk.Amatni dow en kowh tatawng müa uanh iawng naown bowk kown,now cham mang khe kowh malauüa tatawng müa iawng naown büah kown.19“En tapiak khowk chepaw, akhaw aklaima en uowi khowk chepaw,now en kowh pren mih akamnama mih krawng phaw khowk chepawen nowng peah uowi rah dowi mowr en kowh maru-uüa nahu kown mih khin nauang ting kown chowbowt.Nakhowk khe dow khümla en miuüa mih alakma kowi nauowi bowt kown.20En mata mih chauüa en tut-e nauang hanow natek kown mih,‘Mami süng dow anging vüi sowm lai.Nauowila kownkow pe anging süng küng diah,’ napa kown.21Nakhowk khe sakdawng kowi en natek kown mih,‘Ang vüi maiawngünuüa kowi mia chow penah?Ang dow mata chauüa kowh ka chah dowi mih masiuüa iawng phaw khowk chowdiah manow.Ang dow prütta ang kowh cham powt panglang chowdiah manow.Maiawngünuüa kowi mia chow thumah?Ang dow ang malowkchow towbowt diah manow.Maiawngünuüa tawng hownia chow uang ting?’ napa kown,” pakhai.22CHAKRAMANG tek mih, “Sünta, rut hown akeng chenchapuüa kowi ang nahawah kown,now ang kowh tamkhuown mih amatni kowi ang natüng pe kown.Naiawng rakowi amatni dow en kowh chapauüa kowi paila se nauang pawla kown,now pangkawt hown kawtla hanow en kowh chamauüa kowi nauang pawla en büah kown.23Manguüa dow en kowh thum mih nachowng kown,now amatni kowh masi dow en kowh mingkhet mih nachowng kown.Amatni dow tabawk krawm se nachup en kown,now en khawk kowi kowh dinchow nabia büah kown.Nakhowk khe dow ang chowtaih CHAKRAMANG pami en natuk bowt kown.Ang luk kowi kowh owmsak miuüa dow narukrai kown nadowi,” pakhai.24Tasenra hownia kowh siphai uang kala mih asung khakma mih uanh miapaw nowng rup dowi chekhai.Now tasen awng miuüa khümla mih maru kowi nowng lawng mih paw miapaw uowi dowi chekhai.25Nachenganchepaw CHAKRAMANG tek mih,“Tasen miuüa khümla miuüa kowi dow tasen miuüa rut hownia ang napawta pe kown,now kramra uowima mih maru rut hownia aia cham khünah mih uanh dow ang nakrawi lawngah kown.En hown kowh tasen kown miuüa hown ang natasen kown,now en kowh chauüa kowi ang nalawngah kown.26Chang en nowng miuüa kowi dow amatni kowh nga amatni kowi ang nape chaah kown;amatni dow nau iawng nakham amatni kowh vi hanow napua kown.Nakhowk khe dow ang chowtaih CHAKRAMANG enni kowh lawng miia,Jakawb kowh akürma mih Thurai pami maru maten natuk bowt kown,” pakhai.
The Seed Company