Зак.уш28
1[Иордан вес могырыш, Господь Юметын тылат пуымо мландышке куснымеке,] Господь Юметын мутшым колышташ да мыйын таче тылат пуымо Тудын чыла кӱштымашыжым шуктен шогаш тӱҥалат гын, Господь Юмет тыйым мландымбалысе чыла калык деч кӱшкӧ шында.2Господь Юметым колышташ тӱҥалат гын, тыйын ӱмбакет нине суапландарымаш-влак толыт да шукталтыт.3Тый олаштат, пасуштат суапландарыме лият.4Тыйын авагудо саскат, мланде лектышет, шолдыра ден тыгыде вольыкетын презе-пачашт суапландарыме лийыт.5Комдо ден руашвочкет-влак суапландарыме лийыт.6Суапландарыме лият тый пурымет годым, суапландарыме лият тый лекмет годым.7Ваштарешет шогалше тушман-влакым Господь тыйын ончылнет кырен шалата: нуно тыйын ӱмбакет ик корно дене толыт, а тый дечет шым корно дене куржыт.8Господь тыйын клатетым, кидет дене ыштыме чыла пашатым суапландара. Тыланет пуымо мландыште Господь Юмет тыйым суапландара.9Господь Юметын кӱштымыжым шуктен шогаш да Тудын корныж дене кошташ тӱҥалат гын, Господь Юмет, тылат [да ача-кочат-влаклан] товатлен сӧрымыж семынак, тыйым шке святой калыкшым ышта.10Тунам мландымбалысе чыла калык тыйын Господьын калыкше улметым пален налеш да тый дечет лӱдаш тӱҥалеш.11Ача-кочат-влаклан товатлен, тылат пуаш сӧрымӧ мландыште Господь [Юмет] тылат чыла шотышто перкелыкым пуа – шуко шочшо ден вольыкым, мланде лектышым.12Господь тылат шке поянлык аралыме вержым – кавам – почеш, шке жапыштыже тыйын мландышкет йӱрым колта да чыла кид пашатым суапландара. Тый шуко калыклан арымеш пуаш тӱҥалат, а шкеже арымеш от нал. [Тый шуко калык дене озаланет, а нуно тый денет озаланаш огыт тӱҥал.]13Мыйын таче тылат пуымо Господь Юметын кӱштымашыже-влакым колышташ тӱҥалат гын, Господь [Юмет] тыйым почым огыл, а вуйым ышта, да тый ӱлнӧ огыл, а кӱшнӧ лият. Чыла нине кӱштымашым тыршен шуктен шого.14Мыйын таче тылат пуымо кӱштымаш-влак деч пурлашкат, шолашкат ит кораҥ, моло юмо почеш ит кай да нунылан ит служитле.15А Господь Юметын мутшым колышташ от тӱҥал да мыйын таче тылат пуымо Господь Юметын чыла кӱштымаш ден пунчалжым шуктен от шого гын, тыйын ӱмбакет нине каргымаш-влак толыт да шукталтыт.16Тый олаштат, пасуштат каргыме лият.17Комдо ден руашвочкет-влак каргыме лийыт.18Тыйын авагудо саскат, мланде лектышет, шолдыра ден тыгыде вольыкетын презе-пачашт каргыме лийыт.19Каргыме лият тый пурымет годым, каргыме лият тый лекмет годым.20Кеч-мом ыштет гынат, Господь тыйын ӱмбакет каргымашым, пудыранымашым да азапым колта. Господьым коден, осалым ыштыметлан тый пытарыме лият да пеш вашке колет.21Господь тыйын ӱмбакет шучко черым колта, сеҥен налаш кайыме мландет гыч тый пытарыме лият.22Господь тыйым чахотко, шокшымужо да йӱштымужо дене черландара. Тудо тылат пелтыше шокшым, когартыше мардежым да шемуржам колта. Нине азап-влак тыйым орландараш тӱҥалыт, колымо марте шуктат.23Вуй ӱмбалнет кава вӱргене гай, а йол йымалнет мланде кӱртньӧ гай пеҥгыде лиеш.24Йӱр олмеш Господь мландышкет пуракым колта. Тыйын колымешкет, кава гыч ӱмбакет лач пурак йогаш тӱҥалеш.25Тушманет-влак тыйым кырен шалатат: нунын ваштареш тый