O LUKAS14
1Ma moi'u o hiaini ma wange'u, o Yesus wotagi woodomo o Farisio'a manga baluhu awi woa'a. Geena'a o nyawa-nyawa 'awihimadawa manga la'o.2De aha womatengo woboano wobere-bere ho, awi giama de awi dou iobo-oboho.3De o Yesus wohano o agama yodoto-doto'o, de o Farisi ma nyawa'a, <<Imote'e to ngone nanga agama ma pareta, bote 'aidadi o nyawa po'ihi ai'i o hiaini ma wange'u, e'ola 'aidadiwa?>>4O agama yodo-doto'o de o Farisio'a geena 'ayoma li-ililo'a. Ho o Yesus wiaho'ino de wihiai'i, de aha o Yesus wihulo'o wotagi'au.5Iduangino geena o Yesus wo'itemo o nyawa yolepe-lepe'a, <<Na'o ho'awoma tengo nginio'a moi awi ngowa'a e'ola awi hapi iota'a o humu'u o hiani ma wange'u, 'ai dadi bolo 'ouwa wohi hupu awi ngowa'a e'ola awi hapi ma wange geena?>>6Ma 'omoiwa yopaluhu awi ha-hano geena.7O Yesus wo'ima'e yoboa-boano yomadingili'i o go-gogele duru yaowa-owa. Hababu geena Una wo'i'ula, o dodoto'o neena:8<<Na'o ngini niaho'o o modo'a ma ngodomi'a tanu uwa niogogele o daha nage ma bioniha ida-adadu. Hababu uwa hiadono naga woma tengo iholoi wihoromati de ngini, wiaho'o'au,9uwa hiadono ma woa ma dutu niwi aho-aho'ino nimididi hona nage, wa'aino de wotemo, <Uwa nongamo e, ma go-gogele neena 'atongonawa ma atouna neena.> Ho done matiti geena ngona nimae'e ho nogogele dai duru ma du-duno nodadu.10Hababu geena na'o niiaho'o o ngodomi'a, nimadingili'i ngaro 'ama duduno'o, la na'o ma woa ma dutu wa'aino ngonano de wotemo, <Manaio naino la nogogele ma biono'a.> De na'o o geena imadadi ngini iholoi nihoromati de geedau moi-moi.11Hababu nagoonau yomahi 'a'ulie aha wo'ihi'au'u ma nagoonau yomahi tipo'o'u aha wo'ihi 'a'ulie.>>12De aha o Yesus wotemo ma woa ma dutu'a, <<Na'o ngona no'iaho'o o nyawa ani rame'a, yoodomo o wange'a e'ola o wutu'u, uwa no'iaho'o 'a ani ma-manai, e'ola 'a ani riadodoto, e'olah 'a ani tihebanga manga pipi 'iamo-amo'o. Hababu ona geena aha ngonali niaho'o, de na'o o geena, ngona naehe'au ma balaha o'iau ge nodi-diaio'au.13Ho, na'o ngona nodiai o rame, no'iaho'o o nyawa yohu-huha, yo'o'ocela, yopa-paluga de yopilo-pilo'o.14Ngona aha o bara'ati nama'e, hababu ona geena 'ayadadiwa yabalaha ani owa. Ani owa geena ma Jou ma Dutu aha wabalaha ma oraha o nyawa ma owa-owa yomomi'oli o hongenino.>>15Ma oraha womatengo woodo-odomo geena'a woihene o Yesus awi demo, una wotemo <<Duru youtumu o nyawa aha yoodomo de ma Jou ma Dutu na'o Una woboa wodadi o 'oana!>>16Ma o Yesus wotemo una'a 'onaneda: <<Ma moi'u naga womatengo wodiai o rame ma amo'o de wo'iaho'o o nyawa manga lepe.17Ho de ma oraha yaadono'au yorame, ma woa ma dutu wohulo'o yolele-leani'a wotagi la wo'iaho'o nage wo'iaho-aho'o'au, de wobeheongo, <Yainou! Moi-moi itiaio'auho!>18Ma ona moi-moi 'ayomahi looahino. Idiidihila'a wote yolele-leani'a, <Ngoi aha iduangino o tona'a tomadogoo'o, ho 'iani ta taila'o'ahi ho 'tomahilooaha.>19Womatengoli wotemo, <Ngoi aha iduangino tomadogoo'o o hapi o habi motoa ho 'iani tohitailo'ahi 'ai hapi geena ho 'toahilooahae.>20Womatengoli wotemo, <Ngoi aha tomodo'ano ho, ngoi 'aidadiwa to'ai'a.>21Wolele-leani geena wolio, de wohingahu awi tuangi'a. Ma tuanga guuna duru wongamo, de wotemo wolele-leani'a ge, <Itaiti'a notagi o nge'omo ma amo'i'a de o bendaro'ama tapa-tapa'i'a neena. No'iahano o nyawa yohu-huha, yo'o'ocela, yopilo-pilo'o de o nyawa yopa-paluga.>22Geena'a de wolele-leani wotemo, tuanga ani hu-hulo'o to hidagio'au, ma ma gogogele ma lepe'ahi.23Ho ma Tuanga guuna wotemoli, <Notagi o nge'omo ma amo'i'a de o bendara ma duduni'a de no'itooa'ino hagala nyawau, la 'ai woa yaomanga.24Ngini nimaahi-hingina! To'iaho-aho'o'au ge ma, 'ayoolu'u ya'aino ona geena 'oyaodomua 'ai inomo o ama'o'a neena.> >>25O nyawa manga lepe yotagi winii'i o Yesus. O Yesus womalelo'o de wo'itemo ona'a,26<<Na'o o nyawa yoboa ngoino, ma iholoi yo'ihingina manga eha, manga dea, manga we'ata, manga ngoa-ngowa'a, manga riadodoto, e'ola manga roehe mahirete, ona 'aidadiwa Inii'i Ngoi.27O nyawa 'ayoolu'u yomahi mo'uno manga salib, de inii'i ngoi ona 'ai dadiwa yodadi Aini-nii'i.28Na'o naga nginio'a itimoi yomahi go'o o woa i'a-'a'ulie, 'iani wogogelu'u de wadoimo'ahi la, wana'o awi pipi yaadono hiadono iduanga, e'ola 'ayaadonua.29Hababu na'o hiadono una 'owa duanguwa ena ma angi yadiai'u'au, done o 'awaha yama'e geena de wihie-iete.30Ona done aha wihiade-ade yotemo <E iyaahi, ma nyawa nuuna wohigo'o, ma 'awa duanguwa!>31Na'o o 'oana moi awi hurudado yaaribuhu mogio'o'a, yoma'aparaanga de o 'oana moi awi hurudado yaaribuhu monao'o, marai done ma 'oana geena wogogelu'u de ihila 'iani womadoimo'ahi 'aidadi yo'idaali awi haturuu geena e'ola 'aidadiwa.32Na'o una wana'o 'awopauwa, halingou awi haturuu manga ga'ulo'ahi, una wo'ihulo'o'au awi nyawa la wogaaho'o yomahi 'alooaha.>>33Wohibobaha o Yesus wotemo, <<O geenali de ngini. 'Amoiwa ngini neena idadi ni-nii'i Ngoi, na'o 'aniamadawa moi-moi.>>34<<O gahi geena yaowa, mana'o de ialio'au, done 'aidadiwau ihigahi35Ma guna 'oiwau, ho 'aobailo'ama 'aidadiwau padiai o joro pohihero-hero. Ho ngaro'ai umo'au. Na'o de niangau'o'a, de tanu nioihene!>>
The Seed Company