Зак.уш29
1Теве Господьын Моисейлан израиль калык дене Моав мландыште ышташ кӱштымӧ ойпидышыже – тудо Хоривыште ыштыме ойпидыш дек ешартыш лийын.2Моисей уло израиль калыкым поген да нунылан каласен: «Египет мландыште фараон дене, тудын тарзыж-влак да уло мландыж дене Господьын мом ыштымыжым те шке шинча дене ужында.3Тушто лийше тӱрлӧ кугу орлыкым, палдарыше пале ден ӧрыктарыше паша-влакым, [нӧлталме виян кидым] те шке шинча дене ужында.4Но тачысе кече марте Господь [Юмо] тыланда умылен моштышо шӱмым, ужын моштышо шинчам да колын моштышо пылышым пуэн огыл.5”Мый тендам ир мланде дене нылле ий вӱден наҥгаенам, но тиде жапыште вургемдат тоштемын огыл, йолчиемдат йыгалт пытен огыл.6Те киндым кочкын огыдал, йошкар арака ден руштыктарыше йӱышымат йӱын огыдал. Мый тендан Господь Юмыда улам – тидым палыза манын, тыге лийын”.7Кунам ме тиде верыш толынна, мемнан ваштареш Есевон кугыжа Сигон да Васан кугыжа Ог кредалаш лектыныт, но ме нуным сеҥенна.8Вара нунын мландыштым поген налынна да Рувим, Гад тукымлан да Манассийын пел тукымжылан пуэнна.9Тиде ойпидышын [чыла] шомакшым шуктен шогыза, тунам те чыла пашаштыда сеҥымашке шуыда.10Таче те чыланат Господь Юмыдан чурийже ончылно шогеда – тукымвуй ден кугурак-влак, [судья-шамыч,] вуйлатыше ден моло израиль эрге-влак.11Тыштак улыт тендан шочшыда, ватыда да тендан станыште улшо йот калык еҥ-влак – пум руышо гыч тӱҥалын, вӱд нумалше марте.12Те тыште Господь Юмыда дене ойпидышым ышташ шогеда. Тендан дене Господь таче товатмут дене пеҥгыдемдыме ойпидышым ышта.13Тыге Тудо тендам шке калыкшым ышта да тендан Юмыда лиеш. Тидын нерген Тудо тыланда ойлен да кугезыда-влаклан – Авраамлан, Исааклан да Иаковлан – товатлен сӧрен.14Товатмут дене пеҥгыдемдыме тиде ойпидышым Тудо тендан дене гына огыл ышта.15Тиде ойпидыш кызыт тыште Господь Юмына ончылно шогышо-влак дене, тыгак мемнан деч варасе ончыкылык тукым денат ышталтеш.16Те паледа, кузе ме Египетыште илен улына да кузе тышке толмо корныштына тӱрлӧ калыкын мландышт гоч эртенна.17Те нунын пу да кӱ, ший да шӧртньӧ дене ыштыме йырнык шояк юмыштым ужында.18Тек тендан коклаште, Господь Юмына деке тупынь савырнен, нине калыкын юмыштлан служитлаш кайыше пӧръеҥ але ӱдырамаш, тукым але урлык огыт лий! Тек тендан коклаште аяр ден кочо кушкылым шочыктышо тыгай вож огеш лий!19Тек нигӧ, тиде товатмут шомакым колмеке, шкенжым суапландарыме еҥлан шотлен, ок каласе: ”Умбакыжат шке шонымем семын илем гынат, мый денем чыла сай лиеш”. Уке гын тиде сулыкан еҥ дене пырля титакдыме айдемат пыта.20Господь тыгай айдемын сулыкшым ок кудалте. Тыгай еҥ ӱмбаке Тудын кугу шыдыже ылыжеш, тудын ӱмбаке тиде [закон] книгаште возымо [ойпидышысе] чыла каргымаш толеш. Господь тудын лӱмжым кава йымач ӱштын кудалта.21Тиде закон книгаште возымо ойпидышысе каргымаш-влак дене келшышын, Господь тиде еҥым чыла израиль тукым деч кораҥда да тудым пытара.22Тендан деч вара илыше тукым, тендан йочада-влак, да мӱндыр мланде гыч толшо йот еҥ-шамыч ужыт: Господь тиде мланде ӱмбаке туткар-влакым колтен, тӱрлӧ чер дене тудым тӱлыжтарен.23Уло мланде чӱкчыгиш да шинчал дене когартыме лиеш. Тушан нимом ӱдаш, ончен кушташ ок лий, тушто нимогай шудо ок шоч. Тудо Содом, Гоморра, Адма да Цевоим ола-влак семын лиеш, а нуным Господь шке кугу шыдыж дене пытарен.24Чыла калык-влак йодыт: ”Молан Господь тиде мланде дене тыге ыштен? Молан Тудын тыгай кугу шыдыже ылыжын?”25Вашмут тыгай лиеш: ”Тиде калык Господьын, шке кугезыж-влакын Юмыжын, ойпидышыж деч кораҥын. Тиде ойпидышым Юмо нуным Египет гыч лукмыж годым ыштен.26Нуно каеныт да вес юмо-влаклан служитлаш, нунылан кумалаш тӱҥалыныт. А вет тидым ышташ Господь нунылан кӱштен огыл, нине юмо-влакым нуно паленат огытыл.27Теве молан Господь тиде мландылан шыдешкен да тудын ӱмбаке тиде [закон] книгаште возымо [ойпидышысе] чыла каргымашым колтен.28Пеш чот сырымыж дене, кугу шыдыж дене Господь нуным тиде мланде гыч луктын шуэн да вес мландыш намиен кудалтен. Таче кечынат нуно туштак улыт”.29Мом шылтыме – тиде Господь Юмыланна гына палыме, а мом почмо – тиде курымешлан мыланна да шочшына-влаклан пуымо: ме тиде законын чыла шомакшым шуктен шогышаш улына.
Institute for Bible Translation, Finland