متی24
1یسوعؔ دراو ہیکل کہِ صحنہٕ منٛزٕ نٮ۪بر۔ ییٚلہِ زن سُہ پکان اوس، شٲگرد آیس نکھہٕ تہٕ رودؠ پانہٕ وٲنؠ ونان زِ ہیکلچ یہِ عمارت کٲژاہ لوٗبہٕ وٕنؠ چھےٚ۔2تٔمؠ ووٚن تِمن، "بہٕ ونو یِمن عمارژن متعلق اکھ پزر یِمہٕ توٚہؠ دیدمان وُچھان چھُو: اکھ فوجی لشکر کرِ یِمن مکمل تباہ۔ تِم والن یِمن عمارژن ہنٛز اکھ اکھ کٔنؠ۔ کانہٛہ کٔنؠ روزِنہٕ کنہِ پیٚٹھ۔3ژیرؠ پہن، ییٚلہِ زن یسوع کُنےٕ زون زیتون بالہٕ کِس وسہٕ وٕنِس پیٚٹھ بیٚہِتھ اوس، شٲگرد آس سٔمِتھ تہٕ پرُژھہس، "یِمن ہیکل چیٚن کنٮ۪ن کر ییہِ یُتھ ہِیو بٔنِتھ تہٕ کیا ہِیو سپدِ یُس چون دُبارٕ یُن ہاوِ۔ تہٕ یہِ ہاون زِ یہِ دنیا چھُ اند واتن وول۔4یسوعنؔ ووٚنُکھ یورٕ، "یہِ بہٕ توٚہہِ ؤنِتھ ہیٚکہٕ ہو تہِ چھُ یہِ زِ یِنہٕ کانہٛہ دھوکھہٕ دیو زِ یہِ کر سپدِ واقع۔5واریاہ لوٗکھ یِنو تہٕ وننو زِ تِم چھُس بہٕ۔ آ، تِم وننو بالکل یی، بہٕ چھُسو مسیحؔ تہٕ یِتھٕ پٲٹھؠ دِن واریاہن لوٗکن دھوکھہٕ۔6توٚہؠ بوزِو جنگن متعلق یِم ؤلؠ ؤلؠ وتھن تہٕ یِم جنگ وُنہِ دوٗر آسن۔ یہِ کتھ تھٲیو ژٮ۪تس زِ خداین ووٚن زِ یِم چیز سپدن ووٚنؠ گوو ییٚلہِ یِم واقعہٕ سپدن، میون مطلب آسہِ نہٕ زِ دنیا واتہِ اند۔7لوٗکن ہنٛزٕ گیجہٕ کرن اکھ أکِس پیٚٹھ حملہٕ، بادشاہ یِن اکھ أکِس پیٚٹھ وۅتلِتھ۔ واریاہن جاین آسن دراگ تہٕ بنِلؠ۔8گۅڈٕ سپدن یِمے چیز، ووٚنؠ گوو یہِ آسہِ بوزؠ تو زنتہٕ أکِس زنانہِ بچہٕ دود ہیٚو وۅتھُن بچہٕ زیٚنہٕ برونہٛہ۔9بیٚیہِ تہِ سپدن واریاہ چیز۔ لوٗکھ یِم توٚہہِ خلاف آسن نِن توٚہہِ پانس سٟتؠ توٚہہِ عذاب دِنہِ تہٕ مارنہِ۔ مختلف گیجن منٛز وہرِتھ لوٗکھ تھاون تُہنٛز دٕے تکیازِ توٚہہِ آسیٚو مےٚ پیٚٹھ ایمان۔10تہٕ واریاہ تراون مےٚ پیٚٹھ پنُن ایمان تمہِ عذابہٕ کِنؠ یُس تِمن لوٗکھ دِن تہٕ پھساون۔ تِم پھساون پننٮ۪نےٕ ایماندار سٲتھین تہٕ تھاون اکھ أکؠ سنٛز نفرت۔11واریاہ یِن یہِ ونان زِ تِم چھِ نبی۔ ووٚنؠ گوو تِم آسن اپُز ونان، تہٕ دِن واریاہن لوٗکن دھوکھہٕ۔12تکیازِ ہُریمانہٕ لوٗکھ تراون خدایہِ سُنٛد قانون مانٕنؠ۔ واریاہ ایمان وٲلؠ تراون اکھ اکؠ سُنٛد لول۔13ووٚنؠ یِم تمام لوٗکھ پنُن ایمان سٲرسےٕ زُوَن کالس منٛز سلامت تھاون، تِمن بخشہِ خدا نجات۔