خروج28
1ژٕ انُن پننُ بوٗڈ بوے ہارونؔ بیٚیہِ تمؠ سنٛدؠ نیٚچوؠ، ندبؔ، ابیہوؔ، الِیعزرؔ تہٕ اِتمرؔ اسرائیل کیو لوٗکو نِشہ الگ کٔڈتھ پانس نکھٕ یتھ زن تِم میٲنؠ کاہن ہیکن بنتھ۔2پننِس بٲیس ہارونہِؔ خٲطرٕ بناو مقدس پوشاک یمہِ سٟتؠ سُہ میٚون عزت تہٕ میٲنؠ خوبصورتی ہاوِ۔3تِمن سارٕنے ہُنر منٛد کٲرؠ گرن سٟتؠ کر کتھ یِمن مےٚ شاندار چیز بناونچؠ صلٲحیت دِژمٕژ چھے زِ تِم بناون ہارونہِؔ باپتھ سُہ پوشاک یُس سُہ کاہن بنتھ میٲنؠ خدمت کرنس پؠٹھ لاگہِ۔4تِم بناون یِم پوشاک: اکھ مقدس سینہٕ بند، اکھ مقدس افُودٕ، اکھ چوغہٕ، اکھ کامہِ دار کُرتہٕ، اکھ دستار تہٕ اکھ کمر بند۔ تِمن چھۓ یِم مقدس پوشاک تتھؠ بناونؠ یُتھ زن ہارونؔ بیٚیہِ تسٕنٛدؠ نیٚچوؠ تمہِ وِزِ لٲگتھ آسن ہیکان ییٚلہ تِم میٲنؠ خدمت کران کاہنن ہنٛز کٲم آسن انجام دِوان۔5ہُنر منٛد کٲرؠ گرن چُھ سُہ پوشاک بناونس منٛز زٲولؠ کتنہٕ آمُت کپرٕ بیٚیہِ سنہرؠ، اسمانؠ، بنفشی تہٕ ووٚزٕلؠ پن کامہِ لاگُن۔6تِمن کٲرؠ گرن چُھ مقدس افُودٕ بناونہٕ خٲطرٕ پورٕ پٲٹھؠ کتنہٕ آمُت زٲویٔل کپرٕ لٲگن تہٕ تِمن چھِ تتھ پؠٹھ اسمانؠ، بنفشی تہٕ ووٚزلہِ پنہٕ سٟتؠ بیٚیہِ خٲلص سنہرؠ پنو سٟتؠ کٲم کرنؠ۔7اتھ گژھن پھیکؠن پؠٹھ زٕ فیتہٕ سٟتؠ آسٕنؠ یِم پانہٕ وٲنؠ دوٛن اندن جوریِن۔8ہُنر مندی سان بناو اکھ کمر بند یُس مقدس افُودس سٟتؠ رلان آسہ یُس تمی کپرٕ سٟتؠ بناونہٕ آسہ آمُت یمیٛک زیوٹھ کوٹ بناونہٕ آمُت آسہ۔ تتھ کپرس گژھِ ہُنر مندی سان نیوٗل، بنفشی، سُرخ تہٕ اصل سنہرؠ پن لٲگنہٕ آمُت۔ پتہٕ گژھِ تتھ افُودٕ سُووٚن۔9زٕ سلیمٲنی کَنہِ تُل تہٕ تِمن پؠٹھ کھن یعقوبؔ نؠن باہن نیٚچوٮ۪ن ہنٛدؠ ناو۔10تِمن ہنٛدؠ ناو کھن تہنٛدِ زیونہٕ مطٲبق۔ اکِس کنہِ پؠٹھ کھن شیٚن ہنٛدؠ ناو تہٕ بییٚس کنہِ پؠٹھ باقی شیٚن ہنٛدؠ ناو۔