Genesis7
1जब सभे चीज तइयार हो गेल तऽ यहोवा नूह से कहलन, हम देखली हे, कि अखनी जेतना लोग जिन्दा हथन ओखनी में से खाली तोहीं हमेशा धर्मी काम कर रहलऽ हे। येहिगुने हम चाहऽ ही कि तूँ आउर तोर पूरा परिवार नाव में बइठ जा।2अपना जौरे सभे किसीम के शुद्ध जनाबर के सात जोड़ा ले आवऽ जेकरा बारे में हम कहली हे कि हम बलिदान लागी सकार करम। सातगो नर आउर सातगो मादा लेलऽ। आउर हर किसीम के जानवर में से एगो नर आउर एगो मादा लेलऽ जेकरा बारे में हम कहली हे कि हम ओकरा बलि ला सकार नऽ करम। 3आउर ओकर वंश के पूरा धरती भर में जिन्दा रखे लागी सभे रगन के चिरईं-चिरगुन्नी के सातगो जोड़ा ले लिहऽ4अईसन करिहऽ, काहेकि आज से सात दिन के बाद हम धरती पर बरखा बरखायेम। चालीस दिन आउर चालीस रात ला लगतार बरखा बरखते रहत। अईसे कर के, हम धरती पर जे कुछ बनइली हे ओकरा खतम कर देम।5नूह ऊ सभे कुछ कईलन जे यहोवा उनका से करेलागी कहलन हल।6बाढ़ धरती पर आयेल, तऽ नूह छः सौ बरिस के हलन।7बरखा शुरू होवे से पहिले, नूह आउर उनकर मेहरारू आउर उनकर बेटा आउर पुतोहियन बाढ़ के पानी से बचे लागी नाव में चल गेलन।8शुद्ध आउर अशुद्ध दुन्नो तरह के जानवर के जोड़ा, जेकरा परमेश्वर बलि चढाबे लागी सकार करे के बात कहलन हल आउर जेकरा बलि लागी सकार नऽ कईलन हल, आउर चिरईंयन के जोड़ा आउर धरती पर रहे वाला सभे रगन के जीउवन के जोड़ा,9नर आउर मादा, नूह भीर अईलक आउर फिन नाव में चल गेल, जईसे परमेश्वर नूह से कहलन हल कि ऊ अईसन करतन।10सात दिन बीतला के बाद बरखा पड़े लगल, आउर बाढ़ धरती के डूबाबे लगल।11जहिया नूह छौ: सौ बरिस के होलन, दोसरका महीना के सतरहमा दिन धरती के तरे के सभे पानी के सोता फूट पड़ल, आउर एतना कस के बरखा बरखे लगल कि लगऽ हे कि आसमान से कोई बाँध टूट पड़ल हे।12धरती पर चालीस दिन आउर रात लगतार बरखा बरखते रहल।13जौन दिन बरखा बरखे लगल, नूह अपन मेहरारू, आउर अपन तीनों बेटा, शेम, हाम, आउर येपेत, आउर अपन पुतोहियन के साथे नाव पर गेलन।14ऊ आउर सभे किसीम के बनावल जानवर, आउर सभे किसीम के पालतु जानवर, आउर सभे किसीम के धरती पर रेंगे वाला जीव-जंतु, आउर सभे किसीम के चिरईं-चिरगुन्नी, आउर सभे पंख वाला जीव-जंतु में से कुछ नाव में चढ़ गेल।15आउर सभे जीव-जंतु के जे साँस ले हे, ओकर जोड़ा नूह भीर आके नाव में चढ़ गेल।16सभे जंतु में से एगो नर आउर एगो मादा हल जे नूह भीर अईलक, जईसे परमेश्वर कहलन हल कि ऊ अईसन करतन। जखनी ओखनी सभे नाव पर चढ़ गेल, तऽ यहोवा दुआरी बंद कर देलन।17चालीस दिन ला पानी पड़ते रहल, आउर बाढ़ बढ़ते गेल आउर नाव धरती से ऊपरे छहला गेल।18आउर पानी धरती से बड़ी ऊपरेला आउर बढ़ते गेल, आउर नाव पानी पर पैरे लगल।19पानी समूचे धरती पर से बड़ी ऊपर बढ़ते गेल, ईहाँ ला कि ऊ सभे पहाड़ आउर आसमान के तरे के सभे चीज के डूबा देलक।20ईहाँ ला कि सभे से ऊँचा पहाड़ भी छौ: मीटर से जादे पानी में डूब गेल हल। 21जेकर फल होल कि धरती पर के सभे जिन्दा जीव-जंतु मर गेल। एकरा में चिरईं-चिरगुन्नी, पालतु जनाबर, जंगली जानवर आउर धरती पर चले वाला सभे दोसर जीव-जंतु जनाबर जौरे सभे कोई सामिल हल।22जे कोई साँस ले हे, माने कि धरती के जीव-जंतु, ऊ सभे मर गेल।23अईसे धरती पर सभे जिन्दा जीव-जंतु, अादमी, बड़का जानवर, रेंगे वाला जंतु, आउर चिरईं-चिरगुन्नी सभे खतम हो गेल। खाली नूह आउर उनका जौरे नाव में चढ़ल लोगवन जिन्दा बचलन हल।24बाढ़ के पानी एक सौ पचास दिन ला धरती पर अईसहीं भरल रहल।
Bridge Connectivity Solutions Pvt. Ltd.