阅读DANIEL 1

DANIEL1

Babilon kya Israel Ccangvae Lu Pali

¹Jehoiakim nynh Judah siapharan lang a tangnaw kumthumnaw kum khe Babilon siapharan Nebukhadnezzar nynh Jerusalem lang yn thua zah a koihlu.²Bawipaw nynh Nebukhadnezzar tuh Judah siapharan Jehoiakim kha kyngsah zah, Pachia inn kya-e uccaw abang kha a lawsah. Tuh-e uccaw hae tuh Shinar ram lang cciakhae zah, a pachia hae inn kya sisua nungnaw khaan kyakhe a nung.

³Te siapharan nynh a inn kya-e bawi Ashpenaz kha kawpya zah, kyng athua hae paw Israel hae kya-e siapharan phuin te sawtuanaw a ccoupaw phuin lungkhu e,⁴a pyn ccaenaw um leipaw te a puithyapaw, a hawpaw, nythyanaw te tuathyanaw a hoipaw, siapharan inn kya rya a lahthya cih paw ccangvae hae kha potua hae; minmin nynh Khaldi hae ccaw te bya kha ccangkuh hae sah.⁵Nin takyh a ae lan hae paw looh te a nia lan hae paw misutui tuh siapharan nynh a aepaw kya-e athua cih, cite siapharan nynh a ci. Kum thum lungkhu a ccangkuh cih hae zah, tuh-e ccyh athang te, siapharan inn kya rya a lah cih hae.⁶Tuh-e hae kyakhe Judah phin kya-e Daniel, Hananiah, Mishael te Azariah tuh a umbua hae.⁷Siapharan inn kya-e bawi nynh ccangpaw min kha phuthui hae zah: Daniel kha Belteshazzar, Hananiah kha Shadrak, Mishael kha Meshak, Azariah kha Abednego cite a phu hae.

⁸Daniel nynh siapharan inn e looh te misutui khate amaw toulou kha thusaku lei lante a tuaku; tukeiccuze amaw toulou kha a thusaku khyh nawlan siapharan inn e bawi kha a ngiaku.⁹Pachia nynh siapharan inn e bawi kha Daniel tungvaw thawccinaw te ngaethyaumsahnaw a hoisah.¹⁰Siapharan inn e bawi nynh Daniel kha, “Ka bawipaw siapharan kha ka rih; aning nynh looh te misutui kha ae paccynpya oh. Nae kum alokuhpaw ccangvae hae laeze na ngethyapaw kha a muih zetuh, siapharan nynh ka lu yn zo vae cih,” a cipya.¹¹Tetuh Daniel nynh amaw, Hananiah, Mishael te Azariah tungvaw do-oihtu lang cite siapharan inn e bawi nynh a khangpaw ccungccaw rintu kha ngia zah:¹²Nin haw lungkhu kaening hynh oun syntawtua oh. Ae lanpaw enaw-rohnaw te nia lanpaw tui kyalya kha beih oun pyatua oh.¹³Siapharan inn e tui te looh a ae hae paw ccangvae hae mae te kae mae hynh oun dokhia tua lah, nae muihnaw thyhte kae tungvaw oun cyitua, a cipya.¹⁴Tukeiccuze ccungccaw rintu nynh tuh-e bya tuh a nawccah zah, nin haw lungkhu a syntawtua hae.¹⁵Nin haw accing nin khe he a do hae tuh, siapharan inn e looh a ae hae paw ccangvae hae balyn laeze mih ngesaw hoyhua zah a thohua lante a lang hae.¹⁶Tukeiccuze ccungccaw rintu nynh siapharan inn e mih looh te a nia lan hae paw misutui kha ccaring lah zah, enaw-rohnaw kha a pya hae.¹⁷Pachia nynh khah-e lu pali hae kha nynaw, ccaw lante thyanaw te hawnaw kha a pya hae; Daniel mah vizin te maan balyn kha leihthyanaw akhupaw nynaw a hoi.

¹⁸Siapharan inn lungkhu lang teekhae lan cite khyapaw accyh he accing te, siapharan inn e bawi Ashpenaz nynh minmin kha Nebukhadnezzar malang thuakhae hae zah,¹⁹siapharan nynh bya a hokhae hae. Mih balyn laku kyaze Daniel, Hananiah, Mishael, Azariah te khinkhia lanpaw lu kheit sanmah um khyh hae; tukeiccuze minmin tuh siapharan inn kya ryalahtu lang khang athua hae.²⁰Siapharan nynh a khia hae paw hawnaw bya te nythyanaw bya miakaw kyakhe minmin tuh a ram pynpi kya umpaw mitleihthya hae paw te beidinhothya hae paw balyn laeze leit haw a thyahua hae paw kha a muih.²¹Te Sairas Siapharan nynh siapharan lang a tangnaw kum kheitnaw kyacia Daniel tuh tuin kya po a um. Nebukhadnezzar Maan

¹Nebukhadnezzar nynh siapharan lang a tangnaw kum ningnaw kum khe maan ccangkheit sah zah, a lungvaw a sawsah keiccuze ih kho khyh.²Tukeiccuze siapharan nynh mitleihthya hae paw, beidinhothya hae paw, naawthya hae paw te Khaldi hae kha a maan leih lan pum khylan kaw a pya hae. Minmin tuh oun thua hae zah siapharan malang he a thadyn hae te,³siapharan nynh minmin kha, “Maan ccangkheit ka sah zah, tuh-e maan asuilan ka ny ry keiccuze ka lungvawsaw,” a cipya hae.⁴Khaldi hae nynh siapharan kha Aramaik bya te khung hae zah, “Pou siapharan, na hiinshe sae vae sah! Na maan kha kaening oun hopah lah, kae leihpah cih,” a cipya hae.⁵Siapharan nynh Khaldi hae kyakhe, “E hynh kaw ka thopaw nynh thua: ka maan te ka maan asuilan kha nae leihpya khyh oh ze, nae kuih nae ccu kha pae athua cih zah, nae inn tuh aronahpaw apumkuhpaw lang a tang cih.⁶Thuasalama ka maan te ka maan asuilan kha nae leihpya kho oh ze, lasung, nae ryalaw mee te alesaepaw sawtuanaw kha kae pya cih oh. Tukeiccuze ka maan te ka maan asuilan kha yn hopya tua oh,” a cipya hae.⁷Minmin nynh, “Siapharan nynh na maan kha masaty kaening oun hopah lah, na maan kha kae leihpah kho cih,” cite vae ningnaw bya a khung hae.⁸Siapharan nynh, “Tynkaring lan kaw ka tho vae paw kha na ny oh keiccuze, accyh khaw cia rosah lanpaw kha na zuaku oh cipaw ccaerarih lan ka ny:⁹Maan kha nae hopya khyh oh ze, nae hanlan detahnaw a um cih. Ccyh arulaeku mawlaezung hynbya hopya lan cite naemaw laku kya nawccawnaw na hoi vae oh. Tukeiccuze maan kha yn hopya tua oh, tetuh maan asuilan nae leihpya kho oh paw kha ka nyh cih,” a cipya hae.¹⁰Khaldi hae nynh siapharan kha, “Siapharan nynh ny na rypaw hynh ae hopah khopaw tuh laephi vawlan lu kheit san um khyh! Alesaepaw te athungpaw siapharan humhung nynh mah mitleihthyapaw, beidin hothyapaw te Khaldi hae kha hynhcihawpaw bya hynh khia boi khyh hae.¹¹Siapharan nynh na khiapaw bya hynh myaryamaw aru, achih khopaw ccungccaw hae kya a umbua leipaw pachia hae holeite tuh, humhung nynh mah ae hopah kho lan khyh,” a cipya hae.

¹²E bya keiccuze siapharan tuh a bung phe paw zah, Babilon khua umpaw mihaw hae balyn kha chia lan kaw a tho.¹³Kaw kha tho thua vae zah, mihaw hae kha chianaw anae vae; te Daniel te a ban hae kha chia khylan a ccung hae.¹⁴Siapharan a rintu bawi Ariok tuh Babilon mihaw hae kha chia khylan he a pou tuh, Daniel nynh raeringkute hawnaw bya khate siapharan inn e bawi, Ariok kha hopah zah,¹⁵“Pawccemou siapharan nynh hynhcih baban arang lante kaw a tho?” cite a khia. Ariok nynh khah-e konglang kha Daniel kya ccaerarih lan a hopya.¹⁶Tukeiccuze Daniel nynh siapharan kalan cceih zah, maan asuilan leihpya khylan, siapharan nynh accyh a pya nawlan a ngiaku. Pachia nynh Nebukhadnezzar Maan A Leih

¹⁷Te Daniel tuh a inn lang cceih zah, a ban hae, Hananiah, Mishael te Azariah kha a hopya hae,¹⁸amaw Daniel te a ban hae te Babilon ram e tuhlaepaw mihaw hae tuh chia athua khyh nawlan hae, e byakhupaw konglang hynh vaawlang e Pachia kalan thawccinaw ngia khylan a hopya hae.¹⁹Tetuh byakhupaw tuh khuazi vizin kyakhe Daniel kya phy athua vae, te Daniel nynh vaawlang e Pachia kha the a hoysah.²⁰Daniel nynh ho zah:“Hawnaw te thungnaw tuhamaw kya-e athua keiccuzePachia min tuh she kheit kouteshe kheit thehoyte umsah.²¹Aning nynh accyh tekumvaelori kha a rulae,siapharan hae khasahbung hae zah a hangthung hae;mihaw hae kha hawnaw pya hae zah,nythyanaw a hoi hae paw khanynaw a pya hae.²²Akhupaw te thuruhpawuccaw hae kha a langsaku;mohnaw kya a umpawmiakaw kha nyh zah,awnaw tuh amaw kya a um.²³Pou ka minpaaw hae Pachia,na tungvaw lungtuabya hote,kae thehoysah,pawccecize hawnaw tethungnaw kha nae pya vae,kaening nynh kae ngiapaw khaatu ka kya nae phypya vae,siapharan nynh kaw oun pyapaw khakaening kalan nae phypya vae,” a ci.Daniel nynh Maan A Leih

²⁴Tukeiccuze Daniel tuh Babilon mihaw hae kha chia lan siapharan nynh rya a pyapaw Ariok kalan cceih zah, “Babilon mihaw hae kha theih nan hae; kae hynh siapharan malang yn thuakhae lah, a maan kha ka leihpah cih,” a cipya.

²⁵Tetuh Ariok nynh Daniel kha siapharan malang khe arangte thuakhae zah: “Na maan ae leihpah kho cih paw lu kheit kha kyngpaw Judah hae laku kya ka muih vae,” a cipya.²⁶Siapharan nynh a min Belteshazzar cikuhpaw Daniel kha, “Maan ka sahpaw te ka maan asuilan kha nae leihpah kho cih tou?” a cipya.²⁷Daniel nynh siapharan kha, “Siapharan nynh na khiapaw byakhupaw hynh asuilan ae hopah khopaw ahawpaw ccungccaw, beidinhothyanaw, mitleihthyapaw, apawepaw lu kheit san um khyh,²⁸thuasalama byakhupaw asuilan ae hopah khopaw Pachia lu kheit tuh vaawlang khua kya a um, aning nynh nyathya nin kya yn cyihkuh lanpaw kha namaw Nebukhadnezzar siapharan kya ae hopya vae. Na i lya-e na maan te vizin na muih hae paw kha hynh-e hae nynh athua:²⁹Pou siapharan, na i lyakhe malang yn cyihkuh lanpaw kha maan na sah; byakhupaw ae leihpahpaw Pachia nynh malang yn cyihkuh lanpaw kha na kya ae langsahpyaku.³⁰Thuasalama ccangpaw ahysuepaw laeze hawnaw ka hoi keiccuze, e byakhupaw hynh Pachia nynh ka kya a langsahkupaw thua khyh, thuasalama siapharan nynh na maan asuilan kha na ny kho nawlan te na lung kya yn thungkuhpaw tuanaw kha na thaethya kho nawlan nynh thua.

