Read Ariñawagúni 24

Ariñawagúni24

-19-

¹Magimugarabaña wuribatiña, mayumahabá lun lidan ban aban hama,²ladüga luágurügüñein anarimeni hasaminara, luágurügüñein ladügǘn wuribani hadimureha.

-20-

³Lau lichú aau tábunawagua muna, lau lualin ichügü lichugúa tuágaburi;⁴lau subudi labuinchagüdüwa tirumun lau ílagu gebegiti le buíduburiti.

-21-

⁵Buítimatiña gürigia chútiña aau sügǘ hau gürigia héretiña; buítimati lichú aau sügǘ lau ubafu;⁶ladüga lau aransehani buiti ladügǘwa wuribu, hádanñein saragu eweridihatiña agañeiruni.

-22-

⁷Ha ibidiouguabaña aau, ibidiñeti houn kaba lan hariñaga ligibugiñe aguseragüdüti, ladüga díseti lichú aau hawéi.

-23-

⁸Ha luágurügübei ladügǘn damichi hasaminara, adimurehóuati hawagu ladüga luriban hasaminan.⁹Figóu hasaminanbei ibidiougua tau; úati hínsiñehabuti houn ha wuribabaña ichügü.

-24-

¹⁰Anhein ábürüha barüna dan le lidan ban lénrengunga, lóuguarügü liña bere.

-25-

¹¹Sefubáña ha siádiwaaña lun óunweni; sefubáña ha madiseelibei hounwen lídangiñe denchaü.¹²Ladüga íbini bariñagun luagu ibidiñe lan yebe bun, líchuguba le aguseragüdübalin lébuna katei fe luagu, lasubudirubei le aríagubei bun, le afayeirubalin kada aban según katei le ladügübei.

-26-

¹³Guraba sírudu bímeti le tídangiñeti haban maba, niráü: Houchabéi, ariha báamugei lisemén.¹⁴Ítarameme luba libimen basandiruni lichú aau luma subudi; anhein badarira, buídubei lidin bun, ani meferidirunbei bemenigin.

-27-

¹⁵Maransehabá lagübüri saminaü habá gürigia ha harumabaña, madügün buguyame günringuaü tidan muna to ñein lubéi haganawa,¹⁶ladüga íbini héiguadun sedü wéiyaasu, hásaarayaba sedü wéiyaasu, ánhaña ha salufuribaña hábürühaba lidan günringuaü.

-28-

¹⁷Magundaarabá, mefeduhan buguyame lau léiguadun bágani,¹⁸ladüga mínsiñebei lun Bungiu lun larihini lira, ábameti ladisedun ligañi luéi bágani.

-29-

¹⁹Magañidagüda hamabu ha wuribabaña, magimugarabaña giñe ha salufuribaña,²⁰ladüga wuribabei hagumuchun gürigia ha salufuribaña: Héñeguchuba ha salufuribaña keisi aban lanpu!

-30-

²¹Ruba inebesei lun Bungiu luma lun urúei, niráü, móundaraba hama áganiñu.²²Ladüga madisebei liabin günringuaü hawagun, ani ibidiñewati kaba lan abeichúni líchiga Bungiu luma urúei houn.

Hererun burí ha chúbaña aau

²³Anihán le hererun burí giñe ha chúbaña aau:
Mabuidunti lun ǘnabu lan lanügǘn aban gürigia luéi le aban tidan lúbaanina aguseruni.²⁴Ha agidarutiña hadurun ha gadurunbaña, íñaragua hamutiña gürigia, ani barüwatiña giñe kei ni kata;²⁵ánhaña ha abeichubaliña ha gadurunbaña, buiti lidin houn ani biní hamutiña gürigia.

²⁶Óunabagülei le inarüniti, ligía séinibei le lánina aban umadaguaü le tímatimaati.

²⁷Aransehabei bumarasun ǘmada, adügabéime bidasin bicharirugu, lárigiñeme lira, gayaraahalime bábunagunu buban.

²⁸Madimurehabá wuriba luagu gürigia bíledi marichaga, machoururun buguyame katei le mámabei ligía.

²⁹Masaminarabá bafayeiruni wuribani le ladügübei amu bun, lau badügüni wuribaniméme ligía lun.

³⁰Sügütina licharirugugiñe le magúalibei, luma lubeibein-ágeirugugiñe le lóuguabei gunfuranda lan³¹Le narihubei, aban fulasu buin lau hiiyu, lau layaraawagun le lauti dübü héiguañu.³²Dan narihinbalin katei le, aba nareiduni nichügüwagu; ariha numuti, aba nafurendeiruni katei le:³³Sun abunha lan áriha luma gewenedü, ani cháguabei barüna lun barumuguntima buidu,³⁴liábinba gudemei ábame lageindagun buma keisi aban éibugañahadügüti le gárumateti.

Bible Society of Honduras

https://app.library.bible/content/f187d7f7786a7cd1