Ezekiel18
1Nami kung kowi CHAKRAMANG laiklow dow ang tut-e uang ting khai. Aia tek ang mih,2“Israel pren kowi maiawng mih tantawh enni tek khai, ‘Cha sur mih dow u-pa taih diah. Tawkche iüng krüm mih dow achauüa kowh chekhai,’ pakhai. Tawngplawng kowchow naiawng enni lang tek rereng?3“Ang kowh asak lüklau se ang tek khowk, naiawng mih tantawh Israel pren kowi natek kown nadowi bowt.4Tawngplawng kowchow panow sing uowi mih maru maten dow ang kowh chekhai, pa hai chapa pre ia trui ang kowh chekhai. Ang kowh rirow dow mami chekhai: Chang ngak mih chowtaih nakowng kown.5“Dowkah diah sik, maru iungma mih uowi lowk ia. Aia dow anowm hai anama mih lup chowtaih chang khai.6Nami maru dow hungh luk kowi kowh phuchuara kowi paw cham tawi cha nat ngar dowi chekhai. Now Israeluüa thawpah mih arup aren kowi paw tawi chup tawi iia dowi chekhai. Aia klowkchak kowh masi kowi paw krawi piak dowi. Nami klen kowi uisawng uowi mih masiuüa hown paw krawi taphua taiua dowi chekhai.7Aia dow mia kowi paw chang nowng chang powng dowi chekhai. Naiawng nachang lak dow maru uang pawng uanh chepaw aiawngma hawt plan peah reng chekhai. Aia dow ku dowi chekhai, ku lak dow hawm sakkrai miuüa kowi peah chakkham reng chekhai, now tawnguat uowi dowi miuüa kowi paw peah tawnguat reng chekhai.8Now aia dow cham pe lowi chepaw paw achüt dowi chekhai. Aia dow angak lup changra hownia lang tahen reng chekhai, now maru kowi paw anowmma hown chet pe tara reng chekhai.9Aia dow ang kowh rirow iawng mang reng, now kaah sakowmma hai ang kowh ari aiang paw chün reng chekhai. Aia dow maru aiungma chekhai nowm; aia dow nasing ngengche kown. Ang CHAKRAMANG Thurai mami laiklow ang tek khowk.10“Now dowkah diah sik, nami maru iungma mih kowh chapa ngakma mih uowi lowk ia. Nami maru dow sai maru sak ün, katpaw a-pa changah dowi mih lup ngak ün chang khai. Aia dow hungh luk kowi kowh phuchuara kowi ün cham tawi cha nat ngar khai. Aia dow aia klowkchak masi kowi ün krawi piak khai.12Aia dow ngarawng ngarai miuüa hai akhawr a-awng hown uowi miuüa kowi chang nowng chang powng khai. Aia dow ku reng chekhai, maru uang pawngah mih uanh paw hawt plan pe dowi chekhai. Aia dow chup arup aren reng chekhai, now suiiai kaniaima mih lup paw chang reng chekhai.13Aia dow pe lowi chepaw paw achüt reng chekhai. Aia dow nasing kown pabow? Aia dow mapaw nasing kown nadowi chekhai. Naiawngün suiiai kaniaima mih lup maten aia chang rakowi aia dow nakowng ngengche kown. Aia kowng mih aprek dow aiamat ngengche nakur kown.14“Now dowkah iawk diah sik, nami maru ngak kowh chapa uowi lowk ia. Nami dow a-pa chang angak mih maten khi khowk chepaw a-pa changah mih lup tawi chang dowi chekhai.15Aia dow hungh luk kowi kowh phuchuara kowi ün cham tawi cha nat ngar dowi chekhai, Israeluüa thawpah mih arup aren kowi paw tawi chup tawi iia dowi chekhai. Aia dow aia klowkchak kowh masi kowi krawi piak dowi.16Now mia kowi paw krawi chang nowng chang powng dowi chekhai. Aia dow aia kowh kakra uowi rakowi maru uang pawngah mih uanh pawta dowi chekhai. Aia dow ku dowi; ku lak dow hawm sakkrai miuüa kowi peah chakkham reng, now tawnguat uowi dowi miuüa kowi paw peah tawnguat reng chekhai.17Aia dow ngarawng ngarai miuüa kowi chang nowng chang powng