پیدٲیش45
1یوسفؔ اوس نہٕ وۅنؠ پننٮ۪ن جذباتن پٮ۪ٹھ قوبو پرٲوِتھ ہیٚکان۔ سُہ اوس نہٕ پننٮ۪ن خٲدمن برُونٛہہ کنہِ ودُن یژھان، لہٰذا وُن تٔمؠ تِمن روبہٕ سان "توٚہؠ سٲری نیریٚو یتہِ نیٚبر!" تمہٕ پتہٕ دراے تِم نیٚبر تہٕ تتہِ اوس نہٕ یوسفسؔ نِش مِصرُک کانٛہہ ییٚلہ تٔمؠ پننٮ۪ن باین وُن زِ بہٕ کُس چُھس۔2سُہ لوٚگ تتھٕ کنؠ نالہٕ دنہِ زِ نیٚبرِمیٚو نفرو مِصرِیو تہِ بوز تہٕ محل خانہ کیٚو باقی لوٗکو تہِ۔3یوسفن وُن پننٮ۪ن باین، "بہٕ چُھس یوسفؔ! کیاہ سون مول چھا وُنہِ زندے؟" مگر تٔمسنٛدیو بایو ہیٚوک نہٕ کہین ؤنتھ تکیازِ تم گے دم پُھٹؠ زِ یہ کیاہ چُھ یہ ونان۔4پتہٕ وُن یوسفنؔ پننٮ۪ن باین، "ؤلیو مےٚ برونٛہہ کُن" ییٚلہ تِم تٔمس نزدیک آے تہٕ وُننکھ، بہٕ چُھس تُہنٛد بوے یوسفؔ! سُے یوسف یُس توٚہہِ تٲجرن کٕنہٕ وون تہٕ تِمو واتنووُس بہٕ یور مِصر!5مگر وۅنؠ مہٕ گژھیٚو توٚہؠ پریشان تہٕ پانس مہٕ گژھیٚو بیزار زِ توٚہہ ژُھنووس بہٕ غلام بنٲوِتھ کٔنِتھ۔ یہ چُھ خدایہ سُنٛد کرُن یمؠ بہٕ توٚہہِ برُونٛہہ یور واتنووُس تاکہ توٚہہِ بچایو دراگہٕ سٟتؠ مرنہٕ نشہٕ۔6یتھ ملکس منٛز چُھ پتمیٚو دوٚیو ورؠ یو پٮ۪ٹھٕ دراگ چلان تہٕ یہ روزِ بیٚیہِ تہِ پانٛژن وری ین جٲری۔ اتھ وقتس دوران نہ وایہ کانٛہہ زمینےٕ تہٕ نہ آسہ لوننہٕ خٲطرٕ فصلےٕ۔7خداین سوزُس بہٕ توٚہہِ برُونٛٹھےٕ یور تاکہِ توٚہؠ روزیٚو نہٕ بۅچھِ ۂتؠ تہٕ یہ کتھ بنہِ یقینی زِ تُہنٛز زُرؠ یاتھ بچہ۔8لہٰذا ووتُس نہٕ بٕ تُہنٛدِ سٟتؠ یور، یہ چُھ خدایہ سُنٛد یژُھن یمؠ بہٕ یور واتنووُس! تٔمؠ بنووُس بہٕ بادشاہس زنتہٕ مول۔ بہٕ چُھس تمہِ سنٛدِ محلہٕ کہ پرٛتھ چیزُک نگران تہٕ مِصرس منٛز سارنی ہُنٛد گورنر!9وۅنؠ گٔژھیٚو جلدےٕ میانِس مٲلس نِش تہٕ ؤنؠ ووس، چون نیٚچو یوسفؔ چُھ یہ ونان: "خداین بنووُس بہٕ سارے مِصرُک بادشاہ۔ جلدےٕ وات مےٚ نِش!10توٚہؠ ہکیٚو جشنؔ علاقس منٛز روزِتھ۔ توٚہؠ، تُہنٛدؠ شُرؠ تہٕ زُرؠ، تُہنٛدؠ تیر، ژھاوٕلؠ، چاروٲے تہٕ پرٛتھ سُہ چیز یُس تُہنٛز ملکِیت آسہ، روزَن مےٚ نزدیک۔11تکیازِ دراگٕکؠ پانٛژھ وری چھِ وُنہِ تہٕ بہٕ بناوٕ یہ یقینی زِ توٚہہ نِش چُھ کھیٚن۔ اگر نہٕ توٚہؠ یور یِیو تہٕ توٚہؠ، تُہنٛد عیال تہٕ تُہنٛدؠ سٲری نوکر مرن بۅچھِ بۅچھِ کران۔12اگر ژٕ، تہٕ بنیمِینؔ تہِ مےٚ غورٕ سان وُچھو تہٕ توٚہہِ سارنی گژھِ یقین زِ بےٕ چُھس یوسفؔ یُس توٚہہِ سٟتؠ کتھ چُھ کران۔13گٔژھیٚو ؤنیٚو میانِس مٲلِس زِ مِصرس منٛز کیٚوتھ عزت چُھ مےٚ۔ یہ کینٛژھا توٚہہِ وُچھو تتھ متعلق ؤنیٚو تمِس۔ تہٕ میٚون مول واتنٲوؠ وون جلدےٕ یور!"14پتہٕ روٚٹ تٔمؠ پنُن لۅکُٹ بوے بنیمِینؔ نالہٕ متہِ تہٕ لوٚگ ریٚونہِ۔ بنیمِیننؔ تہِ لوگ سُہ نالہٕ متہِ رٹِتھ ودُن۔15پتہٕ کٔرؠ تٔمؠ پننٮ۪ن بڈین باین رِوان رِوان ماہ تہٕ میٹھؠ، تمہِ پتہٕ لٲج تٔمسنٛدیو بایو تمِس سٟتؠ کتھ کرٕنؠ۔16کُس تام گو محل خانس منٛز تہٕ ؤنِن تتہِ یہ خبر زِ یوسفسؔ چھِ بٲے آمٕتؠ۔ بادشاہ تہٕ تمسنٛدؠ تمام عہدٕدار گےَ خوش۔17بادشاہن وُن یوسفسؔ، "پننٮ۪ن باین وَن زِ پننٮ۪ن خرن پٮ۪ٹھ بٔریٚو اناج تہٕ گٔژھیٚو کنعان مُلکس کُن روانہٕ۔18پتہٕ أنوون پنُن مول تہٕ پنٕنؠ گرٕ وٲلؠ تہِ یورؠ۔ بہٕ دِمو توٚہہِ مِصرس منٛز بہتر جاے تہٕ کھیٚنہٕ خٲطرٕ میلیٚو توٚہہِ یتہِ بہترین غذا۔"19پننٮ۪ن باین ؤنیٚو یتہِ زِ "پننہِ گرٕواجنہِ تہٕ شُرؠ یور اننہٕ باپتھ نِیو مِصرٕ پٮ۪ٹھٕ کینٛہہ گاڈِ تہٕ أنووکھ، بیٚیہِ أنوون پنُن مول تہِ سٟتؠ تہٕ وٲتیٚو جلدےٕ واپس۔"20پنُن مال یور واتناونٕچ بٔرؠ زیٚو نہٕ کانٛہہ فِکٕر تکیازِ مِصرس منٛز آسن ساروےٕ کھۅتہٕ اصل چیز تُہنٛدِ باپتھ۔ لہٰذا پییہِ نہٕ توٚہہِ کنعان پٮ۪ٹھٕ کانٛہہ تہِ چیز یور اننٕچ ضرورت۔"21یعقوبؔ سنٛدیو نیٚچیو کۅر تی یہ بادشاہ سُنٛد فرمان اوس۔ بادشاہ سنٛدِ فرمانہ مطٲبق دِژٕ یوسفنؔ تِمن گاڈِ تہٕ کھیٚن یہ تِمن وتہِ لگہ ہے۔22تٔمؠ دِتؠ تِمن سارنی نٔوؠ پلو، مگر بنیمِینسؔ دِتؠ تٔمؠ چاندِ ہنٛدؠ ترےٚ ہتھ سِکہٕ تہٕ بیٚیہِ نویٚن پلون ہنٛدؠ پانٛژھ جورٕ!23پننِس مٲلِس سوزؠ تٔمؠ مِصرٕ پٮ۪ٹھٕ ینہٕ والہِ بہترین سامانہٕ سٟتؠ بٔرِتھ داہ خر تہٕ داہ خٔرنہِ یمن پٮ۪ٹھ تس مِصرٕکہ سفرٕ باپتھ اناج، ژۅٹ تہٕ باقی کھیٚنہٕ سامانہٕ بٔرِتھ اوس۔24یتھ کٔنؠ کٔرؠ تٔمؠ پنٕنؠ بٲے پننہِ وتہِ روانہٕ تہٕ وُننَکھ ینہٕ وتہِ لڑٲے لٲگیٚو۔25لہٰذا دراے تمسنٛدؠ بٲے مِصرٕ منٛزٕ تہٕ وٲتؠ پننِس مٲلِس یعقوبسؔ نِش کنعانس منٛز۔26تِمو منٛزٕ وُن أکؠ تمِس، "یوسفؔ چُھ وُنہِ زندے۔ اکھتُے چُھ سُہ سارے مِصرُک گورنر!" یعقوب گو یہ بوزِتھ حٲران۔ تمِس بیٹھ نہٕ پژھےٕ یہ کیاہ آسہ پوٚز۔27مگر تِمو وُن تس تہِ سورےٕ یہ یوسفنؔ تِمن ونمُت اوس تہٕ یعقوبن وُچھٕ تمہٕ گاڈِ تہِ یم یوسفنؔ سُہ، تمسُنٛد خاندان تہٕ باقےٕ مال مِصر اننہٕ باپتھ سوزٕمژٕ آسہٕ۔ یتھ کٔنؠ ژوٚل یعقوبسؔ سورےٕ غم۔28تٔمؠ وُن، "یہ توٚہہ ونُو تہِ چُھ میانہِ یقینہٕ باپتھ کٲفی۔ میٚون نیٚچو یوسفؔ چُھ ونیُک تام زندٕ، بہٕ گژھٕ تہٕ مرنہٕ برُونٛہہ وچُھن سُہ!
Bridge Connectivity Solutions Pvt. Ltd.