متی27
1دویمہِ دوٚہہ سُلہِ صُبحٲے کوٚر فٲصلہٕ زٕ سردار کاہنو تہٕ یہُودؠ زِٹھیٚو زِ تم کو انن آٹہٕ واٹہٕ رومین یسوعسؔ مارنہٕ باپتھ۔2تِمو گنٛڈؠ أمِس اتھٕ تہٕ واتنووُکھ رومی منتظم پیلاطسسؔ نِشہٕ۔3ادے ژیون یسوعسؔ دغا دِنہٕ وٲلؠ یہُوداہن زِ یِمو چھےٚ کتھ کٔرمٕژ زِ مسیحؔ گژھِ کُنہِ ژھلہٕ قتل سپدُن۔ اوے گوو تس پننِس کرنس پیٚٹھ ووٚنؠ افسوس۔ امؠ نیہِ ترٕہہ سِکہٕ واپس سردار کاہنن تہٕ زِٹھٮ۪ن۔4امؠ ووٚنُکھ، "مےٚ کوٚر گناہ۔ مےٚ چھُ توٚہہِ أکِس بےٚ گناہ شخصس سزائے موت دِنس منٛز مدد کوٚرمُت" تِمو ووٚنُس اورٕ، "اتھ چانہِ کتھِ رود نہٕ ووٚنؠ سانہِ باپتھ کانہٛہ معنہِ مطلب۔ یہِ چھُ چون مسلہٕ"5اوے تُلؠ یہُوداہنؔ پنٕنؠ سِکہٕ تہٕ چھکرٕنؠ ہیکل کِس صحنس منٛز۔ پانہٕ دراو تہٕ دِژٕن پانس پھٲسؠ۔6سردار کاہنو تُلؠ یِم سِکہٕ تہٕ ووٚنُکھ، "یہِ پونٛسہٕ دیُت اسہِ اکِس نفرٕ سنٛدؠ مرنہٕ باپتھ تہٕ سٲنؠ شریعت چھنہٕ اجازت دِوان یِتھِس پونٛسس ہیکل کِس خزانس منٛز واپس تراونس۔7اوے کوٚر یِمو صحیح زِ یہِ پونٛسہٕ ورتاوو کرالہٕ کھاہ مٔلؠ ہٮ۪نہٕ باپتھ۔ تِمو بنوو سُہ کھاہ قبرستان۔ یروشلم شہرس منٛز مرن والیٚن وۅپر لوٗکن ہنٛدِ باپتھ۔8اوے چھِ اتھ جایہِ وُنہِ تہِ ونان "رتہٕ کھاہ"9یہِ کھاہ مٔلؠ ہٮ۪تھ کوٚر یِمو پوٚز ثٲبت یرمیاہ نبی سُنٛد واریاہ کالہٕ برونہٛہ یہِ لیٚوکھمُت، تِمو رٔٹؠ ترٕہہِ رۅپیہ سِکہٕ۔ یہِ زن تسُنٛد مۅل مقرر کوٚر اسرائیلی سردارو۔10تہٕ امہِ پونٛسہٕ سٟتؠ ہیوٚت یِمو مٔلؠ کرالہٕ کھاہ۔ یہِ زن خداوندن مےٚ حکم کوٚر"11امہِ پتہٕ رود یسوعؔ گورنرس برونہٛہ کنہِ وۅدٕنؠ۔ حٲکمن پرُژھُس، "ژٕ چھُکھا پانس ونان یہودٮ۪ن ہُنٛد بادشاہ؟" یسوعنؔ ووٚنُس یورٕ، "آ، یہِ ژٕ پانہٕ ونان چھُکھ"12مگر ییٚلہِ سردار کاہنو تہٕ زِٹھیٚو یِتھٕ تِتھٕ غلط کرنُک راہ کھول، تمؠ دیُت نہٕ یورٕ کانہٛہ جواب۔13اوے تہِ ووٚنُس پیلاطسنؔ، "ژےٚ بوزُتھ یِمو کٲتؠ راہ کھٲلی ژےٚ! ژےٚ پزی یورٕ جواب دیُن!"14ووٚنؠ گوو یسوعنؔ ووٚنُس نہٕ یورٕ توتہِ کینٛہہ۔ اوٕ کِنؠ سپٕدؠ، منتظم اعلیٰ سخ حٲران۔