EZEKIEL1

Marangle Vizin

1Kum sung thum kum, sawpaw sah palinaw, nin pangaw nin kya Khebar vawkhu kin khe kyngte ramccang lang a cciakhae hae paw kya ka um lyakhe vaawlui tuh yn hungkuh zah Pachia kya-e vizin kha ka muih.2Tuh-e sawpaw nin pangaw nin khe (tuin nin tuh Jehoiakhin Siapharan kha kyngte ramccang lang a cciakhaenaw hae kum pangawnaw kum nynh thua),3Khaldi ram, Khebar vawkhu kin khe Bawipaw bya tuh Buzi ccapaw ranpibawi Ezekiel kalan yn thua; te tuin kyakhe Bawipaw kuih tuh a tungvaw khe a um.
4Ngawran ka do lyakhe, myarya rupaw khise tuh thahlang te yn zaw: tuh-e khise kyakhe phaephae akpaw nynh phang koihlupaw myarya lepaw maeking te dalahdalah awpaw maee a um, te maee lungkhu tuin sohin hawte a awpaw awnaw a um.5Tuh-e maee lungkhu tuin ahiinpaw ahysuepaw ccangpali a um. Tuh-e hae mih muinsan tuh: ccungccaw muinsan lo hae zah,6ccangkheit ze mitmae ccangpali hoi hae zah sake ccangpali cci a hoi hae.7Mih ccu tuh lawbabin lan cih zah mih ccukaw tuh vaetuataw ccukaw nynh alo; phaephae akpaw sohin hawte a ak hae.8Mih sake kaw, mih pyn san pali khe ccungccaw kuih a hoi hae. Tuh-e ccangpali hae nynh mitmae hae te sake hae a hoi hae:9mih sake hae tuh ccangkheit te ccangkheit a tungkuh hae; tuh-e hae tuh a ccia hae ze maeku leite malang lawbabin lan a cceih hae.10Mih mae muinsan tuh: ahiinpaw ahysuepaw ccangpali hae maesue tuh ccungccaw maesue hoi hae zah, mih ranglang khe chindeih maesue, mih voilang khe tangnuapaw maesue, mosipi maesue a hoi hae;11tuh hawte nynh mih maesue tuh athua hae. Mih sake kha mih luki langkhe tharae a daw hae; ahiinpaw ahysuepaw ccangkheit cci nynh sake bua ning cci a hoi hae, mih sake bua kheit tuh ccangpaw ahiinpaw ahysuepaw sake te tungsakuh hae zah ccangpaw bua kheit nynh mih pyn kha a bong.12Ahiinpaw ahysuepaw ccangkheit cci tuh muisaw nynh a ccianaw miakaw langkhe ccanglang maeku leite malang khe lawbabin lan a cceih hae.13Tuh-e ahiinpaw ahysuepaw hae ngaelung khe maee-e aruapaw alopaw, ahiinpaw ahysuepaw hae laku kya nulang malang a nuekuh bungthungpaw maeekhua alopaw a um; maee tuh phaephae ak zah maee kyate khozaw alaekuh.14Ahiinpaw ahysuepaw hae tuh khozawlaekuhpaw hawte nulang malang rangtareih lan a ccue bungthung hae.
15Ahiinpaw ahysuepaw hae kha ka do lyakhe, tuh-e ccangpali hae mih pepan raveih khe leccu ccangkheit cci kha laekhu khe ka muih.16Leccu hae muinsan te a raenaw hae paw tuh hynhte nynh thua: mih muinsan tuh phaephae akpaw, aphutepaw lung te lokuh zah, ccangpali mawte mih muinsan pong lokuh hae; a raenaw hae paw tuh leccu ccangkheit lungkhu a umpaw leccu ccangkheit te nynh aloku.17He a ccia hae ze, leccu ccangpali hae tuh ccanglang pawpaw kalan mah maeku leite pynkheit lan a cceihthya hae.18Leccu hae tuh hang hae zah ri lan a um hae, pawccecize tuh-e leccu hae ccangpali mawte po voilu lan mit a hoi hae.19Ahiinpaw ahysuepaw hae tuh he a ccia vae hae ze, mih pe khe leccu hae tuh a cceihbua hae; ahiinpaw ahysuepaw hae tuh laephi kyate he a hangku vae hae ze, leccu hae mah a hangkuh bua hae.20Muisaw nynh a ccianaw miakaw langkhe minmin tuh cceihbua hae zah, minmin ryte leccu hae tuh a hangkuh bua hae; pawccecize ahiinpaw ahysuepaw hae muisaw tuh leccu hae kya a um.21Ahiinpaw ahysuepaw hae tuh a ccia hae ze, leccu hae mah cceihbua hae zah, a thadyn vae hae ze leccu hae mah a thadynbua hae; laephi kyate he a hangku hae ze, leccu hae mah a hangkuh bua hae; pawccecize ahiinpaw ahysuepaw hae muisaw tuh leccu hae kya a um.
22Ahiinpaw ahysuepaw hae lu luki khe adawkuhpaw te lokuh zah muinsado hawte a akpaw, mih lu luki tharae dawkuhpaw a um.23Adawkuhpaw zakaw khe mih sake hae kha ccangkheit nynh ccangpaw ccangkheit kalan khe lawbabin lan a daw hae, tuh-e ahysuepaw hae ccangkheit cci nynh mih pyn abongpaw sake ccangning cci a hoi hae.24He a ccia hae ze, tui alepaw roi hawte thuasah, Alesaepaw kya-e kholungthyhpaw hawte thuasah mih sake roi kha ka thae, ngaluin-ngaluin accaepaw roi tuh rhawkaw hae roi hawte nynh athua; he a thadyn hae ze, mih sake kha a sawbung hae.25Te mih lu luki umpaw adawkuhpaw kyate roi roikheit yn ccae; he a thadyn hae ze, mih sake kha a sawbung hae.
26Mih lu luki umpaw adawkuhpaw vawlan khe nilar lung alopaw, bawitungkhung tahawpaw a um; tuh-e bawitungkhung vawlan tuin ccungccaw muinsan alopaw tuh a haung.27Atae alopaw kyate palung lang kyakhe phaephae akpaw sohin te alokuhpaw, po voilu lan maee te alokuhpaw kha ka muih; atae alopaw kyate alia lang kyakhe maee te alokuhpaw, po voilu lan dalahdalah akpaw kha a um.28Tuhte po voilu lan dalahdalah akpaw muinsan tuh khuaaraw ccyh lya maeking kya alangkuhpaw sawdoih te nynh aloku. E hynh Bawipaw phu-enaw te alokuhpaw muinsan nynh thua.
Tuh-e tuh he ka muih te, ka mae ka sahbung, te lukhakheit nynh bya a hopaw roi kha ka thae. Ccakue Vizin
1Aning nynh kae yn hopyapaw tuh: Pou ccungccapaw , thadyntua, bya kae hopah cih.2Te aning nynh bya he yn hopah te, muisaw tuh ka lungkhu lang tee zah ka ccu te yn thadynsah; te bya yn hopyapaw kha ka thae.3Aning nynh yn hopyapaw tuh: Ccungccapaw, nang kha Israel hae kalan, kae yn doutu dou a mangpaw minphuin kalan kae saw cih; minmin te mih minpaaw hae nynh atunin cia ka tungvaw a sei vae hae.4E ciihan tuh a bunglepaw te a lungkhungpaw nynh thua. Nang kha minmin kalan kae saw cih zah minmin kyakhe, “Bawipaw PACHIA nynh hynhte a ho,” cite na hopah cih hae.5(Minmin tuh dou a mangpaw phin thua hae zah), a ngae hae zemah thuasah, a ngae khyh hae zemah thuasah minmin laku kya profeh lu kheit a um cipaw a nyh cih hae.6Pou ccungccapaw, thabu hae te hinpaw hae nynh nang kha ae koihlu hae zah zekang hae laku kya na um zemah minmin kha rih nan hae, mih bya kha mah rih nan; mih maesue keiccuze na lungroh nan sah, pawccecize minmin tuh dou a mangpaw phuin nynh thua hae.7Minmin tuh dou a mangpaw phuin thua hae zah, a ngae hae zemah thuasah, a ngae khyh hae zemah thuasah ka bya hynh na hopah cih hae.
8Thuasalama, pou ccungccapaw, nang tuh kae hopyapaw hynh ngae lah, khah-e dou a mangpaw phuin hawte dou a mangpaw thua nan; na khalang aw lah, kae pyapaw hynh aetua, yn ci.9Ka do zah, ccaw azeikuhpaw ccakue kha phang a ccyngpaw kuih nynh ka kalan yn dyngkupaw kha ka muih.10Aning nynh tuh-e ccakue tuh ka malang khe a daw; nulang malang te azeikuhpaw tuh-e ccakue kyakhe rawnaw bya, khuinaw bya te ngaethyanaw bya kha azeikuh.
1Aning nynh yn hopah zah, pou ccungccapaw, na kalan pya athuapaw kha aetua; e ccakue hynh aetua, te cceih lah, Israel phin kha hopah hae, yn cipya.2Tukeiccuze ka khalang tuh ka aw zah, ae lanpaw ccakue kha aning nynh yn pya.3Aning nynh kae kha yn hopah zah, Ccungccapaw, kae pyapaw e ccakue hynh ae lah, bynsaku tua, yn cipya. Tetuh ccakue tuh ka ae zah, ka khalang kya khoitui hawte a e.
4Aning nynh kae kha yn hopah zah: Ccungccapaw, Israel phin kalan cceih lah, ka bya hynh hopya tua hae.5Thaethya arupaw bya a ho hae paw kalan te arupaw bya a ho hae paw kalan nang kha kae saw khyh, Israel phin kalan nynh kae saw—6mih bya na thaepya kho lei hae paw, thaethya arupaw bya a ho hae paw te arupaw bya a ho hae paw minphuin patae kalan nang kha kae saw khyh. Thanccingte, tuh-e hae kalan kae la saw lanze, na bya kha ae ngaepah cih hae.7Thuasalama Israel phin nynh na bya kha ae ngaepah lan khyh hae, pawccecize Israel phin balyn tuh mih bungle zah mih lungkhung keiccuze ka bya kha ngae ry khyh hae.8Minmin hawte a bunglepaw te a lungkhungpaw lang kae rae vae.9Na terui kha rihlung laeze a tang huapaw, lung a tang huaccepaw lang kae rae vae; minmin kha rih nan hae, mih maesue keiccuze na lungroh nan sah, pawccecize minmin tuh dou a mangpaw phin nynh thua hae, yn cipya.10Aning nynh kae yn hopyapaw tuh: Ccungccapaw, kae hopya lanpaw ka bya balyn hynh na nakaring te thae lah, na thinlung kya lawku tua;11te kyng hae zah ramccang lang a cciakhae hae paw na ccungccaw hae kalan cceih lah, hopah hae. Minmin nynh a ngae hae zemah thuasah, a ngae khyh hae zemah thuasah, “Bawipaw PACHIA nynh hynhte a ho,” cite hopah hae. Khebar Vawkhu kya Ezekiel
12Tetuh muisaw nynh kae kha yn hangthung zah, Bawipaw phu-enaw tuh a umnaw kyate he a hangku lyakhe, myarya ccaepaw siho kha ka nulang khe ka thae;13tuh-e siho tuh ahiinpaw ahysuepaw hae nynh ccangkheit te ccangkheit mih sake a nuihkuh hae paw siho, mih pe umpaw leccu hae roi te siho myarya ccaepaw nynh thua.14Muisaw nynh kae kha yn hang zah ccaring yn cciakhae; kae tuh ka thinlungccih zah ka bungzou, Bawipaw kuih tuh ka tungvaw myarya a kuihlungccih.15Kyngte ramccang lang a cciakhae hae paw Khebar vawkhu pe, Tel-abib khua um hae paw kya ka thua zah, nin sari lungkhu ngaeangthuate minmin kya ka um.
16Nin sari koute Bawipaw bya tuh ka kya yn thua:17Ccungccapaw, nang kha Israel phin a rintu lang kae rae vae; ka bya na thae takyhte, ka kyate yn thuapaw raeringnaw kha na pya cih hae.18“Na chih ccaccing cih,” cite ccungccaw hoyleipaw ka hopyapaw kha nang nynh raeringnaw na pya khyh ze thuasah, ccungccaw hoyleipaw kha a hiinnaw khum khylan raeringnaw bya na hopya khyh ze thuasah, tuh-e ccungccaw hoyleipaw tuh a hoyleinaw keiccu a chih cih; thuasalama a chiise kha nang kae ngia cih.19Thuasalama ccungccaw hoyleipaw kha raeringnaw na pya zah, a hoyleinaw kyate thuasah, ahoy leipaw a cyisahnaw kyate thuasah a maeleihku khyh lanze a hoyleinaw keiccu aning tuh a chih cih, thuasalama nang na hiinnaw tuh na khumku vae.20Tukoute miding tuh a dingnaw kyate maeleihkuh zah hoyleinaw kha a rae ze thuasah, a malang khe thykupawkunaw kha ka nungkhaw ze thuasah aning tuh a chih cih; aning kha raeringnaw na pya khyh keiccuze a seinaw hanlan a chih cih, a la rae vae paw a dingnaw kha liathuipya thua lan khyh; thuasalama a chiise kha nang kae ngia cih.21Tuhzemah, miding kha a sei khyh nawlan raeringnaw na pya zah a sei khyh lanze, raeringnaw kha a lawku keiccuze a hiin ccaccing cih, te nang na hiinnaw tuh na khumku vae. Ezekiel tuh A Makhaete Um zah Yccae Khyh
22Bawipaw kuih tuh ka tungvaw a um; te aning nynh kae kha, Thokuh lah, accya langkhe cciatua, tuin kya nang kha bya kae hopah cih, yn cipya.23Tukeiccuze ka thokuh zah accya lang ka cceih; tuin kyakhe Khebar vawkhu kin ka muih boi paw phu-enaw te alokuhpaw Bawipaw phu-enaw tuh a thadyn; te ka mae kha ka sahbung.24Muisaw tuh ka lungkhu lang tee zah kae kha yn thadynsah; te kae kha bya yn hopah zah: Cceih lah, na inn lungkhu khe khawsungku tua.25Ccungccapaw, ccungccaw hae kalan na ccia kho khyh nawlan arui te khii na thua cih;26bya na ho khyh nawlan te minmin kha na thuihei khyh nawlan hae, na lae kha na dankhaling kya kae besakuh cih; pawccecize minmin tuh dou a mangpaw nynh thua hae.27Thuasalama bya kae hopya ze, na mung kha kae hungpah cih zah, nang nynh minmin kha, “Bawipaw PACHIA nynh hynhte a ho,” cite na hopah cih hae; a ngae rypaw nynh ngae sah lah, a ngae ry leipaw nynh ngae nan sah; pawccecize minmin tuh dou a mangpaw nynh thua hae. Jerusalem Koihlunaw Muihsahnaw
1Pou ccungccapaw, ohkhe kha lah lah, na malang khe nungtua. A vawlan khe Jerusalem khuapi zuh kha soiitua;2Jerusalem kha rawsenawpaw rhawvianawpaw bu, khualungrua, laekarung, rhawkaw ryahmin te rhawlungrua tingnawpaw uccaw kha po voilu lan raenua tua.3Te sivaw aphepaw kha lah lah, nang te khuapi laku khe sivaw pang hawte thungtua, na mae kha khuapi kalan khe hawitua, khuapi tuh koihlu thua sah, nang tuh khuapi a koihlutu na thua cih. E hynh Israel phin hanlan muihsahnaw nynh thua.
4Te na voilang pahaekute ih lah, Israel phin tungvaw detahnaw tuh na tungvaw khe khangku tua; tuhcite na i nin aninlu thyhte minmin tungvaw detahnaw kha na teing cih.5Pawccecize nin kheit tuh mih tungvaw detahnaw kum kheit te alokuh lante ria thua zah, mih tungvaw detahnaw aninlu za thum sung takua kha na tungvaw ka khang vae; tuhcite Israel phin kya-e detahnaw kha nang nynh na teing cih.6Tuh-e aninlu tuh he na ccingsah te, vae ningnaw na ih cih zah na ranglang khe na pahaekuh cih, te Judah phin tungvaw detahnaw kha nin sung pali lungkhu teingtua; nin kheit tuh kum kheit hanlan ria athua cih.7Koihlupaw Jerusalem langkhe na mae na hawi cih, te na kuih na dyngnua cih zah rawsete profehbya na honua cih.8Na teingnaw ccyh kha na ccingsah mawlaezung voikheit langte voikheit langkhe na paleihku kho khyh nawlan, arui te kae khii cih.
9Te chanvuih, barli, pei hae, bia hae, ccaw te pangccaw kha lah hae; ang angkheit lungkhu khe pyde hae lah, sanlou kha raeku tua. Voikheit lang pahaekute na i nin aninlu za thum sung takua lungkhu tuh-e sanlou tuh na ae cih.10Nin kheit ze shekel ccangkuin aripaw looh kha na ae cih; amaw accyh te na ae cih.11Toukute tui kha mah na neih cih, nin kheit ze paling ling kheit kha amaw accyh te na neih cih.12Sanlou kha ccungccaw hae muihnaw khe ccungccaw ia khate na rua cih zah, barli sanlou kha ae hawte na ae cih, a ci.13Bawipaw nynh, “Ka dee cihnaw hae minphuin hae laku khe Israel ccungccaw hae nynh anungsikuhpaw mih sanlou kha tuhcite a ae cih hae,” a ci.14Tetuh kae nynh, “Pou Bawipaw PACHIA, kamaw te kamaw papin ka thusakuh boi khyh; amaw chi lan chihpaw thuasah, sarangpaw nynh a teipaw thuasah, athuhpaw saw thuasah ka di lyate atu cia ka ae boi khyh,” ka ci.15Tetuh aning nynh kae kha, “Ccungccaw ia ccelang vaetua ia kha mang lan kae ua cih, tuh-e khate na sanlou kha na ruakuh cih,” yn ci.
16Te aning nynh kae kha, Ccungccapaw, Jerusalem hanlan looh bawmnaw kha ka paetaw vae cih; minmin nynh looh kha toukute thinphang biate a ae cih hae; tui kha mah toukute lungrote a neih cih hae.17Tui te looh um leite, lu kheit te lu kheit lungrote a dokuh cih hae, mih tungvaw detahnaw keiccuze mih ngethah cih. Jerusalem Rawsepaw Thaloi
1Pou ccungccapaw, thaloi hepaw kha lawku tua; sang ngotu kya-e sangteih hawte mang lah, na sang te na khawming kha ngoku tua; te khin nawlan zawccu kha lawkuh lah, na sang kha pum thum lang phia lah nungtua.2Khuapi koihlu ccyh he accing te, na sang pum thum pum kheit kha khuapi lungkhu khe maee te na u cih; pum thum pum kheit kha na lah cih zah khuapi lungkhu phe lekuh lan thaloi te na aw cih; pum thum pum kheit kha khivae kya na vua cih zah, kae nynh mah tuh-e sang nulang khe thaloi te ka zui cih.3Te tuh-e sang kya-e beihtaraw kha na lah cih zah na angkiccua adung khe na tungde cih.4Tuh-e sang kya-e abang kha bua na lah cih zah, maee kya phungte na u cih; tuin kyate maee nynh Israel phin balyn kha a pounua cih hae.
5Bawipaw PACHIA nynh hynhte a ho: E hynh Jerusalem nynh thua; minphuin hae ngaelung khe ka nung cih zah, ram hae nynh po a koihlu cih hae.6Aning tuh minphuin ccangpaw hae te a pepan po koihlu hae paw ram hae laeze hoyleinaw a rae huapaw lang tang zah, ka phungzae te ka phungbya hae kha a dou, ka phungzae hae kha vua zah ka phungbya hae kha zui khyh.7Tukeiccuze Bawipaw PACHIA nynh hynhte a ho: Nae pepan po ae koihlu oh paw minphuin hae laeze vawsawnaw na thuakhaehua oh zah, ka phungbya hae kha zui leite ka phungzae hae kha mah na kyngkuh khyh oh, thuasalama nae pepan po ae koihlu oh paw minphuin hae kya-e phungzae hae kha na zui oh;8tukeiccuze Bawipaw PACHIA nynh hynhte a ho: Kamaw ccaccei nynh kae ccianua cih oh; minphuin hae nynh a muihnaw hae khe, nae kya byapianaw ka rae cih.9Nae nungsikunaw balyn keiccuze papin ka rae boi leipaw te bua ka rae vae cih leipaw byapianaw kha nae tungvaw ka rae cih.10Thanccingte, pou Jerusalem, nang na ngaelung khe nungpaaw hae nynh mih ccaaw hae kha a ae cih hae zah, ccaaw hae nynh nungpaaw hae kha a ae cih hae; na tungvaw byapianaw ka rae cih zah, na kya ahiinhypaw miakaw kha teitei lang balyn phiariphiarae pong ka nung cih hae.11Tukeiccuze Bawipaw PACHIA nynh a hopaw tuh, kae tuh ka hiin thyhte, thanccingte, athupaw na uccaw balyn te thuasah, na nungsikunaw balyn te thuasah ka beikinnthyaa kha na thusah vae keiccuze kae theih cih; nang kha kae haang lan khyh zah ngaethya kae umsah lan khyh.12Na ccungccaw hae pum thum pum kheit tuh shethya khate a chih cih hae, tuhkhyhze na ngaelung kyakhe ccakanccinaw khate maemih athua cih hae; pum thum pum kheit tuh na pepan khe thaloi te a chih cih hae; pum thum pum kheit kha teitei lang balyn pong ka phiasakuh cih hae zah, mih nulang te thaloi khate ka zui cih hae.
13Tetuh ka thinrianaw tuh accing cih, ka bungpawnaw kha mih tungvaw ka langsakuh cih zah, ka lungrya achih cih; mih tungvaw ka thinrianaw he accing te, kae, Bawipaw nynh tuathyanaw te nynh ka ho cipaw kha a nyh cih hae.14Tuhpiaze na pepan umpaw minphuin ccangpaw hae laku thuasah, na pe po cceih hae paw balyn muihnaw kya thuasah nang kha ccungccaw adaenaw te saryapaw uccaw lang kae rae cih.15Thinria bungpaw te thuasah, myarya ccihpaw detahnaw te thuasah na tungvaw khe byapianaw he ka rae te, nang tuh na pepan umpaw minphuin ccangpaw hae kyakhe saryapaw te nuinsepaw, raeringnaw pyanawpaw te ri lan umpaw lang na tang cih. E bya hynh kae, Bawipaw nynh ka ho vae.16Nanning kha ro khylan, ka kaw cih paw ronawpaw the, chinawpaw ccakanccinaw the te kae kaw cih oh; ccakanccinaw kha nae tungvaw houhouh ka thuasah cih zah, nae looh bawmnaw kha ka paetaw cih.17Ccakanccinaw te sarepaw hae kha kae sawnua cih oh zah, nae ccaaw hae kha ae luade cih oh; shethya te chiise luanaw nynh ae teenua cih oh; nae tungvaw kya thaloi rhaw ka thuasah cih. Kae, Bawipaw nynh ka ho vae, a ci. Zohtuh Beikpaw Israel kha Byapianaw
1Bawipaw bya tuh ka kya yn thua zah:2Pou ccungccapaw, na mae kha Israel kya-e mua hae kalan khe hawi lah, profehbya honua hae.3Pou nanning Israel mua hae, Bawipaw PACHIA bya hynh thaetua oh! Bawipaw PACHIA nynh mua hae te sangpyng hae kalan te vahya te accya kyakhe hynhte a ho: Kae, kamaw ccaccei nynh nae tungvaw kya thaloi ka thuasah cih zah, nae kya-e ahangpaw hmin hae kha ka roh cih.4Nae silawhang hae tuh ccungccaw adae cih zah, nae kya-e mynkhuhpaw unawpaw tung hae tuh khya athua cih; chiapaw nae ccungccaw hae tuh nae zohtuh hae malang khe ka khulia cih hae.5Israel hae rhua kha mih zohtuh hae malang khe ka nung cih; nae ru hae kha nae silawhang pepan khe phiariphiarae ka nung cih.6Teitei na um oh zemah nae khua hae tuh ccungccaw adae cih zah, ahangpaw nae hmin hae tuh aroh cih, tuhteze nynh nae silawhang hae tuh a umhan cih zah aroh cih, nae zohtuh hae tuh akhya cih zah aroh cih, nae kya-e mynkhuhpaw unawpaw tung hae tuh bae athua cih zah nae ryalaw tuh azo cih.7Chiapaw ccungccaw hae tuh nanning laku khe a khuliakuh cih hae; tetuh Bawipaw ka thuapaw kha na nyh cih oh.8Thuasalama abang kha ka haang cih hae. Nanning laku e abang tuh minphuin ccangpaw hae laku khe thaloi rhaw kyate a lue cih hae zah, ram hae kalan khe pong a phiakuh cih hae.9Ka kyate a maeleihkuhpaw mih thinlung sei rynaw keiccu thuasah, mih zohtuh hae nulang a maeleihkuhpaw, sei rynaw mih mitdae keiccu thuasah kae hynh pawtemou yn ro hae cipaw kha a lue hae paw nynh kyng athuanaw hae minphuin hae laku khe kae kha yn liathui cih hae. Tetuh minmin nynh a cyisei hae paw hoyleinaw te mih nungsikunaw balyn keiccuze mimaw toulou nynh mih nungsikunaw kha a rihkuh cih hae.10Te Bawipaw ka thuapaw kha minmin nynh a nyh cih hae; mih tungvaw kya e shethya thuasah lanpaw hynh alakaw lan ka sii huataw khyh hae.11Bawipaw PACHIA nynh hynhte a ho: Israel phin kya-e athupaw anungsikuhpaw balyn hanlan ngaethya lan kou um! cite ho oh lah, nae kuih biate nae ccu te suakuh oh. Pawccecize minmin tuh thaloi, ccakan te shethya khate a chih cih hae.12Asawnaw kya um hae paw tuh shethya te a chih cih hae zah, anaenaw kya um hae paw tuh thaloi te a chih cih hae; ahiinhypaw miakaw te haang athua hae paw tuh ccakanccinaw te a chih cih hae. Tuhcite ka thinrianaw kha mih tungvaw ka ccingsah cih.13Silawhang hae pepan, zohtuh hae laku kya, ahangpaw sangpyng miakaw vawlan, mua dung hae balyn vawlan, hinlalyhpaw thingku kaw miakaw, anaw bungpaw phaesi thing miakaw kaw te minmin nynh mih zohtuh hae balyn kha mynkhuhpaw a pyanaw hae hmin miakaw kyakhe chiapaw mih ccungccaw hae nynh he a huekuh hae tuh, kae hynh Bawipaw nynh ka thua cipaw na nyh cih oh.14Minmin kha ka kuih ka dyngnua cih hae zah, khuasahnaw hae balyn pong lekuh lan, ramkaw kyate Riblah kyacia, ram kha ccungccaw adaenaw te ccungkia leipaw ram lang ka rae cih. Tetuh minmin nynh Bawipaw ka thuapaw kha a nyh cih hae. Ronaw Anae
1Bawipaw bya tuh ka kya yn thua zah:2Pou ccungccapaw, Bawipaw PACHIA nynh Israel ram kha hynhte a hopya:Athang vae! Ram aki ki pali tungvaw kyaathangnaw tuh athua vae.3Athangnaw tuh atuna tungvaw a thua vae,ka thinrianaw khana tungvaw kae sawnua cih;na cyisahnaw thyhte bya kae pia cih,na nungsikunaw balyn hanlannang kha de kae tah cih.4Nang kha kae haang lan khyh,ngaethya kae ungsah lan khyh.Na nungsikunaw tuhna kya phang um zah,na cyisahnaw keiccu de kae tah cih.Tetuh Bawipaw ka thuapaw kha na nyh cih.
5Bawipaw PACHIA nynh hynhte a ho:Ronaw phuin kheit koutephuin kheit yn thua!Dotua, ronaw yn thua.6Athangnaw a thua vae,athangnaw a thua vae.Nang kha ae thonuakuh vae;dotua, yn thua vae!7Pou ram lungkhu um hae paw,nae ronaw nynh ae thuanua vae oh.Accyh zaw vae, mua vawlanlungpawnaw thua leite,keisukeilae umnaw nin kha anae vae.8Aro mawze ka thinrianaw khanae tungvaw ka bu cih;ka thinrianaw kha nae tungvawkae ccingsah nua cih oh.Nae cyisahnaw thyhtebya kae pia cih oh zah,nae nungsikunaw balyn keiccude kae tah cih oh.9Nanning kha kae haang lan khyh oh zah,ngaethya kae umsah lan khyh oh.Na nungsikunaw tuhnae laku kya a um keiccuzenae cyisahnaw thyhtede kae tah cih oh.Tetuh nanning de ae tah oh paw tuhkae, Bawipaw nynhka thua cipaw na nyh cih oh.10Dotua, tuh-e nin!Dotua, tuh-e nin tuh yn thua vae!Nang na ronaw ccyh yn thua vae.Tungbang tuh apaw paw vae,lysakunaw tuh atoih vae.11Puathonaw tuh hoyleinawtungbang lang a lethung vae.Minmin tuh lu kheit sanmahhiinhy lan khyh hae,mih hoirumnaw,mih sisua mah laehy vae khyh;minmin laku kya phu-enaw um khyh.12Accyh azaw vae, anin yn nae vae;a retu tuh a lungpaw nan sah,a zuatu mah a ngaethah nan sah,pawccecize Pachia thinrianaw tuhminmin zapi balyn tungvaw khe a um.
13A zuatu nynh a la zua vae paw uccaw kalan aning nynh a hiinshe lungkhu bua kithui vae lan khyh. Pawccecize tuh-e zapi balyn te asekuhpaw vizin tuh ccing leite um lan khyh. Mih hoyleinaw keiccuze mih hiinnaw kha tynsakuh kho khyh hae.14Minmin nynh saki kha tu hae zah,atyn-are kha a paccyn hae;thuasalama humhung mahrhawtuknaw kalan cceih khyh,pawccecize ka thinrianaw tuhtuh-e zapi balyn tungvawphang a um.15Atolang khe thaloi a um,alungkhu khe shethya teccakannaw a um;ramkaw kya a umpaw tuhthaloi te a chih,khuapi kya a umpaw tuhccakan te shethya nynh a chia.16A hiinhy hae paw tuha lue hae lanze, accya kya umpawvahu hawte mua vawlan khemuih athua cih hae,mih balyn mawtemih hoyleinaw keiccua rah a khui cih hae.17Mih kuih tuha thawzyabung cih zah,mih ccukharu balyn tuhtui lang a tang cih.18Minmin nynh buriboei khaa zingkuh cih hae zah,rinaw nynh minmin khaa bong cih hae.Mih balyn mawte mih maethah cih zah,mih lu a okuh cih hae.19Mih ngunphua khalaanpi lang a vua cih hae,mih sui tuh athupaw lang ria athua cih.Bawipaw a thinria nin kya tuh mih ngunphua te mih sui nynh minmin kha khum kho khyh hae. Tuh-e te mih vueso lan khyh zah, byn lan khyh hae. Pawccecize tuh-e tuh mih hoyleinaw kyate yn thuapaw thykupawkunaw nynh thua.20Apuithyapaw mih ccaankunawpaw khate lysakuh hae zah, anungsikuhpaw mih zohtuh hae, luathua-ae-ui umpaw mih uccaw hae kha a raeku hae; tukeiccuze tuh-e tuh minmin hanlan athupaw uccaw lang ka rae cih.21Tuh-e tuh ramccang hae kalan telaephi vaw e ccungccaw hoylei hae kalan kheluadepaw uccaw hawteka ap cih hae zah,minmin nynh a thusah cih hae.22Minmin kyate ka mae khaccanglang ka hawitaw cih hae,tetuh aphutepaw ka hmin khaa thusah cih hae;puathonaw tuh tuh-e hminlungkhu lang a tee cih,minmin nynh tuh-e hmin tuha thusah cih hae.23Sivawrui bawtary kha raetua!Pawccecize ram tuhccungccaw chiapaw seinaw tephe abeih; khuapi tuhtuaasahkunaw te phe abeih.24Mih inn hae kha lawpya khylanathah huaccepawminphuin hae kha kae thuasah cih hae.Athungpaw ccungccaw haelysakunaw kha ka thangsah cih zah,mih hminthyaa hae kha thusahathua cih hae.25Lungriathaenaw he yn thua te,minmin nynh daenaw khaa ccung cih hae,thuasalama muih lan khyh hae.26Ronaw kha ccangkheit kouteccangkheit,laanbya kha ccangkheit kouteccangkheit yn langkuh cih;profeh kyate vizin khaa ccung cih hae; ranpibawi kyateccangpyanaw tuh um vae lan khyh zah,piccan hae kyatetuanaw pyanaw mah um vae lan khyh.27Siapharan tuh a rah a khui cih,bawi tuh lungrote a um cih zah,ram lungkhu eccungccaw hae kuih tuhathyngkuh cih.Mih cyisahnaw thyhtemih tungvaw ka cyih cih;minmin nynh bya a pia hae thyhtemimaw kha bya ka pia cih hae.Te Bawipaw ka thuapaw kha minmin nynh a nyh cih hae, a ci. Beikinn lungkhu Nungsikunaw
1Kum taruhnaw kum, sawpaw sah taruhnaw, nin pangaw nin khe ka inn kya ka haung zah, Judah piccan hae tuh ka malang a haung lya hae khe, Bawipaw PACHIA kuih tuh ka tungvaw yn thua.2Ngawran ka do zah, ccungccaw muinsan te alokuhpaw kha ka muih; atae te alokuhpaw alia lang tuh maee hawte langkuh zah, atae te palung lang tuh phaephae akpaw sohin te nynh aloku.3Kuih alopaw kha yn dyng zah ka sangtung khate yn kyng; te muisaw nynh kae kha laephi te vaawlui laku lang yn hangthung zah, Jerusalem khua, voidu lungkhu e thahlang a hawipaw teenaw sakoih kalan khe Pachia vizin khate yn cciakhae, tuin kyakhe thinriasahpaw zohtuh a haungnaw um zah, tuh-e zohtuh nynh amaw kha a thinriasah.4Accya kya ka muih boi paw vizin hawte, Israel Pachia a phu-enaw tuh tuin kya a um.
5Tetuh Pachia nynh kae kha, “Pou ccungccapaw, atu palung lang dothung tua,” yn cipya. Tukeiccuze palung lang ka dothung zah, silawhang sakoih palung lang, teenaw kyakhe thinriasahpaw tuh-e zohtuh tuh a um.6Aning nynh kae kha, “Ccungccapaw, ka beikinnthyaa kyate kae kha ccaring dee khylan, minmin nynh a cyi hae paw, Israel phin nynh a cyipaw myarya anungsikuhpaw kha na muih tou? E laeze anungsikuh huapaw kha na muih ung cih,” yn cipya.
7Te aning nynh voidu teenaw kalan khe yn cciakhae; ka do zah pang kya a ua ccangkheit ka muih.8Tetuh aning nynh kae kha, “Ccungccapaw, pang kha poh ua lan vitua,” yn cipya; te pang kha ka vih zah teenaw ccangkheit a um.9Aning nynh kae kha, “Tee lah, khuin kya minmin nynh a cyi hae paw anungsikuhpaw kha dotua,” yn cipya.10Tukeiccuze ka tee zah ka dotua; tuin kyakhe avawpaw sarangpaw phuinccing, anungsikuhpaw sarangpaw hae te Israel phin kya-e zohtuh balyn kha pang kya po voilu lan a soi hae.11Tuh-e hae malang khe Israel phin piccan sung sari tuh Shafan ccapaw Jaazaniah ryte a thadyn hae. Minmin nynh pakephepaw zung kheit cci kha ccarou ccyngkuh hae zah, tuh-e pakephepaw lungkhu te mynkhuhpaw maeekhuh tuh akhuhthung.12Te aning nynh kae kha, “Ccungccapaw, Israel phin piccan hae lu kheit cci nynh amohnaw kya, mih zohtuh khaan raveih kya a cyi hae paw kha na muih vae tou? Minmin nynh, ‘Bawipaw nynh oun muih khyh, Bawipaw nynh ram hynh phe a vua vae,’ a ci hae,” cite yn hopya.13Te aning nynh kae kha, “Minmin nynh e laeze anungsikuh huapaw a cyi hae paw kha na muih ung cih,” yn cipya.
14Te aning nynh kae kha Bawipaw inn thahlang sakoih teenaw kalan khe yn cciakhae; tuin kyakhe nopi hae tuh khozinung Tammuz hanlan rawkhuite a haung hae.15Te aning nynh kae kha, “Pou ccungccapaw, e hynh na muih vae tou? E hae laeze anungsikuh huapaw kha na muih ung cih,” yn cipya.
