O LUKAS15
1O wange moi'u, manga lepe o balahi teenge yoga-gaaho'o ya'aino la yoihene o Yesu awi demo, noona imote'e o 'awaha o nyawa ma diiha.2O Farisio'a ma nyawa de o agama yodoto-doto'o yo'ulubungu. Ona yotemo, <<Hede'e, iyaahi! Una wo'imanai o nyawa ma diiha, de aha woodomoli dede ona!>>3Ma hababu geena o Yesus wohiade-ade o hi'atero neena,4<<Bali naga ho'awoma tengo nginio'a awi duba o dutu o ratuhu moio'a, de o dutu moi iihanga, ito-to'iau done una wodiai? Marai done una aha wamada'a awi duba morihiwo de hiwo geena o ubu-ubuto'a, de wotagi wahali'i iiha-ihanga geena hiadono wama'e.5Hona'o una wama'eli awi duba geena, geena done una duru womagarago, una aha wamo'uno awi bele'a'a de wohigilio,6ho de wolio'a awi woa'a una wo'iaho'o awi ma-manai de awi tihebanga, de wotemo, <Niaino ngone poma garago. 'Ai duba 'iiha-ihanga ge tama'e'au!>7O geenali: o malai'ata o horoga'a ma duru iholoi yomagarago na'o o nyawa moi poba-baradoha de potoba, imaterowa de ona nage yaamori hiwo de hiwo o nyawa ma owa, 'aipa-paraluwau yotoba.>>8O Yesus wotemoli onane, <<Naga momatengo o ngewe'a ami pipi o haa'a mogioo'o'a o de o ngodumu moi iihanga o 'iau aha modiai? Muna done matuu'u ami hilo de ma parihi ami woa ma doda'a de mohali'i geni'adau hiadono muna ma ma'e ami pipi geena.9Ma oraha muna mama'e ma pipi geena, muna mo'iaho'o ami ma-manai de ami ti-tihebanga, mo temo, <Ngoi duru tomagarago ma ngale 'ai pipi iihango'au de tama'e'ali. Niaino ngone pomagarago!>10O geenali de ma Jou ma Dutu awi malai'ata, aha imagarago na'o naga moi o nyawa ma diiha wamada awi baradoha. Ngaro'a nio nga'u!>>11O Yesus wotemoli, <<Naga woma tengo o dea, awi ngowa'a o naulu yaamidi-dio'a.12Ma dodoto wotemo ma dea'a, <Aba, noi'ulanou 'ai do'u o oraha neena to ngone nanga araata.> Ho manga dea ma wo'i'ato'u manga do'u awi ngowa'a yamidi-di hona geena.13O wange muluo naga ipahano, ma ngo'a o dodoto wawu'unu moi-moi awi do'u geena de wotagi o ngi i'a-'a'uli'a. Ma ma oraha una do'a wowango, awi pipi wohigu-guule de wowango 'awohi hohomoa.14Ho de awi pipi ibooto'au moi-moi, ma hoano'a geena yo'idutu'u o hawini ma oraha, hiadono awi wowango ma, ihaitoa'a.15Ho, wo'arajaanga o nyawa'a ma hoanu'u geena, una wogoa-goana o booko manga bailo'a.16Matiti una duru wihawini, ho una hali'i waodomou o booko ma inomo geena. Ngaro o geena 'amoiwa wi'ula o inomo.17Ma baha'u una woma hingina de wotemo, <O nyawa yo'a'arajaanga 'ai dea awi woa'a o inomo 'ayatila'a de ngoi nengo'a tohihongenou de o hawini!18Ngoi 'iani totagi, tolio 'ai dea'a de totemo una'a: Aba, ngoi tobaradoha'au ma Jou ma Dutu'a de ngona'a Aba19Uwau ngoi noi tehongohi ani ngowa'a. Noi diai ngoi ngaro hara 'a ani nyawa yo'a'arajaanga aba.>20Ho una wolio awi dea'a. Awi woa maga'uli'ahi, ena ma dea wima'e 'au. De duru womagarago ho una woma papalitana wihobo'o de wi'oono de wiame.21Ma ngo'a guuna womaade-ade wotemo, <Aba! Ngoi to baradoha'au ma Jou ma Dutu'a de ngona'a aba. Ngoi 'ai dadiwau noiaho'o ani ngowa'a.>22Ma ma dea wo'iaho'o yolele-leani de wotemo, <Itaiti! Nio ehe o baju itero-itero, de niwihinoa. De o ali-ali niohihopa awi raraga'o, de o tarupa awi douha.23De iduangino geena niaehe o hapi i'u-'utuwulu de niatoa'a. Ngone aha poodomo de pomagarago.24Hababu 'ai ngowa'a neena harage'a wohongeno'au ma, wowangoli; una woihango'a ma, towima'e'ali.> Geena'a de yomagarago.25Ma oraha geena awi ngowa'a o lia'a do'a o bailo'a. Ho de wolio womahi horio'au ma dea awi woano, una woihene o damunu de o liwanga ma ilingi yodohoda.26Una wiaho'ino moi wolele-leani de wohano, yodo-doau o do'a o woa'a?27Wolele-leani ge wopaluhu, <Ani dodoto woliono'au! De ani dea wohulo'o o hapi ma ngowa'a i'u'utuwulu mioto'a, hababu una wima'e'ali awi ngowa'a 'awoha-hananga.>28Ma ngowa'a o lia'a geena wongamo ho 'awo-olu'u woohama manga woa'a geena. Ma, ma dea wohupu de wilalu ho woohama.29Ma, una ma dea'a wotemo, <De ma tau-taunu ngoi tonile-leani aba. 'A mamoiwahi tahagata ani hu-hulo'o aba. Ma ngona o 'iau noi'ula ngoino? 'Ao 'abingi ma 'omaiwa noi'ula la ngoi to odo-odomo de 'ai ma-manai!30Ma ani ngowa'a geena wabootu'u'au ani arata aba, de o ngewe'a yohuda-hudala, ma de woliono, nowi dotoa'a o hapi i'u'utuwulu!>31De ma dea wopaluhu wotemo, <'Ai ngoa'a ngona 'a de-de ngoi neena'a. O'iau to ngoi geena moi-moi to ngonau.32Ma ngone halingou porame de pomagarago, matiti ani do-doto wohongeno'au, ma wowango'ali; una woihango'au ma o oraha neena powima'e'ali.> >>
The Seed Company