HOSEA1
1Judah siapharan Uzziah, Jotham, Ahaz te Hezekiah siapharan hae she lya te Israel siapharan Jeroboam, Joash ccapaw she lyakhe Beeri ccapaw Hosea kalan khe Bawipaw bya tuh yn thua. Hosea Innbyn2Bawipaw nynh Hosea kyate masaty bya he a ho te, Bawipaw nynh Hosea kha, “Cceih lah, ohhuanung kha zu lang dykute ohhuakunaw ccaaw hae kha saahku tua, pawccecize e ram nynh Bawipaw kha vua zah myarya lepaw ohhuakunaw kha a rae vae,” a cipya.3Tukeiccuze Hosea nynh cceih zah Diblaim ccanung Gomer kha zu lang a umkhae, te tuh-e nung nynh ccaawpoi zah ccapaw lu kheit a saahpya.4Te Bawipaw nynh Hosea kha, “Ccapaw kha Jezreel cite minphutua, pawccecize sosoh aro te Jezreel chiise keiccuze Jehu ciihan hae kha de ka tah cih hae, Israel hae peenaw kha ka thangsah cih.5Tuin nin kya Jezreel accya khe Israel li kha ka khyapah cih,” a ci.6Gomer nynh ccaaw bua poi zah ccanung kha a saah. Te Bawipaw nynh Hosea kha, “Ccanung kha Lo-ruhamah cite minphutua, pawccecize Israel hae kha ngaethya ka umsah vae lan khyh hae zah, ka ngaethya vae lan khyh hae.7Thuasalama Judah kha tuh ngaethya ka umsah cih zah Bawipaw mih Pachia liate ka khum cih hae; li, thaloi, rhawtuk, marang, marang rhawkaw hae khate ka khum lan khyh hae,” a cipya.8Gomer nynh a ccanung kha mateitui he a phia te, ccaawpoi zah ccapaw kha a saah.9Te Bawipaw nynh, “Ccapaw kha Lo-ammi cite minphutua, pawccecize nanning tuh ka ccungccaw hae na thua khyh oh zah kae tuh nae Pachia ka thua khyh,” a ci. Israel kha Bua Dingsahnaw10Tuhzemah Israel hae tuh toutae leipaw te riatae leipaw rili laesia hawte athua cih hae; “Nanning tuh ka ccungccaw hae na thua khyh oh,” cite hopya athuanaw hae hmin kya mawkhe, “Ahiinpaw Pachia ccaaw hae,” cite hopya athua cih hae.11Judah hae te Israel hae tuh pynkheihlan suelua athua cih hae zah, minmin nynh cciakhaetu lu kheit kha a pokuh cih hae; ram kha a ccou cih hae, Jezreel nin tuh alesae cih.1Na upaw hae kha Ammi cite ko hae lah, na ccianung hae kha Ruhamah cite ko hae. Israel Lungzi leinaw, Detahnaw te Shawkhawnaw2Nae nung kha soihbia oh,pawccecize aning tuhka zu thua vae khyh zah,kae tuh a vawpaw ka thua vae khyh,a ohhuakunaw kha vua zah,milae vawpaw te a seinaw khaa vua nawlan soihbiatua oh,3tuhkhyhze tuh a boeining khaka phae cih zah,a pui lya hawte a ccakaeteka umsah cih,ramkaw te ka losakuh cih zah,ramrou lang ka tangsah cih,tui kanmawnaw teaning kha ka chisah cih.4A ccaaw hae tuh ohhuakunawccaaw hae athua hae keiccuze,a ccaaw hae kha ngaethyaka umsah lan khyh hae.5Pawccecize mih nung tuha ohhuakuh;minmin a poitu hae aning tuhmaethya lan umpaw kha a rae vae.Pawccecize aning nynh,“Ka sungsah hae nulangka zuikuh cih;minmin nynh kae khasanlou te tui, tuuming te laaw,chitui te niapaw atui khayn pya hae,” a ci.6Tukeiccuze a laanpi khahinpawbu te ka khaw cih;a ccianaw a muihku khyh ccaw citelungrua ka ruakhaw cih.7A sungsah hae khadeehui hae salamahphah lan khyh hae;minmin kha ccung hae salamahmuih lan khyh hae.Tetuh aning nynh, “Masaty eka vawpaw kalan ka kithui cih,pawccecize atu laezelangmawlya kha ka hanlanahoyhua,” cite a ho cih.8Aning kha ccathae, misutui techitui a pyatu tuhkae ka thuapaw kha nyh khyh zah,Baal pachia hanlana mang hae paw sui te ngun khahysahte a pyatu tuh kae ka thuapaw khanyh khyh hae.9Tukeiccuze loohrue ccyh kyaka ccathae kha ka lahthui cih zah,misutui non ccyh kyaka misutui kha mah ka lahthui cih;a ccakaete um zahbong khylan ka pyapawka tuuming te ka laaw kha ka lah cih.10Atu a sungsah hae muihnaw khe,a boeining kha phaete maethya ka law cih,humhung nynh mahka kuih kyate luesah lan khyh.11A lungpawnaw, a poi hae,sawpawdia ccyh hae,a sabbath hae teaccyh khyapaw a poi hae balyn khaka thangsah cih.12“E hae tuh ka sungsah hae nynhyn pya hae paw nynh thua,” citeaning nynh a hopaw a misu ku hae tea thaeku ku hae kha ka roh cih.Khah-e hae kha ramkaw langka tangsah cih zah,loramsaw hae nynh a ae cih hae.13Baal pachia hae hanlanmynkhuhpaw kha upyate,a kuihpu te aphutepawlung khate ccaankuh zah,kae kha ningte, a