Uown Lawt35
1Akung kowi Israeluüa maten kowi kuaah now Mosi tek pe mih, “Enni nachünah kownkow mami ana CHAKRAMANG pe enni mih chekhai.2Pasapta kowi taruk ni mowr enni nachang lup kown. Nachenganchepaw ranit ni mih ni dow enni natanai kown; nami dow CHAKRAMANG vüi chimsaima enni nalang towah kown. Nami ni kowi kowh chang lup mih kowi dow nakowngta ngengche kown takla.3Tanai Ni khe dow maih khowm amia iawng mih kim kowi paw enni naia chang kown nadowi,” pakhai.4Mosi plan tek pe Israeluüa mih, “CHAKRAMANG ana pek maiawng:5CHAKRAMANG vüi uang ap uanh büa diah. Lowra maru sak nau hown kowh uang ap kown nau mih dow pauang cham pawla lah. Uang ia pawla kown mih uanh dow kuh, tai, kri,6aruama süah mih ruapur pawi, arikma süah mih ruapur pawi, aringma süah mih ruapur pawi, adipükchow mih la, rua pawi,7aringma süah mih ruapurla pik, chak pik aiungma mih, ri singh,8maibu towk müa kanrawn sau, nathawpla nümnap müa sau kown mih nam iungma mih chap, nam iungma mih maikhük towk müa nathawpla than kown mih chap,9ephawd kowrmow hai owngphowr im kowi kowh nadanah kown mih ‘oniks’ hua hai asung khakma mih hua ün chekhai.10“Enni pungmadawng kowi kowh uanh thawp sarauüa mih CHAKRAMANG ana pek iawng nauang thawp uanh kown.11Amatni nathawp kown mih dow taklowp taklangra te hai te luk müa ün, auowk rah hai aping müa phen ün, akep müa lawng ün, achüng hai akhawk rup rah ün chekhai.12Now sangbowk laitawm tawkpla hai akawtlawng ün, sangbowk laitawm tawkpla küm müa hai atowk chang müa uaniang,13pawitang hai akawtlawng ün, pawitang kowi kowh tawngkengah kown mih uanh ün hai CHAKRAMANG pur kowi kowh towah mih chimsaima mih kawm,14anowi müa maibu towngh hai nami kowi kowh tawngkengah kown mih uanh ün, maibu hai maibu towk müa sau ün,15maikhük towk müa phuchuara hai akawtlawng ün, nümnap müa sau hai anam iungma mih maikhük towk müa than hai taklowp taklangra te plawt kowi kowh uaniang paw nathawp büah kown.16Nami klen kowi tikah mih uanap chang müa phuchuara hai kri hown kowh lawkrachow, phuchuara kawtlawng hai puh bia aikam ün, kri hown kowh biatum hai biatum chowm müa,17viadawng ping müa uaniang hai uaniang iang müa achüng ün, achüng vüi akhawk rup rah ün, viadawng ping kowi kowh aplawt vüi uaniang ün,18taklowp taklangra te hai viadawng ping tükra chung ün, atük müa leng ün nathawp büah kown.19Now uamow Arawn vüi taklowp taklangra te kowi kowh lup chang müa chimsaima mih tawnguat paw nasown pe büah kown, now achapauüa vüi paw uamow iawng nachangla lup kown mih tawnguat nasown pe büah kown,” pape khai.20Mosi ki tek lai kung kowi dow Israeluüa mih Mosi hownia powt khai.21Now amatni sak nau hown kowh pe kown nau miuüa maten dow uang pawla uanh now uang plan uang büah khai. Amatni dow taklowp taklangra te chang müa hai lup chang müa ün, uamow kowh chimsaima mih tawnguat thawp müa ün, lakke mih chap maten uang pawla büah khai.22Masiuüa hai kachakuüa pe kown nau mih maten dow kuh hown kowh tatawng müa achap akawm uang pawla büah khai. Amatni uang pawla mih dow uan klia müa mangsarkap, ramseng, rutbüt hai akeng mih tatawng müa ün chekhai. Naiawngün dow CHAKRAMANG vüi uang tangah büah mih chekhai.23Now aruama mih la, arikma mih la, aringma mih la hai adipükchow mih la ün, rua pawi ün, aringma süah mih ruapur pik ün, chak pik aiungma mih ün uowi miuüa dow naiawngün uang pawla büah khai.24Now tai hai kri uowi miuüa dow CHAKRAMANG kowi napeah kownkow tai hai kri uang pawla büah khai. Nami klen kowi taklowp taklangra te chang müa kowi natawngah kownkow ri singh uowi miuüa dow uang pawla ri singh khai.25Now masiuüa pungmadawng kowi kowh la thawp akiakma miuüa maten dow aruama mih la, arikma mih la, aringma mih la hai adipükchow mih la ün thawpah büah now uang pawla büah khai.26Pe kown nau miuüa hai tuk thawp la mih masiuüa srui dow rua pawi hown thawp la hanow uang pawla büah khai.27Now aluchowuüa dow ephawd kowrmow hai owngphowr im luk kowi nadanah kownkow “oniks” hua hai asung khakma mih akeng mih hua ün uang pawla khai.28Nami klen kowi maibu towk müa sau ün, nümnap müa sau ün, anam iungma mih maikhük towk müa than hai kanrawn sau ün uang pawla khai.29Mosi kowi kowh CHAKRAMANG peah ana mih maten nachangla kownkow Israeluüa mih uang pawla uanh khai. Amatni dow masiuüa hai kachakuüa pe kown nau mih maten CHAKRAMANG vüi uang pawla uanh büah khai.30Nami kung kowi Israeluüa kowi Mosi tek pe mih, “Sünta büa diah, Juda krungchak kowi kowh Uri chapa Bezalel kowi CHAKRAMANG lang klota khowk. Uri dow Hur kowh chapa chekhai.31Bezalel kowi dow Thurai mih aia lümla hown kruiah khowk. Aia kowi dow prengia, tukra, chanlaira hai achap kawm nachangla kown mih kür Thurai peta khowk.32Naiawng rakowi aia dow kuh, tai, kri, asung khakma mih hua hai singh hown klangiung klangiungma mih uanh natuk thawp kown.34Nami klen kowi akeng miuüa kowi paw naiawngün lup nowng sangla kownkow Bezalel hai Dan krungchak hownia kowh Ahisamak chapa Oholiab kowi CHAKRAMANG peta kür khowk.35Amatchi kowi dow aruama süah mih ruapur pawi hown ün, arikma süah mih ruapur pawi hown ün, aringma süah mih ruapur pawi hown ün, adipükchow mih la hown ün natuk sawt bawng kownkow hai natuk kawng uan kown mih kür CHAKRAMANG peta khowk. Nami klen kowi singh, hua hai lawngha kowi rut tua lup maten amatchi dow natuk chang kown, now kowmatia kow thawn hown bawng ün maiow maiow natuk thawp iüah kown,” pakhai.
The Seed Company