خروج29
1ہارونؔ بیٚیہِ تسٕنٛدؠ نیٚچوؠ کاہن بناونہٕ خٲطرٕ کر یِم کامہِ یُتھ زن تِم میٲنؠ خدمت کرن۔ کُنہِ نوٚقصہٕ ورٲے انَ اکھ ہکھر وُژھ تہٕ زٕ کٹہٕ بچہٕ۔2اصل پٲٹھؠ پشنہٕ آمُت کٕنکہٕ اوٚٹ استعمال کرِتھ بناو ترٛیہِ قسمچؠ ژوٚٹ خمیٖرِ ورٲے: کینٛہہ ژوٚچہِ بناو زیتون تیٖلہٕ ورٲے، کینٛژن رلاو زیتون تیٖل، کینٛژن متھ نیٚبرؠ کَنؠ تیٖل۔3تِم تھاوکھ اکِس پجہِ منٛز۔ ژوٚچہِ ہٮ۪تھ سۅ پٔج، ہکھر وُژھ تہٕ زٕ کٹہٕ بچہ انَ مےٚ نِشہ۔4ہارونؔ بیٚیہِ تسٕنٛدؠ نیٚچوؠ اَننکُھ مقدس خٟمکس دروازس پؠٹھ تہِ کروُکھ آبہٕ سٟتؠ سَران۔5پتہٕ لاگ ہارونسؔ پوشاک۔ سُہ زیوٹھ نرؠ دار کُرتہٕ، سُہ چوغہٕ مقدس افُودس اندرؠ کِنؠ، سُہ مقدس افُودٕ، سُہ مقدس سینہٕ بند۔ مقدس افُودس سٟتؠ بناونہٕ آمُت کمر بند گنڈ تمس افُودس پؠٹھٕ۔6دستار تھوُس کلس پؠٹھ تہٕ تتھ دستارس لاگ سۅ مقدس پٔتٕر یتھ پؠٹھ یِم الفاظ کھنتھ چھِ، یہُوواہؔ سٕنٛدِ ناوٕ۔7سُہ وقف کرنہٕ باپتھ انَ مٲلشہِ تیٖل تہٕ تراو تسِ کلس پؠٹھ۔8پتہٕ اَننکُھ تمؠ سٕنٛدؠ نیٚچوؠ برونٛہہ کُن تہٕ تِمن لاگ تِم زیٹھؠ نرؠ دار کُرتہٕ۔9ہارونؔس بیٚیہِ تسنٛدین نیٚچوٮ۪ن گنڈ کمربند تہٕ کلن پؠٹھ دِکھ ٹوپہِ۔ یہِ چُھ اکھ ابدی قانون: تِم چھِ کاہن۔ ژےٚ دِکھ تِمن امیُک اختیار۔10پتہٕ اننُ سُہ ہکھر وُژھ مقدس خٟمس برونٛہہ کُن۔ ہارونؔ بیٚیہِ تمؠ سٕنٛدؠ نیٚچوؠ تھوِن پنٕنؠ اتھٕ تمس ہکھر ؤژِھس کلس پؠٹھ،11یہُوواہسؔ برونٛہہ کُنہِ کر تمس ہکھر ؤژِھس مقدس خٟمہٕ کس دروازس نیٚبرٕ کنہِ کھَش تہٕ خوٗن رٹھ اکِس بانس منٛز۔12پننہِ انگجہِ سٟتؠ تُل کینٛہہ خوٗن تہٕ سُہ متھ قربان گاہ کؠن ہینگن پؠٹھ تہٕ باقی خوٗن تراو قربان گاہس تلہٕ کنہِ۔13سُہ سورےٕ چرب تُل یُس ہکھر ؤژِھس انٛدرِمیٚن تانن جگرس تہٕ دوٚن بوٚکوچن ؤلتھ چُھ۔ سُہ زال قربان گاہس پؠٹھ یوٚت تام سُہ سورےٕ ختم سپدِ۔14مگر ژےٚ زال تمس ہکھر وُژھ سُنٛد ماز، تمؠ سنٛز بستہٕ تہٕ تمؠ سٕنٛدؠ اندرم خٟمس نیٚبرٕ کنہِ۔ ہکھر وُژھ سنٛز قۅربٲنی چھے قربان گاہس پاک کرن۔15دوٚیو کٹہٕ بچو منٛزٕ اننُ اکھ کٹہٕ بچہ یِمس ہارونؔ بیٚیہِ تمؠ سٕنٛدؠ نیٚچوؠ تھون پننؠن اتھٕ کلس پؠٹھ،16تمس کٹہٕ بچس کر کھَش۔ سُہ خوٗن رٔٹ تہٕ چُھکھ قربان گاہس ژوپٲرؠ۔17پتہٕ نِکراوُن سُہ کٹہٕ بچہ۔ تمؠ سٕنٛدؠ انٛدرِم تان تہٕ زنٛگہٕ چھلُکھ تہٕ تِم تراوکھ کٔلس باقی مازس سٟتؠ18قربان گاہس پؠٹھ۔ پتہٕ زال سُہ سورےٕ ماز، یہِ آسہ میانہِ، یہُوواہؔ سٕنٛدِ، باپتھ اکھ بٔزمٕژ قۅربٲنی تہٕ تمہِ نارچ خوشبو لگہ مےٚ خوش۔19دوٚیم کٹہٕ بچہ اننُ تہٕ تمس تہِ تھون ہارونؔ بیٚیہِ تمؠ سٕنٛدؠ نیٚچوؠ پننؠن اتھٕ کلس پؠٹھ،20تمس کٹہٕ بچس کر کھَش۔ رتھ رٔٹ تہٕ تمہِ منٛزٕ متھ کینٛہہ ہارونؠنؔ بیٚیہِ تمؠ سنٛدین نیٚچوٮ۪ن ہنٛدین دٔچھنؠن کنہٕ فیژن تہٕ دٔچھنہِ اتھٕ کؠن نیٚٹھن تہٕ دٔچھنہِ کھۅرٕ کؠن نیٚٹھن پؠٹھ۔ باقی رتھ چُھکھ قربان گاہس ژورن طرفن۔21قربان گاہس پؠٹھ یُس خوٗن چُھ تمہِ منٛزٕ تُل کینٛہہ خوٗن تہٕ تتھ رٔلاو کینٛہہ مٲلشہِ تیٖل، سُہ چُھکھ ہارونسؔ بیٚیہِ تمؠ سنٛدین نیٚچوٮ۪ن بیٚیہِ تِہنٛدین پلون۔ یہِ کرنہٕ سٟتؠ کرکھ ژےٚ تِم تہٕ تہنٛدؠ پلو مےٚ کُن وقف۔22بیٚیہِ کڈ تمس کٹہٕ بچس چرٕب: تمؠ سُنٛد چربہٕ دار لٔٹ، تہٕ تمؠ سنٛدین انٛدرِمٮ۪ن تانن جگرس تہٕ دوٚن بوٚکوچن ؤلتھ چرٕب بیٚیہِ دٔچھنہِ رانہِ ہنٛد چرٕب۔ یہِ کٹہٕ بچہ چُھ ہارونؔ بیٚیہِ تسنٛدؠ نیٚچوؠ پاک بناونہٕ خٲطرٕ یِم میٲنؠ کاہن بنن۔23ٲخرس، پؠٹھ تُل تمہِ پجہِ منٛزٕ خمیٖرِ روٚس اکھ گردٕ ژوٚٹ، اکھ تیٖلہٕ دار ژوٚٹ بیٚیہِ نیٚبرؠ کِنؠ تیٖل لٲگتھ ژوٚٹ یۅسہ ژےٚ مےٚ برونٛہہ کُن اکھ أنِتھ۔24یِم سٲری چیز تھو ہارونؔس بیٚیہِ تمؠ سنٛدین نیٚچوٮ۪ن ہنٛدین اتھن منٛز پتہٕ ون تِمن زِ تِم تُلن تِمن ہیٚور کُن تہٕ کرِن میانہِ ناوٕ وقف۔25پتہٕ تُل تِم تہنٛدیو اتھو پؠٹھٕ تھوٗد تہٕ زالکھ اصل پٲٹھؠ قربان گاہس پؠٹھٕ کنہِ۔ یتہِ آسہ میانہِ باپتھ اکھ بُزنہٕ آمٕژ قۅربٲنی تہٕ تمچؠ خوشبو گژھِ مےٚ خوش۔26ہارونسؔ پاک کرنہٕ خٲطرٕ یُس کٹہٕ بچہ اوس تمؠ سُنٛد سینہٕ رَٹ تہٕ میانہِ ناوٕ کرنہٕ باپتھ تُلن ہیٚور کُن۔ مگر أمِس جانور سُنٛد یہِ حصہٕ آسہ چانہِ کھؠنہٕ باپتھ۔27یِم کرکھ تمس کٹہٕ بچس نِشہ الگ یِمہِ سٟتؠ ہارونؔ تہٕ تمؠ سٕنٛدؠ نیٚچوؠ میٲنؠ کاہن بنہٕ باپتھ پاک کرنہٕ آیہِ: سُہ سینہٕ یُس ژےٚ میانہِ ناوٕ کرنہٕ باپتھ ہیٚور کُن تُلتھ تہٕ سۅ ران یِس ژےٚ مےٚ پیش کٔرِتھ۔ یِم چھِ ہارونہِؔ تہٕ تمؠ سنٛدین نیٚچوٮ۪ن ہنٛدِ خٲطرٕ۔28یہِ رسم روزِ ہمیشہ خٲطرٕ جٲری۔ ییٚلہِ تہِ زانٛہہ اسرائیلٕکؠ لوٗکھ مےٚ لول برنہٕ خٲطرٕ نیاز کرن، تہٕ تِمن جانورن ہُنٛد سینہٕ تہٕ ران کرن مےٚ پیش یِم آسن ہارونؔہِ بیٚیہِ تمؠ سنٛدین نیٚچوٮ۪ن ہنٛدِ کھؠنہٕ خٲطرٕ۔29ہارونہِؔ مرنہٕ پتہٕ لٲگن سُہ مقدس لباس تمؠ سٕنٛدؠ نیٚچوؠ۔ تِم گژھن یہِ تمہِ وِزِ لٲگن ییٚلہِ اکھ سردار تِمن مخصوص کرِ بیٚیہِ کرکھ کاہن ہنٛدؠ اختیار عطا۔30ہارونہٕؔ سُنٛد نیٚچو یُس تمس پتہٕ بوٗڈ کاہن بنہِ سُہ لاگہِ سٔتن دوٚہُن سُہ لباسہٕ ییٚلہِ سُہ مقدس خٟمس منٛز پاک جایہِ پؠٹھ عبادت کرنہٕ باپتھ اژِ۔31یُس کٹہٕ بچہ ہارونؔ بیٚیہِ تمؠ سٕنٛدؠ نیٚچوؠ پاک کرنہٕ باپتھ قربان کرنہٕ آو، تمؠ سُنٛد سینہٕ بیٚیہِ تمؠ سنٛز ران تُل سُہ رن تتھ جایہِ یۅسہ امہِ خٲطرٕ الگ بناونہٕ آمٕژ چھِ۔32یہِ تیار سپدنہٕ پتہٕ کھؠن یہِ ماز ہارونؔس بیٚیہِ تمؠ سنٛدین نیٚچوٮ۪ن تتھ ژوچہِ سٟتؠ یۅسہ مقدس خٟمکس دروازس پؠٹھ پجہِ منٛز تھاونہٕ آمٕژ چھِ۔33تِم کھؠین تِمو چیزو منٛزٕ یِم کاہن بنہٕ خٲطرٕ تِہنٛدؠ گناہ چھلنہٕ باپتھ نیاز کرنہٕ آیہِ۔ مگر یِمو چیرو منٛزٕ ہیٚکہ نہٕ بیٚیہِ کانٛہہ ۅپر کھیٚتھ تکیازِ تِم چھِ کاہنن ہنٛدِ خٲطرٕ یوٚت مخصوص۔34ہرگاہ تمہِ پاک مازٕ منٛزٕ یا ژوچہِ منٛزٕ کینٛہہ روزِ، سُہ گژھِ مکمل پٲٹھؠ زالُن۔ سُہ گژھِنہٕ کانٛہہ کھیوٚن تکیازِ سُہ چُھ مقدس۔