O MARKUS7
1Ma moi geena o Farisio'a ma nyawa de o agama'a yodoto-doto'o yamuluo naga o Yerusalemino, ya'aino o Yesusino.2Ona yo'ima'e o Yesus awi ni-nii'i yamuluo naga yoodomo manga giama 'ade ma beree'o'a, imote'e manga agama ma 'autoranga na'o yoodomo halingou yomaiho'o ihila.3O Farisio'a de o Yahudio'a duru yodomote'e manga dotumu manga adata. Ona 'aidadiwa yoodomo na'o manga giama 'ayomaiho'ua, ho'o'ia ihi tatapuo'au.4O 'iau nage o paharo'a yagoo'ino 'aidadiwa yaodomo na'o 'ayaiho'ua. De 'ao lepehi manga dotumu manga 'autoranga yanii'i: Geenala manga galaaha yaiho'o, manga hawo'o manga pa'a'aha o tambaga.5Geenau ho o Farisio'a de o Yahudio'a manga agama'a ma balu-baluhu, yohano o Yesusi'a, <<Dodoauho Ani ni-nii'i yoodomo de manga giama 'ayaiho'ua? Idodoau ho 'ayodinii'ua mia dotumu manga 'autoranga?>>6O Yesus wopaluhu, <<Ayo ngelu-ngelu'u! Haraitiaio'au ma hila o nabi Yesaya wohingahuo'au mangale ngini:<Onane ma Jou ma Dutu wotemo,O nyawa-nyawa noona ipuji 'amanga ulu ma 'aio'a,Ena momongo manga hininga ma ga'ulu itinga'a.7Paracuma ma nyawa-nyawa noona ipuji,Hababu yo'ihidoto'o o nyawa-nyawa'a,Ao nyawa manga 'autoranga yanii'i.>8Ma Jou ma Dutu awi pareta anioihenua, ma nianii'i o nyawa manga 'autoranga.>>9Geena'a de o Yesus wotemoli, <<Hara'ania pade'a ma Jou ma Dutu awi pareta niatili'utu, mangale ngini nianii'i nia dotumu manga 'autoranga.10O Musa wo'ula'au o behehongo neena, <Ni'ihoromati nia eha de nia dea, De nagonau yo'iade-ade yo'irohu-rohu manga eha e'ola manga dea, goona halingou yo'ihumu hitigi yohonenge.>11Ma ngini ni'idoto'o o nyawa'a: Na'o o nyawa yotemo manga dea'a, <O 'iau nage halingou to'ula 'ai eha de 'ai dea'a, geena to'ula'au ma Jou ma Dutu'a,>12'Ogeena ni'idoto'o ona'a, geena harage 'aniotemo ona'a, ngaro uwau ni'iduhunu nia eha de nia dea.13Ho ma niado-doto'o geena, ni'i'ula o nyawa-nyawa'a, ngini ma hirete niayoihanga ma Jou awi pareta. De 'ao lepehi ma haala 'ogeena niadiai.>>14Geena iduangino o Yesus wo'iaho'oli o nyawa yolepe-lepe de wotemo ona'a, 'onane, <<Nioihene niohididiai o 'iau nage totemo la nimahi na'o.15O 'iau nage iohama o nyawa manga ulu'o, geena 'aimadiaiwa o beree'e, ho yobaradoha ma Jou'a. Ma, o 'iau ihupu ge o nyawa manga uluha geenala imadadi o beree'e, ho yobaradoha, ma Jou'a. [16Ho, nagonau de manga ngau'o'a tanu nioihene.]>>17Wa'utu o Yesus de awi ni-nii'i yo'imada o nyawa yolepe-lepe de yoohama o woa moi'a. Awi ni-nii'i yohano ma mangariti ma hi'atero geena.18Geena'a de o Yesus wotemo ona'a, <<O ho ngini ma 'animahina'owa? Ee ngini ma niana'o'au, o 'iau nage o nyawa yaodomo geena 'aimadiaiwa o beree'e, ho yobaradoha ma Jou ma Dutu'a?19Hababu o inomo 'aiohamua nanga hininga'a, ma iohama 'ananga po'o ma doda'a geena'a de aha ihidagioli.