Isaíasi3
Labeichún Hudá luma Herusalén
1Ariha humá! Lagidarubaña Wabureme sun hawuyeri íchaahatiña éigini Herusaléngiñe luma Hudá úaarume ni fein, ni íbini duna.2Lagidarubaña ha ganigibaña, wuriburuguna, aguseragüdütiña, profetagu, gabiñegutiña, ábutigu,3úfisigu, wéirigutiña, eweridihatiña, gadiñetiña hama gayanuhaditiña.4Ábame líchugun nibureingiña ábutigume; irahüñüba agumadiraña.5Hanarimenóugabei fulasurugu íbinime umadagu hageindaguba hámagua, hiñuraguba nibureingiña houngua hawagun wéiyaaña mutu, iñuragua hagíame ha meberesenwabei hau hawagun gürigia ha wéirigubaña.6Lariñaguba aban íbiri lun aban líbiri lúbiñe háguchi: «Buguya, anuheinraü daüguaü buma lun badaürünu, buguyalá wábuti, agumadihabá lidan fulasu günringuaali le».7Lóunabeime le aban, lariñagame lun: «Au siñati nagaranihan lun wuribani le, úati éigini numa núbiñe, ua daüguaü numa lun nadaürünu. Míchiga humana lábutime fulasu».8Inarüni, lagünrichawagua Herusalén, leredera Hudá málouga, lagumuchaguba ladüga ariñawagúati adügǘwa ligía burí katei ñein le magundanti Wabureme lau, katei le burí anabaguti luéirigun Wabungiute.9Hagía guánarügü arufuda hamuti hadurun lau hóuserun; maramudun hamuti hafigoun; arufuda hamuti lun sun ubóu kei Sodoma. Fugiabugu hagía, ladüga hagía guánarügü aranseha hamuti habeichún!10Fuleseiwatiña gürigia ha richaguabaña, ladüga buídubei lidin houn ani gúndaabaña lau le hadügübei.11Fugiabugu ha wuribabaña, ladüga wuribabei lidin houn! Lafayeiragüdübaña Wabungiute luagu le hadügübei.12Aban nibureingili, ligía ábutibei lau erei hadan nánigu; háhaburuguñein würiña gumadi, numutuniña, heyeeduñadün ha agumadirubalün, wuribati üma le ñéingiñe lubéi hanügaün.13Aransehali Wabureme lun laguseragüdün, aranseli lun laguseragüdüniña lumutuniña.14Lagúaruba Wabureme aban guséi, lariñagame houn wéiyaaña mutu luma houn lábutigu fulasu: Huguya, hagünrinchaguáñahañoun ninadürigu beibei, íweruhaadün hawéi gudemetiña, aba hareiduni le híweruhabei húbiñe.15Kati uagu hasufuriragüdaña numutuniña, dügügua huméi haricha gudemetiña? Au le Aburemei ariñagubalin.Habeichún würiña Herusalénna
16Lariñahare giñe Wabureme: «Würiña ha lílana Sión, ha pántabaña, ha éibugubaña lau hachügü iñurañu, aríagueina lau pantaü, areincheina hagía lau luenden hagudi,17nígirubaña mádiburiga ladüga lisandi lura hachügü, ábame narufuduni hágubu surusu».18Lídanme weyu ligía, lagidarubei Wabureme sun uéndeni le hayusurubei würiña; luagu hagudi, hachügü luma luagu hagiina:19arigeilaü, bángüli tuma belu,20liribante ichügü, iñari lánina ugudi, béliti, lirahüñü lagei ibiñein, lúyawa uraü,21bagü, luenden ígiri,22dúnigu buíduburitu, manda, idáü tuma burí posu,23isubusei, gamisa fínutu, búnedu, musue.24Ínginiba eredera leweñegua ibiñein; gúrudu leweñegua béliti; ábulugu heluti leweñegua aruraguni wéndeguti; gamisa súsutu teweñegua dúnigu fínutu; lumakün gürabu süti leweñegua magadiñein.25Hábürühaba buwügüriñanigu wuriburugu, hóunweguba bánigu wuriburuguna lidan wuribu.26Hayahuahaba lílana uburugu, ábame hamuiserun, eredereina ligíame uburugu málouga.Bible Society of Honduras