³¹“Pou siapharan, ngawran na do zah, myarya lepaw zohtuh kha na muih. E zohtuh tuh myaryamaw ale, phaephae aw zah huatawpaw thua khyh; na malang khe thadyn zah a muinsan tuh ri lan a um.³²Tuh-e zohtuh a lu tuh sui ccipaw thua zah, a by te a kuihbaw hae tuh ngun nynh thua, a vue te a phae tuh sohin thua zah,³³a ccu tuh sivaw nynh thua, a ccuphe abang tuh sivaw thua zah, abang tuh anglae nynh thua.³⁴Na do lyakhe ccungccaw kuih te cyithui athua leipaw lungtungpi ccangkheit tuh amaw pou lan yn pou zah sivaw te anglae khate raekuhpaw a ccu kha deih zah zoihtatyh lan phe koi.³⁵Te sivaw, anglae, sohin, ngun te sui tuh zoihtatyh lan marya a koi hae, te hawnin ccyh lyaze huimin kya-e asipaw hawte thua hae zah, khisan nynh muih lan a um lei lan ciate ccaring a mung hae. Thuasalama zohtuh a deihpaw lungtungpi tuh myarya lepaw mua lang tang zah laephi pynpi kya phe abeih.

³⁶“E hynh na maan nynh thua; atu na maan kha kae leihpah cih.³⁷Pou siapharan, nang tuh siapharan hae siapharan nynh na thua, vaawlang e Pachia nynh peenaw, huhan, thungnaw te phu-enaw kha ae pya,³⁸mih umnaw raveih um hae paw ccungccaw hae thuasah, sarangpaw hae thuasah, vaawlang e pavaw hae thuasah na kuih kya ae pya zah, minmin balyn kha a uktu lante ae rae vae, nang tuh zohtuh kya-e sui lu nynh na thua.³⁹Namaw koute nang laeze anyaa huapaw ccangpaw peenaw ccangkheit yn langkuh cih, te laephi pynpi a uk cih paw ccangthumnaw peenaw athuapaw sohin peenaw tuh yn langkuh cih.⁴⁰Te ccangpalinaw peenaw tuh yn um cih zah sivaw hawte a thawsae cih; sivaw nynh atyn-are balyn kha a koi a khya hawte, tuh-e peenaw nynh e hae balyn kha a koi a khya cih hae.⁴¹Zohtuh a ccu te a ccudung hae tuh anglae abang, sivaw abang athuapaw kha na muih thyhte, aphiakuhpaw peenaw athua cih; thuasalama sivaw te anglae apykuhpaw kha na muih thyhte, sivaw thawzung abang tuh tuh-e peenaw kya a um cih.⁴²A ccudung hae tuh sivaw abang, anglae abang athua thyhte, tuh-e peenaw tuh thungnaw a hoi zemah koi azoi cih.⁴³Sivaw te anglae apykuh hae paw kha na muih thyhte, minmin tuh lu kheit te lu kheit zuvaw lang a tang cih hae, thuasalama sivaw tuh anglae te apykuthya khyh hawte, pynkheihlan umkheihthya lan khyh hae.⁴⁴Tuh-e siapharan hae she kyakhe papin aroh kho leipaw peenaw ccangkheit kha vaawlang e Pachia nynh a rae cih zah, tuh-e peenaw tuh mingccang hae kuih kya thua lan khyh. Kuih te cyi keiccu thua leite lungtungpi tuh mua kyate poh yn khohkuh zah, sivaw, sohin, anglae, ngun te sui hae a deihpaw kha na muih thyhte,⁴⁵tuh-e peenaw nynh e peenaw hae balyn hynh a roh cih hae zah a thangsah cih hae, te tuh-e peenaw tuh zungzae atyn cih. Alesaepaw Pachia nynh malang yn cyihkuh lanpaw kha siapharan namaw kya ae hopya vae. Maan na sahpaw ccaccing kha kae hopya vae, na maan asuilan kha kae leihpya vae,” a cipya. Daniel te A Ban hae Hangthungnaw

⁴⁶Tetuh Siapharan Nebukhadnezzar nynh a mae tebing zah Daniel kha a beik, te ccathae silawnaw te mynkhuhpaw kha Daniel kalan pya lan kaw a pya hae.⁴⁷Siapharan nynh Daniel kha, “Thanccingte, na Pachia tuh pachia hae Pachia, siapharan hae Bawipaw, byakhupaw suilan kha a phy khopaw nynh thua, pawccecize nang nynh e byakhupaw suilan kha na phy kho vae!” a cipya.⁴⁸Te siapharan nynh Daniel kha a rya kaesah zah aphutepaw lasung patae a pya, Babilon ram pynpi uktu lang nung zah, Babilon mihaw hae balyn kya lupi lang a nung.⁴⁹Daniel nynh a ngia liate siapharan nynh Shadrak, Meshak te Abednego kha Babilon ram kya ryalaw synriatu lang a nung hae. Daniel tuh siapharan inn kya a um. Sui Zohtuh

¹Nebukhadnezzar siapharan nynh sui zohtuh ccangkheit, ahangpaw dong sung taruh, akopaw dong taruh acihpaw kha rae zah, Babilon ram Dura bialae kya a thadynsah.²Te mangki hae, zipe hae, vuethoh hae, tuanaw pyatu hae, phua ccytu hae, byapiatu hae, upadi thya hae paw te ram lungkhu e bawi hae balyn kha Nebukhadnezzar nynh a thadynsahpaw zohtuh kha apnaw rae khylan sueluaku lan kaw a pya hae.³Tukeiccuze mangki hae, zipe hae, vuethoh hae, tuanaw pyatu hae, phua ccytu hae, byapiatu hae, upadi thya hae paw te ram lungkhu e bawi hae balyn tuh Nebukhadnezzar siapharan nynh a thadynsahpaw zohtuh kha apnaw rae khylan a sueluakuh hae. Nebukhadnezzar nynh a thadynsahpaw zohtuh malang khe he a thadyn hae tuh,⁴bya thaesahtu nynh thawte sia zah, “Pou bya aphuinphuin a ho hae paw minphuin hae,⁵nanning nynh mungkae, phyly, tintang, lanchi, tyng, daw te khuakupaw aphuinphuin roi kha he na thae oh te, Nebukhadnezzar nynh a thadynsahpaw sui zohtuh kha bakhungnuate na beik cih oh.⁶Bakhungnuate a beik leipaw tuh humhung zemah arua cciamangpaw maeephupi lungkhu lang palou vua athua cih, cite kawpya na thua oh,” a ci.⁷Tukeiccuze ccungccaw balyn nynh mungkae, phyly, tintang, dakhin, daram te khuakupaw aphuinphuin roi kha he a thae takaw hae te, bya aphuinphuin a ho hae paw minphuin hae nynh bakhung hae zah, Nebukhadnezzar siapharan nynh a thadynsahpaw sui zohtuh kha a beik hae.

⁸Tuh ccyh lyatuin Khaldi hae nynh oun cceih hae zah, Judah hae kha sei a be hae.⁹Minmin nynh Nebukhadnezzar kha, “Pou siapharan, na hiinshe sae vae sah!¹⁰Pou siapharan, nang nynh kaw na tho zah, mungkae, phyly, tintang, lanchi, tyng, daw te khuakupaw aphuinphuin roi a thaepaw miakaw nynh sui zohtuh kha a bakhungnua cih zah a beik cih,¹¹te bakhungnuate a beik leipaw miakaw tuh arua cciamangpaw maeephupi lungkhu lang vua athua cih, na ci.¹²Pou siapharan, Babilon ram uknaw ryalaw kya na nung hae paw Judah hae: Shadrak, Meshak te Abednego nynh tuh nang kha pawlang ae ria khyh hae. Na pachia hae kha beik khyh hae zah, na thadynsahpaw sui zohtuh kha beik khyh hae,” cite a hopya hae.

¹³Tetuh Nebukhadnezzar tuh myarya a thinria zah Shadrak, Meshak te Abenego kha ko lan kaw a pya hae keiccuze ko hae zah siapharan malang a thuakhae hae.¹⁴Nebukhadnezzar nynh minmin kha, “Pou Shadrak, Meshak te Abenego, ka pachia hae kha na bakhungnua khyh oh zah, ka thadynsahpaw sui zohtuh kha na beik khyh oh, a ci hae paw tuh thanccingpaw athua tou?¹⁵Atu nanning nynh mungkae, phyly, tintang, lanchi, tyng, daw te khuakupaw aphuinphuin roi kha he na thae oh te, ka raepaw zohtuh kha bakhungnuate beik lan na paccynku oh ze ahoy cih. Thuasalama na beik khyh oh zetuh, arua cciamangpaw maeephupi lungkhu lang palou phung na thua cih oh, ka kuih kyate ae khum kho cih oh paw pachia hummou a um?” a cipya hae.

¹⁶Shadrak, Meshak te Abenego nynh siapharan kha, “Pou Nebukhadnezzar, e konglangte na kya daangsahkunaw byaho lanpaw kae hoi khyh.¹⁷Pou siapharan, kae beikpaw kae Pachia nynh aruapaw maeephupi kyate thuasah, na kuih kyate thuasah oun khum ze, oun khum sah.¹⁸Oun khum khyh zemah, pou siapharan, na pachia hae kha kae bakhungnua lae lan khyh zah, na thadynsahpaw sui zohtuh kha kae beik lae lan khyh cipaw beih nytua,” a cipya hae. Aruapaw Maeephupi

¹⁹Tetuh Nebukhadnezzar tuh Shadrak, Meshak te Abednego tungvaw a maesue phe roh lan ciate myarya a thinria zah, maeephupi kha atakaw lya laeze leit sari sosah hua oh, cite kawpya hae zah,²⁰Shadrak, Meshak te Abednego kha khii lan te arua cciamangpaw maeephupi lungkhu lang vua khylan a rhawkaw hae kyaze a thung huaccepaw abang kha kaw a pya hae.²¹Tukeiccuze lu thum hae kha mih angkile, mih langpatung, mih lukhung te ccangpaw mih boeining hae ryte khiide hae zah, arua cciamangpaw maeephupi lungkhu lang a vua hae.²²Siapharan kya-e kawpyanaw tuh myarya rang zah, maeephupi tuh myarya aso keiccuze Shadrak, Meshak te Abednego a hang hae paw pise hae kha maeesoi nynh phe chia hae.²³Tuh-e lu thum hae, Shadrak, Meshak te Abednego tuh khiidekute aruapaw maeephupi lungkhu lang a ccah hae.