14امہِ مذید ایمان وٲلؠ دِن یمہِ رٕژِ شیٚچھِ ہنٛز تعلیم زِ خدا کِتھہٕ چھُ دنیا کہ اکہِ اندٕ پیٚٹھٕ بیٚیِس انٛدس تام بادشٲہی کران، تاکہِ یہِ تعلیم واتہِ سارنےٕ لوٗکن۔ اوٕ پتہٕ سپدِ دنیہُک انٛد۔15تتھ وقتس دوران اژِ اکھ قٲبلِ نفرت چیز ہیکلس منٛز۔ یہِ کرِ ہیکلس ناپاک تہٕ کرِ لوٗکن اتھ تراونس پیٚٹھ مجبور۔ دانی ایلؔ نبین ووٚن تہٕ لیٚوکھ واریاہ کال برونہٛہ" میون پرٛتھ کانہٛہ یُس یہِ پرِ، دِیِن اتھ کُن دھیان، تکیازِ بہٕ چھُسو توٚہؠ خبردار کران۔ 16ییٚلہِ توٚہؠ ہیکلس منٛز یہِ سپدان وُچھِو، یہُوداؔ علاقس منٛز روزن والیٚن سارنےٕ لوٗک پزِ بالن کُن ژلُن۔17یِمہٕ گرو نٮ۪بر آسن تِمن پزِ نہٕ واپس گرٕ اژُن پنُن سامان تلنہٕ ژلنہٕ برونہٛہ۔18یِم کھہَن منٛز آسن کٲم کران تِمن پزِ نہٕ پنٕنؠ پلو حٲصل کرنس پرارُن۔19یہِ کوتاہ مشکل وقت آسہِ گۅبہِ کھور زنان ہنٛدِ باپتھ تہٕ تِمن زنان ہنٛدِ باپتھ یِم بچن دۅد آسن دِوان۔ تکیازِ تہنٛدِ باپتھ کوتاہ کریوٹھ آسہِ ژلُن۔20خدایس منٛگِو زِ توٚہہِ پیٚیہِ نہٕ وندس منٛز ژلُن۔ ییٚلہِ زن سفر کریوٹھ چھُ آسان۔ یا سبات، یعنی آرامکہِ دوٚہہ؛21تکیازِ لوٗکن واتہِ سخ عِذا ییٚلہِ یہِ سپدِ۔ لوٗکو چھُنہٕ خدایہِ سنٛدؠ دٔسؠ یہِ دنیا بننہٕ پیٚٹھٕ ازتام زانہٛہ تہِ یُتھ عذاب وُچھمُت تہٕ نَہ تُلہِ کانہٛہ امہِ پتہٕ یُتھ عذاب زانہٛہ۔22یودوے لوٗکن ہنٛدِ سخ عذابٕچ یہِ گٔر خداین ژھوٚٹ تھاونُک فٲصلہٕ آسہِ ہے نہٕ کوٚرمُت، تیٚلہِ مرہن سٲری۔ مگر تٔمؠ تھٲو عزابٕچ یہِ گٔر تکیازِ تس چھُ تِمن لوٗکن ہُنٛد وسہِ یِم تٔمؠ ژٲرؠ مٕتؠ چھِ پننہِ باپتھ۔23امہِ خاص وقتہٕ، یودوے توٚہہِ کانہٛہ ونہِ، ہے وُچھِو، یہِ چھُو مسیحؔ یا یودوے کانہٛہ ونہِ "مسیحؔ چھُ یتہِ" اتھ مہٕ کٔرِو پژھ۔24تہٕ کینٛہہ گژھن خدایہِ سنٛدِ نبی آسنُک اپُز دعویٰ کرنہٕ حٲظر۔ باقے کرن مسیحؔ آسنُک دعویٰ۔ تِم کرن واریاہ معجزٕ تہٕ حٲران کروٕنہِ کامہِ تاکہِ لوٗکن دِن دھوکھہٕ۔ تِم کرن توٚہہِ ژھل۔ خدایہِ سنٛدین ژٲرؠ مٕتٮ۪ن لوٗکن سٟتؠ تہ تارن گری کرنچ۔25یِنہٕ یہِ مشرٲیو زِ مےٚ کٔرِو توٚہؠ گۅڈے خبردار یِتھیٚو چیزو نِشہٕ۔