اِستِثنا4
1"وونؠ کٔریٚو توٚہؠ اسرائیلی لوکھ، تِمن تمام اصولن تہٕ ضٲبطن پٮ۪ٹھ عمل یمہٕ بہٕ توٚہؠ ہیٚچھِ ناوو۔ اگر توٚہؠ تہِ کٔریٚو، توٚہؠ روزیٚو زنٛدٕ تہٕ توٚہؠ کٔریٚو تتھ ملکس منٛز دٲخل سپدِتھ قبضہٕ یُس خداوند یہُوواہنؔ یمسنٛدؠ تُہنٛدؠ جدٕاجدادن پٲروکار ٲسؠ توٚہہِ دِوان چُھ۔2یہ کینٛژھا بہٕ توٚہہِ حکم کران چُھس تتھ مہٕ ہُررٲیو کینٛہہ تہٕ یہ کینٛژھا بہٕ توٚہہِ ونان چُھس تتھ مہٕ چھوٚنرٲیو کینٛہہ۔ سٲنِس خدا یہُوواہؔ سنٛدؠ سٲری احکام مٲنیٚو یمہٕ بہٕ توٚہہِ دِوان چُھس۔ 3توٚہہِ وچُھو زِ یہُوواہنؔ کیاہ کوٚر بعلؔ فغُورسؔ منٛز۔ تٔمؠ کٔرؠ تِم سٲری لوٗکھ تباہ یمہٕ تتہِ بعلؔ دیوتا سنٛز عبادت کران ٲسؠ، 4مگر توٚہؠ سٲری یمہٕ پزِدلہٕ سٲنِس خدا یہُوواہؔ سنٛز عبادت کران ٲسؠ چُھو از تہِ زنٛدٕ۔5یاد تھٲیو زِ مےٚ ہیٚچھنٲیو توٚہؠ تمام اصول تہٕ ضٲبطٕ یتھٕ کنؠ سٲنؠ خدا یہُوواہنؔ مےٚ کرُن ونمُت چُھ۔ سُہ چُھ یژھان زِ ییٚلہِ توٚہؠ یتھ ملکس منٛز روزیٚو یتھ منٛز توٚہؠ دٲخل سپدِتھ قبضہٕ کرن وٲلؠ چُھو، توٚہؠ کٔریٚو تمؠ سنٛز عبادت۔6وفادٲری سان کٔریٚو تمؠ سنٛز فرمانبردٲری، اگر توٚہؠ تہِ کٔریٚو، توٚہؠ ہٲیو باقی قومن زِ توٚہؠ چُھو سٮ۪ٹھاہ عقلمند۔ ییٚلہ تِم یِمن سارنےٕ قانونن متعلق بوزن تہٕ تِم ونن، "امہِ عظیم اسرائیلی قومٕکؠ لوٗکھ چھِ یقینن سٮ۪ٹھاہ عقلمنٛد"7یوٚدوے بیٚیہِ تہٕ کانٛہہ قوم عظیم آسہ مگر توتہِ آسہ نہٕ تِمن منٛز تیٚوتھ کانٛہہ خدا یُس تِمن تیوت قریب آسہ یوٗتاہ یہُوواہؔ سون خدا اسہِ چُھ! 8بیٚیہِ چُھنہٕ دویم کانٛہہ تہِ قوم چاہے سُہ کوتاہ تہِ بوٚڈ قوم ٲسؠ تن، یِمن نِش تِتھؠ قانون آسن یمہٕ بہٕ توٚہہِ از ونان چُھسو۔9مگر توٚہؠ روزیٚو سٮ۪ٹھاہ ہُشار! یہ کینٛژھا توٚہہِ خدا کران وُچھوون تِمہ مٔشرٲیو۔ یۅتام توٚہؠ زنٛدٕ چُھو یمہٕ کتھٕ تھٲوؠ زیٚو یاد۔ یمہٕ ؤنؠ زیٚو پننٮ۪ن شُرٮ۪ن تہٕ زُریٚن۔ 10تِمن ؤنؠ زیٚو تتھ دوٚہس متعلق ییٚلہِ تُہنٛدؠ جدٕاجداد کوہہِ سیناؔ ہس پٮ۪ٹھ سٲنِس خدا یہُوواہسؔ برُونٛہہ کنہِ کھڑا ٲسؠ۔ ییٚلہ تٔمؠ مےٚ ووٚن، لوٗکھ کرُکھ جمع تاکہِ تِم بوزن بہٕ کیاہ چُھس ونان۔ بہٕ چُھس یژھان زِ یۅتام تِمہ زنٛدٕ چھِ تِم ہیٚچھن مےٚ عزت تہٕ احترام کرُن، بہٕ چُھس یژھان زِ تِم ہیٚچھناون پننٮ۪ن بچن تہِ یہ کرُن۔"11پننٮ۪ن بچن ؤنیٚو زِ تُہنٛدؠ جدٕاجداد آے بالہٕ دامنس نکھٕ، ییٚلہِ سینا پہاڑس آسمانس تام نارٕ بُڈک وۅتھان ٲسؠ تہٕ پہاڑ آے کریہنہِ ابرٕ تہٕ کریہنہِ دوٚہہ سٟتؠ ولنہٕ۔ 12پتہٕ کٔر یہُوواہنؔ نارٕ منٛزؠ تُہنٛدین جدٕاجدادن سٟتؠ کتھ۔ تُہنٛدیٚو جدٕاجدادو وُچھ سُہ کتھ کران، مگر تِمو وُچھ نہٕ سُہ۔ تِمو بوز صرف تمؠ سنٛز کتھ۔13تہٕ تِمو کوٚر تِمن سٟتؠ پننہِ وعدُک اعلان زِ سُہ چُھ یژھان تِم تہِ کرن عبادت۔ تِمو ؤنؠ تِمن داہ احکام۔ تِمو لیکھؠ تِم کنٮ۪ن ہنٛزن دوٚن تختی ین پٮ۪ٹھ۔14یہُوواہنؔ دیُت مےٚ حکم زِ بہٕ ہیٚچھِ ناوو توٚہؠ تمام قواعد تہٕ ضوابط تاکہِ یتھ ملکس منٛز توٚہؠ دٲخل سپدن تہٕ قبضہٕ کرن وٲلؠ چُھو تتہِ کٔریٚو توٚہؠ تِہنٛز عبادت۔15یمہِ دوٚہہ یہُوواہنؔ کوہہِ سیناؔ ہس پٮ۪ٹھ تُہنٛدین جدٕاجدادن سٟتؠ کتھ کٔر تِمو وُچھ نہٕ سُہ۔ لہٰذا روزیٚو ہُشار! 16پننہِ خٲطرٕ کانٛہہ مورتی گٔرِتھ مہٕ کٔریٚو گناہ! تیٚوتھ کانٛہہ چیز مہٕ بنٲیو یتھ کٲنٛسہِ انسانس سٟتؠ مُشابِہت سپدِ چاہے زنؠ ٲسؠ تن یا مرٕد،17یا یُس کٲنٛسہِ جانورس یا جاناوارس سٟتؠ مُشابِہت تھاوِ،18یا کٲنٛسہِ کھکھرٮ۪ل جانورس یا گاڈِ سٟتؠ مُشابِہت تھاوِ۔19تہٕ حسہٕ رُوزؠ زیٚو یُتھنہٕ آسمانس کُن وچُھو تہٕ کینٛژھا توٚہؠ تتہِ وچھان چُھو ینہٕ تمچہِ پرستِش کرنٕچہِ ازمٲیشہ منٛز پیٚیو یعنی افتاب، زوٗن یا تارک۔ سٲنؠ خدا یہُوواہنؔ تھاوؠ تِمہٕ پرٮ۪تھ جایہ لوٗکن ہنٛدِ مدٕتہٕ باپتھ، مگر توٚہؠ مہٕ کٔریٚو تِہنٛز عبادت۔20یہُوواہنؔ أنؠ تُہنٛدؠ جدٕاجداد مِصرٕ منٛزٕ کٔڈِتھ یمہٕ تتہِ دزٕونہِ نارِ گجہِ ہنٛدؠ پٲٹھؠ دُکھ ویٚتران ٲسؠ تاکہ تِم بنہٕ ہن تمسنٛدؠ لوٗکھ، یتھ کنؠ از توٚہؠ چُھو۔ 21مگر یہُوواہؔ گو مےٚ ناراض تُہنٛدیٚو جد اجدادن ہنٛدِ ورتاوٕ کِنؠ تہٕ تٔمؠ کوٚر وعدہ زِ بہٕ گژھٕ نہٕ اتھ ملکس منٛز زانٛہہ یُس سُہ توٚہہِ دِوان چُھ۔ 22تِمو کھیٚو قسم زِ بہٕ مرٕ یتھؠ ملکس منٛز تہٕ یردن دریاوٕ ترنہٕ زانٛہہ تہِ اپور۔ مگر توٚہؠ تٔریٚو اتھ اپور، تہٕ توٚہؠ کٔریٚو اتھ زمیٖنس پٮ۪ٹھ قبضہٕ۔