Uown Lawt34
Mosi kowi Thurai peah huapher sar mih
1Nami kung kowi CHAKRAMANG tek pe Mosi mih, “Auown khe kowh huapher pre buk mih iawng kawmat paw plan thawp huapher sar pre buk iawk diah. Nami huapher sar kowi en kuakta mih huapher kowi kowh arui uowi mih laiklow maten ang naplan rui en iawk kown.2Naiawng rakowi tharau rau-e kamrütia hown Sinai hungh chut kowi ang tut-e en nauang kown.3Nakhowk khe amia iawng mih maru paw en hown uang ia tawi kown nadowi, now nami hungh kowi paw akeng mih maru-uüa kowi naia khi kown nadowi. Nami klen kowi chia, rua hai ruapur hawmh paw nami hungh ria kowi nauang ia taw kown nadowi,” pakhai.4Now Mosi dow auown khe kowh huapher pre buk mih iawng plan thawp huapher pre buk khai. Aia dow CHAKRAMANG ana pek iawng rau-e murpa Sinai hungh kowi kowpün khai. Aia dow nami huapher pre buk mih paw pawla khai.5Nakhowk khe CHAKRAMANG mih uangnim dawng iawng uang dowm hanow Mosi re-e uang iowng khai, now “CHAKRAMANG” pahai aia ming dow phuang pe khai.6Aia dow Mosi pur iawng haimang se maiawng phuang pe khai, “CHAKRAMANG, CHAKRAMANG, CHAKRAMANG dow saksingra hai sanara atekma mih Thurai. Aia dow kunmarau naklak dowi. Aia kowh sakraura hai kaah sakowm mih rah dow achur uowi dowi chekhai.7Aia kowh achur uowi dowi mih sakraura dow athawng aiawng chowng mowr uowi reng; aia dow atawi ama ün, chün lai dowi mih ün, angak ün lawt reng chekhai. Tawkche aprek uowi miuüa kowi dow aia ripah reng chekhai; aia dow u-pa kowh angak sung chauüa luk kowi sum tali chowng mowr peah ripra reng chekhai,” pakhai.8Nami laiklow tata hown akrowksang Mosi mih krawng kowi tabawk krawm se CHAKRAMANG kowi chupiiaah khai.9CHAKRAMANG kowi aia tek pe mih, “Aw CHAKRAMANG, ang luk kowi che en kowh saksing sanara uowi khai kowh chalow now anging hown tawi diah. Mami maru-uüa dow laiüama mih chenchap pami ang tuk chowh. Nachenganchepaw anging kowh angak mih lawtta anging diah. Now en matia kowh maru iawng hai paw anging iawk diah,” pakhai.10CHAKRAMANG tek pe Mosi mih, “En maru-uüa hown kawmat ang towta sangbowk laitawm khowk. Amatni pur kowi ang nachang pe awdara lup kown. Nami awdara lup dow lusa kowi amia iawng mih chenchap pur kowi paw ang chang dowi tak chekhai. Now enni vüi ang nachangah kown mih lup dow mün khowt chow kraingra uowi khai pami enni tut-e kowh tawi uowi mih akeng chenchapuüa nakhi kown.11“Ani kowh ang nape enni kown mih ana enni nachünah kown takla. Amawruüa, Kananuüa, Hituüa, Perizuüa, Hivuüa hai Jebusuüa kowi dow enni pur hownia ang naprütta kown.12Kaneu diah! Enni kowuowiah kown mih prenchakuüa hown tawng iawng mih sangbowk laitawm paw enni natow kown nadowi; enni che tow hanow enni natauowk kown chekhai.13Amatni kowh phuchuara ün enni napiakta pe kown. Amatni chupiiaah mih hua ün enni nadita pe nak kown, now amatni phuchuaah mih Asera limpu ün paw enni nakripta pe kown.14Akeng mih thurai kowi enni nachupiia kown nadowi. Tawngplawng kowchow panow ang CHAKRAMANG dow khowrbown dawma; ang klen kowi akeng chap kowi enni cham chup mih mapaw ang nau dowi chekhai.15“Naiawngün che enni piakta bowk dowi hanow nami prenchakuüa hown enni natatow sangbowk laitawm chepaw naia kown. Amatni dow amatni kowh thuraiuüa kowi nachup naiia büah kown, now amatni kowh thuraiuüa vüi naphuchua tawncher büah kown. Nami khin khe nahawla enni hawm chak hanow amatni kowh thuraiuüa kowi kowh phuchuala mih ngar enni natawi cha kown chekhai.16Naiawngün che enni piakta bowk dowi hanow enni nachangla iaumow kownkow amatni kowh chamauüa kowi enni paw pe chepaw naia kown. Naiawngün masiuüa dow amatni kowh thuraiuüa kowi nachupiia kown, now enni kowh chapauüa kowi paw