O MATIUS13
1'Ageena ma wange ena o Yesus wamada'au ma woa geena, de wotagi o talaga ma date'i'a de wogogelu'u geena'a.2O nyawa duru manga lepe yomalomu wihigilolitino o Yesusino, geenau ho Una wo'ai'a o ngootili'a de wogogelu'u geena'a, de o nyawa yolepe-lepe yomahigo'ono o talaga ma date'o'a.3Geena'a o Yesus wo'idoto'o waini-ini'o'a de wapa'e de o hi'atero. Wotemo: <<Naga womatengo wotagi awi baili'a de wohibarihi awi gihihi.4Wa'utu una wohibarihi awi gihihi geena, ma regu iota'a o nge'omo ma date'u'u, geena'a de o namo o ginita'a yaino de yaodomo yaboboti'a.5Ma regu iota'a o tona'a ihe-heleo'u, nage ma tona'a ama ngina-nagina'u. Ma gihihi geena 'a ena iwango'au, hababu ma tona'a iina.6Ma wa'utu o wange yodihiwa, ma gihihi geena imoya ho itoolenge hitigi i honenge, hababu 'aimahingutuu'a.7Ma reguoli iota'a o ubutu ihihihi'a ma doda'u. Ma ubutu geena ihero de ihi'aduu'u, ho ma gihihi geena ihonenge.8Ma ma reguoli iota'a o tona'a yaowa-owa'u, ho ma gihihi geena ihero hitigi ihowo'o, de naga ma regu ilio ihidigali o ratuhu moi, ma regu moributanga, ma regu moruange.>>9Iduangino o Yesus wohiade-ade ma hi'atero geena, Una wotemo, <<Nagonau de manga ngau'o'a tanu yoihene.>>10Geena'a de o Yesus awi ni-nii'i yo'ai'a o Yesusi'a de yohano, <<Aba guru, dodoau ho no'idoto'o o nyawa-nyawa'a de napa'e de o hi'atero?>>11O Yesus wopaluhu, <<Hababu, ngini ni'ula'au o cocatu la nia na'o icara'iau ma Jou wo'oana, ma ona'a o uwa.12Hababu to nagonau de ma ena'a, geena aha yo'i'ula 'age'au ilepe. Ma to nagonau amanga 'iawa, ngaro ama ube-ube'awa, geena ma aha yaehe.13Geenau ma hababu ho, Ngoi to'idoto'o o nyawa-nyawa'a tapa'e de o hi'atero, hababu ona yama'e, ma harage 'ayama'ewa; ona yoihene, ma harage 'ayoihenua de o yomamangaratiiwa.14De o geena imadadi harage 'ao nabi Yesaya wohingahuo'au, Ma Jou wotemo:<Ona aha yoihene 'aitogu-togumuama ona o yoma mangaritiiwa;Ona aha yodadananoho 'ai togu-togumuama ona aya na'owa o iau idadi.15Hababu o nyawa-nyawa noona manga hininga iopino'au.Manga ngau'u 'ayoolu'ou yoihene.De manga la'o yaruwutu yapau-pau'u.La ona uwa yama'e de manga la'o.La ona uwa yoihene de manga ngau'u.De ona uwa yoma mangariti de manga hininga.La ona uwa yoma'ilio Ngoino la To 'ihihalamata.> >>16O Yesus wotemo awi ni-nii'i'a, <<Duga ngini duru nio utumu, hababu ngini igou-goungu nia ma'e de nio ihene.17Nia hi-hiningae, o nabi-nabi de o nyawa yotitiai ma Jou'a, manga lepe, yomau yama'e o iau nage nia ma'e o oraha neena, duga ona 'ayama'ewa. Ona yomau yoihene nage o oraha neena nioihe-ihene, duga 'ayoihenua.>>18<<Nio ihene, ma mangariti mangale o gihihi wohibari-barihi 'aano ge.19O gihihi ge iota'a o nge'omo ma date'u'u, geena harage 'ao nyawa-nyawa yoihene o habari mangale icara'iau ma Jou wo'oana, ma oyoma mangaritiiwa. Ho o to'ata iboa de yaehe ma habari geena manga hininga'a.20O gihihi iota'a ge o tona'a ihe-heleo'u, geena harage 'ao nyawa-nyawa yoihene o habari geena, de yadawongo de manga hininga ma garago.21Ma habari geena 'aimahingutu'ua to ona manga hininga'a, ho wa'utu ona yaohana o huha bolo o aniaya mangale ma habari geena, 'ageena ena yamada'au ma habari geena.22Nage iota'a o ubutu ihihi'a'u, geena harage 'ao nyawa nyawa-nyawa yoihene o habari geena, ma yododato de manga wowango, yodabali o dunia ma arata. Ho ma habari ihi'aduu'u manga hininga ma doda'a, hitigi 'aihowo'ua.23De o gihihi ge iota'a o tona'a yaowa-owa'u, geena harage o nyawa-nyawa yoihene ma habari geena, de yoma mangariti. Ho hiadono ihowo'o, ho muna'a ma giliono o ratuhu moi, muna'a moributanga, muna'a moruange.