1 Samuel1
1Israel chuprek chaprek Efraimuüa kowh hungma mawngma süng kowi Rama marow kowi Elkana pami maru uowi lowk ia. Aia dow Efraim krungchak Jeroham kowh chapa chekhai. Jeroham dow Elihu kowh chapa, Elihu dow Tohu kowh chapa, now Tohu dow Zuf kowh chapa chekhai.2Elkana kowh dow masi uowi pre ma. Lowk ia mih ming dow Hanna, now alowk mih ming dow Penina chekhai. Penina dow ka chah chekhai. Nachenganchepaw Hanna dow ka chah dowi chekhai.3Elkana dow ning towng amatni kowh marow hownia Silo marow kowi kowkowi reng. Aia dow Silo marow kowi kowkowi now lang kri lang kraing mih CHAKRAMANG kowi chupiiaah reng, now tawncher hown kowh phuchua paw changla reng chekhai. Nami khin khe Silo marow kowi kowh chang uamow lup miuüa dow uamow Eli kowh chapa Hawpni hai Finehas iüah chekhai.4Tawncher hown chang phuchua mih ni khe Elkana dow amasi Penina hai aia kowh chauüa maten kowi changla phuchua mih chaknga hownia pela abak chi khai.5Tawkche Hanna kowi dow CHAKRAMANG pe kaah chah dowi chepaw lang sakrauah rakowi aia changla phuchua mih chaknga hownia aia peah pre bak khai.6Hanna kowi CHAKRAMANG pe kaah chah dowi rakowi aprawimow Penina mih atungma khareah hanow peah saktuak kawm khai.7Naiawng Hanna kowi Penina khareah hai peah saktuak kawm mih dow ning towng Silo kowi cham chup Thurai büah mih khin khe chekhai. Naiawng rakowi Hanna dow cha dowi kham dowi kowi hing karta hüah khai.8Naiawng uowi mih ahua Elkana khita now Hanna kowi tek pe mih, “Tawng rakowi chow en lang kar rereng? Tawngplawng kowchow tawngpaw en cha en kham dowi? Tawng rakowi chow khowt pat en sak kowi rau? Chapa uowi hamüt ia mih lak-e ang lowk iachow uowi mih lang iung nadowi bow?” pakhai.9Akat dow Silo marow kowi ki changta phuchua hanow nami phuchua ngar ki chata kung kowi Hanna mih kowchup Thurai khai. Nami khin khe uamow Eli dow Thurai chup kim kowi kowh kimplawt re-e chowm rah kowi hawt chowm phülü khai.10Nakhowk khe Hanna dow saktuak kawmkratma hown kar se kar se chup Thurai khai.11Aia dow takham se CHAKRAMANG tut-e maiawng awr lü khai, “Aw lang kri lang kraing mih CHAKRAMANG, ang dow en kowh nar chekhai. Ang kowh saktuak kawm mih mü ang diah, now ang prakowi pela ching diah. Now en che tamata ang dowi kowi pela ang chapa lowk ia khai hanow chownglawng chowng pratma vüi aia kowi ang napeta en kown. Aia kowi dow katpaw nakep pe sam kown nadowi,” pakhai.12Naiawng Hanna chup Thurai mih khin khe uamow Eli mih Hanna nawr prakowi haimüla reng chekhai.13Sakdawng hownia Hanna chup Thurai mih chekhai rakowi nawr taih chü lüplüp; aklow dow taah dowi chekhai. Naiawng rakowi Hanna pua mih naown padow Eli ka tuak khai.14Naiawng rakowi Hanna kowi Eli tek pe mih, “Apuama mün khowt tak chow en nauowi kown? Hang kham grep tui tham bowt. Ching bowt,” pakhai.15Nakhowk khe Hanna klangah mih, “Aw ang kowh chakramang, ang pua mih nadowi. Lainowmma ang kowh saktuak kawm khai. Iu paw ang kham dowi, arak paw ang kham dowi; ang kowh kawmkrat