Ezekiel16
1Nami kung kowi CHAKRAMANG laiklow dow ang tut-e uang ting khai. Aia tek ang mih,2“Aw maru chapa, Jerusalem kowi aia kowh suiiai kaniaima mih lup lawnguan kowi kowphuang pe dit,” pakhai.3Now CHAKRAMANG dow maiawng pe tek ang khai, “Jerusalem, en kowh kim hai en kowh dia rah dow Kananuüa pren kowi chekhai; en pa dow Amawr chenchap chekhai, now en u dow Hit chenchap chekhai.4En uang dia mih ni khe hiah en dairui dowi, now tui hown paw miapaw sawk en sau en dowi chekhai. Nami klen kowi awisa paw plik en dowi, now uan hown paw dua en dowi chekhai.5Naiawng nachang en kownkow miapaw saksing sana en mih uowi dowi chekhai. Naiawng nachang en lak dow dowm akuangma kowi cham kuakta en hüah chekhai. Tawngplawng kowchow panow en uang dia mih ni hownia maru sui en mih chekhai.6“Now en ria iawng ang uang mang mih khin khe en matia vi kowi en taiüa lutlut mih dow ang khi khai. Nami khin khe naiawng uowi se en nasing kownkow ang pe en ana khai.7Krum kowi kowh singh pawi iawng dow ang mingkhet en hanow ang pe iuk en khai. En awr iuk awr sown hanow en awr malauüa khai; en kowh iawn paw uang iuk khai bowt, now en kowh sam paw uang dawng khai bowt. Tawkchedow tawnguat uowi dowi hai tengiow tengklaima en uowi reng tak chekhai.8Nami kung kowi en ria iawng ang uang plan mang iawk khe en prakowi ang haimüla khai. Nami khin khe dow nachang dawngthawng kown mih en tataing khai bowt. Naiawng rakowi ang matia kowh kowrmow dow ang khup en hanow ang phum en siri khai. Now nasakrau en kownkow ang takham khai, now achi natachawng kownkow tatow sangbowk laitawm hanow ang masi en uang chowng khai.9Now tui hown ang lu en hanow en buk kowi kowh vi dow ang sawk sau en khai, now buk kowi ang phawk en sau khai.10En buk kowi dow sawt pe bawng mih uan klangiungma mih ang khup en khai, now khawk kowi dow chak pik phanaikhawk klangiungma mih ang krua en khai. Adipükchow mih la hown kowh kawngah mih uanh hown ang mum en lu khai, now asung khakma mih uanh dow ang khup en khai.11Ngawng awr hown ang tawng en khai: Rut kowi dow kuaiseh, ngawng kowi dow keng,12param kowi dow ramseng, lu kowi dow kuh lukruk klangiungma mih hown ang tawng en khai.13Kuh hai tai hown dow ang tawng en khai. En kowh khupdip tawngklai dow Adipükchow mih la hown kowh kawngah mih uanh hai la uan apachow mih sawt pe bawng mih uan chekhai. En kowh chakkham dow adichow mih kawmdi, kuai tui hai kanrawn sau chekhai. Lainowmma en uang klangiung khai. En dow mang masi iawng uang na khai bowt.14En klangiung lai kowh en kowh anang dow pren maten kowi cham tauet khai. Tawngplawng kowchow panow ang pe en mih tatawng tauat müa hown dow en kowh klangiungra akümma chekhai.15“Tawkchedow en kowh klangiungra kowi en owmsak kowh nachangla chawkkrawma lup kownkow en tawngah khai. En ria iawng mang miuüa maten hown en hawt chang iang khai, now naiawngün maru-uüa dow en kowh klangiungra mih rupta en khai.16Ang pe en mih tawnguat klangiung klangiungma mih dow arup aren chupra ün en tawngla khai, now nakowi dow en chang iang khai. Naiawngün lup en chang mih mapaw taka dowi chowdiah.17Kuh hai tai hown kowh thawpah mih baing chang müa uanh ang pe en mih hown en matia vüi en thawpla kachakuüa rup khai, now naiawngün rup kowi en chupiiaah khai.18Sawt pe bawng mih en kowh tawnguat dow naiawngün arup kowi en khup pe khai. Now naiawngün pur kowi dow ang kowh sau hown maikhük mih en kowphuchua khai.19En nachaah kownkow kawmdi adichow mih, kanrawn sau hai kuai tui ang pe en mih paw naiawngün arup aren pur kowi nam iungma mih uanap iawng dow en towah khai. Naiawng dow en chang ching chekhai, ang CHAKRAMANG tek khowk.20“Ang vüi en pen ang mih chauüa maten kowi paw arup aren kowi en ap-ah khai. En chang iang mih en sak-ih dowi tak chekhai bow?21Ang chauüa kowi en ngenah khai, now maih kowi en nawmah now arup arenuüa vüi en phuchuaah khai.22Naiawng suiiai kaniaima mih lup en chang khe hai en chang iang khe en ngeuüa khe