>>24O Yesus wohijaritali o nyawa-nyawa'a, o hi'atero moioli, Wotemo, <<Na'o ma Jou wo'oana, geena harage onane; Womatengo o baili ma dutu, una wohibarihi o gihihi yaowa-owa awi bailo'a.25O wutu moi'u, wa'utu o nyawa-nyawa yo'o'inihu'o'au, geena'a ma baili ma dutu guuna awi haturuu yoboa, yodutudu'u o nguuhumu awi gandumu ma bailo'a, de yotagi.26Wa'utu ma gandumu geena iwango, de ma howo'o ma ihupu, ma nguuhumu ma iwango harage ama gandumoli.27Wa'utu awi nyawa yo'a'arajaanga yama'e ma nguuhumu geena, de yotemo una'a, <Tuanga aewolo, ma moi'u notudu'u 'ai bailo'a o gihihi yaowa-owa? Ho 'ia'a de yaino ma nguuhumu?>28Ma baili ma dutu guuna wopaluhu, <Geena marai 'ai ha-haturuu yodiai.> Geena'a de yo'a'arajaanga yohanoli, <Ho 'anomode'e ma ngu-nguuhumu geena miaapu'u?>29Una wopaluhu, <Uwa, hababu na'o niaapu'u, done ma gandumu imahinii'i iapu'u.30Niamada'a ma ngu-nguuhumu geena iwango ima 'anii'i hitigi ma oraha yaadono pautu'u. Ngoi aha totemo youtu-utu'i'a: O nguuhumu ihila nia utu'u, la nia li'o de nia tuu'u. Geena'a de aha nia utu'u ma gandumu de nialomu 'ai tila-tila'a.> >>31O Yesus wohijaritali o nyawa-nyawa'a o hi'atero moi, Wotemo, <<Na'o ma Jou wo'oana, geena ma jarita harage 'ao hi'atero neena; Woma tengo waehe o sawi ma mui de watudu'u awi bailo'a.32O sawi ma mui geena duru 'ao ete'e. Ma na'o iwango'au, moi-moi o joro 'aenahi iamo'o. Ena ima dadi o gota ma amo'o, ho o namo o ginita'a ma ya'aino ima diigutu ma jaga-jaga'a.>>O sawi ma utu33O Yesus wohijaritali o nyawa-nyawa'a o hi'atero ma reguoli. <<Na'o ma Jou wo'oana, geena ma jarita harage 'ao ngewe'a momatengo ma ehe o ragi de mohi'aruae de o terigu o kilo moruange, hiadono ihero moi-moi.>>34O Yesus wo'idoto'o o nyawa-nyawa'a moi-moi wapa'e de o hi'atero.35De o geena la idadi harage 'ao nabi watehongo'au,<<Ngoi tapa'e de o hi'atero na'o mima'aade-ade de ona;Ngoi tohingahu o haala ihipongo-pongoni'a wa'utu o dunia neena idadi.>>36Geena'a de o Yesus wo'imada o nyawa yolepe-lepe, de woohama o woa'a. Awi ni-nii'i yo'ai'a de yotemo, <<Aba guru, bee'a nimihingahu ma mangariti, ma hi'atero mangale o gandumu de o nguuhumu.>>37O Yesus wopaluhu, <<O nyawa ge wohibari-barihi o gihihi ma owa, geenala o Nyawa ma Ngoa'a.38O baili geena, o dunia. O gihihi yaowa-owa, geenala o nyawa-nyawa ge yodadio'au ma Jou awi umata. O ngu-nguuhumu geenala, o nyawa-nyawa ge yodadio'au hara 'ao wini-nii'i o to'ata ma 'oani'a.39O haturuu ge yotudu-tudu'u o ngu-nguuhumu geenala, o to'ata ma oana. Ma oraha youtu'u geenala, o wange o dunia ma baha, de youtu-utu'u geenala, o ma-malai'ata.40Ho'o'ia o ngu-nguuhumu yalomu de yatuu'u o u'u'a, o geenali wa'utu o dunia ma baha.41O Nyawa ma Ngoa'a aha wohulo'o o ma-malai'ati'a, la yo'ilomu o nyawa-nyawa ge mangale ona ho o nyawa-nyawa yobaradoha, de moi-moi ge o nyawa yodidiai o baradoha.42Ona moi-moi aha yo'iumo o berehoo'a ge ma u'u ito'a-to'ari'a; geena'a aha ona yoali de yohangihara.43Ma o nyawa ge yadi-diai ma Jou awi pareta, aha yobangoro harage 'ao wange, ma Jou ma Dutu awi pareta'a, ho nagonau de manga ngau'o'a tanu yoihene.