Ariñawagúni22
1Buítimati lun ladimurehoun buidu luagu gürigia sügǘ lau gama lan saragu golu luma pülata.2Anihein aban katei genegeguati lidan rísiti luma gudemeti: Biángubei lan hagía ladügün Bungiu.3Ha buídubaña ichügü harihini denchaü hegeyedun luéi; ánhañati ha ibidiouguabaña aau, ñǘdünrügütiña lubaroun ábati hasufuriruni damichi.4Barüti ǘnabuguni luma inebehabu lun Bungiu, irisini, uéiriguni luma ibagari kei afayeiruahaü.5Buin liña hémeri gürigia ha salufuribaña tau sádara; ánhañati ha góunigibalin habagari, geyetiña tuéi.6Arufudahabá buiti lun irahü dan le ñǘraügili; íbini danme le wéiyaali mabulieidun lubéi.7Ha rísibaña, urúeiñanu hadan ha gudemebaña; ánheinti hadan ha adúeihabaña, ha afuredeihabaña.8Ha ábunagutiña wuribani, halubahaba lamiselu; lagünrinchagubaña Bungiu lau ligañi!9Habinirúba ha gudemehabutiña houn hábegu, ladüga hafanreinraguni heigin hama ha gudemebaña.10Houdin ha mabuchahabaña, lagumuchagun gáganiguaü, wuribu luma anabahani.11Gúndaati urúei hau gürigia ha harumabaña anigi, gamadagua ligía lungua hama ha adimurehabaña lau inebesei.12Góunigi lumutiña Bungiu gürigia ha chúbaña aau; ani arufudaléi hayeeni ha yéebaña.13Ha magúalibaña, luéi hawadigimaridun, hariñaga luagu anihein lan aban liñún ǘmada abusenra láfaruniña.14Ítara liña tiyuma würi to agabarahatu túmari kei fusu huliliti le ñeinhin lubéi hábürüha ha líñaragubaña Bungiu.15Libidiounigan aau, ligía aban lídangiñe katei le lídanbei hasaminan nibureingiña, gama lumoun gidati hawéi dan le habeichúniwa.16Ha amudiragutiña gudemetiña lun harisidun o híchugun lan lun rísiti, hagumuchuba lidan gudemei.
Darandi hererun chútiña aau
17Rubei barigei lun baganbuni le hariñagubei ha chúbaña aau; saminabá buidu luagu le narufudahabei bun.18Gúndaabadibu lau bareiduni bichügüwagu luma lun gayara lan báguyuguagüdüni súngubei aban lárigi aban.19Nasubudiragüdüñein bun uguñe, lun bíchuguni bafiñen luagu Bungiu.20Bürühadina darandi ariñawagúni bun le gádanbei eweridihani luma subudi,21lun larufudahan bun lun basubudiruni inarüni, lun gayara lan bíchugun óunabuni buiti lun le álügüdütibu.-1-
22Mamudiraguabáña ha gudemebaña ladüga hagudemen, mámurudunbañame ha siñaguabaña houngua hagibugiñe aguseragüdütiña;23ladüga liábinba Bungiu lun hámagiñe lan, ábame lámuruduniña ha ámurudubaliña.-2-
24Mamadaguabá bungua hama gürigia hanarimetiña ni hama gémutiña,25furendeibiñalin luriban hagaburi, ábameti bíchuguni gúrudu luagun bigiina.-3-
26Manügabá kárugu lau hadúeihan amu gürigia,27ladüga anhein ua buma lun bafayeiruni, íbini bigabanan, tagidarúba buéi.-4-
28Masansirabéi láfadaragun fulasu le harufudubei bagüchagu bun.-5-
29Ha adügütiña hawadigimari buidu, heseriwiduba houn urúeigu, mama houn furumiñeguarügü gürigia.Bible Society of Honduras