گلتی4
1ووٚنؠ کرٕ بہٕ کتھ شُریٚن تہٕ وٲرثن متعلق۔ وٲرِث گو سُہ یُس پتہٕ مٲلؠ سنٛز وراثت رٹہ تہٕ سمبالہِ۔ ووٚنؠ گو ییتِس کالس یہِ وٲرِث شُر روزِ باقےٕ چھِ أمِس سمبالان روزان۔ أمیُک مطلب چھُ یہِ زِ یہِ چھُ غلام ہیو آسان۔ حالانکہِ سُہ چھُ سارنےٕ ہُنٛد آقا۔2ییتِس کالس امسنٛدؠ مٲلؠ یہِ مقرر کوٚرمُت آسہِ، سُہ بیاکھ نفر روزِ أمِس شُرِس تہٕ امسنٛدِ وراثتس رٲچھ راوٹ کران۔3یِتھے پٲٹھؠ ییٚلہِ أسؠ روحٲنی طور آچھرؠ آسو اوٕ کِنؠ زِ اسہِ چھنہٕ وُنہِ مسیحسؔ پیٚٹھ پژھ قٲیِم کٔرمٕژ، أسؠ چھِ تِمن قانونن تحت روزان یِمن تل باقےٕ دُنیہکؠ لوٗکھ تہِ روزان چھِ۔ یِم نفر چھِ اسہِ پننس حکمس تل رٹان۔ یتھٕ پٲٹھؠ زن اکھ آغہٕ پننیٚن غلامن رٹان چُھ۔4مگر تتھ وقتس پیٚٹھ یُس خداین برونہٛےٕ مقرر کوٚرمُت اوس سوز تٔمؠ یتھ دُنیہس منٛز پنُن نیٚچو یسوعؔ۔ یسوعؔ زاو انسٲنی ماجہِ تہٕ تس پییہِ تِم قانون پالٕنؠ یِم خداین موسیٰ ہس بخٕش۔5خداین سوز یسوع تِم قانون نہ پالنکہِ سزا نِشہٕ اسہِ نجات دِنہٕ باپتھ یِم قانون تٔمؠ موسیٰ ہس دِتؠ۔ خداین کوٚر یہِ اوٕ کِنؠ یُتھ اسہِ تہِ تسٕنٛدؠ شُرؠ آسنُک مقام میلہِ۔6أمہِ ہُریمانہٕ سوز خداین اسہِ پیٚٹھ پاک روح یُس اسہِ انٛدرٕ وجودس منٛز آسہِ تکیازِ اسہِ چھُ ووٚنؠ خدایس سٟتؠ تیوٗت نکھہٕ تعلُق زنتہٕ أسؠ تسٕنٛدؠ گوبر چھِ۔ یہِ چھُ یوٚہے تسُنٛد روح یُس اسہِ ہکہٕ ونناوان چھُ خدایس میانہِ ببا! ہے ببا!7اوے تہِ کوٚڑ یہِ خداین۔ توٚہہ منٛزٕ چھُنہٕ کانہٛہ تہِ غلام، بلکہِ چھُ توٚہہِ منٛزٕ پرٛتھ کانہٛہ زنتہٕ خدایہِ سُنٛد نیٚچو۔ خداین بنوو توٚہہِ منٛزٕ پرٛتھ کانہٛہ پنُن وٲرث یمِس سُہ پرٛتھ کینٛہہ دیہِ یہِ تٔمؠ وعدٕ دیُتمُت چھُ۔8ییٚلہِ توٚہہِ خدایس سٟتؠ رشتے آسہِ نہٕ تیٚلہِ کٔرِو توٚہؠ تِمن خداین ہنٛز عبادت یِمنہٕ وجودسےٕ چھِ ۔ توٚہؠ ٲسِو تمہِ وِزِ غلام ہیوؠ تکیازِ توٚہؠ ٲسِو روحٲنی طور گٔنٛڈِتھ۔ ووٚنؠ چھو توٚہہِ خدایہِ سٕنٛز پٲرؠ زان حٲصل۔9مگر ووٚنؠ چھُو توٚہؠ خدایس نزدیک پٲٹھؠ زانان۔ شاید روزِ بہتر یہِ ونُن زِ ووٚنؠ زٲنیٚو توٚہہِ سارِنےٕ خدا سٮ۪ٹھا بٲریکی سان۔ لہٰذا چھُو توٚہؠ ووٚنؠ احمقٲزی کران۔ توٚہؠ چھُو بیٚیہِ تہِ یہِ پژھ تھاوان زِ یِمن قانونن تہٕ رواجن پالنہٕ سٟتؠ واتہِ توٚہہِ روحٲنی فٲض۔ تِم قانون چھِ بے اثر تہٕ ناکٲفی۔ توٚہؠ چھُو یژھان تِمن قانونن ہنٛز پٲروی کرٕنؠ کٲنٛسہِ آغہٕ سنٛدین غلامن ہنٛدؠ پٲٹھؠ۔10توٚہؠ غٲر یہُودؠ چھُو بڈٕ احتیاطہٕ سان یہُودؠ قانونن تہٕ رسمن ہنٛز مشق کران زِ آیا یِم یہُودؠ خاص دوٚہہ کتھ مناوو خاص رٮ۪تن منٛز خاص موسمن تہٕ وری کِس خاص وقتس پیٚٹھ۔11بہٕ چھُس تہنٛدٮ۪ن غلط خیالن پیٚٹھ سخ پریشان۔ کاش مےٚ آسہِ ہے نہٕ ییٖژِ مشقتہٕ سان بٔلؠ تہنٛز خدمت کٔرمٕژ۔12میانیٚو ایماندار سٲتھیو! بہٕ چھُسو توٚہہِ زور دِتھ توٚہہِ اُکساوان تہِ کرنہٕ باپتھ یہِ بہٕ کران چھُس۔ ترٲیِو یہِ خیال زِ توٚہؠ چھُو یہُودؠ اصول تہٕ رسمی قانون پالٕنؠ یِم موسیٰ سٕنٛدؠ تجویز کرنہٕ آمٕتؠ قانون چھِ ییٚلہِ بہٕ توٚہہِ سٟتؠ اوسُس بہٕ اوسُس تہٕ پالان یِم سٲری یہُودؠ اصول تہٕ رسمی قانون یتھٕ پٲٹھؠ زن توٚہؠ تہِ چھُو نہٕ پالان۔ تٔمہِ وقتہٕ ٲسِو توٚہؠ پزنہٕ پٲٹھؠ مےٚ نفرت کران۔13توٚہؠ تھٲیِو یِمہٕ کتھہٕ ژٮ۪تس زِ مےٚ ونہِ توٚہِ گۅڈے رٕژٕ شٮ۪چھہٕ تکیازِ بہٕ اوسُس جسمٲنی طور لیٚوژ تہٕ اوسُس وۅنؠ بلُن ہیٚوان امے موقعہٕ کِنؠ یُس مےٚ پننہِ بٮ۪مارِ دیُت گوس بہٕ یتھ لایق زِ بہٕ ونہٕ توٚہہِ رٕژ شیٚچھ۔14یودوے زن مےٚ کُن تُہنٛد سلوک حقارتہٕ بوٚرُت تہِ ہیٚکہِ ہے ٲسِتھ میانہِ جسمٲنؠ مینٛدؠ لد آسنہٕ کِنؠ مگر تُہنٛد سلوک اوسنہٕ حقارتہٕ بوٚرُت۔ نہ منسووُس بہٕ توٚہہِ۔ اتھ برعکس کٔرٕو توٚہہِ مےٚ خوش آوے یتھٕ پٲٹھؠ زن توٚہؠ کٲنٛسہِ خدایہِ سٕنٛدِ طرفہٕ آمتس فرشتس کرؠ ہو۔ توٚہہِ کٔرٕو مےٚ خوش آوے یتھٕ پٲٹھؠ زن توٚہہِ پانہٕ یسوع مسیحسؔ کٔرٕو۔15مےٚ چھُ دِل تنگ گوٚمُت زِ توٚہہِ مشرووُو زِ تیٚلہِ ٲسِو توٚہؠ مےٚ پیٚٹھ خوش۔ مےٚ چھُ پوٗرٕ یقین زِ توٚہؠ کٔرِو مےٚ مدد کرنہٕ باپتھ کینٛہہ تہِ۔16اوے چھُس بہٕ نا امید زِ توٚہؠ چھُو ووٚنؠ یتھٕ پٲٹھؠ عمل کران زنتہٕ بہٕ توٚہہِ خلاف چھُس گوٚمُت تکیازِ بہٕ رودُس لگاتار مسیحسؔ متعلق توٚہہِ پوٚز پٲغام ونان۔ 17تِمن یِم زن زور دِوان چھِ یہُودؠ قانونن ہنٛز پیروی کرنہٕ باپتھ چھےٚ توٚہہِ سٟتؠ لاگے۔ مگر تِمن چھنہٕ یہِ لاگے کُنہِ رٕتہِ غرضہٕ توٚہہِ سٟتؠ۔ تِم چھِ اوٕ کِنؠ یہِ کران تاکہِ توٚہؠ رٔلِو نہٕ مےٚ سٟتؠ یا تِمن باقین سٟتؠ یِم مسیحسؔ متعلق پزر چھِ ہٮ۪چھناوان۔ تِمن چھُ غرض زِ اسہِ سٟتؠ میلنہٕ بدلہٕ روزِو توٚہؠ تِمن ستؠ لاگیہِ ہُنٛد شوق۔18مگر ہر وِزِ رٕژِ کامہِ ہنٛز لادنے چھُ اکھ عزت۔ بہٕ چھُس یژھان زِ توٚہہِ تہِ روزِ صحیح کٲم کرنٕچ لادنے میانہِ موجوگی منٛز تہِ تہٕ غٲر موجودگی منٛز تہِ۔19توٚہؠ چھُو برابر میانٮ۪ن گۅبرن ہنٛدؠ پٲٹھؠ۔ مےٚ چھےٚ گۅڈے تُہنٛز فِکر تہٕ مےٚ روزٕ ہر وِزِ تُہنٛز فِکر یوٚتام توٚہؠ پننس سونچس منٛز تہِ کرنس کراونس منٛز مسیحسؔ ہیٚوؠ بٔنیِو۔20مگر بہٕ چھُس یژھان زِ بہٕ گوٚژھُس وُنکٮ۪س توٚہہِ نِش آسُن تاکہِ بہٕ کرہا وارٕ نرمی سان توٚہہِ سٟتؠ کتھ تکیازِ وُنکٮ۪س چھُنہٕ مےٚ تارےٕ یِوان زِ توٚہہِ سٟتؠ کیا کرٕ بہٕ۔21توٚہہِ منٛزٕ چھِ کینٛہہ یژھان تِم سٲری قانون پالٕنؠ یِم خداین موسیٰ ہس بخٕش۔ بہٕ چھُسو ونان زِ توٚہؠ سونٛچِو تِمن اثراتن متعلق تہِ یہِ موسیٰ ہن یِمن صحیفن منٛز لیٚوکھ۔22تٔمؠ لیٚوکھ زِ ابرہام بنیو دوٚن شُریٚن ہُنٛد مول۔ تمؠ سنٛزِ نوکرانہِ ہاجرسؔ زاو اکھ لڑکہٕ تہٕ تسنٛزِ آشنہِ سارس یۅسہٕ نوکرٲنؠ اوسنہٕ بیاکھ شُر۔