>> O Yesus womaade-ade 'ogeena awi ma'uhuutu, geena la moi-moi o inomo 'ai dadi paodomo.20O Yesus wotemoli, <<Ma o nyawa manga demo-demo ihupu manga uluha, geena la imadadi o beree'e, ho yobaradoha ma Jou'a.21Hababu o nyawa manga hininga ma dodano, ihupu moi-moi iti-tiiha: Manga didibanga iti-tiiha, itiyoma'apa'e'a, yotohi-tohi'i, o nyawa yoto-tooma,22yohowono, yonyahihuu, yobu'u, yoho-hohedu, yoere, de yopihi-pihi.23Moi-moi ge iti-tiiha geena 'ipuda o nyawa manga hingina ma dodano, ho na'o o nyawa yodinii'o'au, geena 'imadadi o beree'e ho yobaradoha.>>24Geena'a de o Yesus wawamada ma dingii geena, de wotagi o Tirus ma bendara ma date'o'a. Una awogila-gila woohama o woa moi'a, hababu awoolu'u o nyawa wina'o una geena'a. Ma ngaro 'ogeenau, ma o nyawa-nyawa awi na'o'a, na'o o Yesus geena'a naga.25Geena'a o ngewe'a momatengo, ami ngoa'a o ngewe'a yodongohami'a o to'ata. Muna migiihene o Yesus ho ma'ai'a de matilabu'u'u o Yesus awi biono'a,26De mogaaho'o la tanu waginii'i ma to'ata geena. Muna geena 'ao Yahudio'awa ma nyawa. Muna momaboa o Siria ma daera'a, o Fenesia ma bendara ma date'o'a.27Ma o Yesus wotemo muna'a, <<Mada'ala o ngoa-ngoa'a ihila yoodomo ihila, ayadaenua na'o ngoa-ngoa'a manga inomo de po'ula o 'aho'a.>>28Geena'a de ma ngewe'a gumuna mopaluhu, <<Itiai Aba. Ma ma 'aho geena yaodomo, 'a ma rue-rue o ngoa-ngoa'a yaota-ota'u'u o ama'a ma timio'a .>>29Geena'a de o Yesus wotemo muna'a, <<Mangale ani babaluhu geena. Ho noliou! Ma to'ata ge midodongohami'a ani ngoa'o'a ihupuo'au.>>30Geena'a de ma ngewe'a gumuna molio. Muma mima'e'a ena ami ngoa'a monihu'o'au o daha'a. Hababu ma to'ata ihupuo'au.31Geena iduangino, o Yesus wamada o Tirus ma daera, waboa o Sidon ma bendari'a. Una wotagi o Galilea ma talaga'a o Dekapolis ma daera'a.32Geena'a womatengo o nyawa wopongo de womou wiahano o Yesusino. Ona yogaaho'o la o Yesus wodatami awi giama wopongo-pongo'a la woai'i.33O Yesus wihitinga'a ma nyawa guuna, o nyawa yolepe-lepeno, geena'a de o Yesus awi raraga wohi'ahononga wodohongoda'a ma nyawa guuna awi ngau'i'a, waobili de wananauhu awi ahi-ahili ma nyawa guuna.34Geena'a de o Yesus womatawaga o diwangie de woomaha wapau-paude de wotemo una'a, <<Efata!>> Ma mangariti itemo, <<Ipelenga.>>35'Ageena ena ma nyawa guuna womahiiheno'au de itiaio'au womaade-ade.36Geena'a de o Yesus wo'itaaele la uwa yohijarita o nyawa-nyawa'a. Ma o Yesus 'age'au wo'ituumungu, 'age'au ona ihihabari o nyawa-nyawa'a.37Wa'utu o nyawa-nyawa yoihene ma jarita geena, ona duru yomatodo'ana de duru yoheranga, de yotemo, <<Moi-moi wodiai, wohidi-diai'a! Yopongo-pongo yomahiihene, de yomou-mou yomaade-ade!>>
The Seed Company