>>44<<Na'o ma Jou ma wo'oana, geena ma jarita hara 'ao hi'atero neena: O nyawa womatengo wama'e o arata o bailo'a o tona'a ma doda'a, geena'a de unama wohibaitoli o tona'u'u. Geena'a de mangale wogarago ho ma nyawa guuna wotagi wawu'unu moi-moi awi arata, geena'a de una woma'ilio de wagoo'o ma baili geena.>>45<<Na'o ma Jou wo'oana, geena ma jarita harage 'ao hi'atero neena: Womatengo womawu'u-wu'unu, wohali'i o mutiara ihali-hali.46Wa'utu una wama'e o mutiara moi duru ira-rahai, 'ageena ena wotagio'au wawu'unu moi-moi awi arata, de wagoo'o ma mutiara geena.>>47<<Nao ma Jou wo'oana geena ma jarita ihi'atero harage 'ao homa yaumo'u o talaga'a, de yadaene ma nao'o iini-ini'o'a.48Wa'utu ma homa geena yaomango'au, ma homa geena yagoa'a o du-dungiha. Geena'a de ona yatinga'a ma nao-nao'o geena: Ma nao'o yaowa-owa yaiyunu manga udi'u, de ma nao'o iti-tiiha yaumo.49O geenali aha idadi wa'utu o dunia ma baha yaadono, wa'utu geena o ma-malai'ata aha itagi yo'ihi'atinga'a o nyawa yoba-baradoha, de o nyawa ge yadi-diai ma Jou awi pareta.50Geena'a de aha o nyawa yoba- baradoha yo'iumo o u'u 'aihone-honengua. Geena'au aha ona yoali de yohangihara.>>51O Yesus wohano, <<Bote nima ma mangariti geena moi-moi?>>
Ona yopaluhu, <<Aba guru, ngomi mimangariti!>>52Geena'a de o Yesus wotemo, <<Geenau ma hababu, ho ma noimi o agama'a yodoto-doto'o, yodadio'au ma Jou awi awaha, geena ma jarita harage 'ao woa ma dutu wohihupu, awi arata ma hungi de ma hila ma ngi-ngiino.>>53Iduangino o Yesus wohijarita ma hi-hi'atero geena, Una wamada ma dingii geena,54de wotagi awi hoani'a. Ido'a Una wotagi o dodoomu ma woa'a de wo'idoto'o, wa'utu o nyawa-nyawa geena yoihene, ona duru yoheranga, ona yotemo, <<Ma nyawa nuuna ianou woma dama'e o 'umati geena? De ianou womadama'e o 'uaha geena ho wodiai o haala ihera-heranga?55Ae ma Nuuna o woa wodidiai awi ngoa'a? Nage ma eha o ngo Maria; de Awi riado-doto nage nao, Yakobus, o Yusuf, o Simon de o Yudas.56De Awi bila-bilanga ma yogogele neena'a? Ho 'ianou womadama'e geena moi-moi?>>57Geena'a de ona ayoolu'u widawongo. O Yesus wotemo ona'a, <<O nabi moi ia'a naga wai'a geena wihoromati, ma na'o awi hoana de awi woa'a, geena awi horomatiwa.>>58Mangale ona awi nga'uwa o Yesusi'a ho, Una 'ai lepewa wodiai o haala ihera-heranga geena.
Ona yopaluhu, <<Aba guru, ngomi mimangariti!>>52Geena'a de o Yesus wotemo, <<Geenau ma hababu, ho ma noimi o agama'a yodoto-doto'o, yodadio'au ma Jou awi awaha, geena ma jarita harage 'ao woa ma dutu wohihupu, awi arata ma hungi de ma hila ma ngi-ngiino.>>53Iduangino o Yesus wohijarita ma hi-hi'atero geena, Una wamada ma dingii geena,54de wotagi awi hoani'a. Ido'a Una wotagi o dodoomu ma woa'a de wo'idoto'o, wa'utu o nyawa-nyawa geena yoihene, ona duru yoheranga, ona yotemo, <<Ma nyawa nuuna ianou woma dama'e o 'umati geena? De ianou womadama'e o 'uaha geena ho wodiai o haala ihera-heranga?55Ae ma Nuuna o woa wodidiai awi ngoa'a? Nage ma eha o ngo Maria; de Awi riado-doto nage nao, Yakobus, o Yusuf, o Simon de o Yudas.56De Awi bila-bilanga ma yogogele neena'a? Ho 'ianou womadama'e geena moi-moi?>>57Geena'a de ona ayoolu'u widawongo. O Yesus wotemo ona'a, <<O nabi moi ia'a naga wai'a geena wihoromati, ma na'o awi hoana de awi woa'a, geena awi horomatiwa.>>58Mangale ona awi nga'uwa o Yesusi'a ho, Una 'ai lepewa wodiai o haala ihera-heranga geena.
The Seed Company