sungsahhae nulang a zuiku nin,Baal pachia hae poi nin keiccuzeaning kha de ka tah cih, citeBawipaw nynh a ci.14Tukeiccuze, atu aning khaka soihtua cih,ramkaw lang ka cciakhae cih zah,nebaleih lan ka hopah cih.15Tuin kyakhe a misu khokhu khaka pya cih, Akhor Accya khangaehoinaw thuakaw lang ka rae cih.Tuin kyakhe aning a zawthaw lya,Izip ram kyate yn pou lya hawteyn leihru cih.16Bawipaw nynh a hopaw tuh, tuin nin khe nang nynh, “Ka vawpaw,” cite nae ko cih zah, “Ka Baal,” cite nae ko vae lan khyh.17Baal hae min kha a mung kyate ka vua cih zah, mih min kha ho thua vae lan khyh.18Tuin nin khe loramsaw hae, vaawlang e pavaw hae te laekhu avawthya hae paw ryte nanning hanlan byakinnaw kha ka rae cih; li, thaloi te rhawtuk-zunghe hae kha laephi kyate ka roh cih zah, khyndadyh lan kae isah cih.19Nang kha ka zu lang zungzae kae umkhae cih; dingnaw, byading, zungzae tynpaw sungsahnaw te thawccinaw khate ka zu lang kae umkhae cih.20Lungzite zu lang kae umkhae cih; te nang nynh Bawipaw kha na nyh cih.21Bawipaw nynh a hopaw tuh, tuin nin khe na bya kha kae leih cih,vaawlui bya kha ka thaepah cih zah,vaawlui nynh laephi khabya a thaepah cih;22laephi nynh ccathae, misutui techitui kha bya a thaepah cih hae zah,minmin nynh Jezreel khabya a thaepah cih hae;23te aning kha laephi kyakamaw hanlan ccacii lang ka tukuh cih.Te Lo-ruhamah khangaethya ka umsah cih,Lo-ammi kha, “Nang tuhka ccungccaw nynh na thua,” citeka hopah cih zah,aning nynh, “Nang tuhka Pachia nynh na thua,” citea ho cih, a ci.Hosea te A Lungzi leipaw Nopi1Bawipaw nynh kae kha, “Israel hae nynh ccangpaw pachia hae kalan maekute misu thae aroupaw te raepaw sanlou kha a ry hae zemah, Bawipaw nynh minmin kha a sungsah mamin hae hawte, la cceih lah, vawpaw mang a hoi pite a ohhuakuhnung nopinung kha la sungsah tua,” cite bua yn hopya.2Tukeiccuze ngun shekel haw lae pangaw, barli homer ccangkheit te misutui ling kheit khate tuh-e nopinung kha ka re.3Te kae nynh amaw kha, “Ka ccungccaw lante nin patae na um cih; na ohhuakuh lan khyh, pise te na ihkheih lan khyh oh, kae te mah ikheih lei lan,” ka cipya.4Pawccecize Israel hae tuh siapharan, uktu bawi, silawnaw, athyaapaw tung, ranpibawi angki te terafim zohtuh kha hoi leite nin patae a um cih hae.5Tukoute Israel hae tuh a ki cih hae zah Bawipaw mih Pachia te mih siapharanpaw David kha a ccung cih hae; nyalang ccyh kya tuh Bawipaw hoynaw kha mue khylan amaw kalan sawtuate a cceih cih hae. Israel tungvaw Seisahnaw Bya1Pou Israel ccungccaw hae, Bawipaw bya hynh ngaetua oh;pawccecize Bawipaw tuh ram kya um hae paw tungvaw kya seisahnaw bya a hoi.E ram kya lungzinaw, sungsakunaw um leite,Pachia nynaw um khyh.2Pekunaw, hynhunaw,ccungccaw chianaw,runaw te milae zu milae vawpaw teseinaw a um;chiise luasakunaw ccangkheit kouteccangkheit a um.3Tukeiccuze ram tuh rawkhuite um zah,ram lungkhu um hae paw balyn tuhthawthyate a um hae;loramsaw hae, vaawlang e pavaw hae,rili kya-e ngasaw hae heize a zo hae.4Tuhzemah hum nynh sanmahrawse nan sah,hum nynh sanmah ae seisah nan sah,pawccecize, pou ranpibawi,na tungvaw ka lungccing leinaw a um.5Ninthu khe nang tuhna thy na pawkuh cih;khuazi khe profeh mah nang rytea thy a pawkuh bua cih,na nung kha mah ka roh cih.6Ka ccungccaw hae tuh hawnawazya hae keiccuze aroh hae;nang tuh hawnaw kha na vua keiccuzeka hanlan ranpibawi langtangnaw kyate nang kha kae vua.Na Pachia kawbya khana ning vae keiccuzekae nynh mah na ccaaw hae khaka ning cih hae.7Ranpibawi hae tuh houh lung hae zah,kae kha rawsete houh a sei hae;mih phu-enaw khamaethyanaw lang ka paleih.8Minmin nynh ka ccungccaw haeseinaw khate a hoirum hae;houhouh sei hae sah ci a ry hae.9Ccungccaw zapi hae kya acyiku hawteranpibawi hae kya mah acyihkuh cih;mih ozia keiccu de ka tah cih hae zah,mih cyisahnaw hanlan ka liaru cih hae.10Minmin tuh a ae hae zemahbyn lan khyh hae;a ohhuaku hae zemahpungzae lan khyh hae;pawccecize mimaw toulou khaohhuakunaw kalan pyakuh hae zah,11Bawipaw kha a vua vae hae.Israel Zohtuh BeiknawMisutui