اِستِثنا2
1پتہٕ رودؠ أسؠ انٛدؠ انٛدؠ بیابانو منٛزؠ بحرِ قُلزمچہ وتہِ پکان یتھٕ کِنؠ اسہِ یہُوواہنؔ کرُن ووٚنمُت اوس تہٕ أسؠ رودؠ واریہن ؤرین شعیر بالن پٮ۪ٹھ ادومسؔ منٛزے پھیران۔2پتہٕ ووٚن یہُوواہنؔ مےٚ،3"ژےٚ ووتےٕ یتھ کوہستٲنؠ علاقس منٛز واریاہ کال نژان۔ وۅنؠ نیر تہٕ کر شمالس کُن سفر شروع۔4تہٕ لوٗکن ون زِ سُہ چُھ یتھؠ ملکس نکھٕ سفر کرن وول یُس عیسو سنٛدین اولادن ہُنٛد چُھ سُہ چُھ اضحاقؔ سنٛدیو اولادو منٛزٕ۔ تِم چھِ ادومؔ کٮ۪ن شعیر پہٲڑی ملکن منٛز روزان۔ تِم کھۅژنے ژےٚ،5مگر تِمن سٟتؠ ہیٚزینہٕ لڑٲے، تکیازِ بہٕ دِمے نہٕ ژےٚ تہنٛزِ زمینہ ہُنٛد اکھ حصہٕ تہِ۔ مےٚ چھےٚ سۅ شعیر زمین عیسوؔ سنٛدین اولادن دِنؠ۔ 6ییٚلہِ توٚہؠ تہنٛدِس ملکس نکھٕ سفر کٔریٚو تہٕ تِمن نِش ہیٚزیٚو کھیٚن چیٚن مٔلؠ۔"7یہ مشرٲوؠ زیٚنہٕ زِ سٲنؠ خدا یہُوواہنؔ دِژ اسہِ پرٮ۪تھ کُنہ تتھ کامہِ منٛز برکت یۅسہ توٚہہِ کٔرو۔ سُہ چُھ زانان زِ توٚہہِ پٮ۪ٹھ کیاہ چُھ گُدریومُت ییٚلہ توٚہؠ تتھ بٔڈِس صحراوس منٛز پھیران ٲسیٚو۔ مگر سُہ رود یمن ژتجہَن ورین توٚہہِ سٟتؠ یمہِ کِس نتیجس منٛز توٚہہِ تہِ سورےٕ میلیٚو یمِچ توٚہہِ ضرورت ٲس۔8یِتھ کِنؠ تھوو اسہِ صفر جٲری۔ اسہِ کوٚر پہٲڑی ملکو منٛزؠ سفر کرُن ترک یتہِ عیسوؔ سنٛدؠ اولاد روزان ٲسؠ، یِم سٲنؠ ٲشناو ٲسؠ۔ أسؠ دراے تمہِ وتہِ یۅسہ وادی یردن کیٚو مٲدانو منٛزؠ گُذرتھ واپس عصیُونؔ جابر تہٕ ایلاتؔ منٛزؠ نیرتھ موآبؔ کٮ۪ن صحرٲے وتن پٮ۪ٹھ واتان چھےٚ۔9یہُوواہنؔ ووٚن مےٚ، "موآبٕکؠ لوٗکھ مہٕ کرُکھ تنٛگ تہٕ تِمن سٟتؠ مہٕ کٔریٚو لڑٲے تکیازِ بہٕ دمہٕ نہٕ توٚہہِ تِہُنٛد کانٛہہ تہِ ملک۔ یہ مٔشرٲوؠ زیٚنہٕ زِ سُہ چُھ ابرہامؔ سُنٛد باپتھٕر لوط سنٛدیو اولادو منٛزٕ تہٕ مےٚ دیُت تِمن عار شہر۔"10دیون ہنٛز اکھ بٔڈ جماعت یِمن گۅڈٕ ایمِیمؔ ونان ٲسؠ، ٲسؠ تتہِ روزان۔ تِم ٲسؠ عناقؔ سنٛدؠ اولاد جناتن ہنٛدؠ پٲٹھؠ زیٹھؠ۔11تِمن تہٕ عناقؔ سنٛدین اولادن تہِ ٲسؠ رِفا دیوٚ ونان مگر موآبٕکؠ لوٗکھ ٲسِکھ ایمِیمؔ ونان۔12حورؔ قبیلٕکؠ لوٗکھ ٲسؠ گۅڈٕ ادومؔ علاقس منٛز روزان مگر عیسو سنٛدؠ اولادو لٔگؠ تِمن پتہٕ۔ تِمو دیُت تِمن شکس تہٕ مٲرِکھ تہٕ گے تِہنٛدِس ملکس منٛز آباد۔ یتھٕ پٲٹھؠ پتہٕ اسرائیل یو پنٕنؠ دشمن تمہِ ملکہٕ منٛزٕ کٔڈؠ یُس تِمن یہُوواہنؔ دیُتمُت اوس۔