1 Corinthians6
1जखनी तोर झुण्ड के कोई परमेश्वर के आदमी कोई दोसर आदमी के जौरे झगड़ा, करऽ हथन, तऽ तोरा कहियो भी सार्वजनिक अदालत में ऊ लोगवन के सामने अपन झगड़ा के फईसला नऽ करे चाही जे मूर्तिपूजक आउर अविश्वासी हे। बलुक, अईसन लोगवन के बीच में अपन झगड़ा के अकेले में निपटावे के चाही जिनका परमेश्वर अपना लागी अलग पवित्र करलन हे।2जरुर ही तूँ जानऽ हऽ कि जौन पवित्र लोग संसार के न्याय करे ला परमेश्वर अपना लागी अलग करलन हे, ओही तय करतन कि परमेश्वर जे चिजवन आउर आदमी बनईलन हे, ऊ दोषी हे कि निर्दोष। येहिगुने तूँही तय करवऽ कि ई सभे चिजवन आउर आदमियन दोषी हथन कि निर्दोष, ई लागी तूँ निश्चित रूप से अपन झुण्ड के भीतर छोटा-छोटा मामला के बारे में फईसला ले सकलऽ हे। 3तोरा ई समझे के जरुरत हे कि हमनिये तय करम कि स्वर्गदूत निर्दोष हथन कि दोषी। जबकि हमहीं अईसन करम, ई लागी हम निश्चित रूप से अपन वर्तमान जिनगी से सम्बन्धित झगड़वन के बारे में फईसला लेवे के काबिल ही। 4येहिगुने, जखनी तूँ अपन वर्तमान जिनगी के सम्बन्ध में एक दोसर के जौरे मामला करऽ हऽ, तऽ तोहनी के ऊ आदमियन के जे तोहनी के विश्वासियन के झुण्ड के भाग नऽ हथन, ई फईसला करे लागी नऽ चुने के चाही कि कौन दोषी हथन आउर कौन निर्दोष हथन।5जे कुछ हम अखनी कहली हे ओकरा हम येहिगुने शामिल करऽ ही ताकि तोहनी के शर्म महसूस करवायेम। जरुर तोहनी के झुण्ड में अईसन आदमी भी हथन जे एतना बुद्धिमान तऽ हथन कि साथी विश्वासियन के बीच के भेद लेके फईसला लेवे में समर्थ हथन।6बाकि बजाय एकर, तोहनी में से कुछ विश्वासी दोसर विश्वासियन पर अदालत में आरोप लगावऽ हऽ, आउर ऊ आदमियन मुकदमा के सुलझावऽ हथन जे विश्वास नऽ करऽ हे।7काहेकि तोहनी में दोष हे कि एक-दोसर के साथ झगड़ा हे येहिगुने तूँ पहिलहीं यीशु के पीछे चले में पूरा तौर से पिछड़ गेलऽ हे। बलुक ई रीति से पिछड़ जाय के बदले, तोरा साथी विश्वासियन के क्षमा करे के चाही जखनी ऊ तोहनी के क्षति पहुँचावऽ हथन चाहे धोखा दे हथन।8बलुक दोसरा के क्षमा करे के बदले तोहनी दोसर आदमियन के क्षति पहुँचईलऽ हे आउर उनका धोखा देलऽ हे। सचमुच में, तूँ अईसन कामवन के साथी विश्वासियन के जौरे करलऽ हे!9हम हैरान ही कि तूँ अईसन कामवन के करऽ हऽ भले ही तोरा पता हे कि जे आदमियन अधर्मी दोसर के नुकसान पहुँचावऽ हथन ओखनी परमेश्वर के राज में भागी नऽ होतन। जे कोई भी तोरा कुछ आउर बात बतईतन ओकरा पर विश्वास मत करिहऽ। कोई भी आदमी जे गलत यौन सम्बन्ध बनावऽ हथन चाहे जे दोसर देऊता के उपासना करऽ हथन चाहे जे कोई वियाहल औरत के जौरे यौन सम्बन्ध बनावऽ हथन चाहे जे मरद समान लिंग के मरद के जौरे यौन क्रिया में भाग ले हथन चाहे जे समान लिंग के आदमी के साथे यौन क्रिया करऽ हथन10चाहे जे दोसर के समान चोरी कर हथन, चाहे जे अपन जरुरत से जादे के चाहत करऽ हथन चाहे जे नशा में धुत्त हो जा हथन चाहे जे दोसरा के बात-बात में गाली-गलौज बकऽ हथन जे दोसरा के धोखा दे हथन, ऊ परमेश्वर के राज में भागी नऽ होतन।