te athawpaw misutui nianaw nynhnythyanaw kha a zosah.12Ka ccungccaw hae nynh thingphe khatuanaw ngiakuh hae zah,phuring-unawpaw mih ccungngue nynha ny ry hae paw kha a hopya hae.Pawccecize ohhuaku rynaw thinlung nynhminmin kha cciakhaesei hae zah,mih Pachia kha vuate a ohhuaku hae.13Mua dung hae kyakhe thuasah,sangpyng hae vawlan khe thuasah,a mynlyh ahoypaw phaesi ku kaw,poplar ku kaw, terebint ku kaw khe thuasahsilawnaw kha a rae hae.Tukeiccuze nae ccanung hae tuhohhuakuh hae zah,nae monung hae nynhmilae vawpaw te a sei hae.14Nae ccanung hae nynha ohhuaku hae ze thuasah,nae monung hae nynh milae vawpaw tea sei hae ze thuasah minmin khade ka tah lan khyh hae;pawccecize pise hae toulou nynhohhuanung hae ryte cceihsei hae zah,beikinn e ohhuanung hae rytesilawnaw a raekheih hae;tuhcite nythyanaw a hoi leihae paw tuh a roh cih hae.15Pou Israel, nang tuhna ohhuaku zemahJudah tuh a seipaw lang tang nan sah.Gilgal khua lang tee nan lah,Beth-aven khua lang cceihthung nan,“Bawipaw tuh a hiin thyhte,” citebyakinkunaw rae nan.16A lungkhungpaw vaetua tohlaw hawte,Israel tuh a lungkhung;Bawipaw nynh tuutaw khaakopaw ramnonaw kyaa paeesaku hawte,Israel kha atu looh a dang kho cih tou?17Efraim tuh zohtuh hae kyaphang a kyngkuh,aning tuh a um rythyte um sah.18Mih zu-aenaw kha he a thangsah hae te,ohhuakunaw kyakhe a ciakuh hae;mih phu-enaw laezeohhuaku rynaw kha a duaahua hae.19Khivae nynh a sake lungkhu khelungdete a mung vae hae,mih kya-e silawnawpaw hae keiccuzemih maethah cih.Israel te Judah kha Byapianaw1Pou ranpibawi hae, e hynh thaetua oh!Pou Israel hae, e hynh pekitua oh!Pou siapharan hae, ngaetua oh!Nanning tuh byapianaw na teing cih oh;pawccecize nanning tuhMizpah kya syapaw kaang,Tabor mua vawlan rawkhawpaw miabu,2Shittim kya thaepaw laekarungakhupaw lang na tang vae oh;thuasalama tuh-e hae balyn khade ka tah cih hae.3Efraim kha ka ny,Israel tuh ka kyate thuruh khothua lan khyh;Pou Efraim, atumaw heizena ohhuakuh vae;Israel tuh anungsikuh vae.4Mih cyisahnaw nynh minmin khamih Pachia kalanki lan kaw-ua khyh hae.Pawccecize ohhuakunaw thinlung tuhmih lungkhu phang um zah,Bawipaw kha nyh khyh hae.5Israel a lysakunaw nynhamaw toulou kha a rawse;Efraim tuh a cyiseinaw kyakhea thy a pawkuh;Judah mah minmin rytea thy a pawkuh bua.6Mih vaetua phu hae temih tuuphu hae khateBawipaw ccung lana ccia hae zemah,amaw kha muih lan khyh hae;aning tuh minmin tephe sawkuh vae hae.7Minmin tuh Bawipaw tungvawmih lungzi vae khyh;pawccecize mih ccaaw hae tuhaphung thyhte saahpaw ccaaw haethua vae khyh hae.Sawpaw sah leihpaw nynhminmin te mih loo hae kha a roh cih hae.8Gibeah kya saki tu oh,Ramah kya mungkae tu oh.Beth-aven kya rhawtuknawroi khate siatua oh;Benjamin phin hae,nulang dotua oh!9Efraim tuh detahnaw nin kyaarohpaw lang a tang cih;Israel phin hae laku kyayn cyihkuh lanpaw phe ariapaw khaka thaesah hae.10Judah bawi hae tuh ramri a nuepawccungccaw hae lang a tang vae hae;ka thinrianaw kha mih tungvaw kyatui hawte ka bu cih.11Efraim tuh tuaasahkunaw a teing,byapianaw kya phe a shung,pawccecize accakaepaw nulangzuiku lan bya a paeku.12Tukeiccuze kae tuh Efraim hanlanzanpaw ka lo zah,Judah hae hanlan athuhpaw nynh ka lo.13Efraim nynh a ccinaw khamuihkuh zah,Judah nynh mah a vaemaw khahe a muihkuh te,Efraim tuh Assiria lang cceih zah,alesaepaw siapharan kalanccungccaw a saw hae.Thuasalama aning nynh nanning khaae dansah kho lan khyh oh,nae vaemaw kha ae hoysahkho lan khyh oh.14Pawccecize kae tuh Efraim hanlanchindeih hawte ka thua zah,Judah hae hanlan chindeihnopaw hawte nynh ka thua.Kamaw ccaccei nynh thoh ka paecih hae zah ka cciataw cih hae;minmin kha ccaring ka cciakhaecih hae zah humhung nynh mahkhum vae lan khyh hae.15Minmin nynh mih cyiseinaw khaphykute ka mae yn ccung mawlaezung haeka umnaw kalan bua ka kithui cih.Vawsaw a teing hae keiccuzeka thawccinaw kha yn ngiakuh cih hae.Ngaesiku lan Hyynaw1“Rang oh, Bawipaw kalan ki oh sih;pawccecize aening khathoh oun pae zemah, oun dansah cih;aening kha oun bua zemahah