kowh tengiow tengklaima hown en matia vi kowi en taiüa lutlut mih lai en ka tuak dowi bow.23“En kowh piakra nauang ting kown mih dow kramra uowi lai kowbow! Naiawng khowt mih lup ngak en chang kung kowi paw marow akuangma mih rah maten kowi en kutplan thawp arup lowk chi tak chekhai.25Tiama krum towng paw en thawpah mih arup dow en towah khai. Naiawng en chang mih hown en kowh klangiungra mih en piakah khai. En ria iawng mang miuüa maten kowi dow en kowh buk en peah hanow en kowh iang chang lup dow en pe huah khai.26Iang chang dawma mih Aiguptauüa hown paw en chang iang khai. Lainowmma en pe kunmarau ang kownkow en kowh iang chang dow en pe huah khai.27Naiawng rakowi ang kingküa en hanow en kowh dawngthawnguan mih ang eta en khai. En kowh ransu Filistinuüa rut kowi, en kowh suiiai kaniaima mih akiang rakowi rukraila en miuüa rut kowi ang apta en khowk.28Iang chang dow en duh dowi tak rakowi Asuriauüa hown paw en chang iang khai. Tawkchedow nami kung kowi paw en duh dowi tak chekhai.29Nami kung kowi en kowh iang chang dow en pe huah hanow chang kun mih pren Babulawnuüa hown paw en plan chang iang khai. Nachenganchepaw en duh dowi reng tak chekhai.30“Ang CHAKRAMANG Thurai tek khowk, en kowh sak dow arau uowi chekhai. Tawngplawng kowchow panow en dow tuk rukrai dowi, now sangching khawmma mih chawkkrawma iawng en chang lup khai.31Tiama krum towng arup chupra en thawp mih khin khe en chang chawkkrawma lup khai. En dow nachang chawkkrawma lup kown nau lai bowt kowh en kowh kakbak khowm en paw dowi chekhai.32En dow chang iang mih masiuüa iawng chekhai; en dow en matia hua kowi lak-e tukah dowi mih kachakuüa kowi en lang nau khai.33Chawkkrawmauüa maten dow taphua taiua mih sung paw reng chekhai. Nachenganchepaw en dow phua en iua en miuüa maten kowi en peah awmrawm sung reng chekhai. Lowra hownia en tut-e nauang hanow en hown pacham uang chang iang lah pakowh naiawngünuüa kowi en peah büm mih chekhai.34Naiawng rakowi en kowh chawkkrawma lup dow akeng mih chawkkrawmauüa lak-e lang taklowi chowt chekhai. En hown nachang iang kownkow miapaw chia en dowi chekhai; en matia en krawi chiaah rowt chekhai. En dow lainowmma lang taklowi khai; en dow paw asung kown mih takcha en peah awmrawm sung rowt chekhai,” pakhai.35Aw chawkkrawma, CHAKRAMANG laiklow sünta diah.36CHAKRAMANG tek mih, “En kowh tawnguat dow en klüpta hanow tengiow tengklaima en manau-uüa hown en chang iang khai. En kowh chauüa kowi dow en saiah hanow suiiai kaniaima mih arup aren kowi en phuchuala khai.37Naiawng rakowi en piaw pala mih en kowh manau-uüa maten kowi dow ang nakua en kown. Alai kowh en sakrauah miuüa hai en suiah miuüa maten kowi ang nakua en kown. Nakingküa en kownkow pren tali nui hownia amatni kowi dow ang nakua en kown, now en kowh tengiow tengklaima mih nakhi en kownkow amatni pur kowi dow ang naklüpta en tawnguat kown.38Chang iang mih masiuüa hai paw maru asak miuüa kowi kowh ripah mih iawng ngengche ang narip en kown. Ang kowh kunmaraura lün pluplup mih hown kowng pat mih ripra dow ang nape en kown.39Now en manau-uüa rut kowi ang naapta en kown; amatni dow en kowh arup aren uowi rah maten napiakta en kown. Amatni dow naklüpta en tawnguat kown, now en kowh baing chang müa uanh klangiungma mih maten paw narupta en kown. Amatni dow tengiow tengklaima nata towla en hüah kown.40Amatni dow nakua en maru kawm kown, now nami maru-uüa dow huaklu hown nakuak en hanow nakowngta en kown. Nami klen kowi amatni kowh saidawng hown dow nadungta en naknak kown.41Amatni dow natowkta en kim üa kown, now akeng mih masiuüa pur kowi narip en kown. Naiawng hai en kowh iang chang dow ang nataingta en kown; en manau-uüa kowi en napeah awmrawm sung kown nadowi bowt.42Nami kung kowi dow ang sak nata-ih bowt kown; en luk kowi kowh ang kowh kunmaraura lün pluplup mih dow naprowng bowt kown, ang nakunmarau kown nadowi bowt.43“En ngeuüa khe kowh ang mingkhet en mih ni ün sak kowi en