13موسیٰؔ ہن ووٚن اسرائیلی لوٗکن یتہِ، ییٚلہ أسؠ زرد وادی اپور ترو یتھ کِنؠ زن یہُوواہنؔ اسہِ ووٚن۔14ییٚلہ أسؠ گۅڈنچہِ لٹہِ قادِس برنِیع منٛزٕ دراے تتہِ پٮ۪ٹھٕ گےَ زرد وادی عبور کرنس منٛز اَرترٛہہ وری۔ یِمن ورؠ ین دوران، گُذریاے تمہِ پُییہِ ہنٛدؠ تمام اسرائیلی لڑن وٲلؠ، یتھ کنؠ زن یہُوواہنؔ ونمُت اوس یہ سپدِ۔15تِم مودؠ اوٕ سببہٕ تکیازِ یہُوواہؔ رود تِمن مخٲلف یۅتام زن تٔمؠ تِمن نِش نجات حٲصل کوٚر نہٕ۔16یۅتام تمہٕ سٲری نفر یمہٕ جنگس منٛز لڑنس قٲبل گٔمٕتؠ ٲسؠ مودؠ،17یہُوواہنؔ ووٚن مےٚ،18از پییہِ توٚہہِ سارنےٕ موآبؔ کہِ علاقہٕ منٛزؠ نیرُن یُس عارؔ شہرس نزدیک چُھ۔19ییٚلہ توٚہؠ تمہِ ملکہٕ کِس سرحدس نزدیک وٲتیٚو یتہِ عمونٕکؠ لوٗکھ روزان چھِ تہٕ تمہٕ کٔرؠ زیوکھ نہٕ پریشان تہٕ نہٕ کٔرؠ زیٚو تِمن سٟتؠ لڑٲے۔ تِم تہِ چھِ لوط سنٛدؠ اولاد، اوٕ کِنؠ دمہٕ نہٕ توٚہہِ تمہِ ملکہٕ منٛزٕ کہینٛؠ یُس مےٚ تِمن دیُتمُت چُھ۔"20اتھ علاقس چھِ رِفاؔ دیون ہنٛز سرِ زمین تہِ ونان، گۅڈٕ تتہِ روزان وٲلؠ عمونیؔ لوٗکھ ٲسؠ تِمن زمزم جمٲژ ناوٕ زانان،21سُہ ٲس اکھ بٔڈ تہٕ طاقتور جماتھ یمہٕ عناقؔ نسلہٕ کٮ۪ن لوٗکن برابر تٔھدؠ ٲسؠ، مگر یہُوواہنؔ کٔرؠ تِم بُرباد، تہٕ عمونؔ جمٲژ ژٔلرٲوؠ تِم تہٕ تِمن نِش نِیکھ تہنٛز زمیٖن تہٕ لٔگؠ تٔتی بسنہِ۔22یہُوواہنؔ کوٚر عیسو سنٛدٮ۪ن اولادن سٟتؠ تہِ تی یِم ادومؔ کٮ۪ن پہٲڑی علاقن منٛز روزان ٲسؠ۔ تِمو کوٚر حورؔ لوٗکن نِش نجاتھ حٲصل، امیُک نتیجہٕ دراو یہ زِ ادومؔ کیٚو لوٗکو نیٚیہ تِمن نِش تِہنٛز زمین تہٕ لٔگؠ تٔتی بسنہِ۔ تِم چھِ وُنہِ تہِ تٔتی روزان۔23یِم لوٗکھ کریٹؔ جزیرٕ پٮ۪ٹھٕ آے تہٕ عوی جمٲژ نِش کوٚرکھ نجات حٲصل یِم گۅڈٕ غزہ شہرٕ کِس جنوٗبس منٛز بحیرہ رومسؔ نکھٕ روزان ٲسؠ۔ تَمو نیٚیہ تِمن نِش پنٕنؠ زمین تہٕ لٔگؠ تٔتی بسنہِ۔24ییٚلہ أسؠ موآبؔ کہِ علاقہٕ منٛزؠ دراے تہٕ یہُوواہنؔ ووٚن اسہِ، "وۅنؠ کٔریٚو ارنونؔ دریاو پار۔ بہٕ دمہٕ عمور لوٗکن ہنٛدِس بادشاہ سیحونؔ سنٛدِس فوجس شِکس دِنس منٛز توٚہہِ مدد یُس حسبون شہرس منٛز روزان چُھ۔ پس کٔریٚو تِہنٛدِس فوجس پٮ۪ٹھ حملہٕ تہٕ لٲگیٚو تِمن نِش تِہنٛز زمیٖن لوٗٹہٕ نِنؠ۔25از کرن بہٕ پرٮ۪تھ جایہ پرٮ۪تھ کانٛہہ تُہنٛدِ سٟتؠ خوفزدٕ۔ پرٮ۪تھ کانٛہہ یُس توٚہہ متعلق بوزان آسہ کھۅژِ تہٕ اژیٚس لرزٕ۔