16Te aning nynh kae kha Bawipaw inn voidu lungkhu langkhe yn teekhae; tuin kyaze, Bawipaw beikinn thuakaw kya, inn atolang te beikhang laku khe, ccungccaw lu kuin lae pangaw loukaw tuh Bawipaw beikinn kha mih nulang sangsahte, nithua lang hawi hae zah, nithua lang e khuanin kha bakhungnuate a beik hae.17Te aning nynh kae kha, “Pou ccungccapaw, e hynh na muih vae tou? E kya Judah phin nynh a cyipaw anungsikuhpaw hynh huatawpaw thua khyh khaw? Ka thin houh riasahte ram hynh puathonaw te a biasah hahe cih hae tou? Thingkaran kha mih naduh kin khe a nungdeku hae!18Tukeiccuze thinriate ka cyih cih; minmin kha ka haang lan khyh hae, ngaethya ka ungsah lan khyh hae; ka thaenaw khe myarya ccae lante a sia hae zemah ka ngaepah lan khyh hae,” yn cipya. Zohtuh Beik hae paw Chianaw
1Te aning nynh ka thaenaw khe roi accae lante sia zah, “Khuapi kya-e ccungccaw theihtu hae nanning, chianawpaw nae zunghe kha ccarou ccyngkute oun naeku tua oh,” a ci.2Te ccungccaw lu taruh tuh chianawpaw zunghe kha ccarou ccyngkute thahlang a hawipaw, thahlang koikua kalan te oun thua hae; minmin laku e lu kheit tuh laphan laaw te kuakuhpaw boeining kha lawkuh zah a tae kyakhe ccatui bawng kha a keku. Minmin tuh tee hae zah, sohin silawhang pe khe a thadyn hae.
3Israel Pachia phu-enaw tuh a la umnaw cherubim vawlan te Beikinn thuakaw kalan khe a kaethung. Bawipaw nynh laaw te kuakuhpaw boeining a lawkuhpaw pisepaw, a tae kya ccatui bawng a kekuhpaw kha ko zah,4“Jerusalem khuapi lungkhu lang la cceih lah, khuapi lungkhu e nungsikunaw balyn keiccuze a rah a khui hae paw mih terui kyakhe syntawnaw kha la raetua,” a cipya.5Mingccang hae kha ka thaenaw khe hopah hae zah, “Khuapi lungkhu khe amaw kha zui oh lah, ccungccaw theih oh; haang nan oh lah, ngaethyaumsah nan oh.6Atawpaw, liaccaw te ccangvae, imua taraw hae te nopi hae kha theih oh, thuasalama syntawnaw rae athua hae paw kha tuh ty nan oh. Ka beikinnthyaa kyate thoty oh,” a cipya hae. Tukeiccuze minmin nynh beikinn malang um hae paw piccan hae kyakhate a thoty hae.7Te aning nynh minmin kha, “Beikinn kha thusah oh lah, michi rhua khate voidu kha phe biasah oh. Te poutaw oh!” a cipya hae. Tukeiccuze minmin nynh pou hae zah, khuapi lungkhu khe ccungccaw hae kha a chia hae.8A chia cciamang lya hae khe kae tuh ka makhaete ka um, ka mae ka sahbung zah, “Pou Bawipaw PACHIA, Jerusalem tungvaw na thinrianaw kha na bu thyhte, a laehypaw Israel balyn kha na roh cih hae tou?” cite ka sia.9Aning nynh kae kha, “Israel te Judah phin hae seinaw tuh myaryamaw ale; ram tuh chiise luanaw te phe beih zah, khuapi tuh dingleinaw te phe abeih; minmin nynh, ‘Bawipaw nynh e ram hynh phe vua vae, Bawipaw nynh muih vae khyh,’ a ci hae.10Kae nynh minmin kha ka haang lan khyh hae, ngaethya mah ka umsah lan khyh hae, mih cyisahnaw kha mih lu vawlan ka ccawsah cih,” yn cipya.
11Te laphan laaw te kuakuhpaw boeining a lawkuhpaw pisepaw, a tae kya ccatui bawng a kekuhpaw nynh, “Kaw nae pya thyhte phe ka cyi vae,” cite bya a leih. Pachia Phu-enaw nynh Jerusalem A Cciataw
1Te ka do zah, cherubim lu vawlan adawkuhpaw vawlan khe nilar lung te lokuh zah bawitungkhung te alokuhpaw kha ka muih.2Pachia nynh boei akuakuhpaw a lawkuhpaw pisepaw kha, “Cherubim hae zakaw umpaw leccu hae laku langkhe cciatua; cherubim hae laku umpaw maee-e kha na kuih te lah lah, khuapi vawlan khe heitua,” a cipya. Te ka muihnaw mawkhe aning tuh a cceih.3Tuh-e pisepaw nynh a tee lyakhe cherubim hae tuh beikinn te alia langkhe a thadyn hae; voidu lungkhu tuh maeking nynh pong a zithin.4Te Bawipaw phu-enaw tuh cherubim hae kyate beikinn thuakaw kalan khe a nuekuh thung; beikinn tuh maeking te phe beih zah, voidu tuh Bawipaw phu-enaw phaephae akpaw te phe abeih.5Alesaepaw Pachia nynh bya a hopaw roi hawte, cherubim hae mih sake roi tuh voidu atolang te heize thae kho athua.
6Bawipaw nynh akuakuhpaw boeining a lawkuhpaw pisepaw kha, “Cherubim hae laku kya-e leccu hae lungkhu umpaw maee kha lawtua,” cite kaw he a pya te, tuh-e paw nynh tee zah leccu pe khe a thadyn.7Te cherubim hae laku kya-e cherub ccangkheit nynh mih laku umpaw maee kalan khe a kuih kha dyng zah, maee beihtaraw kha a lah koute akuakuhpaw boeining a lawkuhpaw pisepaw kuih kya a nung, te tuh-e paw nynh maee tuh lah zah a poukhae.8Cherubim hae sake kaw khe ccungccaw kuih alopaw kha yn langkuh.9Ka do zah, cherub ccangkheit pe khe leccu ccangkheit ccite, cherubim hae pe khe leccu ccangpali a um; leccu hae muinsan tuh aphutepaw lung phaephae akpaw te nynh aloku hae.10Leccu ccangpali tuh mih muinsan lokuh zah, leccu ccangkheit lungkhu khe ccangpaw leccu ccangkheit bingpaw te nynh aloku hae.11Cherubim hae tuh he a ccia hae ze, ccanglang maeku leite san kheit lang a cceihthya hae; ccangpaw leccu hae nynh mah ccanglang maeku leite malang sangpaw leccu nynh a hawinaw langkhe a zui hae.12Mih pyn tuh abalyn mawte, mih ke, mih kuih, mih sake, te leccu hae ccangpali mawte mit te phe abeih hae.13Leccu hae tuh, “Amiakuhpaw leccu hae” cite ka thaenaw khe a ho hae.14Cherub ccangkheit nynh mae maepali cci a hoi hae: ccangkheitnaw mae tuh cherub maesue, ccangningnaw tuh ccungccaw maesue, ccangthumnaw tuh chindeih maesue, ccangpalinaw tuh mosipi maesue nynh thua.
15Cherubim hae tuh a thokuh hae. E hae tuh Khebar vawpi pe ka muih hae paw ahiinpaw ahysuepaw hae nynh athua hae.16Cherubim hae tuh he a ccia hae ze, mih pe khe leccu hae tuh a cceihbua hae; cherubim hae nynh laephi kyate hangku khylan mih sake kha he a daw hae ze, mih pe umpaw leccu hae tuh ccanglang maekuh khyh hae.17Cherubim hae tuh a thadyn hae ze, leccu hae mah thadynbua hae zah, a thoku hae ze leccu hae mah a thokuh bua hae; pawccecize ahiinpaw ahysuepaw hae muisaw tuh leccu hae kya a um.
18Tetuh Bawipaw phu-enaw tuh beikinn thuakaw kyate pou zah cherubim hae vawlan khe a thadyn.19Cherubim hae nynh mih sake hae kha daw hae zah ka muihnaw khe laephi kyate a thokuh hae, mih pe umpaw leccu hae ryte a pou hae. Bawipaw beikinn nithua lang e koikua kyakhe a thadyn hae; te Israel Pachia phu-enaw tuh mih vawlan khe a um.20E hae tuh Khebar vawpi pe, Israel Pachia zakaw kya ka muih hae paw ahiinpaw ahysuepaw nynh thua hae; te e hae tuh cherubim hae nynh athua hae cipaw ka ny.21E hae ccangkheit cci nynh mae maepali, sake kepali cci hoi hae zah, mih sake kaw khe ccungccaw kuih te alokuhpaw a um.22Mih maesue tuh Khebar vawpi pe ka muih hae paw maesue hae te nynh aloku hae. Mih balynte malang khe lawbabin lan a cceih hae. Ahoy leipaw Tuanaw Pyatu hae Byapianaw
1Muisaw nynh kae kha yn hangthung zah, Bawipaw inn nithua lang e sakoih, nithua lang a hawipaw kalan khe yn cciakhae. Thuakaw teenaw kyakhe ccungccaw lu kuin lae pangaw a um hae; tuh-e hae kyakhe bawi alepaw hae, Azzur ccapaw Jaazaniah te Benaiah ccapaw Pelatiah kha ka muih hae.2Bawipaw nynh kae kha, “Ccungccapaw, e hae tuh hoyleinaw kha paccyn hae zah, e khuapi kya a hoyleipaw tuanaw kha a pyatu hae nynh thua hae;3minmin nynh, ‘Inn saknaw accyh nae loh khyh; e khuapi tuh ang thua zah aening tuh saw nynh ah thua oh,’ a ci hae.4Tukeiccuze minmin kha rawsete profehbya hotua; pou ccungccapaw, profehbya hotua,” yn cipya.
5Te Bawipaw muisaw tuh ka tungvaw yn thua zah hynhte yn hopya, “Bawipaw nynh hynhte a hopaw hynh hopah hae: Pou Israel phin hae, e hynh nae tuakunaw thua zah, nae lungkhu kya yn thungkuhpaw miakaw kha phe ka ny.6Nanning nynh e khuapi kya ccungccaw patae kha na theih oh zah, michi rhua te laanpi hae kha phe na biasah vae oh.7Tukeiccuze Bawipaw PACHIA nynh hynhte a ho: Khuapi lungkhu na nung oh paw michi rhua hae tuh saw thua hae zah, e khuapi tuh ang nynh thua; thuasalama nanning tuh khuapi kyate kae pousah cih oh.8Nanning nynh thaloi rhaw kha na ri oh; tuh-e thaloi tuh nae tungvaw ka thuasah cih, cite Bawipaw PACHIA nynh a ci.9Nanning kha khuapi kyate kae pousah cih oh zah ramccang hae kuih kalan kae ap cih oh, te bya kae pia cih oh.10Nanning tuh thaloi te na chih cih oh; Israel ramri khe bya kae pia cih oh. Te nanning nynh Bawipaw ka thuapaw kha nae nyh cih oh.11E khuapi tuh nae ang thua lan khyh zah, nanning tuh ang lungkhu e saw na thua lan khyh oh. Israel ramri khe bya kae pia cih oh.12Tetuh minphuin ccangpaw hae phungzae kha na zui oh zah, a phungbya na zuipya lei oh paw te a phungzae kha mah na zuipya lei oh paw Bawipaw ka thuapaw kha nae nyh cih oh,” a ci.
13Profehbya ka ho cciamang lyakhe, Benaiah ccapaw Pelatiah tuh a chih. Tetuh ka mae ka bakhung zah, “Pou Bawipaw PACHIA, a laehypaw Israel hae hynh phe na thangsah ccaccing vae cih hae tou?” cite thawte ka sia. Pachia nynh Israel A Kikhae Cih
14Tetuh Bawipaw bya tuh ka kya yn thua zah:15Ccungccapaw, na puizia hae, na vaeccaw hae, kyng hae zah ramccang lang a cciakhae hae paw na uno hae, Israel phin balyn kha, Jerusalem a um hae paw nynh, “Minmin tuh Bawipaw kyate asawnaw lang a cceih vae hae; e ram hynh aening ram lang oun pya vae,” cite a ho hae.16Tukeiccuze hynhte hopah hae: Bawipaw PACHIA nynh hynhte a ho: Minmin kha minphuin ccangpaw hae kalan ccaring ka nuesakuh hae zah, ram hae kyakhe phiariphiarae ka nung hae zemah, minmin a thuanaw hae ram hae kyakhe kae tuh minmin elang ccyh sosoh hanlan beikinnthyaa nynh ka thua.17Tukeiccuze hopah hae: Bawipaw PACHIA nynh hynhte a ho: Minphuin hae kyate nanning kha kae suelua cih oh zah, phiariphiarae na umnaw oh ram hae kyate kae pum cih oh, te Israel ram kha kae pya cih oh.18Minmin nynh tuin ram kya he a thua hae te, tuin ram umpaw athupaw uccaw balyn te a nungsikunaw balyn kha a vua cih hae.19Minmin kha thinlung ccangkheit hoinaw kha ka pya cih hae zah, mih lungkhu kya tuanaw thawpaw kha ka sang cih hae; mih pyn kyate lung thinlung kha ka vuapah cih hae zah, ngesaw thinlung kha ka pya cih hae,20tuhteze nynh ka phungbya hae kha a zui cih hae zah ka phungzae hae kha kyngkute a zui cih hae. Tetuh minmin tuh ka ccungccaw hae athua cih hae zah, kae tuh mih Pachia ka thua cih.21Thuasalama mih thinlung tuh athupaw mih uccaw hae te mih nungsikunaw nulang a zuikuh hae paw hanlan tuh mih cyisahnaw kha mih lu vawlan ka thuasah cih, cite Bawipaw PACHIA nynh a ci.
22Tetuh cherubim hae nynh mih sake kha daw hae zah, mih pe e leccu hae mah a zuikuh bua hae; Israel Pachia phu-enaw tuh tuh-e hae vawlan khe a um;23Bawipaw phu-enaw tuh khuapi ngaelung kyate hangkuh thung zah, khuapi nithua lang umpaw mua vawlan khe a thadyn.24Pachia muisaw liate a kyng hae paw a umnaw hae, Khaldi ram langkhe kae kha muisaw nynh vizin kyakhe yn hangthung zah yn cciakhae. Tukoute ka muihpaw vizin nynh kae kha yn cciataw.25Bawipaw nynh yn muihsahpaw balyn kha a kyng hae paw ccungccaw hae kya ka hopya hae.
Judah Kyngnaw Muihsahnaw
1Bawipaw bya tuh ka kya yn thua zah:2Ccungccapaw, nang tuh rhawdou a mangpaw ciihan laku kya nynh na um, minmin tuh muihnawpaw mit a hoi hae zemah a muih lei hae paw, thaenawpaw nakaring a hoi hae zemah a thae lei hae paw nynh thua hae;3pawccecize minmin tuh rhawdou a mangpaw ciihan nynh thua hae. Tukeiccuze, ccungccapaw, ram kyate a dee hae paw kya-e uccaw paccynku hawte paccynkuh lah, minmin nynh a muihnaw hae khuadae ccyh khe ram kyate a dee hae paw hawte cciatua; kyng athuapaw ccungccaw hawte a muihnaw hae khe na umnaw hmin kyate ccangpaw hmin kalan na cceih cih. Minmin tuh dou a mangpaw ciihan athua hae zemah poh a thaethya kho hae.4Khuadae ccyh a muihnaw hae khe, a kyng hae paw nynh a phuku hae hawte, khuadae ccyh a muihnaw hae khe na phupaw kha lawku tua; te zete ccyh a muihnaw hae khe, a kyng hae paw hawte na pou cih.5A muihnaw hae khe pang kha poh ua lan vih lah, tuin kyate na phupaw kha poukhae.6Riryngmoh khe a muihnaw hae kyakhe phupaw kha na raw vawlan na khangkuh cih zah, na poukhae cih; laephi kha na muih khyh nawlan na mae kha na bongkuh cih; pawccecize Israel hae hanlan nang kha muihsahnaw lang kae rae vae, yn cipya.
7Kaw yn pya thyhte ka cyi. A kyng hae paw kya-e phupaw hawte, ka phupaw kha khuadae khe ka paccynku, zetesang khe pang kha ka kuih te po ua lan ka vi; mih muihnaw khe phupaw kha ka raw vawlan khangkute riryngmoh khe ka poukhae.8Awkhualan awkhua khe Bawipaw bya tuh ka kya yn thua zah:9Ccungccapaw, rhawdou a mangpaw Israel ciihan nynh nang kha, “Pawmou na cyi?” cite ae khia khyh hae tou? a ci.10Minmin kha hynhte hopah hae, Bawipaw PACHIA nynh hynhte a ho: E hodaepaw bya tuh Jerusalem umpaw uktu bawi te tuin kya umpaw Israel phin balyn hanlan nynh thua.11Kae tuh nanning hanlan muihsahnaw nynh ka thua: Ka cyi hawte, minmin kha cyi athua cih hae; minmin tuh kyng athua cih hae zah, a kyng hae paw umnaw kalan a cceih cih hae.12Minmin kya a umpaw uktu bawi tuh riryngmoh khe a phupaw kha a raw vawlan a khangkuh cih zah, a toikuh cih; pang kha a vikuh cih zah a poukhae cih; a mit te laephi kha a muih khyh ccaw cite, a mae kha a bongkuh cih.13Aning kha ka miabu te ka bong cih zah, ka kaang kya a kae cih; Khaldi hae ram, Babilon khuapi kalan ka cciakhae cih, tuh-e khuapi kya a chi zemah tuh-e khuapi tuh muih lan khyh.14Amaw a umlu hae paw balyn, amaw a bawmtu hae te a rhawkaw hae balyn kha teitei lang balyn pong ka phia cih hae; mih nulang te thaloi khate ka zui cih hae.15Minmin kha minphuin ccangpaw hae laku te ram hae kalan phiariphiarae he ka nung hae te, minmin nynh kae tuh Bawipaw ka thuapaw kha yn nyh cih hae.16Thuasalama minmin kya-e beihtaraw kha tuh thaloi kyate thuasah, ccakannaw te shethya kyate thuasah ka luesah cih hae, tuhteze nynh minmin nynh a thuanaw hae minphuin ccangpaw hae kyakhe mih nungsikunaw balyn kha a ho cih hae; tetuh minmin nynh kae tuh Bawipaw ka thuapaw kha a nyh cih hae. Byapianaw Ccyh Nue Leinaw
17Bawipaw bya tuh ka kya yn thua zah:18Ccungccapaw, na looh kha thyngkute ae lah, na tui kha thyngku ri biate niatua;19te ramccungccaw hae kha hynhte hopah hae, Israel ram e Jerusalem khuaccaaw hae te asekuhte Bawipaw PACHIA nynh hynhte a ho: Minmin nynh mih looh kha rikawte a ae cih hae zah, mih tui kha lungrote a neih cih hae, pawccecize tuin kya um hae paw balyn kya-e puathonaw keiccuze mih ram lungkhu umpaw balyn tuh azo cih.20Ccungccaw a la umnaw khuapi hae tuh aroh cih zah, ram tuh ccungccaw kharouh adae cih; tetuh nanning nynh kae tuh Bawipaw ka thuapaw kha na nyh cih oh.21Bawipaw bya tuh ka kya yn thua zah:22Ccungccapaw, “Accyh tuh dyadya alia vae, vizin miakaw tuh accakaepaw lang nynh a tang,” cite Israel ram konglang na hopaw e phungtangbya hynh pawtemou athua?23Tukeiccuze minmin kyakhe, “Bawipaw PACHIA nynh hynhte a ho: E phungtangbya hynh ka thangsah vae cih zah, Israel ram kya phungtangbya lang mang vae lan khyh hae. Thuasalama accyh anae vae, vizin miakaw tuh accing cih,” cite hopah hae.24Israel phin kya akyh leipaw vizin um vae lan khyh, akyh leipaw profehbya mah um vae lan khyh.25Thuasalama kae, Bawipaw nynh ka ho lanpaw bya kha ka ho cih zah, tuh-e bya tuh accing cih. Tuh-e bya tuh a thysung vae lan khyh. Pou rhawdou a mangpaw phin, nae she kya bya ka ho cih zah ka ccingsah cih, cite Bawipaw PACHIA nynh a ho.26Bawipaw bya tuh ka kya yn thua zah:27Ccungccapaw, Israel phin hae nynh, “Aning nynh a muihpaw vizin tuh malang kum patae hanlan nynh thua; ccyh hynhsepi hanlan nynh profehbya a ho,” a ci hae.28Tukeiccuze minmin kha hopah hae, Bawipaw PACHIA nynh hynhte a ho: Ka bya tuh accyh nue vae lan khyh, ka hopaw bya tuh accing cih, cite Bawipaw PACHIA nynh a ci. Lingthya Profeh hae Seisahnaw
1Bawipaw bya tuh ka kya yn thua zah:2Ccungccapaw, profehbya ho hae paw Israel profeh hae kha rawsete profehbya hotua; mimaw tuanaw te profehbya ho hae paw kyakhe, “Bawipaw bya hynh thaetua oh!” cite hopah hae.3Paw sanmah muih leite, mimaw tuanaw thyhte a ho hae paw, tuanaw hoi leipaw profeh hae hanlan ngaethya lan kou um!4Pou Israel, na profeh hae tuh arohpaw apumkuhpaw laku kya a umpaw suizaw hae hawte nynh athua hae.5Bawipaw nin, rhawtuknaw kya Israel tuh tynkaring lan a thadyn kho nawlan, minmin nynh khualungrua aronaw kalan kae khyh hae, Israel hae hanlan khualungrua kha raethui khyh hae.6Minmin nynh hynbya te lingkunawpaw vizin kha a muih hae; Bawipaw nynh minmin kha a saw lei hae pite, “Bawipaw nynh a ho,” a ci hae, tuhzemah mih bya accing lanpaw kha a ngaw hae!7Kae nynh ka ho lei pite, “Bawipaw nynh a ho,” cite ahme leipaw vizin, lingthya profehbya a ho hae paw kha na thae khyh oh tou?
8Tukeiccuze Bawipaw PACHIA nynh a hopaw tuh: Nanning nynh hynbya na ho oh zah lingkunawpaw vizin kha na muih oh keiccuze nanning kha kae rawse cih oh, cite Bawipaw PACHIA nynh a ci.9Ahme leipaw vizin muih hae zah lingkunawpaw bya a ho hae paw profeh hae kha ka kuih nynh a rawse cih hae; minmin tuh ka ccungccaw hae tungkunaw kya umbua lan khyh hae, Israel hae ccazing kya zeibua thua lan khyh hae, Israel ram lungkhu lang tee lan khyh hae; nanning nynh kae tuh Bawipaw PACHIA ka thuapaw kha na nyh cih oh.10Pawccecize, thanccingte, minmin nynh ka ccungccaw hae kha cciakhaesei hae zah, daenaw a um lei pite, “Daenaw,” cite a ho hae keiccu nynh thua, te ccungccaw hae nynh lungrua kha a rua hae ze, e profeh hae nynh lungrua kha arawpaw sii a thuhthin hae keiccu nynh thua.11Lungrua tuh a ting cih, cite lungrua kya arawpaw sii thuh hae paw kha hopah hae. Khuaa thawte arah cih, hya lepaw accah cih zah khise atho cih.12Lungrua tuh he a ting te, “Lungrua kya na thuhpaw arawpaw sii kha teimou a um vae?” cite nanning kha ae khia lan khyh oh tou?13Tukeiccuze Bawipaw PACHIA nynh hynhte a ho: Ka bungpaw keiccuze khise ka thosah cih, ka thinria keiccuze khuaa thawte arah cih zah, hya nynh tuh-e lungrua tuh aroh cih.14Nanning nynh arawpaw sii na thuh oh paw lungrua kha laekhu kyacia ka ting cih; tuhteze nynh athonaw aleihpaw tuh azo cih; lungrua tuh he a ting te, nanning mah lungrua kyakhe na rohbua cih oh; te nanning nynh kae tuh Bawipaw ka thuapaw kha na nyh cih oh.15Tuhcite tuh-e lungrua kya te arawpaw sii a thuh hae paw tungvaw khe ka thinrianaw kha ka mang cih; lungrua tuh um vae khyh, lungrua sii a thuhtu hae—16daenaw a um lei pite Jerusalem hanlan daenaw vizin muih hae zah Jerusalem konglang profehbya a hotu hae Israel profeh hae mah um vae khyh hae cipaw kha nanning kya kae hopah cih oh, cite Bawipaw PACHIA nynh a ci.17Ccungccapaw, mimaw tuanaw thyhte profehbya a ho hae paw na ccungccaw hae kya-e nopi hae kha rawsete na mae hawiliatua hae; minmin kha profehbya honua hae lah,18Bawipaw PACHIA nynh hynhte a ho: Ccungccaw hiinnaw kha kyng khylan ccungccaw miakaw kuihnyng kya khiikupaw kha huipah hae zah, lu miakaw hanlan lu bongkupaw boei taraw kha a raepah hae paw nopi hae hanlan ngaethya lan kou um! Ka ccungccaw hae laku kya hiinnaw kha kyngdete nae hiinnaw kha na khynsakuh cih oh tou?19Barli phaw kuihphe kheit te sanlou beihtaraw hanlan ka ccungccaw hae laku kya the nae thyasah vae oh, hynbya a ngae hae paw ka ccungccaw hae kya hynbya hopyanaw liate, chi lan accan leipaw kha na theih oh zah, hiin lan accan leipaw kha na hiin oh.
20Tukeiccuze Bawipaw PACHIA nynh hynhte a ho: Ccungccaw hiinnaw na kyngdenaw oh paw kuih kya khiikupaw kha ka hua; khah-e kha nae kuih kyate thoh ka pae cih zah, pavaw bite na bi oh paw ccungccaw hae hiinnaw kha ka luesah cih.21Nae kya-e bongkupaw boei taraw kha ka seii cih zah, nae kuih kyate ka ccungccaw hae kha ka khum cih hae; minmin tuh nae kuih kya umpaw saw thua vae lan khyh hae; tetuh kae tuh Bawipaw ka thuapaw kha na nyh cih oh.22Miding hae kha rawthyanaw ka pya lei hae pite, mih raw na thyasah oh keiccu thuasah, ccungccaw hoylei hae paw kha ahoy leipaw mih laanpi kyate a maeleihku khyh nawlan hae thawzung na pya oh zah mih hiinnaw kha na khum oh keiccu thuasah,23nanning nynh ahme leipaw vizin kha na muih vae lan khyh oh zah, profehbya kha na ho vae lan khyh oh; ka ccungccaw hae kha nae kuih kyate ka khum cih hae. Tetuh kae tuh Bawipaw ka thuapaw kha na nyh cih oh. Pachia Byapianaw Ahme
1Israel piccan abang tuh ka kya oun thua hae zah ka malang a haung hae.2Te Bawipaw bya tuh ka kya yn thua zah:3Ccungccapaw, e ccungccaw hae nynh mih zohtuh hae kha mih thinlung kya lawkuh hae zah, mih hoyleinaw kha mih malang khe thykunawpaw lang a nungkhaw hae; kae tuh minmin nynh tuanaw ngiakupaw lang ka tang cih tou?4Tukeiccuze minmin kha hopah hae, Bawipaw PACHIA nynh hynhte a ho: Mih zohtuh hae kha mih thinlung kya lawkuh hae zah mih hoyleinaw kha mih malang khe thykunawpaw lang a nungkhaw hae paw Israel hae miakaw nynh profeh kalan oun cciakhae hae; mih zohtuh patae ryte oun cceih hae paw kha kae, Bawipaw nynh bya ka leih cih hae,5tuhteze nynh mih zohtuh hae liate ka kyate asawkuh hae paw balyn, Israel hae thinlung kha ka kyng kho cih.
6Tukeiccuze Bawipaw PACHIA nynh hynhte a ho cite minmin kha hopah hae: Ngaesikuh oh lah, nae zohtuh hae kyate maeleihkuh oh; nae nungsikunaw balyn kyakhate nae mae kha ccanglang hawi oh.7Ka kyate phiakuh hae zah, mih zohtuh hae kha mih thinlung kya lawkute, mih hoyleinaw kha mih malang khe thykunawpaw hawte nung hae salamah, ka rynaw khiatua khylan profeh kalan a cceih hae paw Israel phin miakaw kha thuasah, Israel ram a umpaw ramccang hae miakaw kha thuasah kae, Bawipaw ccaccei maw nynh minmin kha bya ka khung cih hae.8Minmin kha rawsete ka hawilia cih hae; minmin kha muihsahnaw te byaphung lang ka rae cih hae zah, ka ccungccaw hae laku kyate ka vua cih hae; te nanning nynh kae tuh Bawipaw ka thuapaw kha na nyh cih oh.9Profeh lu kheit kha hopya thua zah, tuh-e thyhte bya a ho lanze, tuh-e profeh tuh kae, Bawipaw nynh ka hynsah vae, tuh-e paw tuh ka kuih ka dyngnua cih zah, ka ccungccaw Israel hae laku kyate ka roh cih.10Minmin tuh detahnaw a teing cih hae—profeh tungvaw detahnaw te profeh kha bya a khiatupaw tungvaw detahnaw tuh alokuh cih—11tuhteze nynh Israel hae tuh ka kyate ccanglang cceihsei lan khyh hae zah, mih cyiseinaw balyn khate mimaw toulou kha thusakuh vae lan khyh hae. Tetuh minmin tuh ka ccungccaw hae athua cih hae zah, kae tuh mih Pachia ka thua cih, cite Bawipaw PACHIA nynh a ci.12Bawipaw bya tuh ka kya yn thua zah:13Ccungccapaw, ram ramkheit nynh ka tungvaw lungzi leite um zah a sei ze, ka kuih ka dyngnua zah, looh bawmnaw kha paetawte a tungvaw khe ccakan ka ccisah, te ccungccaw hae te sarangpaw hae kha ka chia hae,14Noah, Daniel te Job, e lu thum hae maw heize a la um hae ze, mih dingnaw liate mimaw hiinnaw kyalya kha a khumkuh cih hae, cite Bawipaw PACHIA nynh a ci.15Ram kha ro khylan loramsaw hae kha ram phe lekuh lan ka sawnua hae ze, ram kya daetedae cih. Tuh-e loramsaw hae keiccuze hum sanmah cceih kho lan khyh;16kae tuh ka hiin thyhte, e lu thum hae tuh a la um hae ze heize, mih ccanung hae te mih ccapaw hae kha khum kho lan khyh hae; mimaw makhae kha khum athua cih hae zah, ram tuh ccungccaw phe adae cih, cite Bawipaw PACHIA nynh a ci.17Tuhkhyhze tuh-e ram tungvaw thaloi thuakhaete, “Thaloi tuh ram pynpi phe lekuh lan cceih sah,” cite ka ho zah ccungccaw hae te sarangpaw hae kha ka chia hae ze,18kae tuh ka hiin thyhte, e lu thum hae tuh a la um hae ze heize, mih ccanung hae te mih ccapaw hae kha khum kho lan khyh hae, mimaw makhae kha khum athua cih hae.19Tuhkhyhze ccungccaw hae te sarangpaw hae kha chia khylan, tuh-e ram kya shethya ka thuasah zah, ka thinrianaw tuh tuh-e ram kya chiise te ka bu lanze,20Noah, Daniel te Job tuh a la um hae ze heize, kae tuh ka hiin thyhte, mih ccanung hae te mih ccapaw hae kha khum kho lan khyh hae; mih dingnaw liate mimaw hiinnaw rou kha nynh a khumkuh kho cih hae.21Pawccecize Bawipaw PACHIA nynh hynhte a ho: Jerusalem kyate ccungccaw hae te sarangpaw hae kha chia khylan chinawpaw ka detahnaw phuin pali, thaloi, ccakannaw, loramsaw hae te shethya kha Jerusalem tungvaw he ka thuasah te, hohcihmou luenaw houh aruhua cih!22Tuhzemah, poukhae athua cih hae paw ccanung ccapaw ahiinhy hae paw kha tuin kya a um cih hae; minmin tuh na kalan oun thua cih hae. Mih ozia te mih cyisahnaw kha he na muih hae te, Jerusalem tungvaw ka thuakhaepaw hoyleinaw balyn hanlan kha lungdaenaw pya na thua cih.23Mih ozia te mih cyisahnaw kha he na muih hae te, minmin nynh nang kha lungdaenaw ae pya cih hae; Jerusalem tungvaw ka la cyipaw balyn tuh akonglang um leite ka cyi khyhpaw kha na nyh cih, cite Bawipaw PACHIA nynh a ci. Ccungkia leipaw Misu ku
1Bawipaw bya tuh ka kya yn thua zah:2Pou ccungccapaw,misu ku tuh ccangpawthingku hae laeze pawmouhoyhua zah, misu karan tuhramkaw e thingku hae laezepawmou ahoyhua?3Hankhakheit rae nawlanmisu ku kha law athua zawtou?Uccaw hankhakheitbawnawpaw lang misu ku kharae kho athua zawtou?4Maeething lang maee kyakhephung athua; adung san ning khamaee nynh karae u zahangaelung tuh phe man lan a u vae ze,pawlang sang ccungkia ung cih tou?5Maee nynh a u mawzepawpaw lang mah ccungkia khyh;maee nynh phe ccung lanu zah phe aman vae te thytuh,ccungkianaw houh zyahua vae cih—pawlang sang mang kho a um ung cih tou!
6Tukeiccuze Bawipaw PACHIA nynh hynhte a ho: Maeetua nawlan ka pya vae hae paw ramkaw e thingku hae laku umpaw misu ku hawte, Jerusalem khuaccaaw hae kha ka ap cih hae.7Minmin kha rawsete ka hawilia cih hae; maee kyate a lue hae zemah, maee nynh minmin kha a u mamin cih hae; minmin kha rawsete he ka hawilia hae te, nanning nynh kae tuh Bawipaw ka thuapaw kha na nyh cih oh.8Te minmin tuh mih lungzi khyh keiccuze ram kha ccungccaw phe ka daesah cih, cite Bawipaw PACHIA nynh a ci. A Lungzi leipaw Akaenung Liaccanung
1Bawipaw bya tuh ka kya yn thua zah:2Ccungccapaw, Jerusalem kha a nungsikunaw nysakuh lah,3hynhte hopya tua, Bawipaw PACHIA nynh Jerusalem kha hynhte a hopya: Na thokeinaw te na puinaw tuh Kanaan ram nynh thua; na paaw tuh Amor paw thua zah na nung tuh Hit nung nynh thua.4Na puinaw konglangte, na pui nin ze na laerui ae aw khyh hae, tuisingte ae ccikan khyh hae, loi ae noi khyh hae, nolung boei te mah ae lung khyh hae.5Na tungvaw thawccinaw hoite, e hae ccangkheit san cyipya lan ngaethya ae umsahpaw um khyh; na pui nin khe nang kha ae hua hae zah ramkaw kya ae vua hae.
