Зак.уш27
1Моисей израиль [калыкын] кугуракше-влак дене пырля калыклан кӱштен каласен: «Мыйын таче пуымо чыла кӱштымаш-влакем шуктен шогыза.2Кунам те Иордан эҥерым вончеда да Господь Юмыдан тыланда пуымо мландышкыже пуреда, тушан кугу кӱ-влакым шогалтыза, нуным татыр дене шӱрыза3да тушан тиде законын чыла мутшым возен шындыза. Господь Юмыдан тыланда пуымо мландышкыже Иордан эҥерым вончен пураш манын, чыла тидым ыштыза. Тиде шӧр да мӱй йогыман мландым Господь, тендан ача-кочада-влакын Юмышт, каласымыж семынак тыланда пуа.4Иорданым вончымекыда, таче кӱштымем семынак, нине кӱ-влакым Гевал курык ӱмбалан шогалтыза, нуным татыр дене шӱрыза.5Тушан Господь Юмыланда жертвенникым, кӱ гыч чоҥымо жертвенникым, ыштыза. Нине кӱ деке нимогай кӱртньӧ ӱзгар тӱкнышаш огыл.6Господь Юмыланда жертвенникым тичмаш кӱ гыч ыштыза да тушан Господь Юмыланда йӱлалтен пуымо надырым кондыза.7Тушан татулык надырым кондыза, [теммеш] кочса, Господь Юмыда ончылно куанен пайремлыза.8Шогалтыме нине кӱэш тиде законын чыла мутшым раш, умылаш лийшын возен шындыза».9Вара Моисей да левит иерей-влак уло израиль калыклан каласеныт: «Шып лий да колышт, Израиль! Таче тый Господьын, тыйын Юметын, калыкше лийынат.10Тугеже Господь Юметым колышт да таче увертарыме Тудын [чыла] кӱштымашыж ден пунчалжым шуктен шого».11Моисей тиде кечын калыклан тыгай кӱштымашым пуэн:12«Кунам Иорданым вончеда, тек Гаризим курык ӱмбаке калыкым суапландараш Симеон, Левий, Иуда, Иссахар, Иосиф да Вениамин тукым-влак шогалыт.13А каргыме мутым ойлаш тек Гевал курык ӱмбаке Рувим, Гад, Асир, Завулон, Дан да Неффалим тукым-влак шогалыт.14Тек левит-влак уло израиль калыклан кугу йӱкын каласат:15”Кӧ пӱчкеден але велен ыштыме шояк юмым – Господьлан йырнык улшо полганым, айдеме кидын пашажым – ышта да, шолып верыш шогалтен, тудлан кумалаш тӱҥалеш, тудо каргыме лиеш”. Тек уло калык ”аминь!” манын каласа.16”Кӧ шке ачаже але аваже нерген осалым ойла, тудо каргыме лиеш”. Тек уло калык ”аминь!” манын каласа.17”Кӧ лишылъеҥжын межажым шке верже гыч кораҥда, тудо каргыме лиеш”. Тек уло калык ”аминь!” манын каласа.18”Кӧ сокыр еҥым кайышаш корныж гыч кораҥда, тудо каргыме лиеш”. Тек уло калык ”аминь!” манын каласа.19”Кӧ йот калык еҥлан, тулык йочалан але тулык ватылан чын судым ок ыште, тудо каргыме лиеш”. Тек уло калык ”аминь!” манын каласа.20”Кӧ шке ачажын изватыж дене мала да тыге ачажым шӱктара, тудо каргыме лиеш”. Тек уло калык ”аминь!” манын каласа.21”Кӧ вольык дене кӱтла, тудо каргыме лиеш”. Тек уло калык ”аминь!” манын каласа.22”Кӧ шке акаже але шӱжарже дене, шке ачажын але аважын ӱдыржӧ дене, мала, тудо каргыме лиеш”. Тек уло калык ”аминь!” манын каласа.23”Кӧ шке оньыкуваж дене мала, тудо каргыме лиеш”. Тек уло калык ”аминь!” манын каласа. [Кӧ ватыжын акаже але шӱжарже дене мала, тудо каргыме лиеш. Тек уло калык ”аминь!” манын каласа.]24”Кӧ лишылъеҥжым шолып пуштеш, тудо каргыме лиеш”. Тек уло калык ”аминь!” манын каласа.25”Кӧ, вес еҥым пушташ да титакдыме вӱрым йоктараш манын, взяткым налеш, тудо каргыме лиеш”. Тек уло калык ”аминь!” манын каласа.26”Кӧ тиде законын [чыла] мутшым шуктен ок шого, нунын почеш илаш ок тӱҥал, [кажне] тыгай еҥ каргыме лиеш”. Тек уло калык ”аминь!” манын каласа.
Institute for Bible Translation, Finland