vaemaw kha oun heepah cih.2Nin ning koute aening khaoun hiinsah thui cih;nin thumnaw khe aening khaoun thosah cih zah,amaw malang khe ah hiin cih oh.3Bawipaw kha nyh oh sih,amaw kha ny lan zuakuh oh sih;aning yn langku lanpaw tuhkhua yn dae lanpaw hawte phe aria;pharyphary rahpaw khuaa hawte thuasah,laephi kha tui a bupawhawkhuaa hawte thuasah aning tuhaening kalan yn thua cih,” a ci.Israel te Judah Ngaesiku leinaw4Pou Efraim, nang khapawtemou kae cyih cih?Pou Judah, nang khapawtemou kae cyih cih?Na sungsahnaw tuh awkhua e maeking tetaloi azothyapaw vuiraw te nynh aloku.5Tukeiccuze profeh hae khamangte minmin kha ka bae vae hae,ka munglae kya-e bya teminmin kha ka chia vae hae,ka byapianaw tuh awnawhawte nynh athua.6Ka rypaw tuh atynpaw sungsakunaw khathua zah, silawnaw thua khyh,maee-ute silawnaw laezePachia nynaw kha ka ryhua.7Thuasalama Adam hawtebyakinnaw kha a ro hae;tuin kyakhe ka tungvawmih lungzi khyh.8Gilead tuh hoyleinaw a raetu haekhuapi thua zah,chii loihkuhpaw ccunoh nynh thua.9Damiah hae nynh ccungccaw khaa buh hae hawte,ranpibawi hae tuh pynkheihlansueluakuh hae zah,Shekhem khua lang cceihpaw laanpi kheccungccaw kha a chia hae,ri lan umpaw hoyleinaw kha a rae hae.10Israel hae kyakhe ri lan umpawuccaw kha ka muih vae;Efraim a ohhuakunaw tuhtuin kya a um,Israel tuh anungsikuh.11Pou Judah, nang na hanlan mahloohrue ccyh kha khya athua vae.1Ka ccungccaw hae khaka kikhae hae zah,Israel kha he ka dansah te,Efraim a ozia hoyleinaw teSamaria kya-e ahoy leipawcyisahnaw tuh alang cih;pawccecize minmin nynhahme lei lante cyih hae zah,ru khylan kia biate a tee hae,atolang khe mah kyngdeteuccaw a luade hae.2Mih hoyleinaw balyn khaphe ka ny cipawminmin nynh tua khyh hae.Atu mih cyisahnaw nynhmimaw kha a koihlu vae hae,minmin tuh ka malang a um hae.3Mih hoyleinaw khate siapharan khaa lungtuasah hae zah,mih hynhunaw khate bawi hae khamih lungtuasah hae.4Minmin balyn tuh milae zumilae vawpaw kya a seihae paw nynh thua hae;minmin tuh asopaw talyng-angte nynh aloku hae,sanlou thoutu nynh vaekhui khaa nonde koutesanlou athoo makhia talyng-ang khamaee noihnua leite a nung.5Ah siapharan poi nin khea kuihkaw e bawi hae tuhmisutui a rui hae; siapharan tuhccungccaw a saryatu hae rytea kuih a dyngbua.6Minmin tuh talyng-ang hawtemyarya aso hae, mih thinlung tuhmih lungkhu kya maee lang arua;azi zidae mih thinrianaw tuhbyabyate maee lang arua;awkhua takaw vae tuharuapaw maee hawte thawte arua.7Mih balyn mawte talyng-anghawte so hae zah,mih uktu bawi hae kha a chia hae.Mih siapharan hae balyn tuha chih vae hae; kae yn kopawlu kheit sanmah um khyh.8Efraim tuh minphuin ccangpaw hae rytea mungkuh hae;Efraim tuh buhleih leitevoikheit lang kyalya thoupawsanlou nynh thua.9Ramccang hae nynh a thawzung khaa aepya hae,thuasalama tuh-e tuh nyh khyh;a lu kya sangpaw patae a um,thuasalama tuh-e tuh nyh khyh.10Israel a lysakunaw nynhamaw toulou kha a rawse;tuhzemah Bawipaw mih Pachia kalankithui khyh hae,e balyn hynh acyiku zemahamaw kha ccung khyh hae.Minphuin hae Doliakunaw11Efraim tuh angaeepaw, tuanaw hoi leipawvahu te nynh aloku vae;minmin nynh Izip kha ko hae zah,Assiria langkhe a cceih hae.12A ccia lya hae khe, minmin khaka miabu te ka bong cih hae;vaawlang e pavaw hawte laekhu langka sahbung cih hae;a pumkunaw hae kya a thae hae thyhte,minmin kha ka thuihei cih hae.13Ka kyate ccanglang a cciaseivae hae keiccuze, minmin hanlanngaethya lan kou um!Kae kha yn dou vae hae keiccuzeronaw nynh thuanua hae sah!Minmin kha ka shawkhaw hae zemah,kae kha rawsete hynbya a ho hae.14Thinlung ccaccing teka kalan sia leite,mih ikhung vawlan kherawkhuite a um hae;ccathae te misutui mue khylanmimaw saw toulou kha a awku hae;kae kha yn dou hae.15Thungnaw kuih a pyatu hae tea thuiheitu hae tuhkamaw nynh ka thua,tuhzemah kae kha rawseteahoy leipaw khua kha a khanku hae.16Ccungkia leipaw kalan khe a maeku hae;minmin tuh ahynthyapawli te nynh aloku vae hae;mih bawi hae tuh mih lysakunawbya keiccuze thaloi te a chih cih hae.Izip ram