6Na pe ka cceih zah, na chiise te na kalouhkupaw kha kae muih. Na chiise kya na touku lyakhe nang kha, “Hiintua!7Loolae kya umpaw thingku hawte lethungtua,” kae cipya. Na lethung, na hang vae zah phe na liaccaw vae; na matei yn doh zah na sang yn sae vae; tuhzemah boeining leite na ccakaete nynh na um.8Na pe bua ka cceih zah kae dotua; nang tuh vawpaw hoi phe na zaw vae. Ka angkiccua adung kha kae dawpah zah, na ccakaete na umpaw kha kae bongpya: Nang kae hawnawpaw byakinnaw kha namaw ryte ka rae zah, nang tuh ka kya-e lang na tang vae, cite Bawipaw PACHIA nynh a ci.9Tetuh nang kha tui te kae sing, na chii kha pong kae ccikanpah zah, chitui kae thuh.10Ccaanpaw boeining kha kae lawsakuh zah, saving phanah kha kae nawsaku; nebaleihpaw laaw te kuapaw boei kha kae zingsakuh zah, po-laaw te kuapaw boeining kha kae zingsah.11Nang kha ccaannawpaw uccaw hae te kae ccaan: Na kuih kya khawccan kae nawsah zah na nging kya si kae oisah,12na naduh kya naduhhuing kae huingsah, na nakua kya nakuahuing kae huingsah zah, na lu vawlan apuithyapaw bawilukhung kae khungsah.13Nang kha sui te ngun te ccaan na thua zah, na boeining tuh nebaleihpaw laaw te kuapaw boeining te po-laaw te kuapaw boeining te ccaanpaw boeining nynh thua. Na looh tuh vaekhui, khoitui te chitui nynh thua. Myarya na puithya zah siapharannung lang na tang.14Nang kae pyapaw ka lesaenaw keiccuze na puithyanaw tuh ccing zah, na puithyanaw minthaannaw tuh minphuin hae laku kya a pazaekuh, cite Bawipaw PACHIA nynh a ci.15Thuasalama na puithyanaw kha na doliakuh zah na minthaan keiccuze na ohhuakuh, khuaccong hae paw miakaw kya na ohhuakunaw kha ruarua na ua hae.16Na boeining kha na lawkuh zah, na beiknaw hminthyaa kha azong aphuinphuin te na ccaan zah, tuin kyakhe na ohhuaku; e tahawpaw hynh um mah um boi khyh zah, malang mah um boi vae lan khyh.17Kae pyapaw ka sui te ka ngun athuapaw na kya-e apuithyapaw lung hae kha na lah zah, pise zohtuh hae kha na raeku, te khah-e hae khate na ohhuaku;18khah-e zohtuh hae kha ccaanpaw na boeining hae khate na bong zah, ka chitui te ka kya-e mynkhuhpaw kha mih malang khe na nungpya hae.19Kae pyapaw looh—kae dangpaw vaekhui, chitui te khoitui kha mih malang khe mynkhuhpaw silawnaw lante na nungpya hae; tuhcite Bawipaw PACHIA nynh a ho.20Nae saahpya hae paw na ccanung hae te na ccapaw hae kha na hoei hae zah, khah-e zohtuh hae nynh ae hae sah cite si na lawnaw hae. Na ohhuakunaw tuh zaw loh khyh ii!21Ka ccaaw hae kha na theih hae zah, khah-e zohtuh hae kalan khe silawnawpaw lante na pya hae.22Na nungsikunaw te na ohhuakunaw balyn keiccuze na zawthaw lya-e na chii kya ohkute, boeining lawku leite na ccakaete na umpaw kha na liathui vae khyh.23Hoyleinaw balyn kha na rae koute (Nang na hanlan ngaethya lan kou um, ngaethya lan kou um! cite Bawipaw PACHIA nynh a ci),24accawngnaw hmin miakaw khe inaw kha na raekuh zah, khualae e laanpi takyh kyakhe ahangpaw hmin kha na duaku;25laanpi akounaw takyh kya ahangpaw hmin kha na raekuh zah na puithyanaw khate na ohhuaku, na pe a cceihpaw miakaw kya na pyn kha pyakute houhouh na ohhuaku.26A ohhuakuh rypaw na innpaw hae, Izip hae te na ohhuakuh oh zah, ka thinriasah khylan houhouh na ohhuaku.27Tukeiccuze nang kha ka kuih kae dyngnua zah na looh kha ka zyasah bung, te na ohhuaku ry keiccuze mih maethahpaw Filistin ccanung hae, na rhaw hae rynaw kalan khe nang kha kae ap.28Nang tuh a sungkuh kho leipaw na thua keiccuze Assiria hae ryte na ohhuaku oh; minmin ryte na ohhuaku oh zemah na lungryachih kho loh khyh.29Kungku hae paw ram, Khaldi ram ryte ohhuakunaw houhouh na rae; e hynhte mah na lungryachih lae khyh.30Bawipaw PACHIA nynh a hopaw tuh, maethya nyh leipaw ohhuanung cyisahnaw, e uccaw hae balyn hynh rawthungte raete, na thinlung tuh pawcih baban mou anyaa;31laanpi akounaw takyh kya inaw na raekuh zah, khualae e laanpi takyh kya ahangpaw hmin kha na raeku. Tuhzemah amee pyapaw kha pawlang na ria khyh keiccuze nang tuh ohhuanung te na lokuh khyh oh.32A vawpaw ccelang mingccangpaw kha lehkhanpaw, milae vawpaw te a seinung zu nynh na thua!33Ohhuanung hae balyn kha amee pya athua hae; thuasalama nang tuh na sungsah hae paw kha na lasung na pya hae, na ohhuakunaw elang teitei kyate balyn na kalan yn ccia ccaw hae cite pyaruh kha na pya hae.34Tukeiccuze nang tuh na ohhuakunaw kya ccangpaw nopi hae te na lokuh khyh oh: humhung nynh mah nang kha ohhuaku khylan ae soih khyh; nang kha amee ae pya khyh lya hae khe, nang nynh amee na pya paleih hae; nang tuh milae te na lokuh khyh oh.35Tukeiccuze, pou ohhuanung, Bawipaw bya hynh thaetua:36Bawipaw PACHIA nynh hynhte a ho: Na ohhuakuh ry zah na ccakaete umte na sungsah hae paw ryte na ohhuaku keiccu thuasah, anungsikuhpaw na zohtuh hae balyn keiccu thuasah, na zohtuh hae na pyapaw na ccaaw hae chiise keiccu thuasah,37hoysahnaw na raekheih oh paw na sungsah hae paw balyn, na sungsah hae paw balyn te na hua hae paw balyn kha ka suelua cih hae; minmin kha teitei kyate balyn kae sueluanua cih hae zah mih malang khe na ccakaete kae nung cih, tetuh minmin nynh na ccakaete na umpaw kha khaleih ae muih cih hae.38Milae vawpaw te a sei hae paw nopi hae te ccungccaw theihpaw nopi hae kha byapia hawte nang kha bya kae pia cih zah, eiung thinriate na tungvaw kya chiise ka thuasah cih.39Minmin kuih kya kae ap cih, minmin nynh na ohhuakunaw hmin kha a roh cih hae zah, ahangpaw na hmin hae kha a roh cih hae; na boeining kha ae phae cih hae zah apuithyapaw na uccaw hae kha a lah cih hae, te na ccakaete ae cciataw cih hae.40Ccungccaw patae kha ae konua cih hae zah minmin nynh lung te ae deih cih hae, mih thaloi te zoihtatyh lan ae bae cih hae.41Minmin nynh na inn hae kha maee te ae soipah cih hae zah nopi hae patae muihnaw khe bya ae pia cih hae; na ohhuakunaw kha ka thangsah cih zah, amee mah na pya vae lan khyh hae.42Tuhcite ka thinrianaw kha ka daesakuh cih zah, na tungvaw ka eiung vae lan khyh; lungdaete ka um cih zah, ka thinria vae lan khyh.43Na zawthaw lya kha na ning vae zah, e uccaw hae balyn kya ka thin nae riasah vae keiccuze na cyisahnaw hae kha na lu vawlan kae khang cih, cite Bawipaw PACHIA nynh a ci.
Na nungsikunaw balyn vawlan khe ohhuaku rynaw seinaw kha na raechih khyh tou?44Dotua, phungtangbya a mangpaw miakaw nynh nang na kong kha, “Nung lothya alonung ccanung,” cite phungtangbya a mang cih hae.45Nang tuh a vawpaw te a ccaaw hae kha a huatu na nung ccanung nynh na thua; nang tuh mih vawpaw hae te mih ccaaw hae kha a huatu na unonung hae mih unonung nynh na thua. Na nung tuh Hit nung thua zah, na paaw tuh Amor paw nynh thua.46Na unung tuh a ccanung hae ryte nang te palung lang a umpaw Samaria kha nynh thua; na neitawnung tuh a ccanung hae ryte nang te alia lang umpaw Sodom kha nynh thua.47Nang nynh mih hiinzia kyalya kha zui leite, mih nungsikunaw thyhte na cyibua; ccyh sosoh kya minmin laeze na hiinzia balyn tuh arohhua.48Bawipaw PACHIA nynh, kae tuh ka hiin thyhte, nang te na ccanung hae nynh na cyi oh hawte, Sodom te a ccanung hae nynh cyih khyh hae.49E hynh na neitawnung Sodom seinaw nynh thua: aning te a ccanung hae tuh a lysakuh hae, looh phe beih lan hoi hae zah ngaengan hiinhoyte a um hae, thuasalama ryachi hae te anyaa hae paw kha bawm khyh hae.50Minmin tuh lysakuh hae zah ka malang anungsikuhpaw uccaw kha a rae hae; tukeiccuze tuh-e uccaw tuh he ka muih te minmin kha ka vua hae.51Samaria nynh nang na seinaw angankuh zeih seinaw rae khyh; nang nynh anungsikuh huapaw kha minmin laeze na rae vae, te na raepaw anungsikuhpaw balyn liate na unonung hae mih dingnaw kha na langsaku vae.52Nang nynh thethyanaw kha ccoutua, pawccecize na unonung hae hanlan azoi huapaw byapianaw kha na thuakhaepya vae hae; minmin nynh a rae hae paw laeze anungsikuh hua lante na raepaw na seinaw hae keiccuze minmin tuh nang laeze a dinghua hae. Tukeiccuze na maethah sah lah, thethyanaw ccoutua, pawccecize na unonung hae mih dingnaw kha na langsah vae.53Sodom te a ccanung hae, Samaria te a ccanung hae kha ka kikhae cih hae zah, nanning hiinnaw kha mah mih ccungccaw hae ryte bua ka hoysah cih,54tetuh minmin hanlan lungtangnaw lang na tang cih, na cyipaw balyn keiccuze na thethah cih zah na maethah cih.55Na unonung Sodom te a ccanung hae, na unonung Samaria te a ccanung hae tuh langmawlya hawte bua athuathui cih hae zah, nang te na ccanung hae mah langmawlya hawte bua na thuathui cih oh.56Na hoyleinaw langsah athua maw, na lysaku lya kha na unonung Sodom tuh na munglae kya byaphung lang na mang khyh tou? Atu tuh nang ae theihrya hae paw na pepan e hae balyn, Aram ccanung hae te a innpaw hae balyn hanlan thuasah, Filistin ccanung hae hanlan thuasah nang tuh dothatheihpaw nynh na thua vae.58Nang tuh na ohhuaku rynaw te na nungsikunaw keiccuze detahnaw kha na teing cih, cite Bawipaw nynh a ci. Zungzae Tynpaw Byakinnaw
59Bawipaw PACHIA nynh hynhte a ho: Na cyi hawte na tungvaw ka cyih cih, nang nynh byakinnaw kha na roh zah, thyalawkute byakinkunaw kha pawlang na ria khyh;60tuhzemah na ngawphue lyaze nang te ka raepaw ka byakinnaw kha ka liathui cih zah, zungzae tynpaw byakinnaw kha nang te ka rae cih.61Nang te byakinnaw ka la raepaw keiccu thua leite, na unonung hae athua hae paw na unung te na neitawnung kha parouh mawte na ccanung hae lang he kae pya hae te, na hiinzia kha na liathui cih zah na maethah cih.62Ka byakinnaw tuh na kya ka tynsah cih zah, kae tuh Bawipaw ka thuapaw kha na nyh cih,63Na cyipaw balyn kha he kae ngaethya te, na tuathui cih zah na ngaeangthua cih, te na maethya keiccuze na khalang kha papin na awthui vae lan khyh, cite Bawipaw PACHIA nynh a ci. Mosipi Sa Ning te Misu Ku
1Bawipaw bya tuh ka kya yn thua zah:2Pou ccungccapaw, Israel hae kha phohpawbya phohpyate tousenaw phungpaw kha hynhte hopah hae:3Bawipaw PACHIA nynh hynhte a ho:Aming tuh azong aphuinphuin te pyaa zah,a sake alepaw, aming myarya thaawpaw,mosipi lepaw sa kheit tuhLebanon mua lang yn thua.Aning nynh sidar ku adung kha kyng zah,4adungpaccy atoihpaw kha a khya;tuh-e tuh kungkunaw ram lang cciakhae zah,kungkunaw khua kyakhe a lin.5Te ram kyate ccacii kha lah zah,lae hoy kyakhe a lin;su ku hawte tui alungnaw khe a lin.
6Tuh-e aku tuh yn toih zahange tuh lo zah apazaekuhpaw,nebabynpaw, ange hae tuhmosipi kalan khe lobung hae zah,atharui hae tuh a thadynnaw khea sahbung hae pawmisu ku lang yn tang.Tuhcite misu ku lang a tang;ange hae tuh toih hae zahanaw asae.
7Aming thaaw zah a sake myarya lepawccangpaw mosipi lepaw sa kheit a um.Te dotua! E misu ku nynh atharui hae khatuh-e mosipi kalan khe a saw;tuh-e misu ku nynh tui mue khylan,ange hae kha tuh-e mosipi kalan khe a losah.Tuh-e misu ku tuh lin a la thuanaw hmin kyate8tui alungnaw lae hoy kyakhe lin athua,tuhteze nynh ange atoih cih,anaw asae cih zahaphu-epaw misu ku langa tang cih.
9Tukeiccuze hynhte hopah hae: Bawipaw PACHIA nynh hynhte a ho:Tuh-e misu ku tuhhoynaw a mue cih tou?Tuh-e misu ku tuhbaleih naansah khylan teathae kha thuhsah khylan,anaw atoih thawpaw khanaansah khylan,mosipi nynh atharui khakhaee lan khyh tou?Atharui ryte poh khaee khylan,athawsaepaw kuih khyhzeathungpaw rhawkaw ho lan khyh.10Ccangpaw hmin kyalinthui he athua te, hiinte alethung cih tou?Nithua lang e khisan nynh he a mung te,khaleih naan lan khyh tou?A lethungnaw hmin kyakhenaan lan khyh tou?
11Te Bawipaw bya tuh ka kya yn thua zah:12Rhawtho a mang hae paw kha atu hopah hae: E tousenaw bya asuilan hynh na nyh khyh oh tou? Hynhte hopah hae: Babilon siapharan tuh Jerusalem lang yn thua zah, Jerusalem siapharan te a kuihkaw e bawi hae kha kyng hae zah Babilon lang a kikhae hae.13Siapharan ciihan lu kheit kha ko zah, byakinsakute tuh-e paw ryte byakinnaw kha a rae, (aning nynh ram lungkhu e lupi hae kha a cciakhae hae),14tuhteze nynh peenaw tuh zakaw a sangsakuh cih zah, amaw te amaw kha hangsahku leite, a byakinnaw kha zuite a thadyn kho cih.15Thuasalama aning nynh Judah siapharan kha rhawthonua zah, marang hae te rhawkaw patae kha ngia khylan Izip ram langkhe locceihtu hae kha a saw hae. Aning tuh hoynaw a mue cih tou? Hynhcihawpaw uccaw a cyihpaw tuh a lue kho cih tou? Byakinnaw kha rote a lue kho cih tou?16Bawipaw PACHIA nynh a hopaw tuh: Kae tuh ka hiin thyhte, thanccingte siapharan lang a khangtupaw siapharan kya-e byakinnaw kha pawlangria khyh zah, aning te a raekheih hae paw a byakinnaw kha a ro keiccuze siapharan lang a khangtupaw a umnaw Babilon khua khe aning tuh a chih cih.17Ccungccaw patae kha chia khylan, Babilon hae nynh rhawtuk nawlan laephi kha thaete dohsah hae zah koihlunawpaw khualungrua kha he a rae hae te, Faro nynh athungpaw a rhawkaw hae te aphupi hae ryte aning kha rhawtuknaw kya bawm lan khyh.18Jerusalem siapharan nynh thyalawkute byakinkupaw kha pawlangria khyh zah, byakinnaw kha a ro keiccu thuasah, e uccaw balyn hynh a cyi keiccu thuasah aning tuh lue lan khyh.19Tukeiccuze Bawipaw PACHIA nynh a hopaw tuh: Kae tuh ka hiin thyhte, aning nynh pawlang a ria leipaw ka byakinpyakunaw kha thuasah, aning nynh a ropaw ka byakinnaw kha thuasah a lu vawlan ka ccawsah ccaccing cih.20Ka miabu te ka bong cih zah, ka kaang kya a kae cih; Babilon lang ka cciakhae cih zah, ka tungvaw lungzinaw hoi leite a sei keiccuze tuin khua khe bya ka pia cih.21A rhawkaw hae kyate a ccuepaw balyn tuh thaloi te a chih cih hae, a hiinhy hae paw tuh teitei lang balyn phiariphiarae a phiakuh cih hae; tetuh kae, Bawipaw nynh ka hopaw kha na nyh cih oh, a ci. Nyathya kya Israel kha Hangthungnaw
22Bawipaw PACHIA nynh hynhte a ho:Myarya hangpaw sidar kuadungpaccy kya-e atoih thawpaw khaka lah cih zah, ka lin cih.Atoih thawpaw adungpaccy kya-eatoihpaw kha ka khya cih zah,hang zah asung-epaw mua vawlan kheka lin cih.23Israel mua ahang huaccepaw vawlan khetuh-e tuh ka lin cih,tuh-e nynh ange atoih cih zah athae thae cih,te asung-epaw sidar lang a tang cih.tuh-e thingku kaw khepavaw phuinccing a um cih hae;asake saepaw ahysuepaw phuinccing nynhtuh-e thingnge a mynlyh kyakhebu a luakuh cih hae.24Ramkaw e thingku balyn nynhBawipaw ka thuapaw khayn nyh cih hae.Ahangpaw thingku kha ka nesah zah,anepaw thingku kha ka hangsah;hinlalyhpaw thingku khaka rousah zah, aroupawthingku kha hinlalyh lan ka nung.Kae, Bawipaw nynh ka ho vae;tuh-e tuh ka ccingsah cih.Lu Raveih tungvaw Liarunaw
1Bawipaw bya tuh ka kya yn thua zah:2“Nungpaaw hae nynh ariapaw misu thae kha ae hae zah, ccaaw hae tuh mih hawzaw,” cite nanning nynh Israel ram te asekuhpaw e phungtangbya kha palei na ho oh paw hynh paw na rynaw oh mou?3Bawipaw PACHIA nynh a hopaw tuh, Kae tuh ka hiin thyhte, e phungtangbya hynh Israel ram kya na mang vae lan khyh oh.4Hiinnaw balyn tuh ka kya-e nynh thua; nungpaaw hae hiinnaw thuasah, ccaaw hae hiinnaw thuasah ka kya-e nynh thua: A seipaw ccungccaw tuh a chih cih.
5Ccungccapaw tuh ding zah ahmepaw te akyhpaw kha a cyi ze thuasah—6mua hae vawlan khe ae khyh, Israel phin kya-e zohtuh hae kha beik khyh, milae zu kha seikhae khyh, nopiny a nyhpaw kha naekuh khyh,7humhung kha mah tuaasah khyh, laebah a lahtu nynh a ponpaw uccaw kha bua a kii, milae uccaw luade khyh, a vuelawpaw kha a looh pyabua zah a ccakaete umpaw kha boeining a bongpya ze thuasah,8ato lawkute phua koiisakuh khyh hae, hoyleinaw kyate a kuih a synku, byalung hae paw laku kya ahmete bya a pia,9ka phungbya hae kha a zui, ka phungzae hae kha pekite zui zah lungzite rya a law ze thuasah—tuhcihawpaw ccungccaw tuh miding nynh thua; aning tuh a hiin ccaccing cih, cite Bawipaw PACHIA nynh a ci.
10Tuh-e paw a ccapaw tuh a puathopaw, ccungccaw a theihpaw,11e uccaw hae hankhakheit kha a cyi (a paaw nynh khah-e hae kha a la cyi khyh zemah), mua hae vawlan khe a ae, milae zu kha a seikhae,12ryachi hae te anyaa hae paw kha a tuaa a sah hae, milae uccaw a luade, ponpaw uccaw kha kii khyh hae, zohtuh hae kha a beik, anungsikuhpaw kha a cyi,13ato kha a lawkuhtupaw athua lanze, aning tuh a hiin cih tou? Hiin lan khyh. Aning nynh anungsikuhpaw e uccaw balyn kha a cyi vae; aning tuh a chih ccaccing cih; a chiise tuh amaw tungvaw accah cih.
14Thuasalama, e ccungccapaw ccapaw tuh a paaw nynh a la raepaw seinaw balyn kha muih zah hoyte tua zah tuhcite cyihbua khyh,15mua vawlan khe ae khyh, Israel hae kya-e zohtuh hae kha beik khyh, milae zu kha seikhae khyh,16humhung kha mah tuaasah khyh, a pon hae paw uccaw kha lawkuh khyh, milae uccaw luade khyh, a vuelawpaw kha a looh pyabua zah a ccakaete umpaw kha boeining te a bongpya,17hoyleinaw kyate a kuih kha a synku, ato kha lawkuh khyh zah ka phungzae hae te ka phungbya hae kha a zui lanze, aning tuh a paaw hoyleinaw keiccu chih lan khyh; aning tuh a hiin ccaccing cih.18A paaw tuh a rysawthah zah a uno uccaw kha a luade, te a minphuin hae laku khe ahoy leipaw kha a cyi keiccuze a hoyleinaw keiccu a chih.
19Tuhzemah nanning nynh, “A paaw hoyleinaw keiccuze a ccapaw tuh pawccemou teing leite a um cih?” na ci oh. A ccapaw nynh ahmepaw te akyhpaw kha cyih zah, ka phungbya balyn kha pekite a zui lanze, aning tuh a hiin ccaccing cih.20A seipaw ccungccaw tuh a chih cih. A ccaaw tuh a paaw hoyleinaw keiccuze teing lan khyh, a paaw tuh a ccapaw hoyleinaw keiccuze teing lan khyh; miding tuh a dingnaw mee kha a mue cih zah, ccungccaw hoyleipaw tuh a hoyleinaw mee kha a mue cih.
21Thuasalama ccungccaw hoyleipaw nynh a raepaw a seinaw balyn kyate maeleihkuh zah ka phungbya balyn kha zuite ahmepaw te akyhpaw kha a cyi lanze, aning tuh a hiin ccaccing cih; chih lan khyh.22Aning nynh a la cyiseipaw seinaw hae kha ccuinpya thua lan khyh; aning tuh a la cyipaw dingnaw keiccuze a hiin cih.23Ccungccaw hoyleipaw nynh a chipaw kha ccapyh san ka lungtua zawtou? A hiinzia kha paleihkuh zah a hiinpaw kha ka lungtuahua khyh tou? cite Bawipaw PACHIA nynh a ci.24Thuasalama midingpaw nynh a dingnaw kyate maeleihkuh zah hoyleinaw kha raete, ccungccaw hoyleipaw nynh a cyipaw anungsikuhpaw uccaw kha a cyi lanze, aning tuh a hiin cih tou? Aning nynh a la cyipaw adingpaw cyisahnaw kha liathuipya thua lan khyh; a la cyiseipaw hynhunaw te a la raepaw seinaw keiccuze aning tuh a chih cih.
25Tuhzemah nanning nynh, “Bawipaw nynh a cyipaw tuh hme khyh,” na ci oh. Pou Israel hae, atu ngaetua oh: Ka cyipaw tuh hme khyh tou? Ahme leipaw tuh nanning nynh na cyi oh paw kha thua khyh tou?26Miding nynh a dingnaw kyate maeleihkuh zah hoyleinaw kha a rae lanze, tuh-e hoyleinaw keiccuze aning tuh a chih cih; a la cyipaw hoyleinaw keiccuze aning tuh a chih cih.27Tuhawte, ccungccaw hoyleipaw nynh a la cyipaw hoyleinaw kha maetawkuh zah, ahmepaw te akyhpaw kha a cyi lanze, a hiinnaw kha a khumkuh cih.28Aning nynh a la cyipaw cyiseinaw balyn kha hoyte tua zah a maetawku keiccuze aning tuh a hiin ccaccing cih; chih lan khyh.29Tuhzemah Israel hae nynh, “Bawipaw nynh a cyipaw tuh hme khyh,” a ci hae. Pou Israel hae, ka cyipaw tuh hme khyh tou? Ahme leipaw tuh nanning nynh na cyi oh paw kha thua khyh tou?
30Tukeiccuze, pou Israel hae, nae hiinzia thyhte nanning balyn kha bya kae pia cih oh, cite Bawipaw PACHIA nynh a ci. Nae seinaw balyn kha maetawkuh oh lah, ngaesikuh oh; tuhkhyhze tuh hoyleinaw tuh nae ronaw athua cih.31Kae kha rawsete na rae oh paw seinaw balyn kha vua oh lah, thinlung thawpaw te tuanaw thawpaw lawkuh oh! Pou Israel hae, pawccemou na chih cih oh?32Lukhakheit nynh a chipaw kha ka lungtua khyh, paleihkuh oh lah, hiintua oh, cite Bawipaw PACHIA nynh a ci. Israel Thethyanaw
1Israel siapharan ccapaw hae hanlan rawkhuite na ho lanpaw tuh:2Na nung tuh chindeih hae kyazepawcihawpaw chindeih pinung mou athua!Chindeih ano hae paw kyazeamaw a taw hae khaa do-oih hae.3Aning nynh a do-oihpawataw sa kheit tuhchindeih anopaw lang yn tang zah,saw teipaw kha a ccangku;aning nynh ccungccaw hae kha a ae hae.4Minphuin hae nynhamaw kong kha thae hae zahmih bungzou; aning khamih saehung lungkhu khe a kyng hae,sivawrui te he hae zahIzip ram lang a cciakhae hae.5A nung nynh ngaehoium vae khyh cipaw nyh zah,lungrote he a um te,ataw hae kya-e sa kheit kha lah zahchindeih nopaw lang a tangsah.6Tuh-e chindeih nopaw nynh mahchindeih hae kya saw khatei lan a via bungthung;te chindeih nopaw lang yn tang zah,saw teipaw kha a ccangku;aning nynh ccungccaw hae kha a ae hae.7Aning nynh mih rhawlungrua hae kharopah hae zah mih khua hae khaphe a zosahpya hae;aning nynh a siaruapawroi keiccuze ram tea lungkhu umpaw balyn tuhpong siikuh hae.8A pepan umpaw khua takyh kya-eminphuin hae nynhamaw kha a dou hae;miabu te aning kha bong hae zahmih saehung lungkhu khea kyng hae.9Sivawrui te khii hae zahabawng lungkhu a nung hae,te Babilon siapharan kalana cciakhae hae;Israel mua vawlan khe a roi khathae athua vae khyh ccaw citethong lungkhu a nung hae.10Na nung tuh misu khokhu lungkhu,tui kin kya linpawmisu ku hawte nynh thua,tui alung keiccuze athae thae zah,akaran te phe abeih.11Tynkarangpaw akaran tuhuktu bawi kya-e ccoi lang a tang;akaran hae patae laku khemyarya hang lante a thadyn;akaran patae ryte ahang keiccuzephe alangkuh.12Thuasalama tuh-e tuhthinriate poh khaee thua zahlaephi kya vua athua;nithua lang e khisan nynhkarae rousah zah,athae tuh akhuakuh,tynkarangpaw akaran tuhkarae rou zah, maee nynh phe a u.13Atu vae tuh, tui um leinaw,karae roupaw ramkaw khelinthui athua.14Akaran kyate maee pou zah,akaran te athae kha phe a u,tetuh tuin kyakheuknawpaw ccoi rae nawlantynkarangpaw akaran um vae khyh.E tuh rawkhuinaw thua zah, rawkhui nawlan mang athua. Israel nynh Pachia Dounaw
1Kum sarinaw kum, sawpaw sah pangawnaw, nin haw nin khe Israel piccan hae tuh Bawipaw kha tuanaw ngia khylan oun thua hae zah ka malang a haung hae.2Te Bawipaw bya tuh ka kya yn thua zah:3Ccungccapaw, Bawipaw PACHIA nynh a hopaw kha Israel piccan hae kha hopah hae: Kae kha tuanaw ngia khylan pawccemou nae thua oh? Kae tuh ka hiin thyhte, nanning nynh tuanaw nae ngia kho lan khyh oh, cite Bawipaw PACHIA nynh a ci.4Ccungccapaw, minmin kha bya na pia cih hae tou? Minmin kha bya na pia cih hae tou? Mih minpaaw hae nynh a rae hae paw nungsikunaw kha nysah hae lah,5minmin kha hopah hae: Bawipaw PACHIA nynh hynhte a ho: Israel kha ka po lyaze, Izip ram kya kamaw toulou kha minmin kya nysakute, Kae tuh Bawipaw nae Pachia nynh ka thua, cite Jakob ciihan hae kha bya ka kinpyaku hae.6Tuin nin khe, Izip ram kyate kae poukhae cih oh zah, nanning hanlan ka popaw ram, mateitui te khoitui aluanaw ram, ram balyn laeze aphu-e huaccepaw ram lungkhu lang kae teekhae cih oh, cite minmin kha bya ka kinpyaku hae.7Nanning lu kheit cci nynh nae mit lungtuakhae kupaw anungsikuhpaw uccaw hae kha vua oh lah, Izip ram e zohtuh khate naemaw toulou kha thusakuh nan oh; kae tuh Bawipaw nae Pachia nynh ka thua.8Thuasalama minmin nynh kae kha yn dou hae zah ka bya ngae khyh hae; mih mit lungtuakhaekupaw anungsikuhpaw uccaw hae kha lu kheit nynh sanmah vua khyh hae zah, Izip ram e zohtuh hae kha vua khyh hae.
Tetuh ka thin-unaw kha mih tungvaw ka bu cih zah, Izip ram lungkhu kya ka thinrianaw kha ka mangnua cih hae, cite ka tuaku.9Thuasalama minmin a umnaw hae minphuin ccangpaw hae muihnaw khe ka min kha thusah athua khyh nawlan, ka min hanlan rya ka lah zah, minphuin ccangpaw hae muihnaw khe ka nysakuh hae zah, minmin kha Izip ram kyate ka poukhae hae.10Tukeiccuze Izip ram kyate ka poukhae hae zah ramkaw lang ka cciakhae hae.11A zuipaw miakaw nynh a hiin ccaw hae cite, ka phungbya hae kha ka pya hae zah ka phungzae hae kha ka muihsah hae.12Tuhpiaze kae, Bawipaw nynh minmin kha ka thyaasah hae cipaw a ny nawlan hae, kae te minmin laku muisahnaw lante ka sabbath hae kha ka pya hae.13Thuasalama Israel hae nynh ramkaw kya kae kha yn dou hae; a zuipaw miakaw nynh a hiinnaw lanpaw ka phungbya hae kha zui khyh hae zah, ka phungzae hae kha a vua hae; te ka sabbath hae kha myaryamaw a thusah hae.
Tetuh minmin kha ro khylan, ramkaw kya ka thin-unaw kha mih tungvaw bu lan cite ka tuaku.14Thuasalama ka poukhae hae paw kha a muih hae paw minphuin ccangpaw hae muihnaw khe ka min kha thusah athua khyh nawlan, ka min hanlan rya ka law.15Tuhpiaze ram balyn laeze aphu-e huaccepaw, mateitui te khoilutui aluanaw ram, nanning kae pya vae oh paw ram lungkhu langkhe kae teekhae lan khyh oh, cite ramkaw khe bya ka kinpyaku hae,16pawccecize mih thinlung tuh mih zohtuh hae nulang a zuiku keiccuze ka phungzae hae kha vua hae zah ka phungbya hae kha zui khyh hae, ka sabbath hae kha mah a thusah hae.17Thuasalama minmin kha ngaethya ka umsah hae zah ka roh khyh hae, ramkaw kya phe ka thangsah khyh hae.
18Ramkaw kya mih ccaaw hae kha ka hopah hae zah, Nae nung nae paaw hae kya-e phungbya kha zui nan oh, mih phungzae kha mah zui nan oh, mih zohtuh hae khate naemaw toulou kha thusakuh nan oh.19Kae tuh Bawipaw nae Pachia nynh ka thua; ka phungbya hae kha zui oh lah, ka phungzae hae kha hoyte zui oh,20Kae, Bawipaw tuh nae Pachia ka thuapaw kha na ny nawlan oh, kae te nanning laku kya muisahnaw athua cih paw ka sabbath hae kha thyaasah oh.21Thuasalama mih ccaaw hae nynh kae kha yn dou hae; a zuipaw miakaw nynh a hiinnaw lanpaw ka phungbya hae kha zui khyh hae zah, ka phungzae hae kha hoyte zui khyh hae; ka sabbath hae kha a thusah hae.
Tetuh ka thin-unaw kha mih tungvaw ka bu cih zah, ramkaw khe ka thinrianaw kha ka mangnua cih hae, cite ka tuaku.22Thuasalama ka poukhae hae paw kha a muih hae paw minphuin ccangpaw hae muihnaw khe ka min kha thusah athua khyh nawlan, ka min hanlan tuate ka kuih kha zya ka synku.23Tuhpiaze ramkaw khe minmin hanlan bya ka kinkuh zah, minmin kha minphuin ccangpaw hae laku kya phiariphiarae ka nung cih hae zah, ram hae kalan ka saw cih hae,24pawccecize minmin nynh ka phungzae hae kha zui khyh hae, ka phungbya hae kha vua hae zah ka sabbath hae kha a thusah hae, mih minpaaw hae kya-e zohtuh hae kha a beik hae.25Te ahoy leipaw phungbya hae kha ka pya hae zah, a hiinkhae kho lei hae paw phungzae hae kha ka pya hae.26Minmin nynh kae tuh Bawipaw ka thuapaw kha a ny nawlan hae, minmin kha ro khylan mih ccatawccaw balyn khate silawnaw rae hae zah, mimaw mih lasung ccaccei mawkhate minmin kha ka thusah hae.
27Tukeiccuze, ccungccapaw, Bawipaw PACHIA nynh a hopaw kha Israel hae kalan hopya tua hae: Nae minpaaw hae nynh ka tungvaw lungzi leite ka min kha bua yn thusah hae.28Minmin kha pya lan bya ka kinpyaku hae paw ram lungkhu langkhe he ka teekhae hae te, minmin nynh a muih hae paw ahangpaw mua miakaw khyhze thingku anaw abungpaw miakaw kyakhe silawnaw rae hae zah ka thin yn riasah hae; te tuin kyakhe mynkhuhpaw kha maee te upah hae zah, niapaw silawnaw kha a rae hae.29(Na ccianua oh paw ahangpaw hmin tuh pawmou athua? cite ka khia hae. Tukeiccuze tuh-e tuh Bamah cite atunin cia a ko hae.)30Tukeiccuze Bawipaw PACHIA nynh a hopaw kha Israel hae kalan hopya tua hae: Nae minpaaw hae kya-e anungsikuhpaw uccaw hae nulang zuikuseite, minmin nynh a cyi hae hawte naemaw toulou kha na thusakuh cih oh tou?31Nae lasung kha na pya oh zah nae ccaaw hae kha silaw nawlan maee te ute naemaw toulou kha nae zohtuh hae khate atunin cia na thusaku oh. Pou Israel hae, nanning nynh kae kha tuanaw nae ngiakuh kho cih oh tou? Kae tuh ka hiin thyhte, nanning nynh tuanaw nae ngia kho lan khyh oh, cite Bawipaw PACHIA nynh a ci.
32“Aening tuh minphuin ccangpaw hae hawte thua oh sih lah, thing te lung a beik hae paw ramccungccaw hae hawte thua oh sih,” cite na tuaku oh paw kha papin cyihkuh lan khyh. Pachia nynh Israel kha A Kikhae Cih
33Bawipaw PACHIA nynh a hopaw tuh: Kae tuh ka hiin thyhte, athungpaw kuih, dyngpaw kuih te bupaw thinrianaw khate nanning kha kae uk cih oh.34Phiariphiarae na umnaw oh ram hae te minphuin hae kyate athungpaw kuih, dyngpaw kuih te bupaw thinrianaw khate kae cciakhae cih oh zah kae suelua cih oh;35minphuin ccangpaw hae ramkaw langkhe kae cciakhae cih oh zah, tuin kyakhe mitmae hawiliakute nanning kha bya kae pia cih oh.36Izip ram ramkaw kya nae minpaaw hae kha bya ka pia hae hawte, nanning kha bya kae pia cih oh, cite Bawipaw PACHIA nynh a ci.37Ka hoitang kaw khe kae cciasah cih oh zah, byakinnaw lungkhu khe kae nung cih oh.38Kae yn dou hae paw te yn rawse hae paw kha nanning laku kyate poh ka thuaa cih hae; ramccang ccungccaw lante a umnaw hae ram kyate minmin kha ka poukhae hae zemah, Israel ram lungkhu lang tee lan khyh hae. Te kae tuh Bawipaw ka thuapaw kha na nyh cih oh.
39Pou Israel hae, Bawipaw PACHIA nynh hynhte a ho: Nae balynte atu cceih oh lah, nae zohtuh hae kha beik oh; thuasalama atu te malang tuh ka bya na ngae khyh oh zemah, nae lasung hae te nae zohtuh hae khate athyaapaw ka min kha na thusah vae lan khyh oh.40Pawccecize, Bawipaw PACHIA nynh a hopaw tuh: athyaapaw ka mua, Israel mua ahangpaw vawlan khe Israel hae balyn nynh ram lungkhu kya kae kha yn beik cih hae; tuin kyakhe minmin kha leh ka khan cih hae, te tuin kyakhe nae kya-e ahlu hae, ahoy huaccepaw nae lasung hae te athyaapaw nae uccaw balyn kha kae ngia cih oh.