26اوے تہِ یودوے توٚہہِ کانہٛہ ونہِ، "ہے بوزِو۔ مسیحؔ چھُ بیابانس منٛز" یِنہٕ تور کُن نیرِو۔ یِتھے پٲٹھؠ یودوے کانہٛہ ونیو۔ سُہ چھُ کُنہِ خفیہ کمرس منٛز۔ أمِس ونن وٲلِس مہٕ کٔرِو پژھ۔27توٚہہِ پزِ نہٕ تِمن پیٚٹھ بھروسہٕ کرُن تکیازِ یِتھٕ پٲٹھؠ آسمانچہِ وُزملہٕ چھےٚ پرٮ۪زلان تہٕ اتھ چھِ سٲری لوٗکھ وچھان، تِتھے پٲٹھؠ وُچھِ پرٛتھ کانہٛہ آدمؔ سنٛدِس گوٚبرس ییٚلہِ سُہ بیٚیہِ واپس ییہِ۔28یہِ آسہِ سارنےٕ ہنٛدِ باپتھ صاف زِ یِتھٕ پٲٹھؠ ییٚلہِ گرید سٔمِتھ یِن توٚہؠ زٲنِو زِ کٲنٛسہِ جانور سُنٛد کرینٛز آسہِ اندؠ پکؠ۔29"تمہِ وزِ لوٗکن عذاب پینس پتے سپدِ آفتاب سیاہ، زوٗنہِ مۅکلہِ گاشےٕ، تارکھ پٮ۪ن نبہٕ پیٚٹھٕ وسِتھ۔ خدا دنہٕ راوِ پرٛتھ چیزس ژکہِ پیٚٹھےَ۔30امہِ پتہٕ وُچھن سٲری دیدمان تس آدمؔ زادس نبس پیٚٹھ ظٲہِر سپدان۔ بُترٲژ پیٚٹھ پرٛتھ لُکہٕ گٮ۪جہٕ تہٕ قبیلن منٛز موجود بے ایمان لرزن خوفہٕ سٟتؠ۔ تِم وُچھن مےٚ آدمؔ زادس، اوبرٕ پیٚٹھؠ قوت سان تہٕ عظمتہٕ سان یوان۔31پتہٕ سوزکھ بہٕ فرشتہٕ نبکہِ پرٛتھ اندٕ بُترٲژ پیٚٹھ ییٚلہِ تمؠ تھدِ تھدِ ترے وزنٕچ آواز بوزن۔ خدایہِ سنٛدؠ لوٗکھ، یِم تٔمؠ ژٲرؠ مٕتؠ چھِ سمن سٲری بُترٲژ پیٚٹھ۔32ووٚنؠ ہیٚچھِو وارٕ انجیرؠ کُلہِ کہِ وۅتھہٕ واشرٕ سٟتؠ۔ ییٚلہِ انجیرؠ کُلچہِ لنجہِ نرم بنان چھےٚ تہٕ پن چھُ ہیٚوان نیرُن۔ أسؠ چھِ زانان زِ رٮ۪تہٕ کول ووت۔33یِتھے پٲٹھؠ ییٚلہِ توٚہؠ یہِ سورےٕ وننہٕ آمُت سپدان وُچھِو۔ زٲنِو زِ تسنٛدِ واپس یِنُک وق چھُ دروازس نکھے۔34یہِ کتھ تھٲیو ژٮ۪تس، یِم سٲری واقعہٕ سپدن تِمن تمام لوٗکن ہنٛدِ مرنہٕ برونہٛہ یا یِم اتھ سپدتِس پانہٕ وُچھن۔35توٚہؠ تھٲیو یقین زِ یہِ مےٚ توٚہہِ ووٚن تہِ سپدِ برابر۔ یہِ بُترات تہٕ یہِ نب گژھِ موٗلے غٲب اکہِ دوٚہہ۔ ووٚنؠ گوو یہِ بہٕ ونو، تہِ آسہِ ہمیشہٕ پوٚز۔36"مگر کانہٛہ بیاکھ نفر نہٕ، آسمانٕکؠ فرشتہٕ تہِ نہٕ، گۅبُر تہِ نہٕ، چھِنہٕ اکھ رژھ تہِ زانان زِ سُہ وق کر واتہِ ییٚلہِ یہِ سپدِ۔ چھرا چھُ بب خداے زانان۔37یہِ آسہِ زٲنؠ تو یہِ نوح سنٛدِ وقتہٕ گوو۔ ییتِس کالس نہٕ سُہ بوٚڈ یُپ کھوٚت، لوٗکن ٲس نہٕ پژھےٕ زِ یُتھ کینٛہہ کُڈُر ییہِ تِمن بٔنِتھ۔ تِم ٲسؠ پننہِ مزٕ کھیٚوان چیٚوان۔ لوٗکھ ٲسؠ نیتھٕر تہِ کران۔ تہٕ مٲلؠ ٲسؠ پننہِ کورِ مردن نیتھرس منٛز تہِ دِوان۔ تِم رودؠ یہِ سورےٕ کران کراوان یوٚتام نوح تہٕ امسنٛدؠ ٹبر تتھ بجہِ ناوِ منٛز ژاو۔ تہٕ ییٚلہِ سُہ یُپ آو تہٕ پھاٹنٲوِن ناوِ نٮ۪بر رودؠ مٕتؠ سٲری لوٗکھ۔ یِتھے پٲٹھؠ زانن نہٕ مےٚ بے ایمان بالکل ییٚلہِ بہٕ اولادِ آدمؔ دُبارٕ یِمہٕ۔40ییٚلہِ یہِ سپدِ سٲری لوکھ یِن نہٕ آسمانس کھالنہٕ۔ مثالے، زٕ نفر آسن کھہَن منٛز۔ اکھ ییہِ آسمانس کھالنہٕ تہٕ بیاکھ ییہِ اتی تراونہٕ سزا تُلنہٕ باپتھ۔41یِتھے پٲٹھؠ زٕ زنانہٕ آسن گرٹہٕ پیٚٹھ پھل پِشان۔ اکھ ییہِ آسمانس کھالنہٕ تہٕ بیاکھ ییہِ اتی تراونہٕ۔42اوے تہِ، چونکہِ توٚہہِ چھنہٕ خبرےٕ زِ خداوند کر ییہِ، توٚہہِ پزِ پرٛتھ گرِ تیار روزُن۔43أسؠ چھِ زانان زِ یودوے کٲنٛسہِ مکان مٲلکس یہِ پتاہ روزِ سُہ ژوٗر کمہِ وِزِ ییہِ راتھ کیُت، سُہ روزِ ہُشارے ژوٗرس زاگہِ روزِتھ۔44اوے روزیٚو توٚہؠ تیار، تکیازِ، بہٕ آدمؔ سُنٛد اولاد، یِمہٕ دُبارٕ تمہِ وزِ ییٚلہِ نہٕ توٚہہِ میٲنؠ پے لگہ۔۔45سونٛچِو اکھ وفادار تہٕ دانا نوکر کیُتھ آسہِ۔ مکان مٲلک چھُ أکِس نوکرس باقین نوکرن پیٚٹھ نگران مقرر کران۔ سُہ چھُ أمِس ونان زِ یِمن دِیہِ زِ منٲسب وقتس پیٚٹھ کھیٚن چیٚن۔ پتہٕ چھُ سُہ پانہٕ نیران أکِس زیٹھِس سفرس پیٚٹھ۔46یودوے زن سُہ نوکر مٲلکہٕ سنٛدِ یِنہٕ وِزِ پنٕنؠ دِنہٕ آمٕژ کٲم کران آسہِ، مٲلکِ مکان گژھِ أمِس واریاہ خۅش۔47یہِ میون ونُن چھُ پوٚز زِ یہِ مکان سُہ مٲلکھ بنایو تمِس خدمت گارس پننہِ سٲری جایٔیدادک مختار یتھ سُہ مٲلک چُھ۔48مگر اکھ کمین نوکر چھُ پانس ونان، "مٲلکس گوو واریاہ کال نٮ۪بر، اوے ییہِ نہٕ شاید ؤلؠ ؤلؠ تہٕ زانہِ زِ بہٕ کیا چھُس کران۔49اوے لاگہِ سُہ ماتحتن لایُن تہٕ روزِ کھیٚوان چیٚوان شرابٮیٚن سٟتؠ۔50مگر یہِ مٲلکِ مکان چھُ تمہِ وِزِ واپس یِوان ییٚلہِ سُہ نوکر امِچ امیدے تھاوان اوسنہٕ۔51سُہ مٲلکہِ مکان دِیہِ سخ سزا أمِس نوکرس تہٕ برٮ۪س توٚت یوٚت زن ریاکارن بران چھِ۔ تتھ جایہِ چھِ لوٗکھ ودان رِوان روزان تہٕ دند ٹکان آسان تکیازِ تِمن چھُ آسان سخ عذآب۔
Bridge Connectivity Solutions Pvt. Ltd.