خروج2
1وۅنؠ اوس تتہِ اکھ نفر یُس یعقوبؔ سنٛدِ زُرؠ یٲژ منٛز لاوی اوس۔ تٔمؠ کوٚر أکِس زنانہِ سٟتؠ خانٛدر یۅسہ لاوی سنٛدِ پُشتٕچ ٲس۔2سۅ روز گۅبہِ کھورٕ تہِ تَس زاو اکھ نیٚچو۔ ییٚلہ تمہِ وُچھ سُہ اوس اکھ صحت منٛد شُر، تمہِ تھوو سُہ ترٛین ریتن ژوٗرِ تکیازِ سۅ ٲس نہٕ یژھان تہِ کرُن یمیُک بادشاہن حکم کوٚرمُت اوس۔3ییٚلہ نہٕ تمہِ سُہ زیادٕ کالس ژوٗرِ ہیوٚک تھٲوِتھ، تمہِ بنٲو واریاہ رادٕ والٮ۪ن نرکانیٚن ہنٛز اکھ ٹوکر۔ تمہِ موٚتھ تتھ تارکول یُتھ زنہٕ سۅ آبہٕ پیٚٹھؠ یررٕ وسہِ ہے۔ پتہٕ تھووُن سُہ لڑکہٕ تتھ ٹوکرِ منٛز تہٕ ٹوٗکر ترٲون آبس منٛز۔ یہِ ٲس دریاۓ نیٖل کِس اندس پؠٹھ تھدیٚن نرکانؠن منٛزس۔4تس سنٛز زِٹھ بیٚنہِ روز نکھے وۅدٕنؠ وچھان زِ تمِس کیاہ سپدِ۔5دٔستی وٲژ بادشاہ سنٛز کور درؠ یاوس پٮ۪ٹھ سران کرنہِ۔ تس سنٛزِ دایہِ درایہ درؠ یاوٕ بٹِھس پؠٹھ اورٕیور کرنہِ۔ تمہِ وُچھ سۅ ٹوکر درؠ یاوس منٛز تھدؠن نرکانؠن منٛز، لہٰذا سوز تمہِ پنٕنؠ اکھ داے سۅ تُلِتھ اننہٕ باپتھ۔6ییٚلہِ تمہِ دایہ سۅ ٹوکر أنؠ، تمہِ مُژرٲو سۅ، سۅ گییہِ حٲران اتھ منٛز اکھ شُر وُچِھتھ یُس ودن کریکہ دِوان اوس۔ تمِس آو تٔمؠ سُنٛد عار، تہٕ تمہِ ووٚن، "یہِ گژھِ ضرور اکھ عِبرٲنؠ شُر آسن۔"7پتہٕ گییہِ تمِس شُرؠ سنٛز بٔڈ بیٚنہِ تمِس بادشاہ سنٛزِ کورِ نش تہٕ ووٚننس، "کیاہ بہٕ گژھا اکھ عِبرٲنؠ زٔنؠ ژھارنہِ یۅسہ أمِس شُرس چانہِ خٲطرٕ دۅد چیاوِ؟"8بادشاہ سنٛزِ کورِ ووٚن تمس، "ادٕ کیاہ، گژھِ تہٕ أنِن اکھ۔" لہٰذا سۅ کور گییہِ تہٕ لبنؠ شُر سنٛز موج۔9بادشاہ سنٛزِ کورِ ووٚن تمِس شُرؠ سنٛزِ مٲجہِ، "مہربٲنی کٔرِتھ یہِ شُر نِن تہٕ میانہِ خٲطرٕ چاوُن یہِ دوٗد۔ بہٕ دِمے ژےٚ امی خٲطرٕ تنخاہ۔" لہٰذا تمہِ شُرؠ سنٛزِ مٲجہِ نیٚو سُہ تہِ دِیتنس دوٗد۔10ییٚلہِ سُہ بوٗڈ اوس سپدمُت تمؠ سنٛزِ مٲجہِ اوٚن سُہ لڑکہٕ بادشاہ سنٛزِ کورِ نِشہ۔ تمہِ بنوو سُہ پنُن نیٚچو تہٕ ووٚننُ، "مےٚ کوٚڈ یہِ آبہٕ منٛزٕ نیٚبر، لہٰذا بہٕ ونہٕ أمِس موسیٰؔ۔"11موسیٰؔ ییٚلہِ بوٚڈ گوٚومُت اوس، سُہ دراو اکہ دوٚہہ محلکہ علاقہٕ منٛزِ نیٚبر پننؠن عِبرٲنؠ لوٗکھ وُچھنہِ۔ تٔمؠ وُچھ تِمن کٟژھا سٕختی ٲس۔ تٔمؠ وُچھ بیہِ اکھ مِصری نفر اوس أکِس عِبرٲنؠ نفرس لایان۔12تٔمؠ دِژ اورٕیور نظر زِ کانٛہہ ما آسہ ہے وُچھان۔ تتہِ وچُھن نہٕ کانٛہہ، تٔمؠ کوٚر سُہ مِصری نفر قتل تہٕ سؠکہِ منٛز وڈرُن تٔمؠ سنٛز لاش۔13دویمہِ دوٚہہ آو سُہ تژھِ جایہِ واپس۔ سُہ گوٚو حٲران یہِ وُچِھتھ زِ زٕ عبرٲنؠ شخص ٲسؠ پانہٕ وٲنؠ ژُوان۔ تٔمؠ ووٚن تمس نفرس یِم ژُوُنؠ لٲجؠ، "ژٕ کیازِ چُھکھ پنِنس عِبرٲنؠ بٲیس لایان؟"14تٔمؠ نفرن دِیت جواب، "ژٕ کٔمؠ چُھکھ سون حٲکم تہٕ منصف بنوومُت؟ کیاہ ژٕ کرِکھا مےٚ تِتھے پٲٹھؠ قتل یتھ پٲٹھؠ ژٕ رٲتھ مِصرُک اکھ نفر قتل کوٚرتھن؟ موسیٰؔ کھوژ پتہٕ، تکیازِ تٔمؠ سونچ، "ییٚلہِ یمِس نفرس پتاہ چھِ یہِ مےٚ کوٚر، باقین لوٗکن تہِ لگہ پتاہ۔"15ییٚلہِ بادشاہن بوز زِ موسیٰؔ ہن کوٚر اکھ مِصری نفر قتل، تٔمؠ دِیت سِپاہن موسیٰؔ قتل کرنُک حکم۔ مگر موسیٰؔ ژوٗل بادشاہس نِشہ تہٕ دراو مِصرٕ منٛزِ۔ تٔمؠ کوٚر مدیان علاقس مشرقس کنُ سفر تہٕ تٔتی روزنُک سنٛز کوٚرن۔ اکہِ دوٚہہ اوس موسیٰؔ اکِس کہرِس نکھٕ بہتھ،16ستتھ زنانہٕ آیہِ تتھ کیٖرِس پؠٹھ یمہٕ مدیانکس کاہن سنٛزٕ کورِ آسہٕ۔ تِمو کوٗڈ آب تہٕ برکھ ڈونگہٕ یتھ زن تِم پننس مٲلؠ سنٛدین تیٖرن تہٕ ژھاوٕلؠن تریش چاوہن۔17کینٛہہ پوٗہولؠ آیہِ تہٕ تِمو لٲجہِ تمہِ کورِ ژلناؤنہِ۔ مگر موسیٰؔ ہن کوٚر تِمن کورن مدد تہٕ کوٗڈن تہنٛدؠن تیٖرن ہنٛدِ باپتھ آب۔18ییٚلہ تمہِ کورِ پننس مٲلس یتؔروہس نِشہ واپس واژٕ، یمِس رعوایلؔ تہِ ونان ٲسؠ، تٔمؠ پرُوژھ تِمن، "توٚہؠ کتھٕ کٔنؠ دِژوٕ از تیرؠن تریش ؤلؠ ؤلؠ تہٕ اوو گرٕ یوٚت سُلے؟"19تِمو دِیت جواب، "اکؠ مِصرُک نفرن رٔٹؠ باقی پوٗہولؠ اسہِ لار کرنہٕ نِشہ پتھ۔ تٔمؠ دِیت اسہِ بیٚیہِ کیرِ منٛزٕ آب کڈتھ تہٕ اسہِ چاونٲۓ تیٖر تریش۔"20تٔمؠ ووٚن پننؠن کوریٚن، "سُہ کیٖرِس پؠٹھ تراون چُھنہٕ جان، توٚہہِ ہووٕ نہٕ أمِس نفرس زَ أسؠ چھِ ۅپرن خوش آوے کران یا مہربٲنی کرنُکھ ماوضہٕ دِوان۔ تمِس دِیو دعوت یُتھ زن سُہ کینٛہہ کھیٚیہِ!" لہٰذا تِمو کوٚر تیٖ تہٕ موسیٰؔ ہن کھیو تِمن سٟتؠ۔21یتروہنؔ دِژ موسیٰؔ ہس تِمن سٟتؠ روزنٕچ دعوت یِس موسیٰؔ ہن قبول کٔر۔ یتروؔہن دِژ پتہٕ موسیٰؔ ہس پننؠٕ کور صفورہؔ نیتھرؠ۔22پتہٕ زاو تمِس اکھ نیٚچو، تہٕ موسیٰؔ ہن تھؤو تمِس ناو جیرسومؔ، عِبرٲنؠ زبٲنؠ منٛز یمیک مطلب چُھ "غٲر مُلکی" تکیازِ تٔمؠ ووٚن، "بہٕ چُھس غٲر مُلکی یتھ مُلکس منٛز روٗزان۔"23واریاہ وری پتہٕ مود مِصرُک بادشاہ۔ اسرائیلی لوٗکھ ٲس وۅنؠ تہِ کرؠکہٕ دِوان تکیازِ تِمن ٲس غلامن ہنٛدؠ پٲٹھؠ سٕخت کٲم کرنؠ پوان۔ تِم ٲسؠ مددتہٕ خٲطرٕ کسَ تام آلو دِوان، تہٕ خداین بوز تِہنٛد۔24ییٚلہِ تٔمؠ تہنٛزِ کرؠکہٕ بوزٕ، تمِس پؠو ابرہامسؔ، اضحاقسؔ تہٕ یعقوبسؔ پنُن کوٚرمُت وعدہ ژؠتس۔25خداین وُچھِ زِ اسرائیل کیٚن لوٗکن سٟتؠ کوتاہ بُرٕ سلوک اوس یوان کرنہٕ، تہٕ تمس سپد تُہنٛد حال مولوم۔
Bridge Connectivity Solutions Pvt. Ltd.