amatni kowh thuraiuüa kowi nachupiia kownkow napawla kown.17“Lawngha hown tawng iawng mih arup paw enni naia thawp kown nadowi.18“The pe tuah dowi mih kawm Pawi enni nasun reng kown. Ang pe enni ana iawng ranit ni mowr the pe tuah dowi mih kawm enni nacha kown. Nami pawi dow Abib la kowi kowh khowmta bowkta mih ni kowi enni nasunah reng kown. Tawngplawng kowchow panow Aigupta pren hownia enni uang lawt mih dow nami la kowi chekhai.19“Rik dia mih kachakuüa chah maten dow ang kowh chekhai. Nami klen kowi tawncher kowi kowh rik pen mih ala maten paw ang kowh chekhai.20Now kawrngaramchük rik pen mih ala takcha kowi dow ruapur chah hown enni naklanah kown. Klan dowi kowh chalow now nami kawrngaramchük chah kowh ngawng enni naklowkta pe kown. Now enni kowh chapa ta maten kowi paw enni naklanah ngengche kown takla.“Pawi khe dow rut khawma ang tut-e enni naia uang kown nadowi.21“Taruk ni mowr mih enni nachang lup kown, now ranit ni khe dow enni natanai kown. Asawt khin khe lah, angen khin khe lah, nami ni dow enni natanai kown takla.22Püm ngen khin khe dow rik ngenah mih püm hown enni nachang Chamüng Pawk Pawi kown. Now ning chur prakowi ki tawnta luprak prowng khe dow enni nachang Bowthowk Pawi kown.23Enni pren kowi kowh ransu-uüa maten kowi ang naprütta enni kown. Ang dow Israeluüa kowh Thurai chekhai. Naiawng rakowi paning kowi sum kat chi kachakuüa maten ang CHAKRAMANG pur kowi enni nauang takua kown takla. Nami khin khe dow enni kowh krawng bawn nauang khün kown mih ransu-uüa nauowi kown nadowi bowt. Enni kowh pren sünghi mih aphiama ang nachang enni kown.25“Ang vüi kowi tawncher hown enni chang phuchua mih khin khe the pe tuah mih tawng chap paw enni naphuchuala kown nadowi. Takat Pawi kowi kowh phuchuaah mih dow tawng chap paw auai rau mowr enni natow kown nadowi.26Üa hai laih hownia kowh uih müng lang iung mih dow ang CHAKRAMANG enni kowh Thurai chup kim kowi enni nauang pawla kown.
“Rua chah nga dow a-u iawn tui hown enni naengah kown nadowi,” pakhai.27Nami kung kowi CHAKRAMANG tek pe Mosi mih, “Naiawngün laiklow dow ruiah diah. Tawngplawng kowchow panow en hai Israeluüa hown ang tow sangbowk laitawm mih dow naiawngün laiklow hown chekhai,” pakhai.28Sinai hungh kowi CHAKRAMANG tut-e Mosi uowi mih dow likawm ni hai likawm uar mowr chekhai. Nami khin khe aia dow tawng chap paw cha dowi kham dowi chekhai. Huapher pre buk mih luk kowi dow sangbowk laitawm lai plan ruiah khai. Nami dow hamüt klüng mih ana pek chekhai.29Mosi mih sangbowk laitawm huapher pre buk mih dowkla se Sinai hungh hownia uang iu dowm khai. CHAKRAMANG hown taklang rakowi aia kowh lumowr tawk mih aia dow tuk dowi chekhai.30Arawn hai Israeluüa maten dow Mosi kowh lumowr tawk mih khita hanow aia tut-e kowkowi kown mih kram büah khai.31Nachenganchepaw Mosi dow amatni kowi haihawah khai, now Arawn hai Israel aluchowuüa dow aia tut-e kowkowi khai. Nahanow Mosi dow amatni hown talawp khai.32Nami kung kowi dow Israeluüa maten Mosi tut-e kowkowi khai, now Sinai hungh kowi kowh CHAKRAMANG peah mih ana maten amatni kowi Mosi phuang pe khai.33Now maru kawmuüa hown ki taklang kung kowi dow Mosi mih aia kowh lumowr uan hown mumta khai.34Nachenganchepaw takrumra te kowi CHAKRAMANG hown nakowtaklang kownkow kowkup mih khin khe dow aia lumowr kowi kowh uan mih lowtta reng chekhai. Now CHAKRAMANG hownia kowh aia kaah mih ana maten dow uang lawt hanow Israeluüa kowi uang tek pe reng chekhai.35Nakhowk khe maru kawmuüa dow aia kowh lumowr tawk mih khi reng chekhai. Nami kung kowi dow CHAKRAMANG hown kowplan taklang dowi mowr aia kowh lumowr mih Mosi plan mumta hüah chekhai.
The Seed Company