dowi chekhai, now cham pe lowi chepaw paw achüt dowi chekhai. Aia dow ang kowh ari aiang townah reng, now ang kowh rirow chün reng chekhai. Aia dow a-pa kowh angak rakowi nakowng kown nadowi; aia dow nasing ngengche kown chekhai.18Tawkche a-pa dow aia kowh angak rakowi nakowng kown. Tawngplawng kowchow panow aia dow kür hown krawi paw tangka khai, aia tainau-uüa kowh uanh paw krawi ku khai, now aia maru-uüa luk kowi paw krawi chang lup ngak khai.19“Nachenganchepaw enni tek mih, ‘Tawngplawng kowchow apa kowh angak rakowi achapa tawi ka ripra dowi kown?’ pakhai. Achapa dow tawi ka ripra kown nadowi. Tawngplawng kowchow panow achapa dow anowmma hai anama mih lup chang khai. Now ang kowh ari-arow paw towsak towtaima hown chün khai. Naiawng rakowi aia dow nasing ngengche kown.20Chang ngak mih chowtaih nakowng kown. Apa kowh aprek rakowi achapa naka ripra kown nadowi, achapa kowh aprek rakowi a-pa paw naka ripra kown nadowi chekhai. Maru iung dow aia kowh aiung sung naka kown, now maru ngak dow aia kowh angak sung naka kown.21“Tawkchedow maru ngak che aia kowh angak towta kowh ang prakowi uang plan now ang kowh ari arow chün khai, now anowmma hai anama mih lup chang khai kowh chalow hanow aia dow nasing ngengche kown, nakowng kown nadowi.22Aia changta angak mih maten dow sak kowi ang natow pe kown nadowi bowt. Aia changah mih lup iung rakowi chowtaih aia dow nasing kown.23Maru ngak kowng khe ang awmrawm lai pabow? Maru ngak kowng mih lak-e angak hownia uang plan now sing mih ang lang awmrawm dowi pabow?24“Tawkchedow maru iungma mih lowk ia aia kowh lup iung towta hanow chang angak khai, maru ngakuüa iawng suiiai kaniaima mih lup tawi chang khai hanow aia dow nasing kown nadowi. Aia kowh lup iung dow sak kowi ang natow pe kown nadowi bowt. Aia dow ang kaah sakowm iawng uowi dowi hai chang angak khai rakowi nakowng ngengche kown.25“Nachenganchepaw enni tek mih, ‘CHAKRAMANG kowh tiama thik dowi,’ pakhai. Aw Israeluüa, sünta büa diah. Ang kowh tiama athikma chekhai. Thik dowi mih dow enni kowh tiama chowbowt.26Maru iung che aia kowh lup iung towta kowh chang lup ngak khai hanow kowng mih dow aia kowh angak rakowi aia kowng mih chekhai.27Tawkchedow maru ngak che aia kowh lup ngak towta kowh chang lup iung khai hanow aia kowh sak dow naplai kown.28Aia ngak mih aia tuakah kowh nami hownia aia uang plan mih chekhai. Naiawng rakowi aia dow nasing ngengche kown, nakowng kown nadowi.29Nachenganchepaw enni tek mih, ‘CHAKRAMANG kowh tiama thik dowi,’ pakhai. Israeluüa low, ang kowh tiama dow athikma chekhai. Tiama thik dowi mih dow enni kowh chowbowt.30“Naiawng rakowi aw Israeluüa, enni kowh chowm krang uowi krang iawng bowkbowk kowi ang nachet enni tara kown. Angak hownia uang plan büa diah, enni kowh lup ngak maten hownia uang plan büa diah; nahanow angak rakowi enni napiak kown nadowi bowt.31Enni kowh angak maten enni matia hownia kuakta büa diah, now enni kowh sak hai lümla dow asar hown thawpah büa diah. Tawngplawng kowchow enni nakowng kown chow?32Tawngplawng kowchow panow maru kowng mih mapaw ang awmrawm dowi chekhai. Naiawng rakowi enni kowh angak hownia uang plan now sing büa diah. Ang CHAKRAMANG Thurai mami laiklow ang tek khowk,” pakhai.
The Seed Company