متی25
1آسمانہٕ پٮ۪ٹھٕ خدایہِ سنٛزِ بادشٲہی ہنٛز مثال زٲنتو تِژھےٕ دلیل یۅسہٕ دہن انہرشیٚن کورٮ۪ن سپٕز یمہِ خاندرٕ سال کھٮ۪نہٕ باپتھ تیار سپٕز۔ تِمن اوس پنُن پنُن دزٕوُن ژونگ ہٮ۪تھ مہرازس پرارون روزن۔2یِمو منٛزٕ آسہٕ پانٛژھ کورِ بیقل تہٕ پانٛژھ عٲقٕل۔3پانٛژو بیقل کوریٚو تُلؠ پنٕنؠ ژٲنگؠ مگر ہُریمانہٕ زیتون تیل تلوٗکھ نہٕ سٟتؠ کینٛہہ یہنٛدِ باپتھ۔4مگر عٲقل کوریٚو تُل پننٮ۪ن بوتلن منٛز ہُریمانہٕ تیل تہِ تہٕ پننٮ۪ن ژانگیٚن منٛز تہِ تھووُکھ تیل ترٲوِتھ۔5مہرازن لوگ یِمن واریاہ ژیر، تہٕ راتھ تہِ وٲژ واریاہ۔ یِم کورِ لوسہٕ پرٲرؠ پرٲرؠ تہٕ کھٔژٕکھ نٮ۪ندر تہٕ پیٚیہِ خفتہٕ۔6منٛز رٲژ وُزناوِ یِمہٕ کمؠ تام کریکھ دِتھ، "ہے مہرازٕ آو! مہرازٕ چھُ پکان۔ وتھِو نیرِو نٮ۪بر تس خۅش آوے کرنہِ"7اوے وژھٕ سارے کورِ تہٕ ہٮ۪تِکھ پنٕنؠ ژٲنگؠ زالنہٕ باپتھ سمبالٕنؠ۔8بیقل کوریو وون عٲقٕل کورٮ۪ن۔ اسہِ دِیو کینٛہہ تیل، تکیازِ سٲنؠ ژٲنگؠ چھِ لوسنس وٲتؠ مٕتؠ9عٲقٕل کوریٚو ووٚنُکھ، "نہ، سون تیل پوشہٕ نہٕ اسہِ پننٮ۪ن تہٕ تہنٛدٮ۪ن ژانگیٚن۔ نیرِو ہیٚیِو وٲنِس پانس کیُت تیل!"10یپٲرؠ ییٚلہِ بیقل کورِ تیل ہٮ۪نہِ دراے، مہرازٕ پیٚو وٲتِتھ۔ عٲقٕل کورِ یِمہٕ تیار آسہٕ، دراے أمِس نفرس سٟتؠ خاندرٕ کُٹھِس کُن یتہِ مہرِنؠ پراران ٲس۔ امہِ پتہٕ آو بر بند کرنہٕ۔11کینٛژِ کٲلؠ واژٕ باقے کورِ خاندرٕ کُٹھِس نِش تہٕ دِتھِکھ مہرازس بر یلہٕ تراونہٕ باپتھ آلو، "جناب، مُژرٲوؠ تو"12مگر تمؠ وونُکھ اورٕ، "پزر گوو زِ بہٕ زانو نہٕ توٚہؠ، اوے مُژراونہٕ بہٕ تہنٛدِ باپتھ بر"13یسوعنؔ تھٲو کتھ جٲری، "اوے تہِ تاکہِ یُتھ ہیِو ییہِ نہٕ توٚہہِ بٔنِتھ۔ روزِو تیار تکیازِ کیا خبر کیا سپدِ"14ییٚلہِ آدمؔ زاد بادشاہ بٔنِتھ واپس ییہِ آسمانہٕ پیٚٹھٕ۔ یہِ آسہِ زنتہٕ اکھ نفر یُس أکِس دوٗر دراز زیٹھِس سفرس پیٚٹھ نیرُن ہیٚیہِ۔ تمؠ أنؠ پنٕنؠ نوکر ناد دِتھ تہٕ بٲگراونکھ پننہِ دولژ منٛز کینٛہہ رقم تاکہِ سُہ لاگن تِم کُنہِ کارس تہٕ زینن مزید پونٛسہٕ۔15تمؠ دِتؠ یِمن پونٛسہٕ، یہنٛز پونٛسہٕ خرچ کرنچ لیاقت وُچھِتھ۔ مثالے، امؠ دِتؠ أکِس نوکرس پانٛژھ تھیلہٕ سۅن یُہنٛد وزن اکھ ہتھ تہٕ پنٛژہٲٹھ کلو اوس۔ دویمِس دِتِن زٕ تھیلہٕ سۅن یہُنٛد وزن شِہٲٹھ کلو اوس۔ تہٕ تریمِس دِتُن اکھ تھیلہٕ سۅن یمیُک وزن تریہِ ترٕہ کلو اوس۔ امہِ پتہٕ دراو سُہ پننِس سفرس۔16یمِس نفرس پانٛژھ تھیلہٕ سۅن میلؠ سُہ دراو وُژھی تہٕ بنٲوِن یِمن پانٛژن ہُریمانہٕ پانٛژھ تھیلہٕ۔17یِتھے پٲٹھؠ، دراو نوکر یمِس زٕ تھیلہٕ ٲسؠ میلؠ مٕتؠ تہٕ زینِن مزید زٕ تھیلہٕ سۅن۔18مگر سُہ نوکر یمِس اکُے تھیلہٕ اوس میولمُت، سُہ گوو تہٕ کھوٚنُن زمینہِ منٛز کھۅڈ تہٕ تھووُن خداوند سُنٛد یہِ اکھ تھیلہٕ سۅن أتھؠ منٛز ژوٗرِ حفاظتہٕ سان۔19واریاہہِ کٲلؠ پتہٕ پھیور یِمن نوکرن ہند مٲلک واپس۔ تمؠ أنؠ یِم ناد دِتھ سمبرٲوِتھ تاکہِ زانہِ یِمو کیا کوٚر پننِس پونٛسس۔20یمِس نوکرس پانٛژھ تھیلہٕ ٲسؠ میلؠ مٕتؠ، آو داہ تھیلہٕ ہٮ۪تھ واپس۔ تمؠ ووٚن، "مٲلک، ژےٚ دِتِتھ مےٚ پانٛژھ تھیلہٕ سۅن خیال تھونہٕ موجُب۔ مےٚ زینؠ پانٛژھ ہُریمانہٕ!"21مٲلکن ووٚنُس، "ژٕ چھُکھ سٮ۪ٹھا رُت نوکر۔ ژٕ رودُکھ مےٚ وفادار۔ ژےٚ رژھرووُتھ اکھ معمولی رقم واریاہ رٕتؠ پٲٹھؠ۔ اوے بناوتھ بہٕ ژٕ واریاہن چیزن ہنٛد نگران۔ ولہٕ تہٕ روز مےٚ سٟتؠ خۅش"22یمِس نوکرس سۅنٕکؠ زٕ تھیلہٕ میلؠ مٕتؠ ٲسؠ، تہِ آو برونہٛہ کُن تہٕ ووٚنُن، "مٲلک، ژےٚ دِتِتھ مےٚ زٕ تھیلہٕ سۅن رژھراونہٕ باپتھ۔ مےٚ زینؠ تتھ زٕ ہُریمانہٕ تھیلہٕ!"23تسٕنٛدؠ مٲلکن ووٚنُس، "ژٕ چھُکھ رُت نوکر۔ ژٕ رودُکھ مےٚ سخ وفادار۔ ژےٚ رژھرووُتھ کمےٕ رقم سٮ۪ٹھا رٕتؠ پٲٹھؠ۔ اوے بناوتھ ژٕ بہٕ واریاہن چیزن ہُنٛد نگران۔ ولہٕ تہٕ روز خۅش مےٚ سٟتؠ۔24پتہٕ آو سُہ نوکر یمِس اکُے تھیلہٕ سۅنُک میولمُت اوس۔ تمؠ ووٚن، "مٲلک بہٕ رودُس ژےٚ کھوٚژان۔ بہٕ اوسُس زانان زِ ژٕ چھُکھ اکھ شخص یُس یژھان چھُ کُنہِ کامہِ منٛز پونٛسہٕ تراونہٕ ورٲے واریاہ کماوُن، أکِس تِتھِس کمِلؠ سنٛدؠ پٲٹھؠ یُس کھہَس کینٛہہ وَو نَے فصٕل لونُن یژھان چھُ۔25بہٕ اوسُس کھوٚژان زِ یودوے مےٚ یہِ دِنہٕ آمُت پونٛسہٕ راوِ، ژٕ کیا کرکھ مےٚ سٟتؠ۔ اوے تھوو مےٚ سُہ زمینہِ منٛز ژوٗرِ۔ سُہ چھُ یہِ مہربٲنی کٔرِتھ رٔٹِو واپس"26مٲلکن ووٚنُس، "ہے کمینہٕ، آلٕژؠ نوکرٕ، ژےٚ زونُتھ زِ مےٚ روٚٹ باقین نِش سُہ پونٛسہٕ تہِ یُس نہٕ میون اوس۔ أکِس کمِلؠ سنٛدؠ پٲٹھؠ یُس کٲنٛسہِ وۅپر کمِلؠ سنٛدؠ کھہہ پیٚٹھٕ فصل لوٚنان چھُ یُس نہٕ تٔمؠ وومُت تہِ آسہِ۔27ژےٚ پزؠ ہی یہِ پونٛسہٕ کم از کم کُنہِ بنکس منٛزے تھاوُن یتہِ پیٚٹھٕ بہٕ واپس پھیرِتھ پنُن رقم سوٗد ہٮ۪تھ وصول کرہا"28امہِ پتہٕ وون مٲلکن باقے نوکرن، "أمِس نِش رٔٹِو یہِ سۅنہٕ تھیلہٕ تہٕ دِیو یہِ نوکرس یمِس داہ تھیلہٕ چھِ۔29تِمن یِم زن وصول کٔرؠ مٕتِس چیزس رٕتؠ پٲٹھؠ استعمال کرن، بہٕ دِمہٕ تِمن مزید، تہٕ تِمن آسہِ وٲفِر۔ وۅنؠ گوو تِم، یِم رٹن مگر رٕتؠ پٲٹھؠ ورتاون نہٕ، خدا نِیہِ تِمن نِش تتہِ واپس یہِ تِمن آسہِ۔30امہِ مذید، ژھٕنؠ ووٗن یہِ نابکار نوکر نٮ۪بر انہِ گٔٹِس کُن کٔڈِتھ، ییٚتہِ سُہ ودان رِوان تہٕ دگہِ سٟتؠ دند ٹکن والیٚن سٟتؠ روزِ"31"ییٚلہِ آدمؔ زاد پننہِ شانہٕ سان واپس ییہِ پننٮ۪ن سارنےٕ فرشتن ہنٛدِس اردلس منٛز، سُہ بیٚہہِ پننِس تختس پیٚٹھ بادشاہ ہیٚو سارنےٕ عدالت لاگنہِ۔32ساروےٕ لوٗکو منٛزٕ پرٛتھ کانہٛہ ییہِ سمبراونہٕ تس برونہٛہ کنہِ۔ پتہٕ ژارِ سُہ لوٗکن بیوٚن بیوٚن اکہِ اکہِ، یتھٕ پٲٹھؠ زن اکھ پوٚہل تیرن ژھاوجو منٛزٕ ژٲرِتھ کڈان چھُ۔33سُہ تھاوِ راستباز لوٗکن پانس دچھنہِ طرفہٕ تہٕ تِمن تھاوِ کھووٕرؠ کِنؠ یِمنہٕ راستباز آسن، زنتہٕ کٹن تہٕ ژھاوجن ہنٛدؠ پٲٹھؠ"34پتہٕ ونہِ سُہ پانس دچھنہٕ طرفہٕ کٮ۪ن، "توٚہؠ لوٗکھ یِمن میٲنؠ مٲلؠ فضل عطا کوٚر، ؤلِو رٔٹِو سٲری رٕتؠ چیز یِم سُہ توٚہہِ دِنؠ یژھان چھُ۔ سُہ چھُو توٚہہِ ووٚنؠ پننہِ بادشٲہی ہنٛدؠ فضیلتہٕ عطا کرن وول۔ چیز یِمن سُہ دنیا خلق کرنہٕ پیٚٹھٕ تیار کران رود۔35یِم چیز چھِ تہنٛدؠ ملکِیت۔ تکیازِ توٚہہِ دِتو مےٚ کھٮ۪نہٕ باپتھ ییٚلہِ بہٕ بۅچھِ ہوٚت اوسُس۔ توٚہہِ دِتو مےٚ چٮ۪نہٕ باپتھ کینٛہہ ییٚلہِ بہٕ تریشہٕ ہوٚت اوسُس۔ ییٚلہِ بہٕ تہنٛزِ سریہِ منٛز مسٲفر اوسُس، توٚہہِ دِژٕو مےٚ گرٕ یِنچ دعوت۔36ییٚلہِ مےٚ پلون ہُنٛد حاجت اوس، توٚہہِ دتِو مےٚ پلو۔ ییٚلہِ بہٕ بٮ۪مار اوسُس، توٚہہِ بوٚرُو میون واے۔ ییٚلہِ بہٕ بٲنٛدؠ اوسُس، توٚہؠ آیو مےٚ سمکھنہِ۔