11اکھ گوہر تراش گژھِ یِمن ناون دوٚن کنن پؠٹھ تمہ طریقہ کھننٕؠ زن تہِ آسنہِ سُہ اکہِ مُہرِ باپتھ وٲج بناوان۔ پتہٕ گژھِ سُہ تِمن کَنؠنٕؠ سجٲونہٕ آمتِس سۅنہٕ کسِ دٲیرس منٛز بند کرُن۔12تِم یادگار کنہِ دباو مقدس افُودس پھؠکؠن ہنٛدین فیتن سٟتؠ۔ پتہٕ روزِ ہارونؔس یاد تِمن اسرائیل کؠن باہن قبیلن ہنٛدؠ ناو یِم تمس پھؠکؠن لٲگتھ چھِ ییٚلہِ سُہ یہُوواہسؔ خدمت آسہ کران۔13تِمن کنؠن ہنٛدِ خٲطرٕ بناو شوبہٕ دار سۅنہٕ سٕنٛدؠ دٲیرٕ۔14خٲلص سۅنہٕ سنٛزٕ بناو زٕ زنجیٖرٕ تِم ولُکھ رزِ ہنٛدؠ پٲٹھؠ تہٕ دباوکھ تِمن سجٲونہٕ آمتیٚن دٲیرن سٟتؠ۔15فٲصلہٕ کرنہٕ باپتھ بناو اکھ مقدس سینہٕ بند یُس تمی کپرٕ سٟتؠ بناوکھ یمہِ سٟتؠ مقدس افُودٕ بنووٚتھ تہٕ تتھ تہِ گژھِ تِتھے پٲٹھؠ ہُنر مندی سان سنہرؠ، اسمانؠ، بنفشی، تہٕ سُرخ پن لاگنہٕ یِن بیٚیہِ اصل پٲٹھؠ کتنہٕ آمتہِ پنہٕ سٟتؠ بنووٚمُت کپرٕ لاگنہٕ۔16سُہ کپرٕ کر دوٚگن یتھ یہِ اکھ چورُس بنہِ یتھ زیچھر تہٕ خجر ترووُہ 23 ترووُہ 23 سنٹی میٹر آسہ۔17سینہٕ بندس لاگ قٟمتی کنؠن ہنٛزٕ ژور لٲنہٕ۔ گوٗڈنچؠ لٲنہِ منٛز تھو اکھ سُرخ لعل، اکھ زرد یاقوت، تہٕ اکھ سٔبز گوہر۔18دوٚیمہِ لٲنہِ منٛز تھو اکھ سبز زمرُد، اکھ نیوٗل نیٖلم تہٕ اکھ صاف ہیٖرٕ۔19ترٛیمہِ لٲنہِ منٛز تھو اکھ سُرخ گوہر، اکھ سفید سنگِ سلیمٲنی، تہٕ اکھ ووٚزل یاقوت۔20ژوٗرِ مہِ لٲنہِ منٛز تھو اکھ سنگِ خار، اکھ سنگِ سلیمٲنی تہٕ اکھ سبز برجد۔ تِمن سارِنے کنؠنؠ جر سۅن۔21اکِس گوہر تراشش چھِ تِمن سارنے کنؠن پؠٹھ یعقوبؔ نؠن باہن نیٚچوٮ۪ن ہنٛدؠ ناو پریتھ اکِس واجہ ہنٛدس کرانٛکس کھننُ۔ یِم ناو کرن اسرائیل کٮ۪ن باہن قبیلن ہنٛز نمایندگی۔22مقدس سینہٕ بندس جوٗڑ زٕ زنجیٖرٕ یِم تِم خٲلص سوٚنس بناون یِمن رزن ہنٛدؠ پٲٹھؠ ور دِنہٕ آمُت آسہ۔23سینہٕ بندٕ خٲطرٕ بناو زٕ سۅنہٕ سٕنٛدؠ دٲیرٕ تہٕ تِم لاگ تتھ سینہٕ بندس ہیرِمیِن دوٚن اندن پؠٹھ۔