متی28
1آتھوارِ دوٚہہ صبُح پھۅلوُن ہفتکہِ گۅڈنکہِ دۅہہ ییٚلہِ سبات انٛدیو، مگدلِینی سریہِ ہنٛز مریمؔ تہٕ بیاکھ مریم گےَ یسوعؔ سنٛدِس مقبرس نظر دِنہِ۔2اتہِ گوو سخ بنیُل تکیازِ خداوند سُنٛد اکھ فرشتہٕ ووٚتھ آسمانہٕ پیٚٹھٕ۔ سُہ گوو مقبرس کُن۔ تہٕ بیوٹھ کنہِ پیٚٹھ یۅسہٕ کمؠ تام ٲس ڈٲجمٕژ۔3تسُنٛد بدن اوس گاشٕکؠ پٲٹھؠ تابان تہٕ تسٕنٛدؠ پلو ٲسؠ شینٕکؠ پٲٹھؠ سفید۔4رٲچھ درن ژاو لرزٕ تکیازِ تِم کھوٚژؠ واریاہ تہٕ امہِ پتہٕ پییہ زن تہٕ مودؠ ہیوؠ پتھر۔5فرشتن ووٚن تِمن دون زنانن، "توٚہہِ چھُنہٕ کھوٚژُن۔ بہٕ چھُس زانان زِ توٚہؠ چھُو یسوعسؔ وُچھنہِ آمٕتؠ۔ یس صلیبہِ کُن کِلؠ ٹھٲسِکھ۔6مگر سُہ چھُنہٕ یتہِ، خداین کوٚر سُہ بیٚیہِ زندٕ۔ یِتھٕ پٲٹھؠ یسوعنؔ ووٚنو زِ سُہ کرِ۔ ولِو تہٕ وُچھِو سۅ جاے یتہِ یسوعؔ سُنٛد جسم اوس۔7پتہٕ نیرو ؤلؠ ؤلؠ تہٕ ونو امسنٛدین شٲگردن، "سُہ گو مٔرِتھ زندٕ۔ سُہ گژھِ توٚہہِ برونٛٹھےٕ گلیلی ہنٛدِس ضلعس منٛز۔ توٚہؠ وُچھؠ وون سُہ تٔتی۔ اتھ کتھِ کُن دِیو دیان۔ یہِ مےٚ توٚہہِ ونُو"8او پتہٕ تروو یِمو دوٚیو زنانو مقبر ؤلؠ ؤلؠ۔ تِم آسہٕ کھوٚژان مگر خۅش تہِ آسہٕ۔ تِم دورییہِ شٲگردن وننہِ زِ کیا ہِیو سپُد۔9اچانک گوو تِمن یسوعؔ ظٲہر۔ تمؠ ووٚن تِمن، "توٚہہِ چھوو خۅش آوے" یِم زنانہٕ آیہِ تس نکھہٕ۔ تِمہٕ نمییہِ تہٕ رٔٹؠ ہس کھۅر تہٕ کرٕکھ تسنٛز عبادت۔10اوٕ پتہٕ ووٚن یسوعنؔ تِمن، "کھوٚژِو مہٕ۔ نیرِیو ؤنِو میانٮ۪ن سارنےٕ شٲگردن گلیلی واتنہٕ باپتھ۔ تِم وُچھن مےٚ تٔتی۔11ییٚلہِ یِم زٕ زنانہٕ پکان آسہٕ، کینٛہہ سِپاہ یِم مقبرس رٲچھ ٲسؠ ژاے شہرس منٛز۔ تِمو بوو تہِ سورےٕ سردار کاہنن یہِ گومُت اوس۔12سردار کاہن تہٕ یہُودؠ زِٹھؠ سمٕکھؠ پانہٕ وٲنؠ تہٕ کوٚرُکھ فٲصلہٕ زِ تِم کیا کرن۔ تِمو دیُت یِمن سپہن واریاہ رِشوٕ۔13تِمو ووٚنُکھ، "لوٗکن ؤنِو زِ امسنٛدؠ شٲگرد آے راتھ کیُت ژھوپہٕ کٔرِتھ تہٕ نیوکھ امسُنٛد جسم تُلِتھ ژوٗرِ ییٚلہِ أسؠ خۅفتہٕ ٲسؠ پیمٕتؠ۔14اگر گورنر اتھ متعلق بوزِ، أسؠ کروون سُہ پانہٕ رٲضی توٚہہِ سزا نہ دِنہٕ باپتھ۔ اوے پیٚیو نہٕ توٚہہِ پریشان سپدُن"15اوے تہِ تُلؠ سِپاہو یِم یسوعؔ سنٛدِس مقبرس رٲچھ کٔرِتھ ٲسؠ، پونٛسہٕ تہٕ کوٚرُکھ تہِ یہِ تِمن سردار کاہنو تہٕ زِٹھیٚو کرنہٕ باپتھ ووٚنمُت اوس۔ تہٕ لوٗکھ چِھ وُنہِ تہِ یہُودین منٛز یہٕ دلیل ونان۔16پتہٕ گےَ یسوعؔ سنٛدؠ کاہ شٲگرد گلیلی علاقس منٛز۔ تِم گےَ تتھ کوٚہس کُن یور یسوعنؔ تِمن ووٚنمُت اوس گژھنہٕ باپتھ۔17ییٚلہِ تِمو سُہ تتہِ وُچھ، تِمو کٔر تس عبادت۔ ووٚنؠ گوو تِمو منٛزٕ اوسنہٕ کینٛژن یقین زِ یہِ چھُ یسوعؔ۔18پتہٕ آو یسوعؔ تِمن نکھٕ تہٕ ووٚننکھ، "میٲنؠ ببن چھُ مےٚ اختیار دیُتمُت آسمانس پٮ۪ٹھ تہٕ زمینس منٛز پرٛتھ کُنہِ چیزس پیٚٹھ تہٕ پرٛتھ کٲنٛسہِ پیٚٹھ حکومت کرنُک۔19لہٰذا گٔژھِو تہٕ ؤنِو لوٗکن میون پٲغام پرٛتھ کنہِ لُکہٕ جمٲژ تاکہِ تِم بنن میٲنؠ شٲگرد۔ تِمن دِیو بپتسمہ یہٕ ظٲہر کرنہٕ خٲطرٕ زِ تِمو چُھ پنُن پان ببس، گوٚبرِس تہٕ پاک روحس خٲطرٕ وقف کوٚرمُت۔20تِم ہٮ۪چھنٲووکھ سٲری چیز مانٕنؠ یِم مےٚ توٚہہِ حکم کوٚرمُت چھُ۔ تہٕ حقیقتاً روزٕ بہٕ ہمیشہٕ توٚہہِ سٟتؠ تتھ وقتس تام ییٚلہِ دنیا ختم گژھہِ"
Bridge Connectivity Solutions Pvt. Ltd.