23یقین تھاوؠ زیٚو تہٕ عہد مٔشرٲوؠ زیٚو نہٕ یُس یہُوواہؔ سون خداوند توٚہہِ سٟتؠ کران چُھ تہٕ یِمو چیزو نشہٕ تِمو منع فرموو تِمن چیزن ہنٛزٕ شکلہٕ بنٲوِتھ مہ کٔرؠ ووکھ نقشہٕ نگار۔24توٚہہِ پزیٚو نہٕ یہ کرُن تکیازِ یہُوواہؔ تُہنٛد خدا چُھ یژھان زِ پرٮ۪تھ کانٛہہ کرِ تمؠ سنٛز عبادت۔ سُہ کرِ پرٮ۪تھ کٲنٛسہِ تمِس شخصس تباہ یُس پۅتلن آسہ عبادت کران۔ 25ییٚلہ توٚہؠ واریہس وقتس کنعان شہرس منٛز روزِتھ چُھو تہٕ توٚہہِ چھِ اولاد تہِ تہٕ زُرؠ تہِ تہٕ کُنہِ تہِ چیزُک عکس بنٲوِتھ تہٕ تتھ مورتی گٔرِتھ مہٕ کٔریٚو گناہ۔ تکیازِ یہُوواہؔ چُھ فرماوان زِ یہ چُھ غلط، اگر توٚہؠ یہ کران چُھو تہٕ توٚہؠ چھون سُہ ناراض کران تہٕ پانس باپتھ سزا ہیٚوان۔26از چُھس بہٕ پرٮ۪تھ أکِس یُس آسمانس پٮ۪ٹھ چُھ تہٕ پرٮ۪تھ أکِس یُس زمیٖنس پٮ۪ٹھ چُھ التجا کران زِ وُچُھو توٚہؠ کیاہ چُھو کران۔ اگر توٚہؠ میانؠ نافرمٲنی کران چُھو تہٕ سُہ وق آسہ نہٕ دوٗر ییٚلہ نہٕ توٚہؠ یتھ ملکس منٛز مٔریٚو یوٚت توٚہؠ یردن دریاو پار کٔرِتھ وٲتیٚو۔ توٚہؠ روزیٚو نہٕ تتہِ زیادس کالس۔ تہٕ یہُوواہؔ کرِ توٚہہِ منٛزٕ واریہن لوٗکن مکمل پٲٹھؠ نابود۔27تہٕ توٚہہِ منٛزٕ باقی لوٗکن کرِ یہُوواہؔ مجبوٗر زِ توٚہؠ گٔژھیٚو تہٕ بٔسیٚو باقی قومہٕ کٮ۪ن لوٗکن سٟتؠ۔ توٚہہِ منٛزٕ بچن کٔژتام نفرےٕ۔28ییٚلہ، توٚہؠ تِمن ملکن منٛز ٲسیٚو تہٕ توٚہؠ کٔریٚو تِمن دیوتاہن ہنٛز پوٗزا یمہٕ لکٕرِ تہٕ کنٮ۪ن ہنٛدؠ بنیمٕتؠ آسن، انسانن ہنٛدؠ بنٲومٕتؠ دیوتا، تِم دیوتا یِم نہ وُچِھتھ ہیٚکن تہٕ نہ بوزِتھ ہیٚکن، یِم نہ کینٛہہ کھیٚتھ ہیٚکن تہٕ نہ کُنہِ مُشِک ہیٚتھ ہیٚکن۔29مگر ییٚلہ توٚہؠ تتہِ ٲسیٚو تہٕ توٚہؠ کٔرؠ زیٚو یہُوواہؔ پنُن خدا زاننٕچ کوشش تہٕ اگر دِلہ سان توٚہؠ سُہ ژھانٛڈنٕچ کوشش کٔریٚو تہٕ سُہ دِیو توٚہہِ جواب۔30آینٛدٕ ییٚلہِ توٚہہِ سٟتؠ بدسلوکی کرنہٕ ییہِ تہٕ تِم سارے بُراییہِ توٚہہِ سٟتؠ ورتاونہٕ ین تہٕ توٚہؠ کٔرؠ زیٚو پتہٕ تہِ صرِف یہُوواہؔ سنٛز عبادت تہٕ تمؠ سنٛز عبادت۔31یہُوواہؔ چُھ خدا یُس رحم کرن وول چُھ۔ اگر توٚہؠ تمؠ سنٛز فرمانبرداری جٲری تھایو تہٕ سُہ تراوِ نہٕ توٚہہ، پتھر نہ کرِ توٚہہِ تباہ، تہٕ نہ گژھیس سُہ وعدہ مٔشِتھ یُس تٔمؠ تُہنٛدین جدٕاجدادن سٟتؠ کوٚرمُت چُھ۔32"وۅنؠ سونٛچو پتھ کالس متعلق، تُہنٛدِ زیٚنہٕ برونٛہہ مِس وقتس متعلق، تتھ وقتس متعلق ییٚلہِ خداین گۅڈنِچہِ لٹہِ یتھ زمیٖنس پٮ۪ٹھ لوٗکھ پٲدٕ کٔرؠ۔ توٚہؠ ہکیٚو پرٮ۪تھ جایہ، آسمانس تہٕ زمیٖنس منٛز تلاش کٔرِتھ۔ کیاہ کُنہ ساعتہٕ ہیٚوکا تیٚوتھ کینٛہہ سپدِتھ یُس تیوٗت بوٚڈ آسہ یوٗتاہ زن یہُوواہنؔ اسہِ اسرائیل ین باپتھ کوٚر؟33کیاہ کنہِ ساعتہٕ ہیٚچا کانٛہہ جماتھ زنٛدٕ روزِتھ ییٚلہِ تِمو کانٛہہ خدا نارٕ منٛزؠ تِمن سٟتؠ کتھ کران وُچھ یتھ کنؠ زن اسہِ کوٚر؟ 34پٔزؠ پٲٹھؠ کٔرنہٕ خداین زانٛہہ تہِ کُنہِ قومہٕ منٛزٕ لوٗکن ہنٛز اکھ بٔڈ جماتھ دویمہ جایہِ ننٕچ کوشش، یتھٕ پٲٹھؠ زن تٕمؠ أسؠ مِصرٕ منٛزٕ کڈنہٕ وزِ کوٚر۔ اسہِ وُچھ زِ سٲنؠ خدا یہُوواہنؔ کوٚر پنُن عظیم طاقت استعمال کٔرِتھ اسہِ واشگاف زِ سُہ کُس چُھ، طاعون سوزِتھ، تہٕ واریاہ باقی کامہِ کٔرِتھ یمو سٟتؠ لُکہ خوفزدٕ سپٕدؠ، تہٕ ییٚلہِ مِصرٕکؠ فوجن اسہِ پٮ۪ٹھ حملہٕ کرنٕچ کوشِش کٔر تہٕ تِمو کتھٕ کنؠ بچٲوؠ أسؠ۔35یہُوواہنؔ ونہِ توٚہہ یمہٕ سارے کتھٕ اوٕ کِنؠ زِ توٚہؠ زٲنیٚو زِ سُے چُھ پوٚز خدا، تہٕ تمِس بغٲر چُھنہٕ بیٚیہِ کانٛہہ خدا۔36تِمو دیُت تُہنٛدین جدٕاجدادن آسمانہٕ پٮ۪ٹھٕ پنٕنؠ کتھ بوزنُک اجازت تاکہِ سُہ کرِ تِہنٛز تربیت۔ یتھ زمینس پٮ۪ٹھ دیُت تٔمؠ تِمن کوہہِ سیناہس پٮ۪ٹھ پنُن عظمتہٕ وول نار وُچھنُک اجازت، تہٕ تِمو کٔر نارٕ منٛزؠ تِمن سٟتؠ کتھ۔37چونکہ سُہ اوس سانٮ۪ن جدٕاجدادن سٟتؠ محبت کران، تٔمؠ ژٲریٚو توٚہؠ اسرائیلی یمہٕ تِہنٛدِوےٕ اولادو منٛزٕ چھِ تہٕ پننہِ بڈِ طاقتہٕ سٟتؠ أنِن تُہنٛدؠ جدٕاجداد مِصرٕ منٛزٕ نٮ۪بر کٔڈِتھ۔38ییٚلہ تِم سفر کران ٲسؠ تہٕ تِمو کٔڈؠ تتہِ تمہِ قومٕکؠ لوٗکھ یمہٕ تِہنٛدِ کھۅتہٕ بٔڈؠ تہٕ طاقتور ٲسؠ تاکہِ تِم کرٕہن تہنٛزِ سرِزمینہِ پٮ۪ٹھ قبضہٕ یُتھ سۅ تُہنٛز بنہِ ہے، یہ وۅنؠ سپدان چُھ۔39تہٕ وۅنؠ پزِ توٚہہِ اتھ حقیقتس سنُن زِ یہُوواہؔ چُھ خدا تہٕ سُہ چُھ آسمانس تہٕ زمینس پٮ۪ٹھ حکومت کران تہٕ تمِس بغٲر چُھنہٕ بیٚیہِ کانٛہہ خدا۔ 