lawng CHAKRAMANG kowi ang phowk pe mih chowtaih.16Ang dow en kowh nar chowtaih. Masiuüa ngakma pami hauang ka tuak ang diah. Lainowmma tuak kawm tuak krat hown ang chup Thurai mih chowtaih,” pape khai.17Nakhowk khe Eli tek pe mih, “En pacham ka sakklamra lah. Israeluüa kowh Thurai tut-e en lüah mih dow aia pacham pe en lah,” pakhai.18Now Hanna tek pe mih, “Mami narma luk kowi en kowh sanara pacham uowi lah,” pakhai. Naiawng tekla now Hanna dow powt khai, now cha chakkham khai bowt. Nami hownia bowt now aia lumowr kowi dow tuak kawm tuak krat mih powm uowi dowi bowt chekhai.19Now auai rau dow murpa awr rü büah hanow kowchupiia Thurai büah khai. Nami kung kowi dow Rama marow kowi kowh amatni kim kowi mang büah khai bowt. Akung kowi dow Elkana mih amasi Hanna hown taphua taiua khai, now CHAKRAMANG dow Hanna awr lü mih ka tuak khai bowt.20Nahanow Hanna dow kum nau khai bowt. Now akhin uang tachi khe dow Hanna mih pen chapa lowk ia khai. Nakhowk khe Hanna tek mih, “Mami chah dow CHAKRAMANG tut-e kowh ang lüah mih chekhai,” pakhai. Naiawng rakowi achapa ming dow Samuel pahai aia rük pe khai.21Auai ning khe Elkana dow ning towng kowh chang reng iawng kimchakuüa kowi pawla hanow CHAKRAMANG vüi tawncher hown nakowchang phuchua kownkow hai takhamta mih uanap nakowchang kownkow Silo marow kowi kowkowi khai iawk.22Nachenganchepaw nami leng dow amasi Hanna mih tawi tarü dowi chekhai. Ahua kowi Hanna tek pe mih, “Ingcha iawn kham towng khe chiang ingcha hailawm CHAKRAMANG pur kowi ang kowkowi kown. Nakhowk khe dow chownglawng prat nakowi nahing uowi kownkow ingcha kowi ang ta towla kown towbowt,” pakhai.23Nakhowk khe ahua tek pe mih, “En tut-e iung iawng chang towbowt. Ingcha iawn kham towng dowi mowr chawng diah towbowt. CHAKRAMANG dow en takhamta iawng en nowng changla kownkow pacham khowng en lah,” pakhai. Naiawng rakowi Hanna dow kim kowi ta uowi khai. Aia dow iawn kham towng dowi mowr achapa kowi thumah mawmah khai.24Now achapa iawn kham towng khe dow Hanna hai Elkana iüah mih achapa kowi pawla now Silo marow kowi kowh Thurai chup kim kowi kowkowi khai bowt. Nakhowk khe amatchi dow sum ning mih chiala apum, kawmdi hamüt set ngia hai grep tui chak pik im hown pa-im pawla iüah khai. Nami khin khe paw achapa dow asowmchow reng tak chekhai.25Nakowi mih amatchi dow ngen chiala hanow CHAKRAMANG kowi phuchuaah khai. Now amatchi kowh chapa kowi dow uamow Eli tut-e kowpawla iüah khai.26Uamow Eli kowi Hanna tek pe mih, “Aw ang kowh chakramang, pre sum ning dowi rawn mami re-e iowng se chup Thurai mih masiuüa kowi en ka tuak reng tak bow? Nami masiuüa dow ang chowbowt.27Nakhowk khe CHAKRAMANG kowi ang lü mih dow mami chah vüi kowi chekhai. CHAKRAMANG dow ang lüah mih pe ang khai.28Naiawng rakowi ang paw mami chah kowi CHAKRAMANG vüi peta mih chowbowt. Aia sing uowi sak uowi mowr dow CHAKRAMANG kowh towbowt,” pakhai. Nami kung kowi dow amatchi huaiu mih CHAKRAMANG kowi chupiiaah khai.
The Seed Company