Galatians2
1तऽ हम बरनबास के जौरे यरूशलेम में चौदह साल के बाद फिनो गेली, आउर तीतुस के भी अपन जौरे ले गेली।2तऽ हम ईश्वरीय प्रकाशन के मुताबिक ऊपरे गेली, आउर जे सुसमाचार हम अन्यजातियन में प्रचार करऽ ही, ओकरा उनका सामने रख देली, बाकि जे लोग खास जान पड़ऽ हलन, उनका अकेले में सुनावऽ हली, अईसन नऽ होवे कि हमर ई समय के भाग-दौड़ चाहे पहिलका वाला भाग-दौड़ बेकार हो जाय।3बाकि तीतुस के भी, जे हमरा जौरे हल, यूनानी होवे के चलते खतना करवावे के लागी मजबूर नऽ करल गेल।4बाकि ई सभे ऊ झूठा विश्वासी लोग के चलते होल, जे छिप के हमर ऊ आजादी के जे मसीह यीशु में हमरा मिलल हे, चुपचाप से भेद लेवे लागी घूँस अईलन हल, ताकि ओखनी हमरा दास बना लेतन,5हम एक क्षण लागी भी उनकर अधीन होवे ला नऽ चाहली, ताकि सुसमाचार के सच्चाई तोरा में बनल रहत।6बाकि ओखनी दने से जे लोग कुछ समझल जा हलन, ओखनी पहिले कईसन हलन, एकरा से हमर कोई फरक नऽ पड़ऽ हे; परमेश्वर आदमी के मुँह देखके अपनावऽ नऽ हथन काहेकि, जे लोग खास जान पड़ऽ हलन, ओखनी से हमरा कुछो भी नऽ मिलल। 7बाकि एकर उल्टा, ई देख के कि हमरा बिन खतना वाला लागी सुसमाचार सुनावे के काम सौंपल गेल हे, जईसे कि पतरस के खतनावालन लागी सौंपल गेल हे, 8काहेकि जे पतरस में खतनावालन लागी प्रेरिताई के काम करलन, ओही हमर में भी अन्यजातियन लागी काम करलन हे,9आउर याकूब आउर कैफा आउर यूहन्ना जे खम्भा समझल जा हलन, जे अनुग्रह हमरा प्रदान करल गेल हल, ओकरा समझ के बरनबास के आउर हमरा संगति के दहिना हाथ देलन, जेकरा से हम अन्यजातियन भीर जायेम, आउर ओखनी खतनावाला भीर जईतन, 10खाली येहिगुने कि हम कंगाल लोग के याद करते रहम, आउर येही काम करे लागी तऽ हमहूँ उत्सुक हली।11बाकि जखनी कैफा अन्ताकिया शहर में अईलन, तऽ हम उनकर मुँह पर ओकर विरोध येहिगुने करली, काहेकि ऊ दोषी ठहरलन हल। 12काहेकि याकूब के तरफ से कुछ लोग के आवे से पहिले ऊ अन्यजातियन के जौरे भोजन करते रहऽ हलन। बाकि जखनी ऊ अईलन, तऽ ऊ खतना करल गेल लोग के डर के मारे खुद के अलग कर लेलन। 13आउर बाकि यहूदी विश्वासी भी उनका जौरे मिल गेलन, ईहाँ लागी कि बरनबास भी उनकर कपट के वजह से भटक गेलन।14बाकि जखनी हम देखली कि ओखनी सुसमाचार के सच्चाई के मुताबिक ठीक रीति से नऽ चल रहलन हे, तऽ हम ओखनी सभे के सामने कैफा से कहली, कि “जदि तूँ यहूदी होके, यहूदी के जईसन नऽ, बाकि अन्यजाति के जईसन, जिनगी बितावऽ हऽ, तऽ तूँ अन्यजातियन के यहूदियन के जईसन जिनगी बितावे लागी कईसे मजबूर कर सकलऽ हे?15हम तऽ अन्यजातियन से आयेल पापी नऽ, बलुक जनम से यहूदी ही;16बाकि ई जानते भर में कि कोई आदमी यीशु मसीह पर विश्वास कईले बेगर व्यवस्था के कामवन से धर्मी नऽ ठहरतन, येहिगुने हमनी भी यीशु मसीह पर विश्वास करली, ताकि व्यवस्था के काम से नऽ, बलुक मसीह पर विश्वास कर के धर्मी ठहरतन। काहेकि व्यवस्था के काम से कोई प्राणी धर्मी नऽ ठहरतन। 17बाकि जदि, मसीह में धर्मी ठहरेला चाहे भर में, हम खुद ही पापी निकलली, तऽ का मसीह पाप के सेवक हथन? अईसन कहियो नऽ होत!18काहेकि जदि हम ऊ चिजवन के फिनो से बनायेम जेकरा हम नाश करली हे, तऽ हम अपने आप के अपराधी साबित करऽ ही।19काहेकि हम, व्यवस्था के द्वारा, व्यवस्था लागी मर गेली, जेकरा से हम परमेश्वर लागी जिन्दा रहम। हम मसीह के जौरे क्रूस पर चढ़ावल गेली हे,20आउर हम अखनी जिन्दा नऽ रहली, बाकि मसीह हमरा में जिन्दा हथन। आउर जे हम अखनी देह में जिन्दा ही, हम ऊ विश्वास से जिन्दा ही जे परमेश्वर के बेटा पर हे, जे हमरा से प्रेम करलन, आउर अपने आप के हमरा लागी बलिदान दे देलन।21हम परमेश्वर के अनुग्रह के दरकिनार नऽ करऽ ही, काहेकि जदि व्यवस्था के द्वारा धार्मिकता मिलऽ हे, तऽ मसीह बेकार ही मरलन!”
Bridge Connectivity Solutions Pvt. Ltd.