11तोहनी में से कुछ लोग ई रीति से व्यवहार करल करऽ हलन। जबकि, अखनी परमेश्वर तोहनी के शुद्ध करलन हे, ऊ तोरा पवित्र बनईलन हे, आउर ऊ तोहनी के धर्मी आउर निर्दोष घोषित करलन हे। तूँ ई बात के महसूस ई लागी करऽ हऽ काहेकि ओखनी के तोरा देवे लागी प्रभु यीशु मसीह आउर पवित्र आत्मा सामर्थी रूप से काम करऽ हे।12तोहनी में से कुछ कहऽ हथन “हम कुछ भी कर सकली हे आउर हम दोषी नऽ ठहरम।” येहिगुने, हम ई कहऽ ही कि कुछ बात केकरो लागी भी मदतगार नऽ होवऽ हे। फिनो से, तोहनी में से कुछ कहऽ हथन कि “हम कुछ भी कर सकली हे आउर हम दोषी नऽ ठहरम।” येहिगुने, हम ई कहऽ ही कि हम अईसन कोई चीज के सेवा नऽ करम जे हमरा अपन दास बना लेवे।13तोहनी में से कुछ आदमियन कहऽ हथन कि “भोजन के अस्तित्व कोई आदमी के पेट लागी होवऽ हे कि ऊ ओकरा पचावे, आउर कोई आदमी के पेट के अस्तित्व ई लागी होवऽ हे कि भोजन के पचावे।”, सचमुच में, हम ई भी कहऽ ही कि परमेश्वर भोजन आउर पेट के नाश कर देतन। जबकि ई सच हे कि भोजन के अस्तित्व कोई आदमी के पेट लागी होवऽ हे, बाकि आदमियन के देह के अस्तित्व कोई आदमी लागी नऽ हे कि ऊ ओकरा से गलत व्यभिचार बनईतन। बजाय एकर कि आदमी के देह के अस्तित्व प्रभु के सेवा करे लागी हे, काहेकि प्रभु आदमी के देह के उद्धार लागी काम करलन हे।14सचमुच में, परमेश्वर, प्रभु के मरल में से फिन से जिन्दा करलन हल, आउर ऊ हमनियो के भी फिनो से जिन्दा करे लागी सामर्थी रूप से काम करतन।15जरुर ही तूँ जानऽ हऽ कि तोहनी के देह मसीह के हे, जईसे मान लऽ कि तोहनी उनकर देह के अंग हऽ। ई कारण से, तोरा अपन देह लेके फिनो से एकरा एगो वेश्या के नऽ देवे के चाही, जेकरा से तोर देह उनकर हो जाय, जईसे कि मान लऽ कि तूँ उनकर देह के अंग हऽ। अईसन कहियो नऽ करिहऽ!16निश्चित रूप से तोहनी जानऽ हऽ कि जे आदमी कोई वेश्या के जौरे यौन सम्बन्ध बनावऽ हथन, ऊ खुद के ओकरा जौरे एतना नजदीकी से एक जगह करऽ हथन जईसे कि मान लऽ कि ओखनी एक देह साझा कर हथन। तोहनी के ई लागी पता होवे के चाही काहेकि पवित्रशास्त्र कहऽ हे, मरद आउर औरत जबकि दूगो आदमी हथन बाकि ओखनी एगो देह के समान बन जा हथन। 17ई रीति से, कोई भी आदमी जे अपने आप के प्रभु के जौरे एक जगह कर ले हथन, ऊ आत्मा से प्रभु के जौरे एक हो जा हथन।18जान बुझ के व्यभिचार करे से बचऽ। जखनी आदमी पाप करऽ हथन, तऽ ऊ आमतौर पर अपन देह के सीधे तौर से देह के बेगर चोट पहुँचईले अईसन करऽ हथन। येहिगुने, जखनी आदमी गलत यौन सम्बन्ध बनावऽ हथन, तऽ ओखनी अपन खुद के देह के चोट पहुँचावऽ हथन।19निश्चय ही तूँ जानऽ हऽ कि परमेश्वर तोहनी के पवित्र आत्मा देलन हे। येहिगुने, तोहनी के देह पवित्र आत्मा लागी मन्दिर के समान हे, काहेकि ऊ खुद के तोहनी के साथे एक जगह करऽ हथन जईसे कोई ईश्वर अपने आप मन्दिर के जौरे एक जगह करऽ हथन। ई कारण तोहनी अपन खुद के नऽ हऽ।20येहिगुने, तोहनी परमेश्वर के हऽ काहेकि मसीह तोहनी लागी मरलन हे। जब ऊ तोहनी लागी मरलन तऽ मान लऽ कि परमेश्वर तोरा मोल खरीदे लागी दाम देलन हे। काहेकि तूँ परमेश्वर के हऽ येहिगुने जखनी तोहनी अपन देह से कुछ करिहऽ तऽ तोहनी के उनका इज्जत करे के चाही!
Bridge Connectivity Solutions Pvt. Ltd.