26پتہٕ سوزؠ مےٚ پنٕنؠ قٲصد ریگستانہٕ پٮ۪ٹھٕ یتہِ أسؠ ٲسؠ حسبون کِس بادشاہ سیحونسؔ نِش۔ مےٚ ووٚن تِمن زِ بادشاہس نِیو میٚون یہ پُرامن پٲغام:27"مہربٲنی کٔرٕتھ دِیو اسہِ پننہِ ملکہٕ منٛزؠ سفر کرنُک اجازت أسؠ چھِ وعدہ کران زِ أسؠ روزو وتہِ پیٚٹھےٕ۔ أسؠ گژھو نہٕ دٔچُھن کھووُر۔28أسؠ دِمو پرٮ۪تھ کُنہ کھیٚن چیٚنُک ماوضہٕ یمیُک توٚہؠ اسہِ ہیٚنُک اجازت دِیو۔ أسؠ چھِ صرف تُہنٛدِ ملکہٕ منٛزؠ پکُن یژھان۔29یۅتام أسؠ یردن درؠ یاوٕ اپور تتھ ملکس منٛز واتو یُس خداوند یہُوواہنؔ اسہِ دِنہٕ وول چُھ۔ سانہِ باپتھ کٔریٚو تی یتھ پٲٹھؠ زن عیسو سنٛدیو اولادو کوٚر یمہٕ اودمؔ علاقس منٛز روزان چھِ تہٕ موآبؔ کیٚو لوٗکو سانہِ باپتھ کوٚر ییٚلہ تِمو اسہِ پننیٚو علاقو منٛزؠ پکنُک اجازت دیُت۔30مگر بادشاہ سیحونؔن دیُت نہٕ اسہِ پننہِ ملکہٕ منٛزؠ پکنُک اجازت۔ یہ اوٕ موٚکھٕ تکیازِ سٲنؠ خدا یہُوواہنؔ ٲس تمِس دِل آزٲری کٔرمٕژ۔ نتیجہٕ دراو یہ زِ یہُوواہنؔ بنٲوؠ أسؠ تِہنٛدِس فوجس شکَس دِنس تہٕ تِہنٛدِس زمینس پٮ۪ٹھ قبضہٕ کرنس قٲبل یتھ پٮ۪ٹھ أسؠ وُنہِ تہِ روازان چُھ۔31یہُوواہنؔ ووٚن مےٚ، "بوز! بہٕ چُھس توٚہہ سیحونؔ سنٛدِس فوجس شِکس دِنُک تہٕ لوٗکن ہُنٛد زمین لوٗٹہٕ نِنُک اجازت دِنہٕ وول۔ گٔژھیٚو کٔریٚو تتھ پٮ۪ٹھ قبضہٕ کرُن شروع!"32پتہٕ دراو سیحونؔ بادشاہ پنُن سورےٕ فوج ہیٚتھ شہرٕ نیٚبر یہضؔ شہرس کُن اسہِ سٟتؠ لڑنہِ۔33مگر خداین بنٲوؠ أسؠ تس شِکس دِنس قٲبل تہٕ اسہِ ژُھن سیحونؔ، تمسنٛدؠ اولاد تہٕ تمسنٛدؠ تمام سِپاہ مٲرِتھ۔34اسہِ کوٚر تِہنٛدین شہرن پٮ۪ٹھ قبضہٕ تہٕ تِم سٲری کٔرؠ تباہ۔ اسہِ ژھٕنؠ تمام مرٕد، زنہِ، تہٕ بچہٕ مٲرِتھ۔ اسہِ تھوو نہٕ تِمو منٛزٕ کانٛہہ تہِ زنٛدٕ۔35اسہِ یمن شہرن پٮ۪ٹھ قبضہٕ کوٚر تتِکؠ قٟمتی چیز تہٕ چو چاروٲے تہِ نی اسہِ۔36سٲنؠ خداوند یہُوواہنؔ بنٲوؠ أسؠ اتھ قٲبل زِ اسہِ کوٚر تِہنٛدین تمام شہرن جنوب کِنؠ عروعیرؔ پٮ۪ٹھٕ وادی ارنونؔ کٮ۪ن بٹھٮ۪ن تام، شمال کِنؠ جلعادؔ کٮ۪ن علاقن تام۔ یمن شہرن انٛدؠ پٔکؠ ٲسؠ دیوار تہِ، مگر أسؠ گےَ توتہِ تِمن پٮ۪ٹھ قبضہٕ کرنس منٛز کامیاب۔37مگر أسؠ گےَ نہٕ تِمن علاقن نزدیک یتہِ عمونٕکؠ لُکہ روزان چھِ یا یبوق درؠ یاو کیٚن بٹھیٚن یا پہٲڑی ملکہٕ کٮ۪ن قصبن یا کُنہِ دویمہِ جایہ یور خداوند خداین اسہِ گژُھن ووٚن نہٕ۔
Bridge Connectivity Solutions Pvt. Ltd.