kya saryanaw a teing cih hae.Israel A Lungzi leinaw1Mungkae kha tutua!Rhaw tuh Bawipaw inn luki khelantaw hawte yn zou,pawccecize minmin nynhka byakinnaw kha roh hae zah,ka kawbya kha a ei hae.2Israel hae nynh ka kalan khe,“Kae Pachia, kaening tuhIsrael hae kae thua zah,nang kha kae ny!” a ci hae.3Israel hae nynh hoynaw khaa vua vae hae; rhaw hae nynhminmin kha a deehui cih hae.4Minmin nynh ka kaw leitesiapharan hae kha a poku hae;ka ny lei lante bawi hae khaa khangku hae.Mimaw ronaw hanlanmih sui mih ngun khatezohtuh hae kha a raeku hae.5Pou Samaria, na vaetuataw kha ka hua.Ka thinrianaw tuhmih tungvaw maee lang arua.Hohseciamou mih seinawthyaa leite a um cih hae?6E vaetuataw hynhIsrael hae kyate nynh yn thua,a kuihhae hoypaw nynha raepaw nynh thua;e vaetuataw hynh Pachia thua khyh.Samaria kya-e vaetuataw khazoihtatyh lan khya athua cih.7Minmin nynh khivae ccacii kha tu hae zah,khiccung looh kha a rue cih hae.A thadynpaw loohku nynhavui vui khyh zah,looh kha pousah lan khyh;looh a la pou zemahramccang hae nynh a ae cih hae.8Israel kha po laang athua vae;atu tuh ccungkia leipaw angphe hawteminphuin ccangpaw hae laku kya a um.9Minmin tuh Assiria langkhea cceihthung vae hae,a makhaete a khiavuikuhpawramkaw e lann hawtea khiavuikuh vae;Efraim tuh a sungsah hae kalanamaw toulou kha a zuakuh vae.10Minphuin ccangpaw hae kalana zuaku hae zemah,minmin kha ka suelua cih hae;ccyh aro mawze siapharan hae tebawi hae kya-e phupaw ripaw khariathaete a phu cih hae.11Efraim nynh seishawku nawlansilawhang kha patae houh rae zah,tuh-e hae tuh amaw hanlanseinaw lang houh a tang hae.12Aning hanlan ccangpyanaw khapatae ka zeipya zemah,aning te asekuh leipaw lang a ria.13Silawnaw kha rae hae zah,silawnawpaw saw kha a ae hae zemahBawipaw nynh ccoupah khyh hae.Mih hoyleinaw kha a liathui cih zah,mih seinaw hanlan de a tah cih hae;Izip lang a kithui cih hae.14Israel nynh amaw a Raetupaw kha ning zah,inn ahoyhoypaw kha a sakku vae;Judah nynh mah khualungruakoihkuhpaw khuapi patae kha a raeku;thuasalama a khuapi hae khamaee te ka soi cih hae zah,koihlupaw a khuapi hae khamaee nynh a u cih hae.Israel kha Detahnaw1Pou Israel, na lungtua nan sah!Ccangpaw minphuin hae hawtena lungpaw nan sah;pawccecize na Pachia kyatena phiakuh zah na ohhuaku vae.looh ruenawpaw huimin miakaw kyakhena ohhuakunaw mee kha na ry.2Huimin te misutui tungnawpaw nynhminmin kha kua lan khyh hae,misutui thawpaw tuhminmin hanlan pou lan khyh.3Efraim ciihan hae tuhBawipaw ram kya um lan khyh hae;Izip ram lang a ki cih hae zah,Assiria ram khe athyaa leipawlooh kha a ae cih hae.4Misutui niapaw silawnaw khaBawipaw kalan rae lan khyh hae zah,si a lawnaw hae paw nynhaning kha a lungrythuasah lan khyh.Tuhcihawpaw silawnawpaw hae tuhmichi raw a rah hae paw kya-elooh hawte athua cih;tuh-e looh a aepaw balyn tuha nungsikuh cih hae;mih looh tuh mimaw mih vuelaw zahmih vuesonaw hanlan kyalya athua cih;tuh-e looh tuh Bawipaw inn langthuakhae thua lan khyh.5Accyh khyapaw poi nin teBawipaw poi nin khenanning nynh pawmou na cyih cih oh?6Ronaw kyate a lue hae zemahIzip nynh minmin kha a suelua cih hae,Memfis khua khemih rhua kha uu athua cih.Aphutepaw mih ngun uccaw hae tuhlonua nynh a zithin cih zah,mih umnaw kyakhe hinpaw ku hae apo cih.7Detahnaw ccyh a thua vae,liarunaw nin a thua vae;Israel hae nynh,“E profeh tuh mingaee nynh thua,muisaw ccungccapaw tuha lungkyh khyh!” cite a sia hae.Nae hoyleinaw ale keiccuzenae kya-e huakunaw tuh myarya ale.8Profeh tuh ka Pachia hanlanEfraim tungvaw rhawviatu nynh thua,tuhzemah profeh nynha cyipaw miakaw kyakhekaang kha a syakhaw hae,a Pachia inn kya heizehuakunaw a um.9Gibeah she lya hawtemih ozia kha mimaw toulou nynhthawte a roku hae;aning nynh mih hoyleinaw khaa liathui cih zah, de a tah cih hae.10Ramkaw umpaw misu thae hawteIsrael kha ka muih.Athae takawpaw thaeku ku kya-eavoi typaw athae hawtenae minpaaw hae kha ka la muih hae.Thuasalama Baalpeor kya thua hae zah,maethya lan umpaw uccaw kalan khemimaw toulou kha apkuh hae