24سینہٕ بندٕ کس ہیٚرِ مِس اندس پؠٹھ دباو اکھ سۅنہٕ سنٛز رز اکِس دٲیرس سٟتؠ۔25ہر کُنہِ رزِ ہُنٛد اند دباو تِمن سٔجاونہٕ آمژن کنؠن سٟتؠ۔ پتہٕ تھوکھ تِم مقدس افُودس پھؠکؠن ہنٛدین فیتن سٟتؠ برونٛٹھِ مہِ طرفہٕ۔26سۅنہٕ سٕنٛدؠ بناو بیٚیہِ زٕ دٲیرٕ تہٕ تِم جوٗڑکھ مقدس افُودس بٔنؠ مِس اندس پؠٹھ یُس مقدس افُودس انٕدرؠ کِنؠ چُھ۔27سۅنہٕ سٕنٛدؠ بناو بیٚیہِ زٕ دٲیرٕ تہٕ تِم لاگ افودکؠن دوٚن پھؠکؠن بٔنؠ مِس حصص پؠٹھ برونٹھٕ پھؠکؠن ہنٛدین فیتن نکھٕ یتٮ۪ن پھؠکؠن ہنٛدؠ فیتہٕ مقدس افُودس ہیٚرِ کنہِ کمر بندس سٟتؠ رلان چھِ۔28مقدس افودٕس پؠٹھ یِم دٲیرٕ چھِ تِم گنڈکھ امکیٚن دٲیرن سٟتؠ اکہِ فیتہٕ سٟتؠ مقدس افودٕکِس کمربندس ہیٚرٕ کنہِ یُتھ نہٕ تِم مقدس افُودٕ نِشہ ڈلنَ۔29لہٰذا ییٚلہِ زانٛہہ ہارونؔ پاک جایہِ منٛز یہُوواہسؔ نِشہ دٲخل سپدِ تمس روزِ یاد اسرائیل کٮ۪ن تِمن باہن قبیلن ہنٛدؠ ناو یِم تس سینس پؠٹھ مقدس افُودس سٟتؠ لٲگتھ چھِ یمہِ وِزِ سُہ فٲصلہٕ کران آسہ۔30مقدس افُودس منٛز تھو اوریمؔ تہٕ تمیمؔ یُتھ سُہ خبردار روزِ زِ بہٕ کیاہ فٲصلہٕ دِمہٕ۔ امہِ طریقہٕ روٗزن تِم ہارونسؔ دِلس نکھٕ ییٚلہِ تہِ سُہ مےٚ سٟتؠ ملاقات کرنہِ واتہِ۔ تمس گژھن یِم چیز ہمیشہِ لٲگتھ آسٕنؠ یِمو سٟتؠ اسرائیل کٮ۪ن لوٗکن متلق میون اِرادٕ ظٲہر سپدِ۔31ہارونہِؔ خٲطرٕ بناو سُہ پوشاک یُس سُہ مقدس افُودس انٛدرؠ کِنؠ لاگہِ سُہ گژھٕ صرف نیٖلہ کپرُک آسُن۔32تتھ بناو منٛزس اکھ نال یُتھ اکھ کاہن تتھ منٛز کٔلہٕ ہیٚکہ ترٲوِتھ بیٚیہِ پٔجراون سُہ نال ژوپٲرؠ یُتھ نہٕ سُہ ژھینہِ۔33پوشاک کِس دامنس انٛدؠ انٛدؠ بناو اسمانؠ، بنفشی تہٕ سُرخ پنہٕ سٟتؠ دٲن یِمن منٛز باگ سۅنہٕ سنٛزٕ گٲنٹیہِ آسن۔34اکھ آسہ گٲنٹی تہٕ پتہٕ آسہ اکھ دٲن۔ امی طریقہٕ گژھِ پوشاکس سٲرسےٕ دامنس انٛدؠ انٛدؠ آسُن۔