²⁴Te Nebukhadnezzar siapharan tuh a ngaeangthua zah arangte a thokuh. Tuanaw pyatu hae kha, “Khiidete maee lungkhu lang ah phung oh paw kha lu thum thua khyh tou?” cite a khia hae. Minmin nynh siapharan kha, “Ahme, pou siapharan,” a cipya hae.²⁵Aning nynh, “Khii leipaw ccungccaw lu pali nynh maee lungkhu kya a ccia hae paw te vaemaw mue leite a um hae paw kha ka muih, lu palinaw e paw tuh pachia muinsan nynh a ke,” cite a khung hae.²⁶Nebukhadnezzar nynh arua cciamangpaw maeephupi pe langkhe naekuh zah, “Ahang Huaccepaw Pachia ryalahtu hae, Shadrak, Meshak te Abednego, oun pou oh lah, hynhlang oun cciatua oh!” a cipya hae. Tukeiccuze Shadrak, Meshak te Abednego tuh maee lungkhu te oun pou hae.²⁷Mangki hae, zipe hae, vuethoh hae te siapharan tuanaw pyatu hae tuh pynkheihlan sueluakuh hae zah, tuh-e lu pali hae pyn kya maee nynh thungnaw ccapyh san a hoi khyhpaw kha a muih hae; mih sangrua ccangkheit san maee nynh u khyh, mih angkile kha mah u khyh zah, maee myn sanmah myn khyh hae.²⁸Nebukhadnezzar nynh, “Shadrak, Meshak te Abednego hae Pachia tuh thehoyte um sah, a vaawccungccaw hae kha sawpyate, amaw a doliakuh hae paw a ryalahtu hae kha a khum hae. Mih Pachia laelan ccangpaw pachia kha bakhungnuate beik lae tuh, mih pyn pyaku ciate siapharan kaw kha a ei hae.²⁹Tukeiccuze kae nynh kaw ka tho: Pawpaw tahawpaw ccungccaw, minphuin te pawpaw tahawpaw bya a hopaw athua zemah Shadrak, Meshak te Abednego hae Pachia kha thethya a hopaw tuh a kuih a ccu khya athua cih zah, a inn kha mah aronahpaw apumkuhpaw lang a tang cih; pawccecize e hawte ccungccaw a khum khopaw ccangpaw pachia um khyh,” a ci.³⁰Te siapharan nynh Shadrak, Meshak te Abednego kha Babilon ram kya ryalaw a kaesah hae. Vae Ningnaw Nebukhadnezzar Maan

¹Nebukhadnezzar siapharan nynh bya aphuinphuin ho hae paw laephi pynpi e minphuin hae balyn kalan khe: Nae kya daenaw um sah!²Ahang Huaccepaw Pachia nynh rya yn lawpyapaw muihsahnaw hae te ngaeang lan umpaw balyn kha hothui ka ry.³Pachia nynh a raepaw muihsahnaw hae tuh pawcih baban mou lesae zah,ngaeangnaw a raepaw tuh pawcih baban mou huhan a hoi!A peenaw tuh zungzae tynpaw peenaw thua zah,a kya-e kawhoinaw tuh she takyh kya atyn, a ci.

⁴Kae, Nebukhadnezzar tuh ka inn kya ngaengan thawdangte ka um zah, ka siapharan inn kya hiinhoyte ka um.⁵Kae yn risahpaw maan ccangkheit ka sah; ka i lyakhe ri lan umpaw vizin kha ka muih.⁶Tukeiccuze ka maan kha leihpya khylan Babilon ram e mihaw hae balyn kha ka malang thuakhae lan kaw ka tho.⁷Te mitleihthya hae paw, beidinhothya hae paw, Khaldi hae te apawe hae paw tuh oun thua hae zah, ka maan kha ka hopya hae, thuasalama ka maan kha yn leihpah kho khyh hae.⁸Nyathyakou khe ka pachia min liate Belteshazzar cite ko thua zah athyaapaw pachia hae muisaw te phe beihpaw Daniel tuh ka malang yn thua zah, ka maan kha ka hopya:⁹“Mitleihthya hae paw lupi athuapaw, pou Belteshazzar, nang tuh athyaapaw pachia hae muisaw te phe na beih zah, nang na hanlan tuh myaryamaw arupaw byakhupaw um khyh cipaw ka ny. Maan ka sahpaw hynh ngaetua lah, yn leihpya tua.¹⁰Ka i lya ka muihpawvizin tuh hynhte nynh thua;laephi ngaelung khemyarya hangpaw thingku ku kheit a um.¹¹Thingku tuh lethung zahmyarya a bong,adungpaccy tuh vaawluiphe phah zah,laephi pynpi adianaw kyatemuih kho athua.¹²Tuh-e thing anaw hae tuhmyarya puithya,a thae tuh myarya lung zah,ahysuepaw balyn hanlanlooh lang phe azaw.Loramsaw hae nynha mynzia kaw khe a um hae,vaawlang e pavaw hae nynhakaran kya mih bu luakuh hae zah,khah-e thingku khateahysuepaw balyn kha kua athua hae.

¹³Ka ih zah vizin ka muih lyakhe ngawran he ka do tuh, vaawlang te yn rungbungpaw athyaapaw rhawviatu lu kheit a um.¹⁴Aning nynh thawte sia zah a hopaw tuh:‘Thingku kha nge lah,akaran hae kha loi hae,anaw kha sia lah, athae khaphiariphiarae nung hae.Sarangpaw hae tuhtuh-e thingku kaw kyateccue hae sah lah, pavaw hae tuhakaran hae kyate zou hae sah.¹⁵Thuasalama a ccungmuing tea tharui kha sivawrui tesohinrui khate khii lah,laephi kya cciataw,nebaleihpaw lonua kyacciatawtua.Vaawlang e dangtui nynhaning kha ccawphu sah.Laephi kya-e lonua hae kyakheloramsaw hae ryteumkheih hae sah.¹⁶Kum sari lungkhuccungccaw thinlung hoi leite,sarangpaw thinlung hoi sah.¹⁷Ahang Huaccepaw Pachia nynhccungccaw hae peenaw khaa uk cipaw te tuh-e peenaw tuha pya rypaw ccungccaw kha pya zah,anyaa huapaw ccungccaw hae kha maha pya hae cipaw khaccungccaw balyn nynha ny ccaw hae cite,thingku ngawtu hae nynhtuhcite byapia hae,tuh-e byapaenaw tuhathyaapaw vaawccungccaw hae kya-ekawpyanaw liate nynh thua,’ a ci.

¹⁸E hynh kae, Nebukhadnezzar Siapharan nynh maan ka sahpaw nynh thua. Atu tuh Belteshazzar, nang nynh ka maan kha leihtua; ka peenaw lungkhu umpaw mihaw hae balyn nynh ka maan kha a leih kho khyh hae zemah, nang tuh athyaapaw pachia hae muisaw te phe na bia keiccuze maan kha na leih kho,” a cipya. Daniel nynh Vae Ningnaw Maan kha A Leih

¹⁹Te Belteshazzar cikuhpaw Daniel tuh sosoh lungkhu myarya a lungriathae zah a thinphang. Siapharan nynh, “Belteshazzar, ka maan te asuilan nynh na thin ae phangsah nan sah,” a cipya. Belteshazzar nynh, “Ka bawipaw, na maan hynh nang ae hua hae paw elang thua sah lah, na maan asuilan hynh na rhaw hae elang thua vae sah!²⁰Na maan kya na muihpaw thingku, myarya le zah, anaw myarya abongpaw, adungpaccy tuh vaawlui phe phahpaw, laephi pynpi adianaw kyate muih kho athuapaw,²¹anaw tuh myarya puithya zah athae myarya alungpaw, ahysuepaw balyn hanlan looh lang phe azawpaw, aku kaw khe loramsaw hae um hae zah, vaawlang e pavaw hae nynh akaran kyakhe bu a luakunaw hae paw thingku tuh—²²namaw nynh na thua, pou siapharan! Nang tuh na le zah na thung. Na lesaenaw tuh houhouh le zah vaawlui phe aphah, na uknaw tuh laephi adianaw cia phe a thua.²³Siapharan nynh a do lyakhe, athyaapaw ngawtu lu kheit tuh vaawlang te yn rungbung zah, ‘Khah-e thingku kha nge lah rotua, thuasalama a ccungmuing te a tharui kha tuh laephi kya cciatawtua, sivawrui te sohinrui ryte khiide lah, ramkaw e lonua kya cciatawtua, kum sari lungkhu vaawlang e dangtui nynh ccawphu sah lah, loramsaw hae ryte umkheih hae sah,’ a ci—²⁴Pou siapharan, e hynh na maan asuilan thua zah, tuh-e tuh Ahang Huaccepaw Pachia nynh ka bawipaw siapharan na tungvaw kya a thuasah lanpaw nynh thua:²⁵Ccungccaw hae laku kyate nang kha dee na thua cih zah, loramsaw hae ryte na umkheih cih oh. Ahang Huaccepaw Pachia nynh ccungccaw hae peenaw kha uk zah, tuh-e peenaw tuh a pya rypaw kha a pya cipaw na ny mawlaezung, tangnuapaw hawte lonua kha na boukuh cih zah, kum sari lungkhu vaawlang e dangtui nynh ae ccawphu cih.²⁶Thingku a ccungmuing te a tharui kha cciataw lan kawpya athua, cipaw asuilan tuh, Pachia nynh laephi pynpi a uk cipaw he na nyh te, na peenaw kha namaw hanlan bua atyn cih cinawpaw nynh thua.²⁷Tukeiccuze, pou siapharan, tuanaw kae pyapaw hynh beih lawku tua: dingnaw raenaw khate na seinaw kha shawkhawkuh lah, tuaasahkunaw a teing hae paw tungvaw thawccinaw hoinaw khate na hoyleinaw kha shawkhawku tua, tuhteze nynh na hiin hoynaw ccyh asae cih,” a ci. Nebukhadnezzar Maethyanaw Muenaw

²⁸E hae balyn nynh Nebukhadnezzar siapharan tungvaw a thuanua.²⁹Sawpaw sah haw lae ning he athang te, siapharan tuh Babilon e a siapharan inn innccuvaw khe cceih zah,³⁰“E hynh alesaepaw Babilon, siapharan umnawpaw khuapi lang cite athungpaw ka huhan te aphu-epaw ka lesaenaw hanlan ka raepaw thua khyh tou?” a ci.³¹Tuh-e bya a ho lyakhe, vaawlang te roi roikheit yn ccae zah: “Pou Nebukhadnezzar siapharan, ka bya hynh ngaetua: Na peenaw tuh na kyate lawpya athua vae!³²Nang kha ccungccaw hae kyate ccaring dee na thua cih zah, loramsaw hae ryte na umkheih cih oh. Ahang Huaccepaw Pachia nynh ccungccaw hae peenaw kha uk zah, tuh-e peenaw tuh a pya rypaw kha a pya cipaw na ny mawlaezung tangnuapaw hawte lonua kha na boukuh cih,” a cipya.³³Tuh-e bya tuh Nebukhadnezzar tungvaw palou accing. Aning kha ccungccaw hae kyate dee thua zah, tangnuapaw hawte lonua kha a boukuh, vaawlang e dangtui nynh a pyn kha phe a ciasah; a ming tuh mosipi ming hawte sae zah, a kuihting te a ccuting tuh pavaw ccuting hawte asae. Nebukhadnezzar nynh Pachia A Thehoysah

³⁴Tuh-e ccyh he athang te, kae, Nebukhadnezzar tuh vaawlang khe ka do zah, ka lungccingthui.Ahang Huaccepaw Pachia khathe ka hoysah,zungzae hiinpaw Pachia khasawtuate the ka hoysah.Pawccecize a uknaw tuhzungzae tynpaw uknaw thua zah,a peenaw tuh she takyh kya atyn.³⁵Laephi ccungccaw balyn tuhalakawpaw lang ria thua hae zah,vaawccungccaw hae telaephi ccungccaw hae khaa ry hawte a cyi hae.Humhung nynh maha kuih kha khee kho khyh zah,“Pawmou na cyi?” citea hopah khopaw um khyh.

