خروج27
1اکھ قربان گاہ بناو کیکر لکٕرِ ہُنٛد یمیٛک زیچھر گژھِ ڈایہِ میٹر آسُن یُس چورس آسہ تہٕ امیُک تھذر گژھِ ڈوٚڑ میٹر آسُن۔2پریتھ کانٛہہ کنُ ہوراون پؠٹھٕ کنہِ تتھٕ پٲٹھؠ زن تہِ اکھ ہنٛگ آسہ۔ تِم تہِ بناوکھ تمی لکٕر ہنٛدِ ٹُکرٕ منٛزے یِم قربان گاہس چھِ۔ سٲرسےٕ قربان گاہس جر سرتل۔3امیُک سٲری بانہٕ برتن بناو سرتلہِ ہنٛدؠ۔ سوٗر جمع کرنہٕ باپتھ بناو کڑٲیہِ، سوٗر صاف کرنہٕ باپتھ بیلچہِ، بانہٕ، ماز تلنہٕ باپتھ چمٹہٕ، گرم ژِنہِ تُلنہٕ باپتھ بالٹیٖنہٕ۔4سرتلہِ ہنٛز بناو اکھ جالہِ دار بخٲرؠ یتھ منٛز زیُن تہٕ ژِنہِ روٗزن۔ سۅ بخٲرؠ تُلنہٕ خٲطرٕ بناو سرتلہِ ہنٛدؠ دٲیرٕ تِم دباوکھ امکؠن ژورن کونن پؠٹھ۔5یہِ بخٲرؠ تھون قربان گاہ کس دٔندِس تَل یُس تتھ اندؠ اندؠ چُھ تہٕ یہِ گژھِ قربان گاہس انٛدر نیٚصفس تام روزُن۔6قربان گاہس کھالنہٕ باپتھ بناو کیکر لکٕرِ ہنٛدؠ ڈنڈٕ تہٕ تِمن کھال سرتل۔7تِم ڈنڈٕ تراوکھ پریتھ طرفہٕ دٲیرو منٛزؠ یتھ زن سُہ تُلنہٕ ییہِ۔8قربان گاہ بناو تختو سٟتؠ یُس منٛزس خٲلی آسہ۔ تِمن چُھ سُہ یِموے ہدایتو مطٲبق بناون یِم بہٕ ژےٚ یتھ پہاڑس پؠٹھ دِوان چُھسے۔9مقدس خٟمس انٛدؠ انٛدؠ بناو زٲویلہِ کپرکیو واریہو پردو سٟتؠ اکھ آنٛگُن۔ جنوبکہ طرفہٕ تراوس پنژاہ میٹر پردٕ اویزان10وُہن سرتلہِ ہنٛدین تھمب پؠٹھ۔ تِمن بناو وُہ 20 سرتلہِ ہنٛز بنیادٕ بیٚیہِ جوڈکھ چاندِ ہنٛدیو کنڈو سٟتؠ۔11تہٕ یتھے کِنؠ بناو شمالہٕ کہ طرفہٕ تہٕ وُہ 20 تھمب تِمن تراو پنژاہ 50 میٹر پردٕ اویزان۔ تِمن تہٕ گژھن سرتلہِ ہنٛزٕ وُہ 20 بنیادٕ آسنہِ بیٚیہِ جوڈکھ چاندِ ہنٛدیو کنڈو سٟتؠ۔12آنٛگنس گنڈ پنژ 25 میٹر زیوٹھ پردٕ مغربہ کہِ طرفہٕ۔ تِمن لاگ دہ 10 تھمب یِمن پریتھ اکِس تلہِ کنہِ بنیاد آسہ۔13آنٛگنس گژھن مشرقہٕ طرفہٕ تہٕ پنژ 25 میٹر خجرٕ پردٕ آسُن۔14دروازس اکہِ طرفہٕ لاگ ساڑٕ ستتھ میٹر زیوٹھ پردٕ یُس ترین بنیاد ہتھ تھمبن پؠٹھ آسہ۔15دروازس دوٚیمہِ طرفہٕ تہِ لاگ ساڑٕ ستتھ میٹر زیوٹھ پردٕ یُس ترین بنیاد والیٚن تھمبن پؠٹھ روزِ۔16آنٛگنہٕ کہِ دروازٕ خٲطرٕ بناو دَہہ میٹر زیوٹھ پردٕ یُس زٲویل نفیس سٕتھرُک آسہ بیٚیہِ آسہ اکؠ ہُنر منٛد وونن وٲلؠ نیٖلہ، قرمزؠ تہٕ ۅزلہِ پنہٕ سٟتؠ وونہٕ مُت۔ سُہ تراو ژورن تھمبن پؠٹھ اویزان یِمن پرٮ۪تھ اکِس تلہٕ کنہِ بنیاد آسہ۔17آنٛگنس انٛدؠ انٛدؠ سارنےٕ تھمبن گژھن چاندِ ہنٛدؠ گول گول کلہٕ آسٕنؠ۔ چاندِ ہنٛدؠ بناو کُنڈٕ یِمن سٟتؠ پردٕ روزن تہٕ بنیاد بناوکھ سرتلہِ ہنٛز۔18سورےٕ آنٛگُن بناو مشرقی دروازٕ پؠٹھٕ مغرب کِس اندس تام، یمیٛک زیچھر گژھِ پنژاہ 50 میٹر تہٕ خٔجر پنژٕ 25 میٹر آسُن بیٚیہِ یِم پردٕ تتھ لٔگن تِم گژھن ڈایہِ میٹر تٔھدؠ آسن۔ تِم سٲری پردٕ بناو اصل زٲویٔل کتنہٕ آمُت پنہٕ سٟتؠ بیٚیہِ سارنےٕ تھمبن ہنٛز بنیاد گژھِ سرتلہِ ہنٛز آسٕنؠ۔19تِم سٲری چیز یِم مقدس خٟمس منٛز یا آنٛگنس منٛز استعمال سپدن گژھن نہٕ سۅنہٕ سنٛدؠ آسٕنؠ مثلن مقدس خٟمس بیٚیہِ آنٛگنس پردن گنڈنہٕ کرنہٕ باپتھ مینٛخہٕ استعمال سپدن تِم گژھن سرتلہِ ہنٛدؠ آسٕنؠ۔20اسرائیل کیٚن لوٗکن دِ حکم زِ تِم انن زیتونُک تیٖل کٔڈتھ یتھ زن ژونگ روزِ ہمشہ دزان۔21مقدس خٟمس منٛز وعدہ کِس صندوق کِس پردس نیٚبرؠ کِنؠ روٗزن ہارونؔ بیٚیہِ تسٕنٛدؠ نیٚچوؠ یِم تتھ ژانگس حفاظت کران یُس شامہٕ پؠٹھٕ صبحس تام یہُوواہؔ سٕنٛدِ خٲطرٕ دَزان چُھ۔ اسرائیل کؠن لوٗکن چھے یتھ قٲیدس ابدن ابدا تٲبیدٲری کرنؠ۔
Bridge Connectivity Solutions Pvt. Ltd.