1 Lúrudu5
Háfuridagüdüniwa ha wíyebaña ligibugiñe Bungiu
1Aba líchuguni Wabureme uganu le lun Moisesi lun lariñaguni houn Ísüraelina:2—Sagá humaña sun ha gawagutiña lépüra tídangiñe kianpu-agei, o ha lan gasanditiña ésedügüni, o ha lan wíyetiña lárigi haguurun hilaali.3Lun hasagaruniña bóugudin tuéi kianpu-agei, wügüriña yebe, würiña yebe. Ítara luba mawiyedun hamanu kianpu-agei, to ñein lubéi naganawa haganagua.4Aba hadügüni Ísüraelina le lubeibei Wabureme lun Moisesi, aba hasagaruniña gürigia hagía tídangiñe kianpu-agei.Afayeirúni luagu wuribati
5Aba ladimurehan Wabureme lun Moisesi, lariñaga lun:6—Ariñagabéi katei le houn Ísüraelina: Dan le magunfulirun lan aban wügüri o aban lan würi luma Wabureme, aba hadügün wuribati lun somu gürigia lau lira hadügüña figóu,7ani mosu hasubudiruni luagu afigouhaaña lan. Gasu giñe lafayeiruni lebegi damichi le ladügübei ani rúraüya ligíame wein lídangiñe san ligibuagun lun gürigia le unbei ladügǘwa damichi.8Anhein hilá lubéi gürigia le unbei ladügǘwa damichi ligía, ani maduheñuti ha úntiña gayara lan lichugún fáyeiti, ábame lerederun lun Wabureme lun lufulesein fádiri, lumoun mudún le lunbei ladagaragüdüni fádiri lun libihini ferudun luagu lifigoun gürigia ligía.9—Sun ídehani luma idewesei le hederegerun Ísüraelina lun Wabureme, le hanügün ligibugiñoun fádiri, lánibei fádiri.10Sun le anügǘti ligibugiñoun fádiri lun lederegerun lun Wabureme, lánibei giñe fádiri.Lúrudu lidan ñein lan emeidini
11Aba ladimurehan Wabureme lun Moisesi, lariñaga lun:12—Ariñagabéi katei le houn Ísüraelina: Lun hamuga magunfulirun tan aban würi luma túmari,13aba tarounrun luma amu wügüri ibidiñounga lun túmari, ani íbini adüga tani iwiyei ligía gama lumoun aba lerederun katei ligía mafunrangunga ladüga machoururuniwa lan ani madarirawaguntu luma amu wügüri.14Lidan kesi ligía, gayaraati hamuga lemeidihan wügüri tau lúmari. Gama lumoun gayaraati hamuga giñe lasuseredun lun lemeidihan wügüri tau lúmari íbini madurun tan.15Lidan biángubei kesi le, ábame lanügünu wügüri lúmari ligibugiñoun fádiri, ábame líchugun gádürü líburu fulúaru lautu sebada keisi idewesei tuagu, gama lumoun máwiyurunbei garaba ni kupali tuagun fulúaru, ladüga aban lan idewesei luagu emeidini lira, aban idewesei lun lafuranguagüdüniwa aban figóu.16—Ábame lanügünu fádiri würi tuguya lurugabun, ábame líchugunu ligibugiñe Wabureme.17Lárigiñe ábame lanügün murusun dibinísi lidan aban ágeidinaü le lauti múa, ábame lamigisiruni lau murusun kaliki le turageirugugiñeti sanduariu.18Ábame lararamagüdünu würi tuguya ligibugiñe Wabureme, ábame lafaragaduni tídiburi, ábame líchuguni idewesei luagu emeidini, túhaburugun lun lafunranwaguagüdün figóu ligía, ábame lanügüni duna gífiti le anügübei íñarawaguni lúhaburugu.19Ábameti láfiñuragüdünu würi tuguya, lariñagame tun: Anhein marounrungidibu lubéi luma amu wügüri luéi búmari, ani gúnfuli buguya luma búmari, madügün buguya ni kata le lunti lawiyedagüdünibu luma amu wügüri, masuseredalá ni kata bun danme bátuni duna gífiti le, le anügübei íñarawaguni,20gama lumoun anhein magunfulirun bubéi luma búmari, anhein róunhadibu lubéi luma amu wügüri ani adüga buguya aban katei le lunti lawiyedagüdünibu;21adügalábu Wabureme hénpulume lánina íñarawaguni hagibugiñe gürigia, lúgüdalounme bagei, ábame bagüriagun.22Ligíaba abeichúni bibiha danme bátuni duna le, le anügübei íñarawaguni. Ábame tóunabun würi tuguya, tariñagame: Ítarala.23—Ábameti labürüdüni fádiri íñarawaguni le, ábame lachibuni lau duna le gífibei.24Lárigiñe ábame látagüdüni duna ligía tun würi tuguya lun lagifidagüdüni turageirugu,25ábame leresibiruni idewesei luéigiñe emeidini túhaburugugiñe lun ladagaragüdüni ligibugiñe Wabureme lárigiñe ábame líchuguni idewesei ligibuagu latarü,26lárigiñe ábame lanügün murusun lídangiñe idewesei fulúaruauti le ñéingiñe lubéi tasagarúa fulúaru ábame láguduni luagu latarü keisi idewesei lánina aritaguni.—Lárigiñeme látagüdüni fádiri duna gífiti tun würi tuguya,27anhein magunfulirun tubéi lun túmari, lagifidagüdübei duna le anügübei íñarawaguni turageirugu, ábame láludagüdüni turagei ábame tagüriaagun, ábame terederun würi tuguya kei hénpulu lánina íñarawaguni hadan gürigia.28Gama lumoun anhein madurun tubéi, masuseredunbei ni kata tun ani gayaraabei garahüñü tan.29—Anihán lúrudubei lun burí kesi dan le magunfulirun tan würi lun túmari, ani aba lemeidihan,30o dánrügü lan lemeidihan wügüri tau lúmari. Gasu lanügünu wügüri ligía lúmari ligibugiñoun Wabureme, ábame ladügüni fádiri le lariñagubei lúrudu le tau.31Manügǘnbei úmari keisi gadurunti, gama lumoun anhein gadurun tubéi würi, tasufurirubei abeichúni le.
Bible Society of Honduras