³⁶Tuh ccyh lyakhe, ka lungkyhthui zah, ka peenaw a phu-e nawlan ka lesaenaw te ka sung-enaw kha ka muethui. Tuanaw yn pyatu hae te ka kuihkaw e bawi hae nynh kae kha yn cciadue hae zah, ka peenaw kya uknaw kaw kha pyathui ka thua, langmawlya laeze ka huhan tuh houh alehua.³⁷Atu kae, Nebukhadnezzar nynh vaaw Siapharan kha the ka hoysah, ka hangthung zah saw ka tua;pawccecize a cyipaw balyn tuh kyh zah,a laanpi tuh ading;a lysakuh hae paw khaa nyaasah bung kho hae.Belshazzar Poituanaw

¹Belshazzar siapharan nynh a kuihkaw e bawi thong kheit hanlan poitua zah, tuh-e hae malang khe misutui kha a nia.

²Misutui a niatua lyakhe a kuihkaw e bawi hae, a zu hae te a lovae hae ryte misutui nia nawlan, a paaw Nebukhadnezzar nynh Jerusalem beikinn e a la lawpaw sui banang hae te ngun banang hae kha law lan kaw a pya hae.³Jerusalem umpaw Pachia inn kya-e a la law hae paw sui banang hae te ngun banang hae kha lah hae zah, tuh-e tuhte siapharan, a kuihkaw e bawi hae, a zu hae te a lovae hae nynh a nianaw hae.⁴Misutui kha neih hae zah sui pachia, ngun pachia, sohin pachia, sivaw pachia, thingphe pachia te lung pachia kha the a hoysah hae. Pang kya Zeipaw Ccaw

⁵Tualeipite ccungccaw kuihdung tuh yn langkuh zah, maeekhuatung pe, siapharan inn pang vawlan khe ccaw a zei. Tuhcite a zei cciamangpaw kuih kha siapharan nynh phang a do.⁶Te siapharan maesue tuh rulaekuh zah, myarya a thinphang. A kuih a ccu pong thyngkuh zah a ccukharu hae phaphah a buakuh hae.⁷Siapharan nynh beidinhothya hae paw, Khaldi hae te apawe hae paw kha oun ko oh, cite thawte a sia; te siapharan nynh Babilon ram e mihaw hae kha, “E ccaw azeikuhpaw a ria khopaw te asuilan a ho khopaw tuh boeining sepaw kha lawsahku athua cih, a nging kya suisi oisah athua cih zah, ka peenaw kya bawi lu thumnaw lang a tang cih,” a ci.⁸Siapharan kya-e mihaw hae tuh oun thua hae, thuasalama ccaw zeikuhpaw kha ria kho khyh hae zah, asuilan mah siapharan kha hopah kho khyh hae.⁹Tetuh Belshazzar Siapharan tuh myarya a thinphang zah a maesue phe rulaekuh, a kuihkaw e bawi hae mah paw cyi lanpaw nyh khyh hae.

¹⁰Siapharan te a kuihkaw e bawi hae nynh byahokuh hae paw kha siapharannung nynh he a thae tuh, poituanaw khaan lungkhu lang yn tee. Siapharannung nynh, “Pou siapharan, na hiinshe sae vae sah! Na thinphang nan sah, na maesue mah rulaekuh nan sah.¹¹Na peenaw kya athyaapaw pachia hae muisaw te phe beihpaw lu kheit a um. Aning tuh na paaw she lyaze pachia hae hawnaw te alokuhpaw hawnaw, thyanaw, nynaw a hoi cite ny athua. Na paaw, Nebukhadnezzar siapharan nynh aning kha mitleihthya hae paw, beidinhothya hae paw, Khaldi hae te apawe hae paw lupi lang a nung,¹²pawccecize uccaw cyithyanaw, nynaw, maan leihthyanaw, lakawbya asuilan kha ccaesah thyanaw te byalungnaw hopiathyanaw kha, siapharan nynh Belteshazzar cite min a phupaw Daniel kyahin muih athua. Atu Daniel kha ko hae sah lah, aning nynh na maan kha ae leihpah cih,” a cipya. Pang kya Zeikuhpaw Asuilan kha A Ho

¹³Tetuh Daniel kha siapharan malang a thuakhae hae. Siapharan nynh Daniel kha, “Siapharan athuapaw ka paaw nynh Judah ram kyate kyng zah a cciakhaepaw Judah hae laku e Daniel tuh nang hynh tou na thua?¹⁴Athyaapaw pachia hae muisaw tuh na kya um zah, thyanaw, nynaw te hawnaw na hoi cite ka thae.¹⁵E azeikuhpaw hynh ria khylan te asuilan kha ka kya hopya khylan, mihaw hae te beidinhothya hae paw kha ka malang khe thuakhae thua hae salamah minmin nynh asuilan kha ho kho khyh hae.¹⁶Thuasalama nang tuh byakhupaw asuilan kha na ho kho zah, byalungnaw kha na hopia kho cite ka thae. Atu, azeikuhpaw kha na ria kho zah, tuh-e asuilan kha nae hopya kho zetuh, boeining sepaw kha lawsahku na thua cih, na nging kya suisi oisah na thua cih zah, ka peenaw kya bawi lu thumnaw lang na tang cih,” a cipya.

¹⁷Tetuh Daniel nynh siapharan malang khe, “Na lasung tuh namaw elang tang sah, tuhkhyhze mingccang hae kha pya hae! Thuasalama tuh-e ccaw azeikuhpaw tuh siapharan nang kha kae riapah cih zah asuilan kha kae nysah cih.¹⁸Pou siapharan, Ahang Huaccepaw Pachia nynh na paaw kha siapharan lang tangnaw, lesaenaw, phu-enaw te huhan hoinaw kha a pya.¹⁹Pachia nynh a pyapaw tuh-e lesaenaw liate ccungccaw hae, minphuin hae te bya aphuinphuin a ho hae paw balyn nynh amaw malang khe rih hae zah a thyngkuh hae. Ccungccaw a chia rypaw kha a chia, a hiin rypaw kha a hiin, a hangthung rypaw kha hangthung zah, a sawbung rypaw kha a sawbung.²⁰Thuasalama a thinlung yn hangsakuh zah, lungkhungte he yn lysakuh tuh, a siapharan tungkhung kyate vua thua zah, a phu-enaw kha lawpya athua.²¹Ccungccaw hae kyate ccaring dee thua zah, sarangpaw thinlung kha hoisah athua. Ahang Huaccepaw Pachia nynh ccungccaw hae peenaw kha uk zah, tuh-e peenaw tuh a pya rypaw kha a pya cipaw a nythya mawlaezung, ramkaw e lann hae kya umbua zah, tangnuapaw hawte lonua kha a boukuh, a pyn kha vaawlang e dangtui khate ciasah athua.²²Te a ccapaw athuapaw Belshazzar nang nynh tuh-e balyn tuh na ny zemah, zakawsangsakunaw thinlung na hoi khyh.²³Vaawlang e Bawipaw kha rawsete namaw te namaw kha na hangsahku! A beikinn kya-e banang hae kha na kalan na lawsah hae zah, nang te na kuihkaw e bawi hae, na zu hae te na lovae hae nynh misutui na nianaw oh. Ngawmuih leipaw, nawthae leipaw te paw sanmah a nyh leipaw sui pachia, ngun pachia, sohin pachia, sivaw pachia, thingphe pachia te lung pachia hae kha the na hoysah hae; thuasalama na hiinnaw te na cyisahnaw miakaw a uktupaw Pachia kha tuh saw na tua khyh.

²⁴“Tukeiccuze a umnaw kyate kuih kha sawnua zah, e ccaw hynh a zei.²⁵Te a zeipaw ccaw tuh: MENE, MENE, TEKEL, te PARSIN, a ci.²⁶Tuh-e asuilan tuh: MENE cipaw tuh, Pachia nynh na peenaw nin hae kha ria zah a thangsah vae;²⁷TEKEL cipaw tuh, zawccu vawlan khe nang kha khin na thua vae zah, na ccing leinaw kha muih athua vae;²⁸PERES cipaw tuh, na peenaw kha phia thua zah, Media hae te Persia hae kha pya athua vae hae, cinawpaw asuilan nynh thua,” a cipya.

²⁹Te Belshazzar nynh kawpya hae zah, Daniel kha boeining sepaw kha lawsakuh hae zah, suisi kha a nging kya a oisah hae, te aning tuh peenaw kya lu thumnaw bawi nynh thua, cite thaesahnaw kha a rae hae.

³⁰Tuh-e khuazi ccaccei khe Khaldi hae siapharan Belshazzar kha a chia hae.³¹Te sung taruh kum ning loukaw a cih vae paw Media minphuin athuapaw Darias nynh peenaw kha a law. Daniel kha Pheenaw

¹Darias nynh a peenaw a uk lanpaw mangki za kheit lu kuin kha a peenaw pynpi po lekuh lan a nung hae,²tuh-e hae a uk lanpaw lupi lu thum kha nung hae zah, tuin kyaze Daniel tuh a umbua; siapharan rynaw kha accing kho nawlan, mangki hae nynh lupi hae kalan a thaesah cih hae.³Athyaapaw muisaw tuh Daniel kya a um keiccuze Daniel tuh ccangpaw lupi hae te mangki hae balyn laeze langkuh hua zah, siapharan nynh a peenaw pynpi a uktu lang nung lante a paccyn.⁴Tukeiccuze lupi hae te mangki hae nynh Daniel kha rawsete peenaw te asekuh lante a seinaw kha a ccungpya hae. Thuasalama Daniel tuh a lungzipaw thua zah, a tungvaw kya sawphahkunaw thuasah, seinaw thuasah ccapyh san a um khyh keiccuze a seinaw kha muih kho khyh hae.⁵Minmin nynh, “Daniel a Pachia kawbya te asekuh lante a seinaw kha ah muihpya khyh oh zetuh, e Daniel hynh a seinaw ccapyh san ah muih vae lan khyh oh,” cite a hoku hae.

⁶Tukeiccuze lupi hae te mangki hae tuh aruh lante paccynte siapharan kalan cceih hae zah, “Pou Darias siapharan, na hiinshe sae vae sah!⁷Namaw kalan thua leite ccangpaw ccungccaw kalan thuasah, pachia kalan thuasah nin sung thum lungkhu saw a sangpaw tuh chindeih khia lungkhu lang vua athua cih, cite phungzae ccangkheit kha siapharan nynh a rae cih zah a tynsah cih, cipaw kha ram lungkhu e lupi hae balyn, zipe hae, mangki hae, tuanaw pyatu hae te uktu bawi hae nynh nawccawnaw kae hoi.⁸Tukeiccuze, pou siapharan, nang nynh kaw beih tho lah, na minthuhku tua, tuhteze nynh rulae kho leipaw Media hae te Persia hae upadi thyhte rulae kho thua lan khyh,” a cipya hae.⁹Tukeiccuze Darias siapharan nynh minthuhkuh zah kaw a tho. Chindeih Khia kya Daniel

¹⁰Siapharan nynh minthuh zah kaw a tho vae cipaw kha Daniel nynh a ny zemah, a inn langkhe leih ki zah, a inn avawlan khaan kya Jerusalem lang a hawipaw thanlan-aw kha hungte, leih a la cyimae hawte, nin kheit ze vae thum, ccukharutungte Pachia kalan sawsang zah the a hoysah.¹¹Daniel nynh a Pachia kalan sawsang zah thawccinaw a ngiakupaw kha a dokhawtu hae nynh oun thua hae zah a muihbia hae.¹²Tetuh siapharan kalan oun cceih hae zah, “Pou siapharan! Namaw kalan thua leite ccangpaw ccungccaw kalan thuasah, pachia kalan thuasah nin sung thum lungkhu saw a sangpaw tuh chindeih khia lungkhu lang vua athua cih, cite na minthuhkute kaw na tho vae khaw?” cite kaw a thopaw konglang kha a hopya hae. Siapharan nynh, “Athua, arulaekuh kho leipaw Media hae te Persia hae upadi thyhte atyn,” a ci.¹³Tetuh minmin nynh siapharan kha byakhungru hae zah, “Pou siapharan, Judah ram kyate kyngte cciakhae athuapaw Daniel nynh nang kha thuasah, minthuhkute kaw na thopaw kha thuasah pawlangria khyh zah, nin kheit ze vae thum saw a sang,” a cipya hae.