35ییٚلہِ تہِ زانٛہہ ہارونؔ کاہن سنٛز کٲم انجام دِنہٕ باپتھ پاک جایہِ منٛز مےٚ نِشہ اژان یا نیران آسہ تمس چُھ یہِ پوشاک لاگُن ضروری یُتھ بہٕ تِمن گٲنٹین ہنٛز آواز بوزٕ تہٕ سُہ سپدِ نہٕ مارٕ۔36خٲلص سۅنہٕ سٟتؠ سجاو اکھ پٔتٕر تہٕ تتھ پؠٹھ کھن یِم لفظ 'یہُوواہؔ نہِ خٲطرٕ مشخص' یہِ گژھِ تِتھے پٲٹھؠ کھنِتھ آسُن یتھٕ پٲٹھؠ مُہرِ ہنٛزِ واجہ پٮ۪ٹھ آسان چُھ۔37یہِ پٔتٕر گنڈ ہارونسؔ دستارس برونٹھٕ کنہِ اکہِ نیٖلہ رنٛگ کہِ ڈوٗرِ سٟتؠ۔38ہارونسؔ چُھ یہِ دستارٕ ہمیشہِ پننِس ڈیکس پؠٹھ دِتھ تھون یُتھ زن بہٕ تِم چیز تسلیٖم کرٕ یِم اسرائیل کیٚو لوٗکو مےٚ آیِتن تھوؠ۔ ہرگاہ تِمن چیزن منٛزٕ کانٛہہ چیز خراب آسہ یِم چیز مےٚ تِمو ہدیہِ رنگؠ پیش کٔرؠ، ہارونؔ آسہ لوٗکو ہنٛدِ بدلہٕ تمیٛک ذمہٕ دار۔39زیوٹھ نٔرؠ دار کُرتہٕ ووننہٕ ناو زٲویلہِ پنہٕ سٟتؠ بیٚیہِ بناو تِتھے پٲٹھؠ دستار۔ اکھ ہُنرمنٛد وونن وول گژھِ کمر بند بناون۔40ہارونؔ نؠن نیٚچوٮ۪ن ہنٛدِ خٲطرٕ بناو زیٹھؠ نرؠ دار کُرتہٕ، کمربند تہٕ ٹوپہِ یِمو سٟتؠ تِم میون احترام بیٚیہِ میٲنؠ خوبصورتی ہاون۔41یِم پلو لاگ پننِس بٔڈِس بٲیس بیٚیہِ تمؠ سنٛدین نیٚچوٮ۪ن پتہٕ کر تِمن زیتونہ تیٖلہِ سٟتؠ مٲلش تمہِ پتہٕ کُرکھ وقف تہٕ بیٚیہِ دِکھ اختیار یُتھ تِم میٲنؠ کاہن بنن۔42تِمن ہنٛدِ خٲطرٕ بناو سٕتھرِوؠ ییزار یُتھ زن نہٕ تِم ننگہٕ روزن تِم ییزار گژھن کمرٕ پؠٹھٕ مندلن تام آسٕنؠ۔43ہارونسؔ بیٚیہِ تمؠ سنٛدین نیٚچوٮ۪ن گژھن تِم ییزار ہمیشہ تمہِ وِزِ لٲگتھ آسٕنؠ ییٚلہِ تِم مقدس خٟمس منٛز دٲخل سپدن یا ییٚلہِ تِم قربان گاہس نکھٕ پاک جایہِ قۅربٲنی آسن پیش کران۔ یہِ کرنہٕ سٟتؠ نہٕ سپدن تِم گناہگار تہِ نہٕ سپدن مارٕ۔ ہارونسؔ بیٚیہِ تمؠ سنٛدین سارنےٕ مرد زُریٲژ چھِ یتھ قانونس پؠٹھ ہمیشہ خٲطرٕ عمل کرنؠ ضروری۔
Bridge Connectivity Solutions Pvt. Ltd.