40تِمن سارنی اصولن تہٕ ضٲبطن پٮ۪ٹھ کٔریٚو عمل یمہٕ بہٕ توٚہہِ از دِوان چُھسو تاکہِ توٚہہِ تُہنٛدین اولادن باپتھ روزِ بہتر تہٕ توٚہؠ روزیٚو یتھ ملکس منٛز واریہس کالس زنٛدٕ یُس سون خدا یہُوواہؔ توٚہہ دِوان چُھ، تکیازِ یہ چُھ ہمیشہٕ باپتھ تُہنٛد۔"41پتہٕ کوٚر موسیٰؔ ہن تریٚن شہرن ہُنٛد انتخاب یمہٕ یردن دریاوس مشرقہٕ انٛدٕ ٲسؠ۔42اگر کٲنٛسہِ وشفن کانٛہہ دویِم شخص مور یُس نہٕ گۅڈٕ تمسُنٛد دشمن اوس، تہٕ سُہ ہیٚکہِ تِمو شہرو منٛزٕ کُنہِ تہِ شہرس منٛز ژٔلِتھ۔ سُہ ہیٚکہِ تِمو شہرو منٛزٕ کُنہِ أکِس جایہ محفوظ روزِتھ تکیازِ تتِکؠ لوٗکھ کرن تس حفاظت۔43روبن سنٛدِ قبیلہٕ باپتھ کوٚر موسیٰؔ ہن بیابانن منٛز بصرؔ شہرُک انتخاب۔ جد سنٛدِ قبیلہٕ باپتھ کوٚرُن جلعاد علاقہٕ کِس راموتؔ شہرُک انتخاب۔ منسیؔ قبیلہٕ باپتھ کوٚر موسیٰؔ ہن بسنؔ علاقس منٛز جولانؔ شہرُک انتخاب:44موسیٰؔ ہن دِتؠ بنی اسرائیل ین خدایہ سنٛدؠ احکام۔45تِمن ٲسؠ تِم سٲری پۅختہٕ احکام، ہِدایات تہٕ قانون شٲمل یمہٕ موسیٰؔ ہن اسرائیل کٮ۪ن لوٗکن مِصرٕ منٛزٕ نیرنہٕ پتہٕ ؤنؠ،46ییٚلہ تِم یردن دریاوس مشرقہٕ انٛدٕچہِ وادی منٛز ٲسؠ۔ تِم ٲسؠ بیت فعورؔ شہرٕ کِس اپٲرؠ مِس ملکس منٛز یتہِ گۅڈٕ عمور قومہٕ کِس بادشاہ سیحون سنٛز حکومت ٲس، یُس حسبونس منٛز روزان اوس۔ موسیٰؔ ہن تہٕ باقی اسرائیلی لوٗکن ہنٛدؠ فوجن دیُت تِمن شِکس ییٚلہِ تِم مِصرٕ منٛزٕ دراے۔47تِمو کوٚر سیحونؔ سنٛزِ زمیٖنہٕ تہٕ تتھ ملکس پٮ۪ٹھ قبضہٕ یتھ پٮ۪ٹھ بسنؔ علاقک بادشاہ عوج حکومت کران اوس۔ یِم ٲسؠ تِم زٕ بادشاہ یمو یردن دریاو کِس مشرِقس منٛز واقع عمور لوٗکن ہنٛزِ جمٲژ پٮ۪ٹھ حکومت کٔر۔48تِہنٛز زمیٖن ٲس جنوب کِنؠ عروعیرؔ شہرٕ پٮ۪ٹھٕ ارنونؔ دریاوس تام شمال کِنؠ کوہہِ سیرونس تام پھٲلِتھ یتھ اکثر لوٗکھ کوہہِ حرمون ونان ٲسؠ۔49اتھ منٛز اوس دریاے یردنچہ وادی ہُنٛد مشرقی مٲدانُک سورےٕ علاقہٕ شٲمل، یُس عربہؔ سمندری علاقس تام یتھ بحیرہ مراد تہِ ونان ٲسؠ تہٕ مشرقہٕ کِنؠ پِسگہؔ کوہہ کِس پاتھلِس تام پھٲلِتھ اوس۔
Bridge Connectivity Solutions Pvt. Ltd.