¹⁴Siapharan nynh tuh-e bya tuh he a thae te, myarya a lungriathae. Daniel kha khum lan tuakuh zah, khuanin accaw mawlaezung Daniel kha luesah lan thawte a zuaku.¹⁵Tetuh Daniel a dokhawtu hae nynh siapharan kalan cceih hae zah, “Pou siapharan, siapharan nynh a rae vae paw kawthonaw thuasah, phungzae thuasah rulae kho thua khyh, cite Media hae te Persia hae kawbya kya a um cipaw beih nytua,” a cipya hae.

¹⁶Te siapharan nynh kawpya hae thyhte, Daniel kha cciakhae hae zah chindeih khia lungkhu lang a vua hae. Siapharan nynh Daniel kha, “Lungzite rya na lawpyapaw na Pachia nynh nang kha ae luesah vae sah!” a cipya.¹⁷Lungtungpi kha lah hae zah chindeih khia a khawsung kou hae te, Daniel tuh a lue kho khyh nawlan, siapharan nynh a minkhianawpaw tazeih te a kuihkaw e bawi hae tazeih kha a khia.¹⁸Te siapharan tuh a inn lang cceih zah zidae looh-ae a sung; hoysahnaw mah rae khyh zah i mah ih kho khyh. Chindeih hae kyate Daniel Khumnaw

¹⁹Te, khua he yn dae te, siapharan tuh tho zah chindeih khia kalan rangsakute a cceih.²⁰Daniel a umnaw chindeih khia kalan he a naekuh te, Daniel kalan khe thinphangte sia zah, “Ahiinpaw Pachia seepaw, pou Daniel, lungzite rya na lawpyapaw na Pachia nynh nang kha chindeih hae kyate ae khum kho tou?” a cipya.²¹Daniel nynh siapharan kha, “Pou siapharan, na hiinshe sae vae sah!²²Ka Pachia nynh a vaawccungccaw hae kha yn saw hae zah, chindeih hae khalang kha a hu hae keiccuze chindeih hae nynh vawsaw oun pya khyh hae, pawccecize kae tuh Pachia malang seinaw ka hoi khyh; pou siapharan, nang na malang mah hoyleinaw ka rae khyh,” a ci.²³Tetuh siapharan tuh myaryamaw a lungtua zah Daniel kha chindeih khia lungkhu te pousah lan kaw a pya hae. Tukeiccuze Daniel tuh chindeih khia lungkhu te a pousah hae, a Pachia kha a doliaku keiccuze vaemaw ccapyh san mue khyh.²⁴Siapharan nynh kawpya hae zah, Daniel sei a be hae paw kha kote mimaw, mih ccaaw hae te mih zu hae ryte chindeih khia lungkhu lang a vua hae. Chindeih khia lungkhu laekhu a thua maw hae khe, chindeih hae nynh zounua hae zah mih ru balyn kha zoihtatyh lan a khya hae.

²⁵Tetuh Darias nynh laephi pynpi phe lekuh lan ccungccaw balyn, minphuin hae te bya aphuinphuin a ho hae paw kalan ccaw a zei: Nae kya hiin hoynaw um vae sah!²⁶Ka uknaw ram pynpi kya-e ccungccaw hae nynh Daniel Pachia malang khe ri te sawtua lan kaw kae pya oh:Pawccecize aning tuh ahiinpaw Pachia,zungzae tynpaw Pachia nynh thua.A peenaw tuh papin roh lan khyh zah,a uknaw tuh thang lan khyh.²⁷Aning nynh khum hae zah a luesah hae,muihsahnaw tengaeangthua lan umpaw khavaaw te lae kya a rae;chindeih thungnaw kyateDaniel kha a khum vae.

²⁸Tukeiccuze Daniel tuh Darias nynh a uk lungkhu te Persia paw Sairas nynh a uk lungkhu tuh hiinhoyte a um. Sarepaw Sa Pali Vizin

¹Belshazzar nynh Babilon siapharan lang a tangnaw kum kheitnaw kum khe, Daniel tuh a i lyakhe maansah zah vizin kha a muih. Tetuh a maan kha a zei, tuh-e tuh hynhte nynh thua:²Kae, Daniel nynh khuazi ka vizin kyakhe teitei lang balyn te khisan yn zaw zah rilipi kha tuileih a thosah,³te myarya le hae paw sarepaw sa pali tuh rili lungkhu te oun pou hae zah, sa kheit te sa kheit lokuh khyh hae.⁴Masaty e sa kheit tuh chindeih te lokuh zah, mosipi sake a hoi. Tuhcite ka do lyakhe a sake hae kha khaee athua, laekhu kyate apyn kha hangthung thua zah, ccungccaw ccu alopaw ccu ccangning khate a thadyn; te aning tuh ccungccaw thinlung kha pya athua.⁵Ccangningnaw sarepaw tuh yn langkuh zah, vong te nynh aloku. Anuhlang ccu te thadyn zah, a haw te naru ccangthum kha a tei, te amaw kha, “Thokuh, saw hae kha patae ae!” cite a hopya hae.⁶E koute, ka do lyakhe, kaesing te alokuhpaw ccangpaw sa kheit tuh yn langkuh. A ke kya pavaw sake ccangpali a hoi, alu ccangpali hoi zah uknaw kaw kha pya athua.⁷E koute, khuazi vizin kyakhe, myaryamaw a thawsae zah ri lan umpaw ccangpalinaw sarepaw kha ka muih. A haw tuh myarya lepaw sivaw nynh thua, zoihtatyh lan a khae koute alaepaw kha a ccu te a syde. Aning maw e sarepaw hae te lokuh khyh, aki ki haw asae.⁸A ki ka do cciamang lyakhe, aki hae laku kyate ccangpaw aki taraw ki kheit tuh yn langkuh; tuh-e aki taraw a um nawlan, a umty hae paw aki ki thum kha atharui ryte phoh athua hae. Tuh-e aki taraw kyakhe ccungccaw mit alopaw mit um hae zah, lysakunaw bya a hopaw mung ccangkheit a um. Pachia Byapianaw

⁹Ka do lyakhe, bawitungkhung khanya thua zah, avawlan khezungzae hiinpaw tuh a haung,a boeining tuh vuiraw hawte raw zah,a sang tuh tuumingthyaararihpaw te nynh aloku;a bawitungkhung tuhezazaepaw maeesoi thua zah,a leccu hae tuh arua cciamangpawmaee nynh thua.¹⁰A umnaw kyate maee tuhaluapaw vaw hawte a pou.Ccungccaw athong patae nynhryalawpah hae zah,a malang khe ccungccawathong-asan a thadyn hae.Byapianaw kha tho hae zahccauh kha a kia hae.

¹¹Ka do cciamang lyakhe, tuh-e ki taraw nynh a hopaw lysakunaw bya accaepaw keiccuze, tuh-e sarepaw kha theih hae zah apyn kha maee te a u hae.¹²Tuhlaepaw sarepaw hae tuh mih uknaw kha lawpya athua hae zemah, khyapyapaw accyh kyacia mih hiinshe asae.¹³Khuazi vizin ka muihpaw kyakhe,ccungccaw alopaw lu kheit tuhvaawlang e maeking khateyn cciapaw kha ka muih.Te zungzae hiinpaw kalan cceih zah,a malang a thua.¹⁴Bya aphuinphuin ho hae pawminphuin hae balyn nynhamaw rya kha a lawpya hae,uknaw kaw, phu-enaw tesiapharan lang tangnaw tuhamaw kha pya athua.A uknaw tuh azo cih leipawzungzae tynpaw uknaw thua zah,a siapharan thuanaw tuhpapin roh lan khyh.Daniel A Vizin Ccaesahnaw

¹⁵Kae, Daniel tuh ka lungkhu kya ka lungvawsaw zah, ka muihpaw vizin nynh ka thin yn phangsah.¹⁶E hae balyn konglang ahmepaw kha khiatua khylan, ka pe um hae paw kya-e lu kheit kalan khe ka cceih. Tukeiccuze aning nynh asuilan kha kae hopah cih yn cipah zah hynhte yn hopya:¹⁷E sarepaw alepaw sa pali tuh, laephi vawlan yn langkuh cih paw uknaw ccangpali nynh thua.¹⁸Thuasalama Ahang Huaccepaw Pachia mithyaa hae nynh peenaw kha a mue cih hae zah, tuh-e peenaw kha zungzae te zungzae cia a ccou cih hae.

¹⁹Te sarepaw sapalinaw konglang ahmepaw kha ny ka ry; tuh-e sarepaw tuh ccangpaw hae balyn te lokuh khyh, ri lan myarya um zah a haw tuh sivaw haw nynh thua, te sohin ccutin a hoi, zoihtatyh lan a khae koute alaepaw kha a ccu te a syde;²⁰a lu vawlan e aki ki haw konglang kha ny ka ry, te nyalangte aki ki kheit yn sae zah, he yn sae takaw te ccangpaw aki ki thum hae kha poh phoh zah, mit te lysakunaw bya a hopaw mung a hoi keiccuze ccangpaw ki hae laeze alesae huapaw tuh-e aki konglang kha mah ny ka ry.²¹Ka do lyakhe, zungzae hiinpaw yn thua maw tuh, tuh-e ki tuh mithyaa hae te rhawdoukuh hae zah a tae hae,²²te Ahang Huaccepaw kya-e mithyaa hae hanlan byapianaw kha raepya thua zah, tuh-e mithyaa hae nynh peenaw kha a ccou hae ccyh tuh yn thua.

²³Aning nynh a hopaw tuh:“Sarepaw sapalinaw tuh,laephi vawlan hin ccangpalinawpeenaw yn um cih zah,tuh-e peenaw tuh ccangpawpeenaw hae te lokuh lan khyh;tuh-e peenaw nynh laephi pynpi khakhaleih a ae cih,a syde cih zah zoihtatyh lan a koi cih.²⁴Ki kihaw tuh,tuh-e peenaw kyateyn langkuh cih pawsiapharan lu haw khathua hae zah, tuh-e hae kouteccangpaw siapharanlu kheit yn langkuh cih.E siapharan tuh atakaw esiapharan hae telokuh lan khyh zah,siapharan lu thum hae khaa tae cih hae.²⁵Aning nynh Ahang HuaccepawPachia kha rawse byaa honua cih zah,Ahang Huaccepaw kya-emithyaa hae khavawsaw a pya cih hae,athyaapaw accyh hae tekawbya kha rulae lan a zuakuh cih;mithyaa hae kha a kuih kyaccyh kheit, ccyh ning,ccyh angankuh cia pya athua cih hae.²⁶Te byapianaw a um cih,a uknaw kha lawpya athua cih zahmaemihpya te khaleih ropya athua cih.²⁷Vaawlui zakaw umpawsiapharan thuanaw, uknaw kaw tepeenaw hae kya-e lesaenaw tuhAhang Huaccepaw kya-emithyaa hae kha pya athua cih hae;mih peenaw tuh zungzae tynpawpeenaw athua cih,kawhoitu hae balyn nynhrya a lawpah cih hae zahmih kaw a ngae cih hae,” a ci.