37امہِ پتہٕ دِن جواب تِم لوٗکھ یِمن خدا رُت آسنُک پروانہٕ دِیہِ، "خداوند، ژٕ کر اوسُکھ بۅچھِ ہوٚت زِ اسہِ وُچھُکھ تہ دِتُوے کھٮ۪نہٕ باپتھ کینژھا؟ ژٕ کر اوسُکھ تریشہٕ ہوٚت تہٕ اسہِ دِتُوے چٮ۪نہٕ باپتھ کینٛہہ؟38ژٕ کر اوسُکھ مسافر سانہِ سریہِ منٛز زِ اسہِ اونُکھ پنُن گرٕ دعوت دِتھ۔ ژےٚ کر اوسُے پلون ہُنٛد حاجت تہٕ اسہِ دِتی کینٛہہ؟39ژٕ کر اوسُکھ بٮ۪مار یا بٲنٛدؠ زِ أسؠ آے سمکھنہِ۔ اسہِ چھُنہٕ یادےٕ یِمہٕ چیز کر کٔرؠ اسہِ چانہِ باپتھ۔40بادشاہ ونٮ۪کھ یورٕ، پزر چھُ یہِ زِ ییٚلہِ توٚہہِ پننٮ۪ن ایمان دار سٲتھین ہنٛدِ باپتھ کینٛہہ کوٚرُو یودوے سُہ سٮ۪ٹھا معمولی تہِ اوس۔ توٚہہِ کوٚرُو سُہ پزنہٕ پٲٹھؠ میانہِ باپتھ۔41پتہٕ ونہِ سُہ پانس کھوورِ انٛدٕ کٮ۪ن لوٗکن کُن، "توٚہؠ لوٗکھ یِمن خداین لعنت سوز، نیرِو مےٚ نِش دوٗر! نیرِو روزِو ہمیشہٕ دزوٕنِس نارس منٛز یُس خداین شیطان تہٕ تسنٛدین سٲتھین ہنٛدِ باپتھ تیار کوٚرمُت چھُ۔42تہنٛدِ باپتھ روزِ تورؠ گژھُن جان تکیازِ توٚہہِ دِتُو نہٕ مےٚ کھٮ۪نہٕ باپتھ زانہٛہ کینٛہہ ییٚلہِ بہٕ بۅچھِ ہوٚت اوسُس۔ توٚہہِ دِتُو نہٕ مےٚ کھٮ۪نہٕ باپتھ کینٛہہ ییٚلہِ بہٕ تریشہٕ ہوٚت اوسُس۔43توٚہہِ دِژٕو نہٕ مےٚ زانہٛہ گرٕ یِنچ دعوت، ییٚلہِ بہٕ مسافر اوسُس تُہنزِ سریہِ منٛز۔ توٚہہِ دِتُو نہٕ مےٚ زانہٛہ کانہٛہ وولت ییٚلہِ مےٚ حاجت اوس۔ توٚہہِ بوٚرُو نہٕ زانہٛہ میون واے ییٚلہِ بہٕ بٮ۪مار یا بٲنٛدؠ اوسُس۔44تِم وننس جواب، "خداوند۔ ژٕ اوسُکھ کر بۅچھِ ہوٚت، یا تریشہٕ ہوٚت یا مسافر یا کر اوسُے ژےٚ حاجت کُنہِ وولتیُک۔ یا اوسُکھ بٮ۪مار یا کانہٛہ بٲنٛدؠ زِ اسہِ کوٚرےٕ نہٕ مدد ژےٚ۔45سُہ ونٮ۪کھ اورٕ، پزر گوو یہِ زِ ییٚلہِ تہِ توٚہہِ میٲنِس کٲنٛسہِ نفرس مدد کورُو نہٕ، معمولی نفرس تہِ نہٕ، یہِ اوسُس بےٕ یمہِ سنٛدِ باپتھ توٚہہِ کورُو نہٕ۔46ادٕ گژھن مےٚ کھووٕرؠ کِنؠ بہِتھ لوٗکھ تتھ جایہِ یتہِ خدا تِمن ہمیشہٕ باپتھ عذاب دِیہِ، ووٚنؠ گوو خدایہِ سنٛزِ نظرِ منٛز رٕتؠ لوٗکھ گژھن تتھ جایہِ یتہِ تِم خدایس سٟتؠ ہمیشہٕ روزن"
Bridge Connectivity Solutions Pvt. Ltd.