اِستِثنا3
1پتہٕ پھیرؠ أسؠ شمالی انٛدس کُن تہٕ گےَ بسنؔ علاقس منٛز۔ تمہِ علاقُک بادشاہ عوجؔ تہٕ تمسنٛدؠ تمام سِپاہ گےَ جنوب طرفہٕ ادرعیؔ شہرس منٛز اسہِ سٟتؠ لڑنہٕ باپتھ کھڑا۔2یہُوواہنؔ ووٚن مےٚ یِمن مہٕ کھوٚژ بہٕ بناون چون فوج عوج تہٕ تٔمسنٛدِس سٲرسےٕ فوجس شِکس دِنس تہٕ تِہنٛدس سٲرسےٕ ملکس پٮ۪ٹھ قبضہٕ کرنس قٲبل۔ أمِس سٟتؠ کر تی یہ ژےٚ عمور قومہٕ کِس بادشاہ سیحونس سٟتؠ کۅرتھ یُس حسبونس پٮ۪ٹھ حکومت کران اوس۔"3یتھٕ پٲٹھؠ بنٲوؠ أسؠ یہُوواہنؔ بسن کِس عوجؔ بادشاہس تہٕ تٔمسنٛدِس تمام فوجس شِکس دِنس قٲبل۔ اسہِ مٲرؠ تِم سٲری۔ اسہِ دیُت نہٕ تِمن منٛز کٲنٛسہِ تہِ زنٛدٕ روزنہٕ۔4ارجوبؔ کِس تتھ علاقس منٛز ٲسؠ شیٹھ شہر یِم بسنؔ کِس بادشاہ عوجؔ سنٛدِس زیرِ سلطنتس منٛز یوان ٲسؠ۔ مگر اسہِ رٔٹؠ تِم سٲری۔5یِمن سارنی شہرن ٲسؠ ژۅپٲرؠ دروازٕ تہٕ وۅبؠ دار تٔھدؠ دیوار۔ اسہِ کوٚر واریہن تِمن گامن پٮ۪ٹھ تہِ قبضہٕ یِمن انٛدؠ پٔکؠ دیوار ٲسؠ نہٕ۔6اسہِ کوٚر پرٮ۪تھ اکھ چیز مکمل پٲٹھؠ تباہ، یتھ پٲٹھؠ اسہِ تتھ علاقس منٛز کوٚر یتہِ سیحون بادشاہ حکومت کران اوس۔ اسہِ ژھٕنؠ تمام مرد، زنہِ تہٕ شُرؠ مٲرِتھ۔7مگر اسہِ کٔرؠ تِمو شہرو منٛزٕ تمام چوٕ چاروٲے تہٕ باقی قٟمتی چیز پانس باپتھ جمع۔8تمہِ وقتہٕ نیٚیہ اسہِ عمور قومہٕ کٮ۪ن تِمن دوٚن بادشاہن یردن دریاو کِس مشرِقس منٛز تہٕ جنوب طرفہٕ ارنونؔ دریاوٕ کیٚن بٹھٮ۪ن تام تہٕ شمال طرفہٕ حرمون بالس تام سٲرےٕ زمین قبضس منٛز۔9اتھ پہاڑس ٲسؠ صیدا شہرٕکؠ لوٗکھ سِریُونؔ ونان تہٕ عمورٕکؠ لوٗکھ ٲسِس سنیِرؔ ونان10اسہِ کوٚر سطح مرتفع کٮ۪ن تمام قصبن پٮ۪ٹھ قبضہٕ تہٕ جلعاد کٮ۪ن تمام علاقن پٮ۪ٹھ، تہٕ بسن کِس مشرِقس منٛز ادرعیؔ تہٕ سلقہؔ کٮ۪ن شہرن تام یمہٕ عوج سنٛدِس سلطنتس منٛز یوان ٲسؠ۔11عوجؔ اوس بسنُک ٲخری بادشاہ یُس رِفا دیون ہنٛدِ نسلہٕ منٛزٕ اوس۔ تمِس اوس شِسترو پلنٛگ۔ یُس زن ژور میٹر زیوٹھ تہٕ زٕ میٹر کھۅل اوس۔ یہ اوس عمونؔ علاقہٕ کِس ربہؔ شہرس منٛز۔12تمہِ وقتہٕ یتھ زمیٖنس پٮ۪ٹھ اسہِ قبضہٕ کوٚر تمہِ منٛزٕ دیُت مےٚ روبنؔ تہٕ جد قبیلہٕ کٮ۪ن ارنونؔ دریاوس نکھٕ عروعیرؔ شہرٕ کِس شمالس منٛز تہٕ جلعاد کٮ۪ن پہٲڑی علاقن نِش شہرن نزدیک کینٛہہ زمیٖن۔13جلعادُک دویم حصہٕ تہٕ سورےٕ بسن یُس ارجوبؔ علاقس منٛز اوس یتھ پٮ۪ٹھ عوج بادشاہ حکومت کران اوس دِژ مےٚ منسیؔ کٮ۪ن اڈٮ۪ن قبیلن۔ بسن کِس پوٗرٕ علاقس اوس رِفا دیون ہنٛز سرِ زمین وننہٕ یوان۔14منسیؔ قبیلٕکؠ یائیرؔ نٲوؠ أکؠ شخصن کوٚر سورےٕ بسنؔ فتح۔ یۅتام شمال انٛدٕ جسُورؔ تہٕ معکاتؔ علاقٕکؠ سرحد چھِ۔ تٔمؠ دیُت تتہِ کٮ۪ن گامن پنُن ناو، تہٕ تِم چھِ وُنہِ یائِیرؔ سنٛدِ ناوٕ زاننہٕ یوان۔ 15جلعاد علاقُک شمٲلی حصہٕ دیُت مےٚ مکِیر سنٛدین قبیلن یمہ منسیؔ سنٛدِ قبیلٕکؠ اولاد چھِ۔16مےٚ دِیُت روبن تہٕ جد کٮ۪ن قبیلن جلعادُک جنوبی حصہٕ یُس جنوب کِنؠ ارنونؔ دریاوس تام پھٲلِتھ اوس۔ دریاوُک مرکزی حد اوس جنوبس تام۔ تہٕ شمٲلی حد چُھس دریاے یبوق یُس عمونؔ علاقہٕ کہ سرحدُک حصہٕ چُھ۔17یہ سرحد چُھ یردن وادی ہنٛدِ مشرقی بٹھِکہ مٲدانہٕ پٮ۪ٹھٕ، شمالہٕ کِنؠ کِنرتؔ پٮ۪ٹھٕ (یتھ بحیرہ گُلیلؔ ونان چھِ) جنوبہٕ کِنؠ بحیرہ عربہ ہس (یتھ بحیرہ مردار تہِ ونان چھِ) تام پھٲلِتھ چُھ۔ تہٕ مشرقہٕ کِنؠ پِسگہ کوٚہہ کِس پاتھلِس تام۔18تمہِ وقتہٕ ووٚنو مےٚ توٚہہ تریٚن قبیلن، سون خدا یہُوواہؔ چُھ توٚہہِ یہ ملک یردن کِس مشرِقس منٛز دِوان تاکہِ توٚہؠ کٔریٚو اتھ پٮ۪ٹھ قبضہٕ۔ لہٰذا پزِ وۅنؠ تُہنٛدین سِپہَن زِ تِم یِن پنٕنؠ ہتھیار ہیٚتھ یردن دریاوٕ اپور دویمٮ۪ن اسرائیلی قبیلہٕ کٮ۪ن نفرن برُونٛہہ تاکہِ تِم ہیٚکن یہ ملک فتح کرنس منٛز تِمن مدد کٔرِتھ یُس خدا تِمن دِنہٕ وول چُھ۔19مگر تُہنٛزٕ خاندارنہِ، بچہٕ تہٕ چو چاروٲے روزن تِمن شہرن منٛز یمہٕ مےٚ توٚہہِ دِتؠ۔