Hosea13
1Efraim krungchak tek lai khe maru kawmuüa kram kowh chür reng chowdiah;tawngplawng kowchow panow amatni dow Israel kowi apankrima mih krungchak chowdiah.Nachenganchepaw Baal thurai kowi chupiiara kowi amatni kowi dow napiakta kownkow tukta pe mur khai bowt.2Kawmat mih aia kowh maru-uüa dow lang chang ngak ngamlam chekhai;amatni dow kowmatia vüi kowi tai hown arup sawnah khai,now rut hown paw thawp arup aren büah khai.Naiawngün maten dow rut tua chapma mih kowh lup chekhai.Naiawngün arup lawnguan kowi amatni tek mih,“Uang chang phuchua miuüa dow chia chah rup kowi pacham namla lah,” pabüah khai.3Naiawng rakowi amatni dow rau-e kowh mai hai rau-e kowh lüa tama mih nang tui iawng naphaw kown,now bawk hownia kowh li rownla mih chapli hai tawngpawk hownia kowh lawt mih maikhük iawng naphaw büah kown.4CHAKRAMANG tek mih,“Aigupta hownia ang uang lawtla en mih khin hownia ang chowtaih en kowh CHAKRAMANG Thurai;ang klen kowi en kowh Thurai lang uowi dowi bowt,now ang klen kowi dow en kowh lawng miia lang uowi dowi bowt.5Süngrüp süngkangma kowi mingkhet en mih dow ang chowtaih,now akang khawngma mih pren kowi mingkhet en mih dow ang chowtaih.6En maru-uüa kowi dow ang peah chakkham hanow du büah khai;amatni du chakkham khe dow chang bawri büah khai,now akung kowi dow tamata ang büah khai.7Naiawng rakowi krangsi iawng dow amatni luk kowi ang nauang kown,pri rengchow iawng dow tiama ria kowi ang hawt pawmah kown.8Achah tama mih tawm iawng dow amatni kowi ang nakhümah kown,now amatni kowh buk dow ang nasekta pe naknak kown.Krangsima iawng dow amatni kowi ang namakah kown;kaurawng uaramchak iawng dow amatni kowi adi asekma ang nachangah kown.9“Aw Israel, en dow kingküa ang khai,khowng en mih kowi en dow kingküaah khai.Naiawng rakowi ang napiakta en kown.10Marow maten kowi nanowng lawng en kown mih en kowh mang tawng kowi chow?‘Pe ang pren mingkhet miuüa dit, pe ang mang dit,’ padow en lü khai.En lüah mih pren mingkhet miuüa dow tawng kowi chow?11Naiawng rakowi ang kunmarau lai kowh ang pe en mang chowdiah,nami mangra dow ang kunmarau en lai kowh ang plan pawta en khai.12“Efraim kowh aprek maten dow ruiah now towah kaneu khai,aia kowh angak maten dow krüm pe khai.13Penchow kimuowi mu rau iawng aia kowi dow arau dowkah khai;nachenganchepaw aia dow sangching uowi dowi tak mih ngeuüa iawng chekhai.Aia kowh dow dia khin uang na khai bowt;nachenganchepaw aia dow uang lawt kown nau dowi chekhai.14“Mami maru-uüa kowi dow lusa kowi kowh kowngra hownia ang nalawngah kown nadowi,amatni kowi dow makowng kür hownia ang nalawngah kown nadowi.Aw kowngra, en kowh akru uang pawla diah!aw makowng, en kowh hawi uang pawla diah!Tawngplawng kowchow panow amatni kowi dow ang nasanaah kown nadowi.15“Efraim dow atainau-uüa pungmadawng kowi lang iuksown chowdiah;nachenganchepaw CHAKRAMANG hownia kowh satlawt li mih süngrüp süngkangma hownia nauang hutah kown.Aia kowh awchawng kowi dow tui nauowi kown nadowi,now aia kowh tuikuam dow nakang kown.Aia kowh dawngthawnguan krümra kowi kowh uanh maten dow maru narupta pe kown,now aia kowh asung khakma mih uanh maten paw maru napawta pe kown.16“Samari maru-uüa dow amatni kowh Thurai kowi kingküaah khai;amatni kowh angak rakowi amatni dow naka ripra kown.Amatni dow tasenra kowi nakowng büah kown;amatni kowh chauüa kowi dow krawng kowi natheuta pe naknak kown,now amatni kowh apawmma mih masiuüa kowi paw nakhuekta pe mu nak kown,” pakhai.
The Seed Company