zah,a ry hae paw uccaw hawteanungsikuhpaw lang a tang hae.11Efraim a phu-enaw tuhpavaw hawte a zou cih—ccaaw saahkunaw, ccaaw poinaw teccaaw hoinaw um lan khyh!12Ccaaw a saahku hae zemahlu kheit sanmah a hiinhy lei lan ciateka chitawsah cih hae.Minmin kha he ka cciataw hae te,minmin hanlan ngaethya lankou um ccaccing cih!13Langmaw lyaze Efraim tuhdo ry umpaw lonua ku hae kyaapopaw ungcci ku taraw hawte nynh thua,thuasalama atu vae tuhEfraim nynh a ccaaw hae khaccungccaw chianaw kalana cciakhae vae cih hae.14Pou Bawipaw , minmin kha pya hae—pawmou na pya cih hae?Ccaaw palei rohpaw neita-inn temateitui abya leipawmatei kha pya hae.15Mih hoyleinaw miakaw tuhGilgal kyate nynh yn tho;tuin kyate minmin huanaw kha ka tho.Ahoy leipaw mih cyisahnaw keiccuzeka inn kyate ka dee cih hae.Minmin kha ka sungsah vae lan khyh hae;mih bawi hae balyn tuhrhawthotu hae nynh thua hae.16Efraim tuh vawsaw a tung,mih tharui tuh karae rou zahathae thae lan khyh hae.Ccaaw a saahku hae zemaha sungsah hae pawmih ccaaw hae kha ka theih cih hae.17Ka Pachia bya khaa ngae khyh hae keiccuzeminmin kha a vua cih hae;minmin tuh minphuinccangpaw hae laku kyaa khiavuikuh hae paw langa tang cih hae.Israel Seinaw te Kyngnaw1Israel tuh thae patae athaepawmisu ku te nynh aloku.A thae houh lung zahsilawhang khahouh lung lan a raeku;a ram a kaethung thyhtea beikpaw tung hae khahouh puithya lan a raeku.2Mih thinlung tuh hme khyh;mih cyiseinaw keiccuzea teing cih hae.Bawipaw nynh mih silawhang hae khaa tingbung cih zah,mih tung hae kha a roh cih.3Minmin nynh ho hae zah:“Aening nynh Bawipaw raw khaah ri khyh oh keiccuzesiapharan ah hoi khyh oh,siapharan nynh pawmououn cyipah kho cih?” a ci hae.4Bya te kyalya a ho hae; accakaepawbyakinpyakunaw hae kha a rae hae;tukeiccuze tazaeccoikunaw tuhleikua lungkhu the-awnaw kyakhesy a hoipaw lonua hawte a po.5Beth-aven kya umpawvaetuataw zohtuh hanlanSamaria khuaccaaw hae tuha thyngkuh hae,tuh-e vaetuataw a beik hae paw tuha rah cih hae zahranpibawi hae tuhrawkhuite a um cih hae,pawccecize vaetuatawa phu-enaw kha ccanglanga cciakhae vae hae.6Tuh-e zohtuh tuh alesaepawsiapharan kha lasung langpya khylan Assiria ram langcciakhae athua cih.Efraim tuh maethyanawa mue cih zah, Israel tuha zohtuh keiccu a maethah cih.7Samaria hae siapharan tuhtui vawlan aphalypawthingphe taraw hawte a zo cih.8Israel nynh seinawa raenaw Aven khua eahangpaw hmin hae tuh aroh cih hae.Mih silawhang hae vawlan khehinpaw te lonua hae nynha zithin cih hae.Minmin nynh mua hae kha,“Oun tingthin oh,” citea cipah cih hae zah,sangpyng hae kha,“Oun ccawphu oh,” citea cipah cih hae.9Pou Israel, Gebeah khuana um lya mawte na sei vae;tuin kyakhe minmin tuhpo a sei vae hae.Rhaw nynh minmin khaGibeah khua kyaphah lan khyh hae tou?10Kawngae leipaw ccungccaw hae khadetah khylan ka ccianua cih hae;mih seinaw phuin ning keiccuzedetahnaw he a teing hae te,minphuin hae nynh minmin khaa sueluanuakuh cih hae.11Efraim tuh kia vae paw teccatan tin a rypawvaetua tohlaw thua zah,apuithyapaw a nging khangaethya ka umsah;thuasalama Efraim khalaephi phe mih lan ka thuesah cih;Judah nynh lei a thue cih;Jakob nynh amaw hanlanlei a thuekuh cih.12Naemaw hanlan dingnaw ccacii khatukuh oh lah, atynpaw sungsakunawlooh kha rue oh;a umhanpaw laephi kha thuekuh oh;pawccecize Bawipaw yn thuanawkhylan te nae tungvawdingnaw khuaarawsah khylanamaw kha ccung ccyh athua vae.13Hoyleinaw lei kha na thue oh zahdingleinaw kha na rue vae oh,hynhunaw thae kha na ae vae oh.Pawccecize myarya lungpawnae rhawkaw hae tenae thawzung kha na doliaku oh.14Tukeiccuze nae ccungccaw hae kyarhawtuknaw tuh a um cih zah,nae rhawlungrua balyn tuh aroh cih,Shalman siapharan nynhBeth-arbel kha rhawtuk zaha ro ccyh lyazenung hae tuh mih ccaaw hae rytepalae tui lana deihnaw hae hawte athua cih.15Pou Bethel, na hoyleinaw tuhmyarya alung keiccuzenang tuh tuhawte cyi na thua cih,Khuadaetakaw kheIsrael siapharan khavua athua ccaccing cih.Israel tungvaw Pachia Sungsahnaw1Israel tuh a di lyakhe ka