15یہِ اکھ رسم اوس منتظم اعلیٰ سُنٛد زِ سُہ اوس پرٛتھ وریہِ فسح عیز ہنٛدِس موقعس پیٚٹھ اکِس بٲندِس یلہٕ تراوان۔ سُہ اوس رہا کران یس اکِس بٲندِس لوٗکھ یژھن۔16امہِ وقتہٕ اوس یروشلم کِس بٲنٛدؠ وانس منٛز براباؔ ناوُک اکھ بدنام شخص۔17اوے ییٚلہِ ہجوم سمیاو، پیلاطسنؔ پرژھُکھ۔ کس بٲنٛدؠ چھُو توٚہؠ یژھان یُس بہٕ یلہٕ تراون۔ براباؔ یا یسوعؔ یمِس توٚہؠ مسیحؔ ونان چھُو۔18یہِ سوال پرُژھ امؠ اوٕ کِنؠ زِ تمؠ اوس ژیترمُت یِمو اعلیٰ کاہنو چھُ یسوعؔ چھرا پننہِ حسدٕ کِنؠ تس نِش اوٚنمُت۔19یپٲرؠ ییٚلہِ زن پیلاطس پانہٕ عدالتس بہتھ اوس، امسنٛزِ آشنہِ سوز امِس شیٚچھ: " از سُلہِ صُبحٲے وُچھ مےٚ تمِس شخصس متعلق اکھ بد خواب۔ اوے یُتھنہٕ امِس راستبازس سزا دِکھ۔20مگر ہُپٲرؠ ٲسؠ اعلیٰ کاہن تہٕ زِٹھؠ لُکہٕ ہجومس پتہٕ لگِتھ تمن اتھ پیلاطس براباسؔ یلہٕ تراونُک تہٕ یسوعؔ قتل کرنُک حکم جٲری کرناونہٕ باپتھ ونناوان۔21اوے ییٚلہِ منتظم اعلاہن یمن پرُژھ۔ دوٚیو منٛزٕ کُس اکھ چھُو توٚہؠ یژھان زِ بہٕ تراون یلہٕ، تِمو ووٚنُس براباسؔ۔22پیلاطسنؔ ووٚن یِمن، "تیٚلہِ کیا کرٕ بہٕ یسوعسؔ سٟتؠ یمِس توٚہؠ مسیحؔ ونان چھُو؟ تِمو ساروےٕ ووٚنُس اکے چانٹہِ، "پننٮ۪ن سِپہن دِ حکم یہِ پھہہِ دِنُک"23پیلاطسنؔ ووٚنُکھ یورٕ، "نہ! تمؠ چھُنہٕ کانہٛہ جرُم کوٚرمُت!" مگر یورٕ ووٚنُس ہجومن تھدِ ہٹہِ، "امِس دیاوناو صلیب"24پیلاطسسؔ توٚگ ژٮ۪ترُن زِ سُہ چھُنہٕ پنٕنؠ کتھ پرٲوِتھ ہیٚکان۔ بلکہِ ژیون امؠ دیدمان زِ لوٗکھ چھِ فساد تُلن وٲلؠ۔ اوے تُل امؠ اکھ آبہٕ بٲٹؠ تہٕ چھٔلِن پنٕنؠ اتھٕ۔ ہجوم رود دیدمان وُچھان۔ امؠ ووٚن پنٕنؠ اتھٕ چھلِتھ چھُس بہٕ توٚہہِ باوُن یژھان زِ یودوے یہِ شخص مرِ یہِ آسہِ قصور تُہنٛد نہ زِ میون۔25ساروٕے لوٗکو ووٚنُس یورٕ، "اسؠ روزو راہ لد امِس مارناونٕکؠ۔ ٲسِن سٲنؠ شُرؠ مُرؠ تہِ راہ لد۔26اوٕ پتہٕ دیُت تمؠ سپہن حکم زِ تِم تراون یلہٕ براباہسؔ اہنٛدِ باپتھ۔ تہٕ سٟتؠ دِتُن سپہن حکم یسوعسؔ قمچہٕ والنک۔ اوٕ پتہٕ کوٚرُن سپہن حوالہٕ یسوعؔ تاکہِ تِم ٹھاسان تس صلیبس سٟتؠ کِلؠ۔27اوٕ پتہٕ نِیٚو منتظم اعلیٰ سنٛدیو سپہو یسوعؔ سپہن ہنٛزِ بارکہِ منٛز۔ سٲرےٕ پلٹن روز امِس انٛدؠ انٛدؠ۔28تِمو کٔڈؠ امِس سٲری پلو نٮ۪بر تہٕ لوگہس قرمزؠ پھیٚرن۔ امِس بادشٲہی ہُنٛد مذاق کرنہٕ باپتھ۔29تِمو أنؠ کینٛہہ کنٛڈؠ لورِ تہٕ وونہس اکھ تاج کلس پیٚٹھ تھاونہٕ باپتھ۔ دٔچھنِس اتھس منٛذ تھووہس نرکٲنؠ عاصہٕ زنتہٕ بادشاہ سُنٛد عاصہٕ۔ پتہٕ نمییہِ امِس برونہٛہ کنہِ تہٕ کوٚرہس مذاق یہِ ونِتھ خۅش آوے "ہے یہُودؠ بادشاہ30تِم رودؠ تمِس تھۅکہٕ لایان۔ یہِ نرکٲنؠ عاصہٕ نیوہس تہٕ رودِس امہِ سٟتؠ کلس لایان۔31ییٚلہِ امِس سٟتؠ یہِ مذاق کٔرِتھ مۅکلییہِ، یہِ پھیرن کوٚڈہس نالہٕ تہٕ لٲگؠ ہس بیٚیہِ پنٕنؠ پلو۔ اوٕ پتہٕ نیوکھ تتھ جایہِ یتہِ تِم امِس صلیبس سٟتؠ کِلؠ ٹھاسان وٲلؠ ٲسؠ۔32ییٚلہِ یسوعنؔ پنن صلیب رژھِ کھنجہِ دور تام تل، سِپہو وُچھ اکھ شمعون ناوُک نفر یُس کرینی جایہِ ہُنٛد اوس، یِمو کوٚر امِس یسوع سُنٛد صلیب تُلنہٕ باپتھ جبر۔33تِم وٲتؠ أکِس جایہِ یتھ تِم گُلگتا ونان ٲسؠ۔ یمیُک مطلب چھُ "کلہٕ کھوپٕر ہِش جاے"34پتہٕ دیُت تِمو یسوعسؔ شراب یتھ تِمو کیاہتام ٹیٚوٹھ چیز رلومُت اوس۔ یِمو دیُت یہِ چٮ۪نہٕ باپتھ یسوعسؔ۔ ییٚلہِ امؠ اتھ مزٕ وُچھ، یسوعنؔ کوٚر یہِ چٮ۪نہٕ نِشہٕ انکار۔35صلیبس سٟتؠ کِلؠ ٹھاسنہٕ پتہٕ بٲگرٲوِکھ امسنٛدؠ پلو پانہٕ وٲنؠ شرط لگٲوِتھ زِ کس کُس پلو ییہِ حصہٕ۔ 36امہِ پتہٕ بیٹھؠ سپاہ پتھر اتھؠ جایہِ تاکہِ کانہٛہ نِیہِ نہٕ امِس ژوٗرٕ بچٲوِتھ۔37یسوعؔ سنٛدِس کلس ہیٚور پہن لٲجؠ یِمو اکھ پٔٹ یتھ پیٚٹھ لیکھِتھ اوس زِ تِم کیازِ چھِ امِس صلیبس ٹھاسان۔ اتھ اوس لیکھِتھ زٕ "یہِ چھُ یسوعؔ، یہودٮ۪ن ہُنٛد بادشاہ"38یسوعؔس سٟتؠ ٹھٲسؠ یِمو دون بڈٮ۪ن ژورن کِلؠ صلیبس سٟتؠ۔ تِمو تھوو اکھ صلیب یسوعسؔ دٔچِھنؠ تہٕ بیاکھ کھووٕرؠ۔39اپٲرؠ پکن وٲلؠ رودؠ امِس ریژھ تُلان تہٕ تِتھٕ پٲٹھؠ کلہٕ گلناوان زنتہٕ سُہ کانہٛہ بدکار اوس۔40یِمو ووٚن تس، "ژےٚ ووٚنُتھ زِ ژٕ والکھ ہیکل تہٕ کرکھ یہِ نوِ سرٕ تعمیر ترین دوہن منٛز۔ ییٚلہِ ژٕ تہِ ہیٚککھ کٔرِتھ، تیٚلہِ بچاو پنُن پان! یودوے ژٕ خدایہِ سُنٛد گوبر چھُکھ، تیٚلہِ کر یہِ ثٲبت امہِ صلیبہٕ پیٚٹھٕ بوٚن وسِتھ"41یِتھے پٲٹھؠ کوٚر اعلیٰ کاہنو یہُودؠ شریعت ہٮ۪چھناون والیٚو زِٹھیٚو تہِ یسوعسؔ مذاق۔ تِمو ووٚن پانہٕ وٲنؠ،42"لوٗکھ چھِ دعوا کران زِ تمؠ دیُت باقین نجات بٮ۪ماریٚو نِشہٕ، مگر پانس ہیوٚک نہٕ نجات دِتھ۔ یہِ چھُ ونان بہٕ چھُس اسرائیلُک بادشاہ۔ لہٰذا پزٮ۪س صلیبہٕ پیٚٹھٕ بوٚن وسُن، تیٚلہِ انو أسؠ امِس ایمان۔43یہِ چھُ ونان خدایس پیٚٹھ تھٲیو بھروسہٕ۔ تہٕ یہِ چھُ خدایہِ سُنٛد گوبر۔ اوے تہِ یودوے خدا امِس خۅش چھُ، خدا گژھِ امِس نجات دیُن ووٚنؠ"44یِتھے پٲٹھؠ زٕ ڈاکو ییٚلہِ امسےٕ سٟتؠ صلیبہِ ترٲوِکھ تہٕ رودؠ امِس ٹیپ ژٹان یُتھےٕ کینٛہہ ؤنِتھ۔45منٛز مندنٮ۪ن گو سٲرؠ سےٕ زمینس پٮ۪ٹھ انہِ گوٚٹ۔ شامس ترےٚ بجے تام رود یہِ انہِ گوٚٹ۔46ترےٚ بجے ہِیٚو دِژ یسوعنؔ زورٕ کریکھ، "ایلی، ایلی، لما شبقتنی؟" مطلب، "میانہِ خدایہ، میانہِ خدایہ، ژےٚ کیازِ مشرووتھس بہٕ؟" 47ییٚلہِ اتہِ کینٛژو نفرو لفظ ایلی بوز، تِمو زون زِ سُہ چھُ ایلیا نبین ناد لایان۔48وُژھِ دوریو اکھ نفر تہٕ اونُن اکھ سپنج۔ تمؠ اوٚن یہِ بُڈٕ نٲوِتھ سستہٕ شرابس منٛز۔ پتہٕ تھووُن نرکٲنؠ لورِ ٹپِس پیٚٹھ تہٕ پلنووُن یسوعسؔ کُن تھوٚد رٔٹِتھ تاکہِ یسوعؔ دِیہِ ژےٚ یہ، کٲنٛز آبہٕ منٛزٕ ہیٚور کھٲلِتھ۔49ووٚنؠ گوو اتہِ موجود باقیو ووٚن، "پرٲرِو، وُچھو ایلیا ییا امِس مدتس"50پتہٕ ییٚلہِ یسوعنؔ بیٚیہِ بڈِ چیخ دِژ، تمؠ سنٛدؠ روحن دیُت امانت۔51امہِ وِزِ آو سُہ موٚٹ تہٕ گوٚب پردٕ ژھٮیٚنِتھ دون حصن منٛز ہیٚرِ پیٚٹھٕ بوٚن تام یُس تقریباً ہیکل کٮ۪ن سارنےٕ مقدس جاین ووٚرُن کٔرِتھ اوس۔ زمینہِ گوو الہٕ الہٕ تہٕ پل آے پھٹِتھ۔52مقبر گے ؤتھؠ تہٕ تِمن واریاہن لوٗکن ہنٛدؠ جسم یِم خدایس عزت کران ٲسؠ، گے زنٛدٕ۔53تِم دراے مقبرٕ منٛزٕ۔ تہٕ ییٚلہِ یسوعؔ بیٚیہِ زنٛدٕ گو، تِم گےَ یروشلم تہٕ آیہِ واریاہن لوٗکن نظرِ۔54ییٚلہِ حٲکم یُس نگرٲنی اوس کران تِمن سپہن یِمو یسوعؔ صلیبہِ ٹھوس، اوس اتؠ وۅدٕنؠ، تسنٛدؠ سپاہ یِم صلیبن رٲچھ ٲسؠ تہِ ٲسؠ اتی۔ ییٚلہِ تمو بنیُل ژیون تہٕ باقےٕ چیز تہِ سپدان وُچھؠ، تِمن ژاو لرزٕ۔ تِمو دِژٕ کریکہٕ، "پزی اوس یہِ یسوعؔ خدایہِ سُنٛد گوبر"55واریاہ زنانہٕ آسہٕ اتہِ دوٗر دیدمان وُچھان۔ یِم آسہٕ زنانہٕ یِم یسوعسؔ سٟتؠ گلیلی پیٚٹھٕ آمژٕ آسہٕ تاکہِ تس تھاون ضرورژ میسر تہٕ کرن خدمت۔56یمن منٛز ٲس مریم مگدلِینی بیاکھ مریم یۅسہٕ یعقوب تہٕ یوسف سنٛز موج تہٕ بیٚیہِ یعقوب تہٕ یوحنا زبیدی سنٛز موج تہِ ٲس۔57ییٚلہِ شام ہیِو سپُد، اکھ یوسف ناوُک امیر ووت اوت۔ سُہ اوس ارِمتیہ سریہ، ہُنٛد۔ سُہ اوس یسوعؔ سُنٛد شٲگرد۔58یوسفؔ ووت پیلاطسسؔ نِش تہٕ ووننس یسوعؔ سُنٛد جسم تس حوالہٕ کرنہٕ باپتھ تاکہِ سُہ کرِ تس دفن۔ پیلاطسنؔ دیُت سپہن حکم تمس یہِ جسم نِنُک۔59اوے نیٚو یوسفنؔ تہٕ باقیو تسُنٛد جسم تہٕ وولوٗکھ یہِ صاف سفید پلوَس۔60پتہٕ تھووُکھ یہِ یوسفہٕؔ سنٛدِس پننِس نوِس مقبرس منٛز یُس مزوٗرو اکِس پلس ژٹِتھ بنوومُت اوس۔ تِمو انؠ ڈۅلہِ نٲوِتھ اکھ گول ستٕر کٔنؠ تاکہِ امہِ پلہٕ کِس گٔلِس روزِ دولہٕ۔ امہِ پتہٕ دراے یِم۔61مریم مگدلِینی تہٕ بیاکھ مریمؔ ٲسؠ مقبرس پیٚٹھ بہِتھ یہِ سورےٕ کینہٛہ تہٕ یسوعؔ سنٛز لاش وُچھان۔62دویِم دوٚہہ اوس یہودٮ۪ن ہنٛدِ آرامُک دوٚہہ بٹہٕ وار۔ اعلیٰ کاہن تہٕ سردار تہٕ فریسی آے پیلاطسس نِش۔63تِمو ووٚنُس، "جناب، اسہِ چھُ ژٮ۪تس زِ تمؠ دھوکھہٕ بازن اوس زنٛدٕ زُوٕ ووٚنمُت زِ پننہِ مرنہٕ پتہٕ تریٚیہِ دوٚہؠ پراوٕ بہٕ بیٚیہِ زندگی۔64اوے چھِ أسؠ توٚہہِ ونان زِ پننٮ۪ن سِپہن ؤنیٚو امسنٛدِس مقبرس مذید ترین دوٚہن رٲچھ کرنہٕ باپتھ۔ یودوے توٚہؠ تہِ کٔرِو نہٕ، امسنٛدؠ شٲگرد یِن تہٕ نِن امسُنٛد جسم ژوٗرِ پتہٕ ونن تِم لوٗکن زِ سُہ گوو مٔرِتھ بیٚیہِ زنٛدٕ۔ ہرگاہ تِم لوٗکن یِتھٕ پٲٹھؠ تارن، یہِ آسہِ تمہِ کھۅتہٕ ویکھت۔ ییٚلہِ سُہ لوٗکن زنٛدٕ زُوٕ تاران اوس۔65پیلاطسنؔ ووٚن تِمن، "توٚہؠ ہیکِو کینٛہہ سِپاہ پانس سٟتؠ نِتھ۔ تہٕ گژھِو تہٕ بنٲیو تتھ مقبرس یوٗتاہ خۅش گژھیٚو تیوٗتاہ محفوظ۔66اوے گےَ تِم تہٕ بنووُکھ سُہ مقبرٕ محفوظ۔ اتھ پلس کُن رز گنڈِتھ یۅسہٕ چٹانہِ منٛز کڈنہٕ آمتِس مقبرٕ گٔلِس دولہٕ ٲس۔ مزید تھٲوِکھ اتہِ کینٛہہ سِپاہ مقبرس رٲچھ تہِ۔
Bridge Connectivity Solutions Pvt. Ltd.