23بیٚیہِ اوس یِمن شُریٚن منٛز بیٚنٮ۪ر۔ اسماعیل یُس شُر زن نوکرانہِ ہاجرسؔ زاو، آو دنیاہس فطری آیہِ۔ مگر یُس شُر سارس زاو یۅسہٕ زن نوکرٲنؠ ٲس نہٕ، آو دنیاہس معجزٕ کِنؠ تکیازِ اتھ منٛز اوس خدایہِ سُنٛد دخل یُس ابرہامس سٟتؠ پنُن عہد پوٗرٕ کرُن یژھان اوس۔24بہٕ چھُسو یہِ وضاحتہٕ باپتھ لیٚکھان زِ یِم زٕ زنانہٕ چھےٚ علامتہٕ دوٚن سمجھوتن ہنٛزٕ۔ خداین کوٚر فٲصلہٕ زِ یتھ منٛز شرط اوس تِمن قانونن ہنٛز پیروی یِم خداین موسیٰ ہس سینا ناوٕ کِس بالس پیٚٹھ دتؠ تکیازِ أمہِ فٲصلہٕ کِنؠ اوس یِمن مانن والیٚن ہنٛدٕ باپتھ یِم قانون مستقل پٲٹھؠ تہ کُلہُم پٲٹھؠ پالٕنؠ ضروری۔ یہِ زٲنؠ تو زنتہ اکہِ نوکرٲنؠ ماجہِ نوکر زاو۔ اوے تہِ چھے ہاجرہ نوکرٲنؠ أمہِ مہادٕچ علامت۔25تہٕ ہاجرہ چھےٚ أمہِ سمجھوتچ علامت تمام قانونو تہٕ رسمو سان یِم خداین سینا کِس بالس پیٚٹھ موسیٰ ہس دِتؠ أکِس عرب مُلکس منٛز۔ ہاجرؔ چھےٚ مزید یہُودؠ مزہبٕچ تہِ علامت۔ یہُودؠ مذہب چھُ زنتہٕ اکھ نوکرٲنؠ موج تہٕ یہُودؠ مذہب پالُن زنتہٕ نوکر شُرؠ۔ تکیازِ یِمن سارِنےٕ پزن خدایہِ سٕنٛدِ طرفہٕ موسیٰ ہس دِنہٕ آمٕتؠ قانون پالٕنؠ۔26مگر ہُپٲرؠ چھُ اکھ روحٲنی یروشلم تہِ۔ أسؠ چھِ أمے روحٲنی یروشلمٕکؠ۔ زٲنتو یہِ چھِ اسہِ سارِنےٕ ہنٛز موج یِم یسوعسؔ مانان چھِ۔ أمہِ روحٲنی یروشلمٕکؠ چھِ تِم سٲری مۅکٕلؠ۔ موسیٰ ہس دِنہٕ آمٕتؠ قانون پالنہٕ نِشہٕ تہِ مۅکٕلؠ تہٕ عذاب نِشہٕ یُس یِمن نہ پالن والس میلہِ۔27سٲنِس نٔوِس شہرس منٛز آسن تِم زیادٕ لوٗکھ یِم وُنکٮ۪س یروشلمس منٛز روزان چھِ۔ یہِ آسہِ زنتہٕ تی یہِ عیساین گۅڈٕ ؤنِتھ تھوو تِمن لوٗکن متعلق یِم یروشلم شہرس کُن واپس یِن تس ٲس امید زِ واپس پھیرن وٲلؠ آسن تِمہٕ زیادٕ یِم ملک بدر کرنہ آمٕتؠ ٲسؠ. تِم یِم یروشلم شہرس منٛز روزان چھِ مناون شٲدؠ۔ وُنؠ کٮ۪س چھِنہٕ توٚہہِ اولاد أکِس ہانٹھہِ زنانہِ ہنٛدؠ پٲٹھؠ یۅسہٕ شُریٚن زایُن ہیٚکنہٕ دِتھ مگر کُنہِ دوٚہہ دِیو توٚہؠ خوشی سٟتؠ کریکہٕ۔ یوٗتاہ تھود ہیٚکو تیوتاہ۔ یودوے توٚہؠ وُنکٮ۪س کمےٕ چھُو أکِس ہانٹھہِ زنانہِ ہنٛدؠ پٲٹھؠ یۅسہٕ زایُن ہیٚکنہٕ دِتھ تہٕ توے چھُو اکِتھ کُن مایوس پیمٕتؠ، توٚہؠ گٔژھِو خوش، توٚہہِ آسن واریاہ شُرؠ یِم توٚہہِ کُن یِن۔ یِم شُرؠ آسن تمہِ کھۅتہٕ زیادٕ یِم أکِس رٲنؠ واجنہِ زنانہِ ٲسِتھ ہیٚکن۔ 28ووٚنؠ بوزِو میانیو ایماندار سٲتھیو توٚہؠ بٔنیِو خدایہِ سٕنٛدؠ شُرؠ تکیازِ خداین کوٚر اضحاق سنٛدؠ پٲٹھؠ پنن ابرہامس سٟتؠ پنُن عہد پوٗرٕ۔29سٮ۪ٹھا برونٛہہ کالہِ دیُت ابرہام سنٛدؠ نیٚچِوؠ اسماعیلس یُس فطری آیہِ زاو۔ پننس ابراہیمؔ سٕنٛدِس نیٚچوِس اضحاقسؔ اِذا یُس زن معجزٲتی زاو تِتھے پٲٹھؠ یِم ونان چھِ زِ اسہ پزن خدایہِ سٕنٛدِ طرفہٕ موسیٰ ہس دِنہٕ آمٕتؠ قانون پالٕنؠ تاکہِ خدا دِیہِ اسہِ نجات أسؠ چھِ تِمن ہنٛدِ خٲطرٕ اِذا وۅتلاوان یِم ابراہیمؔ سٕنٛدِس زُرِس مسیحسؔ پیٚٹھ پژھ قٲیم کران چھِ۔ 30مگر موسیٰ ہن لیٚکھؠ یم لفظ پیدٲیِشی ہنٛزِ اکہ کتابہِ ہنٛدِس عبارتس منٛز، "تٔمس آشنہِ ہُند نیٚچو یۅسہٕ نوکرٲنؠ آسہِ نہٕ ترِ پننِس مٲلؠ سٕنٛز ملکِیت وراثتس منٛز۔ نوکرانہِ ہُنٛد نیٚچو پراوِ نہٕ تمہِ منٛزٕ کانہٛہ چیز تہِ۔ اوے کٔڈٕکھ یمہِ جایہِ دور نوکرٲنؠ تہٕ تسُنٛد نیٚچو دۅشوے۔ 31میانیو ایمان باجیو۔ ہاجرؔ چھےٚ علامت تِمن قانون ہنٛز یِم موسیٰ یس خداین دِتؠ مگر أسؠ چھِنہٕ تِم یِمن یِم قانون پراوٕنؠ لٲزمی چھِ یِم خداین موسیٰ ہس دِتؠ۔ أسؠ چھِنہٕ نوکرانہِ ہاجرؔ ہنٛدؠ زُرؠ کینٛہہ۔ ییٚلہِ زن سارایہِ ہنٛدؠ زُرؠ تِم چھِ یِم زن خدایہ سنٛدِ یژھنہٕ زایُن لبان چھِ یمیُک خداین ابرہامس وعدٕ دیُتمُت اوس اوے چھِ أسؠ سارایہِ ہنٛدؠ روحٲنی زُرؠ یۅسہٕ نوکرٲنؠ ٲس نہٕ۔
Bridge Connectivity Solutions Pvt. Ltd.