sungsah zahka ccapaw kha Izip ram kyate ka ko.2Minmin kha houh ka ko hae zah,ka kyate houh a cceih hae;Baal pachia hae kalan khesilawnaw rae hae zah,zohtuh hae kalan khemynkhuhpaw kha a pya hae.3Tuhzemah Efraim kha laancciaa ccangpahpaw tuhkamaw ka thua zah,minmin kha ka kuih te ka dua hae;thuasalama minmin ka dansahhae paw kha nyhkuh khyh hae.4Ccungccaw thawccinaw rui te thuasah,sungsahnaw rui te thuasahka cciakhae hae.Imua hae kha mih byaki kalana hangthungtu hae hawte nynhkae tuh minmin hanlan ka thua.Minmin kha ka bakhungnua hae zahlooh ka dang hae.5Ka kalan kithui lan a mya hae keiccuzeIzip ram lang a kithui cih hae zahAssiria tuh mih siapharan langa tang cih.6Thaloi rhaw nynh mih khuapi hae khaa thiing cih hae,khua koikua ccong hae khaa khyapah cih hae zah, ahoy leipawmih khuakhannaw keiccuzephe a mih cih hae.7Ka ccungccaw hae tuh ka kyateccanglang maekute a cceihsei hae.Ahang Huaccepaw Pachia kha a ko hae,thuasalama aning nynh minmin khapapin hangthung khyh hae.8Efraim, pawtemou nang khakae vua kho cih?Pou Israel, pawtemou nang khamilae kalan kae ap kho cih?Admah khua hawte pawtemounang kha kae roh kho cih?Zeboiim khua hawte pawtemounang kha kae cyih kho cih?Ka lungkhu kya ka thinlung tuharulaekuh vae;nang ngaethya ae umsahpawka thinlung tuh nebaleih.9Ka thin myarya ria thyhteka cyih lan khyh;Efraim kha bua ka roh vae lan khyh;pawccecize kae tuh Pachia ka thua zahccungccaw ka thua khyh,nae laku a umpawAthyaapaw Pachia ka thua zah,nae kalan thinriate kae thua lan khyh.10Minmin tuh chindeih hawte a siapawBawipaw nulang a zuikuh cih hae;aning nynh he a sia vae ze,a ccaaw hae tuhniccaw langte thyngkuteoun thua cih hae.11Minmin tuh Izip ram kyatepavaw hawte arangteoun zou cih hae zah,Assiria ram kyate vahu hawtearangte oun zou cih hae;minmin kha mih inn langka kisah cih hae, citeBawipaw nynh a ci.12Efraim nynh lingnaw bya teyn koihlu zah,Israel hae nynh hynhunaw bya teoun koihlu hae;thuasalama Judah tuh Pachia rytepo cceihkheih hae zahAthyaapaw Pachia tungvawlungzinaw a hoi.1Efraim nynh khivae khatuu hawte a rin,nithua lang e khivae khaanin ninlang a deehui;minmin nynh ngaeenaw tepuathonaw kha a lungsah thung hae;Assiria te byakinnaw khamang a rae hae pitechitui kha Izip ram langkhe a phu hae.Dounaw Ccyh Asae2Bawipaw nynh Judah tungvawseisahnaw bya a hoi,Jakob kha a ozia thyhtede a tah cih zah,a cyisahnaw thyhte a liaru cih.3Jakob nynh a nung vue lungkhu khea upaw umnaw kya umru lanzuakuh zah, piccan he yn thua tePachia kha a rawse.4Jakob tuh vaawpaw tetaekuh hae zah phe a tae,Jakob nynh rah zahhythuanaw kha a ngiaku,Pachia tuh Bethel kya Jakob tetungkuh hae zah bya a hokuh hae.5Tuh-e vaaw Pachia Bawipaw tuha min Bawipaw a cikuh!6Tukeiccuze nanning tuhnae Pachia kalan kithui oh,sungsakunaw te byading khatynkaring lan kyngkuh oh lah,nae Pachia kha po ngaehoi oh.7Aning tuh kungkupaw thua zah,ahme leipaw zawccu kha a ccyngku,milae kha vawsawnaw pya a ry.8Efraim nynh, “Alei, kae tuhka hoirum vae,sisua patae ka tungkuh vae;ka tungkupaw balyn hynhahme leite a muepaw nynh thua citeyn seisah lan khyh hae,” a ci.9Kae tuh Izip ram kyateae cciakhaepaw Bawipawna Pachia nynh ka thua;accyh khyapaw poi nin hawte,bu hae kyakhe bua kae umsah cih.10Profeh hae kya ka ho vae;vizin patae ka langsaku vae,profeh hae kyate ronawkae thuasah cih.11Gilead kya hoyleinaw a um,minmin tuh accakaepaw langa tang ccaccing cih hae.Gilead kyakhe tangnuapaw hae khasi a law hae,tukeiccuze mih silawhang hae tuhleikua lungkhu e the-awnaw kyaa umpaw lungpum hawte athua cih hae.12Jakob tuh Aram ram lang a ccue,tuin kyakhe Israel tuh zu mue khylanmilae rya kha lah zah tuu a rin.13Bawipaw nynh profehlu kheit kha mangte Israel hae khaIzip ram kyatecciakhae thung hae zah,profeh lu kheit nynhminmin kha a do-oih hae.14Efraim nynh Bawipaw khamyarya a thinriasah,tukeiccuze a Bawipaw nynha seinaw kha a tungvawa ccawsah cih zah,a sarya keiccuze a liaru cih.Israel kha Byapianaw1Efraim nynh bya a ho vae ze,ming hae tuh a thyngkuh hae;Israel hae nynh aning khaa hangthung hae;thuasalama Baal khaa beik keiccuze sei zah a chih.2Atu mah po sei hae zahzohtuh kha a raeku hae,mih hawnaw thyhtengun zohtuh hae kha raekuh hae zah,kuihhae hoy hae paw nynhzohtuh hae kha a rae hae.