20تُہنٛدین نفرن پزِ پننٮ۪ن اسرائیلی سٲتھین مدد کرُن، یۅتام نہٕ یہُوواہؔ تِمن تتہِ امنہٕ سان بسنَس قٲبل بناوِ، یۅتام نہٕ تِم تتھ سٲرسےٕ زمیٖنس پٮ۪ٹھ قبضہٕ کرن یۅسہ سون خداوند یہُوواہؔ تِمن یردن دریاوٕ کِس مغربی بٹھِس پٮ۪ٹھ دِوان چُھ یتھ کنؠ تٔمؠ یتہِ یردن دریاوٕ کہِ مشرقہٕ طرفہٕ تُہنٛدِ باپتھ کوٚر۔ تمہِ پتہٕ ہکیٚو توٚہؠ سٲری تتھ ملکس منٛز واپس گٔژھِتھ یُس مےٚ توٚہہِ دیُت۔"21تہٕ مےٚ ووٚن یشُوع ہس، "ژےٚ وُچِھتھ تہِ سورےٕ یہ سانؠ خدا یہُوواہنؔ تِمن دوٚن بادشاہن سیحونسؔ تہٕ عوجسؔ سٟتؠ کوٚر۔ سُہ کرِ تِمن لوٗکن سٟتؠ تی یِم وۅنؠ یتھ ملکس منٛز چھِ یور توٚہؠ ژُوو۔22یِمن لوٗکن مہٕ کھۅژیٚو تکیازِ یہُوواہؔ چُھ سون سُہ خدا یُس توٚہہِ سارنےٕ ہنٛدِ باپتھ لڑِ۔"23تٔمہِ ساعتہٕ کوٚر مےٚ دِلہ سٟتؠ دُعا تہٕ ووٚنُم،24یہُوواہؔ سانہِ خداوندٕ، ژےٚ کۅرتھ صرف مےٚ ہاونہٕ باپتھ یہ شروع زِ توٚہؠ چُھو سٮ۪ٹھاہ عظیم تہٕ مےٚ تِم طاقتہٕ وٲلؠ چیز ہاونہٕ باپتھ یمہٕ توٚہؠ کٔرِتھ ہکیٚو۔ بے شک چُھنہٕ زمیٖنس تہٕ آسمانس منٛز کانٛہہ خدا یُس یہ طاقتور کٲم کرِ یۅسہ توٚہہِ کٔرو۔25تہٕ وۅنؠ کٔرؠ تو مہربٲنی مےٚ دی تو یردن دریاو عبور کٔرِتھ مشرق انٛدٕ اصل زمین تہٕ لبنانٕکؠ خوبصورت پہٲڑی ملک وُچھنٕکؠ اجازت۔26مگر تُہنٛدیٚو جدٕ اجدادن ہنٛزو کامیٚو سٟتؠ سپُد یہُوواہؔ ناراض یمہِ کنؠ تِمو مےٚ کُن توجہ دیُت نہٕ۔ امہِ بجایہ ووٚن تِمو، "یہ کتھ چھےٚ تُہنٛدِ طرفہٕ کٲفی! اتھ متعلق کٔرزیٚنہٕ مےٚ سٟتؠ دوبارٕ کتھ!27ژٕ کھس پِسگہؔ پہارٕ تینٛتٲلِس پٮ۪ٹھ تہٕ دِ مغرب، مشرق، شمال تہٕ جنوب کُن نظراہ۔ ژےٚ پٔزی یہ سٮ۪ٹھاہ توجہ سان وچُھن، تکیازِ ژٕ ہیککھ نہٕ تتہِ پٮ۪ٹھٕ زمیٖن وُچھنہٕ باپتھ یردن دریاو پار کٔرِتھ۔28مگر یشُوعؔ ہس ون زِ سُہ کیاہ کرِ۔ تمِس دِ ہمتھ مضبوط بننٕچ، تکیازِ سُے چُھ سُہ یُس لوٗکن دریاوٕ اپور تارِ تاکہِ تِم کرن تتھ زمیٖنس پٮ۪ٹھ قبضہٕ یُس ژےٚ بالہٕ تینٛتالہٕ پٮ۪ٹھٕ وچُھتھ۔29اوٕ کِنؠ ٹھہریاے أسؠ بیت فعورؔ شہرس نکھٕ یردن دریاوچہِ وادی منٛز۔
Bridge Connectivity Solutions Pvt. Ltd.