Galatians1
1पौलुस, जे नऽ तऽ आदमियन के तरफ से आउर नऽ आदमी के द्वारा, बाकि यीशु मसीह आउर परमेश्वर पिता के द्वारा, जे उनका मरलकन में से जिलईलन, प्रेरित हथन,2आउर हमरा जौरे के सभे साथी विश्वासी के तरफ से, गलातिया प्रान्त के कलीसिया सभे के नाम: 3तोहनी पर अनुग्रह होवे आउर परमेश्वर पिता आउर हमनी के प्रभु यीशु मसीह के तरफ से तोहनी के शान्ति मिले,4जे हमनी के पिता परमेश्वर के इच्छा के मुताबिक, हमनी के पाप लागी खुद के दे देलन, ताकि ऊ हमनी के वर्तमान बुरा युग से छुटकारा दिला सकतन,5उनकर महिमा युगानुयुग ला होते रहे। आमीन।6हम हैरान ही कि तूँ ऊ सुसमाचार से जे तोरा मसीह के अनुग्रह से बोलईलन एतना हाली से मुड़ के अलग किसीम के सुसमाचार के तरफ जाय लगलऽ,7बाकि ऊ दोसरा सुसमाचार हईये नऽ हे, एकर बजाय कुछ लोग हथन जे तोरा घबरा देतन आउर मसीह के सुसमाचार के बिगाड़े चाहऽ हथन।8बाकि जदि हम चाहे स्वर्ग से कोई स्वर्गदूत भी ऊ सुसमाचार के छोड़ के जे हम तोरा सुनईली हे, कोई दोसर सुसमाचार सुनावे, तऽ ऊ श्रापित हे।9जईसन कि हम पहिलहीं कहली हे, आउर अखनी हम फिनो कहऽ ही, “जे सुसमाचार तोहनी ग्रहण करलऽ हे ओकरा छोड़ के जदि कोई आदमी तोरा कोई दोसरा सुसमाचार सुनईतन, तऽ ऊ श्रापित होत।”10का हम अखनी आदमी के समझावे के कोशिश कर रहली हे कि परमेश्वर के? चाहे का हम आदमी के खुश करे ला चाह रहली हे?, जदि हम अखनियो आदमी के ही खुश करते रहती हल, तऽ हम मसीह के सेवक नऽ रहती हल।11काहेकि हे भईवन, हम तोरा बता दे ही, कि जे सुसमाचार हम सुनईली हे, ऊ आदमी के मुताबिक नऽ हे।12काहेकि नऽ तऽ हम एकरा आदमी से पईली, आउर नऽ ही हमरा ई सिखावल गेल, बाकि ई हमरा यीशु मसीह के प्रकाशन द्वारा मिलल हे।13काहेकि तोहनी यहूदी मत में हमर पिछलका चाल-चलन के बारे में सुनलऽ होत, कि हम परमेश्वर के कलीसिया पर बड़ी जादे अत्याचार करऽ हली, आउर हम ओकरा नाश करऽ हली।14आउर हम यहूदी मत में अपन ही जाति के बड़ी सा लोग से आगे बढ़ रहली हल, आउर अपन पुरखावन के रीति-विधि के प्रति आउर भी जादे उत्साहित हो रहली हल।15बाकि परमेश्वर हमरा अपन माता के गर्भ से अलग कर के अपन अनुग्रह से बोलईलन, जखनी ऊ खुश होलन 16कि अपन बेटा के हमरा पर प्रकट करतन, कि हम उनका अन्यजातियन के बीच में सुसमाचार प्रचार कर सकम, तऽ हम तुरन्त मांस आउर लहू से सलाह नऽ लेली,17आउर नऽ ही हम यरूशलेम में ऊ लोग के पास गेली जे हमरा से पहिले प्रेरित हलन। एकर बदले, हम अरब देश में गेली आउर फिनो से दमिश्क शहर में लौट अईली।18फिनो तीन साल बाद हम कैफा से मुलाकात करे लागी यरूशलेम में गेली, आउर पन्द्रह दिन तक ओखनी के जौरे रहली। 19बाकि हम प्रभु के भाई, याकूब के छोड़ के दोसर कोई प्रेरित के नऽ देखली।20देखऽ, अखनी परमेश्वर के सामने जे हम तोरा ई चिट्ठी में लिखऽ ही, ऊ झूठ नऽ कहऽ हे।21फिनो हम सीरिया आउर किलिकिया प्रान्त के इलाका में गेली।22बाकि मसीह में पावल जाय वाला यहूदिया के ऊ कलीसियावन लागी हम चेहरा से अपरिचित हली।23बाकि ओखनी खाली ई सुन रहलन हल, कि “जे पहिले हमनी के सतावऽ हलन, ओही अखनी ऊ विश्वास के सुसमाचार के प्रचार कर रहलन हे, जेकरा पहिले ऊ नाश कर रहलन हल”24आउर ओखनी हमरा बारे में परमेश्वर के बड़ाई करे लगलन।
Bridge Connectivity Solutions Pvt. Ltd.