“E zohtuh hae kalansilawnaw rae oh,” a ci hae.Ccungccaw hae nynh vaetuatawzohtuh hae kha a myng hae!3Tukeiccuze minmin tuhawkhua e vuiraw hawte thuasah,taloi azopaw dangtui hawte thuasah,huimin kyate khiccungkhiapaw nynha zoukhaepaw ccatanphue hawte thuasah,thanlan-aw kyate apoupawmaeekhuh hawte thuasah a zo cih hae.4Tuhzemah kae tuh Izip ram kyateae cciakhaepaw Bawipawna Pachia nynh ka thua;kamaw laelan ccangpaw Pachia khanang nynh na hoi khyh,kamaw laelan ccangpaw khumtu um khyh.5Ram arounaw ramkaw kyalooh ae dangpaw tuhkamaw nynh ka thua.6Looh he ka dang hae tuh a byn hae;mih vueso zah lysakunaw thinlunga hoi hae keiccuze kae kha yn ning hae.7Tukeiccuze kae tuh minmin hanlanchindeih hawte ka thua cih,kaesing hawte laanpi pe kheka buh cih hae.8A taw a luapya hae pawvong hawte minmin khaka zounua cih hae zah,ka pue ka bou cih hae;tuin kyakhe chindeih hawteka tei cih hae,loramsaw nynh minmin khaa bou hae hawte ka bou cih hae.9Pou Israel, nang kha kae roh cih;hum nynh mou ae bawm kho cih?10Nang ae khum kho cih pawna siapharan tuh atu teimou a um?“Siapharan te uktubawi hae kha yn pya,” citena ho hae paw nang ae uktu bawi hae tuhna khuapi hae kya a um hae tou?11Ka thinria pite siapharan khakae pya zah, ka thin phe u lanteaning kha bua ka law.12Efraim a hoyleinaw khatungde thua zah,a seinaw kha ccyke athua.13Neitangia ccinaw nynhaning kha a thuanua vae,thuasalama aning tuhangaeepaw ccapaw nynh thua;pui azaw ccyh lya a nung vue kyatea pui leipaw imua hawte nynh athua.14Minmin kha Sheol thungnaw kyateka shawkhaw cih hae tou?Chinaw kyate ka shawkhaw cih hae tou?Pou chinaw, na kya-e shethya hae tuhteimou a um hae?Pou Sheol, na kya-e ronaw tuhteimou a um?Ngaethyaumsahnaw tuhka muih leinaw kya thuruh athua.15Efraim tuh phaeku hae laku kyahinlalyh lan a um zemah,nithua lang e khisan tuh yn zaw cih,Bawipaw kya-e khisan tuhramkaw langte yn zaw cih zah,a tuisung te a tuidy hae tuhkarae arou cih.Tuh-e khisan nynh aphutepaw uccawa tungkupaw miakaw khapong a mung cih.16Samaria nynh a Pachia khaa dou keiccuzedetahnaw a teing cih;minmin tuh thaloi te a chih cih hae,mih ccaaw taraw hae tuhpalae tui lan deihnaw athua cih hae zah,ccaawpoipaw mih nopi hae tuhmih vue kha seii athua cih hae.Ngaesiku lan Ngianaw1Pou Israel, Bawipawna Pachia kalan kithui tua,pawccecize na hoyleinaw keiccuzena khuliakuh vae.2Sawsangnaw bya kha paccynkuteBawipaw kalan kitua;Amaw kyakhe,“Kae cyiseinaw balyn hynhoun ngaethyatua,thawccinaw te kaening hynhbeih oun ccoutua,kae munglae te kae ho hawtekae pya cih.3Assiria nynh kaening hynhoun khum lan khyh;rhawtuknawpaw marang khakae ccikuh lan khyh;Kae kuih te kae raeku hae paw kha,‘Nang tuh kae Pachia nynhna thua,’ cite kae ho vae lan khyh.Ngawraw hae nynhna thawccinaw khaa mue hae,” cite hopah oh.Seingaethyanaw4Mih lungzi leinaw khaka dansah cih hae;ka lung ccaccing teka sungsah cih hae,pawccecize mih tungvawka thinrianaw phe dae vae.5Kae tuh Israel hanlandangtui hawte ka thua cih;aning tuh lili paw hawte a paw cih,Lebanon ramkaw e thingku hawtea tharui a saw cih.6Aning tuh ange hae atoih cih;oliv thing hawte a puithya cih zah,Lebanon mua hawte a mynkhuh cih.7Minmin tuh ka mynlyh kaw khebua a umthui cih hae zah,khokhu hawte hinlalyh lana um cih hae;misu ku hawte a lethung cih hae zah,Lebanon e misutui hawtemih mynkhuh cih.8Pou Efraim, zohtuh hae tekae tuh pawmou kae sekuh?Na sawsangnaw ae thaepahpaw tenang ae do-oihpaw tuhkamaw nynh ka thua;kae tuh zungzae hinlalyhpawmaeccaw ku hawte nynh ka thua;na lungzinaw tuh ka kyateyn thuapaw nynh thua.9A haw hae paw nynhe hae hynh a thaethya hae;a nyhthya hae paw nynhe hae hynh a ny hae.Pawccecize Bawipaw laanpi tuh kyh zahmiding hae nynh a zui hae,thuasalama misei hae tuhtuh-e laanpi kya a khuliakuh hae.
Bible Society of Myanmar