1 Lúrudu7
Idewesei lun tederegerún sanduariu
1Weyu le lagumuchunbei ladügünu Moisesi sanduariu, aba lederegerunu lau garaba úara luma sun ílagu le ayusurúbei tidan luma le ayusurúbei luagu latarü.2Lárigiñe aba houdin hábutigu türibu, hama ha ídehabaña lidan habahüdün gürigia.3Aba híchugun keisi idewesei lun Wabureme sisi kareta daruguatu hama duusu bulu bágasu, aban kareta hawagu kada bián ábutigu luma aban bágasu luagu kada aban. Aba híchuguni sun katei le tigibugiñe sanduariu.4Ábati lariñagun Wabureme lun Moisesi:5—Resibibóun kareta hama bulu bágasu hámagiñe, bíchigañame houn Lewitagu lun hayusuruniña lidan wadagimanu le tánina kianpu lánina óundaruni, según wadagimanu le lunbei ladügüni kada aban.6Aba leresibirunu Moisesi kareta hama bágasu, aba lafanreinhaniña hadan Lewitagu.7Ruti bián kareta hama gádürü bágasu houn ladügawagun Gerüsón, ha hemegeirubaña lun hawadigimari.8Houn ladügawagun Merarí, ruti gádürü kareta hama widü bágasu lun hadügüni hawadigimari lábugiñe laríaahan Itamárü le liráü fádiri Aarón.9Ánheinti houn ladügawagun Keatü, michugúntu kareta ni bágasu, lugundun sun katei sagüráuti le lunbei hanügüni gasu hégewaguba lan hanügei.10Dan le lederegerúnbei latarü aba hanügüni hábutigu türibu hadewese, aba híchuguni ligibugiñe latarü.11Ábati ladimurehan Wabureme lun Moisesi, lariñaga lun:—Ámuba hábuti türibu anügei lidewese sagü weyu lun lederegerun latarü.12Furumiñeti weyu aba lanügüni Naasón le liráü Aminadábü lidewese, lídangiñe lani Hudá türibu.13Aban boulu lautu pülata lideweseboun, milu-gádürü-san-darandi güramu tihürü, luma aban óunwenbu kopu lauti pülata sedü-san-ǘrüwa-wein-diisi güramu lihürü según tubalansun sanduariu, biángubei buin tau fulúaru to buídutimaboun añoundawagutu lau garaba keisi idewesei fulúaruauti;14luma aban guliyeru golu le hǘrüti san-diisi güramu buin lau kupali;15aban bágasu ñǘraügili, aban mudún wéiriyaali lúmaya aban le ábanti irumu lau lun ladagaragüdüni keisi adagaragüdüni gudawarügüti,16aban liraüraü gábara lun adagaragüdüni luagu figóu,17bián bágasu wügüriña, seingü mudún wéinamuhaña, seingü harahüñü gábara hama seingü harahüñü mudún ha ábanti irumu hau lun adagaragüdüni lánina arandaruni. Ligía lidewesebei Naasón le liráü Aminadábü.18Libiaman weyu aba lanügüni Natanaéli le liráü Suarü lidewese, le hábuti lani Isakárü türibu,19ani idewesei le líchugubei libeméme le híchugubei ha lubaabaña.24Lǘrüwan weyu aba lanügüni Eliabü le liráü Elón, le hábuti lani Sabulón türibu.25Ani idewesei le líchugubei libeméme le híchugubei ha lubaabaña.30Ligadürün weyu aba líchuguni Elisúru le liráü Sedeuru le hábuti lani Rubén türibu lidewese,31lememe giñe híchugubei ha lubaragiñebaña, ligía giñe líchugubei.36Liseingün weyu aba líchuguni Selumiéli le liráü Surisadái, le hábuti lani Simeón türibu lidewese,37ani lememe giñe híchugubei ha lubaragiñebaña, ligía giñe líchugubei.42Lisisin weyu aba líchuguni Eliasáfü le liráü Reueli le hábuti lani Gadü türibu lidewese,43ani idewesei le líchugubei libeméme le híchugubei ha lubaabaña.48Lisedün weyu aba líchuguni Elisamá le liráü Amiudu, le hábuti lani Éfürain türibu lidewese,49ani idewesei le líchugubei libeméme le híchugubei ha lubaabaña.54Liwidün weyu aba líchuguni Gamalieli le liráü Pedasúru, le hábuti lani Manasési türibu lidewese,55ani idewesei le líchugubei libeméme le híchugubei ha lubaabaña.60Linefun weyu aba líchuguni Abidán le liráü Gidoní, le hábuti lani Benhamín türibu lidewese,61ani idewesei le líchugubei libeméme le híchugubei ha lubaabaña.66Lidiisin weyu aba líchuguni Aieserü le liráü Amisadái, le hábuti lani Dan türibu, lidewese,67ani idewesei le líchugubei libeméme le híchugubei ha lubaabaña.72Liunsun weyu aba líchuguni Pagieli le liráü Okürán, le hábuti lani Aserü türibu lidewese,73ani idewesei le líchugubei libeméme le híchugubei ha lubaabaña.78Liduusun weyu aba líchuguni Airá le liráü Enán, le hábuti lani Nefütalí türibu lidewese,79ani idewesei le líchugubei libeméme le híchugubei ha lubaabaña.84Ítara liña lubeiti lídanbei le lederegerúnwabei latarü lun Wabureme, rútiña hábutigu lani Ísüraeli türibu duusu boulu to lautu pülata, duusu kopu wéinamuti le lauti pülata luma duusu guliyeru wéinamuti le lauti golu.85Milu-gádürü-san-darandi güramu tihürü kada boulu to lautu pülata, sedü-san-ǘrüwa-wein-diisi güramu kada kopu. Wein-sisi-milu-gádürü-san güramu lihürü pülata le tubuñe sun boulu luma sun kopu ligía, según habalansun tábutigu sanduariu.86Ñeinñein giñe duusu guliyeru wéinamuti lauti golu buin lau kupali, san-diisi güramu lihürü kada aban. Según habalansun tábutigu sanduariu. Milu-ǘrüwa-san-wein güramu lihürü golu le lubuñena sun guliyeru.87Hadan sun animaalugu ha ichugúbaña lun adagaragüdüni gudawarügüti dúusuñanu bágasu ñǘbürigiña ha wügüriña, duusu mudún wéinamuhaña, duusu harahüñü mudún ha ábanti irumu hau lau hadewese fulúaruauti hama duusu gábara lun adagaragüdüni luagu figóu.88Hadan sun animaalugu ha ichugúbaña lun adagaragüdüni le lánina arandaruni, wein-gádürü bágasu ñǘbürigiña ha wügüriña, ǘrüwa-wein gábara ñǘbürigiña, ǘrüwa-wein mudún wéinamuhaña hama ǘrüwa-wein mudún ha ábanti irumu hau. Hagía sun animaalugu ha ideweseibaña dan le lanuadirún latarü lárigiñe lederegerúniwa lun Wabureme.89Dan lebelurunbei Moisesi tidoun kianpu lánina óundaruni lun ladimurehan luma Wabureme, aba laganbun ladimurehan Wabureme lun tigibuagugiñe tidáü lubagüsina daradu habadinaguagiñe bián kátaña garünatiña.
Bible Society of Honduras