²⁸E kyahin e kong tuh athang vae. Kae, Daniel tuh myarya ka thinphang zah, ka maesue phe rulaekuh; thuasalama e uccaw hae hynh ka thinlung kya tyty ka nung. Tuutepaw te Miaatepaw

¹Belshazzar nynh siapharan lang a tangnaw kum thumnaw kum khe, masaty e vizin tuh kae, Daniel kya yn langkuh koute, ccangpaw vizin ccangkheit tuh ka kya bua yn langkuh. ²Tuh-e vizin kyakhe, kae tuh Elam pee, Susa khuapi kya, Ulai vawkhu kin ka umpaw kha ka muihku.³Ka do zah aki ki ning a saepaw tuutepaw sa kheit, vawkhu pe a thadynpaw kha ka muih. Tuh-e aki hae tuh parouh mawte oun toih hae, thuasalama ki kheit tuh ccangpaw ki kheit laeze asaehua, tuh-e asae huapaw tuh ccangningnaw yn toihpaw kha nynh thua.⁴Tuh-e tuutepaw nynh niccaw lang, thahlang te alia lang a naangbia hae paw kha ka muih. Loramsaw balyn nynh tuh-e tuutepaw kha thadynnua lan ciate huhan hoi khyh hae zah, a huhan kyate a lue khopaw um khyh; a lungry hawte cyih zah a thungpaw lang a tang.

⁵Tuh-e tuh ka do lyakhe, a mit hae laku kya aki ki kheit asaepaw miaatepaw sa kheit tuh niccaw langte yn thua zah, laekhu symang leite laephi pynpi kha po a zuake.⁶Tuh-e miaatepaw nynh vawkhu pe a thadynpaw langmaw ka muih vae paw, aki ki ning saepaw tuutepaw kha a thawzung balynte a ccuenua.⁷Tuutepaw kalan a naenuakupaw kha ka muih, tuutepaw kha a thinrianua zah aki ki ning phe khya lan a dia. Tuutepaw tuh thadynnua ngannawpaw huhan hoi khyh, miaatepaw nynh laekhu kya phe khulia zah a syde, tuutepaw tuh miaatepaw huhan kyate a khum khopaw humhung mah um khyh.⁸Te miaatepaw tuh myarya alesaepaw lang a tang; thuasalama a huhan a umhua lyakhe myarya lepaw a ki tuh akhya, tuh-e a ki akhyanaw kyatuin phe langkuhpaw aki ki pali yn sae zah, ccaccang langkhe a hawi hae.

⁹Tuh-e aki ki pali kya-e ki kheit kyate ccangpaw ki adihpaw ki kheit yn sae zah, alia lang, nithua lang te apuithyapaw ram langkhe hawi zah myarya alethung.¹⁰Tuh-e ki dihpaw tuh vaaw rhawkaw hae kyacia hang zah, vaaw rhawkaw hae abang te awsi hae abang kha laekhu lang sahbung hae zah a syde hae.¹¹Vaaw rhawkaw hae bawipaw kha heize rawsete lysah nuakuh zah, tyty a raepaw maee-ute silawnaw kha ccaring a lawpya, te a beikinnthyaa kha mah a ropya.¹²Hoyleinaw keiccuze, tyty raepaw maee-ute silawnaw ryte vaaw rhawkaw hae kha tuh-e ki kalan khe pya thua hae zah, beiknaw ccaccing tuh laekhu lang a vua; a cyipaw miakaw kya alaan-asui a ua.¹³Tetuh mithyaapaw lu kheit nynh ccangpaw mithyaapaw lu kheit kha bya hopah zah, “Tyty raepaw maee-ute silawnaw te thuasah, ronaw a thuakhaepaw cyiseinaw te thuasah, beikinnthyaa te vaaw rhawkaw hae sydenaw te thuasah asekuhpaw e vizin hynh hohseciamou aro cih?” a ci.¹⁴Te mithyaapaw nynh, “Nin thong ning za thum cia aro cih; tukoute beikinnthyaa tuh atakaw lya hawte athuathui cih,” a ci. Gabriel nynh Vizin Suilan A Ho

¹⁵Kae, Daniel nynh ka muihpaw vizin kha asuilan ny lan ka zuaku. Te ccungccaw muinsan alopaw lu kheit tuh ka malang yn thadyn,¹⁶te Ulai vawkhu pe khe ccungccaw roi kha ka thae zah, “Gabriel, e ccungccapaw nynh vizin asuilan kha a ny nawlan hopya tua,” a ci.¹⁷Tukeiccuze Gabriel tuh ka thadynnaw kalan naekute he yn cceih tuh, ka rih zah ka bakhung. Thuasalama aning nynh kae kha, “Pou ccungccapaw, na muihpaw vizin tuh accyh athangnaw kong nynh thua cipaw nytua,” yn cipya.

¹⁸Tuhcite kae yn hopya lyakhe, phe ka ningkuh zah laekhu kya ka khuliakuh; te aning nynh yn kyng zah yn thadynsah koute,¹⁹“Ngaetua, Pachia thinrianaw ccyh athang te yn cyihkuh lanpaw kha kae hopah cih; na muihpaw vizin tuh khyapyapaw athangnaw ccyh kha nynh a ho ry.²⁰Aki ki ning asaepaw tuutepaw na muihpaw tuh Media siapharan te Persia siapharan nynh thua hae.²¹Miaatepaw tuh Grik siapharan thua zah, a mit ccangning laku kya asaepaw ki alepaw tuh masaty siapharan nynh thua.²²Aki ki kheit khya zah, tuh-e hmin kyate aki ki pali asaepaw tuh, a ram kyate peenaw ccangpali yn langkuh cih, thuasalama masaty e peenaw nynh a hoipaw huhan zeih hoi lan khyh hae.²³Tuh-e peenaw haeathangnaw ccyh khe,mih cyiseimenaw tuhaccingnaw he a thua te,arawthungpaw maesue hoi zahathyaruhpaw siapharanlu kheit yn langkuh cih.²⁴Aning tuh huhana hoithung cih zah,ri lan umpaw ronaw khaa rae cih zah,a cyipaw miakaw kyaa laan a sui a ua cih.Huhan a hoi hae paw temithyaa hae khaa roh cih hae.²⁵Aning tuh a thyaruhnaw keiccuzehynhute a cyisahnaw liatea eenaw accing cih zah,a thinlung myaryaa hangsakuh cih.Raeringnaw pyaty leiteccungccaw patae khaa roh cih hae zah,bawi hae Bawipaw kha heizea rawse cih.Thuasalama aning kharo athua zemahccungccaw kuih tero thua lan khyh.

²⁶Ho athua vae paw zetepakaw te awkhua takaw e vizin tuh akyhpaw nynh thua. Nang nynh vizin kha tazeih khiatua, pawccecize atu te nin patae hanlan a ho rypaw nynh thua,” a ci.

²⁷Tukeiccuze kae, Daniel tuh ka thawbang zah nin beihtaraw ka ccikhaekuh; te ka thokuh zah siapharan a rya kha law lan ka cceih. Thuasalama ka muihpaw vizin keiccuze ka ngaeangthua zah, tuh-e vizin tuh ka thaethya khyh. Ccungccaw hae hanlan Daniel Sawsang

¹Ahasuerus ccapaw, a thokeinaw thyhte Media minphuinpaw Darias nynh Khaldi ram kya siapharan lang tang zah,²ram a uknaw kum kheitnaw kum khe kae, Daniel nynh athyaapaw ccauh hae kha ka ria zah, Bawipaw nynh profeh Jeremiah kya a hopaw bya thyhte, Jerusalem tuh kum sung sari lungkhu aroh cih, a cipaw kha ka ny.

³Looh-aesungte, buriboei zingkute, buhhaw phingkute Bawipaw Pachia kalan sawsangte ka ngia.⁴Bawipaw ka Pachia kalan khe seinaw phykute saw ka sang zah,
“Na kawbya kha zui zah nang ae sungsahpaw kyakhe zungzae tynpaw sungsahnaw te byakinnaw kha a tynsahpaw, alesaepaw te ri lan umpaw Bawipaw Pachia,⁵kaening tuh kae sei zah kae mesei vae, na kawbya te na phungzae kyate ccanglang maekute hoyleinaw kha kae rae zah nang kha kae dou vae.⁶Kae siapharan hae, kae bawi hae, kae minpaaw hae te ram kya-e ccungccaw balyn kalan na min te bya a ho hae paw na ryalahtu profeh hae bya kha kae ngae vae khyh.

⁷“Pou Bawipaw, nang tuh na ding; na tungvaw mih lungzi khyh keiccuze na deenaw hae ram, anaenaw te asawnaw e ram takyh kya um hae paw Judah hae, Jerusalem khuaccaaw hae te Israel hae balyn tuh atunin hynhcite maethyanaw kae mue.⁸Pou Bawipaw , na tungvaw kae sei keiccuze kae siapharan hae, kae bawi hae te kae minpaaw hae te kaening tuh maethyanaw kae mue.⁹Bawipaw kae Pachia kha kae la dou zemah, aning tuh thawccinaw te seingaethyanaw a hoi,¹⁰Bawipaw kae Pachia nynh a ryalahtu profeh hae liate kaening nae nungpyapaw na kawbya hae kha kae zui khyh zah, na bya kha kae ngae khyh.

¹¹“Israel hae balyn tuh na bya ngae leite, na kawbya kha eite a cceihsei vae hae. Tuhcite na tungvaw kae sei keiccuze Pachia ryalahtu Moses kawbya kya azeikuhpaw thyalawnaw kha kae tungvaw buu athua vae.¹²Kaening te oun uktu hae kha rawsete a hopaw a bya kha tynsah zah, myarya ccihpaw shethya kha kae tungvaw a thuasah vae, Jerusalem tungvaw a thuapaw shethya tuh vaawlui zakaw kya thua boi khyh.¹³Moses kawbya kya azeiku thyhte, e shethya balyn tuh kae tungvaw accah vae. Kae hoyleinaw kyate paleihkute a byaccing kha zuite, Bawipaw kae Pachia thawccinaw kha kae ngiakuh khyh.¹⁴Tukeiccuze e shethya hynh kae tungvaw a thuasah mawlaezung Bawipaw nynh a thinlung kya a nung. Thanccingte, Bawipaw kae Pachia tuh a cyipaw miakaw kya ahme; pawccecize kaening nynh a bya kha kae ngae khyh.

