1 Lúrudu6
Hani nasaréu füramasei
1Aba líchuguni Wabureme uganu le lun Moisesi lun lariñaguni houn Ísüraelina:2—Anhein adüga aban gürigia füramasei lun lederegeragun lungua lun leseriwidun lun Wabureme,3siñabei latun diwéin ni amu luwuyeri uniñein le achouhaali, ni binigá tauti diwéin o lauti lan uniñein achouhaali, ni tira beibei; siñabei giñe leigin beibei, ni in to gíriboun pasa.4Siñabei latun ni kata le adügǘti lídangiñe beibei laganagua sun lani füramasei.5Siñabei giñe lásaruni lídiburi lidan sun dan ligía, lubaragiñe lira mosu lígiruni darí lachülürün dan lun lásurun lani füramasei luma Wabureme.6Lidan sun dan ligía, siñabei giñe layarafadun lun aban hilaali,7ni íbini anhein ounwe lúguchi, o lúguchu, o líbugaña o lamulen o litu, luéi lerederun wíyeñu, lugundun lunti lerederun deregeguañu lungua lun Wabureme.8Deregeguñu luba lungua lun Wabureme sun dan le ladurarun lani füramasei.9—Anhein ounwe aban gürigia sódini lurugabu, aba lawiyedun lídiburi le buga lederegerubei lun Wabureme ladüga óunweni le yarafa lun, gasu lásaruni lídiburi sedü weyu lárigiñe, lememe weyu le arufudúbei lun larumadun.10Luágume liwidün weyu ábame lanügün bián wagugua o bián lan harahüñü unhun lun fádiri tubenarin kianpu lánina óundaruni.11Ábame ladagaragüdün fádiri aban hádangiñe keisi adagaragüdüni luagu figóu, aban keisi adagaragüdüni gudawarügüti, ábame hadügüni échuni lun libihini ferudun luagu figóu le ladügübei lau laguurun hilaali. Wéyume ligía ábayame lederegeruni lídiburi lun Wabureme,12ábayame lagumeserun ábanya iseri lidaani lederegeragun lungua lun Wabureme. Mabahüdǘnbei le furumiñeti dan, ladüga lawiyedun ídiburi le buga lederegerubei furumiñe. Gasu giñe lanügün aban liraüraü mudún le ábanti irumu lau lun Wabureme keisi adagaragüdüni luagu duru.13—Danme lagumuchun lidaani lederegeragun lungua, ábame lidin tubenarin kianpu lánina óundaruni14adagaragüda aban liraüraü mudún le ábanti irumu lau le úati mégeiti luagu lun Wabureme keisi adagaragüdüni gudawarügüti, aban mudún würi to ábanti irumu tau, to úati, mégeiti tuagu keisi adagaragüdüni luagu figóu, luma aban mudún wügüri le úati mégeiti luagu keisi adagaragüdüni lánina arandaruni.15Gasu giñe ladagaragüdün aban liraüraü faniñe tau fein to tautu fulúaru to buídutimaboun, furidasi to maganatu lébini to añoundawagutu lau garaba; úara luma burí idewesei le fulúaruauti tuma diwéin.16Ábame ladügüni fádiri adagaragüdüni luagu figóu luma adagaragüdüni gudawarügüti ligibugiñe Wabureme,17dagagüda mudún wügüri keisi adagaragüdüni lánina arandaruni, úara luma faniñe fein maganatu lébini, adügaleime idewesei fulúaruauti tuma diwéin.18Ábame lélechuni wügüri le adügübalin füramasei lábulugu tubenari kianpu lánina óundaruni, ábame lanügüni ídiburi le buga lederegerubei lun Wabureme, ábame lachagaruni lidoun watu gemeti le lábugiñebei adagaragüdüni le lánina arandaruni.19Lanügeime fádiri lanagan mudún héfeeli, aban fein to maganatu lébini lídangiñe faniñe tuma aban furidasi maganatu lébini, ábame líchuguni sun le lúhaburugun wügüri ligía, lárigiñe lásaruni lídiburi.20Ábameti ladügüni fádiri igaburi le lánina arufudúni ligibugiñe Wabureme. Laniguagu animaalu le aubei ladügǘwa arufudúni luma liyada le ichugúbei keisi ídemuei lun Wabureme, sagüráuti ani areidúati lun fádiri. Lárigiñeme sun le, gayaraahalime latun wügüri ligía diwéin.21—Ligía lúrudubei lun le adügüti füramasei lun lederegeragun lungua lun Wabureme lun leseriwiduba lan lun, anihán burí giñe idewesei le lunbei ladagaragüdüni lun, bóugudin luéi furumiñeguarügü amu katei le gayaraati líchuguni. Gasu lagunfulirun lau le füramase lubéi keisi labürüdǘniwa lidan burí kesi le.Habinihan fádirigu
22Aba ladimurehan Wabureme lun Moisesi, lariñaga lun:23—Ariñagabá lun Aarón luma houn lirahüñü lun danme lan habiniruniña Ísüraelina, lun ítara lan hadügüni:24«Binilabu Wabureme, góunigi lábume;25gundaalá Wabureme bau, arufudaléime lareini bun;26hínsiñehabula Wabureme bun, ru ligíame darangilaü bun».27—Ítara luba híriduni niri hawagu Ísüraelina, ábame nabiniruniña.Bible Society of Honduras