ик корно дене лектат, а нунын деч шым корно дене куржат. Тыште Господьын кидше лиеш. Тый мландысе чыла кугыжаныш еда шалатен колтымо лият.26Тыйын колышо капет чыла кайык ден янлыклан кочкыш лиеш, нуным поктен колтышо нигӧ ок лий.27Господь тыйын ӱмбакет Египетыште лийше кокшам, тыгак пуалын шӱймашым, котырым, удыртыш черым колта. Нунын деч тый от тӧрлане.28Господь тыйым ушдымым, сокырым да шонен моштыдымым ышта.29Кечывал кечын тый, сокыр еҥын пычкемыште коштмыж семын, кидшӱмет дене кошташ тӱҥалат. Тыйын илышет нигузеат ок воране. Тыйым эре шыгыремдылаш, агаш тӱҥалыт, тылат полшышо нигӧ ок лий.30Ӱдырым марлан налаш кутырен келшет, но тудын дене вес еҥ малаш возеш. Пӧртым чоҥет, но тушто илаш от тӱҥал. Виноград аҥам шындет, но саскажым от пого.31Тыйын шинча ончылнет ӱшкыжетым шӱшкылыт, но тый тудын шылжым от коч. Тый дечет осёлетым вӱден наҥгаят да тыланет огыт пӧртылтӧ. Шорыкет-влак тушман кидыш логалыт, тылат полшышо нигӧ ок лий.32Тыйын эргыч ден ӱдырет-влакым вес калыклан пуат. Кажне кечын тый нуным шинчат нойымешке вучаш тӱҥалат, но нимом вашталтен от керт.33Мланде лектышетым да чыла ыштен налметым тылат палыдыме калык кочкеш, а тыйым лач шыгыремдаш да индыраш тӱҥалыт.34Чыла мом ужмет деч тыйын ушет кая.35Господь тыйын пулвуйышкет, йолвургышкет паремдаш лийдыме кокша-влакым колта, нуно капетым йолвундаш гыч вуйлеп марте леведыт.36Тыйым да вуйлаташ шогалтыме кугыжатым Господь тылат да ача-кочат-влаклан палыдыме калык деке наҥгая. Тушто тый пу да кӱ дене ыштыме вес юмо-влаклан служитлаш тӱҥалат.37Чыла калыклан, кӧ дек Господь [Юмо] тыйым поктен колта, тый шучкылыкым лукшо, койдарчык да воштылчык лият.38Пасушто пырчым шуко ӱдет, но лектышет изи лиеш – тудым шурнышырчык кочкеш.39Виноград аҥам шындет, тудым ончен куштет, но йошкар аракам йӱашет ок логал, саскажым от пого – виноградым шукш-влак кочкын пытарат.40Тыйын мландыштет чыла вере олив пушеҥге-влак лийыт, но ӱйжым йыгашет ок логал – олив саскат чыла йоген пыта.41Тыйын эргыч-ӱдырет-влак лийыт, но нуным тый йомдарет – нуным пленыш вӱден наҥгаят.42Тыйын чыла пушеҥгетым чер, мланде лектышетым шемуржа пытара.43Тый денет илыше йотъеҥ тый дечет кӱшкырак да кӱшкырак нӧлталтеш, а тый ӱлыкрак да ӱлыкрак волет.44Тудо тыланет арымеш пуаш тӱҥалеш, а тый тудлан арымеш пуэн от керт. Тудо вуй лиеш, а тый поч лият.45Чыла тиде каргымаш-влак тыйын ӱмбакет толыт. Нуно почешет кошташ тӱҥалыт да, поктен шуын, тыйым пытарат. Вет тый Господь Юметын мутшым колыштын отыл, Тудын тылат пуымо кӱштымаш ден пунчалже-влакым шуктен шоген отыл.46Курымешлан нине каргымаш-влак тылат да тыйын ончыкылык тукыметлан таныклыше да палдарыше пале лийыт.47Чыла тӱрлӧ перкелык улмо годым тый Господь Юметлан куанен да весела шӱм дене служитлен отыл,48сандене Господьын ӱмбакет колтымо тушман-влаклан тый шужышо да сусынышо, чара да пеш чот нужнаҥше тарзыланаш тӱҥалат. Тушман шӱйышкет кӱртньӧ омытам чикта, тыйым орландарен пытара.49Умбачын, мланде тӱр гыч, Господь тыйын ӱмбакет калыкым колта. Тудо арыслангайык семын кержалтеш, тудын йылмыжым тый от