35ہارونؔس تہٕ تمؠ سنٛدین نیٚچوٮ۪ن کر تہِ سورےٕ یتھٕ پٲٹھؠ مےٚ ژےٚ حکم دِیتمتُ چھے۔ ژےٚ کرکھ تِم ستن دوٚہُن تام تیار۔36قربان گاہ پاک کرنہٕ باپتھ کر پریتھ دوٚہہ اکھ ہکھر وُژھ قربان۔ تمہِ سٟتؠ سپدِ رسمن قربان گاہ صاف تہٕ قربان گاہچ ناپٲکہِ سپدن دوٗر۔ بیٚیہِ چھے ژےٚ قربان گاہس پٹؠھٕ زیتون تیٖل تراون یتھ یہِ یہُوواہؔ سٕنٛدِ ناوٕ وقف سپدِ۔37ستن دوٚہُن قربان گاہس منٛز قۅربٲنی جٲری روزنہٕ پتہٕ آسیٚتھ ژےٚ سُہ پاک کوٚرمُت۔ یہِ آسہ تیوٚت پاک سپدمُت یُس تہٕ چیز اتھ سٟتؠ لگہ سُہ تہِ سپدِ پاک۔38بیٚیہِ چھےٚ ژےٚ ہمیشہ روزانہٕ زٕ وٲرؠ شنؠ برٕ قربان گاہس پؠٹھ قربان کرنؠ۔39ژےٚ چھےٚ اکھ کٹہٕ برٕ صبحس قربان کرُن تہٕ بیاکھ لگ بھگ شامس قربان کرُن۔40گوٗڈنکس کٹہٕ برس سٟتؠ کر بیٚیہِ نیاز زٕ لیٹر اصل پٲٹھؠ پشنہٕ آمُت کنکہٕ اوٚٹ یتھ سٟتؠ اکھ لیٹر رٔتہِ قسمک زیتون تیٖل رٔلٲیتھ آسہ تہٕ اکھ لیٹر شراب یُس چینُکھ نیاز آسہ۔41ییٚلہِ ژےٚ شامس بیاکھ کٹہٕ برٕ قربان کرکھ تمہِ وِزِ تہِ کر تیوٚتاہ اوٚٹ، تیٖل تہٕ شراب نیاز یوٚتاہ صبحس کۅرتھ۔ یہِ آسہ مےٚ یہُوواہسؔ سٕنٛدِ باپتھ اکھ نیاز، تِم زالن تہِ تہٕ تمچؠ خوشبو ییہِ مےٚ پسند۔42یمہٕ قۅربٲنہِ چھِ ژےٚ بیٚیہِ چٲنؠن ذریٲژن ہمیشہ مےٚ یہُوواہؔ سٕنٛدِ خٲطرٕ پیش کرنہِ۔ توٚہہِ چھِ یمہٕ قۅربٲنینہِ مقدس خٟمکس دروازس پؠٹھ پیش کرنہِ تتھ جایہِ یتھ بہٕ ژےٚ سمکھے تہٕ ژےٚ سٟتؠ کلامہٕ کرٕ۔43تتھ جایہِ یتِتھ بہٕ اسرائیل کٮ۪ن لوٗکن سمکھٕ تہٕ سۅ جاے سپدِ میانہِ جلالہٕ سٟتؠ پاک۔44بہٕ کرن سُہ مقدس خٟمہٕ تہٕ قربان گاہ وقف بیٚیہِ ہارونؔ تہٕ تسنٛدؠ نیٚچوؠ یُتھ زن تِم میٲنؠ کاہن بنن۔45بہٕ روزٕ اسرائیل کٮ۪ن لوٗکن سٟتؠ تِہنٛد خدا بنتھ۔46أتی زانن تِم زِ بہٕ چھس یہُوواہؔ تِہنٛد خدا یمؠ تِم مِصرٕ منٛزٕ نیٚبر کٔڈتھ أنؠ تہٕ بہٕ روزٕ تِمن منٛز۔ بہٕ چُھس یہُوواہؔ سُہ خدا یمِس تِم عبادت کران چھِ۔
Bridge Connectivity Solutions Pvt. Ltd.