Ezekiel17
1Nami kung kowi CHAKRAMANG laiklow dow ang tut-e uang ting khai.2Aia dow maiawng tek ang khai: Aw maru chapa, Israeluüa kowi laiuat hown kowtek pe dit.3CHAKRAMANG Thurai tek mih, “Apawi chakma, alap pawi klangma, apreuprakma, aiukma mih uamu dow Lebanawn hungh kowi uang lowk. Nami uamu dow Lebanawn kowi kowh sidar singh lang lowng mih mia klowkla lowk hanow Babulawn pren kowi kowpawla khai, now nakowi kowh kun changra marow kowi kowtowah khai.5Nahanow nami uamu mih Israel pren hownia kowh aliu dow krawng iungma mih kowi chowkah khai. Nami liu dow klangiungma naia iuksownla kownkow tui ahuma mih aw pang kowi chowkah khai.6Nami liu dow awr ru hanow ruih iawng krawng kowi awr tamung khai. Now aprün paw krawng abüpma kowi sawt khai. Naiawng hai nami ruih dow awr iuk khai, aram hailawm a-awm ahuma uang towk khai bowt. Now nami ruih dow nami uamu prakowi awr tarawk khai.7“Nami uamu kowh paw apawi chakma hai alap iukma chekhai. Nachenganchepaw nakala tui küng kownkow nami ruih dow aprün hai a-awm mih nami hownia akeng mih uamu prakowi cham plan tarawk khai iawk.8Tawkchedow nami ruih kowi mih a-awm pacham hu lah, pacham uih lah, arui klangiungma pacham phaw lah pakowh tui ahuma mih aw pang kowi chowkah khowk chowdiah.9“Naiawng rakowi kawmat CHAKRAMANG tek mih, ‘Aw maru chapa, Israeluüa kowi maiawng kowtek pe diah: Nami ruih naia iuksown tak pabow? Nami ruih dow naia iuksown kown nadowi. Naiuksown lak dow nakeula kownkow ang nachawita kown, now auih ün paw ang nakuakta pe kown. Aia kowh a-awm sar maten dow nakeu bowk kown. Aia kowh aprün nachawita pe kownkow maru akawmma lakke dowi tham, akürma mih paw lakke dowi tham.10Aia kowi dow klangiungma chowkah khowk chowdiah. Nachenganchepaw nasing kown nadowi. Aia awr iuksownla mih rah kowi dow satlawt li nauang hanow aia dow nakeu bowk kown chekhai,’ pape diah,” pakhai.11Nami kung kowi CHAKRAMANG laiklow dow ang tut-e uang ting khai. Aia tek ang mih,12“Aw maru chapa, kingküa hai sen mih chenchap kowi maiawng kowtek pe dit: Nami uamu hai ruih auan enni tuk tak bow? Babulawn mang dow Jerusalem kowi uangah hanow Jerusalem kowi kowh mang hai mang kimchakuüa kowi Babulawn pren kowi pawla khai.13Nahanow Babulawn mang dow nami mang kimchak lowk ia mih hown tatow sangbowk laitawm khai, now aia low kowi nauowila kownkow nami mang kimchak lowk ia mih kowi dow pe khamah lai khai. Sangbowk laitawm che townah büah reng hanow nauowi büah reng kown mih chekhai. Tawkchedow akürma hang pacham phaw lah, Babulawn low kowi pacham uowi lah pakowh Juda pren kowi kowh lang kri miuüa kowi Babulawn pren mang khümla hanow pawla mih chekhai.15Nachenganchepaw Juda pren mang dow nakala kawrnga hai nakala siphai kawm kownkow Aigupta pren kowi kowchin maru khai; aia dow Babulawn mang kowi kingküa hai senah khai. Aia kowh lup chang dow nachawn kown pabow? Naiawngün lup aia chang mih dow khalat kown pabow? Aia piakta laikham now naplai kown pabow?16“Ang CHAKRAMANG masing Thurai, ang kowh asak lüklau se ang tek khowk, mang chowm rah kowi kowh pe chowmah mih ia, aia kham pe lai mih mang kowi aia nüah klowkah dowi chekhai, now laikham paw aia piakta pe khai. Naiawng rakowi aia dow Babulawn pren kowi nakowng kown.17Tasen mih khin khe maru akawmma nakowngla kownkow Babulawnuüa nathawp huapam hai nathai kuam kown. Nami khin khe Faraw kowh akürma mih siphai kawm dow nakhowngah kown nadowi.18Tawngplawng kowchow panow mang Zedekia dow piakta sangbowk laitawm khai; aia dow aia kowh laikham nüah klowkah dowi chekhai. Aia dow Babulawn low kowi nauowi kownkow tatow laikham khowk chepaw nami laikham piakta khai rakowi nakhalat kown nadowi.19“Ang CHAKRAMANG masing Thurai, ang kowh asak lüklau se ang tek khowk. Aia dow ang ming hown kowh takham mih piakta khai. Naiawng rakowi nami sung dow aia kowi ang napeah kown.20Mang Zedekia vüi ang nathang pe powk hanow aia dow ang kowh powk kowi nataia kown. Aia dow ang kaah sakowm iawng uowi dowi chekhai. Naiawng rakowi aia kowi mih Babulawn pren kowi dow ang nakowpawla kown, now nakowi mih aia kowi ang naripah kown.21Aia kowh tasen lang kiak mih siphaiuüa maten dow tasenra kowi nakowng kown, now ta plai mih siphaiuüa dow nacham taset plawt kown. Nami khin khe dow ang CHAKRAMANG ngengche mami laiklow tekla khowk pami enni natuk bowt kown,” pakhai.22CHAKRAMANG Thurai tek mih, “Sidar singh chem hownia a-awm achalachow mih dow ang matia ngengche ang napawah hanow Israel kowi kowh lang lowng mih hungh luk kowi ang nachowkah kown.23Israel pren kowi kowh alowngma mih hungh luk kowi nami awmh hownia dow aprek nauang uowi hanow nauih kown; nami dow sidar singh klangiungma nauang chowng kown. Nami mia kowi dow uakling uaber matiow nachang bai kown, now nami klim kowi dow uakling uaber hawmh natanai kown.24Nahanow alowngma mih singh kowi kripta mih, anemchow mih singh kowi alowngma pe phawah mih, asingma mih singh kowi akeuma changah mih, akeuma mih singh kowi pe singah mih dow ang CHAKRAMANG chekhai pami dowm kowi kowh singh kau maten natuk bowt kown. Ang CHAKRAMANG mami laiklow ang tek khowk, now ang tekta mih dow ang nachang ngengche kown,” pakhai.
The Seed Company