умыло.50Тиде калык намысдыме, шоҥго-влакым пагалыдыме, самырык-влакым чаманыдыме лиеш.51Тудо вольыкет ден мланде лектышетым кочкаш тӱҥалеш, да те шужен коледа. Тыланет тудо шурнымат, йошкар аракамат, олив ӱйымат, презе ден пачатымат ок кодо, да те колен пытеда.52Мландыштет улшо чыла олам тудо авырен налеш, да инанен илыме кӱкшӧ да пеҥгыде ола пырдыжет-влак сӱмырлат. Господь Юметын тылат пуымо пӱтынь мландысе чыла олаштет тудо тыйым шыгыремдаш тӱҥалеш.53Олам авырен налмеке, тушманет тылат кугу орлыкым конда, да тый авагудетын саскажым – Господь Юметын тылат пуымо эргыч ден ӱдырет-влакым – кочкаш тӱҥалат.54Тендан кокла гыч эн поро да ныжыл пӧръеҥат шке иза-шольыжо, йӧратыме ватыже да илыше кодшо йочаж-влак ӱмбаке чаманыдыме шинча дене ончаш тӱҥалеш.55Тудо нунын дене йочаже-влакын капыштым пайлаш ок тӱҥал. Нуным тудо шкет кочкеш, вет тидын деч посна тудын кочкашыже нимоат ок код. Теве могай орлыкым тушман тыйын чыла олат-влакым авырен налмеке конда.56Тыйын кокла гыч эн чот нечке, ныжылге ӱдырамашат – тудлан йолжо дене нигунам мландым тошкалаш логалын огыл – шке йӧратыме марийже, эргыже да ӱдыржӧ ӱмбак чаманыдыме шинча дене ончаш тӱҥалеш57да авагудыж гыч лекше азагудым да ыштыме азаж-влакым нунылан ок пу. Шужымыж дене тудо нуным шолып шке кочкаш тӱҥалеш. Теве могай орлыкым тушман тыйын чыла олатым авырен налмеке конда.58Тиде книгаш возымо законын чыла мутшым шуктен шогаш да Господь Юметын чапланыше да кӱдыратле лӱмжӧ деч лӱдаш, тудым шотлаш от тӱҥал гын,59Господь тыланет да тыйын тукыметлан кугу туткарым, кужун шуйнышо неле орлыкым да шучко, парем кертдыме чер-влакым колта.60Господь тыйын ӱмбакет Египетыште лийше чыла [осал] орлыкым конда. Нине орлык деч тый лӱдынат, а ынде нуно тый декет пижын шинчыт.61Господь тыгак ты закон книгашке возалтдыме [да возалтме] чыла тӱрлӧ чер ден орлыкым тылат колта, да тый пытет.62Те кавасе шӱдыр наре шукын лийында. Но те Господь Юмыдан мутшым колыштын огыдал, сандене шагалын кодыда.63Кузе Господь тыланда порым ыштымыж да чотдам шукемдымыж годым куанен, тендам тӱнчыктарымыж да пытарымыж годым тугак куанаш тӱҥалеш. Сеҥен налаш кайыме мланде гыч те ӱштын кудалтыме лийыда.64Господь [Юмет] тыйым чыла калык коклашке – мландын ик тӱржӧ гыч весыж марте – шалатен колта. Тый тушто тылат да ача-кочат-влаклан палыдыме, пу да кӱ дене ыштыме вес юмо-влаклан служитлаш тӱҥалат.65Но нине калык коклаште тылат тыныс илыш ок лий, йолет тушто канаш верым ок му. Господь тылат пырткыше шӱмым пуа, шинчатым начарым ышта, а чонет ойганаш тӱҥалеш.66Илышет шӱртӧ мучаште кечаш тӱҥалеш. Кечывалымат, йӱдымат тый лӱдын чытыраш тӱҥалат, илыше кодат але уке – тый от пале.67Шӱметым лӱдмаш авалтымылан да шинчат мом ужмылан кӧра тый эрдене ”вашкерак кас толжо ыле”, а кастене ”вашкерак эр толжо ыле” манын ойлаш тӱҥалат.68Лач тудо корно дене, кудыж дене тетла каяшет ок логал манын ойленам, Господь тыйым корабль дене мӧҥгеш Египетыш пӧртылта. Тушто тый шкендым тушманетлан кул шотеш ужалаш тӱҥалат, но тыйым налше нигӧ ок лий».
Institute for Bible Translation, Finland