¹⁵“Pou Bawipaw kae Pachia, athawsaepaw kuih te na ccungccaw hae kha Izip ram kyate na poukhae hae zah atunin cia heize na min na thaansaku, kaening tuh kae sei vae, ahme lei lante kae cyisei vae.¹⁶Pou Bawipaw, adingpaw na ryalawnaw thyhte, na mua thyaapaw Jerusalem tungvaw na thinrianaw te na thin-unaw tuh beih dae ccavae sah, cite kaening nynh saw kae sang; kae seinaw te kae minpaaw hae hoyleinaw keiccuze Jerusalem te na ccungccaw hae tuh kae pepan um hae paw balyn laku kya a thethahpaw lang a tang vae hae.¹⁷Tukeiccuze, pou kae Pachia, na ryalahtu nynh saw ka sangpaw te kae ngiapaw hynh beih yn thaepya tua. Bawipaw, namaw hanlan, aroh vae paw na beikinnthyaa kyakhe na mitmae tuh beih awsah tua.¹⁸Pou ka Pachia, na nakaring tuakute beih thaetua. Na mit beih dae lah, kae ronaw hynh thuasah, na min te ko athuapaw khuapi hynh thuasah beih dotua. Kaening nynh kae dingnaw liate thua leite, myarya lepaw na thawccinaw liate ka sawsangnaw hynh na malang kae thuakhae.¹⁹Pou Bawipaw, beih thaetua, pou Bawipaw, beih yn ngaethya; pou Bawipaw, beih yn ngaepah lah, beih cyitua! Pou ka Pachia, namaw hanlan rangsaku tua, pawccecize na khuapi te na ccungccaw hae tuh na min te ko athua hae paw nynh thua,” ka ci. Lonaw Sung Sari

²⁰Ka Pachia kya-e mua thyaapaw ccelang Bawipaw ka Pachia malang khe ka sawsangnaw kha thuakhae te, ka seinaw te ka ccungccaw Israel hae seinaw kha phykute saw ka sang zah bya ka ho lyakhe,²¹tuhcite sawsangte bya ka ho cciamang lyakhe, vizin kya langmaw ka muih vae paw Gabriel tuh zete silaw ccyh khe arangte ka kya yn thua.²²Gabriel nynh kae kha, “Daniel, nang kha hawnaw te nythyanaw pya khylan atu kae thua vae.²³Na sawsangnaw tuh he na tho te, aning nynh ae leih zah, nang kha hopya khylan kae thua vae, pawccecize nang kha myarya ae sungsah. Tukeiccuze ka bya hynh hoyte ngae lah, vizin asuilan kha nytua:

²⁴“Cyiseinaw kha thangsah khylan, seinaw kha zosah khylan, hoyleinaw kha ngaethya khylan, zungzae tynpaw dingnaw kha thuakhae khylan, vizin te profeh kha tazeihkhia khylan te hmin thyaa huaccepaw kha chitui thuh khylan, na ccungccaw hae te athyaapaw na khuapi hanlan lonaw sung sari kha byapae athua.²⁵Tukeiccuze nyh lah thaethyatua: Jerusalem kha sakthuite langmaw a um thyhte umsah khylan kawpya athua nin kyate tho zah chitui thuhpaw bawi a ccyh athua mawlaezung lonaw naw sari aro cih; te lonaw sung taruh naw ning lungkhu khe Jerusalem tuh laanpi hae te tuihung hae ryte bua raethui athua cih, thuasalama tuh-e ccyh tuh vawsaw riathae ccyh athua cih.²⁶Lonaw sung taruh naw ning koute, chitui thuh athuapaw kha ahme leite a theih cih hae, nyalangte yn thua cih paw bawi a rhawkaw hae nynh khuapi te beikinnthyaa kha a roh cih hae. Tuh-e khuapi athangnaw tuh tui alepaw hawte yn thua cih zah, phe athang cia rhawtuknaw a um cih. Ronaw kong kha kawtho athua vae.²⁷Aning nynh lonaw naw kheit lungkhu ccungccaw patae ryte atynpaw byakinnaw kha a rae cih, tuh-e lonaw angankuh he thua te, silawnaw te pyanaw kha umsah vae lan khyh; anungsikuhpaw rohtupaw tuh a um cih zah, tuh-e paw tungvaw kya thangnaw kawthonaw kha a thua mawlaezung tuin kya a um cih,” yn cipya. Minphuin hae Rhawkunaw

¹Sairas nynh Persia siapharan lang a tangnaw kum thumnaw kum khe, Belteshazzar cite minphu athuapaw Daniel kyakhe bya ccangkheit phy athua. Tuh-e bya tuh akyhpaw thua zah, myarya lepaw rhawkunaw te asekuhpaw nynh thua. Tuh-e bya kha nyhthya zah a muihpaw vizin kha mah a thaethya.

²Tuh ccyh lya tuh kae, Daniel tuh lonaw naw thum ngaethyate ka um vae.³Aepaw thuapaw kha ka ae khyh, saw mah ka ae khyh, misutui mah ka neih khyh, chitui mah papin ka thuhkuh khyh, lonaw naw thum phe ccing lan tuhcite ka um.⁴Masaty sawpaw, nin kuin nin pali nin, Tigris vawpi pe ka thadyn lyakhe,⁵ngaw ka do zah laaw te kuapaw boeining kha lawkuh zah Ufaz sui taeccia cciakuhpaw ccungccapaw kha ka muih.⁶A pyn tuh aphutepaw lung te lokuh zah a mae tuh khozawlaekuhpaw nynh alo, a mit tuh a awpaw dahmaee te lokuh zah a kuih te a ccu tuh awrarih lan nuihpaw sohin te nynh aloku hae, bya a hopaw roi tuh ccungccaw zapi roi nynh alo.⁷Kae, Daniel lu kheit rou nynh vizin kha ka muih; kae umkheihpaw ccungccaw hae tuh muih khyh hae; myarya thyngkute ccue hae zah a rekuh hae.⁸Tukeiccuze tuh-e myarya lepaw vizin tuh muih khylan ka makhae nynh ka umhy vae. Ka thawzung zya zah ka ngesaw tuh dawkadae lan acih, ka thaw um vae khyh.⁹Te bya a hopaw roi kha ka thae; bya a hopaw roi kha he ka thae te, phe ka ningkuh zah laekhu kya moh ka bakhung.

¹⁰Te kuih ccangkheit nynh kae kha yn kyng zah kae tuh ka kuih te ka ccukharu khate ka thokuh.¹¹Aning nynh kae kha, “Sungsah lan kou umpaw Daniel, kae hopah cih paw bya hynh hoyte ngaetua. Thadyntua, pawccecize kae hynh na kalan saw ka thua,” yn cipya. Tukeiccuze aning nynh e bya yn hopya lyakhe thyngkute ka thadyn.¹²Aning nynh kae kha, “Daniel, rih nan, pawccecize thaethya khylan te na Pachia malang zakawsangsaku khylan na thinlung kya bya na paeku takaw nin kyamawte na bya kha thaethya thua vae zah, tuh-e na bya keiccuze kae tuh kae thua vae.¹³Thuasalama Persia ram uktu bawi nynh nin kuin lae kheit lungkhu phe yn khee. Tukeiccuze lupi lu kheit athua buapaw Mikhael tuh kae kha bawm khylan yn thua, te aning kha Persia ram uktu bawi ryte tuin kya ka cciataw hae,¹⁴nin athang nin kya na ccungccaw hae kya yn cyihkuh lanpaw kha nang thaethyasah khylan kae thua vae. Pawccecize e vizin tuh malang ccyh hanlan nynh thua,” yn cipya.

¹⁵Aning nynh e bya yn hopya lyakhe ka mae tuh laekhu kya ka bakhung zah bya ka ho khyh.¹⁶Te ccungccaw muinsan alopaw lu kheit nynh ka mung kha yn hae zah byaho khylan ka khalang tuh ka aw, te ka malang a thadynpaw ccungccapaw kha, “Ka bawipaw, ka tungvaw teingnaw yn thuakhaepaw e vizin keiccuze ka thaw um khyh.¹⁷Na ryalahtu kae nynh ka bawipaw kha pawtemou bya ka hopah kho cih? Pawccecize ka thyngkuh zah ka thawzung um vae khyh, ka hy mah um vae khyh,” ka cipya.

¹⁸Tukoute ccungccaw muinsan lopaw lu kheit nynh kae kha yn hae zah ka thaw bua yn umsah.¹⁹Aning nynh, “Sungsah lan kou umpaw, rih nan, nang tuh na khyn. Na thawsae sah lah, na rawhoy sah!” yn cipya. Aning nynh he yn hopah tuh thawzung ka mue zah, “Ka bawipaw, yn hopah ccaleih, pawccecize thawzung phe nae pya vae,” ka cipya.²⁰Tetuh aning nynh, “Pawccemou na kalan kae ccia cipaw na nyh tou? Persia bawipaw kha rhawtuk khylan atu ka ki cih, te ka cceih koute Grik bawipaw tuh yn thua cih.²¹Thuasalama byaccing ccauh kya zei athuapaw kha kae hopah cih. Na bawipaw Mikhael holeite tuh ka kalan pante, e bawi hae a rawsepaw lu kheit san um khyh.

¹Media minphuinpaw Darias nynh ram a uknaw kum kheitnaw kum khe, aning kha bawm khylan te thawzung pya khylan ka thadyn.

²“Atu byaccing kha kae hopah cih. Persia ram kya siapharan lu thum oun langkuh cih hae. Tuh-e hae balyn laeze lu palinawpaw tuh a hoirumhua, te a hoirumnaw liate thawzung he yn hoi tuh, Grik ram kha rawse khylan ccangpaw hae balyn kha a tuhou cih hae.³Te arawthungpaw siapharan lu kheit yn langkuh cih zah, myarya lepaw ram kha ukte a lungry hawte a cyih cih.⁴Huhan a hoi cciamang lyakhe a peenaw tuh a koi cih zah vaawlui zakaw aki ki pali langkhe a phiakuh cih hae, a peenaw kha a ciihan hae nynh uk vae lan khyh hae, thuasalama aning nynh a la ukpaw peenaw zeih kha huhan hoi lan khyh; pawccecize a peenaw kha lawpya athua vae cih zah, a ciihan athua leipaw milae hae nynh a ccou vae cih hae.

⁵“Tetuh alia lang e siapharan tuh thawzung a hoithung cih, thuasalama a rhawbawi hae kya-e lu kheit tuh amaw laeze thawzung a hoihua cih zah, amaw laeze ram akohua a uk cih.⁶Kum patae aro koute minmin tuh nawccawnaw a rae cih hae, alia lang e siapharan ccanung tuh thahlang e siapharanpaw kalan khe nawccawnaw tynsah khylan zu lang a cceih cih. Thuasalama tuh-e nopinung nynh huhan hoi lan khyh zah, tuh-e siapharan ciihan hae tuh tyn lan khyh hae. Tuh-e nopinung te a kya umbua hae paw, a ccaaw, amaw a bawmtupaw kha chia athua cih hae.
“Tuh ccyh lyatuin,⁷tuh-e nopinung a puizia hae kyate tuh-e siapharan rya a sanlae lanpaw lu kheit yn pou cih. Aning nynh rhawkaw hae kha a ccianua cih hae zah, thahlang e siapharan rhawlungrua lungkhu lang teenuate a tuk cih hae zah a tae cih hae.⁸Mih pachia hae, mih zohtuh hae, aphutepaw sui banang te ngun banang hae kha rhawtuknaw kya-e luadepaw uccaw hae lante Izip ram lang aning nynh a cciakhae cih. Thahlang e siapharan kha rhawtuk leite kum patae a sibia cih;⁹te thahlang e siapharan nynh alia lang e siapharan kha rhaw a tuk cih, thuasalama amaw ram lang a ki cih.

¹⁰“Thahlang e siapharan ccapaw hae nynh rhawtuk lan paccynkute, rhawkaw patae kha a pum cih hae, tui alepaw hawte malang khe a naangbia cih hae zah, a rhawlungrua kyacia bua a tuk cih hae.¹¹Alia lang e siapharan tuh a thinria cih zah, thahlang e siapharan kha ccianuate rhaw a tuk cih, thahlang e siapharan nynh rhawkaw patae kha a suelua cih hae, tuhzemah alia lang e siapharan rhawkaw hae nynh a tae cih hae.¹²Tuhcite rhawkaw patae kha he a tae te, a thinlung tuh a hangsakuh cih, rhawkaw athong patae kha a tae hae zemah, rhaw kha po tae lan khyh.¹³Pawccecize thahlang e siapharan nynh atakaw lya laeze alung huapaw rhawkaw patae ryte rhaw bua a tho cih, kum beihtaraw aro te, aning tuh myarya lungpaw rhawkaw hae te aenia uccaw patae ryte oun cceih cih hae.

