阅读Ariñawagúni 23

Ariñawagúni23

-6-

¹Dan hagunbirahanibu gürigia wéirigutiña eiga, saminabá buidu ka lan igibugiñeñadibu.²Íbini weiri lan bilama, hámarula beigin.³Mawamadirabéi lubuidun heigin, ladüga gayaraati heyeeduñadibu lan.

-7-

⁴Máfaaguaba lun barisidun, madiheridabá luagu lira.⁵Anhein bariha katei buidu, barihubei luagu ua lan irisini, áhamahati sódini kei ágila kamá hamuga saliguarügüti arünaü luagu.

-8-

⁶Mañuurabá eiga hama arügüretiña, mawamadirunbéime lubuidun heigin,⁷ha ítarabaña kei aban ídiburi lidan agülerugu: Agunbiraha hamutibu lun beigin luma lun batun hama, gama lumoun mama lau linarün hagunbirahabu;⁸bewerahabéi le béigibei, úaalime hu lan lubuidun burí bererun bun.

-9-

⁹Maganbagüdabéi bererun houn ha ibidiouguabaña aau, hadügüba bula lau lichú lau badimurehan.

-10-

¹⁰Masansirabéi binadu fadaguaü, manügünbeime hafulasun méteñuhaña,¹¹ladüga anihein aban esefuhati gabafuti hámagiñe, lageindaguba buma haweigiñe.

-11-

¹²Rubei bisaminan luma barigei lun arufudahani luma subudi.

-12-

¹³Merederalá bererehan lun irahü, máfarun lubéi abeichúni hilagubei;¹⁴lubaragiñe lira, anhein babeicha, besefurubei luéi óunweni.

-13-

¹⁵Ragǘ baali ligíame lichú aau, niráü, úabei ni aban gúndaati nuéi;¹⁶nasandiruba aban óunwenbu ugundani danme naganbun badimurehan kei lubudubu.

-14-

¹⁷Magimugarabaña gafigountiña, lubaragiñe lira, ruba inebesei lun Bungiu;¹⁸ítara luba buidu lan lidin bun, ani meferidirunbei bemenigin.

-15-

¹⁹Gaganbadibá niráü, furendeibá; áfaaguaba bafalaruni üma le buídubei.²⁰Móundaraguaba hama gátaditiña, ni hama wéinamu teigin,²¹ladüga gátaditiña hama wéinamu teigin, lidan günringuaü hagumucha; ha magúalibaña huchecheeru hadaüragunboun.

-16-

²²Aganbabéi búguchi le agaraüdübalibu, míchigaba mebereseni tun búguchu danme le taweiyadun.²³Agañeihabei inarüni luma lichú aau, arufudahani luma gunfurandaü, ani malugurabéi!²⁴Agübürigu ha gasaanitiña irahüñü buítiña ani chu ligía hau, garichatiña gúndaañu hamá hau, apantaha hagía hawagu;²⁵adügabá lubeiti lun gúndaañu hamá bagübürigu, apantaha hagíame.

-17-

²⁶Tenibá buidu lun le nariñagubei, niráü, arihabéime nani hénpulu lidan nibagari;²⁷ladüga würi to terencha, to horu, ítara tiña kei aban fusu huliliti ani bürüraü ligia;²⁸sétitu habá wügüriña keisi aban híweruti; aba teferidiraguagüdün saragu wügüriña.

-18-

²⁹Ka asufurirubei? Ka ayahubei? Ka ageindagubei? Ka íbaawagubei mébunouga? Ka dagumebei arihin?³⁰Le mígirunbalin átuni, ani redei ligía oucha sun tuwuyeri diwéin.³¹Mawamadatá diwéin bun. Mama tífunan ámiriha tugía lidan weru! Ma lubuidun tasandirúniwa dan le tatuniwa!³²Gama lumoun lárigiñe, ítara liña tasandirúniwa kei tágürün hewe, ani gáriti.³³Larihagüdübadibu katei terenchati, ladimuregüdübadibu ani saminagüdalábume libidiounigan aau,³⁴basandiraguba bungua kamá baranahañadibu tidan aban ugunei balañu luagu wewe le wéiritimabei tuagu.³⁵Bariñagame: «Buleseiwatina ani masandi numuti; béiwatina, ani mefentina luagu; gama lumoun danme násaarun, nídiyaba áluaha diwéin».

Bible Society of Honduras

https://app.library.bible/content/f187d7f7786a7cd1