towah dowi chekhai. Nami takcha lup ngak maten hown en towk ang kunmarau khai. Akeng mih lup ngak maten klen kowi paw en chang iang khai. Naiawng rakowi ang paw en kowh lup sung ang nape en kown.44“En lawnguan kowi maiawng mih tantawh maru natek en kown, ‘A-u chah dow a-u iawng taih,’ napa büah kown.45En dow en u kowh chama ching chekhai; en u paw ahua hai achauüa kowi suiah reng. En dow en tuamowuüa kowh tuamow ching chekhai; en tuamowuüa paw ahuauüa hai achauüa kowi suiah reng. Enni kowh u dow Hit chenchap chekhai, now enni kowh pa dow Amawr chenchap chekhai.46En taimow dow aia kowh chamauüa hown tawngphak prakowi uowi mih Samari marow chekhai. En naumow dow aia kowh chamauüa hown mrawkphak prakowi uowi mih Sawdawm marow chekhai.47En dow amatni kowh chowm krang uowi krang hai suiiai kaniaima mih akiang iawng en tawi kiang khai, now khin kra dowi kowi amatni lak-e en kowh chowm krang uowi krang lang suiiai kaniai khai.48Ang CHAKRAMANG Thurai ang kowh sak lüklau se ang tek khowk, en hai en chamauüa changah mih lup ngak iawng en tuamow Sawdawm hai achamauüa khowm padow katpaw changla dowi chekhai.49“En tuamow Sawdawm marow kowh angak dow aia hai aia kowh chamauüa chang bawri mih chekhai. Amatni kowh dow chakkham ahuma uowi khai, now athaulangma uowi büah khai. Naiawng rakowi chang bawri büah mih chekhai. Tawkchedow akhawr hai ngarawng ngaraima miuüa kowi khowng büah dowi chekhai.50Amatni dow bawrima chekhai, now ang pur kowi paw suiiai kaniaima mih lup chang büah khai. Naiawng rakowi nami ang khi hanow amatni kowi dow ang ripah khai.51En changah mih angak maten kowi dawnglang khowm padow Samari marow chang dowi chekhai. En dow amatni lak-e lang suiiai mih lup en chang khai. En changah mih lup maten khi hanow en lak-e en tuamowuüa lang tachi tanawm rowt powm iawng chekhai.52Naiawng rakowi en tuamowuüa kowh rukraira lak-e en kowh rukraira nalang hu kown. En kowh angak dow en tuamowuüa kowh lak-e lang hu khai. Naiawng rakowi en tuamowuüa lang tachi tanawm mih powm iawng uang tatüng khai. En kowh lup dow lainowmma suiiai khai. Naiawng rakowi en nakham rukrai ngengche kown takla.53“Pani dow Sawdawm hai aia chamauüa, Samari hai aia chamauüa kowi alai kowh iawng ang napeah iungra iawk kown, now en kowi paw ang nape en iungra iawk kown.54Nahanow en changta lup ngak mih maten rakowi en narukrai kown, now en rukrai mih dow en tuamowuüa nakala sakklamra kown.55Alai kowh uowi iawng dow en tuamowuüa hai achamauüa naplan uowi iawk kown; now en hai en chamauüa paw alai kowh uowi iawng naplan uowi iawk kown.56En chang bawri reng tak mih ni khe, en kowh angak tatüng dowi tak khe dow en tuamow Sawdawm marow kowi en prawng renah khai. Nami powm iawng kawmat dow Edawm prenchak masiuüa hawmh hai amatni tasin taken mih Filistin masiuüa hawmh, en riaret kowi kowh uowi miuüa hai sui en miuüa maten prawngren en khai.58En kowh lup ngak hai suiiai kaniaima mih lup sung dow en nakur ngengche kown.59“Ang kowh sangbowk laitawm dow en piakta hanow ang kowh laikham paw en nüah dowi chekhai. Naiawng rakowi en kowh lup chang krang iawng ang nachang en kown.60Nachenganchepaw en ngeuüa khe kowh en hown kowh ang towah mih sangbowk laitawm dow ang natuakah kown, now en hown chowngchowng saksakma mih sangbowk laitawm ang nathawp lowk kown.61En kowh taimow hai en kowh naumow dow ang kowh laikham kowi uowi dowi chowdiah. Nachenganchepaw amatchi kowi mih en kowh chama iawng ang nape en kown. Nami khin khe dow en kowh chowm krang uowi krang en naka tuak hanow en narukrai kown.62En hown kowh ang towah mih sangbowk laitawm dow asar hown ang nathawpah iawk kown. Nahanow ang chowtaih CHAKRAMANG pami en natuk kown.63En kowh angak maten ang lawtta en mih khin khe dow en kowh lup ngak maten en naka tuak kown, now en narukrai kown. Nakhowk khe dow en rukrai lai rakowi tawngpaw en uam tek kown nadowi bowt. Ang CHAKRAMANG mami laiklow ang tek khowk,” pakhai.
The Seed Company