¹⁴“Tuh ccyh lyakhe ccungccaw patae nynh alia lang e siapharan kha a rhaw cih hae. Na minphuin hae laku e a puatho hae paw nynh na muihpaw vizin kha ccingsah khylan rhaw a tho cih hae, thuasalama a shung cih hae.¹⁵Te thahlang e siapharan tuh yn cceih cih zah laekarung thaenuakute tynkaring lan akoihkuhpaw khuapi kha a lah cih. Te alia lang e rhawkaw hae nynh thuasah, a po hae paw rhawkaw hae nynh heize thuasah thadynnua kho lan khyh hae, pawccecize douru nawlan thawzung hoi khyh hae.¹⁶Tuh-e yn ccianuatupaw thahlang e siapharan nynh a rythyte a cyih cih zah, humhung nynh mah khee kho lan khyh. Ram apuithyapaw kya a um cih zah, tuin ram e atyn-are tuh a kuih kya a um cih.¹⁷A peenaw balyn kya-e thawzung khate ccianua lan a tuakuh cih zah, daenaw a um nawlan a rae cih. A rhaw hae peenaw kha ro khylan nopinung kha zu lang a pya cih; thuasalama tuh-e a tuakunaw tuh thua kho lan khyh zah thane lan khyh.¹⁸Tukoute rili kin e ram hae kalan a maekuh cih zah ccungccaw patae kha a kyng cih hae. Thuasalama ccangpaw rhawbawi lu kheit nynh a puathonaw kha zya a daesah cih; thanccingte, a puathonaw kha amaw toulou kalan a kisah cih.¹⁹Tetuh amaw ram lungkhu e rhawlungrua kalan khe a ki cih, thuasalama thypawkute a khuliakuh cih zah a zo vae cih.

²⁰“A ryalaw kha ccangpaw lu kheit nynh a sanlae cih zah, tuh-e paw nynh a peenaw tuh a phu-e ccaw cite bawi lu kheit kha a saw cih; thuasalama nin beihtaraw kya thinrianaw kya te rhawtuknaw kya thua leite a chih cih.²¹Tuh-e paw tuh siapharan huhan pyarua leipaw ccungccaw hoyleipaw nynh a sanlae cih; aning nynh raeringnaw pyaty leite a tee cih zah, thyaruhnaw khate peenaw kha a mue cih.²²Amaw a doutu rhawkaw hae te Pachia Ranpibawi Lupi kha khaleih a tae cih hae zah a malang khe a theih cih hae.²³Te aning te ccawkunaw a rae kou hae te, amaw nynh a ling cih hae zah ccungccaw beihtaraw kyalya te a thawzung umpaw lang a tang cih.²⁴Raeringnaw pyaty leite ram lungkhu e a hoirum huapaw hmin hae kha a teenua cih hae, a minpaaw hae nynh a cyi boi lei hae paw kha a cyih cih zah, luadepaw uccaw hae kha a nee cih hae. Rhawlungrua te koihpaw khua hae kha tuk lan a paccynku zemah sosoh hanlan kyalya athua cih.²⁵Myarya lungpaw a rhawkaw hae ryte alia lang e siapharan kha rawse zah, a thungnaw te a rawthungnaw khate a lung a thosahku, alia lang e siapharan nynh alung huapaw te athung huapaw rhawkaw khate a tuk cih. Thuasalama aning nynh tae lan khyh, pawccecize a looh a ae hae paw nynh amaw kha rawsete aruh lante a paccynnua cih hae.²⁶Aning kha a phee cih hae, a rhawkaw hae tuh ro athua cih hae zah rhawkaw patae kha chia athua cih hae.²⁷Tuh-e siapharan lu ning hae tuh ahoy leipaw kha tuate ccaboi ccangkheit kyakhe hynhupaw bya kha a hokuh cih hae. Thuasalama mih tuakunaw ccing lan khyh, pawccecize khyapaw accyh zaw loh khyh.²⁸Thahlang e siapharan tuh sisua patae te a ram lang a ki cih, thuasalama a thinlung tetuh athyaapaw byakinnaw kha a rawse. A rypaw kha a cyih cih zah a ram lang a ki cih.

²⁹“Aning tuh khyapaw accyh kyakhe alia lang e ram kha a teenua cih, thuasalama langmawlya hawte thua vae lan khyh.³⁰Pawccecize Kittim ccingbaw hae nynh a ccianua cih hae zah, aning tuh lungrote nulang a ki cih. Athyaapaw byakinnaw kha a thinria thyhte a cyih cih. A ki cih zah athyaapaw byakinnaw a vua hae paw kha pekite a oihsah cih hae.³¹Aning nynh a saw hae paw rhawkaw hae tuh oun thua cih hae zah beikinn te koihnawpaw kha a thusah cih hae. Tyty raepaw maee-ute silawnaw kha a daesah cih hae zah, ro a mangpaw anungsikuhpaw kha a nung cih hae.³²Byakinnaw a vua hae paw kha tuh hynpyate a soih kho cih hae; thuasalama mih Pachia tungvaw mih lungzipaw tuh tynkaring lan a thadyn cih hae zah a douru cih hae.³³Ccungccaw hae laku e mihaw hae nynh ccungccaw patae kha a ccangpah cih hae; thuasalama ccyh sosoh tuh thaloi te maeephupi khate chiakunaw, kyngkunaw te luadekunaw kha a teing cih hae.³⁴Tuhcite he a teing hae te, bawmnaw beihtaraw a mue cih hae, ccungccaw patae tuh ahme lei lante minmin kalan a pan cih hae.³⁵Accyh athang mawlaezung tuh, mihaw hae abang tuh syntawnaw teingte thyaasah athua nawlan hae, chia athua cih hae, pawccecize khyapaw accyh azaw mawlaezung tuhcite acyihkuh ung cih.

³⁶“Thahlang e siapharan nynh a lungry hawte a cyih cih. Amaw te amaw kha a hangsakuh cih zah pachia miakaw laeze alesaehua lante a tuakuh cih, pachia hae Pachia kha rawsete ri lan umpaw bya kha a ho cih. Thinrianaw ccyh tuh phe accing mawlaezung a laan a sui a ua cih, thuasalama byapaenaw thyhte cyi athua mamin cih.³⁷Aning nynh a minpaaw hae kya-e pachia hae kha thuasah, nopi hae nynh a sungsah hae paw pachia kha thuasah sawtua lan khyh, ccangpaw pachia miakaw kha mah sawtua lan khyh, pawccecize amaw te amaw kha humhung balyn laeze ka lehua cite a tuaku.³⁸Tuh-e hae laeze rhawlungrua pachia kha saw a tuahua cih; a minpaaw hae nynh a ny boi lei hae paw pachia kha sui, ngun, aphutepaw lung hae te amee rupaw lasung kha pyate saw a tuahua cih.³⁹Ramccang pachia kya-e bawmnaw liate atyn huaccepaw rhawlungrua hae kha a rae cih. A tungvaw nawccawnaw a hoi hae paw kha houh a hoirumsah cih hae zah, ccungccaw patae a uktu lang a nung cih hae, ram kha lasung lang a nee cih hae. Ccyh Thangnaw

⁴⁰“Ccyh athangnaw kya vae tuh alia lang e siapharan nynh aning kha rhaw a tuk cih. Thuasalama thahlang e siapharan nynh marangle hae, marang rhawkaw hae te ccingbaw patae khate khiccung hawte a douru cih zah, tuh-e ram hae kha tui alepaw hawte teenuate a tuk cih hae.⁴¹Aning nynh apuithyapaw ram kha a teenua cih zah ccungccaw athong patae kha a theih cih, thuasalama Edom ram, Moab ram te Ammon hae ram kyaze abyapihua hae paw tuh aning kuih kyate a lue cih hae.⁴²Aning nynh ram hae kha a tuk cih hae zah, Izip ram mah lue lan khyh.⁴³Aning tuh aphutepaw sui, ngun te Izip ram a hoirumnaw balyn kha a uktu lang a tang cih; Libia ram te Ethiopia ram nynh mah a nulang a zui cih hae.⁴⁴Thuasalama nithua lang te thahlang e thongpang nynh a thinphangsah cih zah, ccungccaw patae kha ro khylan te maemih khylan myarya thinriate a pou cih.⁴⁵Rili te apuithyapaw mua thyaapaw laku khe a siapharan bu kha a sak cih. Tuhzemah a bawmtu lu kheit san um leite aning athangnaw ccyh tuh a thua cih. Michi hae Thoothuinaw

¹“Tuh ccyh lyatuin, na minphuin hae thungkhawtu, bawi lepaw Mikhael tuh yn langkuh cih. Minphuin hae a um takaw hae te a um boi leipaw lungriathaenaw ccyh tuh yn thua cih. Thuasalama tuh ccyh lyatuin, ccauh kya a min zei athuapaw na minphuin hae miakaw tuh luesah athua cih hae.²Laenoi kya a ih hae paw patae tuh oun tho cih hae, abang tuh zungzae hiinnaw te a tho cih hae zah, abang tuh maethyanaw te zungzae theihryakunaw khate a tho cih hae.³Mihaw hae tuh vaawlui a awpaw hawte a aw cih hae zah, ccungccaw patae kha dingnaw kalan a cciakhae hae paw tuh awsi hawte zungzae te zungzae cia a aw cih hae.⁴Thuasalama Daniel, nang tuh ccyh athang mawlaezung, e bya hae hynh khawsung lah, ccauh kha tazeih khiatua. Ccungccaw patae tuh nulang malang a ccue bungthung cih hae zah hoyleinaw tuh alungthung cih,” a ci.

⁵Tetuh kae, Daniel nynh ka do zah, ccangpaw lu ning hae tuh oun langkuh hae, lu kheit tuh vawkhu hynhlang raw thadyn zah ccangpaw lu kheit tuh khuhlang raw a thadyn.⁶Lukheitpaw nynh laaw te kuapaw boeining kha lawkuh zah vawkhu palung lang a umpaw lukheitpaw kha, “E ngaeangnaw hae athang cia hohsemou aro ung cih?” cite a khia.⁷Laaw te kuapaw boeining kha lawkuh zah vawkhu palung lang a umpaw lukheitpaw nynh a ranglang kuih te a voilang kuih kha vaawlang hangthung zah, “Ccyh kheit, ccyh ning, te angankuh lungkhu athua cih, athyaapaw ccungccaw hae huhan a pazaeku ccyh he yn thang te, e uccaw hae balyn hynh accing cih,” cite zungzae hiinpaw Pachia min kha phyate bya a kinkupaw kha ka thae.⁸Ka thae zemah ka thaethya khyh; tukeiccuze kae nynh, “Ka bawipaw, e uccaw hae hynh athangnaw pawtemou yn cyihkuh cih?” cite ka khia.⁹Aning nynh, “Daniel, cciatua, pawccecize e bya hae tuh athangnaw ccyh athua mawlaezung khawsung lanpaw te tazeihkhia lanpaw nynh thua.¹⁰Ccungccaw patae tuh thyaasah athua cih hae zah syntawtua athua cih hae, thuasalama ccungccaw hoylei hae paw nynh tuh thaethya lan khyh hae zah ahoy lei lante po a cyih cih hae. Thuasalama mihaw hae tuh a thaethya cih hae.¹¹Tyty raepaw maee-ute silawnaw kha daesah thua zah ro a mangpaw anungsikuhpaw kha thadynsah he athua ccyh kyate nin thong kheit za ning sung takua aro cih.¹²Nin thong kheit za thum sung thum nin pangaw cia lungzite a um hae paw tuh lungtua hae paw nynh thua hae.¹³Thuasalama nang tuh athang cia cciatua, tynkaring lan la um; ccyh athang nin kya na lasung kha ccou khylan na thoothui cih,” a ci.

Bible Society of Myanmar

https://app.library.bible/content/1a340f5ae072b2f4