41Phiariphiarae na umnaw oh ram hae te minphuin hae kyate nanning kha kae poukhae oh zah he kae suelua oh te, nanning kha mynkhuhpaw hawte kae ccou cih oh; minphuin ccangpaw hae muihnaw khe ka thyaanaw kha nanning laku kya ka langsakuh cih.42Nae minpaaw hae kalan pya lan bya ka kinpyaku hae paw ram, Israel ram lungkhu lang he kae teekhae oh te, kae tuh Bawipaw ka thuapaw kha nae nyh cih oh.43Tuin kyakhe naemaw toulou na thusakunaw oh paw nae cyisahnaw te nae hiinzia balyn kha na liathui cih oh zah, na la cyi oh paw hoyleinaw balyn keiccuze naemaw toulou nae luathuakuh cih.44Pou Israel hae, ahoy leipaw nae hiinzia, nae cyisahnaw athahpaw thyhte thua leite, ka min hanlan nanning kha he kae ccuepe oh te, kae tuh Bawipaw ka thuapaw kha nae nyh cih oh, cite Bawipaw PACHIA nynh a ci. Negeb Rawse lan Hotynaw
45Bawipaw bya tuh ka kya yn thua zah:46Ccungccapaw, alia langkhe na mae kha hawi lah, alia lang kha rawsenaw bya honua tua, te Negeb ram umpaw tuhpi kha rawsete profehbya hopya tua;47Negeb tuhpi kha hynhte hopya tua, Bawipaw bya hynh thaetua: Bawipaw PACHIA nynh hynhte a ho, Na tungvaw kya maee ka tyh cih zah, na kya umpaw thingku hinlalyhpaw miakaw te aroupaw thingku miakaw kha a u cih; aruapaw maee tuh chih lan khyh zah, alia langte palung langkhe pawpaw balyn kha khaleih a u cih.48Kae, Bawipaw nynh tuh-e maee kha ka tyh cipaw kha ccungccaw balyn nynh a nyh cih hae; tuh-e maee tuh chih lan khyh.49Tetuh kae nynh, “Pou Bawipaw PACHIA! Minmin nynh ka konglang ho hae zah, ‘Aning tuh tousenawpaw phungpaw a hotupaw thua khyh tou?’ a ciku hae,” cite ka hopya. Pachia Thaloi
1Bawipaw bya tuh ka kya yn thua zah:2Ccungccapaw, na mae kha Jerusalem langkhe hawi lah, beikinnthyaa hae kha rawsenaw bya hotua; Israel ram rawsenawpaw profehbya kha hotua,3Bawipaw nynh hynhte a ho cite Israel ram kha hopya tua: Nang kha rawsete ka thaloi kha abu kyate ka thuaakuh cih zah, na kya umpaw miding thuasah, ccungccaw hoyleipaw thuasah parouh mawte ka bae cih hae.4Adingpaw te ahoy leipaw na ccungccaw hae kha parouh mawte ka bae lan hae paw athua keiccuze, alia langte palung lang cia ccungccaw balyn kha rawsete ka thaloi tuh abu kyate thuaa athua cih;5Bawipaw nynh ka thaloi kha abu kyate a thuaa vae cipaw ccungccaw balyn nynh a nyh cih hae; tuh-e thaloi tuh abu lungkhu lang bua sangthui thua vae lan khyh.6Tukeiccuze ccungccapaw, hawkhaeku tua; mih malang khe thinlung koite myarya ngaethyate hawkhaeku tua.7Minmin nynh nang kha, “Pawccemou na hawkhaeku?” cite ae khia hae ze, nang nynh minmin kha, “Oun thuapaw thongpang keiccu nynh thua. Ccungccaw miakaw tuh myarya rih cih hae zah, mih kuih tuh a thawzya cih, mih lungroh cih zah mih ccukharu athyngkuh cih. Tuh-e tuh yn thua cih zah yn ccing cih,” cite Bawipaw PACHIA nynh a ci.
8Te Bawipaw bya tuh ka kya yn thua zah:9Ccungccapaw, profehbya ho lah, Bawipaw nynh hynhte a ho cite hopya tua hae:Thaloi, thaloi tuh taw athua vae,awrarih lan nuih athua vae.10Thaloi tuh chianaw khylantaw athua vae,khozawlaekuhpaw hawtephaephae ak lan taw athua vae!Pawtemou lungtuanaw khaah rae kho ung cih oh?Ccungngue te thuiheinaw balyn khapawlang na ria khyh oh.11Thaloi kha awrarih lan nuih khylan tekuih te kyng khylan pya athua vae.Thaloi kha ccungccawa theihtu kuih kya pya khylantaw thua vae zah awrarih lannuih athua vae.12Pou ccungccapaw, siaruate rawtua,pawccecize tuh-e thaloi nynhka ccungccaw hae kha a rawse hae;Israel bawi balyn kha mah a rawse hae;minmin tuh ka ccungccaw hae rytethaloi kalan vua athua hae.Ezou! cite nae phae kha tuku tua oh!
13Tuh-e tuh syntawtuanaw nynh thua. Ccungngue kha pawlang na ria khyh oh lanze, tuh-e tuh cyihkuh lan khyh tou? cite Bawipaw PACHIA nynh a ci.14Ccungccapaw, profehbya ho lah,na kuihbia tua.Thaloi nynh vae ning,vae thum baetua sah;tuh-e tuh chianaw lanpawthaloi nynh thua.Ccungccaw patae chianaw hanlanthaloi thua zah,minmin kha phang a koihlu hae;15tukeiccuze mih lungroh zah,ccungccaw patae a khuliakuh hae.Koikua balyn kyakhethaloi kha ka nung vae.Thaloi kha phaephae ak lan rae thua zah,chia nawlan awrarih lan nuih athua.16Na thaloi haw a hawinaw miakaw lang,voilang ranglang khe baetua!17Kae nynh mah ka kuih ka bia cih zah,ka thinrianaw kha ka daesah cih;kae, Bawipaw nynh ka ho vae.
18Ka kalan yn thuapaw Bawipaw bya tuh:19Ccungccapaw, Babilon siapharan thaloi nynh a cceih cihnaw laanpi ccangning kha syntawnaw raetua; tuh-e laanpi ccangning mawte ram ramkheit kyate a pou cih hae. Te khuapi kalan a cceihpaw laanpi aphiakunaw kyakhe syntawnawpaw kha raetua;20Ammon hae khua Rabbah lang thuasah, Judah ram e sihkakinpaw Jerusalem khua lang thuasah tuh-e thaloi a cceih cihnaw laanpi kha syntawnaw raetua.21Pawccecize Babilon siapharan tuh laanpi ccangning aphiakunaw kyakhe ccungthydung khylan a thadyn; the hae kha a thyhleih, terafim khozi kha tuanaw a ngia, saw athin kha a do.22Jerusalem cite zeikuhpaw ccungthydungnawpaw the kha a ranglang kuih nynh a kyng, tuh-e the nynh aning kha rhawtuknawpaw zunghe raenua lanpaw, chia khylan siarua lanpaw, rhawtuk khylan siarua lanpaw, koikua te arawsekuh lante rhawtuknawpaw zunghe raenua lanpaw, laephi dohsah lanpaw te rhawvianawpaw innhangpaw hae sak lanpaw kha a hopya.23Thuasalama phuring-unaw tuh Jerusalem ccungccaw hae hanlan ahme leipaw phuring-unaw hawte nynh athua; pawccecize minmin nynh atynpaw byakinkunaw kha a rae vae hae; thuasalama siapharan nynh minmin kha kyng khylan mih hoyleinaw kha a syntaw.24Tukeiccuze Bawipaw PACHIA nynh hynhte a ho: Nae seinaw kha nae cyisahnaw balyn kya langsaku khylan, nae cyiseinaw kha phykute milae na nysah oh keiccuze milae kuih kya na thua cih oh.25Anungsikuhpaw ccungccapaw, Israel uktu bawi,nyathya detahnaw ccyh nynhae thuanua vae.26Bawipaw PACHIA nynh hynhte a ho:Na pungde kha nung lah,na bawilukhung kha khahku tua;uccaw hae tuh arulaekuh vae.Anyaapaw kha hangthungtua lah,ahangkuhpaw kha nyaasah bung tua.27Ronaw, ronaw, ronaw—tuh-e ronaw tuh ka thuasah cih!(Tuhcihawpaw tuh cyihkuh boi khyh.)Tuh-e ronaw a rae cih pawhe yn thua te, tuh-e tuh ka pya cih.Amaw kha tuh-e khuapi tuh ka pya cih.
28Ccungccapaw, profehbya ho lah, hopya tua hae, Amon hae te thuasah, mih saryanaw te thuasah asekuh lante Bawipaw PACHIA nynh hynhte a ho:Thaloi, thaloi!Chia nawlan thuaaku athua,maemih nawlan,khozawlaekuhpaw hawteawrarih lan taw athua.29Vizin na muih oh paw tuhahme leipaw thua zah,malang hanlan na hodaeoh paw bya tuhhynbya nynh thua, nanning tuhccungccaw hoyleipaw teccungccaw thyapawna thua oh zah,nanning nyathya detahnawccyh tuh yn thua vae.Thaloi tuh nae nging vawlan accah cih.30Thaloi kha abu kalan sangtua oh!Nanning kha rae na thuanaw oh hmin kya,na thokeinaw oh ram kyakhebya kae pia cih oh.31Ka thinrianaw khanae tungvaw ka bu cih,ka thinrianaw maee tekae mung cih oh.Mih rysawthah zahro a thya hae paw kuih kalan,kae ap cih oh.32Nanning tuh maee hanlanmaeething na thua cih oh,nae chii tuh laephi kalan a tee cih.Nanning tuh liathuina thua vae lan khyh oh,pawccecize kae, Bawipaw nynh phe ka ho vae.Ccungccaw Theihpaw Khuapi
1Bawipaw bya tuh ka kya yn thua zah:2Ccungccapaw, nang, ccungccaw theihpaw khuapi kha bya na pia cih tou, bya na pia cih tou? Aning nynh anungsikuhpaw a cyisahnaw balyn kha hopya tua.3Bawipaw PACHIA nynh a hopaw kha minmin kalan hynhte hopya tua hae: Amaw lungkhu khe chiise luasah zah, zohtuh hae kha raekute amaw toulou a thusakuhpaw khuapi ccyh tuh a thua vae.4Na luasahpaw chiise keiccuze na sei vae, na raekupaw zohtuh hae keiccuze na nungsikuh vae; namaw nynh na ccyh kha na naesaku vae, khyapyapaw na ccyh tuh a thua vae. Tukeiccuze minphuin hae malang khe na the kae thyasah zah, ram balyn nynh saryapaw lang kae rae vae.5A thethah zah siarisiarae a sianua hae paw nang kha namaw te na sawkuh oh paw te na naekuh oh paw nynh ae sarya cih hae.
6Na kya umpaw Israel bawi hae nynh mih huhan raveih thyhte ccungccaw kha a chia hae.7Na kyakhe nung te paaw kha a theihrya hae; na kya umpaw minphuin ccangpaw hae kha uccaw luade hae zah, ngawraw hae te nomae hae kha na kyakhe a tuaa a sah hae.8Athyaapaw ka uccaw hae kha pawlang na ria khyh oh zah ka sabbath hae kha na thusah oh.9Ccungccaw chia khylan ccungccaw a lawty hae paw, mua vawlan a ae hae paw, ohhuakunaw seinaw rae hae paw tuh na kya a um hae.10Na lungkhu khe mih paaw hae zu kha a seikhae hae; nopiny a ny ccyh hae khe nopi hae kha a seikhae hae.11Ccungccaw abang nynh mih innpaw hae zu seikhaete anungsikuhpaw kha a rae hae; abang nynh mih monung hae ryte anungsikuhpaw ohhuakunaw kha a rae hae; na kya umpaw abang nynh mih ccianung athuapaw mih paaw ccanung khate anungsikuhpaw kha a rae hae.12Na lungkhu khe, minmin nynh ccungccaw chia khylan amee a lawku hae; nanning nynh phua ato lawkute na koiisaku oh, nae innpaw hae uccaw kha na luade oh; nanning nynh kae kha nae ning vae oh, cite Bawipaw PACHIA nynh a ci.
13Dotua, ahme leite na mue oh paw uccaw, te na lungkhu kya aluapaw chiise keiccuze ka kuih ka bia.14Na tungvaw rya he ka lah te, na rawthungnaw tuh a ngaesang kho cih tou? Na kuih thungnaw tuh atyn kho cih tou? Kae, Bawipaw nynh ka ho vae paw kha ka cyih cih.15Nanning kha minphuin ccangpaw hae kya phiariphiarae kae nung cih oh zah ram hae kyakhe kaheikalah kae phia cih oh, te nae nungsikunaw kha kae lawpah cih oh.16Nanning keiccuze minphuin hae muihnaw kya ka minthusah athua cih; te nanning nynh kae tuh Bawipaw ka thuapaw kha na nyh cih oh.
17Bawipaw bya tuh ka kya yn thua zah:18Ccungccapaw, Israel hae tuh ka hanlan sivaw-ia lang phe tang vae hae; mih balyn mawte ngun, sohin, ccephui, sivaw te kuee hawte thua hae zah, somaee kya tuisahte sivaw-ia lang phe tang vae hae.19Tukeiccuze Bawipaw PACHIA nynh hynhte a ho: Nanning balyn tuh sivaw-ia lang na tang vae oh keiccuze Jerusalem ngaelung langkhe kae suelua cih oh.20Ngun, sohin, sivaw, kuee te ccephui kha tuisah khylan somaee lungkhu nung hawte, nanning kha ka thinrianaw te ka thin-unaw khate Jerusalem khua khe kae pum cih oh zah kae tuisah cih oh.21Nanning kha sueluate ka thinrianaw maee kha kae mungnua cih oh zah, tuin khua lungkhu khe atui lang na tang cih oh.22Ngun tuh somaee lungkhu atui hawte, nanning tuh tuin khua kyakhe na tui cih oh; Bawipaw nynh nae tungvaw kya ka thinrianaw ae bu oh paw kha na nyh cih oh.
23Bawipaw bya tuh ka kya yn thua zah:24Ccungccapaw, Israel ram kha hopya tua: Nang tuh accikankuh leipaw ram, thinrianaw nin kya khuaarah leipaw ram nynh na thua.25Ram lungkhu umpaw a bawi hae tuh saw tei zah a siapaw chindeih te nynh aloku hae; ccungccaw hae kha tei hae zah, sisua te aphutepaw uccaw hae kha a lawku hae; ram lungkhu kya nomae lang patae a tangsah hae.26A ranpibawi hae nynh ka ccangpyanaw kha roh hae zah athyaapaw ka uccaw hae kha a thusah hae; athyaapaw te athyaa leipaw kha laesah leite, athyaapaw te athyaa leipaw kong kha ccangpah khyh hae, minmin laku kya kae kha thethyasah khylan, ka sabbath hae kha pawlangria khyh hae.27A bawi hae tuh saw a tei hae paw ram-ui hae te nynh aloku hae, ccungccaw chiate, ahme leite muenaw hanlan ccungccaw hiinnaw kha a ro hae.28Profeh hae nynh mah Bawipaw nynh a ho lei pite, “Bawipaw PACHIA nynh hynhte a ho,” cite hote ahme leipaw vizin kha muih hae zah, hynbya a ho hae, arawpaw sii kha a thuh hae.29Ram kya-e ccungccaw hae nynh nangsepaw te luadepaw rya kha a law hae; a ryachipaw te anyaapaw kha tuaasah hae zah, ramccang hae kha ahme leite a luade hae.30Ram kha ka ro khyh nawlan, khualungrua a raethui cih paw te ating vae paw khualungrua kya ram ccelang ka malang a thadyn cih paw kha ka ccung zah lu kheit sanmah ka muih khyh.31Tukeiccuze ka thinrianaw kha mih tungvaw kya ka bu; ka thinrianaw maee te minmin kha ka u hae; mih cyisahnaw kha mih lu vawlan ka ccawsah, cite Bawipaw PACHIA nynh a ci. Oholah te Oholibah
1Bawipaw bya tuh ka kya yn thua zah:2Ccungccapaw, nung nungkheit ccanung hae lu ning a um hae;3minmin tuh he a liaccaw hae te, Izip ram kya ohhuanung lang a tang hae; mih matei kha miapah hae zah mih liaccady by kha a pom hae.4Atawccanung min tuh Oholah cikuh zah a neitawnung min tuh Oholibah acikuh. Minmin tuh ka kya-e lang tang hae zah, ccanung ccapaw hae kha a saahku hae. Oholah tuh Samaria thua zah Oholibah tuh Jerusalem nynh thua.
5Oholah tuh ka kya-e athua pite a ohhuakuh; a sungsah hae paw Assiria hae,6meizong boeining a lawkuh hae paw rhawbawi hae, uktu hae te kawpyatu bawi hae, apuithyapaw ccangvae hae, marang rhawkaw hae kha a ry hae.7Assiria pise asung-e hae paw balyn ryte a ohhuaku hae; aning nynh a ry hae paw miakaw kya-e zohtuh hae balyn khate amaw toulou kha a thusaku.8Izip ram kya a la raepaw ohhuakunaw kha umtaw khyh; tuin kyakhe a ngawphue lyaze pise hae nynh ikhae hae zah a liaccady matei kha miapyate a seikhae hae.9Tukeiccuze aning nynh a ry hae paw a sungsah hae, Assiria hae kuih kalan khe ka ap vae.10Minmin nynh a boeining kha phae hae zah a ccakaete a nung hae; a ccanung hae te a ccapaw hae kha a kyngpya hae; amaw thaloi te a chia hae. Aning tuh byapianaw teing zah, nopi hae laku kya byaphung lang a tang.11A neitawnung Oholibah nynh tuh-e tuh a muih zemah a unung laeze ohhuaku rynaw thinlung hoihua zah a ohhuakuh hua.12Assiria hae, uktu hae te kawpyatu bawi hae, sivaw rhawtuk-uccaw lawkuh hae paw rhawbawi hae, marang rhawkaw hae apuithyapaw ccangvae hae balyn kha aning nynh a ry hae.13Aning nynh a nungsikunaw kha ka muih; parouh mawte alokuhpaw laanpi kha a zui hae.14Thuasalama Oholibah nynh houhouh a ohhuaku; pang kya soikuhpaw pise hae zuh, asi sepaw soikuhpaw Khaldi hae zuh,15tuh-e azuh hae tuh mih tae kya taeccia cciakuh hae zah mih lu kya haetapaw pungde a deku hae, mih balynte bawi hae—mih thokeinaw ram tuh Khaldi ram athuapaw Babilon hae te nynh aloku hae.16Minmin kha he a muih hae te, ohhuaku rynaw thinlung hoi zah, Khaldi ram umpaw tuh-e hae kalan khe locceihtu a saw hae.17Babilon hae tuh sungsakunaw ikhung kalan cceih hae zah aning kha a thusah hae; te minmin ryte amaw toulou kha a thusakuh koute, nungsikuh babae lante minmin kyate a ki.18A ohhuakunaw te a ccakaete a umpaw kha khawsung leite he a langsakuh tuh, a unung tungvaw ka lua ka aethua hawte, aning tungvaw mah ka lua ka aethua.19A ngawphue lyaze Izip ram kya a ohhuaku ccyh kha liathuite houhouh a ohhuaku,20pise athuanaw hae paw mih e tuh lann e te lokuh zah, mih buatui tuh rangtepaw buatui te alokuhpaw a sungsah hae kha a ry hae.21Izip hae nynh na matei ae miapya lya hae te na mateidung ae moipya lya hae, na ngawphue lya-e ohhuakuh rynaw kha na ngaethui.22Tukeiccuze, pou Oholibah, Bawipaw PACHIA nynh hynhte a ho: Mih tungvaw na lua-aethuapaw na sungsah hae kha nang rawsete ka thosakuh cih hae zah, teitei langte balyn nang kha kae konua cih hae:23tuh-e hae tuh Babilon hae te Khaldi hae balyn, Pekod hae, Shoa hae te Koa hae ryte Assiria hae balyn, tuh-e hae kya-e apuithyapaw ccangvae hae, uktu hae, kawpyatu bawi hae, bawi hae te rhawbawi hae, marang rhawkaw hae balyn nynh athua hae.24Minmin nynh palung langte rhawkaw patae ryte marangle hae te uccaw phunawpaw le hae khate nang kha ae thuanua cih hae; khawriaphua adihpaw, khawriaphua alepaw te sivawlukhung khate teitei langte balyn nang kha ae koihlu cih hae, kae nynh minmin kha byapianaw kaw ka pya cih hae zah, nang kha mih phungzae thyhte bya ae pia cih hae.25Minmin nynh na tungvaw mih thin ae rianua ccaw hae cite, ka thinrianaw kha kae sawnua cih. Na naduh te na nakua kha ae aw cih hae zah, a hiinhy hae paw tuh thaloi te a chih cih hae. Na ccanung hae te na ccapaw hae kha a kyng cih hae, a hiinhy hae paw kha maee te a u cih hae.26Na boeining kha ae phae cih hae zah, aphutepaw na lung hae kha a lawkuh cih hae.27Tuhcite na ohhuaku rynaw thinlung te Izip ram kyate nae thuakhaekupaw na ohhuakunaw kha ka thangsah cih; khah-e hae kha na ngae vae lan khyh zah, Izip ram kha na liathui vae lan khyh.28Bawipaw PACHIA nynh hynhte a ho: Nang nynh na huapaw ccungccaw hae kuih kalan te na lua na aethuapaw ccungccaw hae kuih kalan khe kae ap cih;29nang kha ae hua hae thyhte ae cyih cih hae, na ryalaw mee athae balyn kha a lawkuh cih hae zah, na ccakaete ae cciataw cih hae, na ohhuakunawpaw na e kha alang cih. Na ohhuaku rynaw te na ohhuakunaw nynh30hynh-e hynh na tungvaw ae thuakhaepya vae, pawccecize minphuin ccangpaw hae ryte na ohhuakuh zah, mih zohtuh hae khate namaw toulou kha na thusaku.31Na unung laanpi kha na zuibua vae; tukeiccuze a banang kha na kuih kya kae pya cih.32Bawipaw PACHIA nynh hynhte a ho:Akopaw te akhupawna unung banang khana neih cih; tuh-e banang tuhpatae accawngpaw thua zah,nang tuh ae sarya cih hae zahae nuinse cih hae.33Nang tuh ruinaw tengaethyanaw khate phe na beih cih.Na unung Samaria banang tuhri lan umpaw teronaw banang nynh thua;34tuh-e banang tuh na neih cih zahphe athang cih,banang akoinahpaw khana khae cih zah,na matei kha thoh ae aw cih;phe ka ho vae, cite Bawipaw PACHIA nynh a ci.35Tukeiccuze Bawipaw PACHIA nynh a hopaw tuh: Kae kha nae ning zah na nulang nae vua keiccuze ohhuaku rynaw na hoipaw te na ohhuakunaw mee kha teingtua.
36Bawipaw nynh kae yn hopyapaw tuh: Ccungccapaw, Oholah te Oholibah kha bya na pia cih hae tou? Anungsikuhpaw mih cyisahnaw kha hopya tua hae.37Pawccecize minmin nynh milae vawpaw te sei hae zah ccungccaw kha a chia hae; mih zohtuh hae khate milae vawpaw kya seinaw a rae vae hae; ka hanlan yn saahpya hae paw ccaaw hae kha heize zohtuh hae kalan khe looh lang a pya vae hae.38Tuhpiaze ka tungvaw kya e hynh a cyi ung hae: Tuin nin khe ka beikinnthyaa kha thusah hae zah ka sabbath hae kha thethyasah hae.39Mih ccaaw hae kha mih zohtuh hae hanlan a chia nin hae khe, ka beikinnthyaa kha thusah khylan a lungkhu lang a tee hae. E hynh minmin nynh ka inn lungkhu a cyi hae paw nynh thua.
40Minmin nynh locceihtu hae kha sawte asawnaw e pise hae kha kosah hae zah oun thua hae. Minmin hanlan tui na singpyaku hae, na mit kya azong na thuhpakuh hae zah ccaankunawpaw uccaw khate na ccaanpyaku hae;41myarya lypaw ikhung vawlan khe na haung zah, tuh-e ikhung malang aphaekuhpaw ccaboi vawlan khe ka kya-e mynkhuhpaw te ka chitui kha na nung.42ngaluin-ngaluin ccae hae paw zapi hae roi tuh accae, siarisiarae um hae paw patae te ramkaw te oun thuakhae hae paw arui hae paw mah a umbua hae; minmin nynh nopi hae kuih kyakhe khawccan nawsakuh hae zah, mih lu vawlan khe apuithyapaw bawilukhung kha a khungsah hae.43Milae vawpaw te seinaw raekheihte a tawkhaekuhnung tetou minmin tuh a ohhuaku hae, cite ka ho.44Lukhakheit nynh ohhuanung kha a teenua hawte, minmin nynh aning kha a teenua hae. Tuhcite minmin nynh a ohhuakuh ry hae paw Oholah te Oholibah kha a teenua hae.45Adingpaw byapiatu hae nynh, minmin tuh milae vawpaw kya seinaw te ccungccaw chiapaw seinaw kha a rae hae, cite a ho cih hae; pawccecize minmin tuh milae vawpaw kya seinaw raetu hae te ccungccaw theihtu hae nynh athua hae.
46Bawipaw PACHIA nynh hynhte a ho: Tuh-e nopi hae kha thinphangsah khylan te uccaw luade khylan, zapi hae kha mih kalan konua oh.47Zapi hae nynh minmin kha lung te a deih cih hae zah thaloi te a bae cih hae; mih ccanung hae te mih ccapaw hae kha a chiapah cih hae zah, mih inn kha maee te a soipah cih hae.48Nopi balyn nynh raeringkuh hae zah nanning hawte a ohhuaku khyh nawlan hae, ram lungkhu kya ohhuakunaw kha ka zosah cih.49Ohhuaku na rynaw oh keiccu ae liaru cih oh zah, aseipaw nae zohtuh hae keiccu detahnaw na teing cih oh; te kae tuh Bawipaw PACHIA ka thuapaw kha na nyh cih oh. Accohpaw Ang
1Kum takuanaw, sawpaw sah hawnaw, nin haw nin khe Bawipaw bya tuh ka kya yn thua zah:2Ccungccapaw, atunin ccaccei maw a min kha zeitua. E nin ccaccei kyahin Babilon siapharan nynh Jerusalem kha a koihlu vae.3Rhawtho a mangpaw ccungccaw hae kha tousenaw phungpaw hopah hae, Bawipaw PACHIA nynh hynhte a ho:Maee vawlan khe ang khang lah,tui kha phoihtua;4ang lungkhu khe sange hae kha thungtua,ahoypaw sange hae, aphae, alya tearu ahoy hae paw khate phe biasah tua.5Tuuphu kya-e ahoy huapaw kha lawtua lah,thingtung hae khaang kaw khe pumnua tua;sange hae kha ccohsahnua lah,ang lungkhu umpawaru hae kha mah ccohsahnua tua.
6Tukeiccuze Bawipaw PACHIA nynh hynhte a ho:Chiise aluapaw khuapi,chihhangkae zah athyaa leipawang hanlan ngaethya lan kou um!Sange hae khange kheit koute nge kheitccungthydung leitephe thang lan lawtua.7Pawccecize khuapi nynha luasahpaw chiise tuhtuh-e khuapi lungkhu kya a um;tuh-e chiise tuh laephi nynha thei ccaw cite laephi vawlan lae khyh;raerae langpaw lung vawlan khe nynh a lae.8Ka thinriasah khylan te phulaw khylankhuapi nynh a luasahpaw chiise kharaerae alangpaw lung vawlan khe ka lae vae,tuhteze nynh chiise khathei kho thua lan khyh.
9Tukeiccuze Bawipaw PACHIA nynh hynhte a ho:Chiise aluapaw khuapi hanlanngaethya lan kou um!Maeething apumkuhpawmyarya lepaw kha ka rae cih.10Thingtung hae khapum oh lah, maee tyh oh;saw kha phe voi lan thung oh lah,amynkhuhpaw aphuinphuin khathungbia oh,aru hae kha maee nynh u hae sah.11Maee-e vawlan kheang ccakae khate khangtua,tetuh ang tuh aso cih,daw tuh ase cih zah,a lungkhu umpaw athupaw tuhpalae atui cih, chihhang tuhmaee nynh phe a u cih.12Alakaw lan ka thaw ka bangsaku han;thaawkalae lan chihhangkaepaw tuhzo kho khyh. Maee te zo kho khyh.
13Anungsikuhpaw na ohhuaku rynaw khaka thyaasah zemah,na nungsikunaw tuh thyaa lae khyh;ka thinrianaw kha na tungvawka ccingsah mawlaezungna thyaa lan khyh.
14Kae, Bawipaw nynh ka ho vae; accyh zawbia vae zah rya ka lah cih. Kae synpakuh lan khyh. Na ozia te na cyisahnaw thyhte de kae tah cih, cite Bawipaw PACHIA nynh a ci. Ezekiel kha Chitawnaw
15Bawipaw bya tuh ka kya yn thua zah:16Ccungccapaw, na sungsah huapaw kha na kyate vaekheihmawte ka lah cih; tuhzemah na rah na khui lan khyh, na mitphi mah lua lan khyh.17Zyazyate hawkhaeku tua; a chihpaw elang rawkhuite um nan. Na pungde khungkuh lah, na phanah nawkuh; na mung palung lang e kha bongsakuh nan, a rah a khui hae paw kya-e looh kha ae nan, a ci.18Tukeiccuze awkhua ccyh khe ccungccaw hae kha ka hopah hae zah, zete ccyh kya ka zu tuh a chih. Te awkhualan awkhua tuh kawpya ka thua thyhte ka cyih.
19Tetuh ccungccaw hae nynh kae kha, “E na cyipaw hynh kaening hanlan paw suilan mou cipaw nae hopah lan khyh tou?” cite yn khia hae.20Te minmin kha ka hopya hae: Bawipaw bya tuh ka kya yn thua:21Israel hae kha hopah hae, Bawipaw PACHIA nynh hynhte a ho: Na lysakunaw oh paw nae huhan, nae mit lungtuanaw te nae thinlung nynh a rypaw ka beikinnthyaa kha the ka thyasah cih; na cciataw oh paw nae ccanung hae te nae ccapaw hae tuh thaloi te a chih cih hae.22Te ka cyi hawte na cyih cih oh; nae mung palung lang e tuh na bongkuh lan khyh oh, a rah a khui hae paw kya-e looh kha na ae lan khyh oh.23Nae pungde kha na khungkuh cih oh zah nae phanah kha na nawkuh cih oh; na rah na khui lan khyh oh, nae hoyleinaw keiccuze na zo na dae cih oh zah, lu kheit te lu kheit hawkhaekute na umnuakuh cih oh.24Tetuh Ezekiel tuh nanning elang muihsahnaw athua cih; aning nynh a cyi hawte na cyihbua cih oh. E hynh he yn cyihkuh te, Bawipaw PACHIA ka thuapaw kha na nyh cih oh.
25Ccungccapaw, mih rhawlungrua, mih lungtuanaw te mih phu-enaw, myarya a do ry hae paw te mih thinlung nynh a rypaw kha thuasah, mih ccanung hae te mih ccapaw hae kha thuasah ka lawpya hae ccyh yn thua tetuh,26a luepaw lukhakheit nynh na kya yn thua cih zah, nang kha the ae thaesah cih.27Tuin nin vae tuh yn luetupaw kalan khe na khalang na aw cih zah, yccae leite um vae leite bya na hopah vae cih. Tuhcite minmin hanlan nang tuh muihsahnaw na thua cih; te Bawipaw ka thuapaw kha a nyh cih hae.
Ammon Honuapaw Bya
1Bawipaw bya tuh ka kya yn thua zah:2Ccungccapaw, na mae kha Ammon hae kalan hawi lah, profehbya honua hae.3Ammon hae kha hopya tua hae, Bawipaw PACHIA bya kha ngaetua oh: Bawipaw PACHIA nynh hynhte a ho: Thethyasah athuapaw ka beikinnthyaa kha thuasah, ccungccaw daesah athuapaw Israel ram kha thuasah, kyngte ramccang lang cciakhae athuapaw Judah hae kha thuasah nanning nynh he na muih oh te, nae lungrythua keiccuze,4nanning kha nithua lang e ccungccaw hae kalan kae ap cih oh. Minmin nynh nanning laku kya mih ryahmin kha ae tahnuakuh cih oh zah, nanning laku khe mih bu hae kha ae saknua cih oh; nae thingthae kha ae aepah cih oh zah, nae vaetua mateitui kha ae niapah cih oh.5Rabbah khua kha kalauh hae paeenaw lang ka rae cih zah Ammon ram kha tuukhia lang ka rae cih. Tetuh Bawipaw ka thuapaw kha na nyh cih oh.6Pawccecize Bawipaw PACHIA nynh hynhte a ho: Nanning nynh Israel ram kha rawsete nae kuih na bianua oh, na ccu na suanuakuh oh zah eiungte nae lungtua keiccuze,7ka kuih kae dyngnua vae oh zah, minphuin ccangpaw hae kalan luadepaw uccaw hawte kae ap cih oh. Minphuin ccangpaw hae kyate nanning kha kae vua cih oh zah, ram hae kyate kae maemih cih oh; nanning kha kae roh cih oh. Tetuh kae tuh Bawipaw ka thuapaw kha na nyh cih oh. Moab Honuapaw Bya
8Bawipaw PACHIA nynh hynhte a ho: Moab nynh, Judah hae tuh minphuin ccangpaw hae balyn te alokuh, cite a ho keiccuze,9Moab tuh ram akin-akae, ramri kya-e khua hae kyate tho zah ram phu-enaw athua hae paw Beth-jeshimoth, Baal-meon te Kiriathaim khua hae kha rhaw hae ka tuksah cih hae.10Moab te Ammon ram kha nithua lang e ccungccaw hae kalan ka pya cih hae. Tukeiccuze Ammon tuh minphuin hae laku kya liathui thua vae lan khyh,11Moab ram kha bya ka pia cih. Tetuh kae tuh Bawipaw ka thuapaw kha a nyh cih hae. Edom Honuapaw Bya
12Bawipaw PACHIA nynh hynhte a ho: Edom nynh Judah hae tungvaw phulah ry zah rawsete phu a lawnaw kya myarya a sei,13tukeiccuze Bawipaw PACHIA nynh hynhte a ho, Edom kha ka kuih ka dyngnua cih, a kya umpaw ccungccaw te sarangpaw hae kha ka roh cih zah, ccungccaw phe ka daesah cih; Teman khua kyate Dedan khua kyacia thaloi te a chih cih hae.14Ka ccungccaw Israel kuih khate Edom kha phu ka lah cih; ka thinrianaw te ka thin-unaw thyhte minmin nynh Edom tungvaw a cyih cih hae; minmin nynh phu ka lawpaw kha a nyh cih hae, cite Bawipaw PACHIA nynh a ci. Filistin Honuapaw Bya
15Bawipaw PACHIA nynh hynhte a ho: Filistin hae nynh adae kho leipaw rhawkunaw khate phulawnaw kha rae hae zah, eiungnaw thinlung khate ro khylan a liaru hae,16tukeiccuze Bawipaw PACHIA nynh hynhte a ho, Filistin kha ka kuih ka dyngnua cih, Kereth hae kha ka vua cih hae zah, rili kin kya a laehy hae paw kha ka roh cih hae.17Myarya ccihpaw detahnaw khate minmin kha phu ka lah cih hae. Te minmin kha phu he ka lah hae te, minmin nynh kae tuh Bawipaw ka thuapaw kha a nyh cih hae. Tair Honuapaw Bya
1Kum haw lae kheitnaw, sawpaw masaty nin khe Bawipaw bya tuh ka kya yn thua zah:2Ccungccapaw, Tair nynh Jerusalem konglang kha ho zah,“Alei! Minphuin hae koikua athuapawJerusalem tuh aroh vae;a thuakaw hae tuh ka hanlanahungkuh vae; kae tuhhouhouh ka hoirum vae cih,atu aning tuh aroh vae,” a ci.
3Tukeiccuze, Bawipaw PACHIA nynh hynhte a ho:Pou Tair, nang kha kae rawse!Rili nynh tuileih khaa thosah hawte, nang rawseteminphuin patae khaka thosakuh cih hae.4Minmin nynh Tair kya-ekhualungrua khaa roh cih hae zah,a innhangpaw hae khaa phou cih hae.A laenoi kha phe thyaa lanka phi cih zahlung ccite a umpaw langka rae cih.5Rili ngaelung kya miabu reinawpaw hmin langka tangsah cih.Kae nynh phe ka ho vae, cite Bawipaw PACHIA nynh a ci.Tair tuh minphuin hae nynha luade hae paw lang a tang cih,6ram lungkhu e khua hae kyaum hae paw khathaloi te chia athua cih hae.Tetuh minmin nynh kae tuh Bawipaw ka thuapaw kha a nyh cih hae.
7Pawccecize Bawipaw PACHIA nynh hynhte a ho: Siapharan hae siapharan athuapaw thahlang e Babilon Siapharan Nebukhadnezzar kha marang hae, marangle hae, marang rhawkaw hae, athungpaw te huhan a hoipaw rhawkawphu ryte Tair khua lang ka cciakhae cih.8Ram lungkhu e khua hae kyaum hae paw kha aning nynhthaloi te a theih cih hae.Aning nynh rhawlungrua khaae raenua cih, marung khaae thaekhaw cih zah,khawriaphua khaae hangnua cih.9Na khualungrua khathingtung khate a tingsah cih zah,na innhangpaw hae khaa hae khate a tya cih.10A marang hae tuhmyarya alung hae keiccuze,vuiping nynh nang khaphe ae bong cih.Aroh vae paw khuapilungkhu lang tee hawte,aning nynh na koikua hae kyahe a tee te, marang rhawkaw hae,leccu hae te marangle hae roi keiccuzena khualungrua tuh ahy cih.11A marang ccukoh hae khatena laanpi balyn kha a syde cih.Na ccungccaw hae khathaloi te a theih cih hae,tynkarangpaw na tung hae tuhlaephi kya a khuliakuh cih hae.12Na hoirumnaw khaae luade cih hae zahna uccaw hae khaae lawpakuh cih hae;na khualungrua khaa tingsah cih hae zah,ahoypaw na inn hae khaa roh cih hae.Na lung hae, thingphe hae telaephi hae kha tui lungkhu langa phung cih hae.13Hlaw na sahpaw roi khaka daesah cih;na tintang roi khathae thua vae lan khyh.14Nang kha lung ccakaepaw langkae rae cih zah,miabu reinawpaw hmin langna tang cih.Nang kha papinmaw raethuina thua vae lan khyh,pawccecize kae, Bawipaw nynhphe ka ho vae, citeBawipaw PACHIA nynh a ci.
15Bawipaw PACHIA nynh Tair kha hynhte a hopya: Na lungkhu kya ccungccaw chianaw um zah, vaemaw mue hae paw nynh he a hawkhaekuh hae te, na khuliakupaw roi keiccuze rili kin um hae paw tuh thyngku leite a um cih hae zawtou?16Tetuh rili kya-e uktu bawi balyn tuh mih bawitungkhung kyate a rung cih hae; mih angkiccua te kou puithya lan ccaanpaw mih boeining kha a khahkuh cih hae. Boeining kha thyngku biate a lawkuh cih hae zah laekhu kya a haung cih hae; atu te atu a thyngkuh cih hae zah, na tungvaw acyihkuhpaw keiccuze a siikuh cih hae.17Minmin tuh nang na hanlan mih ngaethah cih zah nang kha:Pou a minthaanpaw khuapi,vaekheih lyaze rili kyaathungpaw khuapi,ri lan a umnaw kha ram pynpi kyaphe a biasahpaw khuapi,nang te na kya um hae paw tuhpawtemou rili hae kyatephe na zo oh!18Na khuliaku nin kherili kin e ram hae tuha thyngkuh hae;nang nynh na zo keiccuzerili lungkhu umpawtuikoih hae tuh a siikuh hae.
19Bawipaw PACHIA nynh hynhte a ho: Ccungccaw a um leipaw khuapi hawte nang kha ccungccaw adaepaw khuapi lang kae rae zah, rili kha na tungvaw lang thuakhaete, tui alepaw te nang kha he kae vusah te,20langmaw lyaze Hunghua lungkhu lang a rungbung hae paw ccungccaw hae kalan khe nang kha kae nangde cih, langmawlya te roh hae zah Hunghua lungkhu lang a cceihbung hae paw ryte lae kaw khe kae umsah kheih cih oh, tuhteze nynh na kyakhe khuasahpaw ccungccaw um lan khyh zah ahiin hae paw ram kya umnaw hmin na hoi lan khyh.21Ri lan umpaw athangnaw kalan khe kae thuakhae cih zah, nang tuh na um vae lan khyh; nang kha ccung zemah papinmaw muih na thua vae lan khyh, cite Bawipaw PACHIA nynh a ci. Tair hanlan Ngaethyanaw
1Bawipaw bya tuh ka kya yn thua zah:2Ccungccapaw, Tair hanlan rawkhuite um lah,3rili kin umpaw khua, rili kin e ram patae kya-e ccungccaw hae nynh kungkunaw hae khua athuapaw Tair kha hopya tua, Bawipaw PACHIA nynh hynhte a ho:Pou Tair, nang nynh,“Kae tuh ka puithyanawphe ccing,” cite na ho vae.4Na ramri tuhrili hae ngaelung nynh a um;nang ae raetu hae nynhna puithyanaw khaphe ccing lan ae rae hae.5Senir ram e maeccaw ku hae khana thingphe lang a sue hae;kohlung boei tung rae nawlanLebanon ram e sidar ku kha a law hae.6Bashan ram e phaesi thing khatena kohlung zawnawpawaccong kha a rae hae;Saipras e maeccaw ku khatena kohlung suarui kha rae hae zahsaepanua khate a ccaan hae.7Na kohlung kya zopaw boei tuhIzip ram kya-e kou puithya lanccaanpaw boei ahoypawthua zah, na kohlung kyaasaekuhpaw alan hawte nynh thua;na kohlung kya adawkuhpaw boei tuhElishah tuikoih kyate thuakhaepawmeizong te sephaphuhpaw nynh thua.8Sidon khua te Arvad khua kyaum hae paw tuhna kohlung a zawtu nynh thua hae;na kyakhe ryalaw athyapawccungccaw hae um hae zah,minmin tuh na kohlunga zawtu nynh thua hae.9Gebal piccan hae temih kuihhae ahoypawkohlung raetu hae tuhna kya a um hae;rili kya-e sanphalung balyn tea zuitu hae tuhnang te uccaw reku khylanna kya a um hae.10Paras  , Lud  te Put  minphuin hae tuhna rhawkawphu, athungpawna rhawkaw hae kya a umbua hae,minmin nynh khawriaphua telukhung kha ae saepah hae zah,phu-enaw kha ae pya hae.11Arvad hae te na rhawkaw hae nynhna khualungrua po voilu lanrhaw ae viapya hae;Gamad hae nynhna innhangpaw kyaterhaw ae viapya hae.Mih the bawng hae khana khualungrua po voilu lana baw hae; na puithyanaw khaphe ccing lan ae raepya hae.
12Na sisua tuh myaryamaw lung zah, Tarshish khua ryte uccaw reku bungthungnaw kha na rae oh; phua, sivaw, ccephui, kuee kha na kungku kya yn thuakhae zah na rulaeku oh.13Javan, Tubal te Meshek hae ryte uccaw kungkunaw kha na raekheih oh; see te sohin angphe hae kha ae zuapya hae.14Beth-togarmah hae te nang tuh marang hae, rhawtuknawpaw marang hae te lann hae kha rulaekunaw na rae oh.15Rhodes hae ryte uccaw kungkunaw kha na raekheih oh; rili kin e ram hae tuh nang nynh uccaw na zuanaw hmin nynh thua hae; minmin nynh saepanua te thing manpaw kha amee lang nang ae pya hae.16Na uccaw alung keiccuze Edom te nang tuh uccaw kungkunaw kha na raekheih oh; lung hinpaw, sephaphuhpaw boeining, kou puithya lan ccaanpaw boeining, ahoypaw boeining, koral lung te patamia lung khate na uccaw kha na rulaeku oh.17Judah te Israel ram khate mah uccaw kungkunaw kha na raekheih oh; Minnith kyate apoupaw chanvuih, ccaw, khoitui, chitui te balm phi kha ae zuapya hae.18Na sisua aphuinphuin tuh myaryamaw alung keiccuze Damaskas te mah nang tuh uccaw kungkunaw kha na raekheih oh—Helbon misutui te tuuming rawpaw kha ae pya hae.19Vedan te Uzal kya-e Javan nynh nang te uccaw kungkunaw a rae hae; sivaw, kassia thing te ccazung epaw kha na re hae.20Dedan nynh marang cciku ze dekupaw kha ae zuapya.21Arabia ram te Kedar bawi hae balyn tuh tuutaw hae, tuutepaw hae te miaa hae kha kungkunaw na raekheih oh zah hoyte na ccuepeku oh.22Sheba te Raamah kya-e kungku hae ryte uccaw kungkunaw kha na raekheih oh; ahoy huaccepaw mynkhuhpaw aphuinphuin, amee rupaw lung te sui kha na rulaeku oh.23Haran, Kanneh, Eden, Sheba kungku hae, Asshur te Khilmad hae nynh mah nang te uccaw kungkunaw kha a rae hae.24Ahoypaw boeining hae, meizong boeining hae, kou hoy lan ccaanpaw boeining, azong aphuinphuin te ccaanpaw uccaw, khyndadyh lan arui te heedepaw uccaw hae kha kungkunaw na raekheih oh.25Tarshish sanphalung hae tuh na uccaw phupyate na kalan oun cceih hae.Tukeiccuze nang tuhrili ngaelung kya myarya ripawphupaw te phe na beih.26Kohlung zawtu hae nynhnang kha rili lungkhu kheae cciakhae hae.Nithua lang e khisan nynhnang kha rili ngaelung kheae ro vae.27Na sisua hae, na uccaw hae,zuathyapaw na uccaw hae,na kohlung zuitu hae,na kohlung a zawtu hae tea raethuitu hae,na uccaw a zua a retu hae,na kya umpaw rhawkaw balyn tena umkheih oh pawccungccaw aphu balyn tuhnang kha ro na thua nin kherili ngaelung kya a ccah cih hae.28Na kohlung a zawtu hae kya-esiaruanaw roi keiccuzeanaenaw umpawkhua hae tuh ahy hae.29Kohlung zawtu balyn tuhmih kohlung hae kyateatolang a rung hae.Kohlung a zuitu hae tea zawtu balyn tuhvarang langkhe thadyn hae zah,30nang na hanlan accae lanterah hae zah thawte a sia hae.Mih lu vawlan vuiping phingkuh hae zah,buhhaw kya a toukuh hae;31nang na keiccuzemih sang kha okuh hae zah,buriboei kha a zingku hae,nang na hanlan mih thinlungphe ccih lante thawte a rah a khui hae.32Nang na hanlan ngaethyaterah hae zah:“Rili ngaelung kya Tair hawtearoh boi paw hummou a um?33Rili laanpi kyate na uccaw haehe yn thua te, ccungccaw patae khamih lungry na ccingsah hae;myarya lungpaw na sisua tena zuapaw uccaw hae khatelaephi siapharan hae khana hoirumsah hae.34Atu tuh tui akhunaw kyakherili khate ro na thua vae;na zuapaw uccaw hae tekohlung kya-e na ccungccaw hae tuhnamaw ryte na phungkuh vae oh.35Rili kin um hae paw balyn tuhnang keiccuze a siikuh vae hae;mih siapharan hae tuh myarya rih hae zah,mih maesue kya mih rinaw alangkuh.36Minphuin patae laku ekungku hae nynh nang khasaryanaw roi ae sawnua cih hae;nang tuh myarya ri lan umpawathangnaw kya na thua vae zah,zungzae na zo vae cih,” a ci hae.Tair Siapharan Rawsenaw Bya
1Bawipaw bya tuh ka kya yn thua zah:2Ccungccapaw, Tair uktu bawi kha hopya tua, Bawipaw PACHIA nynh hynhte a ho:Lysakunaw thinlung na hoi zah,“Kae tuh pachia nynh ka thua;rili ngaelung kya,pachia hae haungnaw kyaka haung,” na ci,pachia hawte na tuaku zemahpachia na thua khyh,ccungccaw nynh na thua.3Nang tuh Daniel laezena hawhua ccaccing;nang na malang phei khopaw tethuruh khopaw um khyh;4na hawnaw te na nythyanaw liatesisua patae na tungku vae,na sisua bawng lungkhu khesui te ngun kha na sueluaku vae.5Kungkunaw kya myarya na haw liatena sisua kha na lungthungsaku vae,tuh-e na sisua keiccuzelysakunaw thinlung na hoi vae.6Tukeiccuze Bawipaw PACHIA nynh a hopaw tuh:namaw toulou kha pachia hawtena tuaku keiccuze7minphuin hae kyaze ri lan um huaccepawramccang hae kha kae konua cih hae;minmin nynh aphutepawna hawnaw kha mih thaloiae thuaanuakuh cih hae zah,na lesaenaw kha a thusah cih hae.8Nang kha Hunghua lungkhu langae tuu cih hae zah,rili ngaelung khemyarya ccihpaw chinaw tena chih cih.9Nang ae theih hae paw kuih kyakhenang tuh pachia thua leite,ccungccaw mang na thua pite,nang ae theihtu hae malang khe“Kae tuh pachia nynhka thua,” cite na ho ung cih tou?10Vingdungawkuh lei hae paw nynha chi hae hawte,ramccang hae kuih khate na chih cih;pawccecize Bawipaw PACHIA nynh,phe ka ho vae, a ci.Tair Siapharan tungvaw Ngaethyanaw
11Tuhpiaze Bawipaw bya tuh ka kya yn thua zah:12Ccungccapaw, Tair siapharan hanlan na ngaethah sah lah, aning kha hopya tua, Bawipaw PACHIA nynh hynhte a ho:Nang tuh ccingnaw tazeih nynh na thua,hawnaw te phe na beih zahna puithyanaw tuh phe accing.13Nang tuh Pachia khokhu,Eden kya na um;aphutepaw lungaphuinphuin khate na ccaanku,tuh-e lung hae tuh patamia, khrisolaih,awrarihpaw lung, topaz, beryl,oniks, jasper, nilar lung,karbankal te emeral lung nynh thua hae;sui te raepaw uccaw hae khana hoi.Nang kha rae na thua nin khekhah-e hae kha na hanlanpaccynpya athua vae.14Chitui thuh athuapaw cherub khanang ae rintu lang kae nungpya;nang tuh athyaapawPachia mua vawlan khe na um;phaephae akpawlung hae laku khe na cceih.15Na pui nin kyate na tungvaw kyahoyleinaw muih athua mawlaezungna cyisahnaw tuh ccaenaw um khyh.16Na kungkunaw tuh myaryaalung keiccuze puathonaw tephe na beih zah na sei vae;tukeiccuze nang khaathyaa leipaw uccaw hawtePachia mua kyate kae vua,nang ae rintu cherub nynhphaephae akpawlung hae laku kyatenang kha ccaring ae dee.17Na puithya keiccuzena thinlung tuh alysakuh;na minthaannaw hanlanna hawnaw kha na roku.Nang kha laekhu lang kae vua;siapharan hae nynhnang kha dotemih lungpaw ccaw citemih malang khe kae nung.18Ahme leipaw kung na kunaw kyana hoyleinaw alung keiccuzena beikinnthyaa hae kha na thusah.Tukeiccuze na lungkhu kyamaee ka tyh zahnang kha maee te kae u,nang ae muih hae paw balyn malang khelaephi vawlan khenang kha buhhaw lang kae tangsah.19Minphuin hae lakunang ae nyhpaw balyn tuhnang keiccuze a siikuh hae;nang tuh ri lan umpawathangnaw kya na thua vae zah,zungzae na zo vae cih.Sidon kha Rawsenaw Bya
20Bawipaw bya tuh ka kya yn thua zah:21Ccungccapaw, Sidon khua langkhe hawi lah, profehbya kha hynhte honua tua,22Bawipaw PACHIA nynh hynhte a ho:Pou Sidon, nang kha kae rawse,na ngaelung khephu-enaw ka mue cih.Sidon khua kha bya ka pia zah,ka thyaanaw khahe ka langsakuh te,kae tuh Bawipawka thuapaw kha a nyh cih hae;23Sidon khua khashethya ka sawnua cih zah,khua lungkhu e laanpi hae kyachiise ka luasah cih;khua kha voilutea rawsepaw thaloi keiccuzemichi hae tuh khua ngaelung khea khuliakuh cih hae.Tetuh minmin nynh kae tuhBawipaw ka thuapaw khaa nyh cih hae.
24Israel hae nynh minmin a dothatheih hae paw mih innpaw hae balyn kyakhe athuingthyapaw hinpawbu te hinpaw ahepaw kha muih vae lan khyh hae. Te minmin nynh kae tuh Bawipaw PACHIA ka thuapaw kha a nyh cih hae. Israel hanlan Malang Hythuanaw
25Bawipaw PACHIA nynh hynhte a ho: Israel hae kha phiariphiarae nung athuanaw minphuin hae kyate he ka suelua hae te, ka ryalahtu Jakob ka pyapaw mimaw laephi kyakhe a um cih hae.26Tuin kyakhe khyndadyh lan a um cih hae, inn a sakkuh cih hae zah misu khokhu kha a raekuh cih hae. Minmin kha a la dothatheih hae paw mih innpaw hae balyn tungvaw bya he ka pia hae te, minmin tuh khyndadyh lan a um cih hae. Tetuh kae tuh Bawipaw mih Pachia ka thuapaw kha minmin nynh a nyh cih hae. Izip Rawsenaw Bya
1Kum hawnaw, sawpaw sah hawnaw, nin haw lae ning nin khe, Bawipaw bya tuh ka kya yn thua zah:2Ccungccapaw, Izip siapharan Faro kha na mae hawinua lah, amaw te Izip ram pynpi kha profehbya honua tua;3Bawipaw PACHIA nynh hynhte a ho:Pou Izip siapharan Faro,a vawpi hae ngaelung khea kuih a ccu tharae zo zah,“Nal vawpi tuh ka kya-e nynh thua;e vawpi hynh kamaw hanlan ka raeku,”cite a hopaw nakaa-hupi,nang kha kae rawse.4Ngasabaw khate na khaw khakae baw cih zah,na vawpi hae kya-e ngasaw hae khana kaleih kya ka besakuh cih hae.Na vawpi hae kyatenang kha ccaring kae sue cih zah,na vawpi hae kya-engasaw balyn tuhna kaleih kya a bekuh cih hae.5Nang te na vawpi hae kya-engasaw balyn kharamkaw langkhe kae vua cih oh;nang tuh ramkaw khe na chih cih,nang kha ae khuing lan khyh hae zahae uh lan khyh hae.Nang kha laephi kya-e sarangpaw hae tekhivae kya-e pavaw hae hanlanlooh lang ka pya vae hae.6Tetuh Izip ram um hae paw balyn nynhkae tuh Bawipawka thuapaw kha a nyh cih hae,pawccecize nang tuh Israel hae hanlanphaeku hoitang nynh na thua;7mih kuih te ae kyng vae hae ze,nang tuh na khya zah,mih raw balyn khathoh na pae hae;na kya a ngeiku vae hae ze,nang tuh na khya zah,mih kuih mih ccu balyn khana tynsah khyh hae.
8Tukeiccuze Bawipaw PACHIA nynh a hopaw tuh: Na kalan thaloi ka thuasah cih zah, ccungccaw te sarangpaw hae kha ka bae cih hae;9Izip ram tuh ccungccaw adae cih zah alakawpaw lang a tang cih. Tetuh minmin nynh kae tuh Bawipaw ka thuapaw kha a nyh cih hae.
Nang nynh, “Nal vawpi tuh ka kya-e nynh thua, ka raekupaw nynh thua,” na ci keiccuze10nang te na vawpi hae kha kae rawse oh, Izip ram kha Migdol kyate Sai-en cia, Ethiopia ramri phe thua lan, alakawpaw te ccungccaw phe adaepaw lang ka rae cih.11Ccungccaw te sarangpaw nynh tuin ram kya po cceih lan khyh hae; kum sung pali lungkhu pawpaw nynh mah umnah lan khyh.12Ccungccaw phe adaepaw ram hae laku khe Izip ram kha ccungccaw adaepaw lang ka rae cih; Izip khuapi hae tuh arohpaw khuapi hae laku khe kum sung pali lungkhu arohpaw lang a tang cih hae. Izip hae kha minphuin hae kyakhe phiariphiarae ka nung cih hae zah, ram hae kyakhe ka phiasakuh cih hae.
13Tuhzemah Bawipaw PACHIA nynh hynhte a ho: Kum sung pali accing te, Izip hae kha phiariphiarae a umnaw hae minphuin hae kyate ka suelua cih hae;14Izip hae kha ka kikhae cih hae zah, mih thokeinaw ram, Pathros ram langkhe ka kisah cih hae; tuin kyakhe ram nyaapaw lang a tang cih hae.15Ram hae laku kya Izip tuh anyaa huaccepaw ram lang a tang cih zah, minphuin hae luki papin sang vae lan khyh; minmin tuh minphuin ccangpaw hae kha papin bua a uk leipaw ditarawpaw lang ka rae cih hae.16Izip hae tuh Israel hae nynh doliakupaw lang papin tangthui vae lan khyh hae; bawmnaw mue khylan Izip hae kalan a la maeku hae paw mih hoyleinaw kha Israel hae nynh a tuathui cih hae. Tetuh minmin nynh kae tuh Bawipaw PACHIA ka thuapaw kha a nyh cih hae. Babilon nynh Izip A Thiing Cih
17Kum kuin lae sarinaw, sawpaw sah kheitnaw, masaty nin khe Bawipaw bya tuh ka kya yn thua zah:18Ccungccapaw, Babilon Siapharan Nebukhadnezzar nynh a rhawkaw hae tuh Tair kha thawte rhaw a tuksah hae; rhawkaw miakaw tuh mih lu-o zah, mih raw pong kuakuh; tuhzemah aning te a rhawkaw hae tuh Tair dounaw mee kha Tair kyate paw sanmah mue khyh hae.19Tukeiccuze Bawipaw PACHIA nynh hynhte a ho: Izip ram kha Babilon Siapharan Nebukhadnezzar ka pya cih; aning nynh Izip sisua kha luadete a lawkuh cih zah a phukuh cih; tuh-e tuh a rhawkaw hae mih ryalaw mee lang a tang cih.20Thawte rya a lawnaw mee lang Izip ram kha aning ka pya vae, pawccecize minmin nynh ka hanlan rya a law hae, cite Bawipaw PACHIA nynh a ci.
21Tuin nin khe Israel hae hanlan aki ka saesah cih zah, nang kha minmin laku kya byahonaw kaw kae pya cih. Tetuh minmin nynh kae tuh Bawipaw ka thuapaw kha a nyh cih hae. Izip hanlan Rawnaw
1Bawipaw bya tuh ka kya yn thua zah:2Ccungccapaw, profehbya hotua, Bawipaw PACHIA nynh hynhte a ho:“Ezou, yn thuapaw nin hanlanngaethya lan kou um!” cite rah oh.3Pawccecize nin tuh anae vae,Bawipaw nin tuh anae vae;tuh-e nin tuh mae-ui nin,minphuin hae hanlanronaw nin athua cih.4Izip kya thaloi te chiakunawa um cih zah, Ethiopia ram kyalungriathaenaw a um cih,chiapaw ccungccaw hae tuhIzip ram kya he a chih hae te,a uccaw hae khaccaring cciakhaepya athua cih zah,athonaw aleihpaw kharopya athua cih.
5Ethiopia, Put, Lud te Arabia balyn, Libia ram e ccungccaw hae, a pankheih hae paw ram kya-e ccungccaw hae tuh minmin ryte thaloi te a chih cih hae.
6Bawipaw nynh hynhte a ho:Izip kha a bawm hae paw tuha chih cih hae zah,Izip nynh a lysakunawpaw tuha ccahbung cih;Migdol kyate Sai-en ciathaloi te a chih cih hae, citeBawipaw PACHIA nynh a ci.7Ccangpaw arohpaw ram hae kyakheIzip hae tuh aroh cih hae zah,mih khuapi hae tuh arohpawkhuapi hae kya a umbua cih hae.8Izip ram kha maee ka tyhnua zahIzip a bawm hae paw tuhhe a roh hae te,kae tuh Bawipaw ka thuapaw kha a nyh cih hae.
9Tuin nin vae tuh, pawningkhua a nyh lei hae paw Ethiopia hae kha mih rikawthuasah khylan ka saw hae paw locceihtu hae tuh sanphalung te a cceih cih hae; Izip ram a ro nin khe lungriathaenaw nynh mih tungvaw a thuanua cih hae; pawccecize tuh-e ccyh tuh anae vae!
10Bawipaw PACHIA nynh hynhte a ho:Babilon Siapharan Nebukhadnezzar kuih khateIzip zapi hae khaphe ka thangsah cih hae.11Minphuin hae kyazeri lan um huaccepawNebukhadnezzar tea ccungccaw hae khaIzip ram ro khylancciakhae athua cih hae;Izip ram kha thaloia thuaanuakuh cih hae zaha chia hae paw michi rhua khateram kha phe a biasah cih hae.12Vawpi hae khaka kansah cih hae zahram kha hoyleinawa rae hae paw kuih kalan ka zua cih;ramccang hae kuih khateram te ram lungkhu eatyn-are kya ronaw ka thuasah cih.Kae, Bawipaw nynhphe ka ho vae.
13Bawipaw PACHIA nynh hynhte a ho:Zohtuh hae kha ka roh cih zahMemfis kya umpawazuh hae kha phe ka thangsah cih;Izip ram kya uktu bawium vae lan khyh;tuhcite Izip ram kyarinaw ka umsah cih.14Pathros ram kha ka roh cih zah,Zoan khua kha maee te ka soi cih,Thebes khua tungvawbyapianaw ka rae cih.15Izip ram kyaze athung huapawPelusium khua tungvawka thinrianaw ka bu cih zah,Thebes zapi hae kha ka theih cih hae.16Izip ram kha maee te ka soi cih;Pelusium khua tuhriathaenaw myarya a teing cih;Thebes khua kya-ekhualungrua tuh ating cih zah,Memfis tuh khuadae ccyh kya heizerhaw hae nynh a tuk cih hae.17On khua te Pi-beseth khua eccangvae hae tuh thaloi te a chih cih hae;khuapi hae tuh kyngku khylanmimaw nynh a cceih cih hae.18Izip uknaw kha he ka roh te,Tehafnehes khua kyakhuadae tuh phe amoh cih,a lysakunaw tuh phe athang cih;khuapi kha maeking tebong athua cih zah,a ccanung athua hae pawkhua hae kha kyngtecciakhae athua cih hae.19Tuhcite Izip tungvawbyapianaw ka rae cih.Tetuh kae tuh Bawipawka thuapaw kha a nyh cih hae.Faro Rawsenaw Bya
20Kum haw lae kheitnaw, masaty sawpaw, nin sari nin khe Bawipaw bya tuh ka kya yn thua zah:21Ccungccapaw, Izip siapharan Faro kuih kha ka khya vae; thaloi kyng lan ciate a thawsae ccaw cite a vaemaw a dan nawlan heepya thua khyh.22Tukeiccuze Bawipaw PACHIA nynh hynhte a ho: Izip siapharan Faro kha ka rawse, athungpaw a kuih te khya athua vae paw a kuih kha parouhte ka khya cih hae zah, a kuih kyate thaloi kha ka ccawsah cih.23Izip hae kha minphuin hae laku kya phiariphiarae ka nung cih hae zah, ram hae kya ka phiasakuh cih hae.24Babilon siapharan kuih kha a thaw ka saesah cih zah, ka thaloi kha a kuih kya ka nung cih; thuasalama Faro kuih kha tuh ka khya cih zah, vaemaw keiccu vyavya chihpaw nynh a hawkhaeku hawte Babilon siapharan malang khe a hawkhaekuh cih.25Babilon siapharan kuih kha a thaw ka saesah cih, thuasalama Faro kuih tuh accahbung cih. Ka thaloi kha Babilon siapharan kuih kya he ka nung te, minmin nynh kae tuh Bawipaw ka thuapaw kha a nyh cih hae. Aning nynh Izip ram kha tuh-e thaloi tuh a hangnua cih,26Izip hae kha minphuin hae laku kya phiariphiarae ka nung cih hae zah ram hae kya ka phiasakuh cih hae. Tetuh kae tuh Bawipaw ka thuapaw kha a nyh cih hae. Ahangpaw Sidar Ku
1Kum haw lae kheitnaw, sawpaw sah thumnaw, masaty nin khe Bawipaw bya tuh ka kya yn thua zah:2Ccungccapaw, Izip siapharan Faro te a ccungccaw zapi hae kha hopah hae:Nang tuh na lesae zahhum te mou na loku oh?3Assiria khuh dotua,Lebanon kya a umpawsidar thing te nynh aloku,tuh-e thing akaran hae tuhpuithya zah anaw abung,myarya hang zah adung tuhmaeking phe aphah.4Tui nynh aku kha a lethungsah,lae kaw e tui nynhaku kha hangsah zah,aku aponaw pepan khevaw hae kha a luasah,ramkaw e thingku balyn kalan khevaw taraw hae tuh alua hae.5Tuhcite ramkaw ethingku balyn laezeahanghua; atoihnaw kyatui alung keiccuzeange hae tuh lethung zahakaran hae tuh myarya asae hae.6Khivae kya-e pavaw balyn nynhange hae kyakhe bu a luaku hae;ramkaw e sarangpaw balyn nynhakaran hae kaw khemih taw than hae;minphuin lepaw balyn tuha mynzia kya a um hae.7Tuh-e thingku tuh le zahakaran hae asae keiccuzemyarya apuithya;pawccecize tui alungnaw langkheatharui asah.8Pachia khokhu kya-esidar ku hae nynh tuh-e thingku tuhrawse kho khyh hae,maeccaw ku hae tuhtuhcihawpaw ange kha hoi khyh hae;plane thingku hae mahtuh-e thingkaran hae tetouse lan um khyh hae;Pachia khokhu kyatuh-e thingku hawteapuithyapaw thingku um khyh.9Tuh-e thingku tuhakaran patae khatemyarya puithya lan ka rae zah,Pachia khokhu Eden khokhu kyaumpaw thingku balyn nynhtuh-e thingku tungvaweiungnaw a hoi hae.
10Tukeiccuze Bawipaw PACHIA nynh hynhte a ho: Tuh-e thingku tuh hang zah adung tuh maeking phe aphah, tuhte a hang pawte a thinlung a lysaku keiccuze,11aning kha minphuin hae kya-e bawi hae kuih kalan ka ap vae; a hoyleinaw te ateku thyhte, tuh-e bawi nynh a tungvaw a cyih cih. Tuh-e thingku kha phe ka vua vae.12Minphuin kyaze ri lan um huaccepaw ramccang hae nynh tuh-e thingku kha nge hae zah a cciataw vae hae. Mua hae vawlan te accya balyn khe akaran hae tuh ccah hae zah, ange hae tuh ram kya-e vaw taraw hae pe khe khya zah a um hae; laephi ccungccaw balyn tuh a mynzia kyate cceih hae zah tuh-e thingku kha a cciataw hae.13Khivae kya-e pavaw balyn tuhapupaw akupi vawlan khe a to hae,loramsaw balyn tuhange hae laku khe a um hae.
14E balyn hynh, tui kin umpaw thingku hae tuh myarya hangpaw aku a um khyh nawlan, mih dungparyh tuh maeking kya phe aphya khyh nawlan, te tui hoyte a muepaw thingku hae tuh tuh-e thingku hae phe phah lan ahangpaw a um khyh nawlan nynh thua.Tuh-e thingku balyn tuhHunghua lungkhu langa rungbung hae pawccungccaw balyn rytelae kaw lang, chinaw kalanap athua hae;
15Bawipaw PACHIA nynh hynhte a ho: Tuh-e thingku nynh Michi khua lang a cciabung nin khe, akhupaw tui khate ka khawsung zah phang ka bong; a vawpi hae kha ka tingkhaw zah, athawsaepaw a tui hae kha ka luasah khyh. Tuh-e thingku a chi keiccuze Lebanon kha ngaethyanaw boeining ka lawsahku, ramkaw e thingku balyn tuh tuh-e thingku keiccuze phe arou hae.16Hunghua lungkhu lang a cceihbung hae paw ryte tuh-e thingku kha Michi khua lang he ka vuabung tuh, a ccawpaw roi khate minphuin hae kha ka thyngsaku hae; Eden kya umpaw thingku hae, Lebanon thingku ahoy huaccepaw te aphute huaccepaw, tui hoyte a muepaw thingku balyn tuh lae kaw khe lungdaenaw pya athua hae.17Minmin mah tuh-e thingku ryte thuasah, tuh-e thingku te a hobung hae paw ryte thuasah, minphuin hae laku kya tuh-e thingku mynzia kya a um hae paw ryte thuasah Michi khua lang, thaloi te chia athua hae paw kalan a cceihbung hae.
18Eden kya umpaw thingku hae lakuze phu-enaw te lesaenaw kyaze teihynhmou nang te alokuh? Atu nang tuh Eden kya umpaw thingku hae ryte lae kaw lang rungkhae bung na thua cih; nang tuh vingdungawkuh lei hae paw laku, thaloi te chia athua hae paw ryte na huekuh kheih cih oh. E hynh Faro te a ccungccaw zapi balyn nynh athua hae, cite Bawipaw PACHIA nynh a ci. Faro te Izip elang Rawnaw
1Kum haw lae ningnaw, sawpaw sah haw lae ningnaw, nin kheit nin khe Bawipaw bya tuh ka kya yn thua zah:2Ccungccapaw, Izip siapharan Faro hanlan rah lah, hynhte hopya tua:Nang nynh minphuin hae laku kyachindeih hawte namaw tenamaw kha na tuaku,thuasalama nang tuh rili kya umpawnakaa-hupi te nynh na loku oh;vawkhu hae kyakhe tui na zeihku,na ccu te tui khana thesakuh zah na nuihsah.3Bawipaw PACHIA nynh a hopaw tuh:Minphuin pataea pumkunaw hae kyakheka miabu khate nang khakae bong cih;miabu ryte kae suebia cih.4Nang kha lae vawlankae vua cih zah, ramkaw khephah kae deihnah cih,azouthyapaw pavaw hae khana tungvaw ka ccusah cih hae,laephi pynpi e loramsaw hae khaphe byn lan ka dang cih hae.5Na ngesaw kha mua hae vawlanphiariphiarae ka nung cih zah,accya hae kha na rhua khatephe ka biasah cih.6Aluapaw na chiise khate ram khamua hae vawlan kyaciaka ciasah cih zah,vawkhu hae tuh na chiise tephe abeih cih hae.7Nang kha he kae roh te,vaawlui kha ka bong cih zahawsi hae kha ka mohsah cih;khuanin kha maeking teka khawsah cih zah,sawpaw nynh a awnaw kha pya lan khyh.8Na luki vaawlang eawnaw balyn khaka mohsah cih zah,na ram kha ka mohsah cih, citeBawipaw PACHIA nynh a ci.9Na ny boi leipaw ram hae kalan,ccangpaw minphuin hae laku khenang kha kyngte he kae cciakhae lyakhe,minphuin patae khamih lungria ka thaesah cih hae.10Nang keiccuze minphuin patae khaka siisakuh cih hae;mih siapharan hae tuhnang keiccuze a thyngkuh cih hae.Nang na khuliaku nin kya,ka thaloi kha mih malang he ka he te,minmin lu kheit cci tuhmih hiinnaw elangpalei a thyngkuh cih hae.11Bawipaw PACHIA nynh hynhte a ho:Babilon siapharan thaloi nynhnang kha ae thuanua cih.12Minphuin hae lakuzeri lan um huacce hae paw,mih thawsae hae paw kya-ethaloi khatena ccungccaw zapi hae khaka theih cih hae.Minmin nynh Izipa lysakunaw kha a roh cih hae zah,a ccungccaw zapi balyn tuh a zo cih hae.13Tui alungnaw pepan a um hae pawa sahiin hae balyn kha ka roh cih;ccungccaw ccu nynh thuasah,sahiinpaw ccu nynh thuasahkhah-e tui khanuihsah vae lan khyh.14Tetuh mih tui khaccirarih lan ka ccisah cih zah,mih vawkhu hae khachitui hawte ka luasah cih, citeBawipaw PACHIA nynh a ci.15Izip ram khaccungccaw phe ka daesah zah,ram lungkhu umpaw balyn khahe ka thangsah te, ram lungkhu eccungccaw balyn khade he ka tah hae te,kae tuh Bawipawka thuapaw kha yn nyh cih hae.16E hynh rawkhuinaw nynh thua;e hynh hlaw lang sah athua cih.E hynh minphuin hae kya-enopi hae nynh hlaw lang a sah cih hae.Minmin nynh Izip tea ccungccaw zapi balyn hanlanhlaw lang a sah cih hae, citeBawipaw PACHIA nynh a ci.Izip hanlan Michi Hlaw
17Kum haw lae ningnaw,masaty sawpaw,nin haw lae pangaw nin kheBawipaw bya tuhka kya yn thua zah:18Ccungccapaw,Izip zapi hae hanlan rawtua,Hunghua lungkhu langa cceihbung hae paw a umnaw haelae kaw lang e laephipi kalan kheIzip te alesaepawminphuin hae ccanung hae khasawbung tua hae.19“Nang tuh ming hae laezena puithyahua tou?Cciabung tua!Vingdungawkuh lei hae paw rytedaebabi lan la umkheih oh!” a ci.
20Izip hae tuh thaloi te a chia hae paw laku khe a khuliakuh cih hae. Izip tuh thaloi rhaw kalan ap thua vae zah, a ccungccaw zapi hae ryte parouh mawte kyng hae zah a cciakhae hae.21A thawsaepaw rhawbawi nynh Izip te Izip bawmtu hae kong kha Michi khua kyate a ho cih zah: “Minmin tuh a cceihbung vae hae, thaloi te chia athua hae paw, vingdungawkuh lei hae paw minmin tuh a khuliakuh hae,” a ci cih.
22Tuin kyakhe Assiria tuh a ccungccaw zapi balyn ryte a umbua hae; mih balynte thaloi te chih hae zah, mih shawku tuh Assiaria pepan po voilu lan a um.23Mih shawku hae tuh Hunghua akhu huanaw khe a um hae. A ccungccaw hae shawku tuh a shawku pepan khe po voilu lan a um hae, minmin balyn tuh thaloi te chia thua hae zah a khuliakuh hae paw, a hiin hae paw ram kyakhe ri lan umpaw kha a pazaesakuh hae paw nynh thua.
24Tuin kyakhe Elam tuh a um, a shawku pepan balyn khe a ccungccaw zapi balyn kha a uu hae; minmin balyn tuh thaloi te chia thua hae zah a chih hae paw, a hiin hae paw ram kya ri lan umpaw kha a pazaesakuh hae paw, lae kaw lang a rungbung hae paw vingdungawkuh lei hae paw nynh thua hae. Mih maethyanaw kha Hunghua lungkhu lang a rungbung hae paw ryte a teingkheih hae.25Minmin nynh Elam kha a chia hae paw a ccungccaw zapi balyn laku khe inaw a raepya hae, tuh-e hae shawku tuh a shawku po voilu lan a um, minmin balyn tuh vingdungawkuh lei hae paw, thaloi te a chia hae paw nynh thua hae; pawccecize minmin tuh a hiin hae paw ram kya rinaw a pazaesakuh hae paw thua hae zah, mih maethyanaw kha Hunghua lungkhu lang a rungbung hae paw ryte a teingkheih hae; chia athua hae paw laku khe minmin kha a nung hae.
26Tuin kyakhe Meshek te Tubal tuh mih ccungccaw hae balyn ryte a um hae, minmin po voilu lan mih ccungccaw hae shawku tuh a um, minmin balyn tuh vingdungawkuh lei hae paw, thaloi te a chia hae paw nynh thua hae; pawccecize minmin nynh a hiin hae paw ram kyakhe rinaw kha a pazaesaku hae.27Minmin tuh langmawlya e a chih hae paw rhawkaw hae ryte ihkheih khyh hae; Michi khua lang rhawtuknawpaw zunghe ryte a rungbung hae paw tuh-e rhawkaw hae tuh mih thaloi kha mih lu kaw khe nungpah hae zah mih khawriaphua kha mih ru vawlan a khangpya hae; pawccecize tuh-e rhawkaw hae nynh a hiin hae paw ram kya rinaw a umsah hae.28Nang mah ae khya cih hae zah, vingdungawkuh lei hae paw laku khe, thaloi te a chia hae paw ryte na ihkheih cih oh.
29Tuin kyakhe Edom mah a siapharan hae te a bawi hae ryte a umbua, mih thungnaw balyn ryte thaloi te a chia hae paw kya a nungbua hae; vingdungawkuh lei hae paw, Hunghua lungkhu lang a rungbung hae paw ryte a ih hae.
30Tuin kyakhe thahlang e bawi hae te Sidon hae balyn tuh a umbua hae, mih thungnaw liate rinaw balyn kha a langsaku hae keiccuze chia athua hae paw ryte maethyate a rungbung hae; thaloi te a chia hae paw ryte vingdungawkuh lei hae paw thua hae zah a ih hae, Hunghua lungkhu lang a rungbung hae paw ryte maethyanaw a teing hae.
31Faro nynh minmin kha he a muih hae te, thaloi te a chih hae paw a ccungccaw zapi balyn hanlan Faro te a rhawkaw hae balyn tuh mih lungdaehua cih, cite Bawipaw PACHIA nynh a ci.32Aning nynh a hiin hae paw ram kya rinaw kha a pazaesaku; tukeiccuze Faro te a ccungccaw hae balyn tuh vingdungawkuh lei hae paw laku khe, thaloi te chia athua hae paw ryte haeungsah athua hae, cite Bawipaw PACHIA nynh a ci. Israel Rhawviatu Ezekiel (Eze 3.16-21)
1Bawipaw bya tuh ka kya yn thua zah:2Pou ccungccapaw, ccungccaw hae kha hopya tua hae. Ram ramkhakheit tungvaw thaloi rhaw kha ka thuasah lanze, ram kya-e ccungccaw hae nynh minmin laku e lukhakheit kha rhawviatu lang a nung hae;3tuh-e rhawviatu nynh ram kalan yn cceihpaw thaloi rhaw kha he a muih te, mungkae tu zah ccungccaw hae kha raeringnaw a pya hae;4lukhakheit nynh tuh-e mungkae roi tuh mang a thae pite raeringku leite um zah, rhaw nynh thuanuate amaw kha a chia lanze, a chiise tuh amaw lu vawlan nynh a um.5Mungkae roi kha mang a thae pite a raeringku khyh keiccuze a chiise tuh amaw tungvaw nynh a um. Thuasalama aning nynh a raeringku lanze, a hiinnaw kha a lue cih.6Thuasalama rhawviatu nynh thaloi rhaw yn thuapaw kha mang a muih pite mungkae kha a tu khyh keiccuze ccungccaw hae tuh raeringku leite um hae zah, thaloi rhaw nynh thuanuate minmin laku e lukhakheit tuh a chi lanze, tuh-e paw tuh amaw a seinaw keiccu nynh a chi, thuasalama a chiise mee tuh rhawviatu kha ka ngia cih.
7Tukeiccuze, ccungccapaw, nang kha Israel hanlan rhawviatu lang kae rae vae; ka mung kya-e bya kha na thae takyh te minmin kha raeringnaw na pya cih hae.8Kae nynh ccungccaw hoylei hae paw kha, “Pou ccungccaw hoylei hae, na chih ccaccing cih oh,” cite ka hopah hae zah, ccungccaw hoylei hae paw kha mih hoyleinaw kyate maeleihku khylan na hopya khyh hae ze, minmin tuh mih hoyleinaw keiccu a chih cih hae, thuasalama mih chiise mee tuh nang kha kae ngia cih.9Thuasalama ccungccaw hoylei hae paw kha mih seinaw kyate maeleihku khylan raeringnaw na pya hae zah, mih hiinzia kyate a maeleihku khyh hae ze, minmin tuh mih hoyleinaw keiccu a chih cih hae, thuasalama nang tuh na hiinnaw kha na khumku vae. Pachia Byading te Thawccinaw
10Ccungccapaw, nang nynh Israel hae kha hynhte hopya tua hae: Nanning nynh, “Aening cyiseinaw te aening seinaw nynh aening kha phang oun ne zah, ah thawthang vae, pawtemou ah hiin kho cih oh?” na ciku oh.11Bawipaw PACHIA nynh a hopaw tuh, Kae tuh ka hiin thyhte, ccungccaw hoyleipaw nynh a chipaw kha ka lungrythua khyh, thuasalama tuh-e ccungccaw hoyleipaw nynh a hiinzia kyate maeleihkuh zah a hiinpaw kha ka ry; maeleihkuh oh, ahoy leipaw nae hiinzia kyate maeleihkuh oh. Pou Israel hae, pawccemou na chih cih oh?12Ccungccapaw, na ccungccaw hae kha hynhte hopah hae, Miding nynh a mesei lanze, a dingnaw nynh amaw kha khum lan khyh; ccungccaw hoyleipaw nynh a hoyleinaw kyate a maeleihku lanze, a hoyleinaw nynh aning kha thykupawkunaw pya lan khyh; miding tuh a sei lanze, hiin kho lan khyh.13Miding tuh a hiin ccaccing cih cite ka ho salamah, a dingnaw kha doliakuh zah hoyleinaw a rae lanze, a dingnaw kha tuapya thui thua lan khyh; a la cyipaw hoyleinaw keiccuze aning tuh a chih cih.14Tukoute, ccungccaw hoyleipaw kha, “Nang tuh na chih ccaccing cih,” cite ka hopah salamah, a seinaw kyate maeleihkuh zah atazaepaw te ahmepaw kha a cyi ze thuasah,15ponpaw uccaw kha lawku leite bua pyathui zah, a luadepaw uccaw kha pyathuite, hoyleinaw kha rae vae leite hiinnaw phunglang kha a zui ze thuasah aning tuh a hiin ccaccing cih zah chih lan khyh.16Aning nynh a la raepaw seinaw ccangkheit sanmah liathuipya thua lan khyh; aphung thyhte cyih zah ahmepaw kha a rae keiccuze aning tuh a hiin ccaccing cih.
17Tuhzemah na ccungccaw hae nynh, “Bawipaw nynh a cyipaw tuh hme khyh,” a ci hae, thuasalama minmin nynh a cyi hae paw khaw hme khyh.18Miding nynh a dingnaw kyate maeleihkuh zah hoyleinaw kha a rae lanze, tuh-e hoyleinaw hanlan aning tuh a chih cih.19Ccungccaw hoyleipaw nynh a hoyleinaw kyate maeleihkute aphung thyhte cyih zah ahmepaw kha a rae lanze, tuh-e liate aning tuh a hiin cih.20Tuhzemah nanning nynh, “Bawipaw nynh a cyipaw tuh hme khyh,” na ci oh. Pou Israel hae, na cyisahnaw thyhte nanning balyn kha bya kae pia cih oh! Jerusalem Ronaw
21Oun kyng hae zah oun cciakhaenaw hae te, kum haw lae ningnaw kum, sawpaw sah hawnaw, nin pangaw nin khe Jerusalem kyate yn lue zah yn ccuepaw lu kheit nynh kae kha, “Jerusalem khuapi tuh aroh vae,” yn cipya.22Tuh-e yn ccuepaw yn thua maw zete ccyh mawte Bawipaw kuih tuh ka tungvaw a um vae; thuasalama awkhua ccyh kya tuh-e paw he yn thua te nynh kae kha byaho khonaw yn pya; tetuh ka mung kha hungpya thua zah byaho kho leite ka um vae khyh. Judah Ram kya A Hiinhy hae paw
23Bawipaw bya tuh ka kya yn thua zah:24Ccungccapaw, Israel ram e arohpaw hmin hae kya a um hae paw nynh, “Abraham tuh a makhae kyalya a la thua zemah e ram hynh a la ccou; thuasalama aening tuh patae ah cih vae oh; ram hynh ccou khylan pya ah thua ccaccing vae oh,” a ci hae.25Tukeiccuze minmin kha hopah hae, Bawipaw PACHIA nynh hynhte a ho: Nanning nynh achii ryte asaw kha na ae oh zah, zohtuh hae kalan khe nae mit dothungte chiise na luasah oh; te nanning nynh ram kha na ccou cih oh tou?26Nae thaloi kha na doliaku oh, anungsikuhpaw kha na rae oh zah, nae innpaw paw zu kha mang na thusah oh pite ram kha na ccou cih oh tou?27E hynh minmin kha hopah hae, Bawipaw PACHIA nynh hynhte a ho: Kae tuh ka hiin thyhte, arohpaw hmin hae kya a um hae paw tuh thaloi te a chih ccaccing cih hae; ramkaw um hae paw kha loramsaw hae kalan ka pya cih hae zah ka teisah cih hae; rhawlungrua lungkhu te lungkarung kya um hae paw tuh shethya khate a chih cih hae.28Ram kha arohpaw te accakaepaw lang ka rae cih, a lysakunawpaw a thungnaw tuh athang cih. Israel mua hae tuh ccungccaw a cceih bungthungpaw a um lei lan ciate ccungccaw adaepaw lang a tang cih.29Minmin nynh anungsikuhpaw a rae hae paw balyn keiccuze ram kha arohpaw te accakaepaw lang he ka rae te, kae tuh Bawipaw ka thuapaw kha a nyh cih hae.
30Ccungccapaw, na ccungccaw hae nynh nang na kong kha inn thuakaw pe te pang pe khe innpaw raveihte lu kheit te lu kheit hokuh hae zah, “Rang oh, Bawipaw kyate paw bya mou yn thua cipaw kha thaetua oh sih,” a ciku hae.31Minmin tuh ka ccungccaw hae hawte oun thua cih hae zah, na malang khe ka ccungccaw hae hawte a haung cih hae, te na bya kha a thae cih hae, thuasalama zui lan khyh hae. Mih munglae tuh myarya anawthya, thuasalama mih thinlung tuh mih uccaw amia muenaw kyakhe nynh a um.32Minmin hanlan tuh nang hynh sungsakunaw hlaw a sahthyapaw, a roi hoypaw te tintang hoyte a khuathyapaw hawte nynh na thua; na hopaw kha a thae hae zemah zui lan khyh hae.33E balyn hynh yn ccing ccaccing cih, he yn ccing te, minmin laku kya profeh a la umpaw kha a nyh cih hae. Ahme leipaw Israel Tuurin hae
1Bawipaw bya tuh ka kya yn thua zah:2Ccungccapaw, Israel tuurin hae kha rawsete profehbya hotua: profehbya ho lah, tuurin hae kha hopah hae: Bawipaw PACHIA nynh hynhte a ho: Mimaw kyalya looh a dangkuh hae paw Israel tuurin hae nanning hanlan ngaethya lan kou um! Tuurin hae nynh tuu hae kha looh dang lan ccan khyh tou?3Tuu matei kha na nia oh, tuuming boeining kha na lawku oh, tuu athopaw kha na chia oh; thuasalama tuu hae kha looh na dang khyh oh.4A thawzyapaw kha thawzung na pya khyh oh, a ccihpaw kha na dansah khyh oh, vaemaw a muepaw kha na heepah khyh oh, a cceihseipaw kha na kikhae khyh oh, a zopaw kha na ccung khyh oh, minmin kha thawcci leite nangsete na uk oh.5Tuurin a um khyh keiccuze tuu hae tuh pong a phiakuh hae; he a phiakuh hae tuh loramsaw hae elang looh lang a tang hae.6Ka tuu hae tuh phiakuh hae zah, mua balyn vawlan te sangpyng ahangpaw miakaw vawlan khe a khiavuikuh hae; ka tuu hae tuh laephi vaw balyn khe pong phiakuh hae zah, minmin a ccungtu te a zahtu lu kheit san um khyh.
7Tukeiccuze, tuurin hae nanning, Bawipaw bya hynh thaetua oh:8Bawipaw PACHIA nynh a hopaw tuh: Kae tuh ka hiin thyhte, tuurin a um khyh keiccuze ka tuu hae tuh teipaw saw lang tang hae zah, loramsaw balyn hanlan looh lang a tang vae hae; ka tuurin hae nynh ka tuu hae kha ccung khyh hae, mimaw kha looh dangkuh hae zah ka tuu hae kha looh dang khyh hae;9tukeiccuze, tuurin hae nanning, Bawipaw bya hynh thaetua oh:10Bawipaw PACHIA nynh hynhte a ho, Tuurin hae kha ka rawse hae; mih kuih kya umpaw ka tuu hae kha yn pya oh, cite minmin kha ka ngia cih hae, tuu hae looh dangpaw rya kyate ka haeungsah cih hae; tuurin hae nynh mimaw te mimaw kha looh dangkuh vae lan khyh hae. Ka tuu hae tuh minmin hanlan looh lang a tang khyh nawlan hae, mih khalang kyate ka tuu hae kha ka luesah cih hae. Ahmepaw Tuurintu Pachia
11Pawccecize Bawipaw PACHIA nynh hynhte a ho: Kamaw ccaccei nynh ka tuu hae kha ka ccung cih hae zah thawte ka zah cih hae.12Tuurin hae nynh a phiakuh hae paw mih tuu hae kya a um lya hae khe, mih tuu hae kha thawte a ccung hae hawte, ka tuu hae kha thawte ka ccung cih hae, mae-ui zah marae amoh nin khe, minmin a phiakunaw hae hmin takyh kyate minmin kha ka luesah cih hae.13Minphuin hae kyate ka poukhae cih hae, ram hae kyate ka suelua cih hae zah, mimaw ram lungkhu lang ka teekhae cih hae; Israel mua hae vawlan, vawkhu hae pepan te ram lungkhu umnaw hmin takyh kyakhe minmin kha looh ka dang cih hae.14Ahoypaw ramnonaw khe ka paeesakuh cih hae zah, Israel mua ahang hae paw tuh minmin nynh rampaeekunaw hae athua cih; rampaeekunaw ahoynaw khe a rya cih hae zah, Israel mua hae vawlan umpaw myarya ramnonaw khe ram a paeekuh cih hae.15Kamaw ccaccei hynh ka tuu hae a rintu ka thua cih zah, minmin kha ryanaw hmin ka pya cih hae, cite Bawipaw PACHIA nynh a ci.16A zopaw kha ka ccung cih zah, a cceihseipaw kha ka kikhae cih, vaemaw a muepaw kha ka heepah cih zah, a thawzyapaw kha thawzung ka pya cih, thuasalama a thopaw te thawzung hoipaw kha ka roh cih. Minmin kha dingnaw te ka kua cih hae.
17Ka tuuphu hae nanning, Bawipaw PACHIA nynh hynhte a ho: Tuu te tuu laku thuasah, tuutepaw hae te miaatepaw hae laku thuasah bya ka pia cih hae:18Ahoypaw ramnonaw kya ram na paeeku oh paw hynh zaw khyh tou? Pawccemou ram na paeeku leinaw oh kha nae ccu te na syde oh? Tui accipaw kha he na nia vae oh ze, na nia bang oh paw tui kha nae ccu te pawccemou na nuihsah oh?19Nae ccu te na syde vae oh paw te nae ccu te na nuihsah vae oh paw tui kha tou ka tuu hae nynh a ae a neih cih hae?
20Tukeiccuze, Bawipaw PACHIA nynh minmin kha hynhte a hopya hae: Athopaw tuu te angethahpaw tuu laku kya kamaw ccaccei nynh bya ka pia cih hae.21Nanning nynh anyaapaw sarangpaw balyn kha phiariphiarae a phiaku mawlaezung hae, nae napang te nae raw khate na eih oh zah, nae ki te na dia oh keiccuze,22ka tuuphu kha ka khum cih zah, ro thua vae lan khyh hae; kamaw nynh tuu te tuu laku bya ka pia cih hae.
23Minmin hanlan tuurin lu kheit, ka ryalahtu David kha ka nungpah cih hae zah, aning nynh looh a dang cih hae: aning nynh looh a dang cih hae zah aning tuh minmin hanlan tuurin athua cih.24Te kae, Bawipaw tuh mih Pachia ka thua cih zah, ka ryalahtu David tuh minmin laku bawi athua cih; kae, Bawipaw nynh phe ka ho vae.
25Minmin ryte daenaw byakin kha ka rae cih zah, loramsaw hae kha ram kyate ccaring ka dee cih hae, tuhteze nynh minmin tuh ramkaw kya khyndadyh lan a um cih hae zah tuhpi kya a rya cih hae.26Minmin te ka mua po voilu lan umpaw hmin hae kha hythua ka pya cih hae; accyh thyhte khuaa ka rawsah cih zah, tuh-e khuaa tuh hythuanaw khuaa athua cih.27Ramkaw e thingku hae nynh athae thae cih hae zah, laephi nynh looh a pousah cih. Minmin tuh mih laephi kya lungdaete a um cih hae; a puihnaw hae paw mih ccong kha ka khyapah hae zah minmin kha see lang a mang hae paw kuih kyate he ka luesah hae te, kae tuh Bawipaw ka thuapaw kha a nyh cih hae.28Minmin tuh minphuin ccangpaw hae nynh luadepaw lang tang vae lan khyh hae, ram lungkhu e sarangpaw hae nynh minmin kha tei vae lan khyh hae; lungdaete a um cih hae zah lu kheit nynh sanmah minmin kha rinaw pya vae lan khyh hae.29Myarya hoypaw thingthae-eccang kha ka voisahpah cih hae, tuhteze nynh ram lungkhu kya vuelawtuihawnaw kha teing lan khyh hae zah, minphuin ccangpaw hae nynh saryakunaw mah teing vae lan khyh hae.30Kae, Bawipaw mih Pachia tuh minmin ryte ka um zah, Israel hae tuh ka ccungccaw hae nynh thua hae cipaw minmin nynh a nyh cih hae, cite Bawipaw PACHIA nynh a ci.31Nanning tuh ka tuu hae, ram ka paeesakuh hae paw tuu hae na thua oh zah, kae tuh nae Pachia nynh ka thua, cite Bawipaw PACHIA nynh a ci. Seir Mua vawlan Byapianaw
1Bawipaw bya tuh ka kalan yn thua zah:2Ccungccapaw, na mae kha Seir Mua kalan khe hawi lah, profehbya kha honua tua,3Bawipaw PACHIA nynh hynhte a ho:Pou Seir Mua, nang kha kae rawse;nang kha arohpaw teaccakaepaw lang rae khylan,ka kuih kae dyngnua.4Na khua hae kha ka roh cih hae;nang tuh ccungccaw adaepaw langna tang cih zah,kae tuh Bawipawka thuapaw kha na nyh cih.
5Nang nynh langmawlya e rhawkunaw kha phang na kyngkuh zah, Israel ccungccaw hae tungvaw shethya a thua ccyh te minmin tungvaw nyathya detahnaw ccyh kyakhe minmin kha thaloi kalan na ap hae keiccuze,6Bawipaw PACHIA nynh a hopaw tuh, Kae tuh ka hiin thyhte, chiise hanlan nang kha kae paccyn cih zah, chiise nynh nang kha ae deehui cih; chiise luanaw kha na hua khyh keiccuze chiise luanaw nynh nang kha ae deehui cih.7Seir Mua kha accakaepaw te arohpaw lang ka rae cih zah, tuin kya oun thua hae paw te a cceih hae paw balyn kha ka roh cih hae.8Na mua hae kha michi rhua te phe ka biasah cih; na sangpyng hae vawlan, na kya-e accya hae kya te na vawkhu hae balyn kyakhe thaloi te chia athua hae paw tuh a khuliakuh cih hae.9Nang kha zungzae arohpaw lang kae rae cih zah, na khuapi hae kya humhung mah um lan khyh. Tetuh kae tuh Bawipaw ka thuapaw kha na nyh cih.
10Nang nynh, “E minphuin ccangning te e ram ramning hynh ka kya-e athua cih hae zah, aening nynh ah ccou cih oh,” cite, tuin kya Bawipaw phang a um pite na ho keiccuze,11Bawipaw PACHIA nynh a hopaw tuh: Kae tuh ka hiin thyhte, nang nynh minmin kha na hua hae keiccuze thinrianaw te eiungnaw kha na langsaku thyhte, na tungvaw ka cyih cih; nanning kha bya he kae pia oh te, nanning kha kamaw ccaccei nynh kae nysakuh cih oh.12Nang nynh, “Israel mua hae tuh ccungccaw adae vae, aening nynh ae khylan aening kalan pya athua vae hae,” cite saryanaw bya na hopaw balyn kha kae, Bawipaw nynh phe ka thae vae, cipaw na nyh cih.13Kae kha rawsete na munglae te na pookuh zah, ka thethya na hopaw kha phe ka thae.14Bawipaw PACHIA nynh hynhte a ho: Laephi pynpi a lungtua lyakhe nang kha ccungccaw phe kae daesah cih.15Israel hae kya-e rho kha ro athua lyaze, na lungtua hawte, na tungvaw ka cyih cih. Pou Seir Mua, nang te Edom ram balyn tuh na roh cih oh. Tetuh kae tuh Bawipaw ka thuapaw kha na nyh cih oh. Israel tungvaw Hythuanaw
1Ccungccapaw, Israel mua hae kha profehbya hopya tua hae: Pou Israel mua hae, Bawipaw bya hynh thaetua oh.2Bawipaw PACHIA nynh a hopaw tuh: Rhaw hae nynh, “Alei! Zungzae tynpaw mua hae tuh kaening kya-e nynh athua vae hae,” cite ae hopya oh keiccuze,3profehbya kha hotua: Bawipaw PACHIA nynh hynhte a ho: Nanning tuh ccangpaw minphuin hae kya-e thua khylan te minphuin hae laku thethya hopaw te saryapaw lang na tang ccaw oh cite, nanning kha ae maemih oh zah, teitei langte balyn ae syro oh keiccuze,4pou Israel mua hae, Bawipaw PACHIA bya hynh thaetua oh: Mua hae te sangpyng hae, vawkhu hae te accya hae, po voilu lan um hae paw ccangpaw minphuin hae nynh luadepaw te saryapaw lang a tang vae hae paw arohpaw hmin hae te ccuetawpaw khua hae kalan khe Bawipaw PACHIA nynh hynhte a hopya hae:5Bawipaw PACHIA nynh a hopaw tuh: Ccangpaw minphuin hae te Edom hae balyn tungvaw khe eiung thinriate bya ka ho cih, Edom hae nynh myarya lungtuakhaekute theihryanaw byaho hae zah ka ram kha luadete mimaw ram lang a lawku hae.6Tukeiccuze Israel ram konglangte profehbya ho lah, mua hae te sangpyng hae, vawkhu hae te accya hae kha hopya tua hae, Bawipaw PACHIA nynh hynhte a ho: Nanning tuh minphuin ccangpaw hae nynh saryakunaw kha na teing oh keiccuze eiung thinriate bya ka ho cih;7tukeiccuze Bawipaw PACHIA nynh hynhte a ho: Na pepan po voilu lan um hae paw minphuin hae toulou kha saryakunaw a teing cih hae cite bya ka kinku.
8Thuasalama, pou Israel mua hae, na karan hae tuh atoih cih zah, ka ccungccaw Israel hae hanlan na thingthae tuh athae cih; pawccecize minmin tuh aro mawze inn lang oun ki cih hae.9Dotua oh, kae tuh nae hanlan nynh ka thua; nae kalan ka maeleihkuh cih zah nanning tuh loo lang pho na thua cih oh zah ccacii tu na thua cih oh;10nanning Israel hae balyn kha milu kae pungzaesah cih oh; khua hae kya ccungccaw a um cih zah arohpaw hmin hae kha raethui athua cih.11Nae tungvaw khe ccungccaw te sahiinpaw hae kha ka pungzae sah cih hae. Minmin tuh a lungthung cih hae zah a pungthung cih hae; alia vae paw nae ccyh lya hawte kae umsah cih oh zah, langmawlya laeze ahoy huapaw kha kae raepah cih oh. Tetuh kae tuh Bawipaw ka thuapaw kha na nyh cih oh.12Ka ccungccaw Israel hae kha nanning vawlan khe ka cciakhae cih hae, nanning tuh minmin kya-e na thua cih oh zah, mih rho na thua cih oh. Mih ccaaw hae kha na theih vae lan khyh oh.
13Bawipaw PACHIA nynh hynhte a ho: Minmin nynh nang kha, “Nang nynh ccungccaw hae kha na ae hae, na minphuin athuapaw imua hae kha na chia hae,” cite ae ci hae;14tukeiccuze nang nynh ccungccaw hae kha na ae vae lan khyh hae zah, na minphuin athuapaw imua hae kha na theih vae lan khyh hae, cite Bawipaw PACHIA nynh a ci;15minphuin ccangpaw hae nynh saryakunaw bya kha kae thaesah vae lan khyh zah, ccungccaw hae nynh theihryakunaw kha na teing vae lan khyh; na minphuin kha na thy na pawsakuh vae lan khyh, cite Bawipaw PACHIA nynh a ci. Israel kha Thawsahthuinaw
16Bawipaw bya tuh ka kya yn thua zah:17Ccungccapaw, Israel hae nynh mimaw laephi kya he a um hae te, mih hiinzia te mih cyisahnaw khate ram kha a thusah hae; ka muihnaw kya mih ozia tuh nopi nynh nopiny a ny lya-e nungsikunaw te nynh aloku.18Tukeiccuze minmin nynh ram lungkhu kya a luasah hae paw chiise keiccu te ram a thusahnaw hae paw zohtuh hae keiccuze mih tungvaw kya ka thinrianaw ka bunua hae.19Minphuin hae laku kya phiariphiarae ka nung hae zah ram hae kya ka phiasaku hae; mih ozia te mih cyisahnaw thyhte bya ka pia hae.20Thuasalama minphuin hae kya he a thua hae te, a thuanaw takyh hae kyakhe ming hae nynh, “E hae hynh Bawipaw ccungccaw nynh thua hae, tuhzemah a ram kyate a pou vae hae,” cite a ho hae keiccuze, minmin nynh athyaapaw ka min kha a thusah hae.21Thuasalama Israel hae nynh a thuanaw hae minphuin hae laku kya a thusah hae paw ka min athyaapaw hanlan ka thinphang.
22Tukeiccuze Israel hae kha hopya tua hae, Bawipaw PACHIA nynh hynhte a ho: Pou Israel hae, e ka cyipaw hynh nanning hanlan thua khyh, thuasalama na thuanaw oh minphuin hae laku kya na thusah vae oh paw ka min athyaapaw hanlan nynh thua.23Minphuin hae laku kya na thusah oh zah athu vae paw ka min alesaepaw kha ka thyaasah cih; ka thyaanaw kha mih malang khe nanning liate he ka langsakuh te, minphuin hae nynh kae tuh Bawipaw ka thuapaw kha a nyh cih hae, cite Bawipaw PACHIA nynh a ci.24Minphuin hae kyate nanning kha kae ko cih oh, ram takyh kyate kae suelua cih oh zah, naemaw ram lang kae cciakhae cih oh.25Nanning kha tui ccipaw te kae hei cih oh zah nae nungsikunaw balyn kyate na thyaa cih oh, nae zohtuh balyn kyate kae thyaasah cih oh.26Thinlung thawpaw kae pya cih oh zah, nae lungkhu kya tuanaw thawpaw kae sang cih oh; nae pyn kyate lung thinlung kha ka lah cih zah, ngesaw thinlung kha kae pya cih oh.27Ka muisaw kha nae lungkhu kya ka sang cih, ka phungbya hae kha kae zuisah cih oh zah ka phungzae hae kha raeringkute na zui cih oh.28Tetuh nae minpaaw hae ka pya hae paw ram kya na um cih oh; nanning tuh ka ccungccaw hae na thua cih oh zah, kae tuh nae Pachia ka thua cih.29Na nungsikunaw oh balyn kyate kae khum cih oh, ccathae kha ka ko cih zah patae ka voisah cih, nae kya ccakannaw ka umsah lan khyh.30Thingthae kha patae ka thaesah cih zah loo kyate looh patae ka voisah cih; tuhteze nynh minphuin hae laku kya ccakanccite maethyanaw kha papin bua na teing vae lan khyh oh.31Tetuh ahoy leipaw nae ozia athahpaw te ahoy leipaw nae cyisahnaw kha na liathui cih oh zah, nae hoyleinaw te anungsikuhpaw nae cyisahnaw keiccuze naemaw toulou nae luathuakuh cih.32E ka cyi lanpaw hynh nanning hanlan thua khyh cipaw nyh oh, cite Bawipaw PACHIA nynh a ci. Pou Israel hae, nae maethah sah lah, lungrote um oh.
33Bawipaw PACHIA nynh hynhte a ho: Nae hoyleinaw balyn kyate he kae thyaasah oh nin khe, khua hae kya ccungccaw ka umsah cih zah arohpaw hmin hae kha raethui athua cih.34Po a cceih hae paw balyn nynh a muihnaw hae khe vua athua vae paw ram tuh, vuapaw ram thua vae leite, loo lang pho athuathui cih.35Tetuh minmin nynh, “Vua athua vae paw e ram tuh Eden khokhu hawte nynh athua vae; alakawpaw, vuapaw te aroh vae paw khua hae tuh atu ccungccaw um vae hae zah rhawlungrua mah a um vae,” cite a ho cih hae.36Tetuh kae, Bawipaw nynh aroh vae paw hmin hae kha ka raethui zah, vua athua vae paw loo kyakhe ccacii ccouthui athua vae cipaw kha nae pepan po voilu lan um hae paw ccangpaw minphuin hae nynh a nyh cih hae; kae, Bawipaw nynh phe ka ho vae zah, ka cyih cih.
37Bawipaw PACHIA nynh hynhte a ho: E hynh Israel hae hanlan cyipya khylan ngiakunaw kaw ka ua ung cih hae: Tuuphu hawte milu ka lungsah thung cih hae.38Silawnaw hanlan mangpaw tuuphu hawte thuasah, poitua lyaze Jerusalem e tuuphu hawte, arohpaw khua hae tuh ccungccaw zapi khate phe abeih cih. Tetuh minmin nynh Bawipaw ka thuapaw kha a nyh cih hae. Ru Roupaw Umnaw Accya
1Bawipaw kuih tuh ka tungvaw yn um, te Bawipaw muisaw nynh yn cciakhae zah, ru phe beihpaw accya ngaelung khe yn nung.2Tuh-e ru hae balyn kyakhe po voilu lan yn cciakhae; tuh-e accya kyakhe ru patae um zah, tuh-e ru hae tuh karae arou hae.3Bawipaw nynh kae kha, “Ccungccapaw, e ru hae hynh a hiin kho cih hae tou?” cite yn khia zah kae nynh, “Pou Bawipaw PACHIA, namaw nynh phe na ny,” ka cipya.4Tetuh Bawipaw nynh kae kha yn hopah zah, “E ru hae hynh profehbya hopya tua hae: Pou aroupaw ru hae, Bawipaw bya hynh thaetua oh.5E ru hae kha Bawipaw PACHIA nynh hynhte a hopya hae: Nae lungkhu lang hy kha ka teesah cih zah na hiin cih oh.6Nae kyakhe tharui ka saesah cih, ngesaw ka thuasah cih zah ving te kae bong cih oh, nae lungkhu kya hy ka nung cih zah na hiin cih oh; te kae tuh Bawipaw ka thuapaw kha na nyh cih oh,” a ci.7Kaw yn pya thyhte kae nynh profehbya ka ho; profehbya ka ho lyakhe vaekheihmawte roi tuh myarya yn ccae, te ru hae tuh sueluakuh hae zah ccangkheit te ccangkheit oun tungkuh vae hae.8Ka do zah minmin kya tharui yn um, ngesaw mah yn um zah ving nynh minmin kha a bong hae; thuasalama minmin kya hy um khyh.9Tetuh Bawipaw nynh kae kha yn hopah zah, “Ccungccapaw, hy kha profehbya hopah, hy kha profehbya hopya tua: Bawipaw PACHIA nynh hynhte a ho: Pou hy, teitei langte balyn yn thua lah, e michi hae hynh a hiin ccaw hae, mih hysuesah tua hae,” a ci.10Aning nynh kaw yn pya thyhte profehbya ka ho, te hy tuh mih lungkhu lang tee zah a hiin hae, mih ccu te thadyn hae zah myarya lungpaw rhawkawphu zeih acih hae.
11Te Bawipaw nynh kae kha, “Ccungccapaw, e ru hae hynh Israel hae balyn kha nynh thua hae. Minmin nynh, ‘Aening ru tuh karae rou vae zah aening ngaehoinaw tuh phe zo vae; aening tuh khaleih mawte vua ah thua vae oh,’ a ciku hae.12Tukeiccuze minmin kha profehbya hopah hae, Bawipaw PACHIA nynh hynhte a ho: Pou ka ccungccaw hae, nae shawku hae kha ka hung cih zah, nanning kha poh kae thuaa cih oh; te nanning kha Israel ram lang kae kikhae cih oh.13Pou ka ccungccaw hae, nae shawku hae kha ka hung zah nanning kha poh he kae thuaa oh te, kae tuh Bawipaw ka thuapaw kha na nyh cih oh.14Nae lungkhu khe ka muisaw kha ka sang cih zah na hiin cih oh, te naemaw laephi kya kae nung cih oh; tetuh kae, Bawipaw nynh phe ka ho vae zah ka cyih cih cipaw kha na nyh cih oh,” cite Bawipaw nynh a ci.
Ccungngue Ccangning
15Bawipaw bya tuh ka kya yn thua zah:16Ccungccapaw, ccungngue ccangkheit kha lawkuh lah, a vawlan khe, “Judah te a ruiban Israel hae hanlan,” cite zeitua; tukoute ccangpaw ccungngue kha lah lah, a vawlan khe, “Josef (Efraim ccungngue) te a ruiban Israel hae balyn hanlan,” cite zeitua;17khah-e ccungngue hae kha na kuih kya ccungngue ccangkheit lang a tang nawlan, piade hae.18Na ccungccaw hae nynh nang kha, “E hynh paw suilan mou athua cipaw nae langsapakuh lan khyh tou?” cite he ae khia hae te,19minmin kha hopya tua hae, Bawipaw PACHIA nynh hynhte a ho: Josef ccungngue (Efraim kuih kya umpaw) te a ruiban Israel minphuin hae kha ka lah vae cih hae; te khah-e ccungngue te Judah ccungngue kha ka pyde cih zah, ka kuih kya ccungngue ccangkheit lang a tang ccaw hae cite ccungngue ccangkheit lang ka rae cih hae.20Ccaw na zeinawpaw ccungngue hae tuh minmin nynh a muihnaw hae na kuih kya he a um hae te,21minmin kha hopah hae, Bawipaw PACHIA nynh hynhte a ho: Israel ccungccaw hae kha a thuanaw hae minphuin hae laku kyate ka ko cih hae, mih umnaw takyh kyate ka suelua cih hae zah mimaw ram lang ka cciakhae cih hae.22Tuh-e ram lungkhu Israel mua hae vawlan khe minphuin phuin kheit lang ka rae cih hae; minmin balyn kha siapharan lu kheit nynh a uk cih hae. Minphuin ccangning lang papin tang vae lan khyh hae zah peenaw ccangning lang papinmaw phiakuh thui vae lan khyh hae.23Mih zohtuh hae, anungsikuhpaw mih uccaw hae te mih seinaw hankhakheit khate mimaw toulou kha papin thusakuh thui vae lan khyh hae. A khuliakunaw hae zynseinaw balyn kyate ka khum cih hae zah ka thyaasah cih hae. Tetuh minmin tuh ka ccungccaw hae athua cih hae zah, kae tuh mih PACHIA ka thua cih.
24Ka ryalahtu David tuh minmin a uktu hae siapharan athua cih; mih balynte tuurin lu kheit rou kha a hoi cih hae. Ka phungzae hae kha a zui cih hae zah ka phunglang hae kha raeringkute a zui cih hae.25Ka ryalahtu Jakob ka pyapaw ram, nae minpaaw hae nynh a umnaw hae ram kyakhe a um cih hae; minmin, mih ccaaw hae te mih mintaw hae tuh tuin kya zungzae a um cih hae; ka ryalahtu David tuh mih uktu bawi athua zungzae cih.26Minmin ryte daenaw byakinnaw kha ka rae cih; tuh-e tuh minmin ryte ka raepaw zungzae tynpaw byakinnaw athua cih; minmin kha hythua ka pya cih hae zah ka pungzaesah cih hae, ka beikinnthyaa kha minmin laku kya ka nung zungzae cih.27Ka umnaw hmin tuh minmin kya a um cih; kae tuh mih Pachia ka thua cih zah, minmin tuh ka ccungccaw hae athua cih hae.28Tuhcite ka beikinnthyaa tuh minmin laku kya zungzae he a um te, minphuin hae nynh kae, Bawipaw nynh Israel kha ka thyaasah cipaw a nyh cih hae. Gog nynh Doukunaw
1Bawipaw bya tuh ka kya yn thua zah:2Ccungccapaw, Magog ram umpaw Meshek te Tubal uktu bawi Gog kha na mae hawinua lah, profehbya honua tua:3Bawipaw PACHIA nynh hynhte a ho: Pou Meshek te Tubal uktu bawi athuapaw Gog, nang kha kae rawse.4Nang kha kae maeleihsakuh cih, na khaw kha bawnawpaw te kae baw cih zah, na rhawkaw hae balyn, marang hae, marang rhawkaw hae, rhaw uccaw phe ccing lan a lawkuh hae paw tuh-e rhawkaw hae balyn, te khawriaphua, khawriaphua dihpaw te thaloi ccyngkuh hae paw ccungccaw zapi patae ryte nang kha kae cciakhae cih oh.5Persia, Kush te Put minphuin hae mah a umbua hae, tuh-e hae balyn tuh khawriaphua te sivawlukhung ccarou a hoi hae;6Gomer te a rhawkaw hae balyn, thahlang adianaw umpaw Beth-togarmah te a rhawkaw hae balyn—ccungccaw patae tuh na kya a cceihbua hae.
7Nang te na kya a pumkuh hae paw zapi balyn tuh raeringkuh oh lah, paccynkute um oh, minmin hanlan rintu lang umtua.8Ninsaw patae aro koute nang kha sueluabua na thua cih; nyalang kum patae aro te, rhaw kyate muethui koute raethuipaw ram kha na ccianua cih, tuh-e ram tuh minphuin patae kyate sueluapaw ccungccaw hae a umnaw hae ram, khaw cia ccungccaw adae vae paw Israel mua hae vawlan umpaw ram nynh thua; tuh-e hae tuh minphuin hae kyate poukhaepaw ccungccaw hae thua hae zah, atu tuh mih balynte khyndadyh lan a um vae hae.9Nang tuh khise hawte malang na cceih cih; nang, na rhawkaw hae balyn te na kya umbua hae paw ccungccaw patae tuh ram a bongpaw maeking hawte na thua cih oh.
10Bawipaw PACHIA nynh hynhte a ho: Tuin nin vae tuh na lungkhu kya tuanaw patae yn thungkuh cih zah, ahoy leipaw paccynnaw kha na paccyn cih.11Nang nynh, “Khualungrua koihkuh leipaw khua taraw hae umnaw ram kha ka ccianua cih; khualungrua, koikua khyhze koikua ccong um leite khyndadyh lante daebabi lan um hae paw kha ka tuk cih hae,” na ci;12mih uccaw kha luadete lawku lan thuasah, langmawlya tuh la roh zah atu ccungccaw a um vae paw hmin hae, minphuin hae kyate suelua thua hae zah, sahiin te uccaw a hoi hae paw te laephi angaelung um hae paw kha tuk lan thuasah na tuakuh cih.13Sheba hae, Dedan hae, Tarshish kungku hae te arawthungpaw a ngawphue hae balyn nynh nang kha, “Uccaw luadete cciakhae khylan nae thua vae tou? Luadepaw uccaw hae, sui te ngun, sahiin te uccaw hae, luadepaw uccaw patae kha cciakhae khylan tou na ccungccaw zapi hae kha na pum hae?” ae ci cih hae.
14Tukeiccuze, ccungccapaw, profehbya ho lah, Gog kha hopya tua: Bawipaw PACHIA nynh hynhte a ho: Ka ccungccaw Israel hae tuh ngaengante a um nin hae khe, nang nynh nae thokuh cih zah,15nang te ccungccaw patae tuh marang ccikuh hae paw, zapi patae, athungpaw rhawkaw hae ryte thahlang asaw huanaw na hmin kyate nae thua cih oh;16maeking nynh ram kha a bong hawte ka ccungccaw Israel hae kha na ccianua cih hae. Nyalang ccyh kya ka ram dou khylan nang kha kae cciakhae cih, tuhteze nynh, pou Gog, minphuin hae malang khe ka thyaanaw kha nang na liate he ka langsakuh te, minphuin hae nynh kae kha yn nyh cih hae. Gog kha Byapianaw
17Bawipaw PACHIA nynh hynhte a ho: Israel hae dou khylan nang kha kae cciakhae cih, cite langmaw lyaze profehbya ho hae paw ka ryalahtu Israel profeh hae kyate bya ka la honuathepaw kha nang na thua khyh tou?18Bawipaw PACHIA nynh a hopaw tuh: Gog nynh Israel ram kha ccianuate he yn tuk nin khe, myaryamaw ka thinria cih.19Ka thinrianaw tuh maee lang ruate bya ka ho: Tuin nin khe Israel ram kya innry thawte asuekuh cih;20rili kya-e ngasaw hae, vaawlang e pavaw hae, ramkaw e sarangpaw hae, lae vawlan avawpaw balyn te laephi vawlan e ccungccaw hae balyn tuh ka malang a thyngkuh cih hae, mua hae tuh a ting cih hae, theihpang hae tuh a khuliakuh cih hae zah khualungrua miakaw tuh a ting cih hae.21Ka mua hae balyn vawlan khe Gog kha rawsete thaloi kha ka konua cih; ccungccaw hae tuh lu kheit te lu kheit thaloi te a baekuh cih hae, cite Bawipaw PACHIA hynh a ho.22Shethya te chiise luanaw khate Gog kha bya ka pia cih; amaw, a rhawkaw hae te amaw kya umbua hae paw ccungccaw patae tungvaw khe thawte arahpaw khuaa, hya, maee te kemaee kha ka ccawsah cih.23Tuhcite ka lesaenaw te ka thyaanaw kha ka langsakuh cih zah minphuin patae malang khe kamaw kha ka nysakuh cih hae. Tetuh kae tuh Bawipaw ka thuapaw kha a nyh cih hae. Gog Rhawkaw hae Ronaw
1Ccungccapaw, Gog kha rawsete profehbya hotua, Bawipaw PACHIA nynh hynhte a ho: Meshek te Tubal hae uktu bawi Gog, nang kha kae dou!2Nang kha kae maeleih cih zah kae dee cih, thahlang asaw huanaw kyate kae cciakhae cih zah Israel mua hae kalan khe kae cciakhae cih.3Na ranglang kuih kya-e na li kha ka khya cih zah, na voilang kuih kya-e na the kha ka ccawsah cih.4Namaw, na rhawkaw hae balyn te na umkheih oh paw ccungccaw hae tuh Israel mua hae vawlan khe na chih cih oh; nang kha saw aepaw pavaw aphuinphuin te loramsaw hae kalan khe looh lang kae pya cih.5Ramkaw huataw kya na chih cih; pawccecize kae nynh phe ka ho vae, cite Bawipaw PACHIA nynh a ci.6Magog ram te ngaengante um hae paw rili kin e ram hae kha maee ka sawnua cih hae; tetuh minmin nynh kae tuh Bawipaw ka thuapaw kha a nyh cih hae.
7Athyaapaw ka min kha ka ccungccaw Israel hae kya ka nysah cih hae; athyaapaw ka min kha thethyasah lan ka ua vae lan khyh; te Israel hae kyakhe kae tuh Bawipaw, Athyaapaw Pachia ka thuapaw kha minphuin hae nynh a nyh cih hae.8Tuh-e tuh a thua vae! Tuh-e tuh acyihkuh vae, cite Bawipaw PACHIA nynh a ci. E nin hynh ka ho vae paw nin nynh thua.
9Te Israel khua hae kya um hae paw tuh a pou cih hae zah rhawtuknawpaw zunghe hae—khawriaphua dihpaw te khawriaphua lepaw, the te li, ccong te ccoi hae kha kum sari lungkhu maee te a soi cih hae.10Minmin nynh loo kya-e maeething kha lawku ho lan khyh, ramkaw e thingku kha mah nge ho lan khyh, pawccecize zunghe hae kha maeetua nawlan a mang cih hae; minmin a la luadetu hae kha a luaderu cih hae zah, mih uccaw a ccuekhaetu hae kha a ccuekhaepah ru cih hae, cite Bawipaw PACHIA nynh a ci. Gog Rhua Uunaw
11Tuin nin khe Gog kha Israel ram, rili nithua lang Khuaccongtu hae Accya kyakhe uukunaw hmin ka pya cih; tuh-e hmin nynh khuaccong hae paw ccianaw kha a khaw cih, pawccecize tuin kyakhe Gog te a ccungccaw hae balyn kha uu athua hae; tuh-e hmin tuh Hamon-gog Accya cite minphu athua cih.12Ram kha thyaasah khylan Israel hae nynh michi rhua kha sawpaw sah sari lungkhu a uh cih hae.13Ramccungccaw balyn nynh minmin kha a uh cih hae; tuh-e ryalaw nynh minmin kha ka phu-enaw ka langsaku nin khe sawtuanaw a ccousah cih hae, cite Bawipaw PACHIA nynh a ci.14Ram kha athyaa ccaw cite, ram lungkhu kya po cciate a uu loh lei hae paw rhaw hae rhua miakaw kha uu khylan pise hae kha taekhiate a nung cih hae; tuh-e hae nynh sawpaw sah sari lungkhu a ccung cih hae.15Ccungtu hae nynh ram lungkhu po a ccia lya hae khe, lukhakheit nynh ccungccaw ru kha a muih lanze, tuh-e ru tuh rhua uhtu hae nynh Hamon-gog Accya kya a uu mawlaezung hae, tuh-e ru a muihtu nynh tuh-e ru pe khe syntawnaw a rae cih.16(Hamonah khuapi mah tuin kya a umbua.) Tuhcite ram kha a thyaasah cih hae.
17Bawipaw PACHIA nynh hynhte a ho: Ccungccapaw, pavaw phuin miakaw te loramsaw balyn kalan khe hopah hae: Sueluakuh oh lah rang oh, Israel mua vawlan nanning elang ka paccynpaw silawnaw poi pi kalan khe teitei langte balyn yn sueluakuh oh lah, asaw te achii kha na ae na neih cih oh.18Athungpaw ccungccaw hae saw kha na ae cih oh zah laephi uktu bawi hae chii kha na neih cih oh—Bashan ram e athopaw tuutepaw hae, tuutaw hae, miaatepaw hae te tangnuapaw hae saw te chii kha na ae na neih cih oh.19Nanning elang ka paccynpaw silawnaw poi kyakhe na byn makhia oh atho kha na ae cih oh zah, na rui makhia oh achii kha na neih cih oh.20Te marang hae, marang rhawkaw hae, rhawkaw hae te rhawkaw aphuinphuin hae kha ka ccaboi kya phe byn lan na ae cih oh, cite Bawipaw PACHIA nynh a ci. Israel Kithuinaw
21Ka phu-enaw kha minphuin hae laku kya ka langsakuh cih; ka raepaw ka byapianaw te mih tungvaw ka khangpaw ka kuih kha minphuin balyn nynh a muih cih hae.22Tuin nin te tho zah malang vae tuh, Israel hae nynh kae tuh Bawipaw mih Pachia ka thuapaw kha a nyh vae cih hae.23Israel hae tuh ka tungvaw mih lungzi khyh keiccuze mih hoyleinaw hanlan kyngte ramccang lang cciakhae athua hae paw kha minphuin hae nynh a nyh cih hae. Tukeiccuze ka mae ka retawku hae, mih rhaw hae kuih kalan ka pya hae zah, thaloi te marya a chih hae.24Mih nungsikunaw te mih seinaw thyhte mih tungvaw rya ka lah zah, ka mae kha ka retawku hae.
25Tukeiccuze Bawipaw PACHIA nynh hynhte a ho: Atu tuh Jakob kha hoynaw ka pyathui cih zah, Israel hae balyn tungvaw thawccinaw ka hoi cih; athyaapaw ka min kha ka thungkhaw cih.26Humhung nynh mah rinaw pya leite mih ram kya ngaengante he a um hae te thuasah, minphuin ccangpaw hae kyate minmin kha kikhaete mih rhaw hae ram kyate ka suelua hae zah, minphuin patae muihnaw khe ka thyaanaw kha minmin liate he ka langsakuh te thuasah, mih maethyanaw te ka tungvaw mih lungzi leinaw balyn kha a ning cih hae.28Minmin kha minphuin hae laku kya see lang tang khylan ka saw hae zah, tukoute mimaw ram lungkhu lang ka suelua hae keiccuze kae tuh Bawipaw mih Pachia ka thuapaw kha a nyh cih hae. Minmin kha lu kheit sanmah nulang ka nungsya lan khyh hae;29Israel hae tungvaw ka muisaw kha he ka bu te, minmin kha papinmaw ka mae ka retawkuh vae lan khyh hae, cite Bawipaw PACHIA nynh a ci.
Beikinn Kong Vizin
1See lang kae tangnaw kum kuin lae pangawnaw, masaty sawpaw nin haw nin, Jerusalem khuapi a lawnaw hae te kum haw lae pali accing nin ccaccei khe, Bawipaw kuih tuh ka tungvaw yn um zah, tuh-e khuapi kalan khe yn cciakhae.2Pachia kya-e vizin kyakhe aning nynh kae kha Israel ram lang yn cciakhae zah, myarya hangpaw mua vawlan khe yn nung, tuh-e mua vawlan alia langkhe khuapi te alokuhpaw inn hae a um hae.3Tuh-e khuapi kalan khe he yn cciakhae tuh, sohin hawte a muinsan phaephae akpaw ccungccapaw lu kheit a um, a kuih kyakhe laawrui te tounawpaw ccungngue ccyngkuh zah koikua kya phang a thadyn.4Tuh-e paw nynh kae kha, “Ccungccapaw, hoyte do lah, pekite ngaetua, kae muihsah cih paw balyn kyakhe na thinlung kha nungtua, pawccecize tuh-e tuh nang kha muihsah khylan nynh hynhlang kae cciakhae; na muihpaw balyn kha Israel hae kya na ho cih,” yn cipya.
5Beikinn atolang khe po voilu lan lungrua a um. Ccungccapaw kuih kya umpaw tounawpaw ccungngue tuh dong taruh asae, tuh-e dong tuh asaepaw phuin thua zah, tuh-e dong kheit tuh dong kheit te zong kheit asae; aning nynh a toupaw lungrua tuh ccungngue ccangkheit thaaw zah ccungngue ccangkheit ahang.6Te nithua lang hawipaw sakoih kalan khe cceih zah, a nawkui kyate a kae koute teenaw sakoihzung kha tou zah, ccungngue ccangkheit acih.7Akhaan hae um zah, khaan kheit ze tounawpaw ccungngue ccangkheit cci ko zah asae; akhaan hae laku kya tuh dong pangaw cci asawkuh; teenaw sakoihzung te alungkhu lang umpaw tee takawnaw akhaan tuh tounawpaw ccungngue ccangkheit asae.8Te aning nynh sakoih tee takawnaw akhaan alungkhu lang kha tou zah dong kheit acih.9Sakoih tee takawnaw akhaan kha tou zah dong tarya acih; a tung hae tuh dong ning cci ahang hae; thuakaw tee takawnaw akhaan tuh thuakaw alungkhu lang nynh a um.10Nithua lang e sakoih voikheih langkhe akhaan khaan thum um zah akopaw phe lokuh hae; voikheit langsang e tung hae mah ahangpaw phe lokuh hae.11Te aning nynh teenaw sakoih kha tou zah dong haw acih; sakoih akopaw kha tou zah dong haw lae thum acih.12Tuh-e akhaan hae malang khe voikheit langkhe pang anepaw dong kheit cih paw a um; akhaan akopaw te asaepaw tuh dong taruh cci acih.13Oute akhaan khaan kheit nulang e pang te ccangpaw khaan kheit nulang e pang kha tou zah akopaw dong kuin lae pangaw acih.14Tee takawnaw akhaan kha mah tou zah dong kuin acih; te voidu po voilu lan umpaw tung hae koute sakoih a um.15Teenaw kya a umpaw sakoih malang kyate alungkhu lang e tee takawnaw akhaan tuh dong sung pangaw asawkuh.16Akhaan hae te sakoih alungkhu langte po voilu lan umpaw mih tung hae kyakhe thanlan-aw hae a um hae, tee takawnaw akhaan hae mah alungkhu langte po voilu lan thanlan-aw hae a um; tung hae kyakhe ungcci ku azuh kha a soi hae.
17Te aning nynh kae kha atolang e voidu lungkhu langkhe yn cciakhae; tuin kya akhaan hae a um hae, voidu po voilu lan lung phaekuhpaw a um; tuh-e lung phaekuhpaw vawlan khe akhaan sung thum a um.18Tuh-e lung phaekuhpaw tuh sakoih po a um thyhte po a um; tuh-e tuh ane huapaw lung phaekuhpaw nynh thua.19Te aning nynh ane huapaw sakoih alungkhu langte alungkhu lang e voidu atolang amalang kha tou zah dong za kheit asawkuh.
20Te aning nynh thahlang hawipaw atolang e voidu sakoih ahangpaw te akopaw kha a tou.21Akhaan hae tuh voikheit langte khaan thum cci um hae zah, tung hae, tee takawnaw akhaan hae tuh masaty e sakoih kya-e hae te phe lokuh hae; ahangpaw dong sung pangaw cih zah akopaw dong kuin lae pangaw acih.22A thanlan-aw hae, tee takawnaw akhaan hae, a ungcci ku hae tuh nithua lang hawipaw sakoih kya-e hae te alokuh hae. Tuh-e sakoih kalan kaenaw tuh nawkui thyh sari um zah, tee takawnaw akhaan tuh alungkhu langkhe nynh a um.23Nithua lang hawte, niccaw lang e sakoih te arawsekunaw khe alungkhu lang e voidu kalan teenawpaw sakoih ccangkheit a um; aning nynh sakoih te sakoih laku kha tou zah dong za kheit acih.
24Te aning nynh alia langkhe yn cciakhae zah, alia lang tuin sakoih ccangkheit a um; aning nynh tung hae te tee takawnaw khaan hae kha tou zah, tuh-e hae tuh ccangpaw hae te adi-ale phe lokuh hae.25Tuh-e sakoih po voilu lan thuasah, tee takawnaw akhaan kya thuasah ccangpaw hae hawte thanlan-aw hae um zah, asaepaw dong sung pangaw, akopaw dong kuin lae pangaw acih.26Tuh-e kalan kaenaw tuh nawkui thyh sari um zah, tee takawnaw khaan tuh alungkhu langte nynh a um. Tung voikheit voikheit langkhe ungcci ku azuh kha a soi hae.27Alungkhu lang e voidu alia langkhe sakoih ccangkheit a um; sakoih ccangkheit te ccangkheit kha alia langkhe po toubung zah dong za kheit acih.
28Alia lang e sakoih kyate alungkhu lang e voidu kalan khe yn teekhae zah, alia lang e sakoih kha a tou; tuh-e tuh ccangpaw hae te ako aby phe lokuh.29A khaan hae, a tung hae te tee takawnaw akhaan hae tuh ccangpaw hae te adi-ale phe lokuh; te tuh-e sakoih po voilu lan thuasah, tee takawnaw akhaan kya thuasah thanlan-aw hae a um; tuh-e tuh dong sung pangaw sae zah dong kuin lae pangaw ako.30Dong kuin lae pangaw sae zah dong pangaw akopaw tee takawnaw akhaan hae tuh po voilu lan a um hae.31Tee takawnaw akhaan tuh atolang e voidu kalan hawi zah, a tung hae vawlan khe ungcci ku zuh asoikuh, te nawkui tuh thyh tarya acih.
32Te nithua lang umpaw alungkhu lang e voidu kalan khe yn cciakhae, sakoih kha tou zah ccangpaw hae te adi-ale phe lokuh.33A khaan hae, a tung hae te tee takawnaw akhaan hae tuh ccangpaw hae te adi-ale phe lokuh; te tuh-e sakoih po voilu lan thuasah, tee takawnaw akhaan kya thuasah thanlan-aw hae a um; tuh-e tuh dong sung pangaw sae zah dong kuin lae pangaw ako.34Tee takawnaw akhaan tuh atolang e voidu kalan hawi zah, voikheit voikheit langte a tung hae vawlan khe ungcci ku zuh asoikuh, te nawkui tuh thyh tarya acih.
35Te thahlang e sakoih kalan khe yn cciakhae, te tuh-e sakoih tuh tou zah ccangpaw hae te adi-ale phe lokuh.36A khaan hae, a tung hae te tee takawnaw akhaan hae tuh ccangpaw hae te adi-ale phe lokuh zah, po voilu lan thanlan-aw hae a um; tuh-e tuh dong sung pangaw sae zah dong kuin lae pangaw ako.37Tee takawnaw akhaan tuh atolang e voidu kalan hawi zah, voikheit voikheit langte a tung hae vawlan khe ungcci ku zuh asoikuh, te nawkui tuh thyh tarya acih.
38Sakoih tee takawnaw akhaan kyakhe akhaan khaan kheit um zah, tuin kyakhe maee-ute silawnawpaw kha a sing hae.39Te sakoih tee takawnaw akhaan voikheit voikheit langkhe ccaboi ccangning um zah, tuh-e hae vawlan khe maee-ute silawnawpaw, seithyaanaw silawnawpaw te cyiseinaw silawnawpaw kha chia athua hae.40Thahlang sakoih teenaw kya umpaw tee takawnaw akhaan atolang khe ccaboi ccangning a um; sakoih tee takawnaw akhaan voikheit lang raw khe ccaboi ccangning a um.41Sakoih atolang te ccaboi ccangpali, alungkhu langte ccaboi ccangpali, abalyn ccangtarya um zah, tuh-e hae vawlan khe silawnawpaw hae kha chia athua.42Maee-ute silawnaw lanpaw a-awkuhpaw lungphe ccaboi ccangpali a um, tuh-e hae tuh asaepaw dong kheit lae angankuh, akopaw dong kheit lae angankuh, ahangpaw dong kheit acih hae, tuh-e hae vawlan khe maee-ute silawnaw te silawnaw hanlan mangpaw uccaw hae kha a nung hae.43Ccaboi rae vawlan khe zapae akopaw khate po voilu lan a heede hae. Te tuh-e ccaboi hae vawlan khe silawnawpaw saw kha a nung hae.
44Alungkhu lang e sakoih atolang kya alungkhu lang e voidu kyakhe hlawsahthya hae paw elang akhaan hae a um, khaan kheit tuh thahlang e sakoih pe khe um zah alia lang a hawi, khaan kheit tuh nithua lang e sakoih pe khe um zah thahlang a hawi.45“Alia lang a hawipaw hynh-e akhaan tuh beikinn kya ryalahpaw ranpibawi elang thua zah,46thahlang a hawipaw akhaan tuh silawhang kya ryalahpaw ranpibawi elang nynh thua; e ranpibawi hae tuh Bawipaw kha ryalawpya khylan a kalan a naekuh cih hae paw Levi phin kya-e Zadok ciihan hae kyalya kha nynh athua hae,” cite yn hopya.47Aning nynh voidu kha tou zah, asaepaw dong za kheit, akopaw dong za kheit, asaepaw te akopaw phe lokuh; silawhang tuh beikinn malang khe a um. Beikinn
48Te beikinn tee takawnaw akhaan kalan khe yn cciakhae, tee takawnaw akhaan kya-e tung hae kha tou zah, dong pangaw cci athaaw; thuakaw tuh dong haw lae pali ko zah, thuakaw voikheit lang tuh dong thum cci athaaw.49Tee takawnaw akhaan tuh dong kuin sae zah, dong haw lae ning ako; nawkui kaenaw tuh thyh haw acih; thuakaw tung hae pe khe voikheit voikheit langte tung hae a um.
1Te inn khaanpi lungkhu lang yn teekhae zah, tung hae kha a tou hae; tung voikheit lang tuh dong taruh cci athaaw.2Teenaw tuh dong haw ako; voikheit lang te voikheit lang a umpaw teenaw tuh dong pangaw cci ako. Hminthyaa tuh tou zah asaepaw dong sung pali, akopaw dong kuin acih.3Te akhaan lungkhu lang a tee, teenaw kya-e tung hae kha tou zah dong ning cci acih; teenaw tuh dong taruh ako; teenaw voikheit lang te voikheit lang umpaw pang hae tuh dong sari cci acih hae.4Hminthyaa athangnaw umpaw akhaan tuh tou zah, asaepaw dong kuin, akopaw dong kuin acih. E hynh hmin thyaa huaccepaw, cite yn hopya.
5Te beikinn pang kha tou zah dong taruh athaaw; beikinn po voilu lan umpaw akhaan hae tuh dong pali cci ako hae.6Tuh-e akhaan hae tuh khaan kheit vawlan khaan kheit cite khang thum lante um hae zah, khang kheit cci kya akhaan taraw sung thum cci a um. Beikinn po voilu lan umpaw pang hae kyakhe akhaan hae kha dounawpaw hae a um, tetuh tuh-e akhaan taraw hae tuh beikinn pang nynh dou ho vae khyh.7Beikinn po voilu lan umpaw akhaan hae tuh khang kheitnaw kyate khang ningnaw kalan, khang ningnaw kyate khang thumnaw kalan a kaeku thyhte, beikinn po voilu lan umpaw akhaan hae tuh houhouh ako hae. Alia khang kyate palung khang lang kha angaelung e laanpi kyate kae athua.8Beikinn po voilu lan kaenawpaw kha mah ka muih; akin lang e akhaan hae athonaw aleihpaw tuh dong taruh asaepaw ccungngue ccangkheit cih ako hae.9Akin lang umpaw akhaan hae atolang e pang tuh dong pangaw athaaw; beikinn akin lang umpaw akhaan hae te10voidu kya-e akhaan hae laku e accawnghannaw hmin tuh beikinn po voilu lan, teitei langte balyn dong kuin ako.11Akin lang e akhaan hae tuh accawnghanpaw hmin kalan khe hungkuh hae zah, thuakaw ccangkheit tuh thahlang khe hawi zah ccangpaw thuakaw ccangkheit tuh alia langkhe a hawi; te accawnghanpaw hmin tuh po voilu lan dong pangaw ako.
12Beikinn voidu kalan hawite niccaw langsang a umpaw inn tuh dong sung sari ako; tuh-e inn pang tuh po voilu lan dong pangaw thaaw zah, dong sung takua asae.
13Te beikinn kha tou zah dong za kheit asae; voidu te koihnawpaw a umbia lante inn tuh dong za kheit acih;14beikinn malang nithua lang te voidu tuh dong za kheit acih.
15Niccaw lang e voidu kalan a hawipaw inn, voikheit voikheit lang umpaw zekaw taraw hae ryte dong za kheit acih.
Beikinn lungkhu e hminthyaa, alungkhu lang e akhaan te atolang e tee takawnaw akhaan tuh thingphe te a ccaan hae,16te tuh-e akhaan ccangthum kya po voilu lan a umpaw abypaw thanlan-aw hae kha thing te po voilu lan a raede hae. Laekhu kyate thanlan-aw kyacia (thanlan-aw hae kha phe bong lante),17thuakaw aluki cia, alungkhu lang e akhaan te atolang cia beikinn kha thing te po voilu lan a ccaan hae. Te alungkhu lang umpaw akhaan te hminthyaa kya-e pang vawlan balyn khe azuh kha a soi hae.18Tuh-e azuh tuh cherubim zuh te ungcci ku hae zuh thua zah, cherubim ccangning laku khe ungcci ku kukheit cci kha po a soi hae. Cherub ccangkheit nynh mitmae ccangning cci a hoi hae:19ccungccaw mae tuh ungcci ku kalan khe hawi zah, chindeih mae tuh ccangpaw ungcci ku kalan khe a hawi. Tuhcite beikinn balyn tuh po voilu lan azuh karynte a soi hae;20laekhu kyate thuakaw luki cia beikinn pang kyakhe cherubim zuh te ungcci ku zuh kha karynte a soi hae.
21Hminthyaa thuakaw tung hae tuh asaepaw te akopaw phe lokuh hae. Hmin thyaapaw malang khe thing te raepaw silawhang alopaw a um,22tuh-e tuh dong thum ahang, dong ning sae zah dong ning ako; apaki, a ccusy te a pang hae tuh thingphe te araekuhpaw nynh thua. “E hynh Bawipaw malang a umpaw ccaboi nynh thua,” cite yn hopya.23Hminthyaa te hmin thyaa huapaw kya tuh thuakaw ccangning cci a um.24Thuakaw hae tuh thuakawphe phe ning cci um zah, thuakaw ccangkheit hanlan kangzae ccangning cci a um.25Beikinn pang kya azuh kha karynte a soi hae hawte, hminthyaa thuakaw hae kyakhe cherubim zuh te ungcci ku azuh hae kha karynte a soi hae; atolang umpaw tee takawnaw akhaan malang khe thing te raepaw dawkupaw a um.26Tee takawnaw khaan pang kyakhe voikheit voikheit langte abypaw thanlan-aw te ungcci ku azuh hae a um. Athyaapaw Akhaan hae te Atolang e Pang
1Te thahlang umpaw atolang e voidu kalan yn cciakhae zah, beikinn voidu te hawiliakuh zah, thahlang e inn te arawsekuhpaw akhaan hae kalan yn cciakhae.2Tuh-e Thahlang umpaw inn tuh dong za kheit sae zah dong sung pangaw ako.3Alungkhu lang voidu kya-e ahmin dong kuin lungkhu khe atolang voidu kya-e lung phaekuhpaw te ahawiliakuh lante innkhaan khaan thum a um.4Tuh-e akhaan hae malang khe alungkhu langte laanpi ccangkheit um zah dong haw ako, dong za kheit sae zah thuakaw hae tuh thahlang khe a um hae.5E inn kya-e palung khaan hae tuh alia khaan te angaelung khaan laeze adihhua hae, pawccecize tuh-e khaan hae tuh nulang asungkuh hua hae.6Pawccecize tuh-e akhaan hae tuh khang thum lante um hae zah, atolang e voidu tung hae hawte tung hoi khyh hae; tukeiccuze palung khaan hae tuh alia khaan te angaelung khaan laeze adihhua.7Tuh-e akhaan hae atolang voikheit voikheit langkhe, atolang e voidu kalan ahawipaw pang tuh dong sung pangaw asae.8Atolang e voidu kya-e akhaan hae tuh dong sung pangaw asae hae, beikinn te a hawiliakuh hae paw akhaan hae tuh dong za kheit asae hae.9E akhaan hae ccusy khe atolang e voidu kyate teethya nawlan, nithua langte teenawpaw laanpi ccangkheit a um.10Tuh-e laanpi akopaw tuh voidu pang te phe ccawkuh.
Alia lang mah, accawnghannaw hmin te ahawiliakuh lante, inn te ahawiliakuh lante akhaan hae um zah,11tuh-e akhaan hae malang khe laanpi ccangkheit a um; tuh-e hae tuh thahlang e akhaan hae te phe lokuh hae, asaepaw te akopaw mah alokuh hae, teenaw, pounaw, accinccang te thuakaw hae mah phe lokuh hae.12Tukeiccuze alia lang umpaw akhaan hae lungkhu langkhe, nithua langte, laanpi athangnaw khe teenaw a um.
13Te aning nynh yn hopah zah, accawnghanpaw hmin kalan ahawipaw thahlang e akhaan hae te alia lang e akhaan hae tuh athyaapaw khaan thua hae zah, tuin kyakhe Bawipaw kalan a naekuhpaw ranpibawi hae nynh athyaa huaccepaw silawnawpaw hae kha a ae cih; tuh-e hmin tuh athyaa keiccuze athyaa huaccepaw silawnawpaw hae—ccathae silawnaw, seithyaanaw silawnaw te cyiseinaw silawnaw kha tuin kya a nung cih hae, pawccecize tuh-e hmin tuh athyaapaw nynh thua.14Ranpibawi hae nynh hmin thyaa lungkhu lang he a tee vae hae ze, tuin kya rya a lawnaw hae paw boeining hae kha khahku leite, tuin kyate atolang e voidu kalan pou lan khyh hae, pawccecize tuh-e boeining hae tuh athyaapaw nynh thua hae; atolang e ccungccaw hae kalan a pou maw hae khe, ccangpaw boeining khate a liakuh cih hae.
15Aning nynh beikinn hmin alungkhu lang kha he a tou koute nithua lang a hawipaw koikua kyate kae kha yn poukhae zah, beikinn hmin kha po voilu lan a tou.16Tounawpaw phaeku khate nithua langsang kha tou zah, tounawpaw phaeku thyhte dong za pangaw acih.17Te aning nynh maekute thahlang sang kha tou zah tounawpaw phaeku te dong za pangaw acih.18Te aning nynh maekute alia langsang kha tou zah, tounawpaw phaeku te dong za pangaw acih.19Te aning nynh maekute niccaw langsang kha tou zah, tounawpaw phaeku te dong za pangaw acih.20Aning nynh san pali mawte a tou. Dong za pangaw sae zah dong za pangaw akopaw pang tuh po voilu lan thungkuh zah, tuh-e tuh athyaapaw hmin te huatawpaw hmin kha phiathya nawlan nynh thua. Pachia Phu-enaw Beikinn kalan Kinaw
1Te nithua lang a hawipaw koikua kalan khe kae kha yn cciakhae.2Israel Pachia phu-enaw tuh nithua langte yn cceih zah, a roi tuh tui alepaw roi te nynh aloku; laephi tuh a phu-enaw khate phaephae a ak.3Ka muihpaw vizin tuh aning nynh khuapi kha ro khylan yn ccia lyaze ka muihpaw vizin te nynh aloku; Kebar vawkhu kin ka muihpaw vizin te lokuh zah, ka mae kha ka tebung.4Bawipaw phu-enaw tuh nithua lang hawipaw koikua kyate beikinn lang a tee lyakhe,5muisaw nynh kae kha yn hangthung zah, alungkhu lang e voidu lungkhu lang yn cciakhae; Bawipaw phu-enaw tuh beikinn kya phe abeih.
6Ccungccapaw tuh ka pe a thadyn lyakhe lukhakheit nynh beikinn kyate bya yn hopyapaw kha ka thae.7Aning nynh kae kha: Ccungccapaw, e hmin tuh ka bawitungkhung a umnaw hmin, ka ccu ka synaw hmin, Israel ccungccaw hae kya zungzae ka um cihnaw hmin nynh thua. Israel hae te mih siapharan hae nynh mih ohhuakunaw khate thuasah, a chi hae ze mih siapharan hae rhua khate thuasah athyaapaw ka min kha thusah vae lan khyh hae.8Mih thuakaw kha ka thuakaw pe nungte mih thuakaw tung kha ka thuakaw tung pe bing hae zah, kae te minmin laku kya pang ccangkheit kyalya he a um tuh, a cyisei hae paw mih nungsikunaw khate ka min thyaapaw kha a thusah hae; tukeiccuze ka thinria zah ka ro hae.9Atu tuh, mih zohtuh beiknaw kha vua hae sah lah, mih siapharan hae rhua kha kae te asawkunaw langkhe vua hae sah, te kae tuh minmin laku kya zungzae ka um cih.
10Ccungccapaw, Israel hae kha beikinn muihsah hae lah, beikinn pungsan kha tou hae sah; te mih hoyleinaw keiccu mih maethah sah.11A cyi hae paw balyn keiccuze mih mae he thah te, beikinn pungsan te beikinn uccaw hae, teenaw te pounaw thuakaw hae, beikinn accinccang balyn, a phungzae balyn te beikinn saknaw paccynnaw miakaw te aphunglang balyn kha na nysah cih hae; beikinn saknaw paccynnaw te a phungzae balyn kha minmin nynh muihthyate a zuithya nawlan hae, mih muihnaw khe na zeipah cih hae.12E hynh beikinn phunglang nynh thua: Beikinn umnaw mua dung balyn tuh po voilu lan athyaa huaccepaw athua cih. E hynh beikinn phunglang nynh thua. Silawhang
13E hae hynh silawhang adi-ale kha dong te toupaw nynh thua (e dong tuh dong kheit zapae acih): Silawhang accusy tuh dong kheit hang zah dong kheit ako, po voilu lan arae tuh khaw kheit ako. E hynh silawhang ahangpaw nynh thua.14Silawhang tuh laekhu umpaw accusy kyate ane huanaw adung tuh dong ning sawkuh zah dong kheit ako; adih huapaw adung te ale huapaw adung tuh dong pali sawkuh zah dong kheit ako;15silawhang tuh dong pali ahang; silawhang ahangnaw kyate aki ki pali tuh asaethung.16Silawhang tuh asaepaw te akopaw alokuh cih, dong haw lae ning asae cih zah dong haw lae ning ako cih, po voilu lan arae tuh khaw ning ako cih.17Adung tuh asaepaw te akopaw alokuh cih, dong haw lae pali asae cih zah, dong haw lae pali ako cih, po voilu lan arae tuh khaw ning ako cih, silawhang po voilu lan accusy tuh dong kheit acih cih. Silawhang kya-e kaenawpaw tuh nithua lang a hawi cih.
18Te aning nynh kae kha yn hopah zah: Ccungccapaw, Bawipaw PACHIA nynh hynhte a ho: E hae hynh silawhang hanlan phungzae hae nynh thua: Maee-ute silawnawpaw kha a vawlan pyanaw hanlan te sachii kha hei khylan silawhang kha he na rae nin khe,19ka rya kha lawpya khylan ka kalan a naekuh hae paw Levi phin ranpibawi Zadok ciihan hae kalan khe seithyaanaw silawnaw hanlan tangnuapaw taraw kha na pya cih hae, cite Bawipaw PACHIA nynh a ci.20Te sachii abang kha na lah cih zah, silawhang a ki kipali, adung lang e apaki ccangpali te po voilu lan arae kha na noi cih; tuhcite silawhang kha na thyaasah cih zah seishawnaw na raepah cih.21Seithyaanaw silawnaw lanpaw tangnuapaw kha na lah cih zah hmin thyaapaw atolang, beikinn voidu lungkhu nungpyapaw hmin kyakhe maee te u athua cih.
22Nin ningnaw khe douccahpaw miaatepaw khate seithyaanaw silawnaw hanlan si na law cih; silawhang kha tangnuapaw te thyaasah athua hawte silawhang kha miaatepaw chii te na thyaasah cih.23Silawhang kha he na thyaasah koute, douccahpaw tangnuapaw taraw te sahiin phu kya-e douccahpaw tuutepaw khate si na law cih.24Khah-e hae kha Bawipaw malang na pya cih, te ranpibawi hae nynh khah-e hae kha loi a phing cih hae zah, maee-ute silawnaw lante Bawipaw kalan a pya cih hae.25Nin sari lungkhu nin takyhte seithyaanaw silawnaw hanlan miaatepaw sa kheit kha na pya cih, sahiin phu kya-e douccah hae paw tangnuapaw taraw sa kheit te tuutepaw sa kheit kha mah na pya cih.26Nin sari lungkhu silawhang hanlan seishawnaw a raepah cih hae zah a thyaasah cih hae, tuhcite silawhang kha thyaasah oh.27Tuh-e nin hae tuh he alia te, nin taryanaw te vae tuh ranpibawi hae nynh silawhang vawlan khe nae kya-e maee-ute silawnaw te ccawkunaw silawnaw hae kha a rae cih hae; te nanning kha kae ccou cih oh, cite Bawipaw PACHIA nynh a ci. Khawpaw Sakoih
1Te aning nynh kae kha beikinnthyaa atolang e sakoih, nithua lang a hawipaw kalan khe yn cciakhae; tuh-e sakoih tuh phe khawkuh.2Bawipaw nynh kae kha yn hopah zah: E sakoih hynh khaw athua cih zah hung thua lan khyh, e kyate lu kheit nynh sanmah tee lan khyh; pawccecize Bawipaw , Israel Pachia tuh tuh-e sakoih kyate a tee vae keiccuze khaw athua cih.3Uktu bawi rou nynh uktu bawi athua keiccuze Bawipaw malang looh ae khylan tuin kya a haung cih; aning tuh sakoih tee takawnaw akhaan kya-e laanpi kyate a tee cih zah tuin kyamawte a pou cih. Beikinn lungkhu lang Teenaw Kaw
4Te thahlang e sakoih kalan cceihpaw laanpi kyate beikinn malang khe aning nynh kae kha yn cciakhae; Bawipaw beikinn tuh Bawipaw phu-enaw te phe abiapaw kha ka muih; te ka mae ka tebung.5Bawipaw nynh kae kha yn hopah zah: Ccungccapaw, hoyte yn do lah, syntawku tua, kae hopah cih paw Bawipaw beikinn a phungzae balyn te a phunglang balyn konglang kha hoyte ngaetua; beikinn lungkhu lang tee lan ua athua cih hae paw te beikinnthyaa lungkhu lang tee lan ua athua cih lei hae paw balyn kha hoyte syntawku tua.6Rhawtho a mangpaw Israel phin kha hopya tua, Bawipaw nynh hynhte a ho: Pou Israel hae, nae nungsikunaw balyn kha zaw ccavae sah,7ka looh, atho te achii kha he nae pya vae oh ze, thinlung kya te ngesaw kya vingdungawkuh lei hae paw ramccang hae kha ka beikinnthyaa kya um lan na ua oh zah, ka beikinn kha na thusah oh, nae nungsikunaw balyn khate ka byakinnaw kha na ro oh.8Ka kya-e athyaapaw silawnaw hae kha na zui khyh oh; ka beikinnthyaa kya ramccang hae kha nae hanlan ryalahtu lang na nung oh.
9Bawipaw PACHIA nynh hynhte a ho: Israel hae laku um hae paw ramccang hae balyn kyaze thinlung kya te ngesaw kya vingdungawkuh leipaw ramccangpaw nynh ka beikinnthyaa lungkhu lang tee lan khyh.10Thuasalama Israel hae nynh he a cceihsei hae te, mih zohtuh hae nulang zuikute ka kyate cceihsei hae zah ka kyate asawkuh hae paw Levi phin hae tuh detahnaw a teing cih hae.11Minmin nynh beikinn sakoih hae kha do-oihte beikinn kya rya a lah cih hae zah, ka beikinnthyaa kya ryalahtu athua cih hae; maee-ute silawnaw te ccungccaw hae nynh silawnaw hae paw kha a theih cih hae, ccungccaw hae hanlan rya a lawpah cih hae.12Minmin nynh ccungccaw hae hanlan mih zohtuh hae malang khe ryalawpah hae zah, Israel hae kha hoyleinaw lungkhu lang a khuliasaku hae, tukeiccuze minmin tuh detahnaw a teing cih hae, cite Bawipaw PACHIA nynh minmin konglangte bya ka kinku a ci.13Ka rya kha lawpya khylan ranpibawi lante ka kalan naekuh lan khyh hae; athyaa huaccepaw uccaw hae, ka kya-e athyaapaw uccaw hae pe lang naekuh lan khyh hae; maethyanaw a ccou cih hae zah a cyi hae paw nungsikunaw hanlan a teing cih hae.14Tuhzemah beikinn do-oih khylan a lungkhu kya ryalaw lanpaw balyn kha law khylan minmin kha ka nung cih hae. Ranpibawi Phin Levi hae
15Israel ccungccaw hae nynh ka kyate a cciasei lya hae ze, ka beikinnthyaa a do-oih hae paw Levi phin, Zadok ciihan ranpibawi hae nynh ka rya kha lawpya khylan ka kalan a naekuh cih hae; kae kha atho te achii pya khylan ka malang a thadyn cih hae, cite Bawipaw PACHIA nynh a ci.16Ka ryalaw khylan te ryalaw ka naw hae paw kha law khylan ka beikinnthyaa lungkhu lang a tee cih hae paw te ka ccaboi kalan a naekuh cih hae paw tuh minmin nynh athua hae.17Alungkhu lang e sakoih hae lungkhu lang he a tee hae ze, laphan laaw te kuakuhpaw boeining kha a lawkuh cih hae; alungkhu lang e voidu sakoih hae kya te alungkhu kya rya a law lya hae khe tuuming boeining kha lawkuh lan khyh hae.18Mih lu kya laphan laaw te kuakuhpaw pungde kha a khungkuh cih hae zah mih tae kya laphan laaw ccuhoih kha a hoihkuh cih hae; vaesaw a pousah thyapaw boeining kha lawkuh lan khyh hae.19Minmin nynh ccungccaw hae a umnaw hae atolang e voidu lungkhu lang he a pou hae te, rya thyaapaw a lawnaw hae paw boeining hae kha a khahkuh cih hae zah, athyaanaw khaan kya a nung cih hae; te ccangpaw boeining kha a lawkuh cih hae, tuhteze nynh athyaapaw kha mih boeining khate ccungccaw hae kalan cciakhaesei lan khyh hae.20Mih sang kha ngokuh lan khyh hae zah, sae mah saesakuh lan khyh hae; azawnaw te a ngokuh cih hae.21Ranpibawi nynh alungkhu lang e voidu lungkhu lang he a tee ze, misutui kha neih lan khyh.22Nomaenung kha thuasah, vawpaw te a mahkuh hae paw nopi kha thuasah zu lang dykuh lan khyh, Israel phin liaccady khyhze ranpibawi nynh a chitawpaw nomaenung kha zu lang a dykuh cih.23Minmin nynh ka ccungccaw hae kha athyaapaw te athyaa leipaw laku alaenaw kha a ccangpah cih hae zah, athyaapaw te athyaa leipaw laku phiathyanaw kha a muihsah cih hae.24Pekumaekunaw a um ze, byapiatu lang a tang cih hae zah, ka phungzae thyhte bya a pae cih hae. Ccyh khyapaw ka poi hae balyn te asekuhpaw ka kawbya hae te ka phunglang hae kha a zui cih hae zah, ka sabbath hae kha thyaararih lan a sung cih hae.25Michi rhua kalan naekute mimaw toulou kha thusakuh lan khyh hae; tuhzemah nung, paaw, ccapaw, ccanung, u te neitaw, vawpaw a hoi leipaw ccianung hanlan kha tuh a thusakuh kho hae.26Mithyaapaw lang a tang koute amaw hanlan nin sari a riapah cih hae.27Hminthyaa lungkhu kya ryalaw khylan alungkhu lang e voidu lungkhu, hminthyaa lungkhu lang a tee nin khe, a seithyaanaw silawnaw kha a rae cih, cite Bawipaw PACHIA nynh a ci.
28E hynh mih rho athua cih: Kae hynh mih rho nynh ka thua; Israel ram kya ccoupaw rho kha minmin na pya lan khyh oh; kae hynh mih ccoupaw rho nynh ka thua.29Minmin nynh ccathae silawnawpaw, seishawnaw silawnawpaw te cyiseinaw silawnawpaw kha a ae cih hae; Israel ram e athyaapaw uccaw miakaw tuh mih kya-e athua cih.30Aphuinphuin kya-e thaety hae balyn kya-e masaty huapaw, na hlu oh paw aphuinphuin balyn kya-e ahlu miakaw tuh ranpibawi hae kya-e athua cih; nae inn kya hythuanaw a um nawlan sanlou lang nonpaw vaekhui kya-e masatypaw vaekhui kha mah ranpibawi kalan na pya cih oh.31Amaw chi lan chihpaw khyhze loramsaw nynh a teipaw pavaw thuasah, sarangpaw thuasah ranpibawi hae nynh ae lan khyh hae. Athyaapaw Loram
1Ram kha rho lang he na neekuh oh te, athyaapaw loram ramkheit kha Bawipaw elang na phiapah cih oh, tuh-e loram tuh dong thong kuin lae pangaw asae cih zah, dong thong kuin ako cih; tuh-e loram pynpi tuh athyaapaw loram athua cih.2E loram lungkhu hin dong za pangaw sae zah dong za pangaw akopaw, asaepaw te akopaw phe lokuhpaw kha beikinnthyaa hanlan athua cih zah, po voilu lan dong sung pangaw accawnghan cih.3Athyaapaw loram lungkhu khe dong thong kuin lae pangaw sae zah dong thong haw akopaw hmin hminkheit kha na tou cih zah, alungkhu khe beikinnthyaa, hmin thyaa huaccepaw a um cih.4Tuh-e loram tuh ram lungkhu ze athyaapaw loram athua cih zah, Bawipaw kha ryalawpya khylan amaw kalan naekuh hae zah, beikinnthyaa kya ryalah hae paw ranpibawi hae hanlan athua cih; tuh-e loram tuh ranpibawi hae inn hanlan te beikinnthyaa elang athyaapaw hmin athua cih.5Dong thong kuin lae pangaw sae zah, dong thong haw akopaw ccangpaw hmin kha beikinn kya ryalah hae paw Levi phin hae mih umnaw lanpaw khua athua cih.
6Athyaapaw loram te po piakuh lante, dong thong pangaw ko zah dong thong kuin lae pangaw asaepaw hmin kha khuapi hanlan na ia cih oh; tuh-e tuh Israel phin balyn kya-e athua cih.
7Athyaapaw loram hanlan te khuapi hanlan ia athuapaw hmin kalansang tuh uktu bawi kya-e athua cih zah, tuh-e ram tuh athyaapaw loram te khuapi hanlan iapaw hmin kalan a hawipaw athua cih, niccaw lang athangnaw ramri cia aphah cih, te nithua langkhe a maeleihkuh cih zah athangnaw ramri cia athua cih.8Tuh-e tuh Israel ram kya aning nynh a hoipaw athua cih. Ka kya-e uktu bawi nynh ka ccungccaw hae kha tuaasah boi vae lan khyh hae; thuasalama Israel phin hae kha mih phin raveih thyhte ram kha na nee cih oh.
9Bawipaw PACHIA nynh hynhte a ho: Pou Israel uktu bawi hae, zaw ccavae sah! Puathonaw te tuaasahkunaw kha vua oh lah, adingpaw te akyhpaw kha cyih oh. Ka ccungccaw hae kha dee nan vae oh, cite Bawipaw PACHIA nynh a ci. Khinlung te Zawccu
10Ahmepaw zawccu te khinlung, ahmepaw ephah te ahmepaw bath kha na mang cih oh.11Ephah te bath tuh tounaw kya phe lokuh cih hae, bath ccangkheit tuh homer pumhaw pumkheit athua cih zah, ephah ccangkheit tuh mah homer pumhaw pumkheit athua cih; homer tuh ccungccaw zapi nynh mang huapaw tounawpaw athua cih.12Shekel ccangkheit tuh gerah kuin lae pangaw te alokuh cih. Shekel sung taruh tuh nanning hanlan mina ccangkheit te alokuh cih. Silawnawpaw hae
13E hynh na rae lan oh paw silawnaw nynh thua: chanvuih thuasah, barli thuasah homer ccangkheit kyaze ephah pum taruh pum kheit,14chitui tuh kor kheit kyaze bath pumhaw pumkheit (kor kheit tuh bath ccanghaw nynh thua);15te Israel hae a umnaw hae kyate tuu za ning umpaw aphu kyate tuu sa kheit athua cih. E hynh minmin hanlan seingaethyanaw raenaw lanpaw ccathae silawnaw, maee-ute silawnaw te ccawkunaw silawnaw hanlan nynh thua hae, cite Bawipaw PACHIA nynh a ci.16E ram kya-e ccungccaw balyn nynh hynh-e silawnawpaw hae hynh Israel uktu bawi kalan a cciakhae cih hae.17Uktu bawi ryalaw tuh beiknaw poi hae, sawpaw sah leihpaw, sabbath hae, Israel phin kya-e accyh khyapaw poi hae kyakhe maee-ute silawnaw, ccathae silawnaw te niapaw silawnaw hae kha a rae cih: Israel phin hanlan seingaethyanaw rae khylan seithyaanaw silawnaw, ccathae silawnaw, maee-ute silawnaw te ccawkunaw silawnaw hae kha a rae cih. Beiknaw Poi hae (Exo 12.1-20; Lev 23.33-43)
18Bawipaw PACHIA nynh hynhte a ho: Masaty sawpaw, nin kheit nin khe douccahpaw tangnuapaw taraw sa kheit kha na lah cih oh zah beikinnthyaa kha na thyaasah cih oh.19Ranpibawi nynh seishawnaw silawnawpaw sachii abang kha a lah cih zah, beikinn thuakaw tung hae, silawhang apaki ki pali te alungkhu lang e voidu sakoih tung hae kha a noi cih.20Cyiseinaw khyhze sawphahkunaw keiccuze a seipaw miakaw hanlan tuh-e sawpaw nin sari nin khe tuhcih maminte na cyipah cih oh; tuhcite beikinn elang seingaethyanaw kha na rae cih oh.
21Masaty sawpaw, nin haw lae pali nin khe kawtaw poi kha na tua cih oh, nin sari lungkhu ransi phing leipaw sanlou kha na ae cih oh.22Tuin nin khe uktu bawi nynh amaw te ram lungkhu e ccungccaw balyn elang seithyaanaw silawnaw hanlan tangnuapaw taraw khate si a law cih.23Poi nin sari lungkhu nin takyhte Bawipaw kalan maee-ute silawnaw lante douccahpaw tangnuapaw taraw sa sari te tuutepaw sa sari khate si a law cih; seithyaanaw silawnaw hanlan miaatepaw sa kheit khate nin takyh si a law cih.24Tangnuapaw sa kheit hanlan ephah ccangkheit, tuutepaw sa kheit hanlan ephah ccangkheit, ephah ccangkheit hanlan chitui hin kheit khate ccathae silawnaw kha aning nynh a rae cih.25Sawpaw sah sarinaw, nin haw lae pangaw nin kyate poi nin sari lungkhu seithyaanaw silawnaw, maee-ute silawnaw te ccathae silawnaw te chitui silawnaw kha uktu bawi nynh tuhcih maminte a rae cih. Phunglang Aphuinphuin
1Bawipaw PACHIA nynh hynhte a ho: Nithua lang a hawipaw alungkhu lang e voidu sakoih tuh ryalaw nin nintaruh lungkhu khaw athua cih; thuasalama sabbath nin te sawpaw sah leihpaw nin kya tuh hung athua cih.2Uktu bawi tuh atolang te tee takawnaw akhaan thuakaw kyakhate a tee cih zah, thuakaw tung pe khe a thadyn cih. Ranpibawi hae nynh uktu bawi kya-e maee-ute silawnaw te ccawkunaw silawnaw kha a rae cih hae, te aning tuh teenaw sakoih kyakhe a bakhung cih. Te aning tuh a pou cih, thuasalama sakoih tuh zete cia khaw thua lan khyh.3Ram lungkhu e ccungccaw hae tuh sabbath nin hae te sawpaw sah leihpaw nin hae kyakhe tuh-e teenaw sakoih kya Bawipaw malang khe a bakhung cih hae.4Uktu bawi nynh sabbath nin kya Bawipaw kalan a raepaw maee-ute silawnaw tuh douccahpaw tuutaw sa taruh te douccahpaw tuutepaw sa kheit athua cih hae;5te ccathae silawnaw tuh tuutepaw sa kheit te vaekhui ephah ccangkheit, tuutaw ryte a ry zeihte a pya cih, te vaekhui ephah ccangkheit cci kyaze chitui hin kheit a umbia cih.6Sawpaw sah leihpaw nin khe abalynte douccah hae paw tangnuapaw taraw sa kheit, tuutaw sa taruh te tuutepaw sa kheit kha a pya cih;7ccathae silawnaw tuh tangnuapaw te vaekhui ephah ccangkheit, tuutaw ryte a ry zeih a pya cih, te vaekhui ephah ccangkheit cci kyaze chitui hin kheit a umbia cih.8Uktu bawi tuh he a tee vae ze, tee takawnaw akhaan thuakaw kyate a tee cih zah, a pou zemah tuin kyate a pou cih.
9Ram lungkhu e ccungccaw hae tuh accyh khyapaw poi kya Bawipaw malang he a ccia vae hae ze, beik khylan thahlang e sakoih kyate a teepaw miakaw nynh alia lang e sakoih kyate a pou cih; te alia lang e sakoih kyate a teepaw miakaw nynh thahlang e sakoih kyate a pou cih: a teenaw hae sakoih laanpi kyate ki leite malang lawbabin lan cciate a pou cih hae.10Minmin a tee hae ze uktu bawi tuh a teebua cih zah, a pou hae ze a poubua cih.
11Beiknaw poi te accyh khyapaw poi kyaze ccathae silawnaw hanlan tangnuapaw taraw sa kheit te vaekhui ephah ccangkheit, tuutepaw sa kheit te vaekhui ephah ccangkheit, tuutaw ryte a pya ry zeihte a pya cih, te vaekhui ephah ccangkheit te chitui hin kheit a umbia cih.12Lungthote silawnaw thuasah, maee-ute silawnaw thuasah, ccawkunaw silawnaw thuasah uktu bawi nynh Bawipaw kalan lungthote silawnaw kha he a rae vae ze, nithua lang hawipaw sakoih kha hungpya athua cih; amaw kya-e maee-ute silawnaw khyhze ccawkunaw silawnaw kha sabbath nin kya a rae hawte a rae cih. Te a pou cih zah, a pou koute sakoih kha khaw athua cih.
13Maee-ute silawnaw hanlan douccahpaw, kum kheit acihpaw tuutaw sa kheit kha nin takyhte awkhua takyh kya Bawipaw kalan a pya cih.14Tuh-e tuutaw ryte ccathae silawnaw hanlan ephah pum taruh pum kheit, vaekhui nonnaw hanlan chitui hin kheit kya-e pum thum pum kheit kha Bawipaw kalan ccathae silawnaw tuh awkhua takyh a rae cih, e hynh zungzae hanlan phungzae nynh thua.15Tuhcite awkhua takyh kya tyty raepaw maee-ute silawnaw tuh tuutaw, ccathae silawnaw te chitui kha pya athua cih.
16Bawipaw PACHIA nynh hynhte a ho: Uktu bawi nynh a rho kha a ccapaw lukhakheit kalan lasung lang a pya ze, tuh-e tuh a ccapaw kya-e athua vae cih zah, rho lang a muepaw nynh thua vae.17Thuasalama a rho kha a ryalahtu lukhakheit kalan lasung lang a pya ze, a lue kum kyacia rou nynh a kya-e lang a tang cih; te tuh-e tuh uktu bawi kalan a kithui cih; a ccaaw hae rou nynh a rho kha a ccou kho hae.18Uktu bawi nynh ccungccaw hae rho hankhakheit kha nangsete lawkude lan khyh; amaw a uccaw lungkhu e kha nynh a ccaaw hae kha rho lang a pya cih hae, tuhteze nynh ka ccungccaw hae tuh mih uccaw kha shung lan khyh hae.
19Te aning nynh kae kha sakoih kalansang umpaw teenaw kyate yn cciakhae zah, thahlang hawipaw, ranpibawi hae kya-e athyaapaw khaan lungkhu langkhe yn teekhae; te tuh-e akhaan hae niccaw lang athangnaw kya umpaw hmin hminkheit kha ka muih.20Aning nynh kae kha, “E hmin tuh ranpibawi hae nynh cyiseinaw silawnaw te seithyaanaw silawnaw kya mangpaw saw kha a thung cihnaw hae hmin te ccathae silawnaw lang pyapaw kha maee te a rua cihnaw hae hmin nynh thua, ccungccaw hae kha thyaasah khylan tuh-e uccaw hae tuh atolang e voidu kalan na poukhae lan khyh oh,” yn cipya.
21Te atolang e voidu kalan yn cciakhae zah, tuh-e voidu apaki ki pali kyakhe yn cciakhae; te tuh-e voidu apaki ccangkheit cci kyakhe voidu adihpaw ccangkheit cci a um,22tuh-e voidu adihpaw hae tuh dong sung pali cci sae hae zah, dong sung thum cci ako hae, asaepaw te akopaw phe lokuh hae.23Tuh-e apaki ki pali hae alungkhu langte po voilu lan lung te raepaw pang ccarou um zah, tuh-e pang hae ccusy khe po voilu lan takua hae a um.24Te aning nynh kae kha, “E hmin hae hynh ccungccaw hae kya-e silawnawpaw hae kha beikinn kya ryalahtu hae nynh a thungnaw hae anghyngnaw hmin nynh athua hae,” yn cipya. Beikinn kyate Aluapaw Tui
1Te aning nynh kae kha beikinn thuakaw kalan khe yn kikhae; tuin kyakhe beikinn thuakaw zakaw kyate tui tuh nithua langkhe alua (pawccecize beikinn tuh nithua langkhe a hawi); beikinn thuakaw alia lang athangnaw akawlan, silawhang alia lang kyate tui tuh aluabung.2Te thahlang sakoih laanpi kyate kae kha yn poukhae zah, nithua lang hawipaw atolang umpaw sakoih atolang khe yn voilukhae zah yn cciakhae; te alia langsang khe tui tuh pou zah alua.
3Ccungccapaw tuh a kuih kya arui ccyngkute nithua lang cceih zah, dong thong kheit a tou koute kae kha tui tuh po yn kesah, tuh-e tui tuh ka ccumali kyacia akhu.4Dong thong kheit bua tou zah, tui kha bua yn kesah, tuh-e tui tuh ka ccukharu cia akhu. Dong thong kheit bua tou zah, tui kha bua yn kesah; tuh-e tui tuh ka cce kyacia akhu.5Dong thong kheit bua tou zah, khuraw lang ka zua kho leipaw vawpi nynh thua vae, pawccecize tui tuh akhu vae; tuh-e tui tuh zua kho um leipaw vawpi, ohku khinpaw nynh thua vae.6Aning nynh kae kha, “Ccungccapaw, e hynh na muih vae khaw?” yn cipya.
Te aning nynh vaw kin dykyhte po yn kikhae.7Ka ki lyakhe vaw kin dykyh kya thingku lepaw patae kha sirawkhuraw po ka muih.8Aning nynh kae kha, “E tui hynh nithua lang lua zah Arabah lang aluabung; te rili kya he apyakuh te, a-yhkuhpaw rili tuh tui thawpaw lang a tang cih.9E tui aluanaw miakaw kyakhe ahiinpaw ahysuepaw miakaw tuh ahiin cih, e tui nynh aluanaw kya tuh ngasaw patae a um cih. Tuh-e tui tuh tui thawpaw lang a tang cih zah, vaw nynh aluanaw kya tuh atyn-are ahiin cih.10En-gedi kyate En-eglaim kyacia rili kin khe ccungccaw hae tuh thadynte ngasaw a baw cih hae; tuin kya tuh paih a rawnaw hae hmin athua cih; tuin kya-e ngasaw aphuinphuin tuh Rili Lepaw kya-e ngasaw hae hawte myarya alung cih hae.11Thuasalama kuatui te tuinoh kya-e tui tuh tui thawpaw lang tang lan khyh; tuhcihmawte loi lang a um cih hae.12Vawpi sirawkhuraw te akin khe thingku phuinccing tuh looh lang apo cih. Tuh-e thing anaw hae tuh naan lan khyh zah athae hae tuh thuh lan khyh, sawpaw sah takyhte thae hoypaw kha athae cih hae, pawccecize tuh-e hae elang beikinnthyaa kyate aluapaw tui nynh thua. Tuh-e thingthae hae tuh looh lang a tang cih hae zah, thingnaw hae tuh dannaw lang a tang cih hae,” yn cipya. Ramri Thawpaw
13Bawipaw PACHIA nynh hynhte a ho: E hynh Israel phin phinhaw lae ning nynh ram kha rho lang na neeku nawlan oh paw ramri hae nynh thua. Josef nynh loram ram ning a ccou cih.14Ram hynh phe ngankuh lante na neekuh cih oh; e ram hynh nae minpaaw hae kha pya lan bya ka kinpyaku vae hae, te e ram hynh nae rho lang a tang cih.
15E hynh ram a ramri athua cih: Thahlang tuh Rili Lepaw kyate Hethlon laanpi pe, Lebo-hamath te Zedah kyacia,16Berothah, Sibraim (e hynh Damaskas ramri te Hamath ramri laku a umpaw nynh thua), Hauran ramri pe umpaw Hazer-hattikon kyacia athua cih.17Tukeiccuze ramri tuh rili kyate Damaskas ramri thahlang umpaw Hazar-enon, te thahlang tuh Hamath ramri cia athua cih. E hynh thahlang sang nynh thua.
18Nithua lang ramri tuh, Hauran te Damaskas laku athua cih; Gilead te Israel loram laku Jordan vaw thyhte athua cih; nithua lang e rili te Tamar kyacia athua cih. E hynh nithua langsang ramri athua cih.
19Alia lang ramri tuh, Tamar kyate Meribath-kadesh tui kyacia athua cih, tuin kyate Izip Accya dykyh thyhte Rili Lepaw kyacia athua cih. E hynh alia langsang ramri athua cih.
20Niccaw lang ramri tuh, Rili Lepaw athua cih zah, Lebo-hamath te arawsekunaw cia athua cih. E hynh niccaw langsang ramri athua cih.
21Tuhcite e ram hynh Israel phin hae nynh ccarou na neekuh cih oh.22E ram hynh naemaw te nae kya umbua hae zah ccaaw a saah vae hae paw ramccang hae kha rho lang na neekuh cih oh. Minmin tuh Israel ramccungccaw hawte athua cih hae; minmin tuh Israel minphuin hae kya rho kha neebua athua cih hae.23Ramccang hae tuh a umbuanaw hae phin miakaw kya mih rho kha na neebua cih oh, cite Bawipaw PACHIA nynh a ci. Ram Neekunaw
1E hae hynh Israel phin hae min nynh thua: Thahlang ramri tuh Hethlon laanpi, Lebo-hamath kyate Hazar-enon kyacia (tuh-e tuh Damaskas ramri, thahlang Hamath kyacia), nithua langte niccaw lang cia tuh Dan loram athua cih.2Dan ramri te kyngkuh zah, nithua langte niccaw lang cia, Asher loram athua cih.3Asher ramri te kyngkuh zah, nithua langte niccaw lang cia, Naftali loram athua cih.4Naftali ramri te kyngkuh zah, nithua langte niccaw lang cia, Manasseh loram athua cih.5Manasseh ramri te kyngkuh zah, nithua langte niccaw lang cia, Efraim loram athua cih.6Efraim ramri te kyngkuh zah, nithua langte niccaw lang cia, Reuben loram athua cih.7Reuben ramri te kyngkuh zah nithua langte niccaw lang cia, Judah loram athua cih.
8Judah ramri te kyngkuh zah nithua langte niccaw lang cia, taekhiate na nung oh paw loram athua cih, tuh-e loram akopaw tuh dong thong kuin lae pangaw athua cih zah, asaepaw tuh nithua langte niccaw lang cia, Israel phin hae kya-e loram hae te alokuh cih, tuh-e loram angaelung khe beikinnthyaa a um cih.9Bawipaw elang taekhiate na nung cih oh paw loram tuh dong thong kuin lae pangaw asae cih zah dong thong kuin ako cih.10E hae hynh athyaapaw loram lante neekupaw athua cih zah: ranpibawi hae hanlan tuh thahlang khe dong thong kuin lae pangaw, niccaw langkhe dong thong haw ako cih, nithua langkhe dong thong haw ako cih zah alia langkhe dong thong kuin lae pangaw asae cih, tuh-e loram angaelung khe Bawipaw beikinnthyaa a um cih.11E athyaapaw loram hynh Israel hae nynh a cciasei lya hae ze, Levi phin hae nynh cciasei leite ka rya a lah hae paw Zadok ciihan, thyaasah athua hae paw ranpibawi hae hanlan athua cih.12Tuh-e loram tuh loram kyaze hmin thyaa huaccepaw thua zah, Zadok ciihan hae hanlan taekhiate a nung hae paw loram athua cih zah, Levi phin hae ramri te akyngkuh cih.13Ranpibawi hae kya-e loram te akyngkuhpaw Levi phin hae loram tuh dong thong kuin lae pangaw sae zah dong thong haw ako cih. Asaepaw abalynte dong thong kuin lae pangaw athua cih zah, dong thong kuin ako cih.14Tuh-e laephi tuh zua lan khyh hae, hankhakheit te mah rulae lan khyh hae; ram kyaze ahoy huaccepaw e laephi tuh lukhakheit min lante paleih lan khyh hae, pawccecize Bawipaw elang athyaapaw loram nynh thua.
15A laehypaw loram, dong thong pangaw ko zah dong thong kuin lae pangaw asaepaw tuh khuapi hanlan mang lanpaw huatawpaw laephi athua cih zah, zapi umnaw hanlan te khuapi rae nawlan athua cih. Tuh-e loram angaelung khe khuapi a um cih;16khuapi ako-aby tuh: thahlang tuh dong thong pali za pangaw, alia lang tuh dong thong pali za pangaw, nithua lang tuh dong thong pali za pangaw, niccaw lang tuh dong thong pali za pangaw athua cih.17Khuapi tuh zapi hanlan laephi a hoi cih zah: thahlang tuh dong za ning sung pangaw, alia lang tuh dong za ning sung pangaw, nithua lang tuh dong za ning sung pangaw, niccaw lang tuh dong za ning sung pangaw athua cih.18Athyaapaw laephi te akyngkuh lante po saepaw laephi tuh nithua lang dong thong haw, niccaw lang dong thong haw athua cih zah, athyaapaw laephi te po akyngkuh cih. Tuin kyate apoupaw ccathae tuh khuapi kya-e ryalahtu hae elang looh athua cih.19Khuapi kya-e ryalahtu hae, Israel phin hae balyn nynh tuh-e laephi kya looh a ccou cih hae.20Akopaw te asaepaw phe lokuh lante dong thong kuin lae pangaw acihpaw, taekhiate na nung cih paw laephi balyn tuh khuapi laephi ryte athyaapaw laephi athua cih hae.
21Athyaapaw laephi kalansang te alaepaw laephi te khuapi laephi kalansang te alaepaw laephi tuh uktu bawi laephi athua cih. Athyaapaw laephi kyate nithua lang ramri kyacia dong thong kuin lae pangaw, niccaw lang tuh niccaw lang ramri kyacia dong thong kuin lae pangaw, Israel phin hae kya-e laephi hae te ngingrarih lan a umpaw laephi tuh uktu bawi laephi athua cih. Athyaapaw laephi tuh angaelung umpaw beikinn kya-e beikinnthyaa ryte,22te Levi phin hae laephi te khuapi kya-e laephi tuh uktu bawi kya-e laephi angaelung khe a um cih. Uktu bawi laephi tuh Judah ram te Benjamin ram laku khe a um cih.
23Tuhlaepaw Israel phin hae tuh: nithua langte niccaw lang cia Benjamin loram athua cih.24Benjamin ramri te kyngkuh zah, nithua langte niccaw lang cia, Simeon loram athua cih.25Simeon ramri te kyngkuh zah, nithua langte niccaw lang cia, Issakhar loram athua cih.26Issakhar ramri te kyngkuh zah, nithua langte niccaw lang cia Zebulun loram athua cih.27Zebulun ramri te kyngkuh zah, nithua langte niccaw lang cia Gad loram athua cih.28Gad loram alia lang ramri tuh Tamar kyate Meribath-kadesh tui kyacia, tuin kyate Izip Accya dykyh thyhte Rili Lepaw kyacia phe a thua.29E ram tuh Israel phin hae kha rho lang na nee lan hae paw ram thua zah, e hae hynh mih loram nynh thua hae, cite Bawipaw PACHIA nynh a ci.
30E hae tuh khuapi kya-e pounaw nynh thua hae: Thahlang sang tuh dong thong pali za pangaw ko zah,31Reuben koikua, Judah koikua te Levi koikua cite koikua ccangthum a um cih, Israel phin hae min thyhte khuapi koikua hae min kha bing athua.32Nithua langsang tuh dong thong pali za pangaw ko zah, Josef koikua, Benjamin koikua te Dan koikua cite koikua ccangthum a um cih.33Alia langsang tuh dong thong pali za pangaw ko zah, Simeon koikua, Issakhar koikua te Zebulun koikua cite koikua ccangthum a um cih.34Niccaw langsang tuh dong thong pali za pangaw ko zah, Gad koikua, Asher koikua te Naftali koikua cite koikua ccangthum a um cih.35Khuapi tuh po voilu lante dong thong haw lae tarya acih cih. Tuh-e ccyh kyate khuapi min tuh Tuin kya Bawipaw a um, ci athua vae cih.

Bible Society of Myanmar

https://app.library.bible/content/1a340f5ae072b2f4

expand_more
chevron_leftPrevious Chapter
chevron_rightNext Chapter