O MATIUS14
1Wa'utu geena o Herodes wo'oana o Galilea ma daera'a, woihene o Habari mangale o Yesus.2O Herodes wotemo nage awi daera ihibalu-baluhi'a, <<Ee, marai nuuna o Yohanes woohi-ohi'i wowango'auoli! Geenau ho Una awadadi wodiai o haala ihera-heranga.>>3Hababu ma hila, o Herodes wohulo'o witago'o de wili'o o Yohanesi'a la wihiohama o bui'a. O Herodes wodiai o geena, mangale mimodo'a awi dawulu ma dutu, geenalah o ngo Herodias, o Filipus ma we'ata.4Hababu ma hila o Yohanes wotemo o Herodesi'a, onane, <<'Ai dadiwa nomimodo'a o ngo Herodias!>>5Ho o Herodes awi hininga ma doda'a womau witooma o Yohanesi'a, duga una wo'idomodongo o nyawa yolepe-lepe'a, hababu ona yana'o'au o Yohanes geena o nabi moi.6Wa'utu o Herodes wodiai o rame mangale awi umuru idogo o taunu moioli, geena'a o ngo Herodias ami ngoa'a momatengo o moholehe moroge o Herodes de awi nyawa-nyawa yoboa-boano manga biono'a. Ami roge geena o Herodes awi hininga yadaene,7ho o Herodes wojaji hitigi wo'oboto muna'a, ngaro oiau hona mogaaho'o maraio'au mi'ula.8Mangale ma eha mibaja, ho ma ngoa'a gumuna motemo, <<O oraha neena ngoi togaaho'o o Yohanes woohi-ohi'i awi hae'e o baki'u nanoa'u de no'ulano!>>9Ma oraha o Herodes woihene ami ga-gaaho'o, una duru awi hininga ihuha. Ma mangale wojajio'au awi nyawa-nyawa manga biono'a ho, una wohinii'i ma ngoa'a gumuna ami ga-gaaho.10Geena'a de o Herodes wo'ihulo'o awi nyawa'a, la yo'ai'a o bui'a de yatobi'i o Yohanes awi hae'e.11Geena'a de o Yohanes awi hae'e yaaha yohiohama yanoa'u o bakio'a de yo'ula muna'a. Muna ma o ota'a ma eha'a.12Geena iduangino o Yohanes awi ni-nii'i ya'aino yaehe awi maiyeti de yapoohu'u. Geena'a de ona yotagi yohingahu ma habari geena o Yesusi'a.13Wa'utu o Yesus woihene ma habari geena, Una wopalene o ngootilie de wotagi o dingii ililili'a. Ma wa'utu o nyawa-nyawa yoihene na'o o Yesus wongootilo'au, ona yamada manga benda-bendara de yotagi wituulu o Yesusi'a yaboa o du-dungiha.14Wa'utu o Yesus wouti o ngootilo'a de wau'u, Una wo'ima'e o nyawa duru manga lepe, Una duru wo'idora. Geena'a de yopa-panya'e wo'ihitogumu.15Wa'utu o wange i'umulu'o'au, o Yesus awi ni-nii'i yomahidutu'u o Yesusi'a de yotemo Una'a, <<Neena o wange i'umulo'o'au, de ma dingii neena imatinga'ino. Iholoi yaowa Aba Guru, no'ihulo'o ma nyawa-nyawa noona la yotagi, la yomadogoo'o o inomo o hoa-hoani'a.>>16Ma o Yesus wotemo ona'a, <<Uwau yotagi, nginiou halingou nihi odomo.>>17Awi ni-nii'i yopaluhu, <<Neena'a naga 'amia roti motoa'a, amia nao'o ma 'amodidio'a!>>18O Yesus wotemo, <<Niaahano,>>19Geena'a de Una wo'ihulo'o o nyawa-nyawa yogogele o ubuto'a. Una waehe ma roti motoa de ma nao modidi geena, de womatawagade o horogade de Wotemo amo owa ma Jou ma Dutu yaomanga-omanga de. Iduangino Una wapela-pela'a ma roti de awi giama, wo'ula Awi ni-nii'i'a la yo'ihi'ado'u o nyawa-nyawa'a.20Ona moi-moi yoodomo hitigi yo'ipunuhu. Iduangino geena o Yesus Awi ni-nii'i yalomu ma inomo ma holoi o udi mogio de modidiohi.21Wa'utu yoodomo geena'a, 'ao naulohi yaribuhu motoa, geena 'ayo'idoimuahi o nge-ngewe'a de o ngoa-ngoa'a.22Geena iduangino o Yesus wo'ihulo'o awi ni-nii'i'a yopalene o ngootilie, la yotagi yohila o talaga ma hononga'a, geena'a de o Yesus wo'ihulo'o o nyawa yolepe-lepe yolio.23O nyawa yolepe-lepe yolio'a, o Yesus wohawu o de'ude de uma dahaubayanga, wa'utu italuho'au ma Una 'ageena'ahi.24Ena awi ni-nii'i manga ngootili, o talaga ma gorona'au yai'a. Manga ngootili geena o mo'u-mo'u yapo'a, mangale o dado'o manga bionino.25Wa'utu i'initau o Yesus wo'ai'a ona'a, de womadagi o a'ele ma de'uha26Wa'utu awi ni-nii'i wima'e, Una uma dagi o a'ele ma de'uha, ona duru yohidodo'ana, ho yomaorehe, <<Ayoyai, o to'ata!>>27Ma o Yesus wotemo ona'a, <<Nimaliili! Uwa nio hawana. 'A Ngoi ho.>>28Ho o Petrus wotemo, <<Na'o Ngona igoungu o Yesus, noihulo'o la ta'ai'a toma dagi o a'ele ma de'uha.>>29O Yesus wopaluhu, <<Nainou.>> Geena'a de o Petrus wouti o ngootilo'a de wau'u, de womadagi o a'ele ma de'uha de wo'ai'a o Yesusi'a.30Ma wa'utu o Petrus wamao o dado'o duru iuata ma talaga'a geena, una wohawana ho wolutu, de woma orehe, <<Jou, noiduhunu.>>31Geena'a de o Yesus widoa'a, de wagagao o Petrus awi giami'a, de wotemo, <<E Petrus, ngona neena i'uranga Noinga'u. Dodoau ho ani hininga 'ilio-lio?>>32Geena'a de o Yesus de o Petrus yopalene ma ngootilie geena, de ma dado'o ma iliili.33Ho awi ninii'i wihuba o Yesusi'a. Ona yotemo, <<Igoungu, Nuuna ma Jou ma Dutu Awi Ngoa'a.>>34Wa'utu ona yoma hiadoni'a o Talaga ma hononga'a, ona youti o Genesaretiha.35Geena'a de o nyawa-nyawa wina'o o Yesusi'a, ona yohihabari ma habari geena, o bendara ma hiridateino. Geena'a de moi-moi yopa-panya'e yo'iaha o Yesusi'a.36Ona yogaaho'o o Yesusi'a la tanu wo'ihigumada yagagao awi baju i'a'a'ulu'u ngaro